‘ಕ್ರಾಸ್ಫಿಟ್ 9ಒನ್’ (CrossFit 9one) ವತಿಯಿಂದ ಆಯೋಜಿಸಿದ್ದ ವಾರ್ಷಿಕ 24 ಗಂಟೆಗಳ ರೋಯಿಂಗ್ ಚಾಲೆಂಜ್ನಲ್ಲಿ 100ಕ್ಕೂ ಹೆಚ್ಚು ಕ್ರೀಡಾಪಟುಗಳು, ಉದ್ಯಮಿಗಳು, ಕೋಚ್ಗಳು ಮತ್ತು ಫಿಟ್ನೆಸ್ ಉತ್ಸಾಹಿಗಳು ಸಕ್ರಿಯವಾಗಿ ಭಾಗವಹಿಸಿದರು.
ಆಗಸ್ಟ್ 16ರಂದು ಆರಂಭಗೊಂಡ ಈ ಸವಾಲಿನಲ್ಲಿ ಒಲಿಂಪಿಯನ್ಗಳು, ಐರನ್ಮ್ಯಾನ್ ಅಥ್ಲೀಟ್ಗಳು, HYROX ಸ್ಪರ್ಧಿಗಳು ಮತ್ತು ಉದ್ಯಮ ಕ್ಷೇತ್ರದ ಪ್ರಮುಖರು ಪಾಲ್ಗೊಂಡು ಸಮಾಜಮುಖಿ ಕಾರ್ಯಗಳಿಗೆ ನಿಧಿ ಸಂಗ್ರಹಿಸಿದರು.
ಈ ವರ್ಷದ ಕಾರ್ಯಕ್ರಮದಲ್ಲಿ ಒಲಿಂಪಿಯನ್ ನಿಶಾ ಮಿಲ್ಲೆಟ್, ಐರನ್ಮ್ಯಾನ್ ವರ್ಲ್ಡ್ ಚಾಂಪಿಯನ್ಶಿಪ್ ಕ್ವಾಲಿಫೈಯರ್ ಸಾಗರ್, HYROX ಬ್ರಾಂಡ್ ಅಂಬಾಸಿಡರ್ ಹಾಗೂ ಅಥ್ಲೀಟ್ ಮಿತಾ ಪಟ್ನಾಯಕ್ ಮತ್ತು HYROX ವರ್ಲ್ಡ್ ಚಾಂಪಿಯನ್ಶಿಪ್ ಕ್ವಾಲಿಫೈಯರ್ ಅಂಕಿತ್ ಕಟಾರಿಯಾ ಸೇರಿದಂತೆ ಹಲವು ಗಣ್ಯರು ಭಾಗವಹಿಸಿದ್ದರು. ಇವರೊಂದಿಗೆ ವಿವಿಧ ಕಂಪನಿಗಳ ಸಿಇಒಗಳು, ಸಿಎಫ್ಒಗಳು, ಉದ್ಯಮಿಗಳು, ವೃತ್ತಿಪರರು, ಕೋಚ್ಗಳು ಹಾಗೂ ‘ಕ್ರಾಸ್ಫಿಟ್ 9ಒನ್’ ಸಮುದಾಯದ ಸದಸ್ಯರು ಕೈಜೋಡಿಸಿದರು.
ಚಾಲೆಂಜ್ನಲ್ಲಿ ಒಟ್ಟು 10 ರೋಯಿಂಗ್ ಯಂತ್ರಗಳನ್ನು ಬಳಸಲಾಗಿದ್ದು, ಇವುಗಳಲ್ಲಿ 8 ಯಂತ್ರಗಳನ್ನು 24 ಗಂಟೆಗಳ ಕಾಲ ನಿರಂತರವಾಗಿ ಪಾಳಿಗಳಲ್ಲಿ ಬಳಸಲಾಯಿತು. ಉಳಿದ 2 ಯಂತ್ರಗಳನ್ನು ಸಾರ್ವಜನಿಕರು ಹಾಗೂ ಸಮುದಾಯದ ಸದಸ್ಯರಿಗಾಗಿ ಮುಕ್ತವಾಗಿರಿಸಲಾಗಿತ್ತು. ಆಸಕ್ತರು ಕೇವಲ ಐದು ನಿಮಿಷಗಳಿಂದ ಹಿಡಿದು ತಮ್ಮ ಅನುಕೂಲಕ್ಕೆ ತಕ್ಕಂತೆ ಹೆಚ್ಚಿನ ಸಮಯದವರೆಗೆ ರೋಯಿಂಗ್ ಮಾಡುವ ಅವಕಾಶ ಪಡೆದರು.
ಈ ಚಾರಿಟಿ ರೋಯಿಂಗ್ ಚಾಲೆಂಜ್ ಮೊದಲ ವರ್ಷ ₹1.5 ಲಕ್ಷ, ಎರಡನೇ ವರ್ಷ ₹2.5 ಲಕ್ಷ ಸಂಗ್ರಹಿಸಲಾಗಿತ್ತು. ಈ ಬಾರಿ ₹3 ಲಕ್ಷ ಸಂಗ್ರಹಿಸುವ ಗುರಿ ಹೊಂದಿದ್ದು, ‘ಕ್ರಾಸ್ಫಿಟ್ 9ಒನ್’ ಸದಸ್ಯರು ಸ್ವತಃ ಕೊಡುಗೆ ನೀಡುವುದರ ಜೊತೆಗೆ ತಮ್ಮ ಸ್ನೇಹಿತರು ಮತ್ತು ವೈಯಕ್ತಿಕ ಸಂಪರ್ಕ ಜಾಲದ ಮೂಲಕವೂ ನಿಧಿ ಸಂಗ್ರಹಿಸಿದರು.
ಹೀಗೆ ಸಂಗ್ರಹವಾಗುವ ಹಣವನ್ನು ಇಂದಿರಾನಗರದ ಜ್ಞಾನ ಮಂದಿರ, ಬಡ ಹೆಣ್ಣುಮಕ್ಕಳಿಗೆ ಬೆಂಬಲ ನೀಡುವ ಸಂಸ್ಥೆ, ದೃಷ್ಟಿದೋಷ ಹೊಂದಿರುವ ಮಕ್ಕಳ ಶಾಲೆ ಸೇರಿದಂತೆ ಅಗತ್ಯವಿರುವ ಸ್ಥಳೀಯ ಸಮುದಾಯಗಳಿಗಾಗಿ ಕಾರ್ಯನಿರ್ವಹಿಸುವ ವಿವಿಧ ಸಂಸ್ಥೆಗಳಿಗೆ ವಿತರಿಸಲಾಗುತ್ತದೆ. ಹಿಂದಿನ ವರ್ಷಗಳಲ್ಲಿ ಬಡ ಮಕ್ಕಳು ಮತ್ತು ಹೆಣ್ಣುಮಕ್ಕಳಿಗಾಗಿ ಕೆಲಸ ಮಾಡುವ ಸಂಸ್ಥೆಗಳು ಹಾಗೂ ಅಸ್ಸಾಂ ಪ್ರವಾಹ ಪರಿಹಾರ ಕಾರ್ಯಗಳು ಸೇರಿದಂತೆ ಹಲವು ಸಮಾಜಮುಖಿ ಕಾರ್ಯಗಳಿಗೆ ನೆರವು ನೀಡಲಾಗಿದೆ.
