ಹೊಸ ವರ್ಷದ ಶುಭಾಶಯಗಳನ್ನು ಪರಸ್ಪರರಿಗೆ ಕಳಿಸಿಕೊಡುವ ಸಿದ್ಧತೆ ಒಂದು ವಾರದ ಮುಂಚೆಯೇ ಆರಂಭವಾಗುತ್ತದೆ. ಮೊದಲೂ ಕೂಡ ಹೀಗೆಯೇ ಆಗುತ್ತಿತ್ತು. ಆದರೆ ಈಗ ಶುಭ ಹಾರೈಸುವ ಬೇರೆ ಬೇರೆ ವಿಧಾನಗಳನ್ನು ಅನುಸರಿಸುತ್ತಾರೆ. ಅದರಿಂದ ಅವರ ನೆನಪು ವರ್ಷವಿಡೀ ಇರಬೇಕು ಎನ್ನುವುದಾಗಿರುತ್ತದೆ. ಅಂದಿನ ಹಾಗೂ ಇಂದಿನ ಶುಭ ಹಾರೈಕೆ ವಿಧಾನಗಳು ಒಂದೇ ರೀತಿಯದ್ದಾಗಿರಬಹುದು. ಆದರೆ ಅದನ್ನು ವ್ಯಕ್ತಪಡಿಸುವ ವಿಧಾನ ಮಾತ್ರ ಬೇರೆಯಾಗಿದೆ.
ಬಣ್ಣ ಬಣ್ಣದ ಹೂಗಳು
ಶುಭಾಶಯ ವ್ಯಕ್ತಪಡಿಸುವ ಎಲ್ಲಕ್ಕೂ ವಿಶಿಷ್ಟ ವಿಧಾನವೆಂದರೆ ಹೂ ಬೊಕೆ. ಹೂ ಬೊಕೆಗಳು ಬಗೆ ಬಗೆಯದಾಗಿರುತ್ತವೆ. ಇವುಗಳ ಬೆಲೆ 50 ರೂ.ನಿಂದ ಹಿಡಿದು 3,000 ರೂ.ತನಕ ಆಗಬಹುದು.
ಬೆಂಗಳೂರಿನಲ್ಲಿ `ಗೋ ಗ್ರೀನ್‌’ ಎಂಬ `ಫ್ಲವರ್‌ ಬೊಕೆ’ ಅಂಗಡಿ ನಡೆಸುವ ರಚನಾ ಹೀಗೆ ಹೇಳುತ್ತಾರೆ, “ಹೊಸ ವರ್ಷದ ಶುಭ ಹಾರೈಕೆ ಕೋರುವ ಹಲವು ಬೊಕೆಗಳು ಚಾಲ್ತಿಯಲ್ಲಿವೆ. ಇವುಗಳಲ್ಲಿ ಹ್ಯಾಂಡ್‌ ಬಂಚ್‌, ಪ್ಲೇನ್‌ ಬೊಕೆ, ಬ್ಯಾಸ್ಕೆಟ್‌ ಮತ್ತು ಫ್ಲವರ್‌ಅರೇಂಜ್‌ಮೆಂಟ್‌ ಇರುತ್ತವೆ. ಇವುಗಳ ಬೆಲೆ ಹಾಗೂ ತಯಾರಿಸುವ ವಿಧಾನ ಬೇರೆ ಬೇರೆಯಾಗಿರುತ್ತದೆ. ಹ್ಯಾಂಡ್‌ ಬಂಚ್‌ಗೋಲಾಕಾರದಲ್ಲಿ ಸಿದ್ಧಗೊಳ್ಳುತ್ತದೆ. ಇದು ಚಿಕ್ಕ ಗಾತ್ರದಿಂದ ಹಿಡಿದು 3 ಅಡಿಯತನಕ ಇರಬಹುದಾಗಿದೆ. ಇದರ ಬೆಲೆ ಹ್ಯಾಂಡ್‌ಬಂಚ್‌ ತಯಾರಿಸುವಲ್ಲಿ ತಗಲುವ ಹೂಗಳ ಲೆಕ್ಕಾಚಾರದ ಮೇರೆಗೆ ನಿರ್ಧಾರವಾಗುತ್ತದೆ.
ಗುಲಾಬಿ ಹಾಗೂ ಗ್ಲ್ಯಾಡಿಯೋಲಸ್‌ನಿಂದ ತಯಾರಾಗುವ ಹ್ಯಾಂಡ್‌ ಬಂಚ್‌ ಕಡಿಮೆ ಬೆಲೆಯದ್ದಾಗಿರುತ್ತದೆ. ಲೀಲಿಯಮ್ ನಂತಹ ವಿದೇಶಿ ಹೂಗಳಿಂದ ತಯಾರಾಗುವ ಹ್ಯಾಂಡ್‌ ಬಂಚ್‌ಗಳು ದುಬಾರಿಯಾಗಿರುತ್ತವೆ. ಅಂದರೆ 2000 ರೂ.ಗಳ ತನಕ ಇರಬಹುದು. ಇವನ್ನು ಅಲಂಕರಿಸಲು ಡ್ರೈಸ್ಟಿಕ್‌, ನೆಟ್‌, ಸೆಣಬು ಹಾಗೂ ಹ್ಯಾಂಡ್‌ ಮೇಡ್‌ ಪೇಪರನ್ನು ಬಳಸಲಾಗುತ್ತದೆ.
ಪ್ಲೇನ್‌ ಬೊಕೆ ನೀಡುವ ಪದ್ಧತಿ ಈಚೆಗೆ ಕಡಿಮೆಯಾಗುತ್ತ ಹೊರಟಿದೆ. ಅದರ ಸ್ಥಾನವನ್ನು ಫ್ಲವರ್‌ ಬ್ಯಾಸ್ಕೆಟ್‌ಗಳು ಪಡೆದುಕೊಳ್ಳುತ್ತಿವೆ. ಇವು ಹಲವು ತೆರನಾದ ಕಟ್ಟಿಗೆ ಹಾಗೂ ಬಿದಿರಿನಿಂದ ತಯಾರಾಗುತ್ತವೆ. ರಾಟ್‌ ಐರನ್‌ನ ಬ್ಯಾಸ್ಕೆಟ್‌ಗಳನ್ನು ಕೂಡ ತಯಾರಿಸಬಹುದು. ಇದರಲ್ಲಿ ಬೇರೆ ಬೇರೆ ವರ್ಣದ ವಿದೇಶಿ ಹೂಗಳನ್ನು ಇಡಲಾಗುತ್ತದೆ. ಇದರ ಬೆಲೆ 1,500 ರೂ.ಗಳಿಂದ ಹಿಡಿದು 3,000 ತನಕ ಇರುತ್ತದೆ. ವಿಶಿಷ್ಟ ಡಿಸೈನ್‌ ಮತ್ತು ಗಾತ್ರಕ್ಕನುಗುಣವಾಗಿ ಬೆಲೆ ಕೂಡ ಹೆಚ್ಚಬಹುದು. ಇದು ಸೆರಾಮಿಕ್ ಪಾಟ್‌ ಗ್ಲಾಸ್‌ನಲ್ಲಿ ತಯಾರಿಸಲಾಗುತ್ತದೆ ಹಾಗೂ ಇದರಲ್ಲಿ ಫ್ಲವರ್‌ ಅರೇಂಜ್‌ಮೆಂಟ್‌ ಕೂಡ ಹೆಚ್ಚಾಗಿರುತ್ತದೆ.
ನೀವು ಬೊಕೆ ಯಾರಿಗೆ ಕೊಡುತ್ತಿದ್ದೀರಿ, ಅವರ ವಯಸ್ಸು ಎಷ್ಟು, ನಿಮಗೆ ಅವರ ಜೊತೆಗಿನ ಸಂಬಂಧ ಹೇಗಿದೆ ಎನ್ನುವುದರ ಮೇಲೆ ಬೆಲೆ ನಿರ್ಧರಿಸಲಾಗುತ್ತದೆ. ಒಬ್ಬ ಉತ್ತಮ ಪ್ಲೇರಿಸ್ಟ್ ನಿಮ್ಮ ಅಗತ್ಯಕ್ಕನುಗುಣವಾಗಿ ಬೊಕೆ ತಯಾರಿಸಿಕೊಡಲು ನಿಮಗೆ ನೆರವಾಗುತ್ತಾನೆ.
ಗ್ರೀಟಿಂಗ್‌ ಕಾರ್ಡ್‌ನ ಬದಲಾದ ರೂಪ
ಜಯನಗರ 4ನೇ ಬ್ಲಾಕ್‌ನಲ್ಲಿ ಗ್ರೀಟಿಂಗ್‌ ಕಾರ್ಡ್‌ ಮಳಿಗೆ ನಡೆಸುವ ಉಮೇಶ್‌ ಹೀಗೆ ಹೇಳುತ್ತಾರೆ, “ದೀಪಾವಳಿಯಿಂದ ಹೊಸ ವರ್ಷದ ತನಕ ಗ್ರೀಟಿಂಗ್‌ ಕಾರ್ಡ್‌ಗಳ ವ್ಯಾಪಾರ ತುಸು ಜೋರಾಗಿಯೇ ನಡೆಯುತ್ತದೆ. ಈಗ ಕಾರ್ಡ್‌ಗಳ ರೂಪ ಬದಲಾಗಿದೆ. ಚಿಕ್ಕ ಹಾಗೂ ಅಗ್ಗದ ಕಾರ್ಡ್‌ಗಳಿಗಿಂತ ದುಬಾರಿ, ದೊಡ್ಡ ಗಾತ್ರದ ಮ್ಯೂಸಿಕ್, ಡಿಸೈನರ್‌ ಹಾಗೂ ಹ್ಯಾಂಡ್‌ ಮೇಡ್‌ ಕಾರ್ಡ್‌ಗಳಿಗೆ ಹೆಚ್ಚು ಬೇಡಿಕೆಯಿದೆ.
ಉದ್ಯಮಿ ನಿರ್ಮಲಾ ಹೀಗೆ ಹೇಳುತ್ತಾರೆ, “ಕಾರ್ಡ್‌ಗಳನ್ನು ನಾವು ಬಹಳ ದಿನ ಕಾಯ್ದಿಡುತ್ತೇವೆ. ಇತ್ತೀಚೆಗೆ ಗ್ರೀಟಿಂಗ್‌ ಕಾರ್ಡ್‌ಗಳು ವಿಶೇಷ ವಿನ್ಯಾಸಗಳಲ್ಲಿ ದೊರೆಯುತ್ತವೆ. ಅವು ನಿಮ್ಮ ಭಾವನೆಗಳನ್ನು ವಿಶಿಷ್ಟ ರೀತಿಯಲ್ಲಿ ವ್ಯಕ್ತಪಡಿಸುತ್ತವೆ.”
ಕಳೆದ ಸಾಲಿನ ಕ್ರಿಸ್‌ಮಸ್‌ ಹಾಗೂ ಹೊಸವರ್ಷದ ಸಮಯದಲ್ಲಿ ಜಗತ್ತಿನಾದ್ಯಂತ 50 ಕೋಟಿಗೂ ಹೆಚ್ಚು ಗ್ರೀಟಿಂಗ್‌ ಕಾರ್ಡ್‌ಗಳು ಮಾರಾಟವಾಗಿದ್ದವು. ಶುಭಾಶಯ ಹೇಳುವ ಬಹಳಷ್ಟು ವಿಧಾನಗಳು ಚಾಲ್ತಿಗೆ ಬಂದುದರಿಂದ ಗ್ರೀಟಿಂಗ್‌ ಕಾರ್ಡ್‌ಗಳ ಮಾರಾಟದಿಂದ ಆಗುವ ಲಾಭದ ಪ್ರಮಾಣ ವರ್ಷದಿಂದ ವರ್ಷಕ್ಕೆ ಶೇ.30ರಷ್ಟು ಹೆಚ್ಚುತ್ತಿದೆ.
ಮೈಸೂರಿನ ರವೀಂದ್ರ ಹೀಗೆ ಹೇಳುತ್ತಾರೆ, ವಿಶೇಷ ಸಿಹಿ ತಿಂಡಿಗಳು, ಒಣಹಣ್ಣುಗಳು ಹಾಗೂ ಕುಕೀಸ್‌ ಗಿಫ್ಟ್ ಪ್ಯಾಕಿಂಗ್‌ ಜೊತೆಗೆ ಸಂದೇಶ ಕಳಿಸುವ ಪರಂಪರೆಯೂ ಈಚೆಗೆ ಹೆಚ್ಚುತ್ತಿದೆ. ಜನರು ತಮಗಿಷ್ಟವಾದ ಕಾರ್ಡ್‌ಗಳನ್ನು ಆಯ್ದುಕೊಳ್ಳುತ್ತಾರೆ. ಮತ್ತೆ ಕೆಲವೊಮ್ಮೆ ನಮಗೆ ಸ್ಪೆಷಲ್ ಕಾರ್ಡ್‌ ಕೊಡಲು ಸೂಚಿಸುತ್ತಾರೆ. ಇನ್ನು ಕೆಲವರು ಉಡುಗೊರೆಯ ಜೊತೆಗೆ ಮ್ಯೂಸಿಕ್ ಕಾರ್ಡ್‌ ಕೂಡ ಹಾಕಿ ಪ್ಯಾಚ್‌ ಮಾಡಲು ತಿಳಿಸುತ್ತಾರೆ. ಆಗ ಕಾರ್ಡ್‌ ತೆರೆಯುತ್ತಿದ್ದಂತೆ `ಹ್ಯಾಪಿ ನ್ಯೂ ಇಯರ್‌’ ಎಂಬ ಇಂಪಾದ ಧ್ವನಿ ಕೇಳಿಸುತ್ತದೆ.
ಕಾರ್ಡ್‌ನಲ್ಲಿ ನೀವು ನಿಮ್ಮ ಭಾನೆಗಳನ್ನು ಸುಲಭಾಗಿ ವ್ಯಕ್ತಪಡಿಸಬಹುದಾಗಿದೆ. ಕಾರ್ಡ್‌ನ್ನು ನೋಡಿದ ಬಳಿಕ ಕಾರ್ಡು ಕಳುಹಿಸಿದವರ ಅಭಿರುಚಿ ಹೇಗಿದೆ ಎನ್ನುವುದು ತಿಳಿಯುತ್ತದೆ. ಬಹಳಷ್ಟು ಜನರು ನೈಸರ್ಗಿಕ ಸೌಂದರ್ಯವುಳ್ಳ ಕಾರ್ಡುಗಳನ್ನೇ ಇಷ್ಟಪಡುತ್ತಾರೆ. ಮತ್ತೆ ಕೆಲವರಿಗೆ ಸೂರ್ಯೋದಯದ ಕಾರ್ಡು ಹಿಡಿಸುತ್ತದೆ.
ನೆಟ್‌ವರ್ಕ್‌ ಜಾಮ್ನಲ್ಲಿ ಕಳೆದುಹೋಗುವ ಎಸ್ಎಂಎಸ್
ಸ್ನೇಹಾ ಮತ್ತು ನವೀನ್‌ ಅವರ ಮದುವೆಯಾಗಿ ಕೆಲವೇ ತಿಂಗಳಾಗಿತ್ತು. ಅವರು ಮೊದಲ ಬಾರಿಗೆ ಹೊಸ ವರ್ಷದ ಆನಂದ ಆಚರಿಸಲು ಜೊತೆಗೆ ಇರಲಿಲ್ಲ. ಏಕೆಂದರೆ ನವೀನ್‌ ಕೆಲಸದ ನಿಮಿತ್ತ ದೆಹಲಿಗೆ ಹೋಗಿದ್ದ. ಹೊಸ ವರ್ಷದಂದು ಒಂದು ಸುಂದರ ಎಸ್ಎಂಎಸ್ ಸಿದ್ಧ ಮಾಡಿ ಅದನ್ನು ಸ್ನೇಹಾಳಿಗೆ ಕಳಿಸಿಕೊಟ್ಟ. ಆದರೆ ಅವಳಿಂದ ಯಾವುದೇ ಉತ್ತರ ಬರಲಿಲ್ಲ. ಹೀಗಾಗಿ ಅವನ ಮೂಡ್‌ ಕೆಟ್ಟುಹೋಯಿತು. ಇತ್ತ ಕಡೆ ಸ್ನೇಹಾಳಿಗೆ ನವೀನ್‌ನ ಎಸ್ಎಂಎಸ್ ಬರಲೇ ಇಲ್ಲ. ಹೀಗಾಗಿ ಅವಳೂ ಆತಂಕಗೊಂಡಿದ್ದಳು. `ನವೀನ್‌ ತನ್ನ ಕೆಲಸದಲ್ಲಿ ಇಷ್ಟೊಂದು ಮಗ್ನನಾಗಿಬಿಟ್ಟನೆ? ಒಂದು ಎಸ್ಎಂಎಸ್ ಕಳಿಸಲು ಕೂಡ ಅವನಿಗೆ ಸಮಯವಿಲ್ಲವೇ?’ ಎಂದು ಅವಳು ಯೋಚಿಸತೊಡಗಿದಳು. ಆ ಬಳಿಕ ಇಬ್ಬರೂ ಈ ಕುರಿತಂತೆ ಚರ್ಚೆ ಮಾಡಲೇಬಾರದು, ಇಲ್ಲದಿದ್ದರೆ ಜಗಳ ಆಗಿಬಿಡುತ್ತದೆ ಎಂದು ಯೋಚಿಸಿದರು.
ಮರುದಿನ ಸ್ನೇಹಾ ನವೀನ್‌ಗೆ ಫೋನ್‌ ಮಾಡಿ ನಿನ್ನೆ ನಿನಗೆ ಒಂದು ಎಸ್ಎಂಎಸ್ ಕೂಡ ಕಳಿಸಲು ಆಗಲಿಲ್ಲವೇ ಎಂದು ಕೇಳಿದಳು. ಆಗ ನವೀನ್‌ ಕೂಡ ಸಿಟ್ಟಿನಿಂದ ನಿನ್ನ ಉತ್ತರ ಕೂಡ ಬರಲಿಲ್ಲ ಎಂದು ಹೇಳಿದ. ಬಹಳ ಹೊತ್ತಿನ ಬಳಿಕ ಮೊಬೈಲ್ ನೆಟ್‌ವರ್ಕ್‌ನ ಕಾರಣದಿಂದ ಎಸ್ಎಂಎಸ್ ಬರದೇ ಇರುವುದು ಅವರ ಗಮನಕ್ಕೆ ಬಂತು. ಈ ರೀತಿಯ ತೊಂದರೆ ಸ್ನೇಹಾ ಮತ್ತು ನವೀನ್‌ಗೆ ಮಾತ್ರ ಆಗುವುದಿಲ್ಲ. ಅನೇಕರು ಈ ಸಮಸ್ಯೆ ಎದುರಿಸಬೇಕಾಗಿ ಬರುತ್ತದೆ.
ಆದರೆ ಎಸ್ಎಂಎಸ್ ಯಾವುದೇ ಸಂದರ್ಭಕ್ಕೆ ಶುಭ ಹಾರೈಸುವ ಅತ್ಯುತ್ತಮ ವಿಧಾನವಾಗಿದೆ. ಇದರಿಂದ ಅನೇಕ ಲಾಭಗಳಿವೆ. ಒಂದೇ ಎಸ್‌ಎಂಎಸ್‌ನ್ನು ಅತ್ಯಂತ ಕಡಿಮೆ ಸಮಯದಲ್ಲಿ ಬಹಳಷ್ಟು ಜನರಿಗೆ ಕಳಿಸಿಕೊಡಬಹುದು. ಅದನ್ನು ಪಡೆದುಕೊಳ್ಳುವ ವ್ಯಕ್ತಿ ಅದೇ ಸೂಕ್ತ ರೀತಿಯಲ್ಲಿ ಉತ್ತರ ಕಳಿಸಬಹುದು. ಆದರೆ ಎಷ್ಟೋ ಸಲ ನೆಟ್‌ವರ್ಕ್‌ನ ತೊಂದರೆಯಿಂದ ಎಸ್‌ಎಂಎಸ್‌ದೊರೆಯದೇ ಇರಬಹುದು ಅಥವಾ ತಡವಾಗಿ ಸಿಗಬಹುದು.
ಫೋನ್‌ನಲ್ಲಿ ಶುಭಾಶಯ ಹೇಳಿ
ಹೊಸ ವರ್ಷದ ಶುಭಾಶಯ ಹೇಳಲು ಈಗ ಪುನಃ ಫೋನ್‌ನ ನೆರವು ಪಡೆದುಕೊಳ್ಳುವ ಪರಂಪರೆ ಆರಂಭವಾಗಿದೆ. ಎಸ್ಎಂಎಸ್ ಹಾಗೂ ಗ್ರೀಟಿಂಗ್‌ ಕಾರ್ಡ್‌ಗಳು ನಿಮ್ಮ ಭಾವನೆಗಳಿಗೆ ನೇರವಾಗಿ ತಲುಪದಿರಬಹುದು. ಇಂತಹದರಲ್ಲಿ ಫೋನ್‌ನಲ್ಲಿ ಮಾತನಾಡುವುದು ಬಹಳ ಉತ್ತಮವೆನಿಸುತ್ತದೆ.
ಮನೋತಜ್ಞೆ ಡಾ. ಮಧುರಾ ಹೀಗೆ ಹೇಳುತ್ತಾರೆ, “ಪೋನ್‌ನಲ್ಲಿ ಶುಭ ಹಾರೈಕೆ ನೀಡುವ ಸಮಯದಲ್ಲಿ ಆತ್ಮೀಯತೆಯ ಒಡನಾಟದ ಭಾವನೆ ಕಾಯ್ದುಕೊಂಡು ಹೋಗುವ ನಿಟ್ಟಿನಲ್ಲಿ ಎಚ್ಚರಿಕೆ ವಹಿಸಲಾಗುತ್ತದೆ.
“ಇಂತಹದರಲ್ಲಿ ನೀವು ಮಾತನಾಡುತ್ತಿರುವ ವ್ಯಕ್ತಿಯ ಭಾವನೆಗಳು ಕೂಡ ಅರಿವಿಗೆ ಬರುತ್ತವೆ. ಮತ್ತೊಂದು ಸಂಗತಿಯೇನೆಂದರೆ, ಪರಸ್ಪರರ ಸಮ್ಮುಖದಲ್ಲಿ ಶುಭಾಶಯ ವಿನಿಮಯ ಆಗುತ್ತದೆ. ಹೀಗಾಗಿ ಫೋನ್‌ನಲ್ಲಿಯೇ ಶುಭಾಶಯ ಹೇಳುವುದು ಎಲ್ಲಕ್ಕೂ ಉತ್ತಮ ವಿಧಾನ.”
ಹೊಸ ವಿಧಾನ
ಅಮೆರಿಕದಲ್ಲಿ ವಾಸಿಸುತ್ತಿರುವ ಶಶಿಕಾಂತ್‌ ಹೀಗೆ ಹೇಳುತ್ತಾರೆ, “ನನ್ನ ಹೆಂಡತಿ ಇನ್ನು ಭಾರತದಲ್ಲಿದ್ದಾಳೆ. ನಾನು ವಿಡಿಯೋ ಕಾನ್ಫರೆನ್ಸಿಂಗ್‌ ಮುಖಾಂತರ ಹೊಸ ವರ್ಷದ ಶುಭಾಶಯ ಹೇಳಬೇಕೆಂದು ನಿರ್ಧರಿಸಿದ್ದೇನೆ. ವಿಡಿಯೋ ಕಾನ್ಫರೆನ್ಸ್ ಹೊರತಾಗಿ ಇಮೇಲ್ ಮೂಲಕ ಶುಭ ಹಾರೈಸುವುದು ಈಚೆಗೆ ಎಲ್ಲರಿಗೂ ಬಹಳ ಇಷ್ಟವಾಗುತ್ತಿದೆ.”
ಇಂಟರ್‌ನೆಟ್‌ ಹಾಗೂ ಫೋನ್‌ಗಳ ಸೌಲಭ್ಯ ಇರುವುದರಿಂದ ಶುಭಾಶಯ ಹೇಳುವ ಹೊಸ ವಿಧಾನ ಜನರಿಗೆ ದೊರೆತಿದೆ. ದೂರ ಇರುವ ಜನರಿಗೆ ಇದು ಹೆಚ್ಚು ಅನುಕೂಲಕರಾಗಿದೆ.
ಸಂಬಂಧ ಮತ್ತಷ್ಟು ಬಲಗೊಳ್ಳಬೇಕು
ಅದೊಂದು ಕಾಲವಿತ್ತು, ಆಗ ಶುಭಾಶಯ ಹೇಳಲು ಗ್ರೀಟಿಂಗ್‌ ಕಾರ್ಡ್‌ಗಳನ್ನೇ ಕಳಿಸಲಾಗುತ್ತಿತ್ತು. ಅವು ಹೋಗಿ ತಲುಪಲು ಅನೇಕ ದಿನಗಳೇ ಬೇಕಾಗುತ್ತಿದ್ದವು. ಅಂದಹಾಗೆ ಅದೊಂದು ಪಾರಂಪರಿಕ ಪದ್ಧತಿ ಈಗಲೂ ಮುಂದುವರಿದಿದೆ. ಆದರೆ ಬದಲಾದ ಪರಿಸ್ಥಿತಿಯಲ್ಲಿ ಈಗ ಜನರು ಕೆಲವೇ ಕ್ಷಣಗಳಲ್ಲಿ ಶುಭಾಶಯಗಳನ್ನು ಕಳಿಸಿಕೊಡುತ್ತಾರೆ. ಇದು ಸಾಧ್ಯವಾದದ್ದು ಸೋಶಿಯಲ್ ನೆಟ್‌ವರ್ಕಿಂಗ್‌ ಸೈಟ್ಸ್ ಮುಖಾಂತರ. ಈ ಸೈಟ್‌ಗಳೆಂದರೆ ಬ್ಲಾಗ್‌ ಹಾಗೂ ಇಗ್ರೀಟಿಂಗ್‌. ಇವುಗಳ ಮುಖಾಂತರ ಜಗತ್ತಿನ ಯಾವುದೇ ಮೂಲೆಯಲ್ಲಿ ಕುಳಿತಿರುವ ಸಂಬಂಧಿಕರು, ಸ್ನೇಹಿತರಿಗೆ ಕೆಲವೇ ಕ್ಷಣಗಳಲ್ಲಿ ಸಂದೇಶ ರವಾನಿಸಬಹುದು.
ಹೊಸ ವರ್ಷದ ಸಂದೇಶವಾಗಿರಬಹುದು ಅಥವಾ ಬೇರೆ ಯಾವುದೇ ಸಂದೇಶ, ಇಗ್ರೀಟಿಂಗ್‌ ಕಾರ್ಡ್ಸ್ ನ ರೂಢಿ ಈಚೆಗೆ ಹೆಚ್ಚಾಗಿದೆ. ಇದಕ್ಕೆ ಹಲವು ಕಾರಣಗಳಿವೆ. ಮೊದಲನೆಯದು ಸಮಯ ಉಳಿತಾಯ. ಎರಡನೆಯದು ಅನವಶ್ಯಕ ಖರ್ಚು. ಆದರೆ ಪಾರಂಪರಿಕ ಪದ್ಧತಿಯಂತೆ ಈಗಲೂ ಗ್ರೀಟಿಂಗ್‌ ಕಳಿಸುವವರ ಸಂಖ್ಯೆ ಕಡಿಮೆಯಾಗಿಲ್ಲ. ಹಾಗೆಂದೇ ಮಾರುಕಟ್ಟೆಯಲ್ಲಿ ಒಂದಕ್ಕಿಂತ ಒಂದು ಎನ್ನಬಹುದಾದ ಗ್ರೀಟಿಂಗ್‌ ಕಾರ್ಡ್‌ಗಳು ಬರುತ್ತಿವೆ. ಅವನ್ನು ಜನರು ಬಹಳ ಪ್ರೀತಿಯಿಂದ ಕಳಿಸಿಕೊಡುತ್ತಾರೆ. ಸಂದರ್ಭ ಸಾಮಾನ್ಯವಾಗಿರಬಹುದು ಅಥವಾ ವಿಶೇಷ, ಶುಭ ಹಾರೈಕೆಯನ್ನಂತೂ ಖಂಡಿತ ಹೇಳಿ. ಇದರಿಂದ ಸಂಬಂಧದಲ್ಲಿ ಮಾಧುರ್ಯ ಬರುತ್ತದೆ.
ಹೊಸ ವರ್ಷದ ಪಾರ್ಟಿ
ಪಾರ್ಟಿ ವಿಶೇಷವಾಗಿರಬೇಕೆಂದು ಅದಕ್ಕಾಗಿ ಒಂದು ವಿಶೇಷ ಥೀಮ್ ರೂಪಿಸಲಾಗುತ್ತದೆ. ಇದಕ್ಕೆ ಜನರನ್ನು ಆಹ್ವಾನಿಸಲು ವಿಶೇಷ ಬಗೆಯ ಕಾರ್ಡ್‌ನ್ನು ಮುದ್ರಿಸಲಾಗಿರುತ್ತದೆ. ಅದರ ಕಾರ್ಡಿನ ಡಿಸೈನ್‌ ಹೇಗಿರುತ್ತದೆಂದರೆ, ಅವರಿಗೆ ಇಡೀ ಪಾರ್ಟಿಯ ಥೀಮ್ ಬಗ್ಗೆ ಕಲ್ಪನೆ ಬರುತ್ತದೆ. ಹೀಗೆ ಮಾಡುವುದರಿಂದ ಜನರು ಪಾರ್ಟಿಗೆ ತಕ್ಕಂತೆ ಸಿದ್ಧರಾಗಿ ಬರುತ್ತಾರೆ. ಮಕ್ಕಳು ಹಾಗೂ ದೊಡ್ಡವರು ಈ ಪಾರ್ಟಿಯ ವಿಭಿನ್ನ ಅಂಗವಾಗಿರುತ್ತಾರೆ. ಇದರಿಂದ ಇಡೀ ಕುಟುಂಬದವರು ಒಂದೇ ಕಡೆ ವಿಶಿಷ್ಟ ಜನರ ಜೊತೆ ಹೊಸ ವರ್ಷದ ಆನಂದ ಅನುಭವಿಸಲು ಸಿದ್ಧರಾಗುತ್ತಾರೆ.
ವಿಭಿನ್ನ ಪ್ರಕಾರದ ಆಟ
ಪಾರ್ಟಿಯಲ್ಲಿ ಪಾಲ್ಗೊಳ್ಳುವವರಿಗಾಗಿ ಕೆಲವು ವಿಶಿಷ್ಟ ಬಗೆಯ ಆಟಗಳನ್ನು ಆಯೋಜಿಸಲಾಗುತ್ತದೆ. ಅದರಲ್ಲಿ ಕೆಲವು ಆಟಗಳನ್ನು ಗಂಡ ಹೆಂಡತಿ ಇಬ್ಬರೂ ಕೂಡಿ ಆಡಬೇಕಾಗುತ್ತದೆ. ಮತ್ತೆ ಕೆಲವು ಆಟಗಳನ್ನು ಕುಟುಂಬದ ಇತರರ ಜೊತೆ ಆಡಬೇಕಾಗುತ್ತದೆ. ಗಂಡ ಹೆಂಡತಿಯ ಆಟದ ಮಾದರಿಯೊಂದನ್ನು ನೋಡಿ.
ಈ ಆಟಕ್ಕೆ ಗಂಡ ಹೆಂಡತಿಗೆ 1 ನಿಮಿಷ ಸಮಯ ನೀಡಲಾಗುತ್ತದೆ. ವೊದಲು ಗಂಡ ಹೆಂಡತಿಗೆ ಬಿಂದಿ ಹಾಗೂ ಲಿಪ್‌ಸ್ಟಿಕ್‌ಹಚ್ಚುತ್ತಾನೆ. ಬಳಿಕ ಹೆಂಡತಿ ಗಂಡನಿಗೆ ಪೇಟಾ ಸುತ್ತುತ್ತಾಳೆ. ಆ ಬಳಿಕ ಇಬ್ಬರು ಕೈ ಹಿಡಿದುಕೊಂಡು 1 ನಿಮಿಷದೊಳಗೆ ಟೇಬಲ್ನ ನ್ನು ಗೋಲಾಕಾರದಲ್ಲಿ ಸುತ್ತಬೇಕಾಗುತ್ತದೆ. ಹೆಚ್ಚು ಸಲ ಸುತ್ತು ಹಾಕಿದವರನ್ನು ವಿಜೇತರೆಂದು ಘೋಷಿಸಲಾಗುತ್ತದೆ.
ಪಾರ್ಟಿಯ ಮತ್ತೊಂದು ಆಟವೆಂದರೆ ಗಂಡ ತನ್ನ ಹೆಂಡತಿಯನ್ನು ಗುರುತಿಸುವುದು. ಯಾವ ಗಂಡ ತಾನೆ ತನ್ನ ಹೆಂಡತಿಯನ್ನು ಗುರುತಿಸಲಾರ ಎಂದು ನಿಮಗೆ ಅನಿಸುತ್ತಿರಬಹುದು. ಆದರೆ ಈ ಆಟ ಅಷ್ಟೊಂದು ಸುಲಭವಲ್ಲ. ಈ ಆಟದಲ್ಲಿ ಹೆಂಡತಿಯರನ್ನೆಲ್ಲಾ ಒಂದೇ ಸಾಲಿನಲ್ಲಿ ನಿಲ್ಲಿಸಲಾಗುತ್ತದೆ ಹಾಗೂ ಅವರ ಮುಂದೆ ಒಂದು ಗಾಢವರ್ಣದ ಸೀರೆಯನ್ನು ಕಟ್ಟಲಾಗುತ್ತದೆ. ಅದರಿಂದ ಇಣುಕಿ ನೋಡಿದರೂ ಏನೂ ಕಂಡುಬರುವುದಿಲ್ಲ. ಜೊತೆಗೆ ಆ ಸೀರೆಯನ್ನು ಹೇಗೆ ಕಟ್ಟಲಾಗಿರುತ್ತದೆಂದರೆ ಪತ್ನಿಯರ ಕಾಲುಗಳು ಮಾತ್ರ ಕಾಣುತ್ತಿರುತ್ತವೆ. ಆ ಕಾಲುಗಳನ್ನು ನೋಡಿ ತಮ್ಮ ಪತ್ನಿಯರನ್ನು ಗುರುತಿಸುವುದಾಗಿರುತ್ತದೆ.
