ಆಗ ಮಾತ್ರ ಅದರಿಂದ ಹೊರಬರಲು ಅವರು ಯೋಚಿಸುತ್ತಾರೆ….”
`ಸಂಘರ್ಷ್‌’ ಚಿತ್ರದಲ್ಲಿ ಬಾಲನಟಿಯಾಗಿ ಬಾಲಿವುಡ್‌ಗೆ ಎಂಟ್ರಿ ಪಡೆದುಕೊಂಡ ನಟಿ ಆಲಿಯಾ ಭಟ್, `ಸ್ಟೂಡೆಂಟ್‌ ಆಫ್‌ ದಿ ಇಯರ್‌’ ಚಿತ್ರದಿಂದ ನಾಯಕಿ ಪಟ್ಟಕ್ಕೇರಿ ತನ್ನದೇ ಪ್ರತ್ಯೇಕ ಛಾಪು ಮೂಡಿಸಿದಳು. ಅವಳ ಮುಗ್ಧ ನಟನೆ ವೀಕ್ಷಕರಿಗೆ ಬಹಳ ಹಿಡಿಸಿತು. ಯುವಜನತೆಗೆ ಈ ಚಿತ್ರ ಹುಚ್ಚೆಬ್ಬಿಸಿತು. ಟೀನೇಜರ್‌ ಆಲಿಯಾ ಎಲ್ಲರ ಮನಗೆದ್ದಳು. ಇದಾದ ಮೇಲೆ ಬಂದ `ಹೈವೇ’ ಚಿತ್ರದಲ್ಲಿನ ತನ್ನ ನಟನೆಯಿಂದ ವಿಮರ್ಶಕರ ಮನ ಗೆದ್ದಳು. `ಉಡ್ತಾ ಪಂಜಾಬ್‌’ ಅವಳ ಪಾಲಿನ ಒಂದು ಸ್ಟ್ರಾಂಗ್‌ ಚಿತ್ರ. ಇದರಲ್ಲಿ ಬಿಹಾರಿ ಹುಡುಗಿ ನಂದಾಳ ಪಾತ್ರ ಬಲು ಗಟ್ಟಿ ಎನಿಸಿತ್ತು. ಈ ಚಿತ್ರಕ್ಕಾಗಿ ಈಕೆಗೆ 2016ರ ಉತ್ತಮ ನಟಿ ಪ್ರಶಸ್ತಿ ಸಹ ಸಿಕ್ಕಿತ್ತು.
ಇದಾದ ಮೇಲೆ `2 ಸ್ಟೇಟ್ಸ್, ಹಂಪ್ಟಿ ಶರ್ಮ ಕೀ ದುಲ್ಹನಿಯಾ, ಕಪೂರ್‌ ಸನ್ಸ್, ಡಿಯರ್‌ ಝಿಂದಗಿ,’ ಇತ್ಯಾದಿ ಚಿತ್ರಗಳಲ್ಲಿ ಸಣ್ಣ ಪ್ರಾಯದಲ್ಲೇ ಸಮರ್ಥವಾಗಿ ನಟಿಸಿ ಸೈ ಎನಿಸಿಕೊಂಡಳು. ಹೀಗೆ ಈಕೆ ಬಾಲಿವುಡ್‌ನ ಟಾಪ್‌ವೋಸ್ಟ್ ಹೀರೋಯಿನ್‌ ಎನಿಸಿದಳು. ಹಿಂದಿಯ ಪ್ರತಿ ನಿರ್ಮಾಪಕ ನಿರ್ದೇಶಕರೂ ಈಕೆ ತಮ್ಮ ಚಿತ್ರದ ನಾಯಕಿ ಆಗಬೇಕೆಂದು ಬಯಸುತ್ತಾರೆ.
ನಟನೆ ಒಂದು ಕಲೆ
ಆಲಿಯಾ ಹೇಳುತ್ತಾಳೆ, “ನಟನೆ ಎಂಬುದು ನಿಜಕ್ಕೂ ಒಂದು ಅದ್ಭುತ ಕಲೆ! ಆ ಪಾತ್ರ ಏನನ್ನು ಬೇಡುತ್ತದೆ ಏನನ್ನು ವ್ಯಕ್ತಪಡಿಸಬೇಕೆಂದು ನೀವು ಪರ್ಫೆಕ್ಟ್ ಆಗಿ ಅರ್ಥ ಮಾಡಿಕೊಂಡರೆ, ನಿಮಗೆ ನಟನೆ ಬಂತೆಂದು ಅರ್ಥ. ಹೀಗಾಗಿಯೇ ನಾನು ಎಲ್ಲಾ ಪಾತ್ರಗಳನ್ನೂ ಸಾಧ್ಯವಾದಷ್ಟೂ ಜೀವಂತವಾಗಿ ಇರಿಸಿಕೊಳ್ಳಲು ಪ್ರಯತ್ನಿಸಿದ್ದೇನೆ. ಅದು `ಉಡ್ತಾ ಪಂಜಾಬ್‌’ನ ಬಿಹಾರಿ ನಂದಾ ಆಗಿರಬಹುದು, `ಹೈವೇ’ ಚಿತ್ರದ ವೀರಾ ತ್ರಿಪಾಠಿ ಅಥವಾ `ಡಿಯರ್‌ ಝಿಂದಗಿ’ಯ ಕಾಯ್ರಾ…. ಎಲ್ಲದರಲ್ಲೂ ನಾನು ನನ್ನ ಛಾಪು ಉಳಿಸಿಕೊಳ್ಳಲು ಪ್ರಯತ್ನಿಸಿದ್ದೇನೆ.”
ಎಷ್ಟೋ ಸಲ ಆಲಿಯಾಳ ಹೆಸರು ಹೀರೋ ಸಿದ್ಧಾರ್ಥ್‌ ಮಲ್ಹೋತ್ರ ಜೊತೆ ಗಾಸಿಪ್‌ ಕಾಲಂನಲ್ಲಿ ಮೂಡಿಬಂದಿದೆ. ಇದಕ್ಕೆ ಡೋಂಟ್‌ಕೇರ್‌ ಎನ್ನುವ ಆಲಿಯಾ, ಆತ ನನ್ನ ಗೆಳೆಯನಷ್ಟೆ ಎನ್ನುತ್ತಾಳೆ. ತನ್ನ ಚಿತ್ರಗಳಲ್ಲಿ ಈಕೆಗೆ `ಡಿಯರ್‌ ಝಿಂದಗಿ’ ಬಲು ಆಪ್ತ. “ನಿಮ್ಮಲ್ಲಿ ಏನೇ ಕುಂದುಕೊರತೆಗಳಿದ್ದರೂ ಅದನ್ನು ಮುಚ್ಚಿಡುವ ಬದಲು ನಾಲ್ಕು ಜನರೊಂದಿಗೆ ಹಂಚಿಕೊಳ್ಳಿ. ನನಗೆ ಸದಾ ಫಾಸ್ಟ್ ಆಗಿ ಮಾತನಾಡುವ ಅಭ್ಯಾಸ, ಕೆಲವೊಮ್ಮೆ ಬೇರೆಯವರಿಗೆ ಅರ್ಥವಾಗಲ್ಲ. ಹಾಗೇಂತ ನಾನು ಅದನ್ನು ಮುಚ್ಚಿಡಲು ಹೋಗೋಲ್ಲ. ಪ್ರತಿಯೊಬ್ಬರಿಗೂ ಒಂದಲ್ಲ ಒಂದು ದೌರ್ಬಲ್ಯ ಇದ್ದೇ ಇರುತ್ತದೆ, ಇತರರಿಗೆ ನೋವಾಗದಂತೆ ಅದರ ಜೊತೆ ಬಾಳಬೇಕಷ್ಟೆ.”
ಮನದಾಳದ ಕನಸು
ನಟನೆ ಮಾತ್ರವಲ್ಲದೆ ಆಲಿಯಾ ಹಾಡುವುದೂ ಉಂಟು. ಎಷ್ಟೋ ಚಿತ್ರಗಳಲ್ಲಿ ತಾನೇ ಹಾಡಿದ್ದಾಳೆ. ತಾನೇ ಹಾಡಿರುವ `ಲವ್ ಯೂ ಝಿಂದಗಿ….’ ಹಾಡು ಬಲು ಇಷ್ಟವಂತೆ. ಕರೀನಾಳ ನಟನೆ ಇವಳಿಗೆ ಬಲು ಇಷ್ಟ. ಹಿಂದಿನವರಾದ ರೇಖಾ, ಶಬಾನಾ ಆಜ್ಮಿ, ವಹೀದಾ ರೆಹಮಾನ್‌ ಮುಂತಾದವರ ಫ್ಯಾನ್‌ ಕೂಡ. ನಿರ್ದೇಶಕರಾದ ತಂದೆ ಮಹೇಶ್‌ ಭಟ್‌ರ `ದಿಲ್ ಹೈ ಕಿ ಮಾನ್ತಾ ನಹೀ, ಹಂ ಹೈ ರಾಹಿ ಪ್ಯಾರ್‌ ಕೇ’ ಇವಳಿಗೆ ಅಚ್ಚುಮೆಚ್ಚು. ತಂದೆಯ ರೊಮ್ಯಾಂಟಿಕ್‌ ಚಿತ್ರಗಳಲ್ಲಿ ನಟಿಸುವಾಸೆ.
“ನನ್ನ ತಂದೆ ಉತ್ತಮ ಲೇಖಕರು. ನನ್ನ ಬಗ್ಗೆ ಏನಾದರೂ ಅಗತ್ಯವಾಗಿ ಬರೆಯುತ್ತಾರೆ ಅನ್ಸುತ್ತೆ. ಅಲ್ಲಿಯವರೆಗೂ ನಾನು ಒಬ್ಬ ಉತ್ತಮ ನಟಿ ಅಂತ ನಿರೂಪಿಸುತ್ತಲೇ ಇರಬೇಕು.”
ಆಲಿಯಾಗೆ ಸವಾಲು ಎಂದರೆ ಹೊಸ ಚಿತ್ರದ ರಿಲೀಸ್‌ ದಿನ ಹಾಗೂ ಅದರ ಪ್ರಮೋಶನ್ಸ್ ಗಾಗಿ ಓಡಾಟ. ಪ್ರತಿ ಚಿತ್ರವನ್ನೂ ಪೂರ್ತಿ ಮಾಡಲು, ಅದು ರಿಲೀಸ್‌ ಆಗುವವರೆಗೂ ಚಡಪಡಿಸುತ್ತಾಳೆ. ವರ್ಷದಲ್ಲಿ 1-2 ಚಿತ್ರಗಳಷ್ಟೇ ರಿಲೀಸ್‌ ಆದರೆ ಚಿಂತೆಯಿಲ್ಲ, ಆದರೆ ಒಟ್ಟೊಟ್ಟಿಗೆ 2-3 ಚಿತ್ರ ರಿಲೀಸ್‌ ಆದರೆ ಈ ಒತ್ತಡ ತಪ್ಪಿದ್ದಲ್ಲ.
ತಾಯಿಯ ಸಾಮೀಪ್ಯದ ನಂಟು
ಆಲಿಯಾಗೆ ಪ್ರಶಸ್ತಿ ಎಂದರೇನೋ ಇಷ್ಟವೇ, ಜೊತೆಗೆ ವಿಮರ್ಶೆಯ ಟೀಕೆ ಟಿಪ್ಪಣಿಗೂ ಸ್ವಾಗತ ಅಂತಾಳೆ. ಯಾರಾದರೂ ಹಾಗೆ ಟೀಕೆ ಟಿಪ್ಪಣಿ ಮಾಡಿದಾಗ ಮಾತ್ರ ತಿದ್ದಿಕೊಳ್ಳಲು ಸಾಧ್ಯ. ತಾನೆಂದೂ ಪ್ರಶಸ್ತಿಗಾಗಿ ಕೆಲಸ ಮಾಡುವುದಿಲ್ಲ, ಕೇವಲ ಪ್ರೇಕ್ಷಕರಿಗಾಗಿ ಎನ್ನುತ್ತಾಳೆ. ತಾನು ಬಾಲಿವುಡ್‌ನಲ್ಲಿ ಇನ್ನೂ ಹೆಚ್ಚಿನ ಹೆಸರು ಗಳಿಸಿದ ಮೇಲೆ ಹಾಲಿವುಡ್‌ಗೆ ಹಾರುವ ಯೋಜನೆ ಇದೆ ಅಂತಾಳೆ.
ತಾನು ಇದುವರೆಗೂ ಗಳಿಸಿರುವ ಕ್ರೆಡಿಟ್‌ ಪೂರ್ತಿ ತಾಯಿ ತಂದೆಗೆ ಸಲ್ಲಬೇಕು. ಪ್ರತಿ ಸಂದರ್ಭದಲ್ಲೂ ಅವರು ತನಗೆ ನೀಡಿದ ಸಹಕಾರ, ಪ್ರೋತ್ಸಾಹ ಪ್ರೇರಣೆ ಮರೆಯಲಾರೆ, ತನ್ನೆಲ್ಲ ಸಂಭ್ರಮಗಳನ್ನೂ ಅವರೊಂದಿಗೆ ಹಂಚಿಕೊಳ್ಳುತ್ತೇನೆ ಎನ್ನುತ್ತಾಳೆ. ತಾಯಿ ಸೋನಿ ರಜ್ದಾನ್‌ ತನಗೆ ಫ್ರೆಂಡ್‌, ಫಿಲಾಸಫರ್‌, ಗೈಡ್‌ ಅಂತಾಳೆ. ಬಿಡುವಿದ್ದಾಗ ತಾಯಿ, ಅಕ್ಕನ ಜೊತೆ ಶಾಪಿಂಗ್‌ ಹೊರಡುತ್ತಾಳೆ. ಇವಳ `ರಾಝಿ, ಬ್ರಹ್ಮಾಸ್ತ್ರ, ಗಲ್ಲೀಬಾಯ್‌’ ಚಿತ್ರಗಳು ಸಹ ಯಶಸ್ಸಿ ಎನಿಸಿದವು.
– ಜಿ. ಸುಮಾ
