- ರಾಘವೇಂದ್ರ ಅಡಿಗ ಎಚ್ಚೆನ್.
ʻಕಾಮಿಡಿ ಕಿಲಾಡಿಗಳುʼ ರಿಯಾಲಿಟಿ ಶೋ ಖ್ಯಾತಿಯ ದೀಪಿಕಾ ಅವರು ತಮ್ಮ ಹೊಸ ಮನೆಯ ಗೃಹಪ್ರವೇಶ ಮಾಡಿದ್ದಾರೆ. ವಿಶೇಷ ಅಂತಂದ್ರೆ ತಮ್ಮ ಮನೆಗೆ, ʻಕನಸಿನ ಮನೆʼ ಅಂತಲೇ ಹೆಸರಿಟ್ಟಿದ್ದಾರೆ. ಮಂಡ್ಯ ಜಿಲ್ಲೆಯ, ಪಾಂಡವಪುರ ತಾಲೂಕು ಮೇಲುಕೋಟೆ ಹೋಬಳಿ ಮಾಡರಹಳ್ಳಿ ಗ್ರಾಮದ ಹುಡುಗಿಯಾಗಿರುವ ದೀಪಿಕಾ ಅವರು, ತಮ್ಮ ಊರಿನಲ್ಲಿ ಹೊಸ ಮನೆಯನ್ನು ಕಟ್ಟಿಸಿದ್ದಾರೆ. ಹೌದು.. ದೀಪಿಕಾ ಅವರದ್ದು ಕೂಡು ಕುಟುಂಬ. ಅವರ ಮನೆಯಲ್ಲಿ ಅಕ್ಕ-ಭಾವ, ತಂದೆ-ತಾಯಿ ಇನ್ನೂ ಮುಂತಾದವರು ಇದ್ದಾರೆ. ಎಲ್ಲರೂ ಸೇರಿ ಈ ʻಕನಸಿನ ಮನೆʼ ಕಟ್ಟಿಸಿದ್ದಾರೆ. ಇತ್ತೀಚೆಗೆ ಮನೆಯ ಗೃಹಪ್ರವೇಶ ನಡೆದಿದೆ. ದೀಪಿಕಾ ಅವರ ಗೃಹಪ್ರವೇಶ ಸಮಾರಂಭದಲ್ಲಿ ಕಾಮಿಡಿ ಕಿಲಾಡಿಗಳು ಖ್ಯಾತಿಯ ಅನೀಶ್ ಪೂಜಾರಿ ಹಾಗೂ ಪ್ರವೀಣ್ ಜೈನ್ ಸೇರಿದಂತೆ ಹಲವರು ಭಾಗಿಯಾಗಿದ್ದರು.
ದೀಪಿಕಾ ಅವರು ತಮ್ಮ ಊರಿನಲ್ಲಿ ಡ್ಯೂಪ್ಲೆಕ್ಸ್ ಮನೆಯನ್ನು ಕಟ್ಟಿಸಿದ್ದಾರೆ. ಅವರ ಹೊಸ ಮನೆಯು ಆಧುನಿಕ ವಿನ್ಯಾಸ ಮತ್ತು ಸೊಗಸಾದ ಒಳಾಂಗಣ ಸೌಂದರ್ಯವನ್ನು ಹೊಂದಿದೆ. ದೀಪಿಕಾ ಅವರ ʻಕನಸಿನ ಮನೆʼ ಕೇವಲ ಒಂದು ನಿವಾಸವಲ್ಲ, ಬದಲಿಗೆ ಅವರ ಕನಸುಗಳ ಮತ್ತು ಆಕಾಂಕ್ಷೆಗಳ ಒಂದು ರೂಪವಾಗಿದೆ. ತಮ್ಮ ಇನ್ಸ್ಟಾಗ್ರಾಮ್ನಲ್ಲಿ ದೀಪಿಕಾ ಅವರು ತಮ್ಮ ಹೊಸ ಮನೆಯ ಗೃಹಪ್ರವೇಶದ ಝಲಕ್ ಅನ್ನು ಶೇರ್ ಮಾಡಿಕೊಂಡಿದ್ದಾರೆ. ಈ ರೀಲ್ಗೆ ಅಭಿಮಾನಿಗಳಿಂದ ಸಾಕಷ್ಟು ಪ್ರತಿಕ್ರಿಯೆಗಳು ಬಂದಿವೆ. ಅಭಿಮಾನಿಗಳು, ಆಪ್ತರೆಲ್ಲರೂ ದೀಪಿಕಾ ಅವರಿಗೆ ಶುಭ ಹಾರೈಸಿದ್ದಾರೆ.
ʻಜೀ ಕನ್ನಡʼ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ʻಅಣ್ಣಯ್ಯʼ ಧಾರಾವಾಹಿಯಲ್ಲಿ ದೀಪಿಕಾ ಕಾಣಿಸಿಕೊಳ್ಳುತ್ತಿದ್ದಾರೆ. ಈ ಧಾರಾವಾಹಿಯಲ್ಲಿನ ಅವರ ಪಾತ್ರವು ಪ್ರೇಕ್ಷಕರಿಗೆ ಇಷ್ಟವಾಗುತ್ತಿದೆ. ಅಂದಹಾಗೆ, ʻಕಾಮಿಡಿ ಕಿಲಾಡಿಗಳು ಸೀಸನ್ 3ʼ ರಿಯಾಲಿಟಿ ಶೋ ಮೂಲಕ ದೀಪಿಕಾ ಕಿರುತೆರೆಗೆ ಎಂಟ್ರಿ ಕೊಟ್ಟಿದ್ದರು. ತಮ್ಮ ಪ್ರತಿಭೆಯಿಂದ ದೀಪಿಕಾ ಕನ್ನಡಿಗರ ಮನೆ ಮಾತಾಗಿದ್ದರು. ಆನಂತರ ಧಾರಾವಾಹಿಗಳು, ಹಾಗೂ ಕಿರುಚಿತ್ರಗಳಲ್ಲಿಯೂ ದೀಪಿಕಾ ನಟಿಸಿದ್ದಾರೆ.
