ಮಕ್ಕಳ ಅಮಾಯಕತೆಯನ್ನು ದುರ್ಬಳಕೆ ಮಾಡಿಕೊಂಡು, ಚಾಕ್ಲೆಟ್, ಫೋನ್, ಇಂಟರ್ನೆಟ್ ಆಮಿಷ ತೋರಿಸಿ, 33 ಮಕ್ಕಳನ್ನು ಅಪಹರಿಸಿ ಬೆದರಿಸಿ ಅವರ ಅಶ್ಲೀಲ ವಿಡಿಯೋಗಳನ್ನು ಚಿತ್ರಿಸಿದ ಉತ್ತರ ಪ್ರದೇಶದ ದಂಪತಿಗೆ ಗಲ್ಲು ಶಿಕ್ಷೆ ಆದೇಶಿಸಲಾಗಿದೆ.
ಹಣಕ್ಕಾಗಿ ಮಕ್ಕಳ ಅಶ್ಲೀಲ ವಿಡಿಯೋ ಚಿತ್ರೀಕರಿಸಿ ಡಾರ್ಕ್ ವೆಬ್ಗೆ ಮಾರಾಟ ಮಾಡಿದ್ದ ದಂಪತಿಗೆ ಉತ್ತರ ಪ್ರದೇಶ ಪೋಕ್ಸೋ ನ್ಯಾಯಾಲಯ ಗಲ್ಲುಶಿಕ್ಷೆ ವಿಧಿಸಿದೆ.
ಸರಕಾರದ ನೀರಾವರಿ ಇಲಾಖೆಯ ಕಿರಿಯ ಅಭಿಯಂತರ ರಾಮ್ ಭವನ್ ಹಾಗೂ ಆತನ ಪತ್ನಿ ದುರ್ಗಾವತಿಗೆ ಗಲ್ಲುಶಿಕ್ಷೆ ವಿಧಿಸಲಾಗಿದೆ. ಆಪರಾಧಿಗಳ ಮನೆಯಿಂದ ಜಪ್ತಿ ಮಾಡಲಾಗಿದ್ದ ಹಣವನ್ನು ಸಂತ್ರಸ್ತರಿಗೆ ತಲಾ 10 ಲಕ್ಷ ರೂ.ಗಳಂತೆ ಪರಿಹಾರ ನೀಡುವಂತೆ ಕೋರ್ಟ್ ಆದೇಶಿಸಿದೆ.
ಉತ್ತರ ಪ್ರದೇಶದ ಬಾಂದಾ, ಚಿತ್ರಕೂಟ ಸುತ್ತಮುತ್ತಲ ಪ್ರದೇಶದಲ್ಲಿ 2010 ರಿಂದ 2020 ರವರೆಗೆ 33 ಮಕ್ಕಳ ಅಪಹರಣ, ಲೈಂಗಿಕ ದುರ್ಬಳಕೆ, ಶೋಷಣೆ ಪ್ರಕರಣದ ತನಿಖೆ ನಡೆಸಿದ್ದ ಕೇಂದ್ರ ತನಿಖಾ ದಳ (ಸಿಬಿಐ) 2021 ರಲ್ಲಿ ಶಿಕ್ಷೆಗೆ ಗುರಿಯಾದ ದಂಪತಿ ವಿರುದ್ಧ ದೋಷಾರೋಪ ಪಟ್ಟಿ ಸಲ್ಲಿಸಿತ್ತು.
ಅಪರಾಧಿಗಳು ಎಸಗಿದ ದುಷ್ಕೃತ್ಯ ಮಾನವೀಯತೆ ಮೀರಿದ ಹೀನಕೃತ್ಯವಾಗಿದೆ. ವ್ಯವಸ್ಥಿತವಾಗಿ ಮಕ್ಕಳನ್ನು ಶೋಷಣೆ ಮಾಡಲಾಗಿದೆ. ಮಕ್ಕಳ ಬದುಕಿನ ಹಕ್ಕು ಕಸಿದುಕೊಂಡ ಅಪರಾಧಿಗಳನ್ನು ಗಲ್ಲಿಗೇರಿಸುವುದೇ ಸೂಕ್ತ ಎಂದು ಪೋಕ್ಸೋ ಕೋರ್ಟ್ ನ್ಯಾ.ಪ್ರದೀಪ್ಕುಮಾರ್ ಮಿಶ್ರಾ ಆದೇಶ ನೀಡಿದ್ದಾರೆ.
”ಇಂತಹ ಕೃತ್ಯಗಳು ಮಕ್ಕಳ ಬದುಕು ನಾಶಪಡಿಸುವ ಜತೆಗೆ ಸಮಾಜದ ನೈತಿಕ ಅಡಿಪಾಯವನ್ನು ದುರ್ಬಲಗೊಳಿಸುತ್ತದೆ. ಲೈಂಗಿಕ ಶೋಷಣೆ ವಿಷಯದಲ್ಲಿ ನೀಡುವ ಸೌಮ್ಯ ತೀರ್ಪುಗಳು ತಪ್ಪು ಸಂದೇಶ ರವಾನಿಸುತ್ತವೆ. ಅಪರಾಧಿಗಳಿಗೆ ವಿಧಿಸುವ ಗರಿಷ್ಠ ಶಿಕ್ಷೆ ಹೊಸ ಪಾಠವಾಗಬೇಕು,” ಎಂದು ನ್ಯಾ.ಪ್ರದೀಪ್ ಕುಮಾರ್ ಮಿಶ್ರಾ ತೀರ್ಪಿನಲ್ಲಿ ಹೇಳಿದ್ದಾರೆ.
ಪ್ರಕರಣದ ಹಿನ್ನೆಲೆ: ಚಿತ್ರಕೂಟ ಸುತ್ತಮುತ್ತ 33 ಮಕ್ಕಳನ್ನು ಅಪಹರಿಸಿದ್ದ ರಾಮ್ಭವನ್ ದಂಪತಿ ಅಶ್ಲೀಲ ವಿಡಿಯೊ ಚಿತ್ರೀಕರಿಸಿ ಹಣಕ್ಕಾಗಿ ಮಾರಾಟ ಮಾಡಿದ್ದರು. 300 ವಿಡಿಯೊ, 700 ಫೋಟೊಗಳನ್ನು ಡಾರ್ಕ್ವೆಬ್ ಸೈಟ್ ಮೂಲಕ ಸುಮಾರು 47 ದೇಶಗಳಿಗೆ ಮಾರಾಟ ಮಾಡಿರುವುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ. 2020ರಲ್ಲಿ ಪ್ರಕರಣ ದಾಖಲಿಸಿಕೊಂಡಿದ್ದ ಸಿಬಿಐ, ಸಮಗ್ರ ತನಿಖೆ ಬಳಿಕ 2021ರಲ್ಲಿ ಚಾರ್ಜ್ ಶೀಟ್ ಸಲ್ಲಿಸಿತ್ತು.
ಸರಕಾರಿ ಕೆಲಸದಲ್ಲಿದ್ದ ರಾಮ್ಭವನ್ ತಮ್ಮ ಮನೆಯನ್ನು ಅಶ್ಲೀಲ ದೃಶ್ಯದ ಚಿತ್ರೀಕರಣ ಕೇಂದ್ರ ಮಾಡಿಕೊಂಡಿದ್ದರು. ಪತ್ನಿ ದುರ್ಗಾದೇವಿ ಜತೆಗೂಡಿ ಆಸೆ ಆಮಿಷ ತೋರಿಸಿ ಮಕ್ಕಳನ್ನು ಮನೆಗೆ ಕರೆ ತರುತ್ತಿದ್ದರು.
ಚಾರ್ಜ್ ಶೀಟ್ನಲ್ಲಿ ಸಿಬಿಐ ವಿವರಿಸಿದಂತೆ, ಮಕ್ಕಳಿಗೆ ಆನ್ಲೈನ್ ಗೇಮಿಂಗ್ ಆಸೆ, ಚಾಕೋಲೆಟ್, ಹಣದ ಆಮಿಷ, ಉಡುಗೊರೆ ಆಸೆ ತೋರಿಸಿ ಸೆಳೆಯುತ್ತಿದ್ದರು. ಸ್ವಲ್ಪ ಬುದ್ಧಿವಂತ ಮಕ್ಕಳಿಗೆ ಮೊಬೈಲ್ ಫೋನ್, ವಾಚ್, ಉಚಿತ ಇಂಟರ್ನೆಟ್ ಆಸೆ ತೋರಿಸಿ ಕರೆತರುತ್ತಿದ್ದರು. ಮನೆಗೆ ಕರೆದು ತಂದ ಮಕ್ಕಳನ್ನು ಪುಸಲಾಯಿಸಿ ಇಲ್ಲವೇ ಬೆದರಿಸಿ, ಅಶ್ಲೀಲ ದೃಶ್ಯದ ಚಿತ್ರೀಕರಣಕ್ಕೆ ಬಳಸಿಕೊಂಡಿದ್ದಾರೆ. ಪೋಟೊ, ವಿಡಿಯೋ ಮೂಲಕ ಬೆದರಿಕೆ ಹಾಕುವ ಮೂಲಕ ನಿರಂತರವಾಗಿ ಲೈಂಗಿಕ ಶೋಷಣೆ ಮಾಡಿದ್ದಾರೆ.
ರಾಮ್ಭವನ್ ದಂಪತಿ ಕೃತ್ಯ ಅಂತಾರಾಷ್ಟ್ರೀಯ ಕಾನೂನು ಸಂಸ್ಥೆ ಇಂಟರ್ಪೋಲ್ ಮೂಲಕ ಬೆಳಕಿಗೆ ಬಂದಿತ್ತು. ಡಾರ್ಕ್ವೆಬ್ನಲ್ಲಿ ಮಕ್ಕಳ ಅಶ್ಲೀಲ ವಿಡಿಯೋ ಮಾರಾಟ ಸಂಬಂಧ ಮೂರು ಮೊಬೈಲ್ ನಂಬರ್ ಪತ್ತೆ ಮಾಡಿದ ಇಂಟರ್ಪೋಲ್, ಭಾರತದ ಸಿಬಿಐಗೆ ಮಾಹಿತಿ ರವಾನಿಸಿತ್ತು. ತನಿಖೆಗೆ ಇಳಿದ ಸಿಬಿಐ ಅಧಿಕಾರಿಗಳು ಬಾಂದಾ, ಚಿತ್ರಕೂಟದಲ್ಲಿ ಮಕ್ಕಳ ನಾಪತ್ತೆ ಪ್ರಕರಣದ ಜಾಡು ಹಿಡಿದು ಹೊರಟಾಗ ರಾಮ್ಭವನ್ ದಂಪತಿಯ ದಂಧೆ ಪತ್ತೆಯಾಗಿದೆ.
