ಬಾಲಿವುಡ್ ನಟಿ ಅಲಿಯಾ ಭಟ್ ಮಾಜಿ ಪರ್ಸನಲ್ ಅಸಿಸ್ಟೆಂಟ್ ವೇದಿಕಾ ಪ್ರಕಾಶ್ ಶೆಟ್ಟಿಯನ್ನು ಮುಂಬೈನ ಜೂಹೂ ಪೊಲೀಸರು ಬಂಧಿಸಿದ್ದಾರೆ. ಅಲಿಯಾ ಭಟ್ ಪ್ರೊಡಕ್ಷನ್ ಹೌಸ್ ಎಟರ್ನಾಲ್ ಪ್ರೊಡಕ್ಷನ್ ಪ್ರೈವೇಟ್ ಲಿಮಿಟೆಡ್ಗೆ ಹಾಗೂ ಅಲಿಯಾ ಭಟ್ ವೈಯಕ್ತಿಕ ಬ್ಯಾಂಕ್ ಖಾತೆಯಿಂದ 77 ಲಕ್ಷ ರೂ. ಲಪಟಾಯಿಸಿ ವೇದಿಕಾ ಪ್ರಕಾಶ್ ಶೆಟ್ಟಿ ನಾಪತ್ತೆ ಆಗಿದ್ದರು.
ಬೆಂಗಳೂರಲ್ಲಿ ಅರೆಸ್ಟ್: ಫೇಕ್ ಬಿಲ್, ನಕಲಿ ಸಹಿ ಹಾಕಿ 2 ಬ್ಯಾಂಕ್ ಖಾತೆಗಳಿಂದ ವೇದಿಕಾ ಶೆಟ್ಟಿ ಹಣ ಲಪಟಾಯಿಸಿದ್ದರು. ಈ ಬಗ್ಗೆ ಅಲಿಯಾ ಭಟ್ ತಾಯಿ ಸೋನಿ ರಾಜಧಾನ್ ರಿಂದ ಮುಂಬೈನ ಜೂಹೂ ಪೊಲೀಸ್ ಠಾಣೆಗೆ ದೂರು ನೀಡಿದ್ದರು.
ಮೂರು ವರ್ಷಗಳ ಕಾಲ ಅಲಿಯಾ ಭಟ್ಗೆ ಪರ್ಸನಲ್ ಅಸಿಸ್ಟೆಂಟ್ ಆಗಿದ್ದ ವೇದಿಕಾ ಶೆಟ್ಟಿ ಬರೋಬ್ಬರಿ 77 ಲಕ್ಷ ರೂಪಾಯಿ ವಂಚಿಸಿದ್ದರು.
ಈ ವರ್ಷದ ಜನವರಿ 23 ರಂದು ಸೋನಿ ರಾಜಧಾನ್ ಪೊಲೀಸರಿಗೆ ದೂರು ನೀಡಿದ್ದರು. ದೂರು ನೀಡಿದ 5 ತಿಂಗಳ ಬಳಿಕ ವೇದಿಕಾ ಶೆಟ್ಟಿ ಬಂಧನವಾಗಿದೆ. ಬೆಂಗಳೂರಿನಲ್ಲಿ ತಲೆ ಮರೆಸಿಕೊಂಡಿದ್ದ ವೇದಿಕಾ ಶೆಟ್ಟಿಯನ್ನು ಮುಂಬೈನ ಜೂಹೂ ಪೊಲೀಸರು ಬಂಧಿಸಿದ್ದಾರೆ. ಬೆಂಗಳೂರಿನ ಕೋರ್ಟ್ ಗೆ ಹಾಜರುಪಡಿಸಿ, ಟ್ರಾನ್ಸಿಟ್ ರಿಮ್ಯಾಂಡ್ ಪಡೆದು ಮುಂಬೈಗೆ ಕರೆದೊಯ್ದಿದ್ದಾರೆ. ಬಳಿಕ ಮುಂಬೈನ ಕೋರ್ಟ್ಗೆ ಹಾಜರುಪಡಿಸಿರುವ ಪೊಲೀಸರು ವೇದಿಕಾ ಶೆಟ್ಟಿಯನ್ನು ತಮ್ಮ ವಶಕ್ಕೆ ಪಡೆದಿದ್ದಾರೆ.
ಮಾಡಿದ ಕೆಲಸವೇನು?: ಅಲಿಯಾ ಭಟ್ರ ವೈಯಕ್ತಿಕ ಮತ್ತು ಬ್ಯುಸಿನೆಸ್ ವ್ಯವಹಾರಗಳು, ಪ್ರೊಡಕ್ಷನ್ ಹೌಸ್ನ ಕೆಲಸಗಳನ್ನು ವೇದಿಕಾ ಶೆಟ್ಟಿ ನೋಡಿಕೊಳ್ಳುತ್ತಿದ್ದರು. 2022ರ ಮೇ ನಿಂದ 2024ರ ಆಗಸ್ಟ್ ಮಧ್ಯೆ ಅಲಿಯಾ ಭಟ್ಗೆ ವಂಚನೆ ಎಸಗಿದ್ದಾರೆ. ಕ್ರಿಮಿನಲ್ ನಂಬಿಕೆ ದ್ರೋಹ, ವಂಚನೆ ಆರೋಪದಡಿ ವೇದಿಕಾ ಶೆಟ್ಟಿ ವಿರುದ್ಧ ಕೇಸ್ ದಾಖಲಾಗಿದೆ. 2021ರ ರಿಂದ 2024 ರವರೆಗೆ ಅಲಿಯಾ ಭಟ್ಗೆ ಪರ್ಸನಲ್ ಅಸಿಸ್ಟೆಂಟ್ ಆಗಿದ್ದ ವೇದಿಕಾ ಶೆಟ್ಟಿ, ಅಲಿಯಾ ಭಟ್ರ ವೈಯಕ್ತಿಕ ಹಣಕಾಸು ದಾಖಲೆ, ಪೇಮೇಂಟ್, ಶೆಡ್ಯೂಲ್ ನಿರ್ವಹಣೆ ಮಾಡುತ್ತಿದ್ದರು.
ಪೊಲೀಸ್ ಕಸ್ಟಡಿಗೆ: ಈ ವೇಳೆ ಫೇಕ್ ಬಿಲ್ ಸೃಷ್ಟಿಸಿ, ಅಲಿಯಾ ಭಟ್ ಅವರ ಸಹಿ ಪಡೆದು ಹಣವನ್ನು ವೇದಿಕಾ ಶೆಟ್ಟಿ ಲಪಟಾಯಿಸಿದ್ದಾರೆ. ನಟಿ ಅಲಿಯಾ ಭಟ್ ಅವರ ಟ್ರಾವೆಲ್, ಮೀಟಿಂಗ್, ಇತರೆ ವ್ಯವಸ್ಥೆಗಳಿಗಾಗಿ ಹಣ ಖರ್ಚಾಗಿರುವ ಬಿಲ್ ತಯಾರು ಮಾಡಿ ಸಹಿಯನ್ನು ವೇದಿಕಾ ಶೆಟ್ಟಿ ಪಡೆದಿದ್ದರು. ಫೇಕ್ ಬಿಲ್ಗಳನ್ನು ಅಸಲಿ ಬಿಲ್ಗಳೆಂಬಂತೆ ಬಿಂಬಿಸಿ ನಟಿ ಅಲಿಯಾ ಭಟ್ ಅವರಿಂದ ಚೆಕ್ಗಳಿಗೆ ಸಹಿ ಪಡೆದಿದ್ದರು. ಹಣವನ್ನು ತನ್ನ ಸ್ನೇಹಿತರ ಬ್ಯಾಂಕ್ ಖಾತೆಗೆ ವರ್ಗಾಯಿಸಿಕೊಂಡಿದ್ದ ವೇದಿಕಾ ಶೆಟ್ಟಿ, ಬಳಿಕ ಸ್ನೇಹಿತರ ಬ್ಯಾಂಕ್ ಖಾತೆಯಿಂದ ತನ್ನ ವೈಯಕ್ತಿಕ ಬ್ಯಾಂಕ್ ಖಾತೆಗೆ ಹಣ ವರ್ಗಾವಣೆ ಮಾಡಿಕೊಂಡಿದ್ದರು. ಅಲಿಯಾ ಭಟ್ ತಾಯಿ ದೂರು ದಾಖಲಿಸಿದ ಬಳಿಕ ಮುಂಬೈನಿಂದ ನಾಪತ್ತೆಯಾಗಿದ್ದರು.
ಬಿಎನ್‌ಎಸ್ ಸೆಕ್ಷನ್ 316(4) ಹಾಗೂ 318(4) ರಡಿ ವೇದಿಕಾ ಶೆಟ್ಟಿ ವಿರುದ್ಧ ಕೇಸ್ ದಾಖಲಾಗಿದೆ. ಜುಲೈ 10 ರವರೆಗೆ ವೇದಿಕಾ ಶೆಟ್ಟಿಯನ್ನು ಜೂಹೂ ಪೊಲೀಸರು ತಮ್ಮ ಕಸ್ಟಡಿಗೆ ಪಡೆದು ತನಿಖೆ, ವಿಚಾರಣೆ ನಡೆಸುತ್ತಿದ್ದಾರೆ.
