ಪ್ರತಿ ದಿನ ಮುಂಜಾನೆ 1 ಲೋಟ ಬಿಸಿ ನೀರಿಗೆ ತುಸು ಜೇನುತುಪ್ಪ ಬೆರೆಸಿ, ನಿಂಬೆಹಣ್ಣು ಹಿಂಡಿಕೊಳ್ಳುವುದರಿಂದ ಆರೋಗ್ಯಕ್ಕೆ ಎಷ್ಟು ಲಾಭಕರ ಎಂದು ಗೊತ್ತೇ ಇದೆ. ಇದು ನಮ್ಮ ದೇಹದ ತೂಕ ಕರಗಿಸುವುದಲ್ಲದೆ, ಈ ಬಿರು ಬಿಸಿಲಿನ ದಿನಗಳನ್ನು ಉತ್ಸಾಹದಿಂದ ಎದುರಿಸಲು ಹೊಸ ಲವಲವಿಕೆ ತುಂಬಿಕೊಡುತ್ತದೆ. ಇಲ್ಲಿವೆ ಅದರ ನಾನಾ ಪ್ರಯೋಜನಗಳು.
ಮಲಬದ್ಧತೆ ಓಡಿಸುತ್ತದೆ : ಈ ಮಿಶ್ರಣ ನಿಮ್ಮ ಮಲಬದ್ಧತೆಯ ಸಮಸ್ಯೆಗೆ ರಾಮಬಾಣವಾಗಿದೆ. ಇದು ನಿಮ್ಮ ಆಂತರಿಕ ಮಲಿನತೆಗಳನ್ನು ಶುದ್ಧಗೊಳಿಸಿ ಮಲವಿಸರ್ಜನೆಗೆ ಸಹಕರಿಸುತ್ತದೆ. ಇದು ಕರುಳಿನ ಹಾರ್ಮೋನುಗಳ ಸ್ರವಿಸುವಿಕೆಗೆ ಸಹಕರಿಸಿ, ಹೈಡ್ರೇಷನ್‌ಗೆ ಒತ್ತುಕೊಡುತ್ತದೆ. ಒಣಗಿದ ಮಲಕ್ಕೆ ತೇವಾಂಶ ತುಂಬಿ ಹೊರದಬ್ಬುತ್ತದೆ. ಒಟ್ಟಾರೆ ಮಲಬದ್ಧತೆಯ ಸಮಸ್ಯೆಗೆ ಇದು ಸುಲಭದ ಮನೆಮದ್ದು.
ಪಚನಕ್ರಿಯೆ ಸುಧಾರಿಸುತ್ತದೆ : ನಿಂಬೆ, ಜೇನು, ಬಿಸಿನೀರಿನ ಮಿಶ್ರಣ ನಿಮ್ಮ ಪಚನಕ್ರಿಯೆಗೆ ಬಲು ಸಹಕಾರಿ. ನಿಮ್ಮ ಜೀರ್ಣಶಕ್ತಿಗೆ ಇನ್‌ಸ್ಟೆಂಟ್‌ ಬೂಸ್ಟರ್ ಆಗಿದೆ. ನಿಂಬೆ ನಮ್ಮ ಲಿವರ್‌ನ್ನು ಹೆಚ್ಚು ಬೈಲ್ ಜೂಸ್‌ ಸುರಿಸುವಂತೆ ಮಾಡುವುದಲ್ಲದೆ, ಜೀರ್ಣಾಂಗ ವ್ಯೂಹಕ್ಕೆ ಅನಗತ್ಯ ವಿಷಮಯ ಪದಾರ್ಥ ತೆಗೆದುಹಾಕಲು, ತನ್ನ ಆಮ್ಲೀಯ ಗುಣದಿಂದ ಧಾರಾಳ ಸಹಾಯ ನೀಡುತ್ತದೆ. ಜೇನು ಆ್ಯಂಟಿ ಬ್ಯಾಕ್ಟೀರಿಯಲ್ ಆಗಿ ಕೆಲಸ ಮಾಡಿ, ಜೀರ್ಣಾಂಗಗಳ ಸೋಂಕು ನಿವಾರಿಸುತ್ತದೆ. ಜೊತೆಗೆ ಜೀರ್ಣಕ್ರಿಯೆಗೆ ಬೇಕಾಗುವ ರಸಗಳನ್ನು ಸ್ರವಿಸಲು ನೆರವಾಗಿ, ವಿಷಾಣುಗಳನ್ನು ನಿವಾರಿಸುತ್ತದೆ.
ಜಠರ ಶುದ್ಧೀಕರಣ ಹಾಗೂ ದೊಡ್ಡ ಕರುಳಿನ ಕ್ರಿಯಾಶೀಲತೆ : ಆಯುರ್ವೇದದ ಪ್ರಕಾರ, ನಮ್ಮ ಹೊಟ್ಟೆಯಲ್ಲಿ `ಆಮ’ ಅಥವಾ ವಿಷಮಯ ಪದಾರ್ಥ ಸಂಗ್ರಹಗೊಳ್ಳುತ್ತದೆ. ಅದರಲ್ಲಿ ಅಜೀರ್ಣಗೊಂಡ ಆಹಾರ, ಕರುಳಿನ ಮೃತಕೋಶಗಳು, ಡೆಡ್‌ ಬ್ಯಾಕ್ಟೀರಿಯಾ ಇತ್ಯಾದಿಗಳು ಪದರಗಟ್ಟಿ ಜೀರ್ಣ ವ್ಯವಸ್ಥೆಗೆ ಅಡ್ಡಿಪಡಿಸುತ್ತವೆ. ಇದು ಹಲವು ರೋಗಗಳಿಗೆ ಮೂಲ. ನಿಂಬೆ, ಜೇನಿನ ಬಿಸಿನೀರು ಮಿಶ್ರಣದಿಂದ ದೊಡ್ಡ ಕರುಳಿನ ಆಂತರಿಕ ಭಾಗಗಳು ಪ್ರಭಾವಿತಗೊಂಡು ಈ `ಆಮ’ದ ನಿವಾರಣೆಗೆ ದಾರಿಯಾಗುತ್ತದೆ. ಸುಲಭದ ಮಾತುಗಳಲ್ಲಿ ಹೇಳಬೇಕೆಂದರೆ, ಈ ಮಿಶ್ರಣ ನಮ್ಮ ಜಠರ, ಕರುಳಿನ ಒಳ ಭಾಗಗಳನ್ನು ಚೆನ್ನಾಗಿ ಶುದ್ಧೀಕರಿಸಿ ಜೀರ್ಣಕ್ರಿಯೆ ಸಲೀಸಾಗುವಂತೆ ಮಾಡುತ್ತದೆ. ಆಗ ದೇಹದ ವಿಷಮಯ ಪದಾರ್ಥ ಹೊರಹೋಗಲು, ಪೌಷ್ಟಿಕಾಂಶಗಳನ್ನು ಹೀರಿಕೊಳ್ಳಲು, ಹೈಡ್ರೇಟೆಡ್‌ ಆಗಿರಲು ನೆರವು ಸಿಗುತ್ತದೆ. ಅದನ್ನು ನಿರ್ಲಕ್ಷಿಸಿದರೆ ಹೊಟ್ಟೆ ಉಬ್ಬರಿಸಿಕೊಂಡು ಇನ್ನಿಲ್ಲದ ತೊಂದರೆಗೆ ದಾರಿಯಾಗುತ್ತದೆ.
ದುಗ್ಧನಾಳ ವ್ಯವಸ್ಥೆಯ ಶುದ್ಧೀಕರಣ : ನಮ್ಮ ಆಂತರಿಕ ದುಗ್ಧನಾಳ ವ್ಯವಸ್ಥೆ ನಿರ್ಜಲೀಕರಣಗೊಂಡಾಗ ಅದು ಹಲವು ರೋಗಗಳಿಗೆ ನಾಂದಿಯಾಗುತ್ತದೆ. ಅಗತ್ಯ ರಸಗಳ ಹಾಗೂ ನೀರಿನ ಕೊರತೆಯುಂಟಾದಾಗ ಈ ವ್ಯವಸ್ಥೆಯಲ್ಲಿ ಅಸಮತೋಲನ ಉಂಟಾಗಿ, ಅದು ಮಲಬದ್ಧತೆಗೆ ತಿರುಗುತ್ತದೆ. ಜೊತೆಗೆ ಅನಿದ್ರೆ, ಹೈ ಬಿ.ಪಿ., ತೀವ್ರ ಮಾನಸಿಕ ಒತ್ತಡ ಇತ್ಯಾದಿ ಕಾಡುತ್ತವೆ. ನಿಂಬೆ ಜೇನಿನ ಈ ಮಿಶ್ರಣ ಸೇವಿಸುವುದರಿಂದ, ಈ ಇಡೀ ವ್ಯವಸ್ಥೆ ಹೈಡ್ರೇಟ್‌ಗೊಂಡು ಮೇಲಿನ ಎಲ್ಲಾ ಸಮಸ್ಯೆಗಳನ್ನೂ ನಿವಾರಿಸುವುದಲ್ಲದೆ, ನಿಮ್ಮ ಇಮ್ಯುನಿಟಿಯನ್ನೂ ಸುಧಾರಿಸುತ್ತದೆ.
ಇನ್‌ಸ್ಟೆಂಟ್‌ ಶಕ್ತಿವರ್ಧಕ ಬೂಸ್ಟರ್ : ಬಹಳ ಸುಸ್ತು, ಏನೂ ಮಾಡಲಾಗುತ್ತಿಲ್ಲ ಅನಿಸುತ್ತಿದೆಯೇ? ಈ ಮಿಶ್ರಣ ನಿಮಗೆ ಬಲು ಸೂಕ್ತ. ಇಲ್ಲಿನ ಜೇನು ಇನ್‌ಸ್ಟೆಂಟ್‌ ಶಕ್ತಿವರ್ಧಕ ಬೂಸ್ಟರ್ ಆಗಿ ಕೆಲಸ ಮಾಡುತ್ತದೆ. ಮೈಂಡ್‌ ಕ್ಲಿಯರ್‌ ಆಗಲು ನೀರು ಸಹಕರಿಸುತ್ತದೆ. ಮೆದುಳಿಗೆ ತಾಜಾ ರಕ್ತದ ರವಾನೆಯಾಗುತ್ತದೆ. ನಿಂಬೆ ಹೊಟ್ಟೆಯಲ್ಲಿನ ಕಿಣ್ವಗಳನ್ನು ಚುರುಕುಗೊಳಿಸಿ, ಆಹಾರ ಪಚನಕ್ಕೆ ಪೂರಕವಾಗುವಂತೆ ಮಾಡುತ್ತದೆ. ಜೊತೆಗೆ ನಿಂಬೆಯ ಸುವಾಸನೆ ಮೂಡ್‌ ಫ್ರೆಶ್‌ ಆಗಲು ಸಹಕಾರಿ.
ಮೂತ್ರಕೋಶದ ಶುದ್ಧೀಕರಣ : ಜೇನು ಒಂದು ಸಶಕ್ತ ಆ್ಯಂಟಿ ಬ್ಯಾಕ್ಟೀರಿಯಲ್ ಏಜೆಂಟ್‌ ಆಗಿದ್ದು, ಯಾವುದೇ ಬಗೆಯ ಸೋಂಕನ್ನೂ ನಿವಾರಿಸಬಲ್ಲದು. ನಿಂಬೆ ಮತ್ತು ಬಿಸಿ ನೀರಿನ ಜೊತೆ ಬೆರೆತು, ಡೈಯೂರೆಟಿಕ್ಸ್, (ದೇಹದ ಆಂತರಿಕ ಭಾಗವನ್ನು ನೀರಿನಿಂದ ಶುದ್ಧೀಕರಿಸುವ ಏಜೆಂಟ್ಸ್) ಆಗಿ ಪರಿಪೂರ್ಣವಾಗಿ ಕ್ಲೆನ್ಸಿಂಗ್‌ ಕೆಲಸ ಮಾಡುತ್ತದೆ. ಸತತ (ಯೂರಿನರಿ ಟ್ರಾಕ್ಟ್ ಇನ್‌ಫೆಕ್ಷನ್‌) ತೊಂದರೆಗೆ ಸಿಲುಕುವ ಮಹಿಳೆಯರು, ಇದನ್ನು ಬಿಡದೆ ಬಳಸುವುದು ಲೇಸು.
ಚರ್ಮ ತಿಳಿಯಾಗಲು : ಚರ್ಮಕ್ಕೆ ನಿಂಬೆಯಿಂದ ದೊರಕು ಲಾಭಗಳು ಹಲವು. ಅದರ ಕ್ಲೆನ್ಸಿಂಗ್‌ ಚಟುವಟಿಕೆಗಳು ರಕ್ತವನ್ನು ಶುದ್ಧೀಕರಿಸುವಲ್ಲಿಯೂ ಪೂರಕ, ಜೊತೆಗೆ ಹೊಸ ರಕ್ತಕಣಗಳ ಉತ್ಪಾದನೆಗೂ ಸಹಕಾರಿ. ನೀರು ಮತ್ತು ಜೇನು ಅನುಪಮ ಆ್ಯಂಟಿ ಬ್ಯಾಕ್ಟೀರಿಯಲ್ ಹಾಗೂ ಕೊಲೆಯಾಜೆನ್‌ ಬೂಸ್ಟಿಂಗ್‌ ಗುಣಗಳನ್ನು ಹೊಂದಿದ್ದು, ನಿಮ್ಮ ಚರ್ಮಕ್ಕೆ ಕಾಂತಿ ತುಂಬುತ್ತದೆ, ಚರ್ಮ ಮೊದಲಿಗಿಂತ ಎಷ್ಟೋ ತಿಳಿಯಾಗುತ್ತದೆ.
ದೇಹದ ತೂಕ ತಗ್ಗಿಸಲು ಪೂರಕ : ಹೊಟ್ಟೆಯನ್ನು ಶುದ್ಧಿ ಮಾಡುವ ಗುಣ ಮಾತ್ರವಲ್ಲದೆ, ನಿಂಬೆಯಲ್ಲಿ ಪೆಕ್ಟಿನ್‌ ಎಂಬ ಫೈಬರ್‌ಅಂಶವಿದೆ. ಇದರಿಂದ ನಿಮಗೆ ಊಟ ಮಾಡಿದ ತಕ್ಷಣ ಹೊಟ್ಟೆ ಭರ್ತಿ ಎನಿಸುತ್ತದೆ, ಬೊಜ್ಜನ್ನು ತಗ್ಗಿಸುತ್ತದೆ. ಈ ಮಿಶ್ರಣ ಹೊಟ್ಟೆಯಲ್ಲಿ ಆಲ್ಕೈನ್‌ ಪರಿಸರ ಉಂಟು ಮಾಡುತ್ತದೆ, ಆಗ ತೂಕ ಕರಗಲು ಹೆಚ್ಚು ಅನುಕೂಲ. ಮನೆಮದ್ದು ಬಳಸಿ ಬೊಜ್ಜು ಕರಗಿಸಬೇಕೇ? ಇಂದಿನಿಂದಲೇ ಈ ಮಿಶ್ರಣ ಸೇವಿಸಲು ಆರಂಭಿಸಿ.
ಮಿಶ್ರಣದ ತಯಾರಿ ಮತ್ತು ಬಳಕೆ : ಈ ಮಿಶ್ರಣದ ತಯಾರಿಗಾಗಿ ಒಂದು ದೊಡ್ಡ ಗ್ಲಾಸ್‌ ಬಿಸಿ ನೀರು (ತುಂಬಾ ಬಿಸಿ ಬೇಡ) ತೆಗೆದುಕೊಂಡು ಅದಕ್ಕೆ 1 ಹೋಳು ನಿಂಬೆಹಣ್ಣು ಹಿಂಡಿಕೊಳ್ಳಿ. ಇದಕ್ಕೆ 1 ಚಿಕ್ಕ ಚಮಚ ಜೇನು ಬೆರೆಸಿ ಚೆನ್ನಾಗಿ ಕದಡಿಕೊಳ್ಳಿ. ಇದನ್ನು ತಕ್ಷಣ ಬರಿಹೊಟ್ಟೆಯಲ್ಲಿ ಕುಡಿಯಬೇಕು. ಇದನ್ನು ಹಲ್ಲುಜ್ಜದೆ, ಬಾಯಿ ಮುಕ್ಕಳಿಸದೆ ಕುಡಿಯಬೇಕು ಎನ್ನುತ್ತಾರೆ. ಆದರೆ ಹಲ್ಲುಜ್ಜಿ ನಂತರ ಇದನ್ನು ಸೇವಿಸಿದರೂ ಅಂಥ ಪ್ರಮಾದವೇನಿಲ್ಲ. ಇದನ್ನು ಸೇವಿಸಿದ 1 ಗಂಟೆಯ ಕಾಲ, ಕಾಫಿ ಟೀ ಇತ್ಯಾದಿ ಏನನ್ನೂ ಕುಡಿಯಬಾರದು.
– ಪಿ. ಅಮೃತಾ
