ಸಂಗಾತಿ ಈಗ ಮೊದಲಿನಂತೆ ಇಲ್ಲ ಎನ್ನುವುದು ಗಂಡ ಅಥವಾ ಹೆಂಡತಿಗೆ ತಿಳಿಯಲು ಬಹಳ ಹೊತ್ತು ಹಿಡಿಯುವುದಿಲ್ಲ. ಅಂದಹಾಗೆ ಈ ಮನಸ್ತಾಪಕ್ಕೆ ಏನು ಕಾರಣ? ಹೆಚ್ಚಿನ ಪ್ರಕರಣಗಳಲ್ಲಿ ಗಂಡ ಹೆಂಡತಿಯ ಜಗಳಕ್ಕೆ ಮುಖ್ಯ ಕಾರಣ ಅತೃಪ್ತ ಸೆಕ್ಸ್ ಸಂಬಂಧ. ವೈವಾಹಿಕ ಜೀವನದಲ್ಲಿ ಸೆಕ್ಸ್ ಎನ್ನುವುದು ಇಬ್ಬರ ನಡುವಿನ ಗಾಢ ಸಂಬಂಧಕ್ಕೆ ಕಾರಣವಾಗುತ್ತದೆ.
ಮಹಿಳೆಯರಿಗೆ ಆರಂಭದಿಂದಲೇ ಲಜ್ಜೆ, ಸಂಕೋಚ ಇವು ಸಹಜವಾಗಿಯೇ ಬಂದಿರುತ್ತವೆ. ವಿವಾಹದ ಬಳಿಕ ಆಕೆ ಸೆಕ್ಸ್ ಸಂಬಂಧದ ಬಗ್ಗೆ ಮುಕ್ತವಾಗಿ ಹೇಳಿಕೊಳ್ಳಲಾರಳು.
ಪರಪುರುಷರ ಬಗ್ಗೆ ಆಸಕ್ತಿ
“ನಾನು ಮೊದಲ ಬಾರಿ ಪರಪುರುಷನ ಜೊತೆ ಸಂಬಂಧ ಬೆಳೆಸಿದಾಗ ಅದರ ನಿಜವಾದ ಖುಷಿ ಏನು ಏನ್ನುವುದು ಅರ್ಥವಾಯಿತು. ಗಂಡ ಎನ್ನುವ ಪ್ರಾಣಿ ನನ್ನ ಖುಷಿಯ ಬಗ್ಗೆ ಒಂದು ದಿನ ವಿಚಾರಿಸುತ್ತಿರಲಿಲ್ಲ. ನಾನೊಂದು ಆಟದ ಗೊಂಬೆ ಎಂದಷ್ಟೇ ಅವರು ಭಾವಿಸಿದ್ದರು,” ಇದು ನನ್ನ ಗೆಳತಿಯ ಹೇಳಿಕೆ.
“ನಿನಗೆ ಹೆದರಿಕೆ ಆಗುವುದಿಲ್ಲವೇ?” ಎಂದು ಕೇಳಿದರೆ, “ಇದರಲ್ಲಿ ಹೆದರಿಕೆಯ ಮಾತೇನಿದೆ?” ಎಂದು ನನ್ನನ್ನೇ ಪ್ರಶ್ನೆ ಮಾಡುತ್ತಾಳೆ.
ಕೆಲವು ಮಹಿಳೆಯರು ಹೇಗಿರುತ್ತಾರೆಂದರೆ, ಅವರು ತಮ್ಮ ದೇಹದ ಹಸಿವು ನೀಗಿಸಿಕೊಳ್ಳಲು ತಮ್ಮ ಸುಖ ಸಮೃದ್ಧಿಯ ಜೀವನವನ್ನು ಒದ್ದು, ಸೆಕ್ಸ್ ಅಭಿಲಾಷೆ ಈಡೇರಿಸುವ ಪರಪುರುಷನ ಹಿಂದೆ ಬೀಳುತ್ತಾರೆ.
ಸ್ವಪ್ನಾ ಮಾಡಿದ್ದು ಹೀಗೆಯೇ. ಶ್ರೀಮಂತ ಮತ್ತು ವಿದ್ಯಾವಂತ ಧರ್ಮರಾಜ ಜೊತೆ ಮದುವೆಯಾಗಿದ್ದ ಅವಳು ಅವನಿಂದ ಸಮಾಗಮದ ಸುಖ ಪಡೆಯಲು ವಿಫಲಳಾಗಿದ್ದಳು. ಗಂಡ ಯಾವಾಗಲೂ ತನ್ನ ವ್ಯಾಪಾರ ವಹಿವಾಟು, ಹಣದ ಬಗ್ಗೆ ಯೋಚಿಸುತ್ತಿದ್ದನೆ ಹೊರತು ಹೆಂಡತಿಯ ಖುಷಿಯ ಬಗ್ಗೆ ಯೋಚಿಸುತ್ತಿರಲಿಲ್ಲ. ಗಂಡನಿಂದ ದೈಹಿಕ ತೃಪ್ತಿ ದೊರೆಯದಿದ್ದಾಗ ಅವಳು ಮಾನಸಿಕವಾಗಿ ಬಹಳ ಕಸಿವಿಸಿಗೊಂಡಳು. ಅವಳು ಮನೆಯಲ್ಲಿ ಏಕಾಂಗಿಯಾಗಿಯೇ ಇರಬೇಕಾಗುತ್ತಿತ್ತಲ್ಲದೆ, ಅವಳಿಗೆ ಮಾಡಲು ಯಾವುದೇ ಕೆಲಸ ಇರುತ್ತಿರಲಿಲ್ಲ. ಹೀಗಾಗಿ ಅವಳು ಪಕ್ಕದ ಮನೆಯ ಹುಡುಗನ ಆಕರ್ಷಣೆಗೆ ಒಳಗಾಗಿ ಅವನನ್ನು ತನ್ನ ಬುಟ್ಟಿಗೆ ಹಾಕಿಕೊಂಡು ಅವನಿಂದ ದೈಹಿಕ ಸುಖ ಪಡೆದುಕೊಂಡಳು.
ಕ್ರಮೇಣ ಇಬ್ಬರಲ್ಲೂ ಲೈಂಗಿಕ ಅಭಿಲಾಷೆ ಹೆಚ್ಚತೊಡಗಿತು. ಅದೊಂದು ದಿನ ಸ್ವಪ್ನಾ ಮನೆಬಿಟ್ಟು ಆ ಯುವಕನ ಜೊತೆ ಹೋಗಲು ನಿರ್ಧರಿಸಿದಳು. ಅವಳು ಹೋಗುವಾಗ ಮನೆಯಿಂದ ಚಿನ್ನಾಭರಣ ಮತ್ತು ಸಾಕಷ್ಟು ಹಣವನ್ನು ತನ್ನ ಬ್ಯಾಗಿಗೆ ಹಾಕಿಕೊಂಡಳು. ಆ ಯುವಕ ತೋರಿಸಿದ ಆಸೆ ಆಮಿಷದಲ್ಲಿ ಅವಳಿಗೆ ಒಳ್ಳೆಯದು, ಕೆಟ್ಟದರ ಗಮನ ಬರಲೇ ಇಲ್ಲ.
ಅದೊಂದು ದಿನ ಆ ಯುವಕ ಸ್ವಪ್ನಾ ತಂದಿದ್ದ ಹಣ ಮತ್ತು ಬಂಗಾರದ ಆಭರಣಗಳನ್ನು ತೆಗೆದುಕೊಂಡು ಪರಾರಿಯಾಗಿಬಿಟ್ಟ. ಈಗ ಅವಳ ಬಳಿ ಏನೇನೂ ಇರಲಿಲ್ಲ. ಅವಳು ತನ್ನ ಗಂಡನ ಮನೆಗೆ ಹೋಗಲು ನಿರ್ಧರಿಸಿದಳು. ಆದರೆ ಅವನು ಅವಳನ್ನು ಮನೆಯೊಳಗೆ ಕರೆದುಕೊಳ್ಳಲು ಸ್ಪಷ್ಟವಾಗಿ ನಿರಾಕರಿಸಿಬಿಟ್ಟ.
ಲೈಂಗಿಕ ಅರಿವು
ಸೆಕ್ಸ್ ಬಗ್ಗೆ ಪುರುಷರ ಮಾನಸಿಕತೆ ವಿಚಿತ್ರವಾಗಿರುತ್ತದೆ. ಪುರುಷರು ಕೇವಲ ತಮ್ಮ ಸುಖದ ಬಗ್ಗೆ ಯೋಚಿಸುತ್ತಾರೆಯೇ ಹೊರತು, ಹೆಂಡತಿಗೂ ಅದರ ಖುಷಿ ದೊರಕಿತಾ ಎನ್ನುವುದರ ಬಗ್ಗೆ ಖಂಡಿತಾ ಯೋಚಿಸುದಿಲ್ಲ.
ಪುರುಷರ ಸೆಕ್ಸ್ ಸಾಮರ್ಥ್ಯ ಕುಸಿಯಲು ಕೂಡ ಹಲವು ಕಾರಣಗಳನ್ನು ಪಟ್ಟಿ ಮಾಡಬಹುದು. ಸೆಕ್ಸ್ ಗೆ ಸಂಬಂಧಪಟ್ಟ ಈ ಎಲ್ಲ ಸಮಸ್ಯೆಗಳಿಗೆ ಪುರುಷರಿಗಿಂತ ಸ್ತ್ರೀಯರೇ ಹೆಚ್ಚು ಪ್ರಭಾವಿತರಾಗುತ್ತಾರೆ. ಅನೇಕ ಮಹಿಳೆಯರು ತಮ್ಮ ದೈಹಿಕ ಇಚ್ಛೆಯನ್ನು ಬೇರೆ ಪುರುಷರಿಂದ ಈಡೇರಿಸಿಕೊಳ್ಳಲು ನೋಡುತ್ತಾರೆ.
ಆದರೆ ಗಂಡನಿಗೆ ತನ್ನ ಹೆಂಡತಿಯ ಅನೈತಿಕತೆಯ ಬಗ್ಗೆ ಗೊತ್ತಾದಾಗ ಅವರ ವೈವಾಹಿಕ ಜೀವನ ಬಿರುಗಾಳಿಗೆ ಸಿಲುಕಿ ನಲುಗಿ ಹೋಗುತ್ತದೆ. ಜೊತೆಗೆ ಕುಟುಂಬದಲ್ಲಿ ಜಗಳ ಹಾಗೂ ಇತರೆ ಸಮಸ್ಯೆಗಳು ಉದ್ಭವಿಸುತ್ತವೆ.
ಗಂಡ ಹೆಂಡತಿ ನಡುವೆ ಕಲಹ
ಅತಿ ಮಹತ್ವಾಕಾಂಕ್ಷೆ : ಗಂಡನನ್ನು ಬಿಟ್ಟು ಪರ ಪುರುಷರ ಜೊತೆ ಮದುವೆಯಾಗುವುದು, ಅವನೊಂದಿಗೆ ಓಡಿಹೋಗುವುದರ ಹಿಂದಿನ ಕಾರಣ ಕೇವಲ ಸಾಮಾಜಿಕ ರೀತಿ ರಿವಾಜು, ಕೌಟುಂಬಿಕ ಸಮಸ್ಯೆ ಹಾಗೂ ಲೈಂಗಿಕ ಸಂಬಂಧದ ಕೊರತೆಯಷ್ಟೇ ಕಾರಣವಲ್ಲ. ಮಹಿಳೆಯ ಮನಸ್ಸಿನಲ್ಲಿ ಉದ್ಭವಿಸಿದ ಇಚ್ಛೆ ಮತ್ತು ಆಕಾಂಕ್ಷೆಗಳು ಕೂಡ ಕಾರಣ ಆಗಿವೆ.
ಒಳ್ಳೆಯ ಸುಖ ಸೌಲಭ್ಯದ ಅಪೇಕ್ಷೆ ಮಾಡುವುದು ತಪ್ಪಲ್ಲ. ಆದರೆ ಈ ಅಪೇಕ್ಷೆ ಹಾಗೂ ಕಲ್ಪನೆಯಲ್ಲಿ ವಾಸ್ತತೆಯನ್ನು ಮರೆಯುವುದು ಮೂರ್ಖತನವಾಗಿದೆ.
ಇತ್ತೀಚೆಗೆ ಹೆಚ್ಚಿನ ಹುಡುಗಿಯರು ತಮ್ಮ ಇದೇ ಅಭಿಲಾಷೆಯ ಕಾರಣದಿಂದ ಅನೇಕ ಬಗೆಯ ಸಮಸ್ಯೆಗಳಲ್ಲಿ ಸಿಲುಕುತ್ತಿದ್ದಾರೆ. ಅಷ್ಟೇ ಅಲ್ಲ, ತಪ್ಪು ದಾರಿ ಕೂಡ ತುಳಿಯುತ್ತಿದ್ದಾರೆ.
ನಿರ್ಮಲಾ ಪದವಿ ಮುಗಿಸುವುದರ ಜೊತೆಗೆ ಎಂತಹ ಗಂಡನ ಬಗ್ಗೆ ಕಲ್ಪನೆ ಮಾಡಿಕೊಳ್ಳ ತೊಡಗಿದಳೆಂದರೆ, ತನ್ನ ದೈಹಿಕ ಬಯಕೆ ಈಡೇರಿಸುವುದರ ಜೊತೆಗೆ ಎಲ್ಲ ಆಸೆಗಳನ್ನೂ ಈಡೇರಿಸುವವನಾಗಿರಬೇಕು. ಕೆಲವು ತಿಂಗಳುಗಳ ಬಳಿಕ ಅವಳ ಮದುವೆ ಒಬ್ಬ ಯುವಕನ ಜೊತೆ ಆಯಿತು. ಆತ ಒಂದು ಕಂಪನಿಯಲ್ಲಿ ಅಕೌಂಟೆಂಟ್‌ ಆಗಿದ್ದ. ಅವನಿಗೆ ಬರುತ್ತಿದ್ದ ಸಂಬಳ ಮನೆ ಸಂಭಾಳಿಸಲಷ್ಟೇ ಸಾಲುತ್ತಿತ್ತು. ಆದರೆ, ಅದು ಅವಳ ಐಷಾರಾಮಿ ಜೀವನಕ್ಕೆ ಸಾಲುತ್ತಿರಲಿಲ್ಲ. ಹೀಗಾಗಿ ಅವಳು ತನ್ನ ಖರ್ಚಿಗೆ ಹೊಂದಿಸಿಕೊಳ್ಳಲು ನೌಕರಿಗಾಗಿ ಶೋಧ ಮಾಡತೊಡಗಿದಳು. ಒಂದು ಆಫೀಸ್‌ ನಲ್ಲಿ ಅವಳಿಗೆ ಪರ್ಸನ್‌ ಸೆಕ್ರೆಟರಿಯ ಕೆಲಸ ಸಿಕ್ಕಿತು. ಅವಳ ಮಾದಕ ಸೌಂದರ್ಯಕ್ಕೆ ಅವಳ ಬಾಸ್‌ ಮರುಳಾಗಿಬಿಟ್ಟ. ಅವಳಿಗೆ ಒಳ್ಳೆಯ ಸೌಲಭ್ಯ ಕೊಡಿಸುವುದರ ಜೊತೆಗೆ ಆಗಾಗ ದುಬಾರಿ ಉಡುಗೊರೆಗಳನ್ನು ಕೊಡಲಾರಂಭಿಸಿದ. ಬಳಿಕ ಅವಳನ್ನು ಹೋಟೆಲ್ ಗೆ ಕರೆದುಕೊಂಡು ಹೋಗಿ ಅವಳಿಗೆ ಬೇಕಾದ್ದನ್ನು ಕೊಡಿಸುತ್ತಿದ್ದ. ಈ ಸಾಮೀಪ್ಯ ಬಹು ಬೇಗನೆ ದೈಹಿಕ ಸಂಬಂಧದಲ್ಲಿ ಬದಲಾಗಿಬಿಟ್ಟಿತು.
ಕೆಲವು ತಿಂಗಳುಗಳ ತನಕ ಇಬ್ಬರ ಮೋಜಿನ ಜೀವನ ಹೀಗೆಯೇ ಸಾಗಿತ್ತು. ಆ ಬಳಿಕ ನಿರ್ಮಲಾ ಬಾಸ್‌ ಗೆ ಮದುವೆಗೆ ಒತ್ತಾಯಿಸತೊಡಗಿದಳು. ನೀನು ಮೊದಲು ನಿನ್ನ ಗಂಡನಿಂದ ವಿಚ್ಛೇದನ ಪಡೆದುಕೊ, ಆಮೇಲೆ ಮದುವೆ ಬಗ್ಗೆ ಯೋಚಿಸೋಣ ಎಂದ. ಅವಳು ಗಂಡನಿಗೆ ಪೀಡಿಸಿ ವಿಚ್ಛೇದನದ ಬಗ್ಗೆ ಪ್ರಸ್ತಾಪಿಸಿದಳು. ಅವನಿಗೂ ಅವಳ ಸಹವಾಸ ಸಾಕಾಗಿತ್ತೇನೋ? ಅವನು ವಿಚ್ಛೇದನಕ್ಕೆ ಒಪ್ಪಿಗೆ ಕೊಟ್ಟುಬಿಟ್ಟ. ವಿಚ್ಛೇದನದ ಬಳಿಕ ನಿರ್ಮಲಾ ಮತ್ತು ಬಾಸ್‌ ಒಂದು ಹೊಸ ಮನೆಯಲ್ಲಿ ವಾಸ ಮಾಡತೊಡಗಿದರು.
ಅದೊಂದು ಬೆಳಗ್ಗೆ ಎದ್ದಾಗ, ನಿರ್ಮಲಾಳಿಗೆ ತನ್ನ ಸದ್ಯದ ಪತಿ ಎಲ್ಲೂ ಕಾಣಿಸಲಿಲ್ಲ. ಅವಳಿಗೆ ಗೊಂದಲ ಕಸಿವಿಸಿಯಾಯಿತು. ಅವಳು ಆಫೀಸಿಗೆ ಹೋದಾಗ ಬಾಸ್‌ ಕಮ್ ಪತಿ ಲಂಡನ್ನಿಗೆ ಹೋಗಿರುವುದು ಗೊತ್ತಾಯಿತು. ಅವಳ ಟೇಬಲ್ ನ ಡ್ರಾಯರ್‌ ನಲ್ಲಿ ಒಂದು ಪತ್ರ ಕಾಣಿಸಿತು. ಅವರಲ್ಲಿ ಹೀಗೆ ಬರೆಯಲಾಗಿತ್ತು, “ಪ್ರೀತಿಯ ನಿರ್ಮಲಾ, ನಿನ್ನೊಂದಿಗೆ ಕಳೆದ ಒಂದೊಂದು ನಿಮಿಷ ಕೂಡ ನನ್ನ ನೆನಪಲ್ಲಿ ಉಳಿಯುವಂಥದು. ನಾನು ಕಂಪನಿಯ ಕೆಲಸದ ನಿಮಿತ್ತ ಇಲ್ಲಿಗೆ ಬಂದಿದ್ದೆ. ಇಂದಿಗೆ ನನ್ನ ಕೆಲಸ ಮುಗಿಯಿತು. ಈಗ ಪುನಃ ಲಂಡನ್ನಿಗೆ ವಾಪಸ್‌ ಹೋಗುತ್ತಿರುವೆ. ನಾನು ನಿನ್ನನ್ನು ಮದುವೆಯಾಗಲು ಸಾಧ್ಯವಿರಲಿಲ್ಲ. ಏಕೆಂದರೆ ಯಾವ ಮಹಿಳೆ ತನ್ನ ಗಂಡನಿಗೆ ನಿಕಟಳಾಗುವುದಿಲ್ಲವೇ, ಅವಳು ನನ್ನವಳು ಹೇಗೆ ಆಗಲು ಸಾಧ್ಯ? ನೀನು ನನ್ನಲ್ಲಿರುವ ಹಣ, ಮೋಹದ ದೃಷ್ಟಿಯಿಂದ ಗಂಡನನ್ನು ಬಿಟ್ಟು ನನ್ನ ಬಳಿ ಬಂದಿದ್ದೆ. ನನಗಿಂತಲೂ ಹೆಚ್ಚು ಹಣ ಇರುವವನು ಸಿಕ್ಕಿಬಿಟ್ಟರೆ ನನ್ನನ್ನೂ ಬಿಟ್ಟು ಹೋಗುವೆ.”
ಈಗ ನಿರ್ಮಲಾಳಿಗೆ ತನ್ನನ್ನು ತಾನು ಹಳಿದುಕೊಳ್ಳುವುದರ ಹೊರತು ಬೇರೇನೂ ಪರ್ಯಾಯವೇ ಇರಲಿಲ್ಲ.
ಪಾಶ್ಚಿಮಾತ್ಯ ಸಂಸ್ಕೃತಿಯ ಪ್ರಭಾವ
ನಮ್ಮ ದೇಶದ ಸಂಸ್ಕೃತಿ, ನಾಗರಿಕತೆ ಹಾಗೂ ಸಂಸ್ಕಾರದ ಬಗ್ಗೆ ಇಡೀ ವಿಶ್ವವೇ ಗಮನಿಸುತ್ತದೆ. ಆದರೆ ನಾವು ನಮ್ಮ ಸಂಸ್ಕೃತಿ, ಸಂಸ್ಕಾರಗಳನ್ನು ತೊರೆದು ಪಾಶ್ಚಿಮಾತ್ಯ ದೇಶಗಳ ಸಂಸ್ಕೃತಿಯನ್ನು ಅನುಸರಿಸುತ್ತಿದ್ದೇವೆ. ಹೈ ಸೊಸೈಟಿಯಲ್ಲಿ ಈ ರೀತಿಯ ವರ್ತನೆ ಸಾಮಾನ್ಯವಾಗುತ್ತಾ ಹೊರಟಿದೆ.
ಕೆಲವು ವರ್ಷಗಳ ಹಿಂದೆ ನೈನಿತಾಲ್ ಗೆ ಹನಿಮೂನ್‌ ಗೆ ಹೋಗಿದ್ದ ಉತ್ತರ ಭಾರತದ ಮೂರು ಜೋಡಿಗಳು ಎರಡನೇ ರಾತ್ರಿ ಹೆಂಡತಿಯರನ್ನು ಅದಲು ಬದಲು ಮಾಡಿಕೊಂಡರು. ಆದರೆ ಇದರಲ್ಲಿ ಒಬ್ಬನ ಪತ್ನಿಗೆ ಇದು ಸರಿಹೋಗಲಿಲ್ಲ. ತಾನು ಕೂಗಿಕೊಳ್ಳುವುದಾಗಿ ಬೆದರಿಕೆ ಹಾಕಿದಳು. ಇದರರ್ಥ ಇಷ್ಟೇ, ನಾವು ನಮ್ಮ ದೇಶದ ಸಂಸ್ಕೃತಿ, ನಾಗರಿಕತೆ ಸಂಸ್ಕಾರವನ್ನು ಬಿಡಬಾರದು.
ನಿರಾಶೆ, ಹೊಂದಾಣಿಕೆಯ ಕೊರತೆ, ನಿರಾಸಕ್ತಿ ಮುಂತಾದ ಅನೇಕ ಕಾರಣಗಳಿಂದ ವೈವಾಹಿಕ ಜೀವನದಲ್ಲಿ ಪ್ರೀತಿಯ ಕೊರತೆ ಉಂಟಾಗುತ್ತದೆ. ಇದಕ್ಕೆ ಬೇರೆ ಕೆಲವು ಕಾರಣಗಳಿರಬಹುದು. ಕಾರಣ ಏನೇ ಇರಲಿ, ಗಂಡ ಹೆಂಡತಿ ನಡುವಣ ಮದುವೆ ಬಂಧನ ಹಾಗೆಯೇ ಉಳಿಯುವಂತಾಗಬೇಕು.
ಪರಸ್ಪರರಿಗೆ ಒಂದು ಅವಕಾಶ ಕೊಡಿ, ಹಿಂದೆ ನೀವು ಕಳೆದ ದಿನಗಳನ್ನು ನೆನಪಿಸಿಕೊಳ್ಳಿ. ಯಾವುದೇ ತಪ್ಪು ಹೆಜ್ಜೆ ಇಡುವ ಮುನ್ನ ಅದರ ಸೈಡ್‌ ಎಫೆಕ್ಟ್ ಗಳ ಬಗ್ಗೆ ಒಮ್ಮೆ ಯೋಚಿಸಿ.
– ಮೋನಿಕಾ
