ಪಿರಿಯಡ್ಸ್ ಇದ್ದರೂ ಬಿಡದ ನಿರ್ದೇಶಕರ!
ಮುಚ್ಚುಮರೆಯಿಲ್ಲದೆ ಮಾತನಾಡುವ ನಿತ್ಯಾ ಮೆನನ್ ಇತ್ತೀಚೆಗೆ ಹಲವು ವಿವಾದಾತ್ಮಕ ಹೇಳಿಕೆಗಳನ್ನು ನೀಡುತ್ತಲೇ ಹಲವಾರು ವಿವಾದಗಳನ್ನು ಮೈಮೇಲೆ ಎಳೆದುಕೊಳ್ಳುತ್ತಿದ್ದಾರೆ. ಇದೀಗ ಸಿನಿಮಾರಂಗದ ಬಗ್ಗೆ ಅವರು ಮಾಡಿದ ಕಾಮೆಂಟ್‌ಗಳು ಇದೀಗ ವೈರಲ್‌ ಆಗುತ್ತಿವೆ.
ನಿತ್ಯಾ ಮೆನನ್ ಅವರು ಆಯ್ದ ಪಾತ್ರಗಳಲ್ಲಿ ಮಾತ್ರ ನಟಿಸುತ್ತಾರೆ. ನಾಯಕಿಯಾಗಿ ಸ್ಯಾಂಡಲ್ವುಡ್ನಲ್ಲಿ ಮಾತ್ರವಲ್ಲ, ತೆಲುಗು, ಮಲಯಾಳಂ ಮತ್ತು ತಮಿಳು ಚಿತ್ರರಂಗಗಳಲ್ಲೂ ತಮ್ಮ ಛಾಪು ಮೂಡಿಸಿದ್ದು, ತಮ್ಮದೇ ಆದ ಅಭಿಮಾನಿ ಬಳಗವನ್ನು ಹೊಂದಿದ್ದಾರೆ.
ಕನ್ನಡದ ಮೈನಾ ಚಿತ್ರದಲ್ಲಿ ಮನೋಜ್ಞವಾಗಿ ನಟಿಸಿದ್ದ ನಿತ್ಯಾ ಮೆನನ್, ಇದಕ್ಕೂ ಮುನ್ನ ತೆಲುಗು ಸಿನಿಮಾರಂಗದ ‘ಅಲಾ ಮೊದಲೈಂದಿ’ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದ್ದರು. ತೆಲುಗಿನಲ್ಲಿ ಅವರಿಗೆ ಮೊದಲ ಚಿತ್ರದ ಯಶಸ್ಸಿನಿಂದ ಹಲವು ಅವಕಾಶಗಳು ಒದಗಿಬಂದವು. ಪವರ್‌ ಸ್ಟಾರ್‌ ಪವನ್‌ ಕಲ್ಯಾಣ್‌, ಎಂಟಿಆರ್‌, ನಾನಿ ಮುಂತಾದ ಸ್ಟಾರ್‌ ನಟರ ಜೊತೆ ನಟಿಸಿದ್ದಾರೆ. ಇನ್ನು ಕನ್ನಡದಲ್ಲಿ ಕಿಚ್ಚ ಸುದೀಪ್ ಅವರೊಂದಿಗೂ ನಟಿಸಿ ಸೈ ಎನಿಸಿಕೊಂಡಿದ್ದಾರೆ.
ಯಾವುದೇ ಅತಿರೇಕದ ಪಾತ್ರಗಳನ್ನು ಮಾಡದೆ ತೆಲುಗು ಸ್ಥಳೀಯ ಹುಡುಗಿಯ ಪಾತ್ರಗಳಿಗೆ ಹೆಸರಾಗಿರುವ ನಿತ್ಯಾ, ಯಾವುದೇ ಪಾತ್ರವನ್ನಾದರೂ ಸವಾಲಾಗಿ ಸ್ವೀಕರಿಸುತ್ತಾರೆ. ತಮ್ಮ ಮುಂಬರುವ ತಮಿಳು ಚಿತ್ರ ‘ಕಾದಲಿಕ್ಕ ನೇರಮಿಲ್ಲೈ’ ಪ್ರಚಾರದಲ್ಲಿ ಬ್ಯುಸಿಯಾಗಿದ್ದಾರೆ. ಈ ಸಂದರ್ಭದಲ್ಲಿ ಅವರು ಮಾಡಿದ ಕೆಲವು ಹೇಳಿಕೆಗಳು ಇದೀಗ ಸಂಚಲನ ಮೂಡಿಸಿವೆ.
ಇತ್ತೀಚಿನ ಸಂದರ್ಶನವೊಂದರಲ್ಲಿ ವಿಶೇಷವಾಗಿ ನಟಿಯರ ಆರೋಗ್ಯದ ಬಗ್ಗೆ ಚಿತ್ರರಂಗ ಕನಿಷ್ಠ ಮಾನವೀಯತೆ ತೋರುವುದಿಲ್ಲ ಎಂದು ಅವರು ಹೇಳಿದ್ದಾರೆ.
“ಚಿತ್ರ ನಿರ್ಮಾಪಕರು ತಮ್ಮ ತಂಡದವರ ಅನಾರೋಗ್ಯದ ಬಗ್ಗೆ ಅಥವಾ ನಟಿಯರು ಮಾಸಿಕ ಪಿರಿಯಡ್ಸ್ ನೋವಿನಿಂದ ಬಳಲುತ್ತಿದ್ದಾರೆ ಎಂದು ಹೇಳಿದರೂ ಲೆಕ್ಕಿಸುವುದಿಲ್ಲ. ಕೆಲಸದ ಬಗ್ಗೆ ಮಾತ್ರ ಯೋಚಿಸುತ್ತಾರೆ. ‘ಚಿತ್ರರಂಗದಲ್ಲಿ ಹಲವು ಕಡೆ ಅಮಾನವೀಯತೆ ಇದೆ. ಚಿತ್ರೀಕರಣದ ವೇಳೆ ನಟರು, ಸಹ ನಟರು ಎಷ್ಟೇ ಅಸ್ವಸ್ಥರಾಗಿದ್ದರೂ, ಎಷ್ಟೇ ಕಷ್ಟವಿದ್ದರೂ ಚಿತ್ರೀಕರಣಕ್ಕೆ ಬರಬೇಕೆಂದು ನಿರ್ಮಾಪಕರು ಮತ್ತು ನಿರ್ದೇಶಕರು ಬಯಸುತ್ತಾರೆ. ನಾವು ಅದಕ್ಕೆ ಹೊಂದಿಕೊಂಡಿದ್ದೇವೆ. ಏನೇ ಆಗಲಿ, ನಾವು ಕಷ್ಟಪಡಲೇಬೇಕು” ಎಂದು ಹೇಳಿಕೊಂಡಿದ್ದಾರೆ ನಿತ್ಯಾ.
ನೋವಿಗೆ ಸ್ಪಂದಿಸಿದ್ದ ನಿರ್ದೇಶಕ
‘ಸೈಕೊ’ ಚಿತ್ರದ ಚಿತ್ರೀಕರಣದ ವೇಳೆ ನಿತ್ಯಾ ಮೆನನ್ ವಿಭಿನ್ನ ಅನುಭವ ಪಡೆದಿದ್ದರು. ಮೊದಲ ದಿನದ ಚಿತ್ರೀಕರಣದಲ್ಲೇ ತಮಗೆ ಪಿರಿಯಡ್ಸ್ ಆರಂಭವಾಗಿ ತೀವ್ರ ನೋವು ಕಾಣಿಸಿಕೊಂಡಿತು. “ಅಂದು ನಾನು ಸೈಕೋ ಸಿನಿಮಾ ಸೆಟ್ಗೆ ಸ್ವಲ್ಪ ತಡವಾಗಿ ಹೋದೆ. ಆಗ ಮೊದಲ ಸಲ ನನ್ನ ಪೀರಿಯಡ್ಸ್ ಬಗ್ಗೆ ಒಬ್ಬ ಪುರುಷ ನಿರ್ದೇಶಕರ ಬಳಿ ಹೇಳಿದೆ. ಅದನ್ನು ಸೂಕ್ಷ್ಮವಾಗಿ ಅರ್ಥಮಾಡಿಕೊಂಡ ನಿರ್ದೇಶಕ ಮಿಸ್ಕಿನ್, ಇದು ಮೊದಲ ದಿನವೇ ಎಂದು ಕೇಳಿದರು. ಹೌದು ಎಂದಾಗ, ನನ್ನಿಂದ ಯಾವುದೇ ಕೆಲಸ ಮಾಡಿಸದೆ, ಸಂಪೂರ್ಣ ವಿಶ್ರಾಂತಿ ತೆಗೆದುಕೊಳ್ಳುವಂತೆ ತಿಳಿಸಿದರು.” ಎಂದು ನೆನಪಿಸಿಕೊಳ್ಳುತ್ತಾರೆ.
ನಿತ್ಯಾ ಮೆನನ್ ನಟನೆಯ ಕಾದಲಿಕ್ಕ ನೆರಮಿಲ್ಲೈ ಸಿನಿಮಾ ಇದೀಗ ಬಿಡುಗಡೆಯಾಗಿದೆ. ಧನುಷ್ ನಿರ್ದೇಶನದ ಇಡ್ಲಿ ಕಡೈ ಚಿತ್ರದಲ್ಲಿ ನಿತ್ಯಾ ಮೆನನ್ ನಟಿಸಲಿದ್ದಾರೆ. ಡಿಯರ್ ಎಕ್ಸೆಸ್ ಎಂಬ ಚಿತ್ರದ ಶೂಟಿಂಗ್ನಲ್ಲೂ ಪಾಲ್ಗೊಂಡಿದ್ದಾರೆ. ಇನ್ನು ವಿಜಯ್ ಸೇತುಪತಿ ಅವರೊಂದಿಗೆ ಇನ್ನೂ ಹೆಸರಿಡದ ಚಿತ್ರದಲ್ಲೂ ನಾಯಕಿಯಾಗಿದ್ದಾರೆ.
