ಆಂಗ್ಲರು ತಮ್ಮ ಆಡಳಿತಾವಧಿಯಲ್ಲಿ ಗಿರಿಧಾಮಗಳನ್ನು ನಿರ್ಮಿಸಿದರು. ಬೇಸಿಗೆಯ ತೀವ್ರ ಉಷ್ಣತೆಯಿಂದ ರಕ್ಷಿಸಿಕೊಳ್ಳಲು ಅವರು ಈ ಸಾಹಸಕ್ಕೆ ಕೈ ಹಾಕಿದರು. ಬೇಸಿಗೆಯ ದಿನಗಳಲ್ಲಿ ಒಂದಷ್ಟು ದಿನಗಳನ್ನು ಶಾಂತ, ತಂಪು ತಾಣಗಳಲ್ಲಿ ಕಳೆಯಬೇಕೆಂಬ ದೃಷ್ಟಿಯಿಂದ ಬ್ರಿಟಿಷರು ದೇಶದ ಪರ್ವತ ಪ್ರದೇಶಗಳಲ್ಲಿ ಸುಂದರ ಹಾಗೂ ನಯನ ಮನೋಹರ ಸ್ಥಳಗಳನ್ನು ಹುಡುಕಿ, ಅವುಗಳನ್ನು ಹಿಲ್ ಸ್ಟೇಷನ್‌ನ ಹಾಗೆ ಅಭಿವೃದ್ಧಿಪಡಿಸಲು ಪರಂಪರೆ ಶುರು ಮಾಡಿದರು. ದೇಶದ ಬೇರೆ ಬೇರೆ ಕಡೆ ಇಂತಹ ಹಲವು ರಮ್ಯ ಸ್ಥಳಗಳಿದ್ದು, ಅವುಗಳಲ್ಲಿ ಹಿಮಾಚಲ ಪ್ರದೇಶದ `ಡಾಲ್ಹೌಸಿ’ ಕೂಡ ಒಂದು.
ಡಾಲ್ಹೌಸಿ ಪರ್ವತ ಪ್ರದೇಶದ ಸೌಂದರ್ಯ ಪ್ರವಾಸಿಗರ ಹೃದಯದಲ್ಲಿ ಎಂತಹದೊಂದು ಪಡಿಯಚ್ಚು ಮೂಡಿಸುತ್ತದೆ ಎಂದರೆ ಅಲ್ಲಿಗೆ ಮತ್ತೆ ಮತ್ತೆ ಹೋಗಬೇಕೆಂದು ಮನಸ್ಸಾಗುತ್ತದೆ. 19ನೇ ಶತಮಾನದಲ್ಲಿ ಆಂಗ್ಲ ಆಡಳಿತಗಾರರ ಮುಖಾಂತರ ನಿರ್ಮಾಣಗೊಂಡ ಈ ಟೌನ್‌ ತನ್ನ ಐತಿಹಾಸಿಕ ಮಹತ್ವ ಮತ್ತು ನೈಸರ್ಗಿಕ ಸೌಂದರ್ಯಕ್ಕೆ ಹೆಸರುವಾಸಿಯಾಗಿದೆ. ಇಲ್ಲಿರುವ ವಿಶಿಷ್ಟ ಗಾಲ್ಫ್ ಕೋರ್ಟ್‌, ನೈಸರ್ಗಿಕ ಅಭಯಾರಣ್ಯ, ನದಿಗಳು ಜಲಪಾತಗಳ ಸಂಗಮ ಹೀಗೆ ಅನೇಕ ಆಕರ್ಷಣೆಗಳ ಅಭಿಲಾಷೆ ಹೊತ್ತು ಲಕ್ಷಾಂತರ ಪ್ರವಾಸಿಗರು ಇಲ್ಲಿಗೆ ಬರುತ್ತಿರುತ್ತಾರೆ.
ನೈಸರ್ಗಿಕ ಸೌಂದರ್ಯ ಮನಮೋಹಕ ವಾತಾವರಣ, ಅನೇಕ ಪ್ರೇಕ್ಷಣೀಯ ಸ್ಥಳಗಳು ಹಾಗೂ ದೇವದಾರು ವೃಕ್ಷಗಳಿಂದ ಸುತ್ತುವರಿದಿರುವ ಡಾಲ್ಹೌಸಿ ಹಿಮಾಚಲ ಪ್ರದೇಶದ ಚಂಬಾ ಜಿಲ್ಲೆಯ ಒಂದು ಸುಂದರ ಗಿರಿಧಾಮ. ಈ ಸ್ಥಳ ಪ್ರಮುಖವಾಗಿ 5 ಪರ್ವತಗಳು ಅಂದರೆ ಕಠ್ಲಾಂಗ್‌, ಪೋಟ್ರೇನ್‌, ತಹಾರಾ, ಬಕರೋಟಾ, ಬಲೂನ್‌ ಮೇಲೆ ನೆಲೆ ನಿಂತಿದೆ.
ಸಮುದ್ರ ಮಟ್ಟದಿಂದ 2000 ಮೀ. ಎತ್ತರದ ಮೇಲಿರುವ ಈ ಪಟ್ಟಣ ಕೇವಲ 13 ಕಿ.ಮೀ. ವ್ಯಾಪ್ತಿಯಲ್ಲಿ ಪಸರಿಸಿದೆ. ಒಂದೆಡೆ ದೂರ, ಬಹುದೂರದ ತನಕ ವ್ಯಾಪಿಸಿಕೊಂಡಿರುವ ಹಿಮಚ್ಛಾದಿತ ಗಿರಿಗಳು, ಇನ್ನೊಂದೆಡೆ ಚಿನಾಬ್‌, ಬಿಯಾಸ್‌ ಮತ್ತು ರಾವಿ ನದಿಗಳ ಕಲರವ ಮನಮೋಹಕ ದೃಶ್ಯಗಳನ್ನು ಪ್ರಸ್ತುತಪಡಿಸುತ್ತದೆ.
ಪಂಚಪುಲಾ ಮತ್ತು ಸತಧಾರಾ
ಡಾಲ್ಹೌಸಿಯಿಂದ 2 ಕಿ.ಮೀ. ದೂರದಲ್ಲಿದೆ. ಪಂಚಪುಲಾ. ಇಲ್ಲಿನ ನೈಸರ್ಗಿಕ ಕುಂಡ ಹಾಗೂ ಅದರ ಮೇಲೆ ನಿರ್ಮಾಣಗೊಂಡಿರುವ 5 ಚಿಕ್ಕ ಚಿಕ್ಕ ಸೇತುವೆಗಳ ಆಧಾರದ ಮೇಲೆ ಅದಕ್ಕೆ ಪಂಚಪುಲಾ ಎಂದು ಹೆಸರಿಡಲಾಗಿದೆ. ಇಲ್ಲಿಂದ ಸ್ವಲ್ಪ ದೂರದಲ್ಲಿ ಮತ್ತೊಂದು ರಮ್ಯ ತಾಣ ಸತಧಾರಾ ಜಲಪಾತ ಇದೆ. ಒಂದು ಕಾಲಕ್ಕೆ ಇಲ್ಲಿಂದ 7 ಜಲಪಾತಗಳನ್ನು ಕಾಣಬಹುದಾಗಿತ್ತು. ಈಗ 1 ಮಾತ್ರ ಅಸ್ತಿತ್ವದಲ್ಲಿದೆ. ಅದರ ರಮಣೀಯ ಸೌಂದರ್ಯ ಎಂಥವರನ್ನೂ ಬೆರಗುಗೊಳಿಸುತ್ತದೆ. ಈ ಸತಧಾರಾದ ಜಲ ನೈಸರ್ಗಿಕ ಔಷಧೀಯ ಗುಣಗಳು ಮತ್ತು ಅನೇಕ ರೋಗಗಳನ್ನು ನಿವಾರಿಸುವ ಶಕ್ತಿ ಹೊಂದಿದೆ ಎಂದು ಹೇಳಲಾಗಿದೆ.
ಖಝಿಯಾರ್‌ ರಮ್ಯ ತಾಣ
ಡಾಲ್ಹೌಸಿಯ ಗಿರಿಧಾಮದ ಪ್ರವಾಸ ಖಝಿಯಾರ್‌ ನೋಡದ ಹೊರತು ಪೂರ್ಣಗೊಳ್ಳುವುದಿಲ್ಲ. ಇದು ಡಾಲ್ಹೌಸಿಯಿಂದ 27 ಕಿ.ಮೀ. ದೂರದಲ್ಲಿದೆ. ಖಝಿಯಾರ್‌ ಒಂದು ಮನಮೋಹಕ ಸರೋವರಕ್ಕೆ ಹೆಸರುವಾಸಿಯಾಗಿದ್ದು, ಅದು ತಟ್ಟೆಯ ಆಕಾರದಲ್ಲಿದೆ. ಈ ಸ್ಥಳ ದಟ್ಟ, ಉದ್ದನೆಯ ದೇವದಾರು ವೃಕ್ಷಗಳ ನಟ್ಟನಡುವೆ ಇದೆ.
ಗಾಲ್ಫ್ ಕ್ರೀಡಾಸಕ್ತರಿಗೆ ಈ ಸ್ಥಳ ಬಹಳ ಇಷ್ಟವಾಗುತ್ತದೆ. ಏಕೆಂದರೆ ಇಲ್ಲಿ ಅತ್ಯದ್ಭುತ ಎನ್ನಬಹುದಾದ ಗಾಲ್ಫ್ ಕೋರ್ಟ್‌ ಕೂಡ ಇದೆ. ರಾವಿ, ಚಿನಾಬ್‌ ಹಾಗೂ ಬಿಯಾಸ್‌ ನದಿಗಳು ಇಲ್ಲಿಗೆ 10 ಕಿ.ಮೀ. ದೂರದಲ್ಲಿ ಸಂಗಮಗೊಳ್ಳುತ್ತವೆ. ಚಂಬಾದ ಹೃದಯ ಎಂದೇ ಹೇಳಲಾಗುವ ಹಸಿರು ಹೊದಿಕೆಯ ಒಂದು ತುದಿಗೆ ನಿರ್ಮಾಣಗೊಂಡಿರುವ ಹರಿರಾಯ ಮಂದಿರದಲ್ಲಿ ಅದ್ವಿತೀಯ ಕಲಾಕೌಶಲದ ಮೆರುಗನ್ನು ಕಾಣಬಹುದು. ಇಲ್ಲಿಯೇ ಭೂರಿ ಸಿಂಗ್‌ ಸಂಗ್ರಹಾಲಯವಿದ್ದು, ಅಲ್ಲಿ ಐತಿಹಾಸಿಕ ದಾಖಲೆಗಳು, ಪೇಂಟಿಂಗ್ಸ್, ಶಿಲಾಕೃತಿಗಳು, ಶಸ್ತ್ರಾಸ್ತ್ರಗಳು ಹಾಗೂ ನಾಣ್ಯಗಳ ಸಂಗ್ರಹವಿದೆ.
ಡಾಲ್ಹೌಸಿಯ ಆಕರ್ಷಕ ಜಿಪಿಓ
ಡಾಲ್ಹೌಸಿಯ ಜಿಪಿಓ ಪ್ರದೇಶ ಜನರು ಹೆಚ್ಚಾಗಿ ಓಡಾಡುವ ಪ್ರದೇಶ. ಇಲ್ಲಿಂದ 2 ಕಿ.ಮೀ. ದೂರದಲ್ಲಿ ಸುಭಾಷ್‌ ಬಾಲಿ (ಬಾವಿ) ಇದೆ. ಈ ಪ್ರದೇಶದಲ್ಲಿ ಸುಭಾಷ್‌ ಚಂದ್ರಬೋಸ್‌ 5 ತಿಂಗಳುಗಳ ಕಾಲ ವಾಸವಾಗಿದ್ದರು. ಆ ಅವಧಿಯಲ್ಲಿ ಇದೇ ಬಾವಿಯ ನೀರು ಕುಡಿಯುತ್ತಿದ್ದರು. ಇಲ್ಲಿಂದ ಹಿಮಚ್ಛಾದಿತ ಪರ್ವತಗಳ ವಿಹಂಗಮ ನೋಟ ಅದ್ಭುತವಾಗಿರುತ್ತದೆ. ಇಲ್ಲಿಂದ ಅರ್ಧ ಕಿ.ಮೀ. ದೂರದಲ್ಲಿ ಚಂಬಾದ ರಾಜನ ಅರಮನೆಯೊಂದು ಉದ್ದುದ್ದನೆಯ ಮರಗಳ ನಡುವೆ ಇದೆ.
ಪ್ರವಾಸದ ಸಮಯ
ಡಾಲ್ಹೌಸಿಯ ಹವಾಮಾನ ವರ್ಷವಿಡೀ ಅತ್ಯಂತ ಸೊಗಸಾಗಿರುತ್ತದೆ. ಆದರೂ ಏಪ್ರಿಲ್‌‌ನಿಂದ ಜುಲೈವರೆಗೆ ಹಾಗೂ ಅಕ್ಟೋಬರ್‌ನಿಂದ ಡಿಸೆಂಬರ್‌ತನಕ ಹೋಗುವುದೇ ಸೂಕ್ತ.
– ರಾಗಿಣಿ
