UPI ಪಾವತಿಗೆ ಶುಲ್ಕ ಬರಲಿದೆಯೇ? ದೇಶಾದ್ಯಂತ ಆತಂಕ – ಸರ್ಕಾರದ ಹೊಸ ನಿರ್ಧಾರವೇನು?

 UPI – ಭಾರತದ ಡಿಜಿಟಲ್ ಕ್ರಾಂತಿಯ ಹೆಮ್ಮೆ

ಕಳೆದ ಕೆಲವು ವರ್ಷಗಳಲ್ಲಿ ಭಾರತ ಡಿಜಿಟಲ್ ಪಾವತಿಯಲ್ಲಿ ವಿಶ್ವದ ಗಮನ ಸೆಳೆದಿದೆ.

• ಪ್ರತಿದಿನ ಕೋಟ್ಯಾಂತರ UPI ವಹಿವಾಟುಗಳು ನಡೆಯುತ್ತಿವೆ.
• ಚಹಾ ಅಂಗಡಿಯಿಂದ ಹಿಡಿದು ದೊಡ್ಡ ಶಾಪಿಂಗ್ ಮಾಲ್‌ಗಳವರೆಗೆ ಎಲ್ಲೆಡೆ UPI ಬಳಕೆ ಸಾಮಾನ್ಯವಾಗಿದೆ.
• ಸಣ್ಣ ವ್ಯಾಪಾರಿಗಳಿಗೂ ಡಿಜಿಟಲ್ ಆರ್ಥಿಕತೆಯಲ್ಲಿ ಸ್ಥಾನ ಕಲ್ಪಿಸಿದ ಪ್ರಮುಖ ವ್ಯವಸ್ಥೆಯೇ UPI.

ಈ ಯಶಸ್ಸಿನ ಪ್ರಮುಖ ಕಾರಣವೇ “Zero MDR”, ಅಂದರೆ ಗ್ರಾಹಕರಿಗೂ, ಸಾಮಾನ್ಯ UPI ಪಾವತಿಗಳನ್ನು ಸ್ವೀಕರಿಸುವ ವ್ಯಾಪಾರಿಗಳಿಗೂ ಯಾವುದೇ ಶುಲ್ಕವಿಲ್ಲ ಎಂಬ ವ್ಯವಸ್ಥೆ.

ಈಗ ಏನು ಬದಲಾಗಿದೆ?

ಇತ್ತೀಚೆಗೆ ಕೇಂದ್ರ ಸರ್ಕಾರ ಒಂದು ಕಾನೂನು ತಿದ್ದುಪಡಿ ಮೂಲಕ UPI ವಹಿವಾಟುಗಳ ಮೇಲೆ Merchant Discount Rate (MDR) ವಿಧಿಸುವ ಅವಕಾಶವನ್ನು ಕಲ್ಪಿಸುವ ಕಾನೂನು ಚೌಕಟ್ಟನ್ನು ರೂಪಿಸಿದೆ.

ಅಂದರೆ,

 ಸರ್ಕಾರ ತಕ್ಷಣವೇ ಶುಲ್ಕ ವಿಧಿಸಿಲ್ಲ. ಆದರೆ ಭವಿಷ್ಯದಲ್ಲಿ ಅಗತ್ಯವಿದ್ದರೆ MDR ಜಾರಿಗೆ ತರಲು ಕಾನೂನುಬದ್ಧ ಅವಕಾಶವನ್ನು ಸೃಷ್ಟಿಸಿದೆ.

ಗ್ರಾಹಕರು ಆತಂಕ ಪಡುವ ಅಗತ್ಯ ಇದೆಯೇ?

ಸದ್ಯದ ಪರಿಸ್ಥಿತಿಯಲ್ಲಿ ಉತ್ತರ – ಇಲ್ಲ. ಪ್ರಸ್ತುತ:

 ಸಾಮಾನ್ಯ ಬ್ಯಾಂಕ್ ಖಾತೆಯಿಂದ UPI ಮೂಲಕ ಹಣ ಕಳುಹಿಸುವವರಿಗೆ ಯಾವುದೇ ಶುಲ್ಕವಿಲ್ಲ.

 ಸ್ನೇಹಿತರಿಗೆ, ಕುಟುಂಬದವರಿಗೆ ಅಥವಾ ನಿಮ್ಮದೇ ಇನ್ನೊಂದು ಬ್ಯಾಂಕ್ ಖಾತೆಗೆ ಹಣ ವರ್ಗಾಯಿಸಿದರೂ ಯಾವುದೇ ಚಾರ್ಜ್ ಇಲ್ಲ.

ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರೂ ಸಹ “UPI ಬಳಸುವ ಸಾಮಾನ್ಯ ಗ್ರಾಹಕರ ಮೇಲೆ ಯಾವುದೇ ಶುಲ್ಕ ವಿಧಿಸುವುದಿಲ್ಲ” ಎಂದು ಸ್ಪಷ್ಟಪಡಿಸಿದ್ದಾರೆ.

ಹಾಗಾದರೆ ಚರ್ಚೆ ಏಕೆ?

ಚರ್ಚೆ ನಡೆಯುತ್ತಿರುವುದು Merchant Discount Rate (MDR) ಕುರಿತು. MDR ಎಂದರೆ, ವ್ಯಾಪಾರಿಗಳು ಡಿಜಿಟಲ್ ಪಾವತಿಯನ್ನು ಸ್ವೀಕರಿಸಿದಾಗ ಬ್ಯಾಂಕ್ ಅಥವಾ ಪಾವತಿ ಸಂಸ್ಥೆಗೆ ಪಾವತಿಸುವ ಸೇವಾ ಶುಲ್ಕ. ಪ್ರಸ್ತುತ UPIಗೆ ಇದು ಶೂನ್ಯವಾಗಿದೆ. ಆದರೆ ಮುಂದಿನ ದಿನಗಳಲ್ಲಿ ಸರ್ಕಾರವು:

• ದೊಡ್ಡ ವ್ಯಾಪಾರಿಗಳಿಗೆ
• ಹೆಚ್ಚಿನ ಮೊತ್ತದ UPI ವಹಿವಾಟುಗಳಿಗೆ

0.3% ರಿಂದ 0.5%ರವರೆಗೆ MDR ವಿಧಿಸುವ ಬಗ್ಗೆ ಚಿಂತನೆ ನಡೆಸುತ್ತಿದೆ ಎಂಬ ವರದಿಗಳು ಪ್ರಕಟವಾಗಿವೆ. ಆದರೆ ಇದಕ್ಕೆ ಸಂಬಂಧಿಸಿದಂತೆ ಇನ್ನೂ ಅಂತಿಮ ಅಧಿಸೂಚನೆ ಹೊರಬಂದಿಲ್ಲ.

ಯಾರಿಗೆ ಪರಿಣಾಮ ಬೀಳಬಹುದು?

ಒಂದು ವೇಳೆ MDR ಜಾರಿಗೆ ಬಂದರೆ ಅದು ಮುಖ್ಯವಾಗಿ:

• ದೊಡ್ಡ ಕಂಪನಿಗಳು
• ದೊಡ್ಡ ವ್ಯಾಪಾರಿಗಳು
• ಹೆಚ್ಚಿನ ಮೌಲ್ಯದ ವಹಿವಾಟುಗಳು

ಇವರಿಗೆ ಅನ್ವಯಿಸುವ ಸಾಧ್ಯತೆ ಇದೆ. ಸಾಮಾನ್ಯ ಜನರು ತಮ್ಮ ಬ್ಯಾಂಕ್ ಖಾತೆಯಿಂದ UPI ಬಳಸುವ ರೀತಿಯಲ್ಲಿ ಯಾವುದೇ ಬದಲಾವಣೆ ಇಲ್ಲ.

RuPay Credit Card ಮೂಲಕ UPI

ಇನ್ನೊಂದು ವಿಷಯವೂ ಗಮನಿಸಬೇಕಾಗಿದೆ. RuPay Credit Card ಅನ್ನು UPIಗೆ ಲಿಂಕ್ ಮಾಡಿ ವ್ಯಾಪಾರಿಗಳಲ್ಲಿ ಪಾವತಿ ಮಾಡಿದಾಗ ಕೆಲವು ಸಂದರ್ಭಗಳಲ್ಲಿ Interchange Fee ಅನ್ವಯಿಸಬಹುದು. ಆದರೆ, ಈ ಶುಲ್ಕ ಗ್ರಾಹಕರಿಂದ ವಸೂಲಿ ಮಾಡುವುದಿಲ್ಲ.

NPCI ಹೊಸ ನಿಯಮಗಳು

UPI ಇನ್ನಷ್ಟು ಸ್ಥಿರವಾಗಿ ಕಾರ್ಯನಿರ್ವಹಿಸಲು NPCI ಕೆಲವು ತಾಂತ್ರಿಕ ಬದಲಾವಣೆಗಳನ್ನೂ ಮಾಡಿದೆ.

ಅವುಗಳಲ್ಲಿ:

• Balance Checkಗಳಿಗೆ ಮಿತಿ
• AutoPay ವ್ಯವಸ್ಥೆಯಲ್ಲಿ ಸುಧಾರಣೆ
• Server Load ಕಡಿಮೆ ಮಾಡುವ ಕ್ರಮಗಳು
• Transaction Failure ಕಡಿಮೆ ಮಾಡುವ ಹೊಸ ವ್ಯವಸ್ಥೆಗಳು

ಇವು ಬಳಕೆದಾರರಿಗೆ ಉತ್ತಮ ಸೇವೆ ನೀಡುವ ಉದ್ದೇಶದಿಂದ ಜಾರಿಯಾಗಿವೆ.

ಸರ್ಕಾರದ ಉದ್ದೇಶ ಏನು?

UPI ಸೇವೆ ಉಚಿತವಾಗಿರುವುದರಿಂದ:

• ಬ್ಯಾಂಕ್‌ಗಳು
• Payment Service Providers
• FinTech ಸಂಸ್ಥೆಗಳು

UPI ಮೂಲಸೌಕರ್ಯ ನಿರ್ವಹಣೆಗೆ ಸಾಕಷ್ಟು ವೆಚ್ಚವನ್ನು ಭರಿಸುತ್ತಿವೆ. ಭವಿಷ್ಯದಲ್ಲಿ ಈ ವ್ಯವಸ್ಥೆಯನ್ನು ಇನ್ನಷ್ಟು ಬಲಪಡಿಸಲು ಕೆಲವು ರೀತಿಯ ಆದಾಯದ ಮೂಲ ಅಗತ್ಯವಿದೆ ಎಂಬ ವಾದವೂ ಕೇಳಿಬರುತ್ತಿದೆ. ಇನ್ನೊಂದೆಡೆ, ಡಿಜಿಟಲ್ ಪಾವತಿ ಜನಪ್ರಿಯವಾಗಿರುವ ಸಂದರ್ಭದಲ್ಲಿ MDR ಜಾರಿಯಾದರೆ ಸಣ್ಣ ವ್ಯಾಪಾರಿಗಳಿಗೆ ಹೊರೆ ಹೆಚ್ಚಾಗಬಹುದು ಎಂಬ ಆತಂಕವೂ ವ್ಯಕ್ತವಾಗುತ್ತಿದೆ.

ಸದ್ಯದ ವಾಸ್ತವ

 UPI ಬಳಕೆದಾರರಿಗೆ ಯಾವುದೇ ಶುಲ್ಕ ಇಲ್ಲ.

 ಬ್ಯಾಂಕ್ ಖಾತೆಯಿಂದ ಬ್ಯಾಂಕ್ ಖಾತೆಗೆ ಹಣ ಕಳುಹಿಸುವುದು ಉಚಿತವೇ ಮುಂದುವರಿಯುತ್ತದೆ.

 MDR ಕುರಿತು ಸರ್ಕಾರ ಕಾನೂನುಬದ್ಧ ಅವಕಾಶ ಮಾತ್ರ ಸೃಷ್ಟಿಸಿದೆ.

 ಅಂತಿಮ ನಿಯಮಗಳು ಇನ್ನೂ ಪ್ರಕಟವಾಗಿಲ್ಲ.

ಕೊನೆ ಮಾತು

UPI ಇಂದು ಭಾರತದ ಡಿಜಿಟಲ್ ಆರ್ಥಿಕತೆಯ ಬೆನ್ನೆಲುಬಾಗಿದೆ. ಈ ವ್ಯವಸ್ಥೆ ಕೋಟ್ಯಾಂತರ ಜನರ ಜೀವನವನ್ನು ಸುಲಭಗೊಳಿಸಿದೆ. ಆದ್ದರಿಂದ “ಇಂದಿನಿಂದಲೇ UPIಗೆ ಶುಲ್ಕ ಆರಂಭವಾಗಿದೆ” ಎಂಬ ರೀತಿಯ ಸಾಮಾಜಿಕ ಜಾಲತಾಣಗಳ ವದಂತಿಗಳನ್ನು ನಂಬಬೇಡಿ. ಸರ್ಕಾರ ಭವಿಷ್ಯದಲ್ಲಿ ಯಾವುದೇ ಹೊಸ ನಿಯಮಗಳನ್ನು ಜಾರಿಗೆ ತಂದರೆ, ಅದರ ಅಧಿಕೃತ ಅಧಿಸೂಚನೆಯ ನಂತರವೇ ಅದು ಜಾರಿಯಾಗುತ್ತದೆ. ಸದ್ಯಕ್ಕೆ ಸಾಮಾನ್ಯ UPI ಬಳಕೆದಾರರು ಯಾವುದೇ ಆತಂಕವಿಲ್ಲದೆ UPI ಸೇವೆಯನ್ನು ಉಚಿತವಾಗಿ ಬಳಸಬಹುದು. ಈ ವಿಷಯವನ್ನು ಪ್ರತಿಯೊಬ್ಬ ಭಾರತೀಯರಿಗೆ ತಿಳಿಸುವ ಜವಾಬ್ಧಾರಿ ನಮ್ಮ ನಿಮ್ಮೆಗಳದ್ದೇ ಆಗಿದೆ ಅಲ್ವೇ?

ಏನಂರೀರೀ?

ನಿಮ್ಮವನೇ

ಉಮಾಸುತ