ವಿಭಿನ್ನ ವೈವಿಧ್ಯಮಯ ಚಹಾ

ಬೆಳಗ್ಗೆ ಎದ್ದ ತಕ್ಷಣ ಎಲ್ಲರ ಮನೆಯಲ್ಲೂ ಚಹಾ ಸೇವನೆ ಅನಿವಾರ್ಯ ಎಂಬಂತೆ ಆಗಿಹೋಗಿದೆ. ಯಾರನ್ನು ಎಲ್ಲೇ ಭೇಟಿ ಮಾಡಲಿ ಅತಿಥಿಗಳು ಬಂದು ಹೋಗಲಿ, ಒಟ್ಟಾರೆ ಎಲ್ಲಾ ಸಂದರ್ಭದಲ್ಲೂ ದಿನಕ್ಕೆ ಹಲವು ಸಲ ಟೀ ಕುಡಿಯುವವರುಂಟು. ಚಹಾದಲ್ಲಿರುವ ಟ್ಯಾನಿನ್‌ ಎಂಬ ಕೆಮಿಕಲ್ ಜೊತೆ ಸಕ್ಕರೆಯೂ ಬೆರೆತು ನಮ್ಮ ದೇಹ ಹಲವು ರೋಗಗಳಿಗೆ ತವರಾಗುತ್ತದೆ. ಇದನ್ನು ಗಮನದಲ್ಲಿ ಇರಿಸಿಕೊಂಡೇ ರೆಗ್ಯುಲರ್‌ ಟೀ ಬದಲು ಇಲ್ಲಿ ವಿಭಿನ್ನ, ವೈವಿಧ್ಯಮಯ ಟೀಗಳ ಬಗ್ಗೆ ಹೇಳಲಾಗಿದೆ. ಇದರಿಂದಾಗಿ ಎಷ್ಟೋ ರೋಗಗಳು ನಮ್ಮನ್ನು ಮುತ್ತುವ ಸಾಧ್ಯತೆಯೇ ಇರುವುದಿಲ್ಲ! ಇದನ್ನು ಕನಿಷ್ಠ 5-6 ತಿಂಗಳ ಕಾಲ ಸತತ, ದಿನಕ್ಕೆ 3 ಬಾರಿ ಸೇವಿಸಬೇಕು.

ರಿಫ್ರೆಶಿಂಗ್‌ ಮಿಂಟ್‌ ಟೀ : 2 ಕಪ್‌ನೀರು ಬಿಸಿ ಮಾಡಿ. ಇದಕ್ಕೆ ಹೆಚ್ಚಿಕೊಂಡ ಅರ್ಧ ಕಪ್‌ ಪುದೀನಾ ಎಲೆ, ಚಿಟಕಿ ಉಪ್ಪು, 2 ಕಾಳುಮೆಣಸು ಹಾಕಿ ಚೆನ್ನಾಗಿ ಕುದಿಸಿ ಕೆಳಗಿಳಿಸಿ. 10 ನಿಮಿಷ ಬಿಟ್ಟು ಸೋಸಿ, ಸವಿಯಿರಿ.

ಲಾಭ : ಇದರ ಸೇವನೆ ಲವಲವಿಕೆ ಹೆಚ್ಚಿಸಿ, ಜ್ವರ ದೂರ ಮಾಡುತ್ತದೆ, ಪಚನ ಶಕ್ತಿ ಸುಧಾರಿಸುತ್ತದೆ. ಹೊಟ್ಟೆ ತೊಳೆಸುವಿಕೆ, ವಾಂತಿ ಇತ್ಯಾದಿ ನಿಲ್ಲುತ್ತದೆ. ಇಮ್ಯೂನ್‌ ಸಿಸ್ಟಮ್ ನ್ನು ಬೂಸ್ಟ್ ಗೊಳಿಸುತ್ತದೆ. ಸ್ವಾಸ್ಥ್ಯ ಸುಧಾರಿಸಿ, ಹಸಿವನ್ನು ಕಡಿಮೆ ಮಾಡಿ ತೂಕ ನಿಯಂತ್ರಣಕ್ಕೆ ಸಹಕಾರಿ ಆಗಿದೆ. ಉಸಿರಿನ ದುರ್ಗಂಧ ನಿವಾರಿಸಿ, ಸ್ಟ್ರೆಸ್‌ ಲೆವೆಲ್‌ ತಗ್ಗಿಸುತ್ತದೆ.

ಕೆಮೊಮೈಲ್ ‌ಟೀ : 2 ಕಪ್‌ನೀರು ಬಿಸಿ ಮಾಡಿ. ಇದಕ್ಕೆ ಕೆಮೊಮೈಲ್‌ ಹೂಗಳ ದಳ, ಚಿಟಕಿ ಉಪ್ಪು 1-2 ಕಾಳುಮೆಣಸು ಹಾಕಿ ಚೆನ್ನಾಗಿ ಕುದಿಸಿ ಕೆಳಗಿಳಿಸಿ. 10 ನಿಮಿಷ ಬಿಟ್ಟು ಸೋಸಿ, ಸವಿಯಿರಿ

ಲಾಭ : ಈ ಟೀ ಸೇವನೆಯಿಂದ ನರಮಂಡಲ ಎಷ್ಟೋ ರಿಲೀಫ್‌ ಆಗುತ್ತದೆ. ಇದರಿಂದ ಚೆನ್ನಾಗಿ ನಿದ್ದೆ ಬರುತ್ತದೆ. ಮಧುಮೇಹಿಗಳಿಗೆ ಇದರ ಸೇವನೆ ಲಾಭಕರ. ದೇಹದಲ್ಲಿ ಎಲ್ಲಾದರೂ ಗಾಯ, ಕಟ್‌ ಆಗಿದ್ದರೆ, ಈ ಟೀ ಸೇವನೆಯಿಂದ ಗಾಯ ಬೇಗ ವಾಸಿ ಆಗುತ್ತದೆ. ಇದರ ಸೇವನೆ ದೇಹದಲ್ಲಿನ ಕ್ಯಾನ್ಸರ್‌ ಸೆಲ್ಸ್ ನಿವಾರಿಸುವಲ್ಲಿಯೂ ಪೂರಕ, ಹಾಗಾಗಿ ಕ್ಯಾನ್ಸರ್‌ ನಿಯಂತ್ರಿಸುವಲ್ಲಿಯೂ ಸಹಾಯಕ. ಚರ್ಮಕ್ಕೂ ಈ ಟೀ ಉಪಕಾರಿ. ಇಮ್ಯೂನ್‌ಸಿಸ್ಟಂ ಚುರುಕಾಗಿಸಲಿಕ್ಕೂ ಸಹಕಾರಿ.

ಹೈಬಿಸ್ಕಸ್‌(ದಾಸಾಳದ) ಟೀ : 4 ಕಪ್‌ನೀರು, ಅರ್ಧ ಕಪ್‌ ಹೆಚ್ಚಿದ ದಾಸವಾಳದ ಹೂವಿನ ಪಕಳೆ, ತುಸು ಹೆಚ್ಚಿದ ಪುದೀನಾ, ನಿಂಬೆರಸ, ರುಚಿಗೆ ತಕ್ಕಷ್ಟು ಉಪ್ಪು, ಜೇನುತುಪ್ಪ. ಮೊದಲು ನೀರು ಬಿಸಿ ಮಾಡಿ. ಅದಕ್ಕೆ ಹೂವಿನ ಪಕಳೆ ಹಾಕಿ 10 ನಿಮಿಷ ಮಂದ ಉರಿಯಲ್ಲಿ ಚೆನ್ನಾಗಿ ಕುದಿಸಿರಿ. 10 ನಿಮಿಷ ಮುಚ್ಚಿರಿಸಿ, ಸೋಸಿಕೊಂಡು ಉಳಿದ ಸಾಮಗ್ರಿ ಬೆರೆಸಿ ಕದಡಿಕೊಂಡು ಸವಿಯಿರಿ.

ಲಾಭ : ಇದರ ಸೇವನೆ  ಬಿ.ಪಿ., ಕೊಲೆಸ್ಟ್ರಾಲ್‌ನ್ನು ತಗ್ಗಿಸುತ್ತದೆ. ಮಧುಮೇಹಕ್ಕೂ ಲಾಭ. ಆ್ಯಂಟಿ ಆಕ್ಸಿಡೆಂಟ್ಸ್ ಧಾರಾಳ ಅಡಗಿರುವ ಇದು ಆ್ಯಂಟಿ ಕ್ಯಾನ್ಸರ್‌ ಎನಿಸಿದೆ. ಇದರಿಂದ ಡಿಪ್ರೆಶನ್‌ ಎಷ್ಟೋ ಕಡಿಮೆ ಆಗುತ್ತದೆ, ತೂಕ ನಿಯಂತ್ರಿಸುತ್ತದೆ. ಇಮ್ಯೂನ್‌ ಸಿಸ್ಟಂ ಸುಧಾರಿಸುತ್ತದೆ. ಈ ಟೀ ವಿಟಮಿನ್‌ಗಳಿಂದ ತುಂಬಿದೆ. ಹಾಗಾಗಿ ಚರ್ಮದ ಸಮಸ್ಯೆಗಳಾದ ಆ್ಯಕ್ನೆ, ಸನ್‌ಬರ್ನ್‌, ಎಗ್ಝಿಮಾ, ಸ್ಕಿನ್‌ ಅಲರ್ಜಿಗಳಿಂದ ಮುಕ್ತಿ ಕೊಡಿಸುತ್ತದೆ.

ಬೇ ಲೀಫ್‌ ಟೀ : 2 ಕಪ್‌ ನೀರು ಬಿಸಿ ಮಾಡಿ. ನಂತರ ಒಣಗಿದ 2-3 ಲವಂಗದೆಲೆ (ಬೇ ಲೀಫ್‌)ಗಳನ್ನು ಪುಡಿ ಮಾಡಿ ನೀರಿಗೆ ಹಾಕಿ, ಮಂದ ಉರಿಯಲ್ಲಿ ಅದು ಅರ್ಧದಷ್ಟು ಹಿಂಗುವಂತೆ ಕುದಿಸಬೇಕು. ನಂತರ ಇದಕ್ಕೆ ತುಸು ಹಾಲು, ಸಕ್ಕರೆ ಬೆರೆಸಿ ಸೋಸಿಕೊಂಡು ಬಿಸಿಬಿಸಿಯಾಗಿ ಸವಿಯಿರಿ

ಲಾಭ : ಈ ಟೀ ಕುಡಿದ ನಂತರ ಹೊರಗೆ ಗಾಳಿಯಲ್ಲಿ ಓಡಾಡಬಾರದು. ಜ್ವರ ಬಂದಾಗ ಇದನ್ನು ಸೇವಿಸಿ ಬೆಚ್ಚಗೆ ಹೊದ್ದು ಮಲಗಿದರೆ, ಜ್ವರ ಬೇಗ ಬಿಡುತ್ತದೆ.

ಜೀರಿಗೆ ಟೀ : 2 ಕಪ್‌ನೀರು ಬಿಸಿ ಮಾಡಿ. ಇದಕ್ಕೆ 1 ಸಣ್ಣ ಚಮಚ ಜೀರಿಗೆ ಹಾಕಿ ಮಂದ ಉರಿಯಲ್ಲಿ 10 ನಿಮಿಷ ಕುದಿಸಿ. ಕೆಳಗಿಳಿಸಿ 10 ನಿಮಿಷ ಹಾಗೇ ಬಿಡಿ. ನಂತರ ಸೋಸಿ ಸವಿಯಿರಿ.

ಲಾಭ : ಬೆಳಗಿನ ಹೊತ್ತು ಬರಿ ಹೊಟ್ಟೆಯಲ್ಲಿ ಈ ಜೀರಿಗೆ ಟೀ ಸೇವಿಸುವುದರಿಂದ ತೂಕ ನಿಯಂತ್ರಣಕ್ಕೆ ಬರುತ್ತದೆ. ಕೊಲೆಸ್ಟ್ರಾಲ್ ಲೆವೆಲ್‌ ಸುಧಾರಿಸುತ್ತದೆ, ಮೆಟಬಾಲಿಸಂ ವರ್ಧಿಸುತ್ತದೆ. ಇದರಿಂದ ಸಹಜವಾಗಿ ಜೀರ್ಣಶಕ್ತಿ ಹೆಚ್ಚುತ್ತದೆ.

ಲೆಮನ್‌  ಜಿಂಜರ್‌ ಟೀ : 6 ಕಪ್‌ನೀರು, 2 ಇಂಚು ತಾಜಾ ಹಸಿ ಶುಂಠಿ, 8 ನಿಂಬೆ ಬಿಲ್ಲೆಗಳು, ಸಕ್ಕರೆ ಅಥವಾ ಜೇನುತುಪ್ಪ.

ವಿಧಾನ : ನೀರು ಬಿಸಿ ಮಾಡಿ. ಹೆಚ್ಚಿದ ಶುಂಠಿ, ನಿಂಬೆ ಬಿಲ್ಲೆ ಹಾಕಿ ಮಂದ ಉರಿಯಲ್ಲಿ ಚೆನ್ನಾಗಿ ಮರಳಿಸಿ ಕೆಳಗಿಳಿಸಿ. ಇದನ್ನು ಸೋಸಿಕೊಂಡು,  ಸಕ್ಕರೆ ಅಥವಾ ಜೇನು ಬೆರೆಸಿ ಸೇವಿಸಿ.

ಲಾಭ :  ಇದರಿಂದ ಮಧುಮೇಹ ಎಷ್ಟೋ ತಗ್ಗುತ್ತದೆ. ಫ್ಲೂ, ನೆಗಡಿ ಹೋಗುತ್ತದೆ. ಕೂದಲನ್ನು ಸಶಕ್ತಗೊಳಿಸಿ, ಹೊಳಪು ನೀಡುತ್ತದೆ. ಚರ್ಮಕ್ಕೆ ಹೊಸ ಕಾಂತಿ ಬರುತ್ತದೆ. ಅಜೀರ್ಣ ದೂರಾಗುತ್ತದೆ. ತಲೆನೋವು, ಮೈ ಭಾರ ಹೋಗಿ ಹಗುರ ಎನಿಸುತ್ತದೆ.

ರೋಸ್‌ ಟೀ : 1 ದೊಡ್ಡ ಗುಲಾಬಿಯ ದಳಗಳು, 2 ಕಪ್‌ನೀರು, ತುಸು ಜೇನು. ಮೊದಲು ನೀರು ಬಿಸಿ ಮಾಡಿ. ನಂತರ ಗುಲಾಬಿ ದಳ ಹಾಕಿ ಮಂದ ಉರಿಯಲ್ಲಿ 10 ನಿಮಿಷ ಕುದಿಸಿರಿ. ಕೆಳಗಿಳಿಸಿ 10 ನಿಮಿಷ ಬಿಟ್ಟು, ಸೋಸಿಕೊಂಡು, ಜೇನು ಬೆರೆಸಿ ಸವಿಯಿರಿ.

ಲಾಭ : ಈ ಚಹಾದಿಂದ ಇಮ್ಯೂನ್‌ ಸಿಸ್ಟಂ ಬೂಸ್ಟ್ ಆಗುತ್ತದೆ. ಡೈಜೆಸ್ಟಿವ್ ಸಿಸ್ಟಂ ಸುಧಾರಿಸುತ್ತದೆ. ತೂಕ ನಿಯಂತ್ರಣದಲ್ಲಿರುತ್ತದೆ. ಚರ್ಮ, ಕೂದಲಿಗೂ ಲಾಭ.

ಮೆಂತ್ಯ ಚಹಾ : 2 ಚಮಚ ಹುರಿದು ತರಿತರಿಯಾಗಿ ಪುಡಿ ಮಾಡಿದ ಮೆಂತ್ಯ, 2 ಕಪ್‌ ನೀರು. ವೊದಲು ನೀರು ಬಿಸಿ ಮಾಡಿ. ನಂತರ ಮೆಂತ್ಯ ಹಾಕಿ ಮಂದ ಉರಿಯಲ್ಲಿ 10 ನಿಮಿಷ ಕುದಿಸಬೇಕು. ನೀರು ಅರ್ಧ ಭಾಗ ಹಿಂಗಿದಾಗ ಕೆಳಗಿಳಿಸಿ 10 ನಿಮಿಷ ಆರಲು ಬಿಡಿ. ನಂತರ ರುಚಿಗೆ ತಕ್ಕಷ್ಟು ನಿಂಬೆರಸ, ಜೇನು ಬೆರೆಸಿ ಕದಡಿ ಸವಿಯಿರಿ.

ಲಾಭ : ಚಳಿಗಾಲದ ಮಂಡಿ ನೋವಿಗೆ ಇದು ರಾಮಬಾಣ. 1-2 ತಿಂಗಳ ಸತತ ಸೇವನೆಯಿಂದ ಸಂಧಿವಾತ, ಕೀಲು, ಮಂಡಿ ನೋವು ಎಷ್ಟೋ ತಗ್ಗುತ್ತದೆ. ಹಿಡಿದುಕೊಂಡ ಮಂಡಿ ಬಿಟ್ಟಂತಾಗಿ ಸಲೀಸಾಗಿ ನಡೆಯಬಹುದು. ಸೊಂಟ, ಬೆನ್ನು ನೋವಿಗೂ ಉಪಶಮನ ನೀಡುತ್ತದೆ.

– ಜಿ. ಮಾಧುರಿ