ತಾನಿಯಾ ಸಾನ್ವಾಲ್
ಈಕೆಯ ಕೆಲಸ ನಿಜಕ್ಕೂ ಅಪರಂಪರಾಗತ ಹಾಗೂ ಚಾಲೆಂಜಿಂಗ್ ಎನ್ನಬಹುದು. ಏರ್ ಪೋರ್ಟ್ಸ್ ಅಥಾರಿಟಿ ಆಫ್ ಇಂಡಿಯಾ ಸಂಸ್ಥೆಯ ನುರಿತ ಸಿಬ್ಬಂದಿ ಹಾಗೂ ಭಾರತದ ಮೊದಲ ಮಹಿಳಾ ಅಗ್ನಿಶಾಮಕ ಅಧಿಕಾರಿ (ಫಸ್ಟ್ ಫೀಮೇಲ್ ಏವಿಯೇಶನ್ ಫೈರ್ ಫೈಟರ್) ಎನಿಸಿರುವ ತಾನಿಯಾ ಸಾನ್ವಾಲ್, ಪಾರಂಪರಿಕ ವಿಧಾನಗಳನ್ನು ಬದಿಗೊತ್ತಿ ಮೇಲೇರಿದ ಸಾಹಸಗಾಥೆಯನ್ನು ಇಲ್ಲಿ ವಿವರಿಸಿದ್ದಾರೆ……
ತಾನಿಯಾ ಹುಟ್ಟಿದ್ದು ಕೋಲ್ಕತಾದಲ್ಲಿ. ಈಕೆ ಒಂದು ಸಾಧಾರಣ ಮಧ್ಯಮ ವರ್ಗದ ಬಂಗಾಳಿ ಕುಟುಂಬಕ್ಕೆ ಸೇರಿದ ಹೆಣ್ಣುಮಗಳು. ತನ್ನ ಅಪಾರ ಪರಿಶ್ರಮ, ಆತ್ಮವಿಶ್ವಾಸ, ಜೀವನದಲ್ಲಿ ಚಾಲೆಂಜಿಂಗ್ ಹೆಜ್ಜೆಗಳನ್ನಿರಿಸುತ್ತಾ ಹಂತ ಹಂತವಾಗಿ ಮೇಲೇರಿ ಬಂದರು. ಹೀಗಾಗಿ, ಔಪಚಾರಿಕ ಶಿಕ್ಷಣದ ಜೊತೆ ಜೊತೆಯಲ್ಲೇ ವ್ಯಾವಹಾರಿಕ ತರಬೇತಿಯು ತಾನಿಯಾರನ್ನು ಯಶಸ್ಸಿನ ಶಿಖರ ಏರುವಂತೆ ಮಾಡಿದೆ. ಯಾವುದೇ ಏರ್ ಪೋರ್ಟ್ ಯಾ ವಿಮಾನಕ್ಕೆ ಬೆಂಕಿ ಬಿದ್ದಾಗ, ಜನರ ಪ್ರಾಣ ಅಯೋಮಯ ಆಗುತ್ತದೆ. ತಕ್ಷಣ ತಾನಿಯಾ ಆ ಆಪತ್ತಿನ ಕ್ಷಣಗಳಲ್ಲಿ ನೆರವಾಗುತ್ತಾರೆ. ಈಕೆ ತಕ್ಷಣ ನೀರಿನ ಜೆಟ್ ನಲ್ಲಿ, ಪೇಂ ಯಾ ಅನ್ಯ ಅಗ್ನಿಶಾಮಕ ಉಪಕರಣಗಳನ್ನು ಬಳಸುತ್ತಾ ಜನರ ಜೀವ ರಕ್ಷಿಸುತ್ತಾರೆ. ಆದರೆ ಉನ್ನತ ಶಿಕ್ಷಣ ಪಡೆದ ಈಕೆ ಯಾವುದೇ ಕ್ಷೇತ್ರದಲ್ಲಿ ನೌಕರಿ ಯಾ ಬಿಸ್ ನೆಸ್ ಮಾಡುತ್ತಾ, ಸುಲಭವಾಗಿ ತನ್ನ ಜೀವನಯಾನ ಮುಂದುವರಿಸಬಹುದಿತ್ತು. ಅಂಥ ಸುರಕ್ಷಿತ ಜೀವನ ತೊರೆದು, ಈಕೆ ಜನರ ಜೀವ ಉಳಿಸಲು ಮುಂದಾಗಿದ್ದಾರೆ. ಆದರೆ ಅಂಥ ಈಝಿ ಲೈಫ್ ನ್ನು ಆಕೆ ಬಯಸಲಿಲ್ಲ. ತಾನಿಯಾ ಆ ಬಗೆಯ ಸುಖೀ ಜೀವನ ಧಿಕ್ಕರಿಸಿ, ಹೆಣ್ಣುಮಕ್ಕಳಿಗೆ ತೀರಾ ಅಪರಿಚಿತವಾದ ಈ ಅಗ್ನಿ ನಂದಿಸುವ ಚಾಲೆಂಜಿಂಗ್ ಕೆಲಸ ಅಪ್ಪಿದ್ದಾರೆ.
ನವ ಸಮರ್ಥ ಮಹಿಳಾ ಸಿಬ್ಬಂದಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಆ ನಿಟ್ಟಿನಲ್ಲಿ ಈಕೆ ಇಡೀ ದೇಶದ ಪ್ರಪ್ರಥಮ ಯಶಸ್ವೀ ಮಹಿಳಾ ಅಗ್ನಿಶಾಮಕ ಅಧಿಕಾರಿ (ಫಸ್ಟ್ ಫೀಮೇಲ್ ಏವಿಯೇಶನ್ ಫೈರ್ ಫೈಟರ್) ಎನಿಸಿದ್ದಾರೆ. ಆಕೆ ಏರ್ ಪೋರ್ಟಿಗೆ ಅಗ್ನಿ ಬಿದ್ದಾಗ, ಧಾವಿಸಿ ಅದನ್ನು ತಕ್ಷಣ ನಂದಿಸುವ ಚಾಲೆಂಜಿಂಗ್ ಕೆಲಸಕ್ಕೆ ಕೈ ಹಾಕಿದ್ದಾರೆ. ಒಂದಾದ ಮೇಲೊಂದರಂತೆ ಎದುರಾದ ಇಂಥ ಅನೇಕಾನೇಕ ಪ್ರಾಣಕಂಟಕ ಸವಾಲುಗಳನ್ನು ಸುಲಭವಾಗಿ ಎದುರಿಸುತ್ತಾ ಬಂದಿದ್ದಾರೆ. ಹಿಡಿದ ಪ್ರತಿ ಕೆಲಸದಲ್ಲೂ ಯಶಸ್ಸು ಗಳಿಸುತ್ತಾ, ಅದರೆಡೆ 100% ಗಮನಹರಿಸುತ್ತಾ ತಮ್ಮ ನಿರಂತರ ಯಶಸ್ಸಿನ ಕುರಿತಾಗಿ, ಗೃಹಶೋಭಾ ಜೊತೆ ಮುಕ್ತವಾಗಿ ಮಾತನಾಡಿದ್ದಾರೆ.
ತಯಾರಿ ಹಾಗೂ ಸೇವೆ : ಬಾಲ್ಯದಿಂದಲೂ ನಾನು ಏನಾದರೊಂದು ವಿಭಿನ್ನ, ವಿಶಿಷ್ಟ ಪಬ್ಲಿಕ್ ಸರ್ವೀಸ್ ನೀಡಬೇಕೆಂಬ ಹುಮ್ಮಸ್ಸಿನಲ್ಲಿ ಬೆಳೆದಳು. ಅದರಿಂದ ಸಮಾಜದಲ್ಲಿ ಸಕಾರಾತ್ಮಕ ಬದಲಾವಣೆ ಬರುವಂತಾಗಬೇಕು. ಒಂದು ವಿಭಿನ್ನ, ಅನುಪಮ, ಅನನ್ಯ ಸೇವೆ ಒದಗಿಸಬೇಕೆಂಬುದೇ ನನ್ನ ಗುರಿ! ನಿಜ ಹೇಳಬೇಕೂಂದ್ರೆ, ನನಗೆ ಇಂಥ ಒಂದು ಸಾಲುಭರಿತ ಕೆರಿಯರ್ ಒದಗಿಸಿಕೊಟ್ಟಿದೆ. ಇದರಿಂದ ನನ್ನಾಸೆ ಪೂರೈಸಿದೆ! ಏರ್ ಪೋರ್ಟ್ ಫೈರ್ ಫೈಟರ್ ಆಗುವುದೆಂದರೆ ಒಂದು ದುರ್ಲಭ ಅನುಭವವೇ ಸರಿ, ಅತಿ ಹೆಮ್ಮೆಯ ವಿಷಯ ಹೌದು.
ಮಾಸ್ಟರ್ಸ್ ಡಿಗ್ರಿ ನಂತರ, ನಾನು ಸರ್ಕಾರಿ ನೌಕರಿಯ ಹುಡುಕಾಟದಲ್ಲಿದ್ದೆ. ಪೇಪರ್ ನಲ್ಲಿ ನಾನು ಈ ಕೆಲಸದ ಜಾಹೀರಾತು ಗಮನಿಸಿದಾಗ, ಈ ಕೆಲಸ ನನಗೆ ಖಂಡಿತಾ ಸಿಗಬಹುದೆಂಬ ನಂಬಿಕೆ ಉಂಟಾಯಿತು. ಹೀಗಾಗಿ ನಾನು ಅದಕ್ಕೆ ಅರ್ಜಿ ಸಲ್ಲಿಸಿ, ಸೆಲೆಕ್ಟ್ ಆದೆ. ಇಂದು ನಾನೊಬ್ಬ ಯಶಸ್ವೀ ಫೈರ್ ಫೈಟರ್ ಆಗಿ ಇಲ್ಲಿ ಸೇವೆ ಸಲ್ಲಿಸುತ್ತಿದ್ದೇನೆ.
ಆದರ್ಶ ನೀತಿ : ನಾನು ಯಾವಾಗಲೂ ನನ್ನ ಅಜ್ಜಿಯ (ತಾಯಿಯ ತಾಯಿ) ಆದರ್ಶಗಳನ್ನು ಅಕ್ಷರಶಃ ಪರಿಪಾಲಿಸುತ್ತಾ ಬಂದಿದ್ದೇನೆ. ಬಾಲ್ಯದಿಂದಲೇ ನಾನು ಆಕೆಯನ್ನು ನನ್ನ ಆದರ್ಶ ಗುರುವೆಂದು ಸ್ವೀಕರಿಸಿದ್ದೆ. ಹೀಗಾಗಿ, ಸ್ವಾಭಾವಿಕ ರೂಪದಲ್ಲಿ, ಆಕೆ ನನ್ನ ಜೀವನದ ಅತಿ ದೊಡ್ಡ ಪ್ರೇರಣಾಶಕ್ತಿ ಆದರು. ಆಕೆ ಒಬ್ಬ ಅಸಾಧಾರಣ ಸರ್ಕಾರಿ ಸಿಬ್ಬಂದಿಯಾಗಿದ್ದು, ಅಖಂಡ ಸೇವೆ ಸಲ್ಲಿಸಿ ನಿವೃತ್ತಿ ಹೊಂದಿದರು. ನನ್ನ ಅಜ್ಜಿ ಮಾತ್ರವಲ್ಲ, ರಾಷ್ಟ್ರಪತಿ ಎಪಿಜೆ ಅಬ್ದುಲ್ ಕಲಾಂ ಸರ್ ಸಹ, ನನಗೆ ಅನನ್ಯ ವಿಚಾರಪ್ರಚೋದಕ ಜ್ಞಾನ ನೀಡಿದ್ದಾರೆ ಎಂದೇ ಭಾವಿಸುತ್ತೇನೆ.
ಶಿಕ್ಷಣ ಹಾಗೂ ಅಭಿರುಚಿ : ನನಗೆ ಬಾಲ್ಯದಿಂದಲೂ ವಿಜ್ಞಾನ ಎಂದರೆ ಅಪಾರ ಆಸಕ್ತಿ! ನಾನು ಸಸ್ಯಶಾಸ್ತ್ರದಲ್ಲಿ ಸ್ನಾತಕೋತ್ತರ ಪದವಿ ಪಡೆದಿರುತ್ತೇನೆ. ಈ ರೀತಿ ಔಪಚಾರಿಕ ಶಿಕ್ಷಣ ಪೂರೈಸಿದ ನನಗೆ ಏನಾದರೂ ಡಿಫರೆಂಟ್ ಆಗಿ ಸಾಧಿಸುವ ಆಸೆಯಾಯ್ತು. ಪ್ರಸ್ತುತ ನನ್ನ ಬಳಿ ಎರಡೂ ಡಿಗ್ರಿಗಳಿವೆ.
ಸೂಕ್ತ ನಿರ್ಧಾರ : ಮೆರಿಟ್ ಲಿಸ್ಟ್ ಜಾರಿಯಾದ ನಂತರ ನನಗೆ ಹಲವು ಸಮಸ್ಯೆಗಳು ಶುರುವಾದವು. ನಾನು ಅಗ್ನಿಶಾಮಕ ಸೇವೆಯ ಕೋರ್ಸ್ ಸೇರುವೆ ಎಂದಾಗ, ಎಲ್ಲರೂ ನನಗೆ ನಿನ್ನಿಂದ ಅದನ್ನು ನಿಭಾಯಿಸಲಾಗದು ಎಂದೇ ಮೂಗು ಮುರಿದರು. ನನ್ನ ಕುಟುಂಬದವರ ನಂಬಿಕೆ ಹಾಗೂ ಭರವಸೆಗಳೇ ನನಗೆ ಆ ಕಷ್ಟದ ದಿನಗಳಲ್ಲಿ ಸೂಕ್ತ ನಿರ್ಧಾರ ತಳೆಯಲು ಸಹಕರಿಸಿದ್ದು. ನನ್ನ ಮನಸ್ಸು ಅಂಥ ಸಂದಿಗ್ಧದಲ್ಲಿದ್ದಾಗ, ನನ್ನ ಮನೆಯವರು ನನಗೆ ಆತ್ಮವಿಶ್ವಾಸ ತುಂಬಿಸಿದರು. ಅವರ ಹಾರೈಕೆಯ ಫಲವಾಗಿ ಇಂದು ನಾನು ಒಬ್ಬ ಯಶಸ್ವೀ ಫೈರ್ ಫೈಟರ್ ಆಗಿದ್ದೇನೆ!
ಕೆಲಸ ಸಾಗಿ ಬಂದ ಕ್ರಮ : ನಿಜ ಹೇಳಬೇಕು ಅಂದ್ರೆ, ಪ್ರೊಫೆಶನ್ಟೆಕ್ನಿಕಲ್ ಚಾಲೆಂಜಸ್ ಹೊರತಾಗಿ, ನನ್ನ ಕೆಲಸದ ಜರ್ನಿಯಲ್ಲಿ ಬೇರಿನ್ನಾವ ತೊಂದರೆಗಳನ್ನೂ ನಾನು ಕಂಡೇ ಇಲ್ಲ! ಸದ್ಯಕ್ಕಂತೂ ನನ್ನ ಪುರುಷ ಸಹೋದ್ಯೋಗಿಗಳು ನಾನು ಈ ಕೆಲಸ ನಿಭಾಯಿಸುತ್ತಿರುವ ಪರಿ ಕಂಡು ಮೂಕ ವಿಸ್ಮಿತರಾದರು. ಅವರು ನನಗೆ ಪೂರ್ಣ ಸಹಯೋಗ ನೀಡುತ್ತಾ, ನನ್ನ ಕೆಲಸಕ್ಕೆ ಬಲು ಪೂರಕವಾಗಿದ್ದಾರೆ.
ತರಬೇತಿ : ನನ್ನ ಆರಂಭಿಕ ತರಬೇತಿ, ನದೆಹಲಿಯ ಫೈರ್ ಫೈಟರ್ಸ್ ಟ್ರೇನಿಂಗ್ ಸೆಂಟರ್ ನಲ್ಲಿ ನಡೆಯಿತು. ಈ ತರಬೇತಿ ಪೂರ್ತಿಯಾಗಲು ಸುಮಾರು 5 ತಿಂಗಳು ಹಿಡಿಯಿತು. ನಾನು ಈ ಟ್ರೇನಿಂಗ್ ಸೆಂಟರ್ ನ ಒಬ್ಬಂಟಿ ಮಹಿಳೆಯಾಗಿದ್ದೆ! ಇದಂತೂ ಅತಿ ಕಠಿಣಕರ, ಸುಸ್ತಾಗಿಸುವ ಟ್ರೇನಿಂಗ್. ಆದರೆ ನಾನು ಮಾತ್ರ ಸುಮಕೋಮಲೆಯಾಗಿ ಸುಮ್ಮನಿರದೆ ಎಲ್ಲಾ ಕಷ್ಟಗಳನ್ನೂ ಎದುರಿಸಿದೆ. ಅಗ್ನಿಶಮನದ ಕುರಿತಾಗಿ ನಾನು ಇಲ್ಲಿ ಬಹಳಷ್ಟು ಕಲಿತುಕೊಂಡೆ. ನೀವೇನಾದರೂ ಚಾಲೆಂಜಿಂಗ್ ಕೆರಿಯರ್ ಬಯಸಿದರೆ, ನೀವು ನಿಮ್ಮ ಕಂಫರ್ಟ್ ಝೋನ್ ನಿಂದ ಹೊರಬರಲೇಬೇಕು, ಅದನ್ನೇ ನಾನು ಮಾಡಿದೆ!
ಆತ್ಮವಿಶ್ವಾಸ ಹಾಗೂ ದೃಢ ಸಂಕಲ್ಪ : ತರಬೇತಿಯ ಮೊದಲ ದಿನಗಳು ನನಗೆ ಬೆಟ್ಟಗಳ ಮೇಲೆ ಚಾರಣ ಮಾಡಿದಷ್ಟೇ ಕಷ್ಟಕರ ಎನಿಸಿತು. ಇಲ್ಲಿಂದಲೇ ನಾನು ನನ್ನ ಭವಿಷ್ಯ ರೂಪಿಸಿಕೊಳ್ಳಬೇಕಿತ್ತು. ಹಿಂದೆಂದೂ ನಾನು ಇಂಥ ಕಠಿಣಕರ ದೈಹಿಕ ವ್ಯಾಯಾಮ ಮಾಡಿದವಳೇ ಅಲ್ಲ! ಇದು ನನಗೆ ಕಷ್ಟಕರ ಮಾತ್ರವಲ್ಲ, ಬಲು ತ್ರಾಸದಾಯಕ ಚಾಲೆಂಜ್ ಆಗಿತ್ತು. ಇದಾದ ನಂತರ ಬೇರೆ ಬೇರೆ ಅಭ್ಯಾಸಗಳು ಹಾಗೂ ಕ್ಲಾಸ್ ವರ್ಕ್ಸ್ ನಿಂದಾಗಿ, ಯಾರಿಗೇ ಆಗಲಿ ಈ ತರಬೇತಿಯನ್ನು ಯಶಸ್ವಿಯಾಗಿ ಪೂರೈಸುವುದು ವಾಸ್ತವದಲ್ಲಿ ಅತಿ ಕಠಿಣಕರ ಪರೀಕ್ಷೆಯೇ ಆಗಿತ್ತು. ಆದರೆ ನಾನು ಮಾತ್ರ ಅಸಂಭವನ್ನು ಸಂಭವನೀಯ ಎಂದು ಮಾಡಿ ತೋರಿಸಲೇಬೇಕೆಂಬ ಛಲ ಹೊತ್ತಿದ್ದೆ, ಅದನ್ನೇ ನನ್ನ ಧ್ಯೇಯವಾಗಿ ಸ್ವೀಕರಿಸಿದ್ದೆ. ಅದು ನನ್ನ ಆತ್ಮವಿಶ್ವಾಸವಾಗಿ ನನ್ನ ದೇಹದ ಕಣಕಣವನ್ನೂ ಸೇರಿತ್ತು! ಹೀಗಾಗಿ ಮನಸ್ಸು ಮಾಡಿದಲ್ಲಿ ಹೆಣ್ಣುಮಕ್ಕಳು ಸಾಧಿಸಲಾಗದೇ ಇರುವಂಥದ್ದು ಏನೇನೂ ಇಲ್ಲ ಎಂದೇ ಭಾವಿಸುತ್ತೇನೆ. ಆದ್ದರಿಂದ ಕೇವಲ ಹಗಲುಗನಸು ಕಾಣುತ್ತಾ, ಗಾಳಿಗೋಪುರ ಕಟ್ಟುವ ಬದಲು, ನಾವು ನಮ್ಮ ಗುರಿ ಸಾಧನೆಗಾಗಿ ಇಂಥ ಕಠಿಣಾತಿ ಕಠಿಣ ಪರಿಸ್ಥಿತಿಗಳನ್ನು ಎದುರಿಸಲೇಬೇಕು. ನಿರಂತರ ಕಠಿಣ ಅಭ್ಯಾಸ, ಸಂಪೂರ್ಣ ಸಮರ್ಪಣಾ ಮನೋಭಾವ, ದೃಢ ಸಂಕಲ್ಪಗಳು ಇದ್ದಾಗ ಮಾತ್ರ ನಾವಂದುಕೊಂಡದ್ದು ಸಾಧಿಸಲು ಸಾಧ್ಯ!
ಅನುಭೂತಿ : ಇತ್ತೀಚೆಗೆ ಹೆಚ್ಚಿನ ಹೆಣ್ಣುಮಕ್ಕಳು ಈ ಫೀಲ್ಡ್ ಗೆ ಬರಲು ಉತ್ಸಾಹ ತೋರಿಸುತ್ತಿರುವುದನ್ನು ಗಮನಿಸಿದರೆ, ನನಗೆ ನನ್ನ ಬಗ್ಗೆ ಬಹಳ ಹೆಮ್ಮೆ ಎನಿಸುತ್ತದೆ. ನಾನು ಈ ಚಾಲೆಂಜಿಂಗ್ ಕೆರಿಯರ್ ನಲ್ಲಿ ನನ್ನ ಮೊದಲ ಹೆಜ್ಜೆಯ ಭಾವನೆಗಳನ್ನು ಇನ್ನಷ್ಟು ಮತ್ತಷ್ಟು ಹರಡಲು ಬಯಸುತ್ತೇನೆ. ಇದರಿಂದ ಹೆಚ್ಚು ಹೆಚ್ಚು ಹೆಣ್ಣುಮಕ್ಕಳು ಈ ವೃತ್ತಿಯಲ್ಲಿ ಅಭಿರುಚಿ ಬೆಳೆಸಿಕೊಳ್ಳಲಿ ಎಂಬುದೇ ನನ್ನಾಸೆ. ನನ್ನ ಸತತ ಹೋರಾಟದ ಕೆಲಸ ಗಮನಿಸುತ್ತಾ ನಿಬ್ಬೆರಗಾಗಿ ನಿಲ್ಲುವ ಗಂಡಸರನ್ನು ಕಂಡಾಗ, ಹೆಂಗಸರೂ ಸಹ ಇಂಥ ಚಾಲೆಂಜಿಂಗ್ ಕೆರಿಯರ್ ನಲ್ಲಿ ಸಂಪೂರ್ಣ ಯಶಸ್ವಿ ಆಗಬಲ್ಲರು ಎಂಬುದನ್ನು ನಾನು ಸಾಧಿಸಿ ತೋರಿಸಿದ್ದೇನೆ ಎಂದು ಬಲು ಹೆಮ್ಮೆಯಾಗುತ್ತದೆ! ಇದರಿಂದ ನನಗೆ ಸಿಗುವ ಖುಷಿಯನ್ನು ನಾನು ಪದಗಳ ಮೂಲಕ ವ್ಯಕ್ತಪಡಿಸಲಾರೆ, ಅಷ್ಟು ಸಂತೃಪ್ತಿ ಖಂಡಿತಾ ಇದೆ! ತುಂಬು ಶ್ರದ್ಧೆಯಿಂದ ನಾನು ಈ ನನ್ನ ಕರ್ತವ್ಯವನ್ನು ನಿಭಾಯಿಸುತ್ತಿದ್ದೇನೆ, ನಾನು ರಕ್ಷಿಸಿದ ಜೀವಗಳ ಮುಖದಲ್ಲಿ ಸಂತೃಪ್ತಿ ಕಂಡಾಗ, ನಿಜಕ್ಕೂ ನಾನು ಪಟ್ಟ ಕಷ್ಟ ಸಾರ್ಥಕ ಎನಿಸುತ್ತದೆ.
ಸಶಕ್ತ ಸಂದೇಶ : ಇಂದಿನ ತರುಣಿಯರಿಗೆ ಈಕೆಯ ಸಂದೇಶ ಎಂದರೆ, ನಿಮ್ಮ ಮೇಲೆ ನಿಮಗೆ ಸದೃಢ ಆತ್ಮವಿಶ್ವಾಸ ಇರಲಿ! ಸವಾಲುಗಳು ಅನಂತವಾಗಿ ಬರುತ್ತಲೇ ಇರುತ್ತವೆ, ಆದರೆ ಹೆಣ್ಣುಮಕ್ಕಳಾದ ನಾವು ಅವನ್ನೆಲ್ಲ ಎಂಥದ್ದೇ ಪರಿಸ್ಥಿತಿ ಬಂದಾಗಲೂ, ಅದನ್ನು ಎದುರಿಸಿ ಗುರಿ ಮುಟ್ಟುತ್ತೇವೆ ಎಂಬ ಛಲವನ್ನು ಎಂದೂ ಬಿಟ್ಟುಕೊಡಬಾರದು. ಯಾವುದೇ ಫೀಲ್ಡ್ ಇರಲಿ, ಅದರಲ್ಲಿ ಎಂಥದ್ದೇ ಕಷ್ಟಗಳು ಎದುರಾಗಲಿ, ಅದನ್ನು ಗೆದ್ದೇ ತೀರುತ್ತೇವೆ ಎಂಬ ಆತ್ಮವಿಶ್ವಾಸ ಸದಾ ತುಂಬಿರಲಿ. ಈ ಮಹತ್ವಪೂರ್ಣ ನಿರ್ಣಯ ತೆಗೆದುಕೊಳ್ಳುವುದು ಅತಿ ಕಷ್ಟಕರ ಎಂಬುದು ನಿಜ, ಆದರೆ ಅಸಾಧ್ಯವೇನಲ್ಲ! ಹೀಗಾಗಿ ಇಂಥ ಯಾವುದೇ ಸಾಹಸಪೂರ್ಣ ಕೆರಿಯರ್ ನಿಭಾಯಿಸ ಬಯಸುವ ತರುಣಿಯರಿಗೆ ನನ್ನ ತುಂಬು ಪ್ರೋತ್ಸಾಹವಿದೆ! ನನ್ನ ನಂಬಿಕೆ ಎಂದರೆ ಮಾನಸಿಕ ರೂಪದಲ್ಲಿ ನಾವು ಸಶಕ್ತರಾದಾಗ, ಯಶಸ್ಸು ನಮಗೆ ಕಟ್ಟಿಟ್ಟ ಬುತ್ತಿ!
ಆಸೆ ಅಭಿಲಾಷೆ : ನನಗೆ ಎಲ್ಲರೊಂದಿಗೆ ಸೇರಿ ಟೀಂವರ್ಕ್ ನಲ್ಲಿ ಪಾಲ್ಗೊಂಡು, ಕಠಿಣಕರ ಕೆಲಸ ನಿಭಾಯಿಸುವುದೆಂದರೆ ಎಲ್ಲಿಲ್ಲದ ಹಿಗ್ಗು! ಇದಕ್ಕಾಗಿ ಎಂಥದ್ದೇ ಅಪಾಯಕಾರಿ ಹೆಜ್ಜೆ ಇಡಲಿಕ್ಕೂ ನಾನು ಹಿಂದುಮುಂದು ಯೋಚಿಸುವವಳಲ್ಲ. ನಾನು ಇಲ್ಲಿ ತರಬೇತಿಗೆ ಸೇರಿದಾಗಿನಿಂದ, ನನ್ನನ್ನು ನಾನು ಇದಕ್ಕಾಗಿ ಸದಾ ರೆಡಿ ಆಗಿರಿಸಿಕೊಂಡಿರುವೆ. ಮುಂದೆ ಬರಬಹುದಾದ ಯಾವುದೇ ಅಪಾಯಕಾರಿ. ಪರಿಸ್ಥಿತಿಯನ್ನೂ ನಾನು ನಿಭಾಯಿಸಬಲ್ಲೇ ಎಂಬ ಸಮಚಿತ್ತದಿಂದಲೇ ನಾನು ದೈನಂದಿನ ಕೆಲಸ ಕಾರ್ಯಗಳಿಗೆ ಸಜ್ಜಾಗುತ್ತೇವೆ. ನಾನು ಜನರ ಪ್ರಾಣ ಕಾಪಾಡಲೆಂದೇ ನನ್ನ ವೃತ್ತಿನಿಷ್ಠೆ ಪ್ರದರ್ಶಿಸುವೆ. ಇದಕ್ಕಿಂತಲೂ ಮಿಗಿಲಾದುದು ಏನೂ ಇಲ್ಲ ಎಂದೆನಿಸುತ್ತದೆ. ನಾವು ಒಂದು ಅಮೂಲ್ಯ ಪ್ರಾಣವನ್ನು ಕಾಪಾಡಿದಾಗ ನಾವು ಆ ಜೀವದೊಂದಿಗೆ ಒಂದು ಇಡೀ ಕುಟುಂಬವನ್ನೇ ಕಾಪಾಡಿದ್ದೇವೆ ಎಂಬ ಸಂತಸ ಉಕ್ಕುತ್ತದೆ. ಹೀಗಾಗಿಯೇ ಇಷ್ಟಪಟ್ಟು ನಾನು ಈ ಕೆರಿಯರ್ ಆರಿಸಿಕೊಂಡೆ.
ತಾಯಿತಂದೆಯರ ಪಾತ್ರ ಪ್ರೋತ್ಸಾಹ : ನನ್ನ ತಾಯಿತಂದೆ ಸದಾ ಒಂದು ಮಾತಿಗೆ ಬಹಳ ಮಹತ್ವ ನೀಡುತ್ತಿದ್ದರು, “ನಿನಗೆ ಏನು ಅನಿಸುತ್ತದೋ ಅದನ್ನೇ ಮಾಡು! ಆದರೆ ಅದನ್ನು ಶ್ರದ್ಧಾಭಕ್ತಿಗಳಿಂದ ಮಾಡು. ನಿನ್ನ ಕರ್ತವ್ಯನಿಷ್ಠೆ, ಪ್ರಾಮಾಣಿಕತೆಗಳೇ ದೇವರ ಸೇವೆ ಎಂದು ತಿಳಿಯಬೇಕು,” ಎನ್ನುತ್ತಿದ್ದರು. ಶಾಲೆಯ ದಿನಗಳಿಂದಲೇ ನನಗೆ ಈ ಮಾತುಗಳನ್ನು ರೂಢಿಸಿಕೊಳ್ಳುವಂತೆ ಕಲಿಸಲಾಗಿತ್ತು. ಹಾಗಾಗಿ ನಾನು ಬಯಸಿದ ಕಿರಿಯರ್ ನನ್ನದಾಗಿಸಿಕೊಳ್ಳುವ ಸ್ವಾತಂತ್ರ್ಯ ನೀಡಿದ್ದರು. ಕೊನೆಗೆ ನನಗೆ ಈ ನೌಕರಿ ಸಿಕ್ಕಾಗ, ಹೆಣ್ಣುಮಗಳ ತಾಯಿತಂದೆ ಆದ್ದರಿಂದ, ಆರಂಭದಲ್ಲಿ ಅವರು, ತುಸು ಆತಂಕಗೊಂಡಿದ್ದು ನಿಜ. ಏಕೆಂದರೆ ನನ್ನದು `ದಿನಕ್ಕೊಂದು ಗಂಡಾಂತರ’ ಎನ್ನುವಂಥ ಕೆಲಸ ಎಂದು ಅವರಿಗೆ ಗೊತ್ತಿತ್ತು. ಆದರೆ ಕೊನೆಯಲ್ಲಿ ನನ್ನ ದೃಢ ಆತ್ಮವಿಶ್ವಾಸ ಗಮನಿಸಿ ಅವರು ಬಹಳ ಹೆಮ್ಮೆಪಟ್ಟರು, ನನಗೆ ಹೆಚ್ಚಿನ ಮಾನಸಿಕ ಸ್ಥೈರ್ಯ ತುಂಬಿದರು. ನನ್ನ ತಾಯಿತಂದೆಯರ ಸಹಯೋಗದಿಂದಲೇ ನನಗೆ ನನ್ನ ಇಡೀ ಕೆರಿಯರ್ ನಲ್ಲಿ ಹೆಚ್ಚಿನ ಆತ್ಮತೃಪ್ತಿ ಸಿಗುವಂತಾಯಿತು.
ಸಮತೋಲನ : ಒಬ್ಬ ಹೆಣ್ಣಾದ ಕಾರಣ, ಏರ್ ಪೋರ್ಟ್ ಗಳಲ್ಲಿ ಅಗ್ನಿ ದುರಂತ ಸಂಭವಿಸಿದಾಗ, ಫೈರ್ ಫೈಟರ್ ಆಗಿ ಮುನ್ನುಗುವುದು ಸುಲಭದ ಮಾತಲ್ಲ. ಅದನ್ನು ಸರಿದೂಗಿಸುತ್ತಾ, ಒಬ್ಬ ಸಾಧಾರಣ ಹೆಣ್ಣಾಗಿ ನನ್ನ ಖಾಸಗಿ ಜೀವನದಲ್ಲೂ ಯಶಸ್ವಿ ಎನಿಸುವುದು, ಅಷ್ಟೇ ಕಠಿಣಕರವಾಗಿದೆ. ನನ್ನ ತಾಯಿತಂದೆಯರ ಜವಾಬ್ದಾರಿ, ಅವರನ್ನು ನೋಡಿಕೊಳ್ಳುವುದು, ಒಂದೇ ಸಲ ಇಷ್ಟೂ ಕೆಲಸಗಳಲ್ಲಿ ಬ್ಯಾನೆಲ್ಸ್ ಮೇಂಟೇನ್ ಮಾಡುವುದು ನಿಜಕ್ಕೂ ಸವಾಲೇ ಸರಿ! ಆದರೂ ನಡೆಸಿಕೊಂಡು ಹೋಗುತ್ತಿದ್ದೇನೆ. ನನಗೆ ನಮ್ಮ ಕುಟುಂಬದ ಸಂಪೂರ್ಣ ಸಹಕಾರವಿದೆ, ಪ್ರೀತಿವಾತ್ಸಲ್ಯ ಅಖಂಡವಾಗಿದೆ. ಹೀಗಾಗಿ ನಾನು ನನ್ನ ಕರ್ತವ್ಯದಲ್ಲಿ 100% ತೊಡಗಿಸಿಕೊಳ್ಳಲು ಸಾಧ್ಯವಾಗಿದೆ. ಹೀಗಾಗಿ ನನ್ನ ಗುರಿ ಕಡೆ ಸಂಪೂರ್ಣ ಗಮನ ಕೇಂದ್ರೀಕರಿಸಲು ಸಾಧ್ಯವಾಗಿದೆ. ಇದರ ಜೊತೆಗೆ ನನ್ನ ಸಹೋದ್ಯೋಗಿಗಳೊಂದಿಗೆ ಉತ್ತಮ ಬಾಂಧವ್ಯ ಹೊಂದಿದ್ದೇನೆ, ಅವರ ಸಂಪೂರ್ಣ ಸಹಕಾರವಿದೆ. ಇಷ್ಟೆಲ್ಲ ಬಿಝಿ ಆಗಿದ್ದರೂ, ನನ್ನ ನೆಂಟರಿಷ್ಟರ ಜೊತೆ ಸಾಮಾನ್ಯ ಸಂಪರ್ಕ ಹೊಂದಿರಲು ಪ್ರಯತ್ನಿಸುತ್ತೇನೆ. ನಾನು ನನ್ನ ಕುಟುಂಬಕ್ಕಾಗಿ ಮುಖ್ಯವಾಗಿ ನನ್ನ ತಾಯಿ, ತಂದೆ, ಅತ್ತೆ ಮನೆಯಲ್ಲಿ ಎಲ್ಲರೊಂದಿಗೂ `ಆದರ್ಶ’ ಸಂಬಂಧ ಉಳಿಸಿಕೊಂಡಿದ್ದೇನೆ.
ವ್ಯಾಯಾಮ : ಜಿಮ್ ಗೆ ಹೋಗುವ ಬದಲು ನಾನು ಹೆಚ್ಚಾಗಿ ಯೋಗಾಭ್ಯಾಸದಲ್ಲಿ ತೊಡಗಿಸಿಕೊಳ್ಳುತ್ತೇನೆ. ಜೊತೆಗೆ ಬ್ರಿಸ್ಕ್ ವಾಕಿಂಗ್, ಜಾಗಿಂಗ್, ಫ್ರೀ ಹ್ಯಾಂಡ್ ಎಕ್ಸರ್ ಸೈಜ್ ಇತ್ಯಾದಿಗಳಿದ್ದೇ ಇವೆ. ಸಮಯಾವಕಾಶ ಆದಾಗೆಲ್ಲ ಮ್ಯಾರಥಾನ್ ಗಳಲ್ಲಿ ಭಾಗವಹಿಸುತ್ತೇನೆ. ಇದು ನನ್ನನ್ನು ಸದಾ ಫಿಟ್ ಆಗಿರಿಸಲು ಸಹಕಾರಿ.
ಅಚ್ಚುಮೆಚ್ಚಿನ ಊಟತಿಂಡಿ : ಒಬ್ಬ ಬಂಗಾಳಿ ಹೆಣ್ಣಾಗಿ, ನನಗೆ ಬೆಂಗಾಲಿ ಡಿಶೆಸ್ ಅಂದ್ರೆ ಪಂಚಪ್ರಾಣ! ಹೊರಗಿನ ಹೋಟೆಲ್, ಢಾಬಾಗಳಿಗಿಂತ ನನಗೆ ಮನೆ ಅಡುಗೆ, ಊಟತಿಂಡಿ ಅಂದ್ರೆ ಬಹಳ ಇಷ್ಟ. ಮುಖ್ಯವಾಗಿ ಪೌಷ್ಟಿಕರ, ಹೆಲ್ದಿ ಫುಡ್ ನ್ನಷ್ಟೇ ಪ್ರಿಫರ್ ಮಾಡ್ತೀನಿ, ಅದು ನನ್ನ ಟೇಸ್ಟಿಗೆ ತಕ್ಕಂತೆ ಇರಬೇಕು ಅನ್ನೋದು ಮುಖ್ಯ!
– ಪ್ರತಿನಿಧಿ
