2026ರ ಫಿಫಾ ವಿಶ್ವಕಪ್ ಫೈನಲ್ನಲ್ಲಿ ಹಾಲಿ ಚಾಂಪಿಯನ್ ಅರ್ಜೆಂಟೀನಾ ತಂಡವನ್ನು 1-0 ಗೋಲುಗಳ ಅಂತರದಿಂದ ಮಣಿಸಿದ ಸ್ಪೇನ್ (Spain) ವಿಶ್ವ ಚಾಂಪಿಯನ್ ಆಗಿ ಹೊರಹೊಮ್ಮಿದೆ.
ಹೆಚ್ಚುವರಿ ಸಮಯದಲ್ಲಿ ಫೆರಾನ್ ಟೊರೆಸ್ ಬಾರಿಸಿದ ಏಕೈಕ ಗೋಲು ಸ್ಪೇನ್ ತಂಡಕ್ಕೆ ಐತಿಹಾಸಿಕ ಗೆಲುವು ತಂದುಕೊಟ್ಟಿದೆ. ಅರ್ಜೆಂಟೀನಾ ಹಾಲಿ ಚಾಂಪಿಯನ್ ಪಟ್ಟವನ್ನು ಉಳಿಸಿಕೊಳ್ಳುವಲ್ಲಿ ವಿಫಲವಾಗಿದೆ.
ಅಮೆರಿಕದ ನ್ಯೂಜೆರ್ಸಿ ನಗರದ ಮೆಟ್ಲೈಫ್ ಕ್ರೀಡಾಂಗಣದಲ್ಲಿ ನಡೆದ ಈ ರೋಚಕ ಪಂದ್ಯದಲ್ಲಿ, ಲಿಯೋನೆಲ್ ಮೆಸ್ಸಿ ನೇತೃತ್ವದ ಅರ್ಜೆಂಟೀನಾ ತಂಡವು ಸ್ಪೇನ್ನ ಬಲಿಷ್ಠ ರಕ್ಷಣಾ ಪಡೆಯನ್ನು ಭೇದಿಸಲು ವಿಫಲವಾಯಿತು. ಪಂದ್ಯದ ಸಾಮಾನ್ಯ ಅವಧಿಯಲ್ಲಿ ಉಭಯ ತಂಡಗಳು ಗೋಲು ಗಳಿಸಲು ಸಾಧ್ಯವಾಗಲಿಲ್ಲ. ಪಂದ್ಯದ ಆರಂಭದಿಂದಲೇ ಸ್ಪೇನ್ ಚೆಂಡಿನ ಮೇಲೆ ಹಿಡಿತ ಸಾಧಿಸಿ ನಿರಂತರ ಒತ್ತಡ ಹೇರಿತು.
ಅರ್ಜೆಂಟೀನಾ ತನ್ನ ಅನುಭವಿ ನಾಯಕ ಮೆಸ್ಸಿಯ ಮೇಲೆ ಭರವಸೆ ಇಟ್ಟಿದ್ದರೂ, ಸ್ಪೇನ್ನ ಸಂಘಟಿತ ರಕ್ಷಣೆಯ ಎದುರು ಅವರು ನಿರೀಕ್ಷಿತ ಪರಿಣಾಮ ಬೀರಲು ಸಾಧ್ಯವಾಗಲಿಲ್ಲ. ಹೆಚ್ಚುವರಿ ಸಮಯದಲ್ಲಿ ಸ್ಪೇನ್ ಆಟಗಾರ ಫೆರಾನ್ ಟೊರೆಸ್ ಚೆಂಡನ್ನು ಗುರಿಯಾಗಿಸುವ ಮೂಲಕ ತಂಡಕ್ಕೆ 16 ವರ್ಷಗಳ ಬಳಿಕ ಅಂದರೆ 2010ರ ನಂತರ ಎರಡನೇ ಬಾರಿಗೆ ವಿಶ್ವಕಪ್ ಕಿರೀಟವನ್ನು ಮುಡಿಗೇರಿಸಿಕೊಟ್ಟರು.
ಫೆರಾನ್ ಟೊರೆಸ್ ನಿರ್ಣಾಯಕ ಗೋಲು
ನಿಯಮಿತ 90 ನಿಮಿಷಗಳ ಕಾಲ ಗೋಲುರಹಿತವಾಗಿ ಸಾಗಿದ ಪಂದ್ಯ ಹೆಚ್ಚುವರಿ ಸಮಯಕ್ಕೆ ತಲುಪಿತು. 106ನೇ ನಿಮಿಷದಲ್ಲಿ ಸ್ಪೇನ್ನ ಬದಲಿ ಆಟಗಾರ ಫೆರಾನ್ ಟೊರೆಸ್ ನಿರ್ಣಾಯಕ ಗೋಲು ದಾಖಲಿಸಿದರು. ಆ ಕ್ಷಣದಿಂದಲೇ ಪಂದ್ಯ ಸ್ಪೇನ್ನ ಹಿಡಿತಕ್ಕೆ ಜಾರಿತು. ಕೊನೆಯ ಕ್ಷಣದವರೆಗೂ ಮೆಸ್ಸಿ ಮತ್ತು ತಂಡ ಸಮಬಲದ ಗೋಲಿಗಾಗಿ ಹೋರಾಡಿದರೂ, ಸ್ಪೇನ್ ರಕ್ಷಣೆಯನ್ನು ಭೇದಿಸಲು ಸಾಧ್ಯವಾಗಲಿಲ್ಲ. ಇದರೊಂದಿಗೆ ಸ್ಪೇನ್ 1-0 ರಿಂದ ಲಯೊನೆಲ್ ಮೆಸ್ಸಿ ಪಡೆಯನ್ನು ಸೋಲಿಸಿತು. ಅಲ್ಲದೆ, ಯುರೋಪಿಯನ್ ಚಾಂಪಿಯನ್ ಆಗಿರುವ ಸ್ಪೇನ್ ಎರಡನೇ ವಿಶ್ವಕಪ್ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿತು.
2ನೇ ವಿಶ್ವಕಪ್ ಕಿರೀಟ
ಸ್ಪೇನ್ 2010ರ ಬಳಿಕ ಎರಡನೇ ಬಾರಿ ವಿಶ್ವಕಪ್ ಟ್ರೋಫಿಯನ್ನು ಗೆದ್ದು ಬೀಗಿದೆ. ಯುರೋ ಕಪ್ ಗೆಲುವಿನ ಬಳಿಕ ವಿಶ್ವಕಪ್ ಕೂಡ ಗೆದ್ದ ಸ್ಪೇನ್, ವಿಶ್ವ ಫುಟ್ಬಾಲ್ನಲ್ಲಿ ಹೊಸ ಅಧ್ಯಾಯ ಬರೆದಿದೆ. 48 ತಂಡಗಳೊಂದಿಗೆ ಮೊದಲ ಬಾರಿಗೆ ಆಯೋಜಿಸಲಾದ ಫಿಫಾ ವಿಶ್ವಕಪ್ 2026ಕ್ಕೆ ಸ್ಪೇನ್ ಚಾಂಪಿಯನ್ ಆಗುವ ಮೂಲಕ ಅದ್ಧೂರಿ ತೆರೆ ಬಿದ್ದಿದೆ.
ಮೆಸ್ಸಿ ಕನಸು ಭಗ್ನ
2022ರಲ್ಲಿ ವಿಶ್ವಕಪ್ ಗೆದ್ದು ತಮ್ಮ ವೃತ್ತಿಜೀವನದ ಅತ್ಯಂತ ದೊಡ್ಡ ಕನಸನ್ನು ನನಸಾಗಿಸಿಕೊಂಡಿದ್ದ ಮೆಸ್ಸಿ, 2026ರಲ್ಲಿ ಮತ್ತೊಮ್ಮೆ ವಿಶ್ವಕಪ್ ಎತ್ತಿಹಿಡಿಯುವ ಕನಸನ್ನು ಹೊಂದಿದ್ದರು. ಆದರೆ ಈ ಬಾರಿ ಆ ಕನಸು ಈಡೇರಲ್ಲಿಲ್ಲ. ಫೈನಲ್ ಸೋಲಿನ ಬಳಿಕ ಮೈದಾನದಲ್ಲೇ ಮೆಸ್ಸಿ ಭಾವೋದ್ವೇಗಕ್ಕೆ ಒಳಗಾದರು. ಸಹ ಆಟಗಾರರು ಸಮಾಧಾನಪಡಿಸಿದ ದೃಶ್ಯ ಅಭಿಮಾನಿಗಳ ಮನಕಲಕುವಂತಿತ್ತು.
ಮೆಸ್ಸಿ ಮೂರು ವಿಶ್ವಕಪ್ ಫೈನಲ್ಗಳಲ್ಲಿ ಆಡಿದ ವಿಶ್ವದ ಎರಡನೇ ಆಟಗಾರ ಎಂಬ ಕೀರ್ತಿಗೆ ಭಾಜನರಾದರು. ಜೊತೆಗೆ ಫೈನಲ್ ಪಂದ್ಯವೊಂದರಲ್ಲಿ ಆಡಿದ ಅತ್ಯಂತ ಹಿರಿಯ ಔಟ್ಫೀಲ್ಡ್ ಆಟಗಾರ ಎನಿಸಿಕೊಂಡರು.
