ಮೊದಲು ಪ್ಲಾಸ್ಟಿಕ್‌ ಸರ್ಜರಿ ಬಳಿಕ ಕಾಸ್ಮೆಟಿಕ್‌ ಸರ್ಜರಿ. ಈಗ ಕನ್‌ಸ್ಟ್ರಕ್ಟಿವ್‌ ಸರ್ಜರಿ. ಇವೆಲ್ಲ ಸೌಂದರ್ಯದಿಂದ ಕಂಗೊಳಿಸಲು, ಆ್ಯಸಿಡ್‌ ದಾಳಿಯಂಥ ಸಂದರ್ಭದಲ್ಲಿ ಪ್ಲಾಸ್ಟಿಕ್‌ ಸರ್ಜರಿ ಹಾಗೂ ಕಾಸ್ಮೆಟಿಕ್‌ ಸರ್ಜರಿ ಇವು ವರದಾನಕ್ಕಿಂತ ಕಡಿಮೆ ಏನಿಲ್ಲ. ಇತ್ತೀಚಿನ ವರ್ಷಗಳಲ್ಲಿ ಹೊಸದೊಂದು ಬಗೆಯ ಸರ್ಜರಿ ಚರ್ಚೆಯಲ್ಲಿದೆ. ಅದೇ ವೆಜಿನೊಪ್ಲಾಸ್ಟಿ. ಇದು ಗುಪ್ತಾಂಗದ ಸೌಂದರ್ಯಕ್ಕೆಂದೇ ರೂಪುಗೊಂಡ ಸರ್ಜರಿಯಾಗಿದೆ. ದೊಡ್ಡ ದೊಡ್ಡ ಮಹಾನಗರಗಳಲ್ಲಿ ಇದೊಂದು ಬಗೆಯ ಟ್ರೆಂಡ್‌ ಆಗಿಬಿಟ್ಟಿದೆ. ಈ ಬಗೆಯ ಸರ್ಜರಿಯ ಜಾಹೀರಾತು ನೋಡಲು ಸಿಗುವುದಿಲ್ಲ. ಆದರೆ ಕಾಸ್ಮೆಟಿಕ್‌ ಸರ್ಜನ್‌ಗಳು ಈ ತೆರನಾದ ಶಸ್ತ್ರಚಿಕಿತ್ಸೆಗಳನ್ನು ದೊಡ್ಡ ದೊಡ್ಡ ಆಸ್ಪತ್ರೆಗಳಲ್ಲಿ ಮಾಡುತ್ತಿರುತ್ತಾರೆ. ಕೋಲ್ಕತ್ತಾ, ಮುಂಬೈನಂತಹ ಕೆಲವು ಮಹಾನಗರಗಳಲ್ಲಿ ಇದಕ್ಕಾಗಿಯೇ ಪ್ರತ್ಯೇಕ ವಿಭಾಗಗಳು ತೆರೆಯಲ್ಪಟ್ಟಿವೆ.
ಕೋಲ್ಕತ್ತಾದ ಹೆಸರಾಂತ ಖಾಸಗಿ ಆಸ್ಪತ್ರೆ ಹಾಗೂ ಕಾಸ್ಮೆಟಿಕ್‌ ಸರ್ಜನ್ನರ ವೆಬ್‌ಸೈಟ್‌ನಲ್ಲಿ ಹಾರ್ಟ್‌ ಸರ್ಜರಿಯ ಜೊತೆ ಜೊತೆಗೆ ಕಿಡ್ನಿ, ಸ್ಕಿನ್‌, ಲಿವರ್‌ ಟ್ರಾನ್ಸ್ ಪ್ಲಾಂಟೇಶನ್‌ನ ಪ್ಯಾಕೇಜ್‌ ಜೊತೆಗೆ ವೆಜಿನೊಪ್ಲಾಸ್ಟಿಯ ಪ್ಯಾಕೇಜ್‌ ಕೂಡ ನೋಡಲು ಸಿಗುತ್ತದೆ. ವೆಜಿನೊಪ್ಲಾಸ್ಟಿ ಶಸ್ತ್ರಚಿಕಿತ್ಸೆಯಡಿ ಹೈಮೆನೊಪ್ಲಾಸ್ಟಿ ಮತ್ತು ರಾಬಿಯಾಪ್ಲಾಸ್ಟಿ ಕೂಡ ಸೇರಿವೆ.
ವೆಜಿನೊಪ್ಲಾಸ್ಟಿ ಎಂದರೇನು?
ಇತ್ತೀಚಿನ ವರ್ಷಗಳಲ್ಲಿ ಇದಕ್ಕೆ ಭಾರಿ ಬೇಡಿಕೆ ಉಂಟಾಗಲು ಏನು ಕಾರಣ? ಯಾವ ವಯಸ್ಸಿನ ಮಹಿಳೆಯರಲ್ಲಿ ಇದು ಜನಪ್ರಿಯವಾಗಿದೆ? ಈ ತೆರನಾದ ಸರ್ಜರಿಗಳ ಯಶಸ್ಸಿನ ಪ್ರಮಾಣ ಎಷ್ಟು? ಇದರಲ್ಲಿರುವ ರಿಸ್ಕ್ ಫ್ಯಾಕ್ಟರ್‌ಗಳೇನು? ವೆಜಿನೊಪ್ಲಾಸ್ಟಿ ಒಂದು ಜೆನಿಟಲ್ ರೀಕನ್‌ಸ್ಟ್ರಕ್ಷನ್‌ ಸರ್ಜರಿಯಾಗಿದೆ. ಆದರೆ ಜೆನಿಟಲ್ ರೀಕನ್‌ಸ್ಟ್ರಕ್ಷನ್‌ ಸರ್ಜರಿಯಲ್ಲಿ ಲಿಂಗ ಪರಿವರ್ತನೆ ಕೂಡ ಸೇರಿದೆ. ಆದರೆ ವೆಜಿನೊಪ್ಲಾಸ್ಟಿಯಲ್ಲಿ ಗುಪ್ತಾಂಗಕ್ಕೆ ನಿಮಗೆ ಬೇಕಾದ ಆಕಾರವನ್ನು ಕೊಡಬಹುದಾಗಿದೆ. ಕೋಲ್ಕತಾದ ಕಾಸ್ಮೆಟಿಕ್‌ ಸರ್ಜನ್‌ ಡಾ. ಸಪ್ತರ್ಷಿ ಭಟ್ಟಾಚಾರ್ಯ ಹೀಗೆ ಹೇಳುತ್ತಾರೆ, ಇದೊಂದು ಬಗೆಯ ರೀಕನ್‌ ಸ್ಟ್ರಕ್ಟಿವ್‌ ಸರ್ಜರಿ ಆಗಿದ್ದು, ಇದರ ಉದ್ದೇಶ ನಿಮಗೆ ಬೇಕಾದ ರೀತಿಯಲ್ಲಿ ಡಿಸೈನ್‌ ಮಾಡುವುದು ಅಥವಾ ಅದಕ್ಕೆ ಹೊಸ ರೂಪ ಕೊಡುವುದಾಗಿದೆ. ಈ ವಿಭಾಗದ ಮುಖಾಂತರ ಕೈಗೊಳ್ಳಲಾಗುವ ಬೇರೆ ಸರ್ಜರಿಗಳೆಂದರೆ ಹೈಮೆನೊಪ್ಲಾಸ್ಟಿ ಮತ್ತು ರಾಬಿಯಾಪ್ಲಾಸ್ಟಿ ಮುಂತಾದವು.
ವೆಜಿನೊಪ್ಲಾಸ್ಟಿ, ಇದು ದೀರ್ಘ ವಿವಾಹ ಜೀವನ ಮತ್ತು ಮಕ್ಕಳಿಗೆ ಜನ್ಮ ನೀಡಿದ ಬಳಿಕ ಸಡಿಲಗೊಂಡ ಗುಪ್ತಾಂಗದ ಗೋಡೆಗೆ ಇನ್ನಷ್ಟು ಬಿಗಿತ ಉಂಟು ಮಾಡುವುದಾಗಿದೆ. ಈ ಶಸ್ತ್ರಚಿಕಿತ್ಸೆ ದುರ್ಬಲಗೊಂಡ ಮಾಂಸಖಂಡಗಳನ್ನು ರಿಪೇರಿ ಮಾಡುವುದೂ ಆಗಿದೆ. ಇದರ ಹೊರತಾಗಿ ರೀಕನ್‌ಸ್ಟ್ರಕ್ಟಿವ್‌ ಸರ್ಜರಿಯಲ್ಲಿ ಪೃಷ್ಠ ಭಾಗದ ಮಾಂಸಖಂಡಗಳನ್ನು ಟೈಟ್‌ ಮಾಡಿ ಹೆಚ್ಚುತ್ತಿರುವ ವಯಸ್ಸಿನ ಪ್ರಭಾವವನ್ನು ಕಡಿಮೆಗೊಳಿಸುವುದಾಗಿದೆ.
ಡಾ. ಅರಿಂದಮ್ ಸರ್ಕಾರ್‌ ಹೀಗೆ ಹೇಳುತ್ತಾರೆ, ಮಧ್ಯ ವಯಸ್ಸಿನ ಮಹಿಳೆಯರೇ ಹೆಚ್ಚಾಗಿ ವೆಜಿನೊಪ್ಲಾಸ್ಟಿಗಾಗಿ ಬರುತ್ತಾರೆ. ವೈದ್ಯರ ಬಳಿ ಬರುವ ಮಹಿಳೆಯರು ಸಾಮಾನ್ಯವಾಗಿ ಈ ಕುರಿತಂತೆ ಅಷ್ಟಿಷ್ಟು ಮಾಹಿತಿ ಪಡೆದುಕೊಂಡೇ ಬರುತ್ತಾರೆ. ಹೀಗಾಗಿ ಅವರಿಗೆ ಇದರ ಬಗ್ಗೆ ಹೆಚ್ಚಿಗೆ ಹೇಳುವ ಅವಶ್ಯಕತೆ ಉಂಟಾಗುವುದಿಲ್ಲ. ಈ ಕುರಿತಂತೆ ಹೆಚ್ಚಿನ ಮಾಹಿತಿ ಅಥವಾ ಸರ್ಜರಿ ಕುರಿತು ಏನೇ ಸಂದೇಹಗಳಿದ್ದರೂ ಅವನ್ನು ಮೊದಲ ಸಿಟಿಂಗ್‌ನಲ್ಲೇ ನಿವಾರಿಸಲಾಗುತ್ತದೆ.
ಈ ಸರ್ಜರಿಗೆ ಅದೆಷ್ಟು ಬೇಡಿಕೆ ಬಂದಿದೆ ಎಂದರೆ, ಕೋಲ್ಕತಾದ ಚಿಕ್ಕ ಹಾಗೂ ದೊಡ್ಡ ಆಸ್ಪತ್ರೆಗಳಲ್ಲಿ ಈ ತೆರನಾದ ಶಸ್ತ್ರಚಿಕಿತ್ಸೆಗಳನ್ನು ಸಾಕಷ್ಟು ಪ್ರಮಾಣದಲ್ಲಿ ಕೈಗೊಳ್ಳಲಾಗುತ್ತಿದೆ. ಅಂದಹಾಗೆ ಈ ಎಲ್ಲ ಆಸ್ಪತ್ರೆಗಳಲ್ಲಿ ಅದಕ್ಕಾಗಿಯೇ ಪ್ರತ್ಯೇಕ ವಿಭಾಗಗಳನ್ನೇನೂ ತೆರೆಯಲಾಗಿಲ್ಲ. ಗುಪ್ತಾಂಗದ ಶಸ್ತ್ರಚಿಕಿತ್ಸೆಯ ಮಾರುಕಟ್ಟೆ ವ್ಯಾಪ್ತಿ ವಿಸ್ತರಣೆಯಾಗುತ್ತಲೇ ಹೊರಟಿದೆ.
ವೆಜೈನಾ ಸರ್ಜರಿಯ ಅಪೇಕ್ಷೆ ಏಕೆ?
ವಿದೇಶದಲ್ಲಿ ಬಾರ್ಬಿ ವೆಜೈನಾಗೆ ಬಹಳ ಬೇಡಿಕೆ ಇದೆ. ಇದಕ್ಕೆ ಕಾರಣ ಏನೆಂದರೆ, ಇತ್ತೀಚಿನ ದಿನಗಳಲ್ಲಿ ಜನರಲ್ಲಿ ಅದೂ ಯುವ ಜನಾಂಗದಲ್ಲಿ ವರ್ಚುವಲ್‌ ವರ್ಲ್ಡ್ ನ ನಶೆ ತಲೆತುಂಬಿಕೊಂಡಿದೆ. ತಮ್ಮ ಗುಪ್ತಾಂಗಕ್ಕೆ ಹೊಸ ರೂಪ ಕೊಟ್ಟು ಸಮಾಗಮ ಕ್ರಿಯೆಯನ್ನು ಮತ್ತಷ್ಟು ಚುರುಕುಗೊಳಿಸಬೇಕು ಎನ್ನುವುದು ಅವರ ಇಚ್ಛೆ. ಎಷ್ಟೋ ಮಹಿಳೆಯರು ಪತಿ ಅಥವಾ ಸೆಕ್ಸ್ ಪಾರ್ಟನರ್‌ನ ಒತ್ತಾಯದ ಮೇರೆಗೆ ಶಸ್ತ್ರಚಿಕಿತ್ಸೆಗೆ ಮುಂದಾದರು. ಮತ್ತೆ ಕೆಲವು ಮಹಿಳೆಯರು ತಾವೇ ಸ್ವಯಂಸ್ಛೂರ್ತಿಯಿಂದ ಶಸ್ತ್ರಚಿಕಿತ್ಸೆಗೆ ಮುಂದಾದರು. ಸಂಚಿತಾ ಎಂಬ ಮಹಿಳೆಯಂತೂ ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ ತನ್ನ ಗಂಡನನ್ನು ಆಶ್ಚರ್ಯಚಕಿತಗೊಳಿಸಲು ಹೈಮೆನೊಪ್ಲಾಸ್ಟಿಗೆ ಒಳಗಾಗುವ ನಿರ್ಧಾರ ಮಾಡಿದಳು. ತನ್ನ ಮದುವೆಯ 10ನೇ ವಿವಾಹ ವಾರ್ಷಿಕೋತ್ಸಕ್ಕೆ ಆಕೆ ತನ್ನ ಗಂಡನಿಗೆ ಈ ರೀತಿಯ ಒಂದು ಉಡುಗೊರೆ ಕೊಡಲು ನಿರ್ಧರಿಸಿದ್ದಳು.
ಹೈಮೆನೊಪ್ಲಾಸ್ಟಿ ಬಗ್ಗೆ ಹೇಳಬೇಕೆಂದರೆ, ಸಮಾಜದಲ್ಲಿ ಇತ್ತೀಚಿನ ವರ್ಷಗಳಲ್ಲಿ ಹೊಸ ಬದಲಾವಣೆಯೊಂದು ಕಂಡುಬರುತ್ತಿದೆ. ಹಿಂದೆ ಮದುವೆ ಸಮಯದಲ್ಲಿ ಹುಡುಗಿಯರ ಕೌಮಾರ್ಯಕ್ಕೆ ಬಹಳ ಮಹತ್ವ ಕೊಡಲಾಗುತ್ತಿತ್ತು. ಆದರೆ ಆ ಬಳಿಕ ಕ್ರೀಡೆಗಳಲ್ಲಿ ಪಾಲ್ಗೊಳ್ಳುವುದರಿಂದಾಗಿ, ಸೈಕ್ಲಿಂಗ್‌ ಹಾಗೂ ಇತರ ಕಾರಣದಿಂದಾಗಿ ಹುಡುಗಿಯರ ಕೌಮಾರ್ಯಕ್ಕೆ ಮಹತ್ವ ಕೊಡುವುದು ಕಡಿಮೆಯಾಯಿತು. ಆದರೆ ಈಗ ಮತ್ತೆ ಅದಕ್ಕೆ ಮಹತ್ವ ಕೊಡಲಾಗುತ್ತಿದೆ. ಹುಡುಗಿಯರು ಮದುವೆಗೂ ಮುಂಚೆ `ಹೈಮೆನೊಪ್ಲಾಸ್ಟಿ’ ಶಸ್ತ್ರಚಿಕಿತ್ಸೆಗೊಳಗಾಗಲು ಹೊರಟಿದ್ದಾರೆ. ತಜ್ಞ ವೈದ್ಯರೊಬ್ಬರ ಪ್ರಕಾರ, ತಮ್ಮ ಬಳಿ ಇಂತಹ ಅನೇಕ ಪ್ರಕರಣಗಳು ಬರುತ್ತಿವೆ. ಈ ಶಸ್ತ್ರಚಿಕಿತ್ಸೆಯ ಮುಖಾಂತರ ಕನ್ಯಾಪೊರೆಯನ್ನು ಮತ್ತೊಮ್ಮೆ ಸೃಷ್ಟಿಸುವುದಾಗಿದೆ. ಈ ಶಸ್ತ್ರಚಿಕಿತ್ಸೆಯಿಂದ ಯಾವುದೇ ಗುರುತುಗಳು ಕಂಡುಬರುವುದಿಲ್ಲ. ಹೀಗಾಗಿ ಸಂಗಾತಿಗೆ ಇದರ ಬಗ್ಗೆ ಏನೂ ಗೊತ್ತಾಗುವುದಿಲ್ಲ. ಮದುವೆಯಾಗಿ 4 ವಾರಗಳ ಮುಂಚೆ ಇಂತಹ ಶಸ್ತ್ರಚಿಕಿತ್ಸೆ ಮಾಡಿಸಿಕೊಳ್ಳಬೇಕೆಂದು ಸಲಹೆ ನೀಡಲಾಗುತ್ತದೆ.
ಇಂತಹ ಶಸ್ತ್ರಚಿಕಿತ್ಸೆಗೊಳಗಾದ ಕಲ್ಯಾಣಿ ಇದರ ಬಗ್ಗೆ, “2 ತಿಂಗಳ ಬಳಿಕ ನನ್ನ ಮದುವೆ ಇದೆ. ಹಾಗಾಗಿ ನಾನು ಈ ಶಸ್ತ್ರಚಿಕಿತ್ಸೆಗೊಳಗಾದೆ. ಗೆಳತಿಯೊಬ್ಬಳಿಂದ ಈ ವಿಷಯ ತಿಳಿದು ನಾನು ಈ ನಿರ್ಧಾರಕ್ಕೆ ಬಂದೆ. ನನಗೀಗ ಖುಷಿಯಾಗುತ್ತಿದೆ,” ಎಂದು ಹೇಳುತ್ತಾರೆ,
ಕೋಲ್ಕತಾದಲ್ಲಿ ಹೋಟೆಲ್ ಮ್ಯಾನೇಜ್‌ಮೆಂಟ್‌ ಕೋರ್ಸ್‌ ಮಾಡುತ್ತಿರುವ ರಿತಿಕಾ ಹೀಗೆ ಹೇಳುತ್ತಾರೆ, “ಇದು ನನ್ನ ವೈಯಕ್ತಿಕ ವಿಷಯ. ಯಾವುದೇ ಹೆದರಿಕೆ ಅಥವಾ ಸಂದೇಹದಿಂದ ನಾನು ಈ ಶಸ್ತ್ರಚಿಕಿತ್ಸೆಗೆ ಒಳಗಾಗಿಲ್ಲ. ಇಂತಹದೊಂದು ಶಸ್ತ್ರಚಿಕಿತ್ಸೆ ಮಾಡಿಸಿಕೊಳ್ಳಬೇಕಿತ್ತು, ಹಾಗಾಗಿ ಮಾಡಿಸಿಕೊಂಡೆ.”
ಈ ಶಸ್ತ್ರಚಿಕಿತ್ಸೆ ಕುರಿತಂತೆ ಮೊದಲ ಬಾರಿಗೆ ಕೇಳುವವರಿಗೆ ಇದರ ಬಗ್ಗೆ ಸಾಕಷ್ಟು ಸಂದೇಹಗಳು ಏಳುತ್ತವೆ. ಅಂದಹಾಗೆ ಈ ತೆರನಾದ ಶಸ್ತ್ರಚಿಕಿತ್ಸೆಯಿಂದ ಆಗುವ ಲಾಭದ ಜೊತೆಗೆ ಏನಾದರೂ ಅಪಾಯಗಳು ಉಂಟಾಗುವ ಸಾಧ್ಯತೆ ಇದೆಯಾ? ಸರ್ಜರಿಗಾಗಿ ಆಸ್ಪತ್ರೆಯಲ್ಲಿ ಎಷ್ಟು ದಿನ ಇರಬೇಕಾಗುತ್ತದೆ? ಸರ್ಜರಿ ಬಳಿಕ ಸ್ವಾಭಾವಿಕ ಜೀವನಕ್ಕೆ ಮರಳಲು ಎಷ್ಟು ದಿನ ತಗಲುತ್ತದೆ?
ಅಪಾಯ ಕಡಿಮೆ ಏನಿಲ್ಲ
2007ರಲ್ಲಿ ಯೋನಿಗೆ ಸಂಬಂಧಪಟ್ಟ ಯಾವುದೇ ಬಗೆಯ ಸರ್ಜರಿಯ ಹೆಸರನ್ನು `ಡಿಸೈನರ್‌ ವೆಜೈನಾ’ ಎಂದು ಇಡಲಾಯಿತು. ಆ ಸಮಯದಲ್ಲಿ ಅಮೆರಿಕದ ಕಾಲೇಜ್‌ ಆಫ್‌ ಆಬ್‌ಸ್ಟೆಟ್ರಿಶಿಯನ್‌ ಅಂಡ್‌ ಗೈನಕಾಲಜಿಸ್ಟ್ ಹೆಚ್ಚುತ್ತಿರುವ ಈ ಟ್ರೆಂಡ್‌ ಬಗ್ಗೆ ಎಚ್ಚರಿಕೆ ನೀಡಿತ್ತು. ರಾಯಲ್ ಆಸ್ಟ್ರೇಲಿಯನ್‌ ಕಾಲೇಜ್‌ ಆಫ್‌ ಆಸ್ಟ್ರೇಲಿಯಾ ಕೂಡ ಈ ಬಗೆಗಿನ ಟ್ರೆಂಡ್‌ನ ವಿರುದ್ಧ ನಿಂತಿತ್ತು. 2009ರಲ್ಲಿ ಬ್ರಿಟಿಷ್‌ ಮೆಡಿಕಲ್ ಜರ್ನಲ್ ಮತ್ತು 2013ರಲ್ಲಿ ಸೊಸೈಟಿ ಆಫ್‌ ಆಬ್‌ಸ್ಟೆಟ್ರಿಶಿಯನ್‌ ಅಂಡ್‌ ಗೈನಕಾಲಜಿಸ್ಟ್ ಆಫ್‌ ಕೆನಡಾ ಇದನ್ನು ಅಗತ್ಯವಿಲ್ಲದ ಕಾಸ್ಮೆಟಿಕ್‌ ಸರ್ಜರಿ ಎಂದು ಹೇಳುತ್ತ ಈ ಟ್ರೆಂಡ್‌ನ್ನು ನಿಲ್ಲಿಸುವ ಬಗ್ಗೆ ಒತ್ತು ಕೊಟ್ಟಿದ್ದರು. ಇದರ ಹೊರತಾಗಿ 2015ರಲ್ಲಿ ನಡೆಸಲಾದ ಒಂದು ಸಮೀಕ್ಷೆಯಿಂದ ಸ್ಪಷ್ಟವಾದ ಸಂಗತಿಯೆಂದರೆ, ಈ ಕುರಿತಾಗಿ ಯಾವುದೇ ಎಚ್ಚರಿಕೆಯೂ ಕೆಲಸ ಮಾಡಲಿಲ್ಲ. ದಿನದಿಂದ ದಿನಕ್ಕೆ ಇದರ ಟ್ರೆಂಡ್‌ ಹೆಚ್ಚುತ್ತಲೇ ಹೋಯಿತು. ಭಾರತಕ್ಕೂ ಅದು ತಲುಪಿತು.
ತಜ್ಞರ ಪ್ರಕಾರ, ಆ ಶಸ್ತ್ರಚಿಕಿತ್ಸೆಯ ಬಳಿಕ ಬಹಳಷ್ಟು ಅಪಾಯಗಳುಂಟಾಗುವ ಸಾಧ್ಯತೆ ಇರುತ್ತದೆ. ಎಲ್ಲಕ್ಕೂ ಮೊದಲು ಅದರ ಅಡ್ಡ ಪರಿಣಾಮಗಳು ಉಂಟಾಗುವ ಸಾಧ್ಯತೆ ಇರುತ್ತದೆ. ಬಹಳಷ್ಟು ಪ್ರಕರಣಗಳಲ್ಲಿ ಕಂಡುಬಂದದ್ದೇನೆಂದರೆ, ರಕ್ತದ ಹರಿವನ್ನು ತಡೆಯಲು ವೈದ್ಯರಿಗೆ ಕಠಿಣವಾಗಿ ಪರಿಣಮಿಸುತ್ತದೆ. ಅದರ ಜೊತೆ ಜೊತೆಗೆ ಸೋಂಕು ಕೂಡ ಒಂದು ಸಮಸ್ಯೆಯಾಗಿ ಪರಿಣಮಿಸುತ್ತದೆ. ಈ ತೆರನಾದ ಸರ್ಜರಿಗೆ 1 ಗಂಟೆಯಿಂದ 3 ಗಂಟೆತನಕ ಸಮಯ ತಗುಲುತ್ತದೆ. ಇದು ಪರಿಪೂರ್ಣವಾದ ಯೋನಿದ್ವಾರ ಹಾಗೂ ಅದರ ಆಸುಪಾಸಿನ ಮಾಂಸಖಂಡಗಳ ಮೇಲೆ ಅವಲಂಬಿಸಿರುತ್ತದೆ. ಶಸ್ತ್ರಚಿಕಿತ್ಸೆಗೊಳಗಾದ 25 ದಿನಗಳ ಬಳಿಕ ಕೆಲಸ ಕಾರ್ಯಗಳಿಗೆ ಮರಳಬಹುದು. ವಾಸ್ತವ ಸ್ಥಿತಿಗೆ ಬರಲು 6 ವಾರಗಳೇ ಬೇಕಾಗುತ್ತದೆ. ಈ ನಡುವಿನ ಅವಧಿಯಲ್ಲಿ ಲೈಂಗಿಕ ಸಂಬಂಧ ಹೊಂದದಿರಲು ವೈದ್ಯರು ಸೂಚನೆ ಕೊಡುತ್ತಾರೆ. ಇದರ ಹೊರತಾಗಿ ಶಸ್ತ್ರಚಿಕಿತ್ಸೆಯ ಗುರುತು ಕ್ರಮೇಣ ನಿವಾರಣೆಯಾಗುತ್ತದೆ. ಸಾಕಷ್ಟು ನುರಿತ ತಜ್ಞರಿಂದಷ್ಟೇ ಇಂತಹ ಶಸ್ತ್ರಚಿಕಿತ್ಸೆ ಮಾಡಿಸಬೇಕು.
ಇತರೆ ಮಾಹಿತಿ
ದೊಡ್ಡ ದೊಡ್ಡ ಮಹಾನಗರಗಳಲ್ಲಿ ಈ ತೆರನಾದ ಶಸ್ತ್ರಚಿಕಿತ್ಸೆಗಳನ್ನು ನಡೆಸಲಾಗುತ್ತದೆ. ಕೆಲವು ಕಾಸ್ಮೆಟಿಕ್‌ ಸರ್ಜನ್ನರ ಆಸ್ಪತ್ರೆಗಳಲ್ಲೂ ಈ ಸರ್ಜರಿ ಮಾಡಲಾಗುತ್ತದೆ. ಒಂದು ವೇಳೆ ಕಾಸ್ಮೆಟಿಕ್‌ ಸರ್ಜನ್ನರ ಬಳಿ ಫುಲ್ ಸೆಟಪ್‌ ಇಲ್ಲದೇ ಇದ್ದರೆ ಅವರು ಖಾಸಗಿ ಆಸ್ಪತ್ರೆಗಳು ಅಥವಾ ನರ್ಸಿಂಗ್‌ ಹೋಂನಲ್ಲಿ ಈ ಬಗೆಯ ಸರ್ಜರಿ ಮಾಡಿಸುತ್ತಾರೆ.
ಈ ರೀತಿಯ ಶಸ್ತ್ರಚಿಕಿತ್ಸೆಗಳಿಗೆ ಎಷ್ಟು ಖರ್ಚು ಬರುತ್ತದೆ ಎಂಬುದು ಕೂಡ ಹಲವರ ಪ್ರಶ್ನೆಯಾಗಿರುತ್ತದೆ. ಸಾಮಾನ್ಯವಾಗಿ ಇಂಥದೊಂದು ಸರ್ಜರಿಗೆ 35 ರಿಂದ 50 ಸಾವಿರ ರೂ.ತನಕ ಖರ್ಚು ಬರುತ್ತದೆ. ಲೋಕಲ್ ಅಥವಾ ಜನರಲ್ ಅನಸ್ತೇಶಿಯಾ ಎರಡರಲ್ಲೂ ಈ ಶಸ್ತ್ರಚಿಕಿತ್ಸೆ ಮಾಡಬಹುದಾಗಿದೆ. ಹೆಚ್ಚಿನ ಪ್ರಕರಣಗಳಲ್ಲಿ ಜನರಲ್ ಅನಸ್ತೇಶಿಯಾವನ್ನೇ ಮಾಡಲಾಗುತ್ತದೆ.
ಏಕೆಂದರೆ ಈ ತೆರನಾದ ಶಸ್ತ್ರಚಿಕಿತ್ಸೆಗಳಿಗೆ 1-3 ಗಂಟೆ ಸಮಯ ತಗಲುತ್ತದೆ. ಕೆಲವು ದಿನಗಳ ಕಾಲ ಯಾವುದೇ ಭಾರದ ಕೆಲಸ ಮಾಡದಿರಲು ಸಲಹೆ ನೀಡಲಾಗುತ್ತದೆ. 24 ವಾರಗಳ ಕಾಲ ಸಮಾಗಮ ಚಟುವಟಿಕೆ ನಡೆಸದಿರಲು ಹೇಳಲಾಗುತ್ತದೆ.
ಮನೋತಜ್ಞರ ಅಭಿಪ್ರಾಯ
ಬೇರೆ ಬೇರೆ ಕಾರಣಗಳಿಂದಾಗಿ, ಬೇರೆ ಬೇರೆ ವಯಸ್ಸಿನ ಮಹಿಳೆಯರು ಈ ತೆರನಾದ ಶಸ್ತ್ರಚಿಕಿತ್ಸೆ ಮಾಡಿಸಿಕೊಳ್ಳುತ್ತಿದ್ದಾರೆ ಎಂಬುದೇನೋ ಸತ್ಯ. ಒಂದು ವೇಳೆ ಯಾರಾದರೂ ಮಹಿಳೆ ಅಥವಾ ಯುವತಿ ತನ್ನ ಪತಿ ಅಥವಾ ಸೆಕ್ಸ್ ಪಾರ್ಟನರ್‌ನ ಒತ್ತಡಕ್ಕೊಳಗಾಗಿ ಈ ತೆರನಾದ ಶಸ್ತ್ರಚಿಕಿತ್ಸೆಗೆ ಒಳಗಾಗುತ್ತಿದ್ದಾರೆಂದರೆ ಅದು ಯೋಚಿಸಬೇಕಾದ ಮಾತು. ಆದರೂ ಅದೇಕೆ? ಅದನ್ನು ಹೀಗೆ ವಿಶ್ಲೇಷಿಸಬಹುದು. ದೇಹದ ಆಂತರಿಕ ರಚನೆ ಬದಲಾವಣೆಗೆ ಗಂಡ ಅಥವಾ ಸೆಕ್ಸ್ ಪಾರ್ಟ್‌ನರ್‌ ಒತ್ತಡ ತರುತ್ತಿದ್ದಾನೆ ಎಂದರೆ, ಪರಸ್ಪರ ಸಂಬಂಧದಲ್ಲಿ ಎಲ್ಲ ಸರಿಯಾಗಿಲ್ಲ ಎಂಬುದನ್ನು ಇದು ತೋರಿಸಿಕೊಡುತ್ತದೆ. ಅದು ಯಾವುದೊ ಒಂದು ಸಮಸ್ಯೆಯ ಕಡೆ ಬೆರಳು ತೋರಿಸುತ್ತದೆ.
ಏಕೆಂದರೆ ದಾಂಪತ್ಯ ಸಂಬಂಧವೇ ಆಗಿರಬಹುದು ಅಥವಾ ಬೇರಾವುದೇ ಸಂಬಂಧ, ಕೇವಲ ದೇಹದ ಮೇಲೆ ಅವಲಂಬಿಸಿರುವುದಿಲ್ಲ. ಅಂತರಂಗದ ಕ್ಷಣಗಳು ಅತ್ಯಗತ್ಯ. ಒಂದು ವೇಳೆ ಅಂತರಂಗದ ಕ್ಷಣಗಳು ಖುಷಿಯಿಂದ ಕೂಡಿದ್ದರೆ ಅದಕ್ಕೆ ದೇಹ ಅಥವಾ ಅದರ ರಚನೆ ಪ್ರಾಮುಖ್ಯತೆ ಪಡೆದುಕೊಳ್ಳುವುದಿಲ್ಲ. ನಿಜವಾಗಿಯೂ ಈ ತೆರನಾದ ಸಂಬಂಧವೇ ಗಟ್ಟಿಯಾಗಿ ಉಳಿಯುತ್ತದೆ.
– ಎನ್‌. ಭಾವನಾ
