ಬೀನ್‌ ಸ್ಕ್ವೇರ್‌

ಸಾಮಗ್ರಿ : 2-3 ಚಮಚ ಆಲಿವ್‌ ಎಣ್ಣೆ, ಶುಂಠಿ/ಬೆಳ್ಳುಳ್ಳಿ ಪೇಸ್ಟ್, ಮಿಕ್ಸ್ಡ್ ಹರ್ಬ್‌, ಹಸಿ ಮೆಣಸಿನ ಪೇಸ್ಟ್ (ತಲಾ                                                                                                                                                                                                                                                            ಅರ್ಧರ್ಧ ಚಮಚ), 1-1 ದೊಡ್ಡ ಈರುಳ್ಳಿ, ಕ್ಯಾಪ್ಸಿಕಂ, ಟೊಮೇಟೊ, 1 ಕಪ್‌ ಬೆಂದ ರಾಜ್ಮಾ, ರುಚಿಗೆ ತಕ್ಕಷ್ಟು, ಉಪ್ಪು, ಪುಡಿಮೆಣಸು, ಟೊಮೇಟೊ ಸಾಸ್‌, ಚಿಲೀ ಸಾಸ್‌, ತುರಿದ ಚೀಸ್‌ ಕ್ಯೂಬ್ಸ್, ಅರ್ಧ ಪೌಂಡ್‌ ಬ್ರೆಡ್‌ ಸ್ಲೈಸ್‌.

ವಿಧಾನ : ಒಂದು ಪ್ಯಾನ್‌ನಲ್ಲಿ ಆಲಿವ್‌ ಎಣ್ಣೆ ಬಿಸಿ ಮಾಡಿ ಅದಕ್ಕೆ ಹಸಿಮೆಣಸಿನ ಪೇಸ್ಟ್, ಶುಂಠಿ, ಬೆಳ್ಳುಳ್ಳಿ ಪೇಸ್ಟ್, ಹೆಚ್ಚಿದ ಈರುಳ್ಳಿ ಹಾಕಿ ಬಾಡಿಸಿ. ನಂತರ ಕ್ಯಾಪ್ಸಿಕಂ, ಟೊಮೇಟೊ ಬೆಂದ ರಾಜ್ಮಾ ಹಾಕಿ ಬಾಡಿಸಿ. ಆಮೇಲೆ ಉಪ್ಪು, 2 ಬಗೆಯ ಸಾಸ್‌ ಹಾಕಿ ಚೆನ್ನಾಗಿ ಬಾಡಿಸಿ, ಬೇಯಿಸಿ. ನಂತರ ಮೆಣಸು, ತುರಿದ ಚೀಸ್‌ ಕ್ಯೂಬ್ಸ್, ಮಿಕ್ಸ್ಡ್ ಹರ್ಬ್‌, ಉಪ್ಪು ಸೇರಿಸಿ ಕೆದಕಿ ಕೆಳಗಿಳಿಸಿ. ಬ್ರೆಡ್‌ ಸ್ಲೈಸ್‌ಗಳ ಅಂಚಿನಿಂದ ಅರ್ಧ ಇಂಚು ಬಿಡುತ್ತಾ ಮಧ್ಯದ ಭಾಗ ಟೊಳ್ಳಾಗಿಸಿ, ಚೌಕದ ಬಟ್ಟಲಾಗಿಸಿ. ಇನ್ನೊಂದು ಬ್ರೆಡ್‌ ಸ್ಲೈಸ್‌ಗೆ ತುಸು ಆಲಿವ್ ಎಣ್ಣೆ ಸವರಿ, ಅದರ ಮೇಲೆ ಈ ಬಟ್ಟಲು ಬರುವಂತೆ ಸೆಟ್‌ ಮಾಡಿ. ಆಮೇಲೆ ಮೇಲಿನ ಬಟ್ಟಲಿಗೂ ತುಸು ಆಲಿವ್ ಎಣ್ಣೆ  ಸವರಿ, ಅದರ ಭರ್ತಿ ರಾಜ್ಮಾ ಮಿಶ್ರಣ ತುಂಬಿಸಿ. ಈ ರೀತಿ ಒಂದಷ್ಟು ಸೆಟ್‌ ಮಾಡಿಕೊಂಡು, ಮೊದಲೇ ಬಿಸಿ ಮಾಡಿದ ಓವನ್‌ನಲ್ಲಿ 250 ಡಗ್ರಿ ಶಾಖದಲ್ಲಿ 10 ನಿಮಿಷ ಬೇಕ್‌ ಮಾಡಿ. ಬಿಸಿ ಇರುವಾಗಲೇ ಕಾಫಿ ಜೊತೆ ಸರ್ವ್‌ ಮಾಡಿ.

food

ಮಾಕ್‌ ಸ್ಟ್ರಾಬೆರಿ ಡಾಗ್ರಿ

ಸಾಮಗ್ರಿ : 1 ಸೌಟು ಕ್ರಶ್ಡ್ ಸ್ಟ್ರಾಬೆರಿ, 2 ಕಪ್  ಸ್ಪ್ರೈಟ್‌ ಅಥವಾ 7 ಅಪ್‌ ಕೂಲ್ ಡ್ಡ್ರಿಂಕ್‌, 1 ನಿಂಬೆ ರಸ, ಒಂದಿಷ್ಟು ಹೆಚ್ಚಿದ ಸ್ಟ್ರಾಬೆರಿ, ಅಗತ್ಯವಿದ್ದಷ್ಟು ಪುಡಿ ಐಸ್‌.

ವಿಧಾನ : ಹೆಚ್ಚಿದ ಸ್ಟ್ರಾಬೆರಿ ಹೊರತುಪಡಿಸಿ ಉಳಿದೆಲ್ಲ ಸಾಮಗ್ರಿ ಬೆರೆಸಿ ಮಿಕ್ಸಿಯಲ್ಲಿ ಚೆನ್ನಾಗಿ ಬ್ಲೆಂಡ್‌ ಮಾಡಿ. 2-3 ಗ್ಲಾಸುಗಳಲ್ಲಿ ಹೆಚ್ಚಿದ ಸ್ಟ್ರಾಬೆರಿ ಹಾಕಿಟ್ಟು, ಮೇಲೆ ಈ ಪೇಯ ಸುರಿದು, ಸರ್ವ್‌ ಮಾಡಿ.

ನಗೆಟ್ಸ್

ಸಾಮಗ್ರಿ : ಅರ್ಧ ಸೌಟು ಬೆಣ್ಣೆ, ಅರ್ಧರ್ಧ ಕಪ್‌ ತುರಿದ ಕ್ಯಾರೆಟ್‌, ಹೆಚ್ಚಿದ ಬೀನ್ಸ್, ಬೆಂದ ಸ್ವೀಟ್‌ ಕಾರ್ನ್‌, ಬ್ರೆಡ್‌ ಕ್ರಂಬ್ಸ್, ಮೈದಾ, 1 ಕಪ್‌ ಹಾಲು, 2-3 ಹಸಿ ಮೆಣಸು, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಗರಂಮಸಾಲ, ಚಾಟ್‌ಮಸಾಲ, ನಿಂಬೆರಸ, ಬೇಯಿಸಿ ಮಸೆದ 2 ಆಲೂ, ಜೊತೆಗೆ ಸವಿಯಲು ಟೊಮೇಟೊ ಸಾಸ್‌.

ವಿಧಾನ : ಒಂದು ಬಾಣಲೆಯಲ್ಲಿ ಬೆಣ್ಣೆ ಕರಗಿಸಿ ಕ್ಯಾರೆಟ್‌, ಬೀನ್ಸ್, ಕಾರ್ನ್‌ ಸೇರಿಸಿ ಹದನಾಗಿ ಬಾಡಿಸಿ ಒಂದು ಪ್ಲೇಟಿಗೆ ಹಾಕಿಡಿ. ನಂತರ ಅದೇ ಬಾಣಲೆಯಲ್ಲಿ ಹಾಲು ಬೆರೆಸಿ ಮಂದ ಉರಿಯಲ್ಲಿ ಕುದಿಸಿ, ಕೆದಕಿರಿ. ನಂತರ ಬಾಡಿಸಿದ ಕ್ಯಾರೆಟ್‌ ಮಿಶ್ರಣ, ಮಸೆದ ಆಲೂ, ಉಪ್ಪು, ಮಸಾಲೆ ಸೇರಿಸಿ ಕೆದಕಿ ಕೆಳಗಿಳಿಸಿ. ಇದಕ್ಕೆ ತುಸು ಹೆಚ್ಚಿದ ಕೊ.ಸೊಪ್ಪು, ನಿಂಬೆರಸ ಬೆರೆಸಿ, ಸಣ್ಣ ಉಂಡೆಗಳಾಗಿಸಿ. ಮೈದಾಗೆ ಚಿಟಕಿ ಉಪ್ಪು, ಖಾರ ಬೆರೆಸಿ ಬೋಂಡ ಹಿಟ್ಟಿನ ಹದಕ್ಕೆ ಕಲಸಿಡಿ. ಅದರಲ್ಲಿ ಈ ಉಂಡೆಗಳನ್ನು ಅದ್ದಿ ಕಾದ ಎಣ್ಣೆಯಲ್ಲಿ ಬೊಂಬಾಯಿ ಬೋಂಡ ಮಾಡುವ ಹಾಗೆ ಕರಿಯಿರಿ. ಚಿತ್ರದಲ್ಲಿರುವಂತೆ ಅಲಂಕರಿಸಿ ಸಾಸ್‌ ಜೊತೆ ಸವಿಯಲು ಕೊಡಿ.

recipe

ನಟ್ಟಿ ಪಾಲಕ್‌ ರೋಲ್

ಸಾಮಗ್ರಿ : 2-3 ಕಂತೆ ಸಣ್ಣಗೆ ಹೆಚ್ಚಿದ ಪಾಲಕ್‌ಸೊಪ್ಪು, 250 ಗ್ರಾಂ ಕಡಲೆಹಿಟ್ಟು, ಅರ್ಧ ಸೌಟು ತುಪ್ಪ, ಅರ್ಧರ್ಧ ಚಮಚ ಜೀರಿಗೆ, ಸೋಂಪು, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಓಮ, ಹಸಿಮೆಣಸಿನ ಪೇಸ್ಟ್, ಧನಿಯಾಪುಡಿ, ಗರಂಮಸಾಲ, ಚಾಟ್‌ಮಸಾಲ, ಕರಿಯಲು ಎಣ್ಣೆ.

ವಿಧಾನ : ಒಂದು ಬೇಸನ್‌ಗೆ ಹೆಚ್ಚಿದ ಸೊಪ್ಪು, ಕಡಲೆಹಿಟ್ಟು, ಜೀರಿಗೆ, ಸೋಂಪು, ಓಮ, ತುಪ್ಪ, ಧನಿಯಾಪುಡಿ, ಹಸಿಮೆಣಸಿನ ಪೇಸ್ಟ್, ಗರಂಮಸಾಲ, ಚಾಟ್‌ಮಸಾಲ, ಉಪ್ಪು, ಖಾರ ಇತ್ಯಾದಿ ಸೇರಿಸಿ, ಪಕೋಡ ಹಿಟ್ಟಿನ ಹದಕ್ಕೆ ಕಲಸಿಡಿ. ಇದನ್ನು 1 ಗಂಟೆ ಕಾಲ ಹಾಗೇ ನೆನೆಯಲು ಬಿಡಿ. ಆಮೇಲೆ ದಪ್ಪ ಚಪಾತಿಯಾಗಿ ಲಟ್ಟಿಸಿ. ಇದಕ್ಕೆ ತುಪ್ಪದಲ್ಲಿ ಹುರಿದ ಗೋಡಂಬಿ ಚೂರು ಸೇರಿಸಿ ಸುರುಳಿಯಾಗಿ ಸುತ್ತಿಕೊಳ್ಳಿ. ಆ ರೋಲ್ಸ್ ನ್ನು ಚಿತ್ರದಲ್ಲಿರುವಂತೆ ಕತ್ತರಿಸಿ, ಕಾದ ಎಣ್ಣೆಯಲ್ಲಿ ಕರಿದು, ಪುದೀನಾ ಚಟ್ನಿ ಜೊತೆ ಸವಿಯಲು ಕೊಡಿ.

ಮಶ್‌ರೂಮ್ ಸ್ಪೆಷಲ್

ಸಾಮಗ್ರಿ : 250 ಗ್ರಾಂ ತಾಜಾ ಅಣಬೆ, ಅರ್ಧರ್ಧ ಸೌಟು ಗೋಡಂಬಿ ಪೇಸ್ಟ್, ರೀಫೈಂಡ್‌ ಎಣ್ಣೆ, 10-12 ಎಸಳು ಬೆಳ್ಳುಳ್ಳಿ, 2-3 ಹೆಚ್ಚಿದ ಈರುಳ್ಳಿ, 1 ಚಮಚ ಶುಂಠಿಪೇಸ್ಟ್, 3-4 ಟೊಮೇಟೊ, 2-2 ಚಿಟಕಿ ಜೀರಿಗೆ, ಅರಿಶಿನ, ಕಸೂರಿಮೇಥಿ, ಅರ್ಧ ಸೌಟು ಫ್ರೆಶ್‌ ಕ್ರೀಂ, 2-3 ಹೆಚ್ಚಿದ ಹಸಿಮೆಣಸು, ರುಚಿಗೆ ತಕ್ಕಷ್ಟು ಉಪ್ಪು, ಖಾರ, ಗರಂಮಸಾಲ, ಚಾಟ್‌ಮಸಾಲ, ಒಂದಿಷ್ಟು ಹೆಚ್ಚಿದ ಕೊ.ಸೊಪ್ಪು, ಪುದೀನಾ, ಕರಿಬೇವು.

ವಿಧಾನ : 1 ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ ಸಣ್ಣಗೆ ಹೆಚ್ಚಿದ ಬೆಳ್ಳುಳ್ಳಿ, ಈರುಳ್ಳಿ, ಕರಿಬೇವು ಹಾಕಿ ಬಾಡಿಸಿ. ಆಮೇಲೆ ಇದಕ್ಕೆ ಶುಂಠಿ ಪೇಸ್ಟ್, ಹೆಚ್ಚಿದ ಹಸಿಮೆಣಸು, ಟೊಮೇಟೊ, ಅರಿಶಿನ, ಗರಂಮಸಾಲ, ಚಾಟ್‌ಮಸಾಲ, ಉಪ್ಪು ಹಾಕಿ ಕೆದಕಬೇಕು. ನಂತರ ಹೆಚ್ಚಿದ ಅಣಬೆ ಹಾಕಿ ಬಾಡಿಸಿ, ನೀರು ಚಿಮುಕಿಸಿ ಬೇಯಲು ಬಿಡಿ. ಕೊನೆಯಲ್ಲಿ ಗೋಡಂಬಿ ಪೇಸ್ಟ್, ಕ್ರೀಂ, ಕಸೂರಿಮೇಥಿ ಹಾಕಿ ಕೈಯಾಡಿಸಿ. ಕೆಳಗಿಳಿಸಿದ ಮೇಲೆ ಕೊ.ಸೊಪ್ಪು, ಪುದೀನಾ ಉದುರಿಸಿ ಬಿಸಿಯಾಗಿ ಚಪಾತಿರೊಟ್ಟಿ ಜೊತೆ ಸವಿಯಲು ಕೊಡಿ.

ಪಿಜ್ಜಾ ಸ್ಟಿಕ್ಸ್

ಸಾಮಗ್ರಿ : 1 ಪಿಜ್ಜಾ ಬೇಸ್‌, ತುಸು ಓರಿಗ್ಯಾನೋ, ಹೆಚ್ಚಿದ 1-2 ಈರುಳ್ಳಿ, 7-8 ಬೆಳ್ಳುಳ್ಳಿ ಎಸಳು, 1 ಕ್ಯಾಪ್ಸಿಕಂ, 1 ಚಮಚ ಗ್ರೀನ್‌ ಆಲಿವ್‌, 1 ಸಣ್ಣ ಚಮಚ ಜೆಲ್ ಪೀನೋ, 1 ಸಣ್ಣ ಚಮಚ ಆಲಿವ್‌ ಆಯಿಲ್, ಒಂದಿಷ್ಟು ತುರಿದ ಚೀಸ್‌, ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸು, ಟೊಮೇಟೊ ಸಾಸ್‌, ರೆಡ್‌ ಚಿಲೀ ಸಾಸ್‌, ಟೊಬ್ಯಾಸ್ಕೊ ಸಾಸ್‌.

ವಿಧಾನ : ಒಂದು ಬಟ್ಟಲಿಗೆ 3 ಬಗೆಯ ಸಾಸ್‌, ಓರಿಗ್ಯಾನೋ, ಹೆಚ್ಚಿಕೊಂಡ ಈರುಳ್ಳಿ, ಬೆಳ್ಳುಳ್ಳಿ, ಕ್ಯಾಪ್ಸಿಕಂ, ಗ್ರೀನ್‌ ಆಲಿವ್, ಜೆಲ್‌ಪೀನೋ, ಆಲಿವ್ ಎಣ್ಣೆ, ಉಪ್ಪು, ಪುಡಿ ಮೆಣಸು ಸೇರಿಸಿ ಚೆನ್ನಾಗಿ ಬೆರೆಸಿಕೊಳ್ಳಿ. ಈ ಮಿಶ್ರಣವನ್ನು ಪಿಜ್ಜಾ ಬೇಸ್‌ ಮೇಲೆ  ಹರಡಿ. ಇದರ ಮೇಲೆ ತುರಿದ ಚೀಸ್‌ ಹರಡಿ 200 ಡಿಗ್ರಿ ಶಾಖದಲ್ಲಿ 10 ನಿಮಿಷ ಬೇಕ್‌ ಮಾಡಿ. ನಂತರ ಪಿಜ್ಜಾ ಕಟರ್‌ನಿಂದ ಇದನ್ನು ಅಗಲದ ಸ್ಟಿಕ್ಸ್ ಆಗಿ ಕತ್ತರಿಸಿ, ಬಿಸಿಯಾಗಿ ಸವಿಯಲು ಕೊಡಿ.

ಪೊಟೇಟೊ ಲೆಜೆಸ್‌ ಇಟಾಲಿಯಾನೋ

ಸಾಮಗ್ರಿ : ಅರ್ಧ ಸೌಟು ಆಲಿವ್ ಆಯಿಲ್, ಸಿಪ್ಪೆ ಸಹಿತ ಉದ್ದುದ್ದಕ್ಕೆ ಹೆಚ್ಚಿದ ಆಲೂಗಡ್ಡೆ, 7-8 ಎಸಳು ಹೆಚ್ಚಿದ ಬೆಳ್ಳುಳ್ಳಿ, ರುಚಿಗೆ ತಕ್ಕಷ್ಟು  ಉಪ್ಪು, ಮೆಣಸು, ಚಿಲೀ ಫ್ಲೇಕ್ಸ್, ಹರ್ಬ್ಸ್.

ವಿಧಾನ : ಆಲೂ ಹೋಳುಗಳನ್ನು ಬಿಸಿ ನೀರಿನಲ್ಲಿ 2 ನಿಮಿಷ ಕುದಿಸಿ ತೆಗೆಯಿರಿ. ತಕ್ಷಣ ತಣ್ಣೀರಿಗೆ ಹಾಕಿಡಿ. ನಂತರ ನೀರಿನಿಂದ ಹೊರತೆಗೆದು ಒರೆಸಿ, ಫ್ಯಾನಿನಡಿ ಒಣಗಿಸಿ. ಒಂದು ಬಟ್ಟಲಿಗೆ ಆಲಿವ್ ಆಯಿಲ್‌, ಬೆಳ್ಳುಳ್ಳಿ ಚಿಲೀ ಫ್ಲೇಕ್ಸ್, ಮೆಣಸು, ಉಪ್ಪು, ಹರ್ಬ್ಸ್ ಬೆರೆಸಿಕೊಂಡು ಇದನ್ನು ಆಲೂ ಮೇಲೆ ಚೆನ್ನಾಗಿ ಸವರಬೇಕು. ಹೀಗೆ ಅರ್ಧ ಗಂಟೆ ಮುಚ್ಚಿರಿಸಿ ಮ್ಯಾರಿನೇಟ್‌ ಆಗಲು ಬಿಡಿ. ನಂತರ ಬೇಕಿಂಗ್‌ ಟ್ರೇಗೆ ಬೆಣ್ಣೆ ಸವರಿಕೊಂಡು ಅದರಲ್ಲಿ ಆಲೂಗಳನ್ನಿರಿಸಿ, ಮೊದಲೇ ಬಿಸಿ ಮಾಡಿದ ಓವನ್ನಿನಲ್ಲಿ 180 ಡಿಗ್ರಿ ಶಾಖದಲ್ಲಿ ಬೇಕ್‌ ಮಾಡಿ. ಬಿಸಿ ಬಿಸಿಯಾಗಿ ಇದನ್ನು ಸಾಸ್‌ ಜೊತೆ ಸವಿಯಲು ಕೊಡಿ.

ಕಾಷನ್‌ ಸ್ಪೈಸ್ಡ್ ಪೊಟೇಟೋ

ಸಾಮಗ್ರಿ : ಸಿಪ್ಪೆ ರಹಿತ ಅರೆಬೆಂದ 250 ಗ್ರಾಂ ಆಲೂ, ಒಂದಿಷ್ಟು ಹೆಚ್ಚಿದ ಈರುಳ್ಳಿ, ಕೊ.ಸೊಪ್ಪು, 4-4 ಚಮಚ ಗಾರ್ಲಿಕ್‌ ಮೆಯೋನೀಸ್‌, ಕಾಷನ್‌ ಪೌಡರ್‌ (ರೆಡಿಮೇಡ್‌ ಲಭ್ಯ), ರೆಡ್‌ ಚಿಲೀ ಸಾಸ್‌, ಕಾದಾರಿದ ಗಟ್ಟಿ ಹಾಲು, ಒಗ್ಗರಣೆಗಾಗಿ ಅರ್ಧರ್ಧ ಚಮಚ ಪುಡಿಮೆಣಸು, ಚಾಟ್‌ಮಸಾಲ, ಗರಂ ಮಸಾಲ, ಚಿಲೀ ಫ್ಲೇಕ್ಸ್, ಉಪ್ಪು, ಕರಿಯಲು ರೀಫೈಂಡ್‌ ಎಣ್ಣೆ.

ವಿಧಾನ : ಆಲೂಗಳನ್ನು ಮೃದುವಾಗಿ ಅದುಮಿ ಕಾದ ಎಣ್ಣೆಯಲ್ಲಿ ಕರಿದು ತೆಗೆಯಿರಿ. ಸ್ಪೈಸಿ ಸಾಸ್‌ಗಾಗಿ ಕಾಷನ್‌ ಪೌಡರ್‌, ಮೆಯೋನೀಸ್‌, ಚಿಲೀ ಸಾಸ್‌, ಉಪ್ಪು, ಗಟ್ಟಿ ಹಾಲು ಬೆರೆಸಿಕೊಂಡು ಚೆನ್ನಾಗಿ ಗೊಟಾಯಿಸಿ. ಚಿಕ್ಕ ಬಾಣಲೆಯಲ್ಲಿ ತುಸು ಎಣ್ಣೆ ಬಿಸಿ ಮಾಡಿ ಮೆಣಸು, ಉಳಿದ ಮಸಾಲೆ ಸೇರಿಸಿ ಚಟಪಟಾಯಿಸಿ. ಕರಿದ ಆಲೂಗಳನ್ನು ಒಂದು ಪ್ಲೇಟ್‌ನಲ್ಲಿ ಜೋಡಿಸಿಕೊಂಡು ಅದರ ಮೇಲೆ ಸ್ಪೈಸಿ ಸಾಸ್‌ ಹರಡಿ, ಅದರ ಮೇಲೆ ಒಗ್ಗರಣೆ ಹರಡಬೇಕು. ಕೊನೆಯಲ್ಲಿ ಹೆಚ್ಚಿದ ಈರುಳ್ಳಿ, ಕೊ.ಸೊಪ್ಪು ಉದುರಿಸಿ ಸ್ಟಾರ್ಟರ್‌ ಆಗಿ ಸವಿಯಲು ಕೊಡಿ.

ಫ್ರೂಟಿ ಸ್ಯಾಂಡ್‌ವಿಚ್‌

ಸಾಮಗ್ರಿ : ಅರ್ಧ ಕಪ್‌ ಹಂಗ್‌ಕರ್ಡ್‌, 4 ಚಮಚ ಕ್ರೀಂ, 4 ಚಮಚ ಪುಡಿಸಕ್ಕರೆ, ಅತಿ ಸಣ್ಣಗೆ ಹೆಚ್ಚಿದ 1 ಸೇಬು, ಅರ್ಧ ಅನಾನಸ್‌, 1 ಕಪ್‌ ಸೀಡ್‌ಲೆಸ್‌ ದ್ರಾಕ್ಷಿ, ಅಗತ್ಯವಿದ್ದಷ್ಟು ಬ್ರೌನ್‌ ಬ್ರೆಡ್‌ ಸ್ಲೈಸ್‌, ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸು, ವಿನಿಗರ್‌, ಮಸ್ಟರ್ಡ್‌ ಸಾಸ್‌.

ವಿಧಾನ : 1 ಬಟ್ಟಲಿಗೆ ಮೇಲಿನ ಎಲ್ಲಾ ಸಾಮಗ್ರಿ ಬೆರೆಸಿಕೊಂಡು ಮಿಶ್ರಣ ಸಿದ್ಧಪಡಿಸಿ. ಈ ಮಿಶ್ರಣವನ್ನು ಬೆಣ್ಣೆ ಸರಿದ ಬ್ರೆಡ್‌ ಸ್ಲೈಸ್‌ಗಳಿಗೆ ಸವರಿ, ಮತ್ತೊಂದು ಸ್ಲೈಸ್‌ನಿಂದ ಅದನ್ನು ಕವರ್‌ ಮಾಡಿ ಸ್ಯಾಂಡ್‌ವಿಚ್‌ ಸಿದ್ಧಪಡಿಸಿ. ಇದನ್ನು ಬಿಸಿ ಬಿಸಿ ಕಾಫಿ, ಟೀ ಜೊತೆ ಸವಿಯಿರಿ.

Tags:
COMMENT