ಚಳಿಗಾಲದಲ್ಲಿ ಕೀಲುಗಳ ನೋವಿಗೆ ಗುಡ್ ಬೈ ಹೇಳಿ

ಚಳಿಗಾಲದಲ್ಲಿ ಕೀಲುಗಳ ನೋವು ಬಹಳಷ್ಟು ತೊಂದರೆಯನ್ನುಂಟು ಮಾಡುತ್ತದೆ. ಇದು ಕೇವಲ ವಯಸ್ಸಾದವರಿಗಷ್ಟೇ ಅಲ್ಲ, ಯಾವುದೇ ವಯಸ್ಸಿನ ವ್ಯಕ್ತಿಗಾದರೂ ಸಮಸ್ಯೆಯನ್ನುಂಟು ಮಾಡಬಹುದು. ಹೆಚ್ಚುತ್ತಿರುವ ಚಳಿಯ ಜೊತೆಗೆ ಕೀಲುಗಳ ನೋವು ಕೂಡ ಹೆಚ್ಚುತ್ತದೆ. ಆ ಕಾರಣದಿಂದ ನಡೆದಾಡಲು ಕೂಡ ಹಿಂಸೆ ಎನಿಸುತ್ತದೆ. ಅಂದಹಾಗೆ ಚಳಿಗಾಲದಲ್ಲಿ ಕೀಲುಗಳ ನೋವು ಏಕೆ ಹೆಚ್ಚಾಗುತ್ತದೆ ಮತ್ತು ಅದರಿಂದ ಮುಕ್ತಿ ಕಂಡುಕೊಳ್ಳುವುದು ಹೇಗೆ ಎಂಬುದರ ಬಗ್ಗೆ ಡಾ. ಶಂಕರ್‌ ಭಗತ್‌ ವಿವರಿಸಿದ್ದಾರೆ :

ಕೀಲು ನೋವಿಗೆ ಕಾರಣವೇನು?

ವಯಸ್ಸು ಹೆಚ್ಚುತ್ತಾ ಹೋದಂತೆ ಮೂಳೆಗಳಲ್ಲಿನ ಕ್ಯಾಲ್ಶಿಯಂ ಹಾಗೂ ಇತರೆ ಖನಿಜ ಪದಾರ್ಥಗಳು ಕ್ಷೀಣವಾಗುತ್ತ ಹೋಗುತ್ತವೆ. ಯಾವುದೇ ಕೀಲು ಇರುವ ಭಾಗದ ಮೂಳೆಗಳು ಪರಸ್ಪರ ಸಂಪರ್ಕಕ್ಕೆ ಬರುವುದಿಲ್ಲ. ಕೀಲುಗಳ ಮಧ್ಯದಲ್ಲಿ ಕಾರ್ಟಿವೇಜ್‌ನ ಒಂದು ಪದರ ಇರುತ್ತದೆ. ವಯಸ್ಸು ಏರುತ್ತಾ ಹೋದಂತೆ ಆ ಪದರವನ್ನು ಬಳಕುವಂತೆ ಮಾಡಲು ಮತ್ತು ಅಲ್ಲಿನ ಸ್ನಿಗ್ಧತೆ ಕಾಯ್ದುಕೊಂಡು ಹೋಗುವ ಲೂಬ್ರಿಕೆಂಟ್‌ನ ಪ್ರಮಾಣ ಕಡಿಮೆಯಾಗುತ್ತಾ ಹೋಗುತ್ತದೆ. ಲಿಗಮೆಂಟ್ಸ್ ನ ಉದ್ದ ಹಾಗೂ ಬಳಕುವಿಕೆ ಕಡಿಮೆಯಾಗುತ್ತದೆ. ಈ ಕಾರಣದಿಂದ ಕೀಲುಗಳು ಪರಸ್ಪರ, ಘರ್ಷಣೆಗೊಳಗಾಗುತ್ತವೆ.

ಚಳಿಗಾಲದಲ್ಲಿ ಕೀಲುಗಳ ನೋವು ಏಕೆ ಹೆಚ್ಚುತ್ತದೆ ಎಂದರೆ, ಚಳಿಗಾಲದಲ್ಲಿ ದೇಹದ ತಾಪಮಾನ ಕಡಿಮೆಯಾಗುತ್ತಾ ಹೋಗುತ್ತದೆ. ದೇಹದಲ್ಲಿ ತಾಪಮಾನದ ಕೊರತೆಯ ಕಾರಣದಿಂದ ಕೀಲುಗಳ ರಕ್ತನಾಳಗಳು ಕುಗ್ಗಲಾರಂಭಿಸುತ್ತವೆ. ಆ ಕಾರಣದಿಂದ ಕೀಲುಗಳು ಹಿಡಿದುಕೊಂಡಂತೆ ಆಗುವುದರ ಜೊತೆಗೆ ನೋವು ಕೂಡ ಶುರುವಾಗುತ್ತದೆ.

ನೋವಿನಿಂದ ಪರಿಹಾರ ಹೇಗೆ?

ವೈದ್ಯರ ಪ್ರಕಾರ, ಕೀಲುಗಳ ನೋವಿನಿಂದ ಪಾರಾಗಲು ಅರಿಶಿನ, ಮಂಗರವಳ್ಳಿ ಮತ್ತು ಮುರಂಗಾದ (ನುಗ್ಗೆ ಸೊಪ್ಪು) ಬಳಕೆ ಹೆಚ್ಚು ಉಪಯುಕ್ತ ಎಂದು ಸಾಬೀತಾಗಿದೆ. ಇದು ಕೀಲುಗಳ ನೋವಿನಿಂದ ಹೆಚ್ಚು ಪರಿಣಾಮಕಾರಿ ಎಂದು ಸಾಬೀತಾಗಿದೆ. ಕೆಲವು ಮನೆ ಉಪಾಯಗಳನ್ನು ಅನುಸರಿಸುವುದರ ಮೂಲಕ ನೋವಿನಿಂದ ಮುಕ್ತಿ ಪಡೆದುಕೊಳ್ಳಬಹುದು.

ಅರಿಶಿನದ ಉಪಯೋಗ : ಸಾಮಾನ್ಯವಾಗಿ ಅರಿಶಿನವನ್ನು ಪಚನಕ್ರಿಯೆ ಸುಧಾರಣೆ ಮಾಡಲು, ಊತವನ್ನು ಕಡಿಮೆಗೊಳಿಸಲು ನೋವಿನಿಂದ ನಿರಾಳತೆ ಪಡೆದುಕೊಳ್ಳಲು ಬಳಸಿಕೊಳ್ಳಲಾಗುತ್ತದೆ. ಅರಿಶಿನದಲ್ಲಿರುವ `ಕರ್ಕ್ಯೂಮಿನ್‌’ ಎಂಬ ಅಂಶ ದೀರ್ಘಾವಧಿ ನೋವಿನಿಂದ ಮುಕ್ತಿ ದೊರಕಿಸಿಕೊಳ್ಳಲು ಸಹಾಯಕವಾಗಿದೆ. ಅದರಿಂದ ಕೀಲುಗಳು ಮತ್ತು ಮಾಂಸಖಂಡಗಳಲ್ಲಿ ಫ್ಲೆಕ್ಸಿಬಿಲಿಟಿ ಬರುತ್ತದೆ. ಹಾಗಾಗಿ ಕೀಲುಗಳ ನೋವು ಕಡಿಮೆಯಾಗುತ್ತದೆ. ಅರಿಶಿನ ನೋವಿನಿಂದ ಉಂಟಾಗುವ ಊತವನ್ನು ಕಡಿಮೆಗೊಳಿಸಲು ನೆರವಾಗುತ್ತದೆ. ಅದು ನೈಸರ್ಗಿಕ ಜೀವಕೋಶಗಳನ್ನು ಕೊನೆಗೊಳಿಸುವ ಫ್ರೀ ರಾಡಿಕಲ್ಸ್ ನ್ನು ನಿವಾರಿಸುವ ಕೆಲಸ ಮಾಡಿ ಕೀಲುನೋವಿನಿಂದ ಮುಕ್ತಿ ದೊರಕಿಸಿಕೊಡುತ್ತದೆ. ರಾತ್ರಿ ಮಲಗುವ ಮುನ್ನ ಹಸಿ ಅರಿಶಿನವನ್ನು ಹಾಲಿನಲ್ಲಿ ಮಿಶ್ರಣಗೊಳಿಸಿ ಕುದಿಸಿಕೊಳ್ಳಿ. ಸಾಧಾರಣ ತಂಪಾದ ಬಳಿಕ ಸೇವಿಸಿ.

ಮಂಗರವಳ್ಳಿ : ಇದೊಂದು ಆರ್ಯುವೇದ ಔಷಧಿ ಎಂದು ಹೇಳಲಾಗುತ್ತದೆ. ಇದರ ಸಸಿಯಲ್ಲಿ ಕೆಂಪು ವರ್ಣದ ಬಟಾಣಿ ಕಾಳಿನಂತಹ ಹಣ್ಣುಗಳು ಉತ್ಪತ್ತಿಯಾಗುತ್ತವೆ. ಈ ಸಸಿಯ ಬಳ್ಳಿ 6 ಮೀ.ಗಿಂತಲೂ ಉದ್ದವಾಗಿರುತ್ತದೆ.

ಈ ಸಸಿಯ ವಿಶೇಷತೆ ಏನೆಂದರೆ, ಇದು ಮೂಳೆ ಜೋಡಿಸುವುದರ ಜೊತೆಜೊತೆಗೆ ಊತ ಕಡಿಮೆಗೊಳಿಸುತ್ತದೆ. ಕೀಲುಗಳ ನೋವು ದೂರವಾಗುತ್ತದೆ, ಮೂಳೆಗಳು ಬಲವಾಗುತ್ತವೆ. ಮಂಗರವಳ್ಳಿ ಬಳ್ಳಿಯಲ್ಲಿ ಸೋಡಿಯಂ, ಪೊಟ್ಯಾಶಿಯಂ ಹಾಗೂ ಕಾರ್ಬೋನೆಟ್‌ ಹೇರಳ ಪ್ರಮಾಣದಲ್ಲಿರುತ್ತದೆ. ಇದರಲ್ಲಿರುವ ಕ್ಯಾಲ್ಶಿಯಂ ಮೂಳೆಗಳನ್ನು ಗಟ್ಟಿಗೊಳಿಸುತ್ತದೆ. ಹಲವು ಗುಣಗಳಿಂದ ತುಂಬಿತುಳುಕುವ ಈ ಬಳ್ಳಿಯನ್ನು ಸುಲಭವಾಗಿ ಬೆಳೆಯಬಹುದಾಗಿದೆ.

ಹೇಗೆ ಸೇವಿಸುವುದು?

ಮಂಗರವಳ್ಳಿಯ ರಸವನ್ನು ತೆಗೆದು ಸಾಧಾರಣ ಬಿಸಿಯಿರುವ ಹಾಲಿನಲ್ಲಿ ಹಾಕಿಕೊಂಡು ಕುಡಿಯಿರಿ.

ಅದರ ಕಷಾಯ ಮಾಡಿ ಸಹ ಕುಡಿಯಬಹುದು.

ಮುರುಂಗಾ (ನುಗ್ಗೆಸೊಪ್ಪು) : ನುಗ್ಗೆ ಸೊಪ್ಪು ಅತ್ಯಂತ ಉಪಯುಕ್ತ ಪೋಷಕಾಂಶಗಳನ್ನು ಹೊಂದಿದೆ. ಅದರಲ್ಲಿ ವಿಟಮಿನ್ಸ್, ಪೊಟ್ಯಾಶಿಯಂ ಹಾಗೂ ಕ್ಯಾಲ್ಶಿಯಂ ಹೇರಳವಾಗಿರುತ್ತದೆ. ವೈದ್ಯರ ಪ್ರಕಾರ ನುಗ್ಗೆ ಸೊಪ್ಪಿನಲ್ಲಿ ಬಾಳೆಹಣ್ಣಿಗಿಂತಲೂ 3 ಪಟ್ಟು ಹೆಚ್ಚು ಪೊಟ್ಯಾಶಿಯಂ ಹಾಗೂ ಹಾಲಿಗಿಂತಲೂ  ನಾಲ್ಕು ಪಟ್ಟು ಕ್ಯಾಲ್ಶಿಯಂ ಇರುತ್ತದೆ. ನುಗ್ಗೆಸೊಪ್ಪನ್ನು ಚಮತ್ಕಾರಿ ಸಸ್ಯ ಎಂದೇ ಕರೆಯಲಾಗುತ್ತದೆ. ಅದರ ಸೇವನೆಯಿಂದ ಹಲವು ಪ್ರಕಾರದ ರೋಗಗಳು ಹೆಚ್ಚುವುದನ್ನು ತಡೆಯಬಹುದಾಗಿದೆ. ಇದರಲ್ಲಿರುವ ಕ್ಯಾಲ್ಶಿಯಂ ಮೂಳೆಗಳನ್ನು ಬಲಗೊಳಿಸುತ್ತದೆ ಹಾಗೂ ಕೀಲು ನೋವನ್ನು ನಿವಾರಿಸುತ್ತದೆ.

ನುಗ್ಗೆ ಹೂವಿನ ಪಲ್ಯ ಮಾಡಿ ಸೇವಿಸುವುದರಿಂದ ಕೀಲುಗಳ ನೋವು ಹಾಗೂ ಊತ ಕಡಿಮೆಯಾಗುತ್ತದೆ. ಅದರ ಎಲೆಗಳ ಕಷಾಯ ಮಾಡಿ ಕುಡಿಯುವುದರಿಂದ ಲಾಭ ದೊರೆಯುತ್ತದೆ. ಜೊತೆಗೆ ಚಳಿಗಾಲದಲ್ಲಿ ಉಂಟಾಗುವ ಸಾಮಾನ್ಯ ಶೀತವನ್ನು ಕೂಡ ನಿವಾರಿಸುತ್ತದೆ.

ಚಳಿಗಾಲ ನೆಮ್ಮದಿಯಿಂದ ಕಳೆಯಿರಿ

ಮುಂಜಾನೆಯ ಬಿಸಿಲು ವಿಟಮಿನ್‌ `ಡಿ’ಯ ಒಳ್ಳೆಯ ಮೂಲ ಎಂದು ಭಾವಿಸಲಾಗುತ್ತದೆ. ಮುಂಜಾನೆ ಎಳೆಬಿಸಿಲಿನಲ್ಲಿ ಕುಳಿತುಕೊಳ್ಳುವುದರಿಂದ ಕೀಲುಗಳ ನೋವು ಹಾಗೂ ಊತದ ಸಮಸ್ಯೆ ಕಡಿಮೆಯಾಗುತ್ತದೆ.

ನಿಯಮಿತ ವ್ಯಾಯಮ ಹಾಗೂ ಪೌಷ್ಟಿಕ ಆಹಾರ ಸೇವನೆಯಿಂದ ಕೀಲುಗಳ ಬಳಕುವಿಕೆ ಕಾಯ್ದುಕೊಂಡು ಹೋಗಲು ಸಾಧ್ಯವಾಗುತ್ತದೆ.

ಸತತವಾಗಿ 5-6 ಗಂಟೆಗಳ ಕಾಲ ಕುರ್ಚಿಯ ಮೇಲೆ ಕುಳಿತುಕೊಳ್ಳುವುದರಿಂದ ಕೀಲುಗಳಲ್ಲಿ ಹಿಡಿದುಕೊಂಡಂತಾಗುತ್ತದೆ. ಆಫೀಸಿನಲ್ಲಿ 1-2 ಗಂಟೆಗಳಿಗೊಮ್ಮೆ 5-6 ನಿಮಿಷಗಳಷ್ಟು ಸುತ್ತಾಡಿ.

ಚಳಿಗಾಲದಲ್ಲಿ ಕೀಲು ನೋವಿನಿಂದ ಮುಕ್ತಿ ಕಂಡುಕೊಳ್ಳಲು ದೇಹಕ್ಕೆ ಬಿಸಿ ಕಾವು ಕೊಡುವುದು ಅತ್ಯಗತ್ಯ. ದೇಹ ತಂಪಾಗಿರುವಾಗ ನೋವು ಜಾಸ್ತಿ ಇರುತ್ತದೆ. ಹೀಗಾಗಿ ಬೆಚ್ಚನೆಯ ಉಡುಪುಗಳನ್ನು ಧರಿಸಿ.

– ಮನಸ್ವಿನಿ