ನಾನು 22ರ ತರುಣಿ. ನನ್ನ ಮುಖದಲ್ಲಿ ಮೊಡವೆಗಳಾಗಿವೆ. ನಾನು ಯಾವ ರೀತಿಯ ಫೇಶಿಯಲ್ ಮಾಡಿಸಿದರೆ ಚೆನ್ನ?
ಮೊಡವೆಗಳಿರುವ ಮುಖಕ್ಕೆ ಫೇಶಿಯಲ್ ಮಾಡಿಸಬೇಕೆಂದರೆ, ಡೀಪ್‌ ಪೋರ್‌ ಕ್ಲೆನ್ಸಿಂಗ್‌ ಒಳ್ಳೆಯದು. ಇದು ಚರ್ಮಕ್ಕೆ ತಗುಲಿದ ಇನ್‌ ಫೆಕ್ಷನ್‌ ನ್ನು ದೂರ ಮಾಡುತ್ತದೆ. ಈ ವಿಧಾನದಲ್ಲಿ ಹೈ ಫ್ರೀಕ್ವೆನ್ಸಿ ಟ್ರೀಟ್‌ ಮೆಂಟ್‌ ಗಾಗಿ ಆ್ಯಂಟಿಸೆಪ್ಟಿಕ್‌ ಮಾಸ್ಕ್ ಸಹ ಧರಿಸಬೇಕಾಗುತ್ತದೆ. ಇದರಲ್ಲಿ ಚರ್ಮಕ್ಕೆ ಡೀಪ್‌ ಹೈಡ್ರೇಶನ್‌ ಸಹ ಒದಗಿಸಲಾಗುತ್ತದೆ. ಇದರಿಂದ ಚರ್ಮ ಎಷ್ಟೋ ಬೇಗ ಸುಧಾರಿಸುತ್ತದೆ. ಇಷ್ಟು ಮಾತ್ರವಲ್ಲದೆ, ಮೊಡವೆಗಳಿರುವ ಮುಖಕ್ಕೆ ಮೈಕ್ರೊಡರ್ಮ ಅಬ್ರೆಶನ್‌ ಸಹ ಮಾಡಿಸಬೇಕು. ಇದರಿಂದ ಚರ್ಮಕ್ಕೆ ಹಾನಿ ಮಾಡುವ ಬ್ಲ್ಯಾಕ್‌ ಹೆಡ್ಸ್/ವೈಟ್‌ ಹೆಡ್ಸ್ ತಂತಾನೇ ದೂರವಾಗುತ್ತದೆ.
ನಾನು 36ರ ಮಹಿಳೆ. ನನ್ನ ಕಂಗಳ ಕೆಳಗೆ ಕಪ್ಪು ಉಂಗುರುಗಳು (ಡಾರ್ಕ್‌ ಸರ್ಕಲ್ಸ್) ಹೆಚ್ಚಾಗತೊಡಗಿವೆ, ಇದರಿಂದ ನಾನು ಆತಂಕಗೊಂಡಿದ್ದೇನೆ. ಇದನ್ನು ನಿವಾರಿಸಲು ಏನಾದರೂ ಉಪಾಯ ತಿಳಿಸುವಿರಾ?
ಸೌತೆಕಾಯಿಯ ಸಿಪ್ಪೆ ಹೆರೆದು ಹೋಳಾಗಿಸಿ. ಇದಕ್ಕೆ ಕ್ಯಾರೆಟ್‌ ತುರಿ ಸೇರಿಸಿ ಪೇಸ್ಟ್ ಮಾಡಿಕೊಳ್ಳಿ. ಇದಕ್ಕೆ ತುಸು ನಿಂಬೆ ರಸ ಬೆರೆಸಿ, ಮುಖದಲ್ಲಿ ಕಪ್ಪು ಉಂಗುರಗಳಿರುವ ಕಡೆ, ಹಗಲಲ್ಲಿ ಬಿಡುವಿರುವಾಗ ಹಾಗೂ ರಾತ್ರಿ ಮಲಗು ಮುನ್ನಾ ಪ್ರತಿ ದಿನ ಮಾಡಬೇಕು. ಹೀಗೆ ಸತತ 15-20 ದಿನ ಮಾಡುವುದರಿಂದ ಹೆಚ್ಚಿನ ಲಾಭವಿದೆ. ಜೊತೆಗೆ ಮಧ್ಯೆ ಮಧ್ಯೆ ಆ್ಯಂಟಿ ರಿಂಕಲ್ಸ್ ಕ್ರೀಂ ಹಚ್ಚಿ ಮಲಗಬಹುದು. ಈ ಡಾರ್ಕ್‌ ಸರ್ಕಲ್ಸ್ ಇತರರಿಗೆ ಕಾಣದಂತೆ ಮಾಡಲು, ಮೇಕಪ್ ಮಾಡಿಕೊಳ್ಳುವಾಗ ಫೌಂಡೇಶನ್‌ ಕ್ರೀಮಿಗೆ ಬದಲಾಗಿ ಕನ್ಸೀಲರ್‌ ಉಪಯೋಗಿಸಿ. ಪ್ರತಿ ದಿನ 10-12 ಗ್ಲಾಸ್‌ ನೀರು ಕುಡಿಯಿರಿ. ನಿಮ್ಮ ಆಹಾರದಲ್ಲಿ ಮೊಳಕೆ ಕಟ್ಟಿದ ಕಾಳು, ತಾಜಾ ಹಸಿರು ತುಂಬಿದ ಸೊಪ್ಪು ತರಕಾರಿ ಬಳಸಿರಿ. ಸಲಾಡ್‌, ಕೋಸಂಬರಿ ಮೂಲಕ ಹೆಚ್ಚು ಹಸಿ ಪದಾರ್ಥ ಸೇವಿಸಿ. ಕಿತ್ತಳೆ, ಮೂಸಂಬಿ, ಕಲ್ಲಂಗಡಿಹಣ್ಣಿನಂಥ ಹೆಚ್ಚು ದ್ರವ ತುಂಬಿದ ಹಣ್ಣುಗಳನ್ನು ಸೇವಿಸಿ, ರಾತ್ರಿ ಕಣ್ತುಂಬ ನಿದ್ದೆ ಮಾಡಿ. ಸಾಧ್ಯವಾದಷ್ಟು ಟೆನ್ಶನ್‌ ಚಿಂತೆಗಳಿಂದ ದೂರವಿರಿ.
ನಾನು 31ರ ಹರೆಯದ ಮಹಿಳೆ. ಏಜಿಂಗ್‌ ನ ಲಕ್ಷಣಗಳೇನು? ಆ್ಯಂಟಿ ಏಜಿಂಗ್‌ ಕ್ರೀಂ ಯಾವಾಗ ಹಚ್ಚಿಕೊಳ್ಳಲು ಶುರು ಮಾಡಬೇಕು?
ವಯಸ್ಸು ಹೆಚ್ಚುತ್ತಿದ್ದಂತೆ ಕ್ರಮೇಣ ಅದರ ಪ್ರಭಾವ ಚರ್ಮದ ಮೇಲೆ ದಟ್ಟವಾಗಿ ಕಾಣಿಸಿಕೊಳ್ಳುತ್ತದೆ. ಇದರಿಂದ ಚರ್ಮ ಶುಷ್ಕವಾಗಿ, ಸುಕ್ಕು ಕೂಡುತ್ತದೆ. ಚರ್ಮದಲ್ಲಿ ಮೃದುತನ ಹೋಗಿ, ನಿಧಾನವಾಗಿ ಒರಟಾಗತೊಡಗುತ್ತದೆ. ತೆಳುವಾಗುತ್ತಾ ಜೋತು ಬೀಳತೊಡಗುತ್ತದೆ. ಇದರ ಪ್ರಭಾವ ಕಂಗಳ ಕೆಳಗೆ ಸ್ಪಷ್ಟವಾಗಿ ಗೋಚರಿಸುತ್ತದೆ. ನಕ್ಕಾಗೆಲ್ಲ ಕೆನ್ನೆ ಬಳಿ ಆಳವಾದ ಗೀರುಗಳು ಕಾಣಿಸಬಹುದು. ಹಣೆಯಲ್ಲೂ ಸುಕ್ಕುಗಳು, ಮಡಿಕೆಯಾದ ಗೆರೆಗಳು ಕಾಣಿಸಬಹುದು. ಇದೇ ಏಜಿಂಗ್‌ ಅಥವಾ ವೃದ್ಧಾಪ್ಯದ ಮೊದಲ ಹಂತ. ಇದನ್ನು ಸಾಧ್ಯವಾದಷ್ಟು ತಡೆಗಟ್ಟಲು ಯತ್ನಿಸುವುದೇ ಆ್ಯಂಟಿ ಏಜಿಂಗ್‌. 26-27ರ ಹರೆಯದಿಂದಲೇ ಯುವತಿಯರು ಆ್ಯಂಟಿ ಏಜಿಂಗ್‌ ಕ್ರೀಂ ಹಚ್ಚಲು ಆರಂಭಿಸಬೇಕು. ಸಾಧ್ಯವಾದಷ್ಟೂ ಬಿಸಿಲು ಮಳೆ ಚಳಿಗೆ ನಿಮ್ಮನ್ನು ನೀವು ಒಡ್ಡಿಕೊಳ್ಳಬೇಡಿ. ಬಿಸಿಲಲ್ಲಿ ಹೋಗಬೇಕಾದಾಗ ಮರೆಯದೆ ಸನ್‌ ಸ್ಕ್ರೀನ್‌ ಲೋಶನ್‌ ಹಚ್ಚಿಕೊಳ್ಳಿ. ರಾತ್ರಿ ಮಲಗುವ ಮುನ್ನ ಅಗತ್ಯವಾಗಿ ಮಾಯಿಶ್ಚರೈಸಿಂಗ್‌ ಕ್ರೀಂ ಹಚ್ಚಿಕೊಳ್ಳಿ.
ನಾನು 19ರ ತರುಣಿ. ಇತ್ತೀಚೆಗೆ ನನ್ನ ಕೂದಲಲ್ಲಿ ಡ್ಯಾಂಡ್ರಫ್‌ ಅಥವಾ ತಲೆಹೊಟ್ಟು ಜಾಸ್ತಿಯಾಗುತ್ತಿದೆ. ಮುಖ್ಯವಾಗಿ ನಾನು ಬ್ಲ್ಯಾಕ್‌ ಡ್ರೆಸ್‌ ಹಾಕಿದಾಗ ಅದು ಉದುರಿರುವುದು ಸ್ಪಷ್ಟವಾಗಿ ಕಾಣಿಸುತ್ತದೆ, ಇದರಿಂದ ಕಾಲೇಜಿನಲ್ಲಿ ನಾನು ಬಹಳ ಸಲ ಪೇಚಿಗೆ ಸಿಲುಕಿದ್ದೇನೆ. ಇದರಿಂದ ಮುಕ್ತಿ ಹೊಂದಲು ದಯವಿಟ್ಟು ಸಲಹೆ ಕೊಡಿ.
ಯಾರ ತಲೆಗೂದಲು ಹೆಚ್ಚು ಕೊಳಕಾಗಿರುವುದೋ ಅಂಥವರಿಗೆ ತಲೆಹೊಟ್ಟಿನ ಸಮಸ್ಯೆ ಹೆಚ್ಚು. ತಲೆಗೆ ಅಕಸ್ಮಾತ್‌ ಎಣ್ಣೆ ಹಚ್ಚಿದಾಗ ಅದನ್ನು ಚೆನ್ನಾಗಿ ಮಸಾಜ್‌ ಮಾಡಿ. ಹಿಪ್ಪೆ ಎಣ್ಣೆ, ಬಾದಾಮಿ ಎಣ್ಣೆ ಹಚ್ಚಿ ಚೆನ್ನಾಗಿ ಮಸಾಜ್‌ ಮಾಡಿಕೊಳ್ಳಿ. ವಾರಕ್ಕೆ 3 ಸಲ ತಪ್ಪದೆ ಆ್ಯಂಟಿ ಡ್ಯಾಂಡ್ರಫ್‌ ಶ್ಯಾಂಪೂ ಹಚ್ಚಿ ತಲೆಗೆ ಸ್ನಾನ ಮಾಡಿ, ಪದೇ ಪದೇ ಶ್ಯಾಂಪೂ ಬದಲಾಯಿಸಬೇಡಿ. ಉಷ್ಣದಿಂದಲೂ ತಲೆಹೊಟ್ಟು ಹೆಚ್ಚು ಸಾಧ್ಯತೆಗಳಿವೆ, ಅದನ್ನು ತಂಪಾಗಿಸಲು ಹೆಚ್ಚು ಹಸಿರು ತರಕಾರಿ, ಮೆಂತ್ಯದ ಪದಾರ್ಥ, ಮೊಳಕೆ ಕಟ್ಟಿದ ಕಾಳು, ಸೊಪ್ಪು, ಹಾಲು ಹಣ್ಣು ಇತ್ಯಾದಿಗಳನ್ನು ನಿಮ್ಮ ಆಹಾರದಲ್ಲಿ ನಿಯಮಿತವಾಗಿ ರೂಢಿಸಿಕೊಳ್ಳಿ. ತಲೆಗೆ ಹರಳೆಣ್ಣೆ ಒತ್ತಿಕೊಂಡು ಸೀಗೇಪುಡಿ ಚಿಗರೆಪುಡಿ ಬೆರೆಸಿ ಸ್ನಾನ ಮಾಡುವುದೂ ಒಳ್ಳೆಯದು. ಅಪರೂಪಕ್ಕೆಮ್ಮೆ ಮೆಹೆಂದಿ ಹಚ್ಚಿ ಸಹ ತಲೆ ಸ್ನಾನ ಮಾಡಿ.
ನಾನು 20ರ ತರುಣಿ. ನನ್ನ ಮೂಗಿನ ಮೇಲೆ ಆಗಾಗ ಬ್ಲ್ಯಾಕ್‌ ಹೆಡ್ಸ್ ಕಾಣಿಸಿಕೊಳ್ಳುತ್ತವೆ. ಇವನ್ನು ದೂರಗೊಳಿಸಲು ನಾನೇನು ಮಾಡಬೇಕು? ಹಲವು ಬಗೆಯ ಚಿಕಿತ್ಸೆ ಪಡೆದಿದ್ದೇನೆ, ಗುಣ ಆಗಿಲ್ಲ.
ಚಿಕಿತ್ಸೆ ಮಾಡಿಸಿಯೂ ಬ್ಲ್ಯಾಕ್‌ ಹೆಡ್ಸ್ ಹೋಗಿಲ್ಲವೆಂದರೆ ಇದನ್ನು ಗಂಭೀರವಾಗಿ ಪರಿಗಣಿಸಿ. ನಿಮ್ಮ ಊಟ ತಿಂಡಿ ಕಡೆ ಹೆಚ್ಚಿನ ಗಮನಕೊಡಿ. ಹುರಿದ ಕರಿದ ಜಿಡ್ಡು ಪದಾರ್ಥಗಳಿಂದ, ಮಸಾಲೆಯುಕ್ತ ಆಹಾರದಿಂದ ದೂರವಿರಿ. ಪ್ರತಿದಿನ 10-12 ಸಲ ದೊಡ್ಡ ಲೋಟದಲ್ಲಿ ನೀರು ಕುಡಿಯಿರಿ, ತಾಜಾ ಹಸಿ ತರಕಾರಿ ಹಣ್ಣು ಸೇವಿಸಿ. ವೈದ್ಯರ ಮಾರ್ಗದರ್ಶನದಲ್ಲಿ ರಕ್ತ ಶುದ್ಧೀಕರಣದ ಔಷಧಿ ಹಾಗೂ ಭೇದಿಗೆ ಮಾತ್ರೆ ತೆಗೆದುಕೊಳ್ಳಿ.
ಟಿಪ್ಸ್
ಸೌತೇಕಾಯಿ ತುರಿದಿಡಿ. ಅದಕ್ಕೆ ಡಾಬರ್‌ ಗುಲಾಬರಿ ಗುಲಾಬಿಜಲ ಬೆರೆಸಿ ಪೇಸ್ಟ್ ಮಾಡಿಕೊಳ್ಳಿ. ಇದನ್ನು ಕಪ್ಪು ಕಲೆಗಳಿರುವ ಕಡೆ ಸವರಿಕೊಳ್ಳಿ. ಇದರಿಂದ ಆ ಭಾಗ ತಿಳಿಯಾಗುತ್ತದೆ, ಜೊತೆಗೆ ಸುಸ್ತಾದ ಕಂಗಳಿಗೆ ಉತ್ತಮ ವಿಶ್ರಾಂತಿಯೂ ದೊರಕುತ್ತದೆ.
ತುರಿದ ಶುಂಠಿಗೆ ಜೇನುತುಪ್ಪ, ಗುಲಾಬರಿ ಗುಲಾಬಿ ಜಲ ಬೆರೆಸಿ ಪೇಸ್ಟ್ ಮಾಡಿಡಿ. ಇದನ್ನು ದಿನಾಲೂ ಬೆಳಗ್ಗೆ ಮುಖಕ್ಕೆ ಸವರಬೇಕು. ಇದರಿಂದ ಮುಖದಲ್ಲಿನ ಕಲೆ, ಸುಕ್ಕುಗಳು ದೂರವಾಗುತ್ತವೆ.
ಒಂದು ಚಮಚ ಟೊಮೇಟೊ ಪೇಸ್ಟ್ಗೆ, ಅರ್ಧ ಚಮಚ ಕಿತ್ತಲೆ ಹಣ್ಣಿನ ರಸ, 2 ಚಿಟಕಿ ಅರಿಶಿನ ಹಾಗೂ 2-3 ಚಿಟಕಿ ಕಡಲೆಹಿಟ್ಟು ಬೆರೆಸಿಕೊಂಡು ಪೇಸ್ಟ್ ಮಾಡಿಡಿ. ಮುಖ, ಕೈ, ಕಾಲುಗಳಲ್ಲಿ ಎಲ್ಲೆಲ್ಲಿ ಕಪ್ಪು ಕಲೆಗಳಿವೆಯೋ ಅಲ್ಲೆಲ್ಲ ಇದನ್ನು ಹಚ್ಚಿಕೊಂಡು, 10 ನಿಮಿಷ ಹಾಗೇ ಒಣಗಲು ಬಿಡಿ. ನಂತರ ತಣ್ಣೀರಿನಿಂದ ತೊಳೆಯಿರಿ. ಇದರಿಂದ ಕಪ್ಪು ಕಲೆಗಳು ಕ್ರಮೇಣ ದೂರವಾಗುತ್ತವೆ.
2 ಚಮಚ ಜೇನುತುಪ್ಪ, 1 ಚಮಚ ನಿಂಬೆರಸ, ತುಸು ಗುಲಾಬರಿ ಗುಲಾಬಿಜಲ ಬೆರೆಸಿಕೊಂಡು ಪೇಸ್ಟ್ ಮಾಡಿಡಿ. ಇದನ್ನು ದಿನಾಲೂ ಬೆಳಗ್ಗೆ ಮುಖಕ್ಕೆ ಹಚ್ಚಿ, ಒಣಗಿಸಿ, ತೊಳೆಯಬೇಕು. ಕೆಲವು ದಿನಗಳ ನಂತರ ನಿಂಬೆರಸಕ್ಕೆ ಬದಲಾಗಿ ಮೊಸರು ಬೆರೆಸಿಕೊಳ್ಳಿ. 15-20 ನಿಮಿಷಗಳ ನಂತರ ಮುಖ ತೊಳೆಯಿರಿ. ಇದು ಡ್ರೈ ಸ್ಕಿನ್‌ ಇರುವವರಿಗೆ ಉತ್ತಮ ಫೇಸ್‌ ಪ್ಯಾಕ್‌ ಆಗಿ ಕೆಲಸ ಮಾಡುತ್ತದೆ.
