ಹಬ್ಬದ ಸಂದರ್ಭದಲ್ಲಿ ಮನೆಗೆ ಬಂದವರಿಗೆ ಉಪಚರಿಸದಿದ್ದರೆ ಹೇಗೆ? ಹೀಗಾದಾಗ ಅಡುಗೆ ಕಡಿಮೆ ಆಗಿ ಗೃಹಿಣಿಗೆ ಕಸಿವಿಸಿ ಆಗುತ್ತದೆ. ಇದಕ್ಕಾಗಿ ಈ ಕೆಳಗಿನ ಸಲಹೆಗಳನ್ನು ಅನುಸರಿಸಿ ಅತಿಥಿಗಳನ್ನು ಆದರಿಸಬಹುದು :

ನೀವು ಪನೀರ್‌ ಕ್ಯೂಬ್ಸ್ ಬಳಸಿ ಏನಾದರೂ ಗ್ರೇವಿ ಮಾಡಿದ್ದರೆ, ಒಂದಿಷ್ಟು ಬೆಂದ ಕಡಲೆಕಾಳನ್ನು ಬೇಯಿಸಿ ಮಸೆದ ಆಲೂ, ಹೆಚ್ಚಿದ ಈರುಳ್ಳಿ, ಟೊಮೇಟೊ ಜೊತೆ ಬಾಡಿಸಿ ಇದಕ್ಕೆ ಬೆರೆಸಿ 1-2 ಕುದಿ ಬರಿಸಿದರೆ ಆಯ್ತು. ಚಪಾತಿ, ಅನ್ನಕ್ಕೆ ಎಕ್ಸ್ ಟ್ರಾ ಗ್ರೇವಿ ರೆಡಿ!

ಫ್ರೋಝನ್‌ ಬಟಾಣಿ ಫ್ರಿಜ್‌ನಲ್ಲಿದ್ದರೆ, ಅತಿಥಿಗಳು ಬಂದ ತಕ್ಷಣ ಅದನ್ನು ಹೊರತೆಗೆದು ಬಿಸಿ ನೀರಲ್ಲಿ ನೆನೆಹಾಕಿಡಿ. ಇದನ್ನು ಬಾಣಲೆಗೆ ಹಾಕಿ 2-3 ನಿಮಿಷದಲ್ಲಿ ಬಾಡಿಸಬಹುದು. ಜೊತೆಗೆ ಹೇಗೂ ಆಲೂ ಕಿವುಚಿ, ಟೊಮೇಟೊ ಸೇರಿಸಿ ಬಾಡಿಸಿಕೊಂಡರೆ, ಮನೆಯಲ್ಲಿ ಸಿದ್ಧವಿರುವ ಸಾಂಬಾರ್‌ಗೆ ಇದನ್ನು ಬೆರೆಸಿ.

ಯಾವಾಗ ಆಲೂ ಬೇಯಿಸಿದರೂ 3-4 ಹೆಚ್ಚಿಗೆ ಬೇಯಿಸಿ ಫ್ರಿಜ್‌ನಲ್ಲಿರಿಸಿ. ಇದು ಸದಾ ಹ್ಯಾಂಡಿಯಾಗಿ ಹೆಲ್ಪ್ ಮಾಡುತ್ತದೆ. ಇದನ್ನು ಮಸೆದು ಯಾವುದೇ ಗೊಜ್ಜು, ಗ್ರೇವಿಗೆ ಬೆರೆಸಿ…. ಜೊತೆಗೆ ಹುಳಿ ಮೊಸರು, ಉಪ್ಪು, ಖಾರ ಹಾಕಿ ಕುದಿಸಿದರೆ ಆಯ್ತು. ಅಗತ್ಯವೆನಿಸಿದರೆ (ಆಲೂ ಕಡಿಮೆ ಇದ್ದಾಗ) ಮೊಸರಿಗೆ ಕಡಲೆಹಿಟ್ಟನ್ನು ಕದಡಿಕೊಂಡು ಸಾಂಬಾರ್‌ ಯಾ ಗ್ರೇವಿಗೆ ಬೆರೆಸಿ ಕುದಿಸಿ. ಈ ರೀತಿ ಕಡಲೆಹಿಟ್ಟು ಬೆರೆಸಿದ ಮೊಸರಿಗೆ, ಬೆಂದ ಆಲೂ ಮಸೆದು ಸೇರಿಸಿ ಕುದಿಸಿದರೆ, ಕಡಿಮೆ ಇರುವ ರಸಂ ಜೊತೆ  ಬಳಸಿಕೊಳ್ಳಿ.

ತೊಗರಿಬೇಳೆ, ಹೆಸರುಬೇಳೆ, ಕಡಲೆಬೇಳೆ ಎಲ್ಲಾ ಸೇರಿಸಿ ತೊವ್ವೆ ರೆಡಿ ಆಗಿದೆ. ಆದರೆ ಬಂದಿರುವ ಅತಿಥಿಗಳಿಗೆ ಸಾಲುತ್ತಿಲ್ಲ….. ಆಗ ಬೇಗ ಬೇಗ ಹೆಚ್ಚಿದ ಬೆಳ್ಳುಳ್ಳಿ, ಈರುಳ್ಳಿ, ಜಾಸ್ತಿ ಟೊಮೇಟೊ ಹಾಕಿ ಫ್ರೈ ಮಾಡಿ. ಅಕಸ್ಮಾತ್‌ ಹೆಚ್ಚಿದ ಎಲೆಕೋಸು ಉಳಿದಿದ್ದರೆ ಅದನ್ನೂ ಸೇರಿಸಿಕೊಳ್ಳಿ. ಅದಕ್ಕೆ ಮೊಸರಿನಲ್ಲಿ ಕದಡಿದ ಕಡಲೆಹಿಟ್ಟಿನ ಮಿಶ್ರಣ ಬೆರೆಸಿ  ಬೇಗ ಬೇಗ ಕೈಯಾಡಿಸಿ. ಇದಕ್ಕೆ ರೆಡಿ ಇರುವ ತೊವ್ವೆ ಬೆರೆಸಿ ಒಟ್ಟಿಗೆ ಕುದಿಸಿ ಕೆಳಗಿಳಿಸಿ.

ಒಂದೇ ತರಹ ತೊವ್ವೆ, ದಾಲ್ ‌ಮಾಡಿ ಸಾಕಾಗಿದೆಯೇ? ಈ ರೀತಿ ಅತಿಥಿಗಳು ಬಂದಾಗ, ಅಂಥ ದಾಲ್‌ಗೆ ಏನು ಸೇರಿಸಬಹುದು? ಅವಸರದಲ್ಲಿ ಹತ್ತಿರದ ಅಂಗಡಿಯಿಂದ 2-3 ಬಗೆಯ ಸೊಪ್ಪು ತರಿಸಿ ಬೇಗ ಬೇಗ ಹೆಚ್ಚಿ, ಬಾಣಲೆಗೆ ಹಾಕಿ ಬಾಡಿಸಿ. ಇದಕ್ಕೆ ಹಸಿ ಮೆಣಸು, ಉಪ್ಪು, ಖಾರ, ಹೆಚ್ಚಿದ ಟೊಮೇಟೊ ಹಾಕಿ ಬಾಡಿಸಿ.

ಬೇಯಿಸಿದ ಆಲೂ ಕಡಿಮೆ ಆಯ್ತು ಅನ್ನಿಸಿತೇ? ತಕ್ಷಣ ಅದರ ಸಿಪ್ಪೆ ಸುಲಿದು ಮಸೆದಿಡಿ. ಒಂದು ಬಾಣಲೆಯಲ್ಲಿ ತುಸು ಎಣ್ಣೆ ಬಿಸಿ ಮಾಡಿ ಸಾಸುವೆ, ಜೀರಿಗೆ, ಇಂಗಿನ ಒಗ್ಗರಣೆ ಕೊಡಿ. ಇದಕ್ಕೆ ಹೆಚ್ಚಿದ ಟೊಮೇಟೊ, ಹುಣಿಸೇ ಕಿವುಚಿದ ರಸ, ಉಪ್ಪು, ಖಾರದ ಪುಡಿ, ಅರಿಶಿನ ಸೇರಿಸಿ. ಮಸೆದ ಆಲೂ ಹಾಕಿ ತುಸು ನೀರು ಬೆರೆಸಿ ತೆಳ್ಳಗೆ ಗ್ರೇವಿ ಕುದಿಸಿ. ಇದನ್ನು ಬಿಸಿ ಅನ್ನದ ಜೊತೆ ತಕ್ಷಣ ಸವಿಯಲು ಕೊಡಿ.

ಕಡಲೆಕಾಳು ಹಾಕಿ ಭರ್ಜರಿ ಗ್ರೇವಿ ಮಾಡಿದ್ದೀರಿ. ಮನೆಯವರ ಊಟ ಮುಗಿದು ಸ್ವಲ್ಪ ಮಾತ್ರ ಉಳಿದಿದೆ. 3 ಗಂಟೆ ಹೊತ್ತಿಗೆ ಯಾರೋ ಇಬ್ಬರು ಅತಿಥಿಗಳು ಬಂದಾಗ ಏನು ಮಾಡುವುದು? ತಕ್ಷಣ ಚಿಕ್ಕ ಕುಕ್ಕರ್‌ನಲ್ಲಿ ಅನ್ನಕ್ಕಿಟ್ಟು, ಅದು ತಣಿಯುವಷ್ಟರಲ್ಲಿ ಬಾಣಲೆಗೆ ಎಣ್ಣೆ ಹಾಕಿ ಬಿಸಿ ಮಾಡಿ. ಹೆಚ್ಚಿದ ಈರುಳ್ಳಿ, ಟೊಮೇಟೊ, ಜಾಸ್ತಿ ಕೊತ್ತಂಬರಿ ಸೊಪ್ಪು ಎಲ್ಲಾ ಹಾಕಿ ಉಳಿದಿರುವ ಕಡಲೆಕಾಳು ಗ್ರೇವಿ ಸೇರಿಸಿ ಚೆನ್ನಾಗಿ ಕುದಿಸಿ ಕೆಳಗಿಳಿಸಿ. ತಟ್ಟೆ ಹಾಕುವಷ್ಟರಲ್ಲಿ ಎರಡೂ ರೆಡಿ. ಒಂದು ಮೊಸರು ಪ್ಯಾಕೆಟ್‌ ತರಿಸಿ, ಮನೆಯ ಉಪ್ಪಿನಕಾಯಿ ಜೊತೆ ಬಡಿಸಿದರೆ, ಊಟ ಕಂಪ್ಲೀಟ್‌!

ಸಾಂಬಾರ್‌, ರಸಂ ಏನೂ ಉಳಿದಿಲ್ಲವೇ? ಚಿಂತೆ ಇಲ್ಲ. ಅನ್ನಕ್ಕೆ ಕುಕ್ಕರ್‌ ಜೋಡಿಸಿ. ಅದು ಕೂಲ್ ‌ಆಗುವಷ್ಟರಲ್ಲಿ ಹೆಚ್ಚಿದ ಈರುಳ್ಳಿ, ಹಸಿ ಮೆಣಸು, ಟೊಮೇಟೊ ಹಾಕಿ ಬಾಡಿಸಿ. ಮೇಲೆ ತುಸು ಉಪ್ಪು, ಅರಿಶಿನ, ವಾಂಗಿಭಾತ್‌ ಪುಡಿ ಹಾಕಿ ಕೆದಕಿ ಕೆಳಗಿಳಿಸಿ. ಬೇಸಿನ್‌ನಲ್ಲಿ ಬಿಸಿ ಅನ್ನ ಹರಡಿಕೊಂಡು, ಅದರ ಮೇಲೆ ಇದನ್ನು ಹಾಕಿ ಕಲಸಿ, ಮೊಸರನ್ನ ಜೊತೆ ಸವಿಯಲು ಕೊಡಿ.

ಮೊಸರು ಕಡಿಮೆ ಇದೆ ಅನ್ನಿಸಿತೇ? ಸಲಾಡ್‌ಗೆ ಬೇಕಾದಂತೆ ಈರುಳ್ಳಿ, ಟೊಮೇಟೊ, ಸೌತೆಕಾಯಿ, ಮೂಲಂಗಿ ಇತ್ಯಾದಿ ಧಾರಾಳ ಸೇರಿಸಿ. ಇದಕ್ಕೆ ಇರುವ ಮೊಸರು, ಅರ್ಧ ಲೋಟ ನೀರು ಬೆರೆಸಿ, ಒಗ್ಗರಣೆ ಕೊಟ್ಟು ಅನ್ನ, ಚಿತ್ರಾನ್ನ, ಪಲಾವ್ ‌ಇತ್ಯಾದಿ ಜೊತೆ ಸಂಭಾಳಿಸಿ.

ಇದು ಯಾವುದೂ ಸರಿ ಹೋಗಲಿಲ್ಲವೇ? ಗೋದಿಹಿಟ್ಟಿಗೆ ಕಡಲೆಹಿಟ್ಟು, ಶುಂಠಿ ಬೆಳ್ಳುಳ್ಳಿ ಪೇಸ್ಟ್, ಹೆಚ್ಚಿದ ಹಸಿ ಮೆಣಸು, ಉಪ್ಪು, ಖಾರ ಸೇರಿಸಿ ಬೇಗ ಬೇಗ ಮಸಾಲೆ ಚಪಾತಿ ಮಾಡಿಕೊಡಿ.

– ನೀರಜಾ ಕುಮಾರ್‌

Tags:
COMMENT