ಈ ಹೊಸ ವರ್ಷದಲ್ಲಿ ನಿಮ್ಮ ಮುಖ್ಯ ಸಂಕಲ್ಪ ಆರೋಗ್ಯ ಸುಧಾರಣೆ ಆಗಿದ್ದರೆ, ಸಿರಿಧಾನ್ಯ ನಿಮ್ಮ ಪ್ರಮುಖ ಆಹಾರ ಆಗಲಿದೆ. ಅದರ ಲಾಭಗಳ ಕುರಿತು ವಿವರವಾಗಿ ತಿಳಿಯೋಣವೇ….?
ಹೊಸ ವರ್ಷ ಬಂದೊಡನೆ ಯಾವುದಾದರೂ ಒಂದು ಹೊಸ ಸಂಕಲ್ಪ ಕೈಗೊಳ್ಳುವುದು ರೂಢಿ. ಈ ವರ್ಷ ಉತ್ತಮ ಆರೋಗ್ಯ ಹೊಂದೋಣ ಎಂಬುದೇ ನಿಮ್ಮ ಮಹತ್ವಪೂರ್ಣ ಸಂಕಲ್ಪ ಆಗಿದ್ದರೆ, ನೀವು ಎಂಥ ಆಹಾರ ಸೇವಿಸುತ್ತಿದ್ದೀರಿ ಎಂಬುದರ ಕಡೆ ಗಮನ ಕೊಡಬೇಕಾಗುತ್ತದೆ. ಹೀಗಾಗಿ ನೀವು ಸಹ ಹೆಲ್ದಿ ಆಪ್ಶನ್ ಗಾಗಿ ಹುಡುಕಾಡುತ್ತಿದ್ದರೆ, `ಸಿರಿಧಾನ್ಯ’ ಉತ್ತಮ ಆಯ್ಕೆಯಾಗಲಿದೆ. ಮಿಲೆಟ್ಸ್ ಅಥವಾ ಸಿರಿಧಾನ್ಯಗಳು ಒಂದು ಬಗೆಯ ದೊಡ್ಡ ಗಾತ್ರದ ಧಾನ್ಯಗಳಾಗಿವೆ. ಇವು ಹೆಚ್ಚುಕಡಿಮೆ ಗೋಧಿ, ಅಕ್ಕಿ ಗಾತ್ರಕ್ಕೆ ಸಮನವಾಗಿರುತ್ತವೆ. ಆದರೆ ಇವುಗಳಲ್ಲಿ ಅಧಿಕ ಪೌಷ್ಟಿಕಾಂಶಗಳಿದ್ದು ಆರೋಗ್ಯಕರ ಎನಿಸುತ್ತವೆ. ಸಿರಿಧಾನ್ಯಗಳಲ್ಲಿ ಹಲವು ಬಗೆ ಇವೆ. ರಾಗಿ, ಜೋಳ, ನವಣೆ, ಸಜ್ಜೆ, ಸಾಮೆ, ಅರ್ಕ, ಊದಲು, ಕೊರಲೆ, ಬರಗು ಇತ್ಯಾದಿ.
ಮಿಲೆಟ್ಸ್ ನ ಉತ್ತಮಿಕೆ ಎಂದರೆ ಇದನ್ನು ಸೇವಿಸುವುದರಿಂದ ಎಂದೂ ಬೋರ್ ಆಗುವುದಿಲ್ಲ. ಇದು ಹಲವು ರೂಪಗಳಲ್ಲಿ ಲಭ್ಯ. ಇದನ್ನು ಸುಲಭವಾಗಿ ಅಡುಗೆಯಲ್ಲಿ ಬಳಸಿಕೊಳ್ಳಬಹುದು. ಎಲ್ಲಾ ಬಗೆಯ ಮಿಲೆಟ್ಸ್ ಬೇರೆ ಬೇರೆ ಉತ್ತಮ ಪೌಷ್ಟಿಕಾಂಶಗಳಿಂದ ತುಂಬಿ ತುಳುಕುತ್ತವೆ.
ಇವೆಲ್ಲ ನಮ್ಮ ಆರೋಗ್ಯಕ್ಕೆ ಖಂಡಿತಾ ಹೆಚ್ಚು ಪೂರಕ, ಪೌಷ್ಟಿಕಾಂಶಗಳ ವಿಷಯದಲ್ಲಿ ಸಂದೇಹವೇ ಇಲ್ಲ. ಹೀಗಾಗಿ ಇವು `ಸೂಪರ್ ಗ್ರೇನ್ಸ್’ ರೂಪದಲ್ಲಿ ಹೆಚ್ಚು ಜನಪ್ರಿಯ. ನಿಮ್ಮ ಆಹಾರದಲ್ಲಿ ಪ್ರತಿದಿನ ಈ ಸಿರಿಧಾನ್ಯ ಬೆರೆಸಿಕೊಂಡು, 100% ನಿಮ್ಮ ಆರೋಗ್ಯವನ್ನು ಸುಧಾರಿಸಿಕೊಳ್ಳಿ.
ಸಿರಿಧಾನ್ಯಗಳಲ್ಲಿ ಹಲವು ಬಗೆ
ಜೋಳ : ಇದು ಮೆಕ್ಕೆಜೋಳ, ಬಿಳಿ ಜೋಳ ಎರಡೂ ರೂಪಗಳಲ್ಲಿ ಲಭ್ಯ. ಇದರಿಂದ ಹಿಟ್ಟು ಮಾಡಿ ರೊಟ್ಟಿ ತಟ್ಟುವುದು, ಉತ್ತರ ಕರ್ನಾಟಕದವರ ಉಸಿರಾಗಿದೆ. ಈ ಸಿರಿಧಾನ್ಯವನ್ನು ನಿಮ್ಮದಾಗಿಸಿಕೊಂಡು ಹೆಚ್ಚಿನ ಆರೋಗ್ಯ ಹೊಂದಿರಿ. ಇದು ಭಾರತದಾದ್ಯಂತ ಸುಲಭ ಲಭ್ಯ. ಇದನ್ನು ಬಿಸಿಯಾದ ಮೃದು ರೊಟ್ಟಿ, ಖಡಕ್ ರೊಟ್ಟಿ, ದೋಸೆ, ಮುದ್ದೆ ರೂಪಗಳಲ್ಲಿ ಸೇವಿಸಬಹುದು. ಇದು ಫೈಬರ್, ಪ್ರೋಟೀನ್ ಅಂಶಗಳಿಗೆ ಉತ್ತಮ ಸ್ರೋತವಾಗಿದೆ. ಇದು 100% ಗ್ಲೂಟೆನ್ ಫ್ರೀ ಆಗಿದ್ದು, ಮಧುಮೇಹಿಗಳಿಗೆ ವರದಾನವಾಗಿದೆ.
ಸಜ್ಜೆ : ಇದು ರೊಟ್ಟಿಗೆ ಹೇಳಿ ಮಾಡಿಸಿದ ಧಾನ್ಯ. ಇದರಲ್ಲಿ ವಿಟಮಿನ್ಸ್ ಹೇರಳವಾಗಿದ್ದು, ಫಾಲೆಟ್ಆ್ಯಂಟಿ ಆಕ್ಸಿಡೆಂಟ್ಸ್ ಗಳು ಧಾರಾಳ ಅಡಗಿವೆ. ಇದರಿಂದ ಪೊಂಗಲ್ ತರಹದ ಖಿಚಡಿ, ಇದರ ಹಿಟ್ಟಿನ ದೋಸೆ ಸಹ ಅಷ್ಟೇ ಫೇಮಸ್.
ರಾಗಿ : ನಮ್ಮ ಕರ್ನಾಟಕದ ಮಂದಿಗೆ ರಾಗಿಯ ಪರಿಚಯ ಹೊಸದಾಗಿ ಆಗಬೇಕಿಲ್ಲ. ಅಂದಿಗೂ ಇಂದಿಗೂ ನಮ್ಮ ಹಳ್ಳಿಗಳಲ್ಲಿ ರಾಗಿಯ ಮುದ್ದೆ, ರೊಟ್ಟಿ, ದೋಸೆಗಳಿಲ್ಲದೆ ಏನೂ ನಡೆಯದು. ಇದು ಉಚ್ಚ ಪ್ರೋಟೀನ್, ಕ್ಯಾಲ್ಶಿಯಂಗಳಿಗೆ ಉತ್ತಮ ಆಕರವಾಗಿದೆ. ನಮ್ಮ ರಾಜ್ಯ ಮಾತ್ರವಲ್ಲದೆ, ದಕ್ಷಿಣ ಭಾರತದಲ್ಲಿ ಎಲ್ಲೆಡೆ ಮನೆಮಾತಾಗಿರುವ ರಾಗಿ ಇದೀಗ `ಸಿರಿಧಾನ್ಯ’ವಾಗಿ ಉತ್ತರ ಭಾರತಕ್ಕೂ ದಾಂಗುಡಿ ಇಟ್ಟಿದೆ. ರಾಗಿಯ ಇಡ್ಲಿ, ಒತ್ತು ಶ್ಯಾವಿಗೆ ಸಹ ಹೆಚ್ಚು ಜನಪ್ರಿಯತೆ ಗಳಿಸುತ್ತಿದೆ.
ಕೊರಲೆ : ಇದು ರವೆ ರೂಪದಲ್ಲಿ ಹೆಚ್ಚು ಜನಪ್ರಿಯ. ಹಾಗಾಗಿ ಇದರ ಉಪ್ಪಿಟ್ಟು, ಖಿಚಡಿ, ದೋಸೆಗಳು ಎಲ್ಲರಿಗೂ ಇಷ್ಟ. ಇದು ಫೈಬರ್, ವಿಟಮಿನ್ ಗಳ ಉತ್ತಮ ಸ್ರೋತವಾಗಿದೆ.
ಬರಗು : ಇದು ಪ್ರೋಸೋ ರಾಗಿ ಎಂದೇ ಪ್ರಸಿದ್ಧ. ಧಾರಾಳ ಮೆಗ್ನೀಶಿಯಂ ಹೊಂದಿದ್ದು, ಇದು ನಮ್ಮ ದೇಹಕ್ಕೆ ಗುಡ್ ಕೊಲೆಸ್ಟ್ರಾಲ್ ಒದಗಿಸುತ್ತದೆ, ಬ್ಯಾಡ್ ಕೊಲೆಸ್ಟ್ರಾಲ್ ನ್ನು ತಗ್ಗಿಸುತ್ತದೆ. ವಿಟಮಿನ್, ಮಿನರಲ್ಸ್, ಪ್ರೋಟೀನ್ ಗಳಿಂದಲೂ ಸಮೃದ್ಧವಾದ ಇದು ಉಪ್ಪಿಟ್ಟು, ಖಿಚಡಿ, ಪಲಾವ್ ತಯಾರಿಸಲು ಸಹಾಯಕ.
ಸಾಮೆ ಅಕ್ಕಿ : ಲಿಟಲ್ ಮಿಲೆಟ್ ಎಂದು ಗುರುತಿಸಲ್ಪಡುವ ಸಾಮೆ ಅಕ್ಕಿ ಉತ್ತಮ ಜೀರ್ಣಶಕ್ತಿಗೆ ಪೂರಕ. ಹೈ ಫೈಬರ್ ಹೊಂದಿದ್ದು, ದೇಹ ತೂಕ ತಗ್ಗಿಸಲು ಹೆಚ್ಚು ನೆರವಾಗುತ್ತದೆ. ಉತ್ತಮ ಪ್ರೋಟೀನ್ ಕಾರಣ, ಅಂಗಾಂಶಗಳ ರಿಪೇರಿಗೆ ಮೂಲ. ಕೊಲೆಸ್ಟ್ರಾಲ್ ನೀಗಿಸಿ, ಆಸ್ತಮಾ ದೂರ ಮಾಡುತ್ತದೆ. ಇದರ ಹಿಟ್ಟನ್ನು ರೊಟ್ಟಿ, ದೋಸೆಗಳಿಗೆ ಬಳಸಬಹುದು.
ಅರ್ಕ (ಹಾರಕ) : ಕೋಡೊ ಮಿಲೆಟ್ ಎಂದೇ ಗುರುತಿಸಲ್ಪಡುವ ಅರ್ಕ ಸಿರಿಧಾನ್ಯ ಫೈಬರ್ ರಿಚ್ ಆಗಿದ್ದು, ಬ್ಲಡ್ ಶುಗರ್ ಲೆವೆಲ್ ಕಂಟ್ರೋಲ್ ಮಾಡಲು ಹೆಚ್ಚು ನೆರವಾಗುತ್ತದೆ. ಮಧುಮೇಹಿಗಳಿಗೆ ಇದು ವರದಾನ. ಇದರ ಹಿಟ್ಟು ರೊಟ್ಟಿ, ದೋಸೆ, ಸಿಹಿ ವ್ಯಂಜನಗಳಿಗೂ ಒದಗುತ್ತದೆ.
ಊದಲು : ಇದು ಮಧುಮೇಹಿಗಳು, ಹೃದ್ರೋಗಿಗಳಿಗೆ ಬಹಳ ಸಹಾಯ ಮಾಡುತ್ತದೆ. ಇದರಲ್ಲಿ 50-60% ಕಾರ್ಬೋಹೈಡ್ರೇಟ್ ತುಂಬಿರುವುದರಿಂದ, ಸಹಜವಾಗಿ ಅಕ್ಕಿಯ ಬಳಕೆ ತಗ್ಗಿಸಬಹುದು. ಹೆಲ್ದಿ ಫ್ಯಾಟ್ಸ್, ರಿಚ್ ಪ್ರೋಟೀನ್ ಗಳಿಂದ ಸಮೃದ್ಧ, ಮೂಳೆಗಳ ಸದೃಢತೆಗೆ ಆಧಾರ. ಹೈಪೋಥೈರಾಯಿಡ್ ರೋಗಿಗಳು ಇದನ್ನು ಬಳಸಬಾರದು.
ನವಣೆ : ಫಾಕ್ಸ್ ಟೇಲ್ ಮಿಲೆಟ್ ಎಂದೇ ಪ್ರಸಿದ್ಧವಾಗಿರುವ ನಮ್ಮ ಉ. ಕರ್ನಾಟಕದ ಪ್ರಧಾನ ಧಾನ್ಯವಾದ ನವಣೆ ವಿಟಮಿನ್ಸ್ ನಿಂದ ಸಮೃದ್ಧವಾಗಿದೆ. ನರರೋಗ, ಹೃದ್ರೋಗಗಳನ್ನು ತಗ್ಗಿಸುವಲ್ಲಿ ಪೂರಕ. ನಮ್ಮ ಹೇರ್ಸ್ಕಿನ್ ಗ್ರೋತ್ ಗೆ ಇದು ಅತ್ಯಗತ್ಯ. ಇದರ ಹಿಟ್ಟಿನಿಂದ ರೊಟ್ಟಿ, ದೋಸೆ ಎಲ್ಲೆಡೆ ಜನಪ್ರಿಯ.
ಗೋಧಿಯನ್ನು ಬೀಸಲು ಕೊಡುವಾಗ ಅದರ ಜೊತೆ ಪ್ರತಿಯೊಂದು ಸಿರಿಧಾನ್ಯವನ್ನೂ ಅಲ್ಪ ಪ್ರಮಾಣದಲ್ಲಿ ಬೆರೆಸಿ ಬಳಸಿಕೊಳ್ಳುವುದರಿಂದ, ರೆಡಿಮೇಡ್ ಮಲ್ಟಿಗ್ರೇನ್ ಆಟಾಗೆ ಮೊರೆಹೋಗುವುದು ತಪ್ಪುತ್ತದೆ. ಇದನ್ನು ಜನ ಕ್ರಮೇಣ ತಮ್ಮ ದೈನಂದಿನ ಆಹಾರದಲ್ಲಿ ರೊಟ್ಟಿ, ಚಪಾತಿ ರೂಪದಲ್ಲಿ ಬಳಸಿಕೊಳ್ಳಬೇಕು.
ಸಿರಿಧಾನ್ಯಗಳಿಂದ ಆರೋಗ್ಯ : ಮಿಲೆಟ್ಸ್ ಹಲವು ರೀತಿಯಲ್ಲಿ ನಮ್ಮ ಆರೋಗ್ಯಕ್ಕೆ ಪೂರಕ. ಮಧುಮೇಹ, ಹೃದ್ರೋಗ, ನರಗಳ ದೌರ್ಬಲ್ಯ ಇವೆಲ್ಲ ಕ್ರಮೇಣ ದೂರಾಗುತ್ತದೆ. ಸೌಂದರ್ಯದ ದೃಷ್ಟಿಯಿಂದಲೂ ಕೂದಲ ಬೆಳವಣಿಗೆ ಮತ್ತು ಕಾಂತಿಯುತ ಚರ್ಮಕ್ಕಾಗಿ ಇದು ಅತ್ಯಗತ್ಯ.
ಪೌಷ್ಟಿಕತೆ : ಮಿಲೆಟ್ಸ್ ನಲ್ಲಿ ವಿಟಮಿನ್, ಸಿ ಮಾತ್ರಲ್ಲದೆ ಮಿನರಲ್ಸ್, ಫಾಸ್ಛರಸ್, ಪೊಟ್ಯಾಶಿಯಂ, ಆ್ಯಂಟಿ ಆಕ್ಸಿಡೆಂಟ್ಸ್, ನಿಯಾಸಿನ್, ಕ್ಯಾಲ್ಶಿಯಂ, ಕಬ್ಬಿಣಾಂಶ, ಪ್ರೋಟೀನ್, ನಾರಿನಂಶಗಳು ಸಮೃದ್ಧವಾಗಿದೆ. ಅಂದ್ರೆ ಇದು ನಮ್ಮ ದೇಹಕ್ಕೆ ಬೇಕಾದ ಎಲ್ಲಾ ಮಹತ್ವಪೂರ್ಣ ಪೌಷ್ಟಿಕಾಂಶಗಳನ್ನೂ ಒದಗಿಸುತ್ತದೆ ಎಂದೇ ಅರ್ಥ. ಇಂದು ನಗರ ಜೀವನದಲ್ಲಿ ಹಾಸುಹೊಕ್ಕಾಗಿರುವ ರಕ್ತದೊತ್ತಡ, ಶುಗರ್ ಕಂಟ್ರೋಲ್ ಮಾಡಿ, ಆರೋಗ್ಯ ಸುಧಾರಿಸಿ ಜನರ ಜೀವನಶೈಲಿ ಸರಿಪಡಿಸುತ್ತದೆ.
ದೇಹತೂಕ ನಿಯಂತ್ರಣ : ನಗರ ಜೀವನದ ಅತಿ ದೊಡ್ಡ ಸಮಸ್ಯೆ ಆಗಿರುವ ಸ್ಥೂಲತೆಯ ನಿವಾರಣೆಗೆ ಮಿಲೆಟ್ಸ್ ರಾಮಬಾಣವಾಗಿದೆ. ಇದರಿಂದ ಸಹಜವಾಗಿ ತೂಕ ತಗ್ಗುತ್ತದೆ, ಸೈಡ್ ಎಫೆಕ್ಟ್ಸ್ ಖಂಡಿತಾ ಇಲ್ಲ. ಇದರಲ್ಲಿ ತುಂಬಿರುವ ಫೈಬರ್ ಹಸಿವನ್ನು ತಗ್ಗಿಸುತ್ತದೆ.
ಹೃದ್ರೋಗದ ಸಮಸ್ಯೆ : ಮಿಲೆಟ್ಸ್ ನಿಂದ ಬ್ಯಾಡ್ ಕೊಲೆಸ್ಟ್ರಾಲ್ ಎಷ್ಟೋ ತಗ್ಗಿ, ಅದೇ ಸಮಯಕ್ಕೆ ಗುಡ್ ಕೊಲೆಸ್ಟ್ರಾಲ್ ಮೈಗೂಡುತ್ತದೆ. ಹೀಗಾಗಿ ಹೃದ್ರೋಗದ ಅಪಾಯ ಎಷ್ಟೋ ತಗ್ಗುತ್ತದೆ. ಇದರಲ್ಲಿನ ಆ್ಯಂಟಿ ಆಕ್ಸಿಡೆಂಟ್ಸ್ ಹೃದಯದ ಆರೋಗ್ಯ ಕಾಪಾಡಲು ಹೆಚ್ಚು ಪೂರಕ. ಇದರಿಂದಾಗಿ ಹೃದ್ರೋಗದ ರಿಸ್ಕ್ ಎಷ್ಟೋ ಕಡಿಮೆ ಆಗುತ್ತದೆ.
ಮಧುಮೇಹಿಗಳಿಗೆ ವರದಾನ : ಮಿಲೆಟ್ಸ್ ನಲ್ಲಿ ಗ್ಲೈಸೆಮಿಕ್ ಇಂಡೆಕ್ಸ್ ಕಡಿಮೆ ಇರುತ್ತದೆ. ಇದರರ್ಥ, ಇದು ರಕ್ತದಲ್ಲಿನ ಸಕ್ಕರೆಯ ಪ್ರಮಾಣಕ್ಕೆ ಎಂದೂ ಹಾನಿ ಮಾಡುವುದಿಲ್ಲ. ಹೀಗಾಗಿ ಸದಾ ಅಕ್ಕಿ, ಗೋಧಿ ಸೇವಿಸುವ ಬದಲು ಮಧುಮೇಹಿಗಳು ಧಾರಾಳವಾಗಿ ಮಿಲೆಟ್ಸ್ ಸೇವಿಸಬಹುದು.
ಕ್ಯಾನ್ಸರ್ ಪ್ರತಿರೋಧಕ : ಮಿಲೆಟ್ಸ್ ನಲ್ಲಿನ ಆ್ಯಂಟಿ ಆಕ್ಸಿಡೆಂಟ್ಸ್ ನಿಂದಾಗಿ ಕ್ಯಾನ್ಸರ್ ವಿರುದ್ಧ ಹೋರಾಡಲು ಹೆಚ್ಚಿನ ಶಕ್ತಿ ದೊರಕುತ್ತದೆ.
ಹೊಟ್ಟೆಗೆ ಹಿತಕರ : ಸಿರಿಧಾನ್ಯದಲ್ಲಿ ತುಂಬಿರುವ ನಾರಿನಂಶದಿಂದಾಗಿ, ಅದು ಜೀರ್ಣವಾಗಿ ರಕ್ತದಲ್ಲಿ ಸುಲಭವಾಗಿ ವಿಲೀನವಾಗಲು ನೆರವಾಗುತ್ತದೆ. ಇದು ಪ್ರಿಬಯೋಟಿಕ್ ರೂಪದಲ್ಲಿ ಕಾರ್ಯ ನಿರ್ವಹಿಸುತ್ತಾ, ಕರುಳಿಗೆ ಗುಡ್ ಬ್ಯಾಕ್ಟೀರಿಯಾ ಪ್ರವೇಶಿಸಲು ದಾರಿ ಮಾಡುತ್ತದೆ. ಇಡಿಯಾದ ಧಾನ್ಯವಾಗಿ ಇದನ್ನು ಬಳಸುವುದರಿಂದ, ಫೈಬರ್ ಅಂಶ ಪ್ರಧಾನವಾಗಿ ಉಳಿಯುತ್ತದೆ. ಮಿಲೆಟ್ಸ್ ನಲ್ಲಿನ ಧಾರಾಳ ನಾರಿನಂಶ ಮಲಬದ್ಧತೆಯನ್ನು ಓಡಿಸುತ್ತದೆ.
ಗ್ಲೂಟೆನ್ ಮುಕ್ತ ಆಹಾರ : ನಿಮಗೆ ಸಿಲಿಯೇಕ್ ರೋಗ ಅಥವಾ ಗ್ಲೂಟೆನ್ ಸಂವೇದನಾಶೀಲತೆ ಇದ್ದರೆ, ಮಿಲೆಟ್ಸ್ ಸೇವನೆ ನಿಮಗಿಲ್ಲಿ ಉತ್ತಮ ಆಯ್ಕೆಯಾಗಿದೆ.
ಆ್ಯಂಟಿ ಆಕ್ಸಿಡೆಂಟ್ಸ್ : ಮಿಲೆಟ್ಸ್ ನಲ್ಲಿ ಆ್ಯಂಟಿ ಆಕ್ಸಿಡೆಂಟ್ಸ್ ಧಾರಾಳ ತುಂಬಿರುವುದರಿಂದ, ಇದರ ಸೇವನೆ ಹಳೆಯ ವಾಸಿಯಾಗದ ರೋಗಗಳಿಂದ ಮುಕ್ತಿ ಕೊಡಿಸುತ್ತದೆ.
ಮೂಳೆಗಳ ಸದೃಢತೆ : ನಮ್ಮ ದೇಹಕ್ಕೆ ಅತ್ಯಗತ್ಯವಾದ ಖನಿಜಾಂಶಗಳಾದ ಕ್ಯಾಲ್ಶಿಯಂ, ಫಾಸ್ಛರಸ್ ಮುಂತಾದ ಮಿಲೆಟ್ಸ್ ನಲ್ಲಿ ಅಡಗಿರುವುದರಿಂದ, ಇದು ಮೂಳೆಗಳ ಸದೃಢತೆಗೆ ಬಲು ಸಹಕಾರಿ.
ಸಿರಿಧಾನ್ಯಗಳ ಸೇವನೆ : ಮಿಲೆಟ್ಸ್ ನಿಂದ ತಯಾರಿಸಲಾದ ವಿವಿಧ ವ್ಯಂಜನಗಳು ಬಲು ರುಚಿಕರ ಹಾಗೂ ಆರೋಗ್ಯಕರ ಎನಿಸುತ್ತದೆ. ಇದು ಬೇಗ ಬೇಯುತ್ತದೆ, ಹೀಗಾಗಿ ದೈನಂದಿನ ಆಹಾರದಲ್ಲಿ ತೊಂದರೆ ಇಲ್ಲದೆ ಸುಲಭವಾಗಿ ಬಳಸಬಹುದು. ಹೀಗಾಗಿ ಇದನ್ನು ಬೇರೆ ಬೇರೆ ವಿಧಾನಗಳಲ್ಲಿ ನಿಮ್ಮ ಅಡುಗೆಗೆ ಬಳಸಿಕೊಳ್ಳಿ.
ಮಿಲೆಟ್ಸ್ ನಿಂದ ರೊಟ್ಟಿ, ಖಿಚಡಿ, ಪಲಾವ್, ಇಡ್ಲಿ, ದೋಸೆ, ಉಪ್ಪಿಟ್ಟು, ಅವಲಕ್ಕಿ, ಬ್ರೆಡ್, ಖೀರು, ಸೂಪ್ ಇತ್ಯಾದಿ ಹಲವು ವ್ಯಂಜನ ತಯಾರಿಸಬಹುದು.
ನಿಮಗೆ ಯಾವ ಕಾಲದಲ್ಲಿ ಯಾವುದು ಸಿಗುತ್ತದೋ ಅಂಥ ಸಿರಿಧಾನ್ಯವನ್ನೇ ಬಳಸಿ, ನಿಮ್ಮ ದೈನಂದಿನ ಆಹಾರವಾಗಿ ರೂಢಿಸಿಕೊಳ್ಳಿ. ಇಡೀ ವರ್ಷ ಇದು ಒಂದಲ್ಲ ಒಂದು ರೂಪದಲ್ಲಿ ಲಭ್ಯ. ಕೆಲವು ಮಿಲೆಟ್ಸ್ನ್ನು ಆಯಾ ಸೀಸನ್ ನಲ್ಲಿ ಬಳಸುವುದೇ ಸರಿ.
ಚಳಿಗಾಲ : ಚಳಿಗಾಲಕ್ಕೆ ಉತ್ತಮವಾದುದು ಎಂದರೆ ಬಿಳಿ ಜೋಳ. ಈ ಸೀಸನ್ ನಲ್ಲಿ ಇದು ಧಾರಾಳ ಲಭ್ಯ. ಇದನ್ನು ಬೇಗ ಹುರಿದು, ಪುಡಿ ಮಾಡಲಿಕ್ಕೂ ಅನುಕೂಲ.
ಬೇಸಿಗೆ : ರಾಗಿ, ಮೆಕ್ಕೆ ಜೋಳ ಇಡೀ ಬೇಸಿಗೆಯಲ್ಲಿ ಲಭ್ಯ, ಉಪಯುಕ್ತ. ಬಿಸಿಲಲ್ಲಿ ಇದು ನಿಮ್ಮನ್ನು ತಂಪುಗೊಳಿಸಿ, ಹೈಡ್ರೇಟೆಡ್ ಆಗಿರಿಸುತ್ತದೆ. ದೇಹದ ತಾಪಮಾನ ಹೆಚ್ಚದಂತೆ ಕಾಯುತ್ತದೆ.
ಹೊಸದಾಗಿ ಮಿಲೆಟ್ಸ್ ಸೇವನೆಗೆ ತೊಡಗುವಾಗ ಕೆಲವು ಎಚ್ಚರಿಕೆಗಳನ್ನು ವಹಿಸಬೇಕು.
ಇದರಲ್ಲಿನ ಫೈಟಿಕ್ ಆ್ಯಸಿಡ್, ಇತರ ಪೋಷಕಾಂಶಗಳು ರಕ್ತದಲ್ಲಿ ವಿಲೀನಗೊಳ್ಳಲು ತಡೆ ಒಡ್ಡಬಹುದು. ಜೊತೆಗೆ ಕೆಲವರಿಗೆ ಸುಲಭವಾಗಿ ಜೀರ್ಣವಾಗದೆ, ಲೂಸ್ ಮೋಶನ್ ಗೆ ದಾರಿಯಾಗುತ್ತದೆ. ಹೀಗಾಗಿ ಇದನ್ನು ನೇರವಾಗಿ ನಿಮ್ಮ ಆಹಾರದಲ್ಲಿ ಬಳಸುವ ಮೊದಲು, ನೀರಲ್ಲಿ ಚೆನ್ನಾಗಿ ನೆನೆಸಬೇಕು. ಹೀಗೆ ನೆನೆಯುವುದರಿಂದ ಅದರ ಫ್ಯಾಟಿಕ್ ಆ್ಯಸಿಡ್ ನ ಪ್ರಭಾವ ತಗ್ಗುತ್ತದೆ. ಇದನ್ನು ಮೊಳಕೆ ಕಟ್ಟಿಸಿ, ನಂತರ ಸವಿಯುವುದರಿಂದ ಇದರ ಹಾನಿಕಾರಕ ಪ್ರಭಾವ ಎಷ್ಟೋ ತಗ್ಗುತ್ತದೆ.
ಗೋಧಿಗೆ ಇದನ್ನು ಬೆರೆಸಿ ಹಿಟ್ಟು ಮಾಡುವ ಮೊದಲು, ರಾಗಿ ನವಣೆ ಮುಂತಾದುವನ್ನು ಅಭ್ಯಾಸ ಮಾಡಿಕೊಳ್ಳಿ. ಮಿಲೆಟ್ಸ್ ನಲ್ಲಿನ ಗೈಟ್ರೋಜನ್ ಅಂಶ, ರಕ್ತದಲ್ಲಿ ಅಯೋಡಿನ್ ವಿಲೀನಗೊಳ್ಳದಂತೆ ಅಡ್ಡಿಪಡಿಸುತ್ತದೆ. ಒಮ್ಮೊಮ್ಮೆ ಬೇಯಲು ತಡ ಆಗಬಹುದು. ಹೀಗಾಗಿ ಹೈಪೋಥೈರಾಯಿಡಿಸಂ ರೋಗದಿಂದ ಬಳಲುವವರು ಮಿಲೆಟ್ಸ್ನಿಂದ ದೂರವಿರಿ.
ಇದರ ಸೇವನೆಯ ನಂತರ ಧಾರಾಳವಾಗಿ ನೀರು ಕುಡಿಯಬೇಕು ಎಂಬದುನ್ನು ಮರೆಯದಿರಿ. ಏಕೆಂದರೆ ಇದರಲ್ಲಿ ಅಷ್ಟು ಹೆಚ್ಚಿನ ಫೈಬರ್ ಅಡಗಿದೆ. ಹೊಸಬರು ಮಿಲೆಟ್ಸ್ ಸೇವಿಸಿ, ಧಾರಾಳ ನೀರು ಕುಡಿಯದಿದ್ದರೆ, ಪಚನಕ್ರಿಯೆಯಲ್ಲಿ ಅದು ಅಡ್ಡಿ ಉಂಟು ಮಾಡಬಹುದು, ಡೀಹೈಡ್ರೇಶನ್ ತಲೆದೋರಬಹುದು.
ಇಮ್ಯೂನಿಟಿ ಬೂಸ್ಟ್ ಮಾಡಲು ಸದಾ ಫ್ರೆಶ್ ಮಿಲೆಟ್ಸ್ ಮಾತ್ರ ಸೇವಿಸಿ. ಅಗ್ಗವಾಗಿ ಸಿಗುವುದೆಂದು 20-25 ಕಿಲೋ ತೆಗೆದಿಟ್ಟುಕೊಂಡು ಅದನ್ನೇ ವರ್ಷ ಪೂರ್ತಿ ತಿನ್ನುವ ಹಾಗೆ ಮಾಡಿಕೊಳ್ಳಬೇಡಿ. ಹೀಗೆ ಮಾಡುವುದರಿಂದ ಅದರ ಪೌಷ್ಟಿಕತೆ ತಗ್ಗಿದಂತಾಗಿ, ಆರೋಗ್ಯಕರ ಎನಿಸುವುದಿಲ್ಲ. ಹೀಗಾಗಿ ತಾಜಾ ಇರುವುದನ್ನೇ ಆಗಾಗ ಕೊಂಡು ಸೇವಿಸುತ್ತಿರಿ. ತಾಜಾ ತರಕಾರಿ, ಹಣ್ಣು ಖರೀದಿಸುವಂತೆಯೇ ಇದು, ಎಂದುಕೊಳ್ಳಿ.
ಹುಚ್ಚಾಪಟ್ಟೆ ಡಯೆಟ್ ಆಸೆಗಾಗಿ ಇದರ ಸಿಕ್ಕಾಪಟ್ಟೆ ಸೇವನೆ ಮಾಡದಿರಿ. ಮೊದಲಿನಿಂದಲೂ ಅಕ್ಕಿ, ಗೋಧಿಯ ಆಹಾರದ ರೂಢಿ ಇರುವ ನಗರವಾಸಿಗಳು ಕ್ರಮೇಣ ಇದನ್ನು ಕಡಿಮೆ ಪ್ರಮಾಣದಿಂದ ಸೇವಿಸಬೇಕೇ ಹೊರತು, ಏಕ್ ದಂ ಅವೆರಡನ್ನೂ ಬಿಟ್ಟು ಇದನ್ನಷ್ಟೇ ತಿನ್ನುವುದು ಸರಿಯಲ್ಲ. ಹೀಗಾಗಿ ಬ್ಯಾಲೆನ್ಸ್ಡ್ ಆಗಿ ಇದನ್ನು ಬಳಸಿಕೊಳ್ಳುವುದು ರೂಢಿಯಾಗಬೇಕು. ಮಿಲೆಟ್ಸ್ ಎಷ್ಟೇ ಪುಷ್ಟಿದಾಯಕ ಆಗಿರಲಿ, ಇದರ ನೆರವಿನಿಂದ ಇಮ್ಯುನಿಟಿಯನ್ನು ಬೂಸ್ಟ್ ಮಾಡಬಹುದು, ಇಷ್ಟೆಲ್ಲ ಇದ್ದರೂ, ನಮ್ಮ ಡಯೆಟ್ ನಲ್ಲಿ ಆಹಾರದ ಇತರ ಅಂಶಗಳನ್ನು ಅಷ್ಟೇ ಬ್ಯಾಲೆನ್ಸ್ಡ್ ಆಗಿ ಸೇವಿಸಬೇಕಾಗುತ್ತದೆ. ಬೇಳೆ, ಮೊಳಕೆಕಟ್ಟಿದ ಕಾಳು, ತಾಜಾ ತರಕಾರಿ, ಹಣ್ಣು ಇತ್ಯಾದಿ ಎಲ್ಲಾ ಬೇಕು. ಇದರಿಂದಾಗಿ ದೇಹಕ್ಕೆ ಸಿಗುವ ಪೌಷ್ಟಿಕಾಂಶಗಳು ಪರ್ಫೆಕ್ಟ್ ಬ್ಯಾಲೆನ್ಸ್ ಆಗುತ್ತವೆ. ಮಿಲೆಟ್ಸ್ ಸೇವನೆಯ ಜೊತೆಗೆ ಇತರೇ ಆಹಾರ ಸಾಮಗ್ರಿಗಳಿಂದ ಪ್ರೋಟೀನ್, ಫ್ಯಾಟ್ ಬಳಸುತ್ತಾ ನಮ್ಮ ಆಹಾರವನ್ನು ಸಮತೋಲನದ ಸ್ಥಿತಿಯಲ್ಲಿಡಬೇಕು.
ಹೀಗಾಗಿ `ಅತಿಯಾದರೆ ಅಮೃತ ವಿಷ’ ಎಂಬಂತೆ, ಒಳ್ಳೆಯದೆಂದ ಮಾತ್ರಕ್ಕೆ 3 ಹೊತ್ತೂ ಇದನ್ನೇ ಸೇವಿಸುತ್ತಾ ಕೂರಬಾರದು. ಆದ್ದರಿಂದ ನಿಮ್ಮ ವೈದ್ಯರ ಸಲಹೆ ಪಡೆದು ನಂತರ ಆ ಪ್ರಕಾರವೇ ಮಿಲೆಟ್ಸ್ ಸೇವನೆ ಆರಂಭಿಸಿ.
ಹಾಗೆಂದು ನೀವು ಹೆಚ್ಚಿನ ಪ್ರಮಾಣದಲ್ಲಿ ರೀಪೈನ್ಡ್ ಮಿಲೆಟ್ಸ್ ಸೇವಿಸುವುದು ಸಹ ಸರಿಯಲ್ಲ. ಇದರಿಂದ ಆರೋಗ್ಯಕ್ಕೆ ಹಾನಿ ಆಗಬಹುದು. ಇದಕ್ಕೆ ಅನಗತ್ಯವಾಗಿ ಅತಿ ಹೆಚ್ಚು ಮಸಾಲೆ ತುಂಬಿಸದಿರಿ. ಪಲಾವ್ ಇತ್ಯಾದಿಗಳಲ್ಲಿ ಇದನ್ನು ಬಳಸುವಾಗ, ವಿಪರೀತ ರೆಡಿಮೇಡ್ ಮಸಾಲೆ ಬೇಡ. ಮಸಾಲೆ ಇದರ ರುಚಿ ಹೆಚ್ಚಿಸಬಹುದಾದರೂ, ಪೌಷ್ಠಿಕಾಂಶಗಳ ಪ್ರಭಾವ ತಗ್ಗಿಹೋಗುತ್ತದೆ, ಹೀಗಾಗಿ ಲೈಟ್ ಆಗಿ ಮಸಾಲೆ ಬೆರೆಸಿಕೊಳ್ಳಿ.
– ಗಿರಿಜಾ ಶಂಕರ್
