ಹೆಚ್ಚುತ್ತಿರುವ ಜವಾಬ್ದಾರಿಗಳನ್ನು ಗಮನದಲ್ಲಿಟ್ಟುಕೊಂಡು ಮಹಿಳೆಯರು ಡಯೆಟ್‌ ಪ್ಲಾನ್‌ನಲ್ಲಿ ಅಷ್ಟಿಷ್ಟು ಬದಲಾಣೆ ಮಾಡಿಕೊಳ್ಳುವುದರ ಜೊತೆ ಜೊತೆಗೆ ಈ ಸಂಗತಿಗಳ ಬಗೆಗೂ ಗಮನ ಹರಿಸಬೇಕು !

ಚೇಂಬರ್‌ ಆಫ್‌ ಕಾಮರ್ಸ್‌ ಅಂಡ್‌ ಇಂಡಸ್ಟ್ರಿ ವತಿಯಿಂದ ನಡೆಸಿದ ಒಂದು ಸಮೀಕ್ಷೆ ಪ್ರಕಾರ, ಭಾರತದಲ್ಲಿ ಪ್ರತಿ 4 ಮಹಿಳೆಯರಲ್ಲಿ 3 ಮಹಿಳೆಯರು ಒಂದಿಲ್ಲೊಂದು ಆರೋಗ್ಯ ಸಮಸ್ಯೆಯಿಂದ ಬಳಲುತ್ತಿದ್ದಾರೆ.`ಮಲ್ಟಿಟಾಸ್ಕಿಂಗ್‌ ಸೀರಿಯಸ್‌ಲಿ ಅಫೆಕ್ಟಿಂಗ್‌ ಕಾರ್ಪೋರೇಟ್‌ ವುಮನ್‌ ಹೆಲ್ತ್’ ಎಂಬ ಹೆಸರಿನ ಸರ್ವೆಯಿಂದ ತಿಳಿದು ಬಂದ ಸಂಗತಿಯೆಂದರೆ, ಶೇ.78ರಷ್ಟು ಉದ್ಯೋಗಸ್ಥ ಮಹಿಳೆಯರು ದೈಹಿಕವಾಗಿ ಆರೋಗ್ಯದಿಂದಿಲ್ಲ. ಅಧ್ಯಯನದ ಪ್ರಕಾರ, ಅನಿಯಮಿತ ದಿನಚರಿ ಹಾಗೂ ಕೆಟ್ಟ ಜೀವನಶೈಲಿಯ ಕಾರಣದಿಂದ ಶೇ.42ರಷ್ಟು ಮಹಿಳೆಯರು ಖಿನ್ನತೆ, ಬೆನ್ನುನೋವು, ಹೃದಯಕ್ಕೆ ಸಂಬಂಧಪಟ್ಟ ರೋಗಗಳು ಹಾಗೂ ಅತಿ ರಕ್ತದೊತ್ತಡಕ್ಕೆ ಸಿಲುಕಿದ್ದಾರೆ. ಶೇ.22 ರಷ್ಟು ಮಹಿಳೆಯರು ಭೀಕರ ರೋಗಗಳಿಂದ ಬಳಲುತ್ತಿದ್ದಾರೆ.

ಹೆಸರಾಂತ ಆಸ್ಪತ್ರೆಯೊಂದರ ಕನ್ಸಲ್ಟೆಂಟ್‌ ನ್ಯೂಟ್ರಿಷನಿಸ್ಟ್ ಡಾ. ಮಂಜರಿ ಹೀಗೆ ಹೇಳುತ್ತಾರೆ, ನಗರ ಪ್ರದೇಶದ ಮಹಿಳೆಯರು 3 ಬಗೆಯ ಸಮಸ್ಯೆಗಳನ್ನು ಎದುರಿಸುತ್ತಿದ್ದಾರೆ. ಮೊದಲನೆಯದು, ಅವರು ಉದ್ಯೋಗಸ್ಥೆಯಾಗಿರುವುದರಿಂದ ಅವರ ಬಳಿ ಸಮಯದ ಕೊರತೆ ಇದೆ. ಹೀಗಾಗಿ ಅವರಿಗೆ ತಮ್ಮ ಆರೋಗ್ಯದ ಬಗ್ಗೆ ಗಮನ ಕೊಡಲು ಆಗುತ್ತಿಲ್ಲ. ಎರಡನೆಯದು ಇಂದಿನ ಮಹಿಳೆಯರಿಗೆ ಅತಿಯಾದ ಸೌಂದರ್ಯ ಪ್ರಜ್ಞೆ ಇದೆ.

ತ್ವಚೆಯ ಮೇಲೆ ಕಂದು ಬಣ್ಣ ಉಂಟಾಗಬಾರದು ಎನ್ನುವುದು ಅವರ ಕಾಳಜಿಯಾಗಿದೆ. ಈ ಕಾರಣದಿಂದಾಗಿ ಅವರು ಬಿಸಿಲಲ್ಲಿ ಓಡಾಡಲು ಹಿಂದೇಟು ಹಾಕುತ್ತಾರೆ. ಹೀಗಾಗಿ ಅವರ ದೇಹದಲ್ಲಿ ವಿಟಮಿನ್‌ `ಡಿ’ ಕೊರತೆ ಇದೆ. ಮೂರನೇ ಸಮಸ್ಯೆ ಎಂದರೆ, ಇಂದಿನ ಮಹಿಳೆಯರು ಎಜುಕೇಟೆಡ್‌. ಹೀಗಾಗಿ ಅವರು ತಮಗೆ ಸರಿ ಎನಿಸಿದ್ದನ್ನು ಮಾತ್ರವೇ ನಂಬುತ್ತಾರೆ. ಉದ್ಯೋಗಸ್ಥೆಯಾಗಿರುವುದು ಹಾಗೂ ಎಜುಕೇಟೆಡ್‌ ಆಗಿರುವುದು ತಪ್ಪು ಎಂದು ಹೇಳುವುದು ಸರಿಯಲ್ಲ. ಆದರೆ ಕೆಲಸ ಕಾರ್ಯಗಳ ಜೊತೆ ಜೊತೆಗೆ ಆರೋಗ್ಯದ ಬಗೆಗೆ ಗಮನಹರಿಸುವುದು ಅತ್ಯವಶ್ಯಕ. ತಮ್ಮ ಎಜುಕೇಶನ್‌ನ್ನು ಸಮರ್ಪಕವಾಗಿ ಬಳಸುವುದು ಕೂಡ ಅಷ್ಟೇ ಅತ್ಯವಶ್ಯಕ.

ಅಂದಹಾಗೆ, ಇಂದಿನ ಆಧುನಿಕ ಮಹಿಳೆಯರು ಇಂಟರ್‌ನೆಟ್‌ನಲ್ಲಿ ಒಳ್ಳೆಯ ಆರೋಗ್ಯಕ್ಕೆ ಏನನ್ನು ತಿನ್ನಬೇಕು, ಏನನ್ನು ಕುಡಿಯಬೇಕು ಎನ್ನುವುದರ ಬಗ್ಗೆ ತಿಳಿದುಕೊಳ್ಳುತ್ತಾರೆ. ಅದಕ್ಕೆ ತಕ್ಕಂತೆಯೇ ಡಯೆಟ್‌ ಪ್ಲಾನ್‌ ಮಾಡುತ್ತಾರೆ. ಆದರೆ ಇದು ತಪ್ಪು ಪದ್ಧತಿ. ಇಂಟರ್‌ನೆಟ್‌ನಲ್ಲಿ ಒಂದೇ ವಿಚಾರಕ್ಕೆ ಸಂಬಂಧಪಟ್ಟಂತೆ ಅನೇಕರು ತಮ್ಮ ವಿಭಿನ್ನ ಅಭಿಪ್ರಾಯ ಮಂಡಿಸಿರುತ್ತಾರೆ. ಅದು ನಿಮಗೆ ಸೂಕ್ತವಾಗುತ್ತದೆ ಎಂದು ಹೇಳುವುದಕ್ಕೆ ಆಗುವುದಿಲ್ಲ. ನಿಮ್ಮ ದೇಹದ ಪ್ರಕಾರಕ್ಕೆ ಸರಿಹೋಗಬಹುದು ಎಂದು ಊಹಿಸುವುದು ಕಷ್ಟ. ಅದು ನಿಮ್ಮ ಮೇಲೆ ತದ್ವಿರುದ್ಧ ಪರಿಣಾಮ ಬೀರಿದರೂ ಆಶ್ಚರ್ಯಪಡಬೇಕಿಲ್ಲ. ಹೀಗಾಗಿ ಕಾಲಕಾಲಕ್ಕೆ ಕನ್ಸಲ್ಟಂಟ್‌ರಿಂದ ನಿಮ್ಮ ಡಯೆಟ್‌ ಪ್ಲಾನ್‌ ಮಾಡಿಸಿಕೊಳ್ಳಿ.

ದುರ್ಬಲಗೊಳ್ಳುವ ಆರೋಗ್ಯ

ಇಂದಿನ ದಿನಗಳಲ್ಲಿ ಮಹಿಳೆಯರು ಏಕಕಾಲಕ್ಕೆ ಹಲವು ಜವಾಬ್ದಾರಿಗಳನ್ನು ನಿಭಾಯಿಸುತ್ತಿದ್ದಾರೆ. ಅವರು ಉದ್ಯೋಗಸ್ಥೆ ಅಥವಾ ಗೃಹಿಣಿಯೇ ಆಗಿರಬಹುದು, ಅವರ ಜವಾಬ್ದಾರಿಗಳು ವರ್ಷದಿಂದ ವರ್ಷಕ್ಕೆ ಹೆಚ್ಚುತ್ತಲೇ ಹೊರಟಿವೆ. ಇದಕ್ಕೆ ಒಂದು ಮುಖ್ಯ ಕಾರಣವೆಂದರೆ, ಈಗ ಮಹಿಳೆಯರು ಹೆಚ್ಚೆಚ್ಚು ಮಾಹಿತಿ ಹೊಂದುತ್ತಿರುವುದು ಮತ್ತು ಆಧುನಿಕ ಸಲಕರಣೆಗಳನ್ನು ಉಪಯೋಗಿಸಲು ತಿಳಿದಿರುವುದು. ಆದರೆ ಒಂದೆಡೆ ಇದು ಅವರ ಕೆಲಸವನ್ನು ಸುಲಭಗೊಳಿಸುತ್ತಿದೆ. ಇನ್ನೊಂದೆಡೆ ಅದು ಅವರ ಜವಾಬ್ದಾರಿಗಳನ್ನೂ ಹೆಚ್ಚಿಸುತ್ತದೆ. ಉದಾಹರಣೆಗಾಗಿ ದ್ವಿಚಕ್ರವಾಹನ ಹಾಗೂ ಕಾರುಗಳನ್ನು ಓಡಿಸಲು ಗೊತ್ತಿರುವ ಗೃಹಿಣಿಯರು ಮಕ್ಕಳನ್ನು ಶಾಲೆಗೆ ಬಿಡುವುದು ಹಾಗೂ ಕರೆದುಕೊಂಡು ಬರುವ ಜವಾಬ್ದಾರಿ ಹೊರಬೇಕಾಗುತ್ತದೆ. ಅದೇ ರೀತಿ ಉದ್ಯೋಗಸ್ಥ ಮಹಿಳೆಯರು ಆಫೀಸಿನ ಜವಾಬ್ದಾರಿಯ ಜೊತೆ ಜೊತೆಗೆ ಮನೆಯ ಜವಾಬ್ದಾರಿಗಳನ್ನೂ ನಿಭಾಯಿಸಬೇಕಾಗುತ್ತದೆ.

ಇಂತಹ ಸ್ಥಿತಿಯಲ್ಲಿ ಅವರಿಗೆ ತಮ್ಮ ಆರೋಗ್ಯದ ಬಗ್ಗೆ ಕಾಳಜಿ ವಹಿಸಲು ಸಮಯವೇ ದೊರೆಯುವುದಿಲ್ಲ ಅಥವಾ ಅವರು ತಮ್ಮ ಕೆಲಸ ಕಾರ್ಯಗಳಲ್ಲಿ ಅದೆಷ್ಟು ದಣಿದು ಹೋಗಿರುತ್ತಾರೆಂದರೆ, ಅವರಿಗೆ ತಮ್ಮ ಬಗ್ಗೆ ಹೆಚ್ಚುವರಿಯಾಗಿ ಏನನ್ನಾದರೂ ಮಾಡಿಕೊಳ್ಳಲು ಆಲಸ್ಯ ಎನಿಸುತ್ತದೆ.

ಡಾ. ಮಂಜರಿ ಹೇಳುವುದೇನೆಂದರೆ, ಸಾಮಾನ್ಯವಾಗಿ ಮಹಿಳೆಯರು ತಮ್ಮ ಕುಟುಂಬದರ ಆರೋಗ್ಯದ ಬಗ್ಗೆ ಗಮನಹರಿಸುತ್ತಾರೆ. ಆದರೆ ತಮ್ಮ ಆರೋಗ್ಯದ ಬಗ್ಗೆ ಕಾಳಜಿ ತೋರಿಸುವುದಿಲ್ಲ. ಮುಂಜಾನೆ ಗಂಡ, ಮಕ್ಕಳು ಹಾಗೂ ಮನೆಯ ಹಿರಿಯರ ಊಟ ಉಪಾಹಾರ ತಯಾರಿಸುವುದರಲ್ಲಿ ಆಕೆಗೆ ಎಳ್ಳಷ್ಟೂ ಆಲಸ್ಯ ಕಾಡುವುದಿಲ್ಲ. ಆದರೆ ತನಗಾಗಿ ವಿಶೇಷ ಅಡುಗೆ ತಯಾರಿಸಿಕೊಳ್ಳುವುದು ಅವರಿಗೆ ಸಮಯ ಹಾಳು ಎನಿಸುತ್ತದೆ. ಹೀಗಾಗಿ ಅವರು ಮುಂಜಾನೆ ಉಪಾಹಾರವನ್ನೇ ಮಾಡುವುದಿಲ್ಲ ಅಥವಾ ಹಸಿವಾದಾಗ ಯಾವುದಾದರೂ ರೆಡಿ ಟು ಈಟ್‌ ಫುಡ್‌ ತಿನ್ನುತ್ತಾರೆ. ಅದು ಅವರಿಗೆ ಒಳ್ಳೆಯ ಪರಿಣಾಮ ಬೀರುವುದಿರಲಿ, ದೇಹದ ಮೇಲೆ ದುಷ್ಪರಿಣಾಮವನ್ನು ಉಂಟು ಮಾಡುತ್ತದೆ.

ಹೀಗಾಗಿ ನಿಮಗೂ ಅಷ್ಟಿಷ್ಟು ಸಮಯ ಕೊಟ್ಟುಕೊಳ್ಳಿ. ಮುಂಜಾನೆ ಖಾಲಿ ಹೊಟ್ಟೆಯಲ್ಲಿ ಎಲ್ಲೂ ಹೊರಗೆ ಹೋಗಬೇಡಿ. ಕೈಯಲ್ಲಿ ಒಂದಿಷ್ಟು ಡ್ರೈಫ್ರೂಟ್ಸ್ ಆದರೂ ಇಟ್ಟುಕೊಂಡು ತಿನ್ನುತ್ತಿರಿ. ಸ್ವಲ್ಪ ಎನರ್ಜಿ ಬರುತ್ತದೆ.

ಅಂದಹಾಗೆ ಬಾದಾಮಿ, ಅಖರೋಟ್‌, ಗೋಡಂಬಿ ಹಾಗೂ ಶೇಂಗಾಕಾಳು ಇವುಗಳಲ್ಲಿ ಪ್ರೋಟೀನ್ಸ್, ಕಾರ್ಬೊಹೈಡ್ರೇಟ್‌ ಮತ್ತು ಕೊಬ್ಬಿನಂಶ ಹೇರಳವಾಗಿರುತ್ತದೆ. ಕೊಬ್ಬಿನ ಹೆಸರು ಕೇಳಿ ಚಕಿತರಾಗಬೇಡಿ. ನಮ್ಮ ದೇಹಕ್ಕೆ ಒಳ್ಳೆಯ ಕೊಬ್ಬು ಅಂದರೆ ಒಮೇಗಾ 3ಯ ಅಶ್ಯಕತೆ ಇರುತ್ತದೆ. ಇದು ಮೆದುಳಿಗೆ ಅತ್ಯವಶ್ಯಕ. ಜೊತೆಗೆ ಇದನ್ನು ಕರುಳು ಮತ್ತು ಹೃದಯದ ಸುರಕ್ಷಾ ಕವಚ ಎಂದು ಹೇಳಲಾಗುತ್ತದೆ. ನಟ್ಸ್ ಪ್ರೋಟೀನ್‌ನ ಒಳ್ಳೆ ಮೂಲಗಳಾಗಿವೆ. ಇವುಗಳಲ್ಲಿ ಮೆಗ್ನೀಶಿಯಂ, ಝಿಂಕ್‌, ಕ್ಯಾಲ್ಶಿಯಂ ಮತ್ತು ವಿಟಮಿನ್‌ ಎ ಮತ್ತು ಇ ಯಲ್ಲಿ ಕಂಡುಬರುತ್ತದೆ.

ಡಾ. ಮಂಜರಿ ಹೀಗೆ ಹೇಳುತ್ತಾರೆ, ಭಾರತದಲ್ಲಿ ಪ್ರತಿವರ್ಷ 1 ಕೋಟಿಯಷ್ಟು ಅಸಿಯೋಪೊರೊಸಿಸ್‌ ಪ್ರಕರಣಗಳು ದಾಖಲಾಗುತ್ತವೆ. ಮೂಳೆಗಳಲ್ಲಿನ ಸ್ನಿಗ್ಧತೆ ಕಡಿಮೆಯಾಗುವುದರಿಂದ ಈ ರೋಗ ಉಂಟಾಗುತ್ತದೆ. 40ರ ಆಸುಪಾಸಿನ ಮಹಿಳೆಯರಿಗೆ ಇದು ಬಹಳ ತೊಂದರೆಯನ್ನುಂಟು ಮಾಡುತ್ತದೆ. ಅವರ ಮಾಂಸಖಂಡಗಳಲ್ಲಿ ಯಾವುದೇ ಶಕ್ತಿ ಉಳಿದಿರುವುದಿಲ್ಲ. ಅಂತಹ ಮಹಿಳೆಯರಿಗೆ ವಿಟಮಿನ್‌ ಹಾಗೂ ಕ್ಯಾಲ್ಶಿಯಂಯುಕ್ತ ಪದಾರ್ಥಗಳು ಬಹಳ ಉಪಯುಕ್ತ. ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ, ಶೇ.50ರಷ್ಟು ಮಹಿಳೆಯರು ರಕ್ತಹೀನತೆಗೆ ತುತ್ತಾಗಿರುತ್ತಾರೆ. ಹೀಗಾಗಿ ಕಬ್ಬಿಣಾಂವುಶಳ್ಳ ಆಹಾರ ಸೇವನೆ ಮುಖ್ಯವಾಗಿರುತ್ತದೆ.

ಇದಕ್ಕೆ ಒಂದು ಬಹುದೊಡ್ಡ ಕಾರಣವೆಂದರೆ, ಮಹಿಳೆಯರು ಕಾರ್ಬೊಹೈಡ್ರೇಟ್‌ಯುಕ್ತ ಆಹಾರಗಳನ್ನೇ ಹೆಚ್ಚಾಗಿ ಅವಲಂಬಿಸಿರುತ್ತಾರೆ. ಅವರು ಬೇಳೆ, ಅನ್ನ,ಗೋಧಿ ರೊಟ್ಟಿ ಹಾಗೂ ಬ್ರೆಡ್‌ ತಿಂದು ಹೇಗೋ ದಿನ ಕಳೆಯುತ್ತಾರೆ. ಇದೇ ಹೆಚ್ಚಿನ ಪೋಷಣಾಯುಕ್ತ ಆಹಾರ ಎಂದು ಅವರಿಗೆ ಅನಿಸತೊಡಗುತ್ತದೆ. ಆದರೆ ಇದು ತಪ್ಪು.

ಕೇವಲ ಗೋಧಿ ರೊಟ್ಟಿಯನ್ನೇ ಏಕೆ ಸೇವಿಸುವುದು? ಜೋಳ, ಸಜ್ಜೆ, ಕಡಲೆ ಇವುಗಳಲ್ಲಿ ನಾರಿನಂಶ ಹಾಗೂ ಪ್ರೋಟೀನ್‌ ಹೇರಳವಾಗಿರುತ್ತದೆ. ಹೀಗಾಗಿ ಇವನ್ನು ಕೂಡ ನಿಮ್ಮ ಆಹಾರದಲ್ಲಿ ಸೇರ್ಪಡೆ ಮಾಡಿಕೊಳ್ಳಿ. ಇವೆಲ್ಲ ಧಾನ್ಯಗಳ ಮಿಶ್ರಣ ಮಾಡಿ ಹಿಟ್ಟು ತಯಾರಿಸಿಕೊಂಡು ಅದರ ರೊಟ್ಟಿ ಸೇವನೆ ಮಾಡಬೇಕು. ಮಹಿಳೆಯರು ಹೆಚ್ಚಾಗಿ ಮಾಂಸಾಹಾರ ಸೇವನೆ ಮಾಡುವುದಿಲ್ಲ. ಈ ಕಾರಣದಿಂದಲೂ ಅವರಿಗೆ ಪ್ರೋಟೀನ್‌ ಕೊರತೆ ಬಾಧಿಸುತ್ತದೆ. ಇದರ ಕೊರತೆಯನ್ನು ಅವರು ಬೇಳೆ ಹಾಗೂ ಅರ್ಧ ಲೀಟರ್‌ ಹಾಲನ್ನು ಸೇವಿಸುವುದರ ಮೂಲಕ ಭರ್ತಿ ಮಾಡಿಕೊಳ್ಳಬಹುದು.

ಉದ್ಯೋಗಸ್ಥ ಮಹಿಳೆಯರು ಇವೆಲ್ಲವನ್ನು ಸದಾ ಸೇವಿಸುವುದಿಲ್ಲ. ಅವರು ತಮ್ಮ ಆಫೀಸ್‌ನಲ್ಲಿ ಹುರಿದ ಕಡಲೆ ಹಾಗೂ ಕೆಲವು ಹಣ್ಣುಗಳನ್ನು ಇಟ್ಟುಕೊಳ್ಳಬೇಕು. ಸಮಯ ಸಿಕ್ಕಾಗ ಅವನ್ನು ಸೇವಿಸಬೇಕು. ಗಮನದಲ್ಲಿಟ್ಟುಕೊಳ್ಳಬೇಕಾದ ಒಂದು ಸಂಗತಿಯೆಂದರೆ, ಬಹಳಷು ಆಹಾರ ಏಕಕಾಲಕ್ಕೆ ಸೇವಿಸಬೇಡಿ. 3-4 ಗಂಟೆಗಳ ಅಂತರದಲ್ಲಿ ಆಹಾರ ಸೇವನೆ ಮಾಡುವಂತಹ `ಮೀಲ್ ಪ್ಲಾನ್‌’ ಹಾಕಿಕೊಳ್ಳಿ.

ಸೂಕ್ತ ಆಹಾರದ ಜೊತೆ ವ್ಯಾಯಾಮ

ನಾನು ದಿನವಿಡೀ ಎಷ್ಟೊಂದು ಕೆಲಸ ಮಾಡುತ್ತೇನೆಂದರೆ, ನನಗೆ ಪ್ರತ್ಯೇಕವಾಗಿ ವ್ಯಾಯಾಮ ಮಾಡಬೇಕಾದ ಅಗತ್ಯವಿಲ್ಲ ಎಂಬ ಭ್ರಮೆಯಿಂದ ಮೊದಲು ಹೊರ ಬನ್ನಿ. ಅಷ್ಟೇ ಅಲ್ಲ, ನೀವು ಯಾವ ಯಾವ ಕೆಲಸಗಳನ್ನು ದಿನವಿಡೀ ಮಾಡುತ್ತೀರೋ, ಅವುಗಳಲ್ಲಿ ಬೇರೆ ಬೇರೆ ಬಗೆಯ ಒತ್ತಡಗಳು ಸೇರಿಕೊಂಡಿರುತ್ತವೆ. ಈ ಒತ್ತಡವೇ ಕಾರ್ಟಿಸೋಲ್‌ ಎಂಬ ಹಾರ್ಮೋನನ್ನು ಬಿಡುಗಡೆಗೊಳಿಸುತ್ತದೆ. ಅದು ನಮ್ಮ ರೋಗನಿರೋಧಕ ಶಕ್ತಿ, ಪಚನಕ್ರಿಯೆಯ ವ್ಯವಸ್ಥೆ ಹಾಗೂ ಚರ್ಮದ ಮೇಲೆ ದುಷ್ಪರಿಣಾಮ ಬೀರುತ್ತದೆ.

ಡಾ. ಮಂಜರಿ ಹೇಳುವುದು ಹೀಗೆ, ಎಷ್ಟೋ ಸಲ ಮಹಿಳೆಯರು ಎಂತಹದೊಂದು ಒತ್ತಡವನ್ನು ಪೋಷಿಸುತ್ತಾರೆಂದರೆ, ಅದು ವಾಸ್ತವದಲ್ಲಿ ಒತ್ತಡದ ವಿಷಯವೇ ಆಗಿರುವುದಿಲ್ಲ. ಯಾವ ಕೆಲಸ ನಮ್ಮ ಅಧೀನದಲ್ಲಿರುತ್ತದೋ ಹಗಲು ರಾತ್ರಿಯಾದರೂ ಸರಿ, ಒಳ್ಳೆಯ ಮನಸ್ಸಿನಿಂದ ಮಾಡಿದರೆ ಅದು ಖಂಡಿತ ಆಗಿಯೇ ಆಗುತ್ತದೆ. ಅದರ ಬಗ್ಗೆ ಒತ್ತಡ ಸೃಷ್ಟಿಸಿಕೊಳ್ಳುವುದರಿಂದ ಯಾವುದೇ ಪ್ರಯೋಜನ ಆಗದು. ಹೀಗಾಗಿ ಒತ್ತಡ ಕಡಿಮೆ ಮಾಡಿಕೊಳ್ಳಿ ಮತ್ತು ಸಾಧಾರಣ ವ್ಯಾಯಾಮವನ್ನು ನಿಮ್ಮ ಜೀವನಶೈಲಿಯ ಭಾಗವಾಗಿಸಿಕೊಳ್ಳಿ.

ವ್ಯಾಯಾಮದ ಅರ್ಥ ಭಾರಿ ತೂಕದ ಡಂಬಲ್ಸ್ ಎತ್ತುವುದಲ್ಲ ಅಥವಾ ಪುಶ್‌ಅಪ್‌ ಹೊಡೆಯುವುದಲ್ಲ. ಪ್ರತಿದಿನ 30 ನಿಮಿಷಗಳ ನಡಿಗೆ ಹಾಗೂ ಪ್ರತಿಯೊಂದು ಕೆಲಸವನ್ನೂ ಕೈಯಿಂದ ಮಾಡುವುದರ (ಯಂತ್ರಗಳ ನೆರವಿಲ್ಲದೆ) ಮೂಲಕ ವ್ಯಾಯಾಮ ಮಾಡಿದಂತಾಗುತ್ತದೆ.

ಏಷ್ಯನ್‌ ಇನ್‌ಸ್ಟಿಟ್ಯೂಟ್‌ ಆಫ್‌ ಮೆಡಿಕಲ್ ಸೈನ್ಸ್ ನ ಅಭಿಷೇಕ್‌ ಹೀಗೆ ಹೇಳುತ್ತಾರೆ, ಪುರುಷರಿಗೆ ಹೋಲಿಸಿದರೆ ಮಹಿಳೆಯರ ಮೆಟಬಾಲಿಸಂ ಪ್ರಕ್ರಿಯೆ ಸಾಕಷ್ಟು ನಿಧಾನವಾಗಿರುತ್ತದೆ. ಹೀಗಾಗಿ ತೂಕ ಕಡಿಮೆ ಮಾಡಿಕೊಳ್ಳುವುದು ಅವರಿಗೆ ಸ್ವಲ್ಪ ಕಷ್ಟಕರ ವಿಷಯವೇ ಸರಿ. ಆ ಕಾರಣದಿಂದ ಮನೆಯ ಕೆಲಸ ಕಾರ್ಯಗಳನ್ನು ಕೆಲಸಗಾರರ ಸಹಾಯದಿಂದ ಮಾಡಿಕೊಳ್ಳದೆ ನೀವೇ ಸ್ವತಃ ಮಾಡಿಕೊಳ್ಳಿ.

ಮನೆಯ ಸ್ವಚ್ಛತೆಯ ಕೆಲಸಕ್ಕೆ ಕೆಲಸದವರನ್ನು ಇಟ್ಟುಕೊಳ್ಳಬೇಡಿ. ನೀವು ಎಷ್ಟು ಕೆಲಸ ಮಾಡುತ್ತೀರೊ, ಕ್ಯಾಲೋರಿ ಅಷ್ಟು ಖರ್ಚಾಗುತ್ತದೆ.

ಅದೇ ರೀತಿ ನೀವು ಉದ್ಯೋಗಸ್ಥ ಮಹಿಳೆಯಾಗಿದ್ದರೆ, ನಿಮ್ಮ ಹೆಚ್ಚಿನ ಸಮಯ ಆಫೀಸ್‌ನಲ್ಲಿಯೇ ಕಳೆಯುತ್ತದೆ. ಆಫೀಸ್‌ನಲ್ಲಿದ್ದಾಗ ಲಿಫ್ಟ್ ಬಳಸುವ ಬದಲು ಮೆಟ್ಟಿಲುಗಳನ್ನು ಉಪಯೋಗಿಸಿ. ನಿಮಗೆ ಸಮಯ ಸಿಕ್ಕಾಗೆಲ್ಲ ಆಫೀಸ್‌ನ ಪ್ರಾಂಗಣದಲ್ಲಿಯೇ ಅಷ್ಟಿಷ್ಟು ಸುತ್ತಾಡಿ. ಹೀಗೆ ಸುತ್ತಾಡುವುದರಿಂದಲೇ ಕ್ಯಾಲೋರಿ ಬರ್ನ್‌ ಆಗುತ್ತದೆ. ಚೆನ್ನಾಗಿ ನೀರು ಕುಡಿಯುವುದರಿಂದ, ಚೆನ್ನಾಗಿ ಅಗಿದು ತಿನ್ನುವುದರಿಂದಲೂ ಕ್ಯಾಲೋರಿ ಬರ್ನ್‌ ಆಗುತ್ತದೆ.

ಕ್ಯಾಲೋರಿ ಬರ್ನ್‌ ಮಾಡುವುದರ ಜೊತೆಗೆ ಸ್ಟ್ರೆಚ್ ಎಕ್ಸರ್‌ಸೈಜ್‌ ಮಾಡಬಹುದು. ನೀವು ನಿಮ್ಮ ಸೀಟ್‌ನಲ್ಲಿಯೇ ಕುಳಿತು ಹೀಗೆ ಮಾಡಲು ಆಗದು. ಏಕೆಂದರೆ ಅದು ಆಫೀಸ್‌ ಶಿಷ್ಟಾಚಾರಕ್ಕೆ ವಿರುದ್ಧವಾದುದು. ಆದರೆ ಬಾಥ್‌ರೂಮಿಗೆ ಹೋದಾಗ ಇಲ್ಲಿ ಕ್ಯಾಂಟೀನ್‌ಗೆ ಹೋಗುವ ಸಮಯದಲ್ಲಿ ಕೈಗಳನ್ನು ಸ್ಟ್ರೆಚ್‌ ಮಾಡಬಹುದು. ಇದರಿಂದಾಗಿ ಕೈಗಳ ನೋವು ದೂರವಾಗುತ್ತದೆ. ಇದರ ಹೊರತಾಗಿ ನೀವು ಕುಳಿತುಕೊಳ್ಳುವ ಭಂಗಿ ಕೂಡ ಸರಿಯಾಗಿರಬೇಕು. ಏಕೆಂದರೆ ತಪ್ಪು ಭಂಗಿಯಲ್ಲಿ ಕುಳಿತುಕೊಳ್ಳುವುದರಿಂದ ನಿಮ್ಮ ಬೆನ್ನೆಲುಬಿನ ಮೇಲೆ ಅದರ ದುಷ್ಪರಿಣಾಮ ಉಂಟಾಗುತ್ತದೆ.

ಫಿಟ್ನೆಸ್‌ ಟ್ರೇನರ್‌ ರಾಜೇಶ್‌ ಹೇಳುವುದೇನೆಂದರೆ, ನಮ್ಮ ದೇಹ ಸಂಪೂರ್ಣವಾಗಿ ಬೆನ್ನು ಮೂಳೆಯ ಮೇಲೆಯೇ ಅಲಂಬಿಸಿರುತ್ತದೆ. ಒಂದು ವೇಳೆ ನಾವು ಸರಿಯಾದ ಭಂಗಿಯಲ್ಲಿ ಕುಳಿತುಕೊಳ್ಳದೇ ಇದ್ದರೆ ಬೆನ್ನುನೋವು ಉಂಟಾಗುವುದು ಸಹಜವೇ ಆಗಿದೆ. ಕುಳಿತುಕೊಳ್ಳುವ ಭಂಗಿಯ ಹೊರತಾಗಿ ಬೊಜ್ಜು ಕೂಡ ನಮ್ಮ ಬೆನ್ನುಮೂಳೆಯ ಮೇಲೆ ದುಷ್ಪರಿಣಾಮ ಬೀರುತ್ತದೆ. ಹೀಗಾಗಿ ನೀವು ಸೇವಿಸುವ ಆಹಾರದ ಅಭ್ಯಾಸಗಳ ಮೇಲೆ ನಿಯಂತ್ರಣವಿರಲಿ. ಫಿಟ್ನೆಸ್‌ ಎಂಬುದು ಶೇ.80ರಷ್ಟು ಸೂಕ್ತ ಆಹಾರ ಹಾಗೂ ಶೇ.20ರಷ್ಟು ವರ್ಕೌಟ್‌ನ್ನು ಅವಲಂಬಿಸಿರುತ್ತದೆ. ಮಹಿಳೆಯರು ಆಫೀಸು, ಮನೆಯ ಹೊಣೆಗಾರಿಕೆಯ ಜೊತೆ ಜೊತೆಗೆ ತಮ್ಮ ಆರೋಗ್ಯದ ಬಗೆಗೂ ಆದ್ಯತೆ ಕೊಡಬೇಕು. ಏಕೆಂದರೆ ನಿಮ್ಮ ಆರೋಗ್ಯ ಚೆನ್ನಾಗಿದ್ದರಷ್ಟೇ ನೀವು ಕೆಲಸವನ್ನು ಸಲೀಸಾಗಿ ಮಾಡಲು ಸಾಧ್ಯವಾಗುತ್ತದೆ, ಆಗ ಮಾತ್ರ ನೀವು ಯಶಸ್ವೀ ಮಹಿಳೆ ಎನಿಸಲು ಸಾಧ್ಯ!

– ಅನುರಾಧಾ

Tags:
COMMENT