ಪರ್ಯಾಯ ಪುತ್ತಿಗೆ ಮಠದ ಸುಗುಣೇಂದ್ರ ತೀರ್ಥರ ವಿಶ್ವ ಗೀತಾ ಪರ್ಯಾಯದ ಭಾಗವಾಗಿ, ಆಯೋಜಿಸಿದ್ದ ಲಕ್ಷ ಕಂಠ ಗೀತಾ ಪಾರಾಯಣ ಕಾರ್ಯಕ್ರಮದಲ್ಲಿ ಪ್ರಧಾನಮಂತ್ರಿ ನರೇಂದ್ರ ಮೋದಿ ಪಾಲ್ಗೊಂಡರು. ಪ್ರಧಾನಿ ಮೋದಿ ಅವರ ಭಾಷಣಕ್ಕೂ ಮುನ್ನ ಆಶೀರ್ವಚನ ನೀಡಿದ ಸುಗುಣೇಂದ್ರ ತೀರ್ಥರು, ಪ್ರಧಾನಿ ಮೋದಿ ಅವರಿಗೆ, ಕೃಷ್ಣ ಕಾರಿಡಾರ್ ಯೋಜನೆಗೆ ಪ್ರಸ್ತಾವನೆ ಸಲ್ಲಿಸಿದರು
ಕಾಶಿ ಕಾರಿಡಾರ್ ಮತ್ತು ಉಜ್ಜಯನಿ ಕಾರಿಡಾರ್ನಂತೆ ಉಡುಪಿಯಲ್ಲಿ ಕೃಷ್ಣ ಕಾರಿಡಾರ್ ನಿರ್ಮಿಸಲು, ವೇದಿಕೆಯಲ್ಲೇ ಮನವಿ ಮಾಡಿದರು. ಇದು ಪ್ರಾಚೀನ ಉಡುಪಿಯ ಪರಿಕಲ್ಪನೆಯನ್ನು ಇಟ್ಟುಕೊಂಡು, ನವೀನ ಮಾದರಿಯಲ್ಲಿ ರೂಪಿಸಲಾದ ಅಭಿವೃದ್ದಿ ಯೋಜನೆಯ ಪ್ರಸ್ತಾವನೆ.
ಶ್ರೀಕೃಷ್ಣಮಠ, ಅನಂತೇಶ್ವರ ಮತ್ತು ಚಂದ್ರಮೌಳೀಶ್ವರ ದೇವಾಲಯ, ಅಷ್ಟಮಠಗಳು, ಸಂಸ್ಕೃತ ಕಾಲೇಜು, ಪೂರ್ಣಪ್ರಜ್ಞ ಕಾಲೇಜು, ಚಂದ್ರ ಪುಷ್ಕರಣಿ ಸೇರಿದಂತೆ, ಪ್ರದಕ್ಷಿಣಾ ಪಥವನ್ನು ನಿರ್ಮಿಸುವುದು, ಕೃಷ್ಣ ಕಾರಿಡಾರ್ ಯೋಜನೆಯ ಭಾಗವಾಗಿದೆ. ವಾಣಿಜ್ಯ ವ್ಯವಹಾರಗಳಿಗೆ ಉತ್ತೇಜನ ನೀಡುವುದೂ ಈ ಯೋಜನೆಯ ಭಾಗವಾಗಿದೆ.
ಮಂಗಳೂರಿನಿಂದ ಸೇನಾ ಹೆಲಿಕಾಪ್ಟರ್ ಮೂಲಕ, ಆದಿಉಡುಪಿ ಹೆಲಿಪ್ಯಾಡಿಗೆ ಆಗಮಿಸಿದ ಪ್ರಧಾನಿ ಮೋದಿ, ಬನ್ನಂಜೆ ನಾರಾಯಣಗುರು ಸರ್ಕಲ್ ನಿಂದ, ಕಲ್ಸಂಕ ಜಂಕ್ಷನ್ ವರೆಗೆ ರೋಡ್ ಶೋ ನಡೆಸಿದರು. ರಸ್ತೆಯ ಇಕ್ಕೆಲಗಳಲ್ಲಿ ಕಿಕ್ಕಿರಿದು ಜನ ಸೇರಿದ್ದರು. ಉಡುಪಿ ನಗರದಲ್ಲಿ ಅಕ್ಷರಸಃ ಹಬ್ಬದ ವಾತಾವರಣ ನಿರ್ಮಾಣವಾಗಿತ್ತು.
ಉಡುಪಿ ಪುತ್ತಿಗೆ ಮಠದ ಶ್ರೀಗಳು, ಪ್ರಧಾನಿಗೆ ಪೇಟ ತೊಡಿಸಿ, ಶಾಲು ಮತ್ತು ತುಳಸಿಮಣಿ ಸರವನ್ನು ಹಾಕಿ, ಕೃಷ್ಣನ ನವಿಲು ಇರುವ ಕಿರೀಟ, ಬೆಳ್ಳಿಯ ಕಡಗೋಲು ಅನ್ನು ನೀಡಿದರು. ಎಲ್ಲರಿಗೂ ನಮಸ್ಕಾರ ಎಂದು ಕನ್ನಡದಲ್ಲಿ ಭಾಷಣ ಆರಂಭಿಸಿದ ಪ್ರಧಾನಿ ಮೋದಿ, ಅಯೋಧ್ಯೆ ರಾಮ ಮಂದಿರದ ಒಂದು ದ್ವಾರಕ್ಕೆ ಆಚಾರ್ಯ ಮಧ್ವರ ಹೆಸರನ್ನು ಇಡಲಾಗಿದೆ ಎಂದು ಹೇಳಿದರು.
ಇದು ವಿಶ್ವ ಗೀತಾ ಪರ್ಯಾಯ, ಈ ಪರ್ಯಾಯಕ್ಕೆ ವಿಶ್ವ ನಾಯಕ ಬಂದಿರುವುದು ಸಂತಸ ತಂದಿದೆ. ಮೋದಿಯವರಿಂದ ಧರ್ಮ ರಕ್ಷಣೆ ನಡೆಯಲಿ. ಮೋದಿ ರಕ್ಷಿತಃ ರಕ್ಷಿತ, ಶ್ರೀಕೃಷ್ಣಾನುಗ್ರಹ ರೂಪದಲ್ಲಿ ಈ ದಿನ ನಾವು, ’ಭಾರತ ಭಾಗ್ಯವಿದಾತ” ಎನ್ನುವ ಬಿರುದಯ ನೀಡುತ್ತಿದ್ದೇವೆ. ವಾರಣಾಸಿ ಕಾರಿಡಾರ್ ನಂತೆ, ಉಡುಪಿಯಲ್ಲಿ ಶ್ರೀಕೃಷ್ಣ ಕಾರಿಡಾರ್ ನಿರ್ಮಿಸಬೇಕು ಎನ್ನುವುದು ನಮ್ಮ ಆಶಯ” ಎಂದು ಪುತ್ತಿಗೆ ಮಠದ ಸುಗುಣೇಂದ್ರತೀರ್ಥ ಶ್ರೀಗಳು ಹೇಳಿದರು.
