*ವಿಶ್ವ ಜೇನುನೊಣ ದಿನ (World Bee Day):* *ಪ್ರಕೃತಿಯ ಪುಟ್ಟ ಜೀವದ ಜೀವರಕ್ಷಾ ಕವಚ*
ಇಂದು ಅಂತರರಾಷ್ಟ್ರೀಯ ಜೇನುನೊಣ ದಿನ. ಗಾತ್ರದಲ್ಲಿ ಅತ್ಯಂತ ಕಿರಿದಾಗಿದ್ದರೂ, ಈ ಭೂಮಿಯ ಜೀವವೈವಿಧ್ಯತೆಯನ್ನು ಕಾಪಾಡುವಲ್ಲಿ ಜೇನುನೊಣಗಳ ಪಾತ್ರ ಅಪಾರ. ಪ್ರಕೃತಿಯ ಸಮತೋಲನವನ್ನು ಕಾಯ್ದುಕೊಳ್ಳುವಲ್ಲಿ ಇವು ಅತ್ಯಂತ ಪ್ರಮುಖ ಕೊಂಡಿಯಾಗಿದ್ದು, ಪರಿಸರ ವ್ಯವಸ್ಥೆಯ ದಕ್ಷ ಎಂಜಿನಿಯರ್ಗಳಂತೆ ಕೆಲಸ ಮಾಡುತ್ತವೆ. ಪ್ರಕೃತಿಯಲ್ಲಿನ ಹೂವುಗಳಿಂದ ಮಕರಂದ ಹಿರುವ ಜೇನುನೊಣಗಳು, ಪ್ರತಿಯಾಗಿ ಪ್ರಕೃತಿಗೆ ನೀಡುವ ಕೊಡುಗೆ ಜೀವರಾಶಿಯ ಉಗಮ ಮತ್ತು ಉಳಿವಿಗೇ ಕಾರಣವಾಗಿದೆ.
ಪರಾಗಸ್ಪರ್ಶದ ಚಮತ್ಕಾರ ಮತ್ತು ಸಸ್ಯಸಂಕುಲದ ಉಳಿವು
ಜೇನುನೊಣಗಳು ಕೇವಲ ಜೇನುತುಪ್ಪವನ್ನು ನೀಡುವ ಕೀಟಗಳಲ್ಲ, ಅವು ಜಗತ್ತಿನ ಅತ್ಯಂತ ಪ್ರಮುಖ ಪರಾಗಸ್ಪರ್ಶಕಗಳು (Pollinators). ಜಗತ್ತಿನಾದ್ಯಂತ ಇರುವ ಸುಮಾರು 80% ರಿಂದ 90% ರಷ್ಟು ಕಾಡು ಹೂವಿನ ಗಿಡಗಳು ಮತ್ತು ನಾವು ತಿನ್ನುವ ಆಹಾರದ ಮೂರನೇ ಒಂದು ಭಾಗದಷ್ಟು (ಸುಮಾರು 75% ಕ್ಕೂ ಹೆಚ್ಚು ಬೆಳೆಗಳು) ನೇರವಾಗಿ ಜೇನುನೊಣಗಳ ಪರಾಗಸ್ಪರ್ಶ ಕ್ರಿಯೆಯನ್ನೇ ಅವಲಂಬಿಸಿವೆ. ಸಸ್ಯಗಳ ಸಂತಾನೋತ್ಪತ್ತಿ ಪ್ರಕ್ರಿಯೆಗೆ ಜೇನುನೊಣಗಳ ಓಡಾಟ ಅತ್ಯಗತ್ಯ. ಒಂದು ಹೂವಿನಿಂದ ಮತ್ತೊಂದು ಹೂವಿಗೆ ಇವು ಪರಾಗರೇಣುಗಳನ್ನು ವರ್ಗಾಯಿಸದಿದ್ದರೆ, ಗಿಡಮರಗಳಲ್ಲಿ ಕಾಯಿ-ಹಣ್ಣುಗಳು ಬಿಡುವುದಿಲ್ಲ, ಹೊಸ ಬೀಜಗಳು ಸೃಷ್ಟಿಯಾಗುವುದಿಲ್ಲ. ಅಂದರೆ, ಇಂದು ಭೂಮಿಯ ಮೇಲಿರುವ ಕೋಟ್ಯಂತರ ಗಿಡಮರಗಳ ಉಳಿವಿಗೆ ಮತ್ತು ಅವುಗಳ ವಂಶಾಭಿವೃದ್ಧಿಗೆ ಜೇನುನೊಣಗಳೇ ಪ್ರಧಾನ ಕಾರಣ.
*ರಾಸಾಯನಿಕ ಕ್ರಿಮಿನಾಶಕಗಳು: ಜೇನುನೊಣಗಳ ಪಾಲಿನ ಮೃತ್ಯುಪಾಶ*
ದುರದೃಷ್ಟವಶಾತ್, ಆಧುನಿಕ ಕೃಷಿ ಪದ್ಧತಿಯಲ್ಲಿ ಮನುಷ್ಯ ಅತಿಯಾಗಿ ಬಳಸುತ್ತಿರುವ ರಾಸಾಯನಿಕ ಕ್ರಿಮಿನಾಶಕಗಳು ಮತ್ತು ಕೀಟನಾಶಕಗಳು (ಮುಖ್ಯವಾಗಿ ನಿಯೋನಿಕೋಟಿನಾಯ್ಡ್ಸ್ – Neonicotinoids) ಜೇನುನೊಣಗಳ ಪಾಲಿಗೆ ವಿಷವಾಗಿ ಪರಿಣಮಿಸಿವೆ. ಈ ವಿಷಕಾರಿ ರಾಸಾಯನಿಕಗಳು ಜೇನುನೊಣಗಳ ನರಮಂಡಲದ ಮೇಲೆ ತೀವ್ರ ಪರಿಣಾಮ ಬೀರುತ್ತವೆ. ಇದರಿಂದಾಗಿ ಅವು ತಮ್ಮ ಗೂಡಿನ ದಾರಿಯನ್ನು ಮರೆಯುತ್ತವೆ, ಆಹಾರ ಹುಡುಕುವ ಸಾಮರ್ಥ್ಯವನ್ನು ಕಳೆದುಕೊಳ್ಳುತ್ತವೆ ಮತ್ತು ರೋಗನಿರೋಧಕ ಶಕ್ತಿ ಕುಗ್ಗಿ ಲಕ್ಷಾಂತರ ಸಂಖ್ಯೆಯಲ್ಲಿ ಸಾವನ್ನಪ್ಪುತ್ತಿವೆ. ಇದನ್ನು ‘ಕಾಲೋನಿ ಕೊಲ್ಯಾಪ್ಸ್ ಡಿಸಾರ್ಡರ್’ (Colony Collapse Disorder) ಎನ್ನಲಾಗುತ್ತದೆ. ಮನುಷ್ಯನ ಈ ಸ್ವಾರ್ಥ ಮತ್ತು ರಾಸಾಯನಿಕಗಳ ಅತಿಯಾದ ಬಳಕೆ ಜೇನುನೊಣಗಳ ಇಡೀ ಸಂತತಿಯನ್ನೇ ವಿನಾಶದ ಅಂಚಿಗೆ ತಳ್ಳುತ್ತಿದೆ.
*ಜೇನುನೊಣಗಳು ಇಲ್ಲದಿದ್ದರೆ* *ಏನಾಗಬಹುದು?*
*ಒಂದು ವೇಳೆ ಭೂಮಿಯ* *ಮೇಲಿನ ಜೇನುನೊಣಗಳು ನಾಶವಾದರೆ, ಮನುಷ್ಯ ಕೇವಲ ನಾಲ್ಕು ವರ್ಷಗಳಷ್ಟೇ ಬದುಕಬಲ್ಲ ಎಂಬ ಪ್ರಸಿದ್ಧ ಹೇಳಿಕೆಯಿದೆ.*
ಜೇನುನೊಣಗಳು ಇಲ್ಲದ ಜಗತ್ತನ್ನು ಕಲ್ಪಿಸಿಕೊಳ್ಳುವುದೂ ಕಷ್ಟ. ಇವು ಮಾಯವಾದರೆ:
● ಆಹಾರದ ಕ್ಷಾಮ: ನಾವು ದಿನನಿತ್ಯ ಬಳಸುವ ತರಕಾರಿ, ಹಣ್ಣುಗಳು, ಕಾಫಿ, ಬಾದಾಮಿ, ಸಾಸಿವೆಯಂತಹ ಪ್ರಮುಖ ಬೆಳೆಗಳ ಇಳುವರಿ ಸಂಪೂರ್ಣ ಕುಸಿಯುತ್ತದೆ.
● ಆರ್ಥಿಕ ನಷ್ಟ: ಕೃಷಿ ವಲಯವು ಸಂಪೂರ್ಣವಾಗಿ ಹದಗೆಟ್ಟು ಜಾಗತಿಕ ಆರ್ಥಿಕತೆ ಮತ್ತು ಆಹಾರ ಭದ್ರತೆಗೆ ದೊಡ್ಡ ಪೆಟ್ಟು ಬೀಳುತ್ತದೆ.
● ಪ್ರಕೃತಿಯ ಅಸಮತೋಲನ: ಕಾಡುಗಳಲ್ಲಿನ ಗಿಡಮರಗಳು ನಶಿಸಿ ಹೋಗುವುದರಿಂದ ಹಸಿರು ಮಾಯವಾಗಿ, ಆಮ್ಲಜನಕದ ಕೊರತೆ ಉಂಟಾಗುತ್ತದೆ ಹಾಗೂ ಪ್ರಾಣಿ-ಪಕ್ಷಿಗಳಿಗೆ ಆಹಾರವಿಲ್ಲದೆ ಇಡೀ ಪರಿಸರ ವ್ಯವಸ್ಥೆಯೇ ಕುಸಿದು ಬೀಳುತ್ತದೆ.
*ಜೇನುನೊಣಗಳ ಸಂತತಿಯನ್ನು* *ಕಾಪಾಡುವುದು ಹೇಗೆ?*
ಜೇನುನೊಣಗಳನ್ನು ರಕ್ಷಿಸುವುದೆಂದರೆ ನಮ್ಮ ಭವಿಷ್ಯವನ್ನು ನಾವೇ ರಕ್ಷಿಸಿಕೊಂಡಂತೆ. ಇದಕ್ಕಾಗಿ ನಾವು ತಕ್ಷಣವೇ ಕೆಲವು ಕ್ರಮಗಳನ್ನು ಕೈಗೊಳ್ಳಬೇಕಿದೆ:
●ಸಾವಯವ ಕೃಷಿಗೆ ಆದ್ಯತೆ: ಹಾನಿಕಾರಕ ರಾಸಾಯನಿಕ ಕ್ರಿಮಿನಾಶಕಗಳ ಬಳಕೆಯನ್ನು ನಿಲ್ಲಿಸಿ, ನೈಸರ್ಗಿಕ ಮತ್ತು ಸಾವಯವ ಕೃಷಿ ಪದ್ಧತಿಯನ್ನು ಅಳವಡಿಸಿಕೊಳ್ಳಬೇಕು.
●ಸ್ಥಳೀಯ ಹೂವಿನ ಗಿಡಗಳನ್ನು ಬೆಳೆಸುವುದು: ನಮ್ಮ ಮನೆಗಳ ಸುತ್ತಮುತ್ತ, ತೋಟಗಳಲ್ಲಿ ಜೇನುನೊಣಗಳಿಗೆ ಮಕರಂದ ನೀಡುವ ವಿಭಿನ್ನ ಜಾತಿಯ ಸ್ಥಳೀಯ ಹೂವಿನ ಗಿಡಗಳನ್ನು ಬೆಳೆಸಬೇಕು.
●ನೈಸರ್ಗಿಕ ಆವಾಸಸ್ಥಾನಗಳ ರಕ್ಷಣೆ: ಜೇನುಗೂಡುಗಳನ್ನು ಕಂಡ ತಕ್ಷಣ ಅವುಗಳನ್ನು ಸುಡುವುದು ಅಥವಾ ನಾಶಪಡಿಸುವುದನ್ನು ನಿಲ್ಲಿಸಬೇಕು. ಕಾಡುಗಳ ನಾಶವನ್ನು ತಡೆಯಬೇಕು.
● ಜೇನು ಸಾಕಣೆಗೆ ಪ್ರೋತ್ಸಾಹ: ವೈಜ್ಞಾನಿಕ ಜೇನು ಸಾಕಣೆಯನ್ನು (Apiculture) ಉಪಕಸುಬನ್ನಾಗಿ ಮಾಡಿಕೊಳ್ಳುವ ಮೂಲಕ ಅವುಗಳ ಸಂತತಿಯನ್ನು ವೃದ್ಧಿಸಬಹುದು.
ಈ ಅಂತರರಾಷ್ಟ್ರೀಯ ಜೇನುನೊಣ ದಿನದಂದು ಪ್ರಕೃತಿಯ ಈ ಮೂಕ ಸೇವಕರನ್ನು ಗೌರವಿಸೋಣ ಮತ್ತು ಅವುಗಳ ಉಳಿವಿಗಾಗಿ ಶ್ರಮಿಸುವ ಸಂಕಲ್ಪ ಮಾಡೋಣ.*
*ರಘು ಚಿಕ್ಕಮಗಳೂರು*
