ಭಗವದ್ಗೀತೆಯು ಶಾಂತಿ ಮತ್ತು ಸತ್ಯವನ್ನು ಪರಮಗುರಿಯಾಗಿ ಬೋಧಿಸುತ್ತದೆ. ಇದರೊಂದಿಗೆ ಧರ್ಮರಕ್ಷಣೆಗಾಗಿ ದುಷ್ಟರು, ಶತ್ರುಗಳನ್ನು ಸಂಹರಿಸಬೇಕು ಎಂಬ ಸಂದೇಶವನ್ನೂ ನೀಡುತ್ತದೆ. ನಮಗೆ ಶಾಂತಿ ಸ್ಥಾಪನೆಯೂ ಗೊತ್ತು. ಧರ್ಮ ರಕ್ಷಣೆಯೂ ಗೊತ್ತು. ಭಾರತವು ಭಗವದ್ಗೀತೆಯ ಇದೇ ತತ್ತ್ವ ವನ್ನು ಅನುಸರಿಸುತ್ತದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದಾರೆ.
ಉಡುಪಿಯ ಪರ್ಯಾಯ ಪುತ್ತಿಗೆ ಮಠ, ಶ್ರೀಕೃಷ್ಣ ಮಠದ ವತಿಯಿಂದ ಗೀತಾ ಮಾಸೋತ್ಸವ ಸಮಾರೋಪದಲ್ಲಿ ಪಾಲ್ಗೊಂಡು ಮಾತನಾಡಿದ ಮೋದಿ, ಕೆಂಪುಕೋಟೆಯ ಮೇಲಿಂದ ಕೃಷ್ಣನ ಶಾಂತಿ- ಸಹಾನುಭೂತಿಯ ಸಂದೇಶ ಹೇಳುತ್ತಲೇ, ಆಪರೇಷನ್ ಸಿಂಧೂರದ ಸಮಯದಲ್ಲಿ ಪ್ರಜೆಗಳ ರಕ್ಷಣೆಗೆ ಸುದರ್ಶನ ಚಕ್ರವನ್ನು ಆಯುಧವಾಗಿ ಬಳಸಿದೆ ಎಂದರು.
ಶತ್ರುಗಳನ್ನು ಹದ್ದುಬಸ್ತಿನಲ್ಲಿಡಬೇಕು. ತಪ್ಪಿದರೆ ಸುದರ್ಶನ ಚಕ್ರದಿಂದ ತಕ್ಕ ಶಾಸ್ತಿ ಮಾಡಬೇಕು. ನಾಗರಿಕರ ಹಾಗೂ ಶಾಂತಿ ರಕ್ಷಣೆಗೆ ಗೀತೆ ನೆಲೆಯಲ್ಲಿ ಸಂಕಲ್ಪ ಕೈಗೊಳ್ಳಬೇಕು ಎಂದರು. 
ಉಡುಪಿಯೇ ಕರ್ಮ ಭೂಮಿ: ಉಡುಪಿಯನ್ನು ಜ್ಞಾನ, ಭಕ್ತಿ, ಸೇವೆಯ ಸಂಕೇತ ಎಂದು ಬಣ್ಣಸಿದ ಮೋದಿ, ಸರ್ಕಾರದ ಆಡಳಿತದ ಮಾದರಿಗೆ ಉಡುಪಿಯೇ ಕರ್ಮ ಭೂಮಿ ಎಂದು ಹೇಳಿದರು.
ಗೀತಾ ಪಾರಾಯಣ ನಮ್ಮ ಮನಸ್ಸು, ಮಸ್ತಿಷ್ಕಕ್ಕೆ ಸ್ಪಂದನೆ ಜನತೆಗೆ ಆಧ್ಯಾತ್ಮಿಕ, ಸಾಮಾಜಿಕ ಶಕ್ತಿ ಜತೆಗೆ ವಿಶ್ವಕ್ಕೆ ಸಾಮೂಹಿಕ ಚೇತನ ನೀಡಬಲ್ಲದು. ಕೋಟಿ ಗೀತಾ ಲೇಖನ ಯಜ್ಞವು ಪರಂಪರೆಯ ಜತೆಗೆ ವಿಶ್ವಕ್ಕೆ ಜನಾಂದೋಲನದ ಪ್ರೇರಣೆಯಾಗಬಲ್ಲದು ಎಂದರು.
ಶ್ರೀಕೃಷ್ಣನ ಭಗವದ್ಗೀತೆಯ ಮೂಲಕ ನೀಡಿದ ಕರ್ಮ, ಕರ್ತವ್ಯ, ಕಲ್ಯಾಣ ಸಂದೇಶಗಳೇ 2047ರೊಳಗೆ ವಿಕಸಿತ ಭಾರತ ನಿರ್ಮಾಣ ಸಂಕಲ್ಪಕ್ಕೆ ಪ್ರೇರಣೆ. ಶ್ರೀಕೃಷ್ಣನ ಉಪದೇಶ, ಸಂದೇಶ ವ್ಯಕ್ತಿಗೆ ಮಾತ್ರವಲ್ಲ, ರಾಷ್ಟ್ರ ನೀತಿ ರೂಪಿಸುವ ಹಾದಿಯಲ್ಲಿ ದಿಕ್ಕನ್ನು ತೋರಬಲ್ಲವು. ಲೋಕದ ಕಲ್ಯಾಣಕ್ಕಾಗಿ ಪ್ರತಿಯೊಬ್ಬರೂ ತಮ್ಮ ಜೀವನವನ್ನು ಸಮರ್ಪಿಸಬೇಕು. ಕೆಂದ್ರ ಸರ್ಕಾರ ರೂಪಿಸಿದ ನಾನಾ ಯೋಜನೆಗಳ ಹಿಂದೆ ಭಗವದ್ಗೀತಾ ಶ್ಲೋಕ ಪ್ರೇರಣೆಯಿದೆ. ಗೀತ ಸಂದೇಶದ ನೆಲೆಯಲ್ಲಿ ಶಾಂತಿ ಸ್ಥಾಪನೆಗೆ ಮಾರಕವಾದ ದಾಳಿಕೋರರನ್ನು ನಿರ್ಮೂಲನೆ ಮಾಡಬೇಕು ಎಂದರು.
