ನಾಗೇಶ್‌ : ಅಲ್ಲಯ್ಯ.... ಮನೇಲಿ ಸದಾ ನಗ್ತಾ ನಗ್ತಾ ಇರ್ತೀರಿ ನೀವಿಬ್ಬರು. ನಿಮ್ಮನ್ನು ಕಂಡರೆ ಎಷ್ಟು ಹೊಟ್ಟೆ ಉರಿಯುತ್ತೆ ಗೊತ್ತಾ..... ಅದು ಸರಿ, ನಿಮ್ಮ ಈ ಸಂತೋಷದ ರಹಸ್ಯವೇನು?
ಸುರೇಶ್‌ : ದಿನಾ ಮನೆಯಲ್ಲಿ ಪಾತ್ರೆ ತೊಳೆಯೋನು ನಾನೇ.... ಆಗ ನನ್ನ ಹೆಂಡತಿ ದೂರದಿಂದ ನನ್ನತ್ತ ಪಾತ್ರೆ ಎಸೆಯುತ್ತಾಳೆ, ಅದು ನನಗೆ ತಗುಲಿದರೆ ಅವಳು ಖುಷಿಯಿಂದ ನಗ್ತಾಳೆ. ತಗುಲದೆ ಕೆಳಗೆ ಬಿದ್ದರೆ ನಾನು ಖುಷಿಯಾಗಿ ನಗ್ತೀನಿ.... ಅಷ್ಟೆ.
ಡಾಕ್ಟರ್‌ : ಸಾರಿ ಗಿರೀಶ್‌.... ನಿಮ್ಮ ಹೆಂಡತಿ ಇನ್ನು 2-3 ದಿನ ಬದುಕಿರ್ತಾರೆ ಅಷ್ಟೇ, ಅವರು ಈ ಭೂಮಿಯಲ್ಲಿ ಕೆಲವೇ ದಿನದ ಅತಿಥಿ. ಐ ಆ್ಯಮ್ ರಿಯಲಿ ಸಾರಿ....!
ಗಿರೀಶ್‌ : ಅದಕ್ಕೆ ನೀವ್ಯಾಕೆ ಸಾರ್‌ ಸಾರಿ ಕೇಳ್ತೀರಿ? ಇಷ್ಟು ವರ್ಷ ಶೋಷಣೆ ಸಹಿಸಿದವನು ಇನ್ನು 2-3 ದಿನ ಅಡ್ಜಸ್ಟ್ ಮಾಡಿಕೊಳ್ಳಲಾರೆನೇ....?
ಗುಂಡನ ಕಾರು ಪಾರ್ಕಿಂಗ್‌ ಸ್ಪಾಟ್‌ನಿಂದ ಕಾಣೆಯಾಗಿತ್ತು. 2 ದಿನ ಬಿಟ್ಟು ನೋಡಿದಾಗ ಕಾರು ವಾಪಸ್‌ ಅದೇ ಜಾಗದಲ್ಲಿತ್ತು. ಅದರ ಒಳಗೆ ಒಂದು ಲಕೋಟೆ ಇಡಲಾಗಿತ್ತು. ಅದರಲ್ಲಿ ಹೀಗೊಂದು ಪತ್ರವಿತ್ತು :
`ಅಮ್ಮನ ಆರೋಗ್ಯ ಹದಗೆಟ್ಟು ದಿಢೀರ್‌ ಹಾರ್ಟ್‌ ಅಟ್ಯಾಕ್‌ ಆಯಿತು. ಅವರನ್ನು ದೊಡ್ಡ ಆಸ್ಪತ್ರೆಗೆ ಸೇರಿಸಲು ಬೆಂಗಳೂರಿಗೆ ಹೋಗಬೇಕಾಯಿತು. ಆದರೆ ಅಂಥ ನಡುರಾತ್ರಿಯಲ್ಲಿ ನಮಗೆ ಎಲ್ಲೂ ಗಾಡಿ ಸಿಗಲಿಲ್ಲ. ಆ ಕಾರಣದಿಂದಲೇ ನಿಮ್ಮ ಅನುಮತಿ ಇಲ್ಲದೆ ನಿಮ್ಮ ಕಾರನ್ನು ಬಳಸಿಕೊಂಡೆವು. ನಿಮಗೆ ತೊಂದರೆ ಕೊಟ್ಟಿದ್ದಕ್ಕಾಗಿ ವಿಷಾದಿಸುತ್ತೇವೆ. ನಿಮ್ಮ ಕಾರಿಗೆ ಫುಲ್ ಟ್ಯಾಂಕ್‌ ಪೆಟ್ರೋಲ್ ತುಂಬಿಸಿದ್ದೇನೆ, ಗಾಡಿ ಯಥಾಸ್ಥಿತಿಯಲ್ಲಿದೆಯೇ ದಯವಿಟ್ಟು ನೋಡಿಕೊಳ್ಳಿ. ಹೊಸದಾಗಿ ಬಿಡುಗಡೆಗೊಂಡ ಸಿನಿಮಾದ 4 ಟಿಕೆಟ್‌ ಒಂದು ಕವರ್‌ನಲ್ಲಿ, ಡ್ರೈವಿಂಗ್‌ ಸೀಟ್‌ ಮೇಲಿದೆ. ಇಂದು ನಿಮ್ಮ ಮನೆಯವರೆಲ್ಲರೂ ಈ ಈವ್ನಿಂಗ್‌ ಶೋ ನೋಡಿ, ಎಂ.ಟಿ.ಆರ್‌.ನಲ್ಲಿ ಡಿನ್ನರ್‌ ಮುಗಿಸಿ ಬರಬೇಕಾಗಿ ವಿನಂತಿ, ಅದರ ಪ್ರೀಪೇಯ್ಡ್ ಬಿಲ್‌ ಕೂಡ ಇದೆ. ನಮ್ಮನ್ನು ಕ್ಷಮಿಸಿ!' ಈ ಕಥೆ ಓದಿ ಮನೆಯವರ ಕರುಣಾರಸ ಉಕ್ಕಿ ಹರಿಯಿತು. ತಪ್ಪು ಮಾಡಿರಬಹುದು, ಕ್ಷಮೆ ಕೋರಿ ದಂಡ ಕಟ್ಟಿದ್ದಾರೆ ಎಂದು ಹಾಯಾಗಿ ಮನೆಯವರೆಲ್ಲರೂ ಸಿನಿಮಾ, ಡಿನ್ನರ್‌ ಮುಗಿಸಿ ಬಂದಾಗ ರಾತ್ರಿ 11 ಗಂಟೆ ಆಗಿತ್ತು. ಮನೆಗೆ ಬಂದು ನೋಡುತ್ತಾರೆ..... ಬಾಗಿಲು ಹಾರು ಬಡಿದಿದೆ! ಬೆಲೆ ಬಾಳುವ ವಸ್ತುಗಳು ಒಂದೂ ಇಲ್ಲ. ಎಲ್ಲ ಲೂಟಿ ಆಗಿತ್ತು. ಟೀಪಾಯಿ ಮೇಲೆ ಒಂದು ಪತ್ರ : ಸಿನಿಮಾ ಹೇಗಿತ್ತು? ಊಟ ಚೆನ್ನಾಗಿತ್ತಾ?
ಅನಂತಯ್ಯ ಅಪರೂಪಕ್ಕೆ ಕಾರ್‌ ಕೊಂಡಿದ್ದರು. ಅವರ ಹೆಂಡತಿ ಅರವಿಂದಮ್ಮನಿಗೆ ತಾವು ಕಾರ್‌ ಡ್ರೈವಿಂಗ್‌ ಕಲಿಯಲೇಬೇಕೆಂಬ ಚಪಲ!
ರಾಯರು ಎಷ್ಟು ಹೇಳಿದರೂ ಆಕೆ ಒಪ್ಪಲಿಲ್ಲ. ಕೊನೆಗೆ ಅವರು ಒಂದು ಎಚ್ಚರಿಕೆಯ ನುಡಿ ಹೇಳುತ್ತಾ ಕಾರಿನ ಕೀ ಕೊಟ್ಟರು, ``ನೋಡೆ.... ನೀನು ಡ್ರೈವಿಂಗ್‌ ಕಲಿಯುವಾಗ ಅಕಸ್ಮಾತ್‌ ಆ್ಯಕ್ಸಿಡೆಂಟ್‌ ಆಗಿ ಹೆಚ್ಚು ಕಡಿಮೆ ಆಗಿಹೋದ್ರೆ, ಆಗ ಪತ್ರಿಕೆಗಳಲ್ಲಿ ನಿನ್ನ ಒರಿಜಿನಲ್ ವಯಸ್ಸಿನ ಸಮೇತ ಫೋಟೋ ಬಂದುಬಿಡುತ್ತೆ.... ಹುಷಾರಾಗಿರು!''
