ಜನ ಉರಿ ಬಿಸಿಲಿನಲ್ಲಿ ನಿಶ್ಚಿಂತೆಯಿಂದ ಹೊರಟುಬಿಡುತ್ತಾರೆ. ಈ ನಿರ್ಲಕ್ಷ್ಯತೆಯ ಪರಿಣಾಮವನ್ನು ಅವರ ತ್ವಚೆ ಅನುಭವಿಸಬೇಕಾಗುತ್ತದೆ. ಬಿಸಿಲು ಎಲ್ಲ ವಯೋಮಾನದವರ ಮೇಲೆ ಪ್ರಭಾವ ಬೀರುತ್ತದೆ. ಹೆಸರಾಂತ ಸೌಂದರ್ಯ ತಜ್ಞೆ ಶಹನಾಜ್‌ ಹುಸೇನ್‌, ನಮಗೆ ಬಿಸಿಲಿನಿಂದ ಅನೇಕ ಲಾಭಗಳು ಸಿಗುತ್ತವೆ, ಜೊತೆಗೆ ಅದರಿಂದ ನಮ್ಮ ತ್ವಚೆಗೆ ಹಾನಿಯೂ ಉಂಟಾಗುತ್ತದೆ. ತ್ವಚೆಗೆ ಬಿಸಿಲಿನಿಂದ ಉಂಟಾಗುವಷ್ಟು ಹಾನಿ ಬೇರಾವುದರಿಂದಲೂ ಆಗುವುದಿಲ್ಲ ಎನ್ನುತ್ತಾರೆ.
ಬಿಳಿಯ ಬಣ್ಣದವರಿಗೆ ಬಿಸಿಲಿನಿಂದ ಹೆಚ್ಚು ಹಾನಿ ಎಂದು ಶಹನಾಜ್‌ ಹುಸೇನ್‌ ಹೇಳುತ್ತಾರೆ. ತ್ವಚೆ ಕಪ್ಪಗಿದ್ದಷ್ಟೂ ಅದು ಬಿಸಿಲಿನ ಹಾನಿಕಾರಕ ಪ್ರಭಾವವನ್ನು ಅಷ್ಟೇ ಸಮರ್ಥವಾಗಿ ಎದುರಿಸುತ್ತದೆ. ಆದರೆ ಬಿಸಿಲಿನ ಪ್ರಭಾವ ಕಪ್ಪು ತ್ವಚೆಯ ಮೇಲೂ ಉಂಟಾಗುತ್ತದೆ. ಕಪ್ಪು ತ್ವಚೆಯಲ್ಲಿ ಅಧಿಕ ಮೆಲನಿನ್‌ ಇರುವುದರಿಂದ ಸೂರ್ಯನ ಕಿರಣಗಳಿಂದ ರಕ್ಷಣೆ ಸಿಗುತ್ತದೆ. ಸೂರ್ಯನ ಕಿರಣಗಳು ನಮ್ಮ ತ್ವಚೆಯ ಆಳದವರೆಗೆ ಹೋಗುತ್ತದೆ. ಇದರಿಂದ ತ್ವಚೆಯ ಮೇಲಿನ ಪದರಕ್ಕೆ ಹಾನಿಯಾಗುವುದಿಲ್ಲ. ಆದರೆ ಒಳಗಿನ ತ್ವಚೆಯ ಜೀವಂತ ಊತಕಗಳಿಗೆ ಹಾನಿ ತರುತ್ತದೆ. ಯಾರಾದರೂ ಸತತವಾಗಿ ಬಿಸಿಲಿನಲ್ಲಿದ್ದರೆ ಅವರ ತ್ವಚೆಯ ಮೇಲೆ ವೃದ್ಧಾಪ್ಯದ ಲಕ್ಷಣಗಳು ಪ್ರಕಟವಾಗುತ್ತವೆ. ಅತ್ಯಧಿಕ ಬಿಸಿಲಿನಲ್ಲಿ ಇರುವುದರಿಂದ ಸ್ಕಿನ್‌ ಕ್ಯಾನ್ಸರ್‌ ಕೂಡ ಆಗಬಹುದು. ಬಿಸಿಲಿನ ಅತ್ಯಂತ ದೊಡ್ಡ ಹಾನಿಕಾರಕ ಪ್ರಭಾವ ತ್ವಚೆಯ ಆರ್ದ್ರತೆ ಕಡಿಮೆ ಮಾಡುವುದಾಗಿದೆ. ಇದರಿಂದ ತ್ವಚೆ ಒಣಗಿ ಒರಟಾಗಿ ಸುಕ್ಕುಗಳಾಗುತ್ತವೆ. ಮುಖದಲ್ಲಿ ಕಪ್ಪು ಕಲೆಗಳುಂಟಾಗುತ್ತವೆ. ಇಷ್ಟೇ ಅಲ್ಲ, ರಕ್ತನಾಳಗಳಿಗೂ ಹರಡಿಕೊಳ್ಳುತ್ತವೆ. ಅದರಿಂದ ಚರ್ಮ ಕೆಂಪಾಗಿ ಕಾಣುತ್ತದೆ.
ಸನ್ ಬರ್ನ್ ಏಕಾಗುತ್ತದೆ?
ಸೂರ್ಯನ ಕಿರಣಗಳಲ್ಲಿರುವ ಅಲ್ಟ್ರಾ ವೈಯ್ಲೆಟ್‌ ಕಿರಣಗಳು ನೇರವಾಗಿ ತ್ವಚೆಯ ಸಂಪರ್ಕಕ್ಕೆ ಬಂದಾಗ ನಮಗೆ ನವೆ ಅಥವಾ ಉರಿಯಾಗುತ್ತದೆ. ಅಲ್ಲಿ ಕೆಂಪು ಗುಳ್ಳೆಗಳು, ಕಲೆಗಳು ಮತ್ತು ಸುಕ್ಕುಗಳಾಗುತ್ತವೆ. ಅಲ್ಟ್ರಾ ವೈಯ್ಲೆಟ್‌ ಕಿರಣಗಳು ತ್ವಚೆಯ ಮೆಲನಿನ್‌ನನ್ನು ನಷ್ಟಗೊಳಿಸುತ್ತವೆ. ಅದರಿಂದ ತ್ವಚೆ ಶ್ಯಾಮಲ ವರ್ಣ ಅಥವಾ ಕಪ್ಪವಾಗುತ್ತದೆ. ಬಿಸಿಲಿನಲ್ಲಿ ಒಂದೇ ಸಮನೆ ಕೆಲಸ ಮಾಡುವುದರಿಂದ ಫೋಟೋ ಏಜಿಂಗ್‌ನ ಸಮಸ್ಯೆ ಹೆಚ್ಚಾಗುತ್ತದೆ. ತ್ವಚೆಗೆ ಅಕಾಲದಲ್ಲಿ ಸುಕ್ಕುಗಳು ಬೀಳುತ್ತವೆ. ಚಳಿಗಾಲಕ್ಕೆ ಹೋಲಿಸಿದರೆ ಬೇಸಿಗೆಯಲ್ಲಿ ಜನ ಸನ್ ಬರ್ನ್‌ಗೆ ಬೇಗ ಬಲಿಯಾಗುತ್ತಾರೆ. ಏಕೆಂದರೆ ಆಗ ಸೂರ್ಯನ ಉಷ್ಣತೆ ತುಟ್ಟತುದಿಯಲ್ಲಿರುತ್ತದೆ. ಮಕ್ಕಳು, ಮಹಿಳೆಯರು, ಪುರುಷರು ಎಲ್ಲರೂ ಇದರಿಂದ ಬೇಸತ್ತು ಹೋಗುತ್ತಾರೆ.
ತ್ವಚೆಯ ತಜ್ಞರು ಬೇಸಿಗೆಯಲ್ಲಿ ಸನ್ ಬರ್ನ್ ಜೊತೆಗೆ ಸ್ಕಿನ್‌ ಅಲರ್ಜಿಯುಂಟಾಗುವುದು ಮಾಮೂಲಿ ಎನ್ನುತ್ತಾರೆ. ಇದುವರೆಗೆ ಅಲ್ಟ್ರಾ ವೈಯ್ಲೆಟ್‌ ಮತ್ತು `ಬಿ’ ಕಿರಣಗಳು ಮಾತ್ರ ಭೂಮಿಯವರೆಗೆ ಬರುತ್ತಿದ್ದವು. ಆದರೆ ಈಗ ಅಲ್ಟ್ರಾ ವೈಯ್ಲೆಟ್‌ `ಸಿ’ ಕಿರಣಗಳು ಸಹ ನಮ್ಮನ್ನು ತಲುಪುವುದರಿಂದ ತ್ವಚೆಗೆ ಸಂಬಂಧಿಸಿದಂತೆ ಅನೇಕ ಸಮಸ್ಯೆಗಳುಂಟಾಗುತ್ತವೆ.
ಇನ್‌ಫೆಕ್ಷನ್‌ನಿಂದಲೂ ಸನ್ ಬರ್ನ್ ಡಿಯೋಡರೆಂಟ್‌, ಸೋಪು, ಪರ್ಫ್ಯೂಮ್, ಔಷಧಗಳು ಮತ್ತು ಬೆಳ್ಳುಳ್ಳಿಯಿಂದಲೂ ಸನ್ ಬರ್ನ್ ಉಂಟಾಗುತ್ತದೆ ಎಂದು ಚರ್ಮ ತಜ್ಞರು ಹೇಳುತ್ತಾರೆ. ಡಿಯೋಡರೆಂಟ್‌ ಮತ್ತು ಸೋಪಿನಲ್ಲಿರುವ ಟಿಬಿಎಸ್‌ ಏಜೆಂಟ್‌ನಿಂದಾಗಿ ಒಮ್ಮೊಮ್ಮೆ ಬಿಸಿಲಿನ ಸಂಪರ್ಕಕ್ಕೆ ಬರುವುದರಿಂದ ಫೋಟೋ ಕಾಂಟ್ಯಾಕ್ಟ್ ಅಲರ್ಜಿಯುಂಟಾಗುತ್ತದೆ. ಆದರೆ ಪರ್ಫ್ಯೂಮ್ ನಲ್ಲಿ ಸಿಗುವ ಸಿಕ್ಸ್ ಮೀಥೈಲ್ ಕ್ಯುಮಾರಿನ್‌ ಸಬ್‌ ಸ್ಟೆಂಟ್‌ ಅಲರ್ಜಿಗೆ ಕಾರಣವಾಗುತ್ತದೆ ಮತ್ತು ಬಿಸಿಲಿನ ಸಂಪರ್ಕಕ್ಕೆ ಬಂದಾಗ ತ್ವಚೆಯಲ್ಲಿ ನವೆ ಅಥವಾ ಉರಿ ಉಂಟು ಮಾಡುತ್ತದೆ.
ಬೆಳ್ಳುಳ್ಳಿಯಲ್ಲಿ ಸಿಗುವಂತಹ ಡೈ ಆ್ಯಲಿವ್ ಸಲ್ಫೈಡ್‌ ಸಬ್‌ಸ್ಟೆಂಟ್‌ ಕೂಡ ಅಲರ್ಜಿಗೆ ಕಾರಣವಾಗುತ್ತದೆ ಎಂದು ಚರ್ಮ ತಜ್ಞರು ಹೇಳುತ್ತಾರೆ. ಒಮ್ಮೊಮ್ಮೆ ಕೆಲವರಲ್ಲಿ ಫಿನೋಥೈಜೀನ್‌, ಟೆಟ್ರಾಸೈಕ್ಲೀನ್‌, ಸಿಫ್‌ ಲಾಕ್ಸ್ ಮತ್ತು ಸಲ್ಫೋನಾಮೈಡ್‌ ಔಷಧಗಳನ್ನು ಸೇವಿಸಿ ಬಿಸಿಲಿನ ಸಂಪರ್ಕಕ್ಕೆ ಬರುವುದರಿಂದ ಅಲರ್ಜಿಯ ಸಮಸ್ಯೆ ಹೆಚ್ಚಾಗುತ್ತದೆ. ಬಿಲಿಸಿನಲ್ಲಿ ಸತತವಾಗಿ ಕೆಲಸ ಮಾಡುವುದರಿಂದಲೂ ಫೋಟೋ ಏಜಿಂಗ್‌ನ ಸಮಸ್ಯೆ ಹೆಚ್ಚಾಗುತ್ತದೆ.
ಸನ್ ಟ್ಯಾನ್‌ನ ಲಕ್ಷಣಗಳು ಮತ್ತು ಪರಿಹಾರ
ತ್ವಚೆಯಲ್ಲಿ ಅಕಾಲದಲ್ಲಿ ಸುಕ್ಕು ಬೀಳುವುದು, ಒಣಗಿದಂತಾಗುವುದು, ಕಪ್ಪು, ಬಿಳಿ, ಕೆಂಪು ಕಲೆಗಳು ಕಂಡುಬರುವುದು, ತ್ವಚೆ ಜೋತು ಬೀಳುವುದು, ಮೊಡವೆಗಳು, ಗುಳ್ಳೆಗಳುಂಟಾಗುವುದು ಊತ, ನವೆ, ಕೀವು ಬರುವುದು ಇತ್ಯಾದಿ.
ಒಂದು ವೇಳೆ ನಿಮ್ಮ ತ್ವಚೆ ಉರಿಬಿಸಿಲಿನಿಂದ ಬಾಡಿಹೋಗಿದ್ದರೆ ನೀವು ಡಾಕ್ಟರನ್ನು ಸಂಪರ್ಕಿಸಿ ಅಥವಾ ಕೆಲವು ಮನೆ ಮದ್ದುಗಳನ್ನು ಮಾಡಬಹುದು. ಸನ್ ಬರ್ನ್ ಆಗಿರುವ ಜಾಗದಲ್ಲಿ ಗಾಳಿ ಬೀಸಿಕೊಳ್ಳಿ, ತಣ್ಣೀರಿನಿಂದ ಸ್ನಾನ ಮಾಡಿ. ಮಂಜಿನ ಗಡ್ಡೆಯಿಂದ ಬಾಡಿಹೋದ ತ್ವಚೆಯ ಮೇಲೆ ಉಜ್ಜಿ. ಗುಲಾಬಿ ಜಲದಲ್ಲಿ ಹತ್ತಿ ಅಥವಾ ಟಿಶ್ಶೂ ಪೇಪರ್‌ನ್ನು ನೆನೆಸಿ ತ್ವಚೆಯ ಮೇಲೆ ಪದೇ ಪದೇ ಹಚ್ಚಿ. ಯಾವುದೇ ಸೋಪನ್ನೂ ಉಪಯೋಗಿಸಬೇಡಿ. ಸೋಪ್‌ನಲ್ಲಿ ಇರುವ ರಾಸಾಯನಿಕ ಪದಾರ್ಥಗಳಿಂದ ಸನ್ ಬರ್ನ್‌ನ ಸಮಸ್ಯೆ ಇನ್ನಷ್ಟು ಹೆಚ್ಚುತ್ತದೆ. ತ್ವಚೆಯನ್ನು ಶುದ್ಧಗೊಳಿಸಲು ಗೋದಿಹಿಟ್ಟು ಅಥವಾ ಕಡಲೆಹಿಟ್ಟನ್ನು ಉಪಯೋಗಿಸಿ. ಸ್ನಾನದ ನಂತರ ಕೋಲ್ಡ್ ಕ್ರೀಂ ಅಥವಾ ಆಲಿವ್ ಆಯಿಲ್ ಹಚ್ಚಿ. ಅದರಿಂದ ತ್ವಚೆಗೆ ವಿಶ್ರಾಂತಿ ಸಿಗುತ್ತದೆ.
ಹಸಿ ಆಲೂಗೆಡ್ಡೆಯನ್ನು ಕತ್ತರಿಸಿ ಪೇಸ್ಟ್ ಮಾಡಿಕೊಳ್ಳಿ. ಅದನ್ನು ತ್ವಚೆಯ ಮೇಲೆ ಹಚ್ಚಿ. 10-15 ನಿಮಿಷಗಳ ನಂತರ ತಣ್ಣೀರಿನಲ್ಲಿ ತೊಳೆಯಿರಿ.
ಅದರಿಂದ ಉರಿ ಕಡಿಮೆಯಾಗುತ್ತದೆ. ಒಂದು ಟಬ್‌ನಲ್ಲಿ ಉಗುರು ಬೆಚ್ಚಗಿನ ನೀರು ತೆಗೆದುಕೊಳ್ಳಿ. ಅದಕ್ಕೆ 4-5 ಕಪ್‌ ಆ್ಯಪಲ್ ಸೈಡರ್‌ ವಿನಿಗರ್‌ ಹಾಕಿ. ನಂತರ 15-20 ನಿಮಿಷಗಳವರೆಗೆ ಕೈಕಾಲುಗಳನ್ನು ಅದರಲ್ಲಿ ಮುಳುಗಿಸಿ. ನಂತರ ತ್ವಚೆಯನ್ನು ಒರೆಸಿ. ಆಮೇಲೆ ವಿಟಮಿನ್‌ `ಇ’ ಮತ್ತು ಆ್ಯಲೋವೇರಾಯುಕ್ತ ಮಾಯಿಶ್ಚರೈಸರ್‌ ಹಚ್ಚಿರಿ. ಇದರಿಂದ ತ್ವಚೆಯ ಮೇಲಿನ ಕೆಂಪು ಗುಳ್ಳೆಗಳು ದೂರಾಗುತ್ತವೆ.
ಬಿಸಿಲಿನಿಂದ ಕಣ್ಣುಗಳನ್ನು ರಕ್ಷಿಸಿ
ಕಣ್ಣುಗಳಿಗೂ ಸೂರ್ಯನ ಅಲ್ಟ್ರಾವೈಯ್ಲೆಟ್‌ ಕಿರಣಗಳಿಂದ ಹಾನಿಯುಂಟಾಗುತ್ತದೆ. ಕಣ್ಣಿಗೆ ಪರೆ ಬರುತ್ತದೆ. ತ್ವಚೆಯಲ್ಲಿ ಸನ್ ಬರ್ನ್ ಪ್ರಭಾವ ಕಂಡುಬರುತ್ತದೆ. ಆದರೆ ನಮ್ಮ ಕಣ್ಣುಗಳಿಗೂ ಸನ್ ಬರ್ನ್ ಪ್ರಭಾವ ಉಂಟಾಗುತ್ತದೆಯೆಂದು ಅಷ್ಟಾಗಿ ತಿಳಿಯುವುದಿಲ್ಲ.
ಕಣ್ಣುಗಳಲ್ಲಿ ಸನ್ ಬರ್ನ್‌ನ ಪ್ರಭಾವ ಕೆಲವು ಗಂಟೆಗಳ ನಂತರ ಒಣಗಿದಂತಾಗುವುದು. ನವೆ, ಉರಿ, ಕಣ್ಣೀರು ಇತ್ಯಾದಿ ಲಕ್ಷಣಗಳಿಂದ ತಿಳಿಯುತ್ತದೆ. ಕಣ್ಣುಗಳಲ್ಲಿ ಸನ್ ಬರ್ನ್‌ನಿಂದ ಶಾಶ್ವತ ದೃಷ್ಟಿ ಹಾನಿಯಾಗಬಹುದು. ನೀವು ಹೊರಗೆ ಹೋದಾಗೆಲ್ಲಾ ಸೂರ್ಯನ ಹಾನಿಕಾರಕ ಕಿರಣಗಳಿಂದ ರಕ್ಷಿಸಿಕೊಳ್ಳಲು ಸನ್ ಗ್ಲಾಸ್‌ ಉಪಯೋಗಿಸಿ. ಜೊತೆಗೆ ಛತ್ರಿಯನ್ನೂ ಉಪಯೋಗಿಸಿ.
ಹೊರಗೆ ಹೋಗುವಾಗ
ನೀವು ಮನೆಯಿಂದ ಹೊರಗೆ ಹೋಗುವಾಗ ಉರಿಬಿಸಿಲನ್ನು ತಡೆದುಕೊಳ್ಳಲು ತುಂಬು ತೋಳಿನ ಶರ್ಟ್‌, ಕುರ್ತಾ ಅಥವಾ ಟಾಪ್‌ಧರಿಸಿ. ಜೊತೆಗೆ ಛತ್ರಿಯನ್ನು ತೆಗೆದುಕೊಂಡು ಹೋಗಲು ಮರೆಯದಿರಿ. ಅದು ಇಷ್ಟವಿಲ್ಲದಿದ್ದರೆ ನಿಮ್ಮ ಡ್ರೆಸ್‌ಗೆ ಹೊಂದುವ ಕಾಟನ್‌ ದುಪಟ್ಟಾ ಅಥವಾ ಸ್ಟೋಲ್ ಧರಿಸಿ. ಇದರಿಂದ ನೀವು ತಲೆ, ಕತ್ತು ಮತ್ತು ಕೈಗಳನ್ನು ಚೆನ್ನಾಗಿ ಮುಚ್ಚಿಕೊಳ್ಳಬಹುದು. ಜೀನ್ಸ್ ನಷ್ಟು ದಪ್ಪದ ಏಪ್ರನ್‌ ಧರಿಸಬಹುದು. ಬಿಸಿಲು ಮತ್ತು ಧೂಳಿನಿಂದ ರಕ್ಷಿಸಿಕೊಳ್ಳಲು ನಿಮಗಿಷ್ಟವಾದ ಸನ್ ಗ್ಲಾಸ್‌ ಧರಿಸಿ. ಬೇಸಿಗೆಯಲ್ಲಿ ಹೆಚ್ಚಾಗಿ ಹತ್ತಿ ಬಟ್ಟೆಗಳಿಗೆ ಪ್ರಾಮುಖ್ಯತೆ ಕೊಡಿ. ಅವು ಬೆವರನ್ನು ಚೆನ್ನಾಗಿ ಹೀರಿಕೊಳ್ಳುತ್ತವೆ. ತ್ವಚೆಗೂ ಆರಾಮದಾಯಕವಾಗಿರುತ್ತವೆ.
ಸನ್ ಸ್ಕ್ರೀನ್ ಹಚ್ಚಲು ಮರೆಯದಿರಿ
ಫೋರ್ಟಿಸ್‌ ಆಸ್ಪತ್ರೆಯ ಚರ್ಮ ತಜ್ಞರಾದ ಡಾ. ಸುನಿಲ್ ಪ್ರಕಾರ, ಸೂರ್ಯನ ತೀಕ್ಷ್ಣ ಕಿರಣಗಳಿಂದಾಗಿ ತ್ವಚೆಯಲ್ಲಿ ಉರಿ ಮತ್ತು ನವೆಯುಂಟಾಗುತ್ತದೆ, ಚರ್ಮ ಉದುರುತ್ತದೆ. ಬೆಳಗ್ಗೆ 10 ರಿಂದ ಮಧ್ಯಾಹ್ನ 3 ಗಂಟೆಯವರೆಗೆ ಬಿಸಿಲು ಹೆಚ್ಚಾಗಿರುತ್ತದೆ. ಆಗ ಯಾವುದೇ ರಕ್ಷಣೆಯಿಲ್ಲದೆ ಬಿಸಿಲಿನಲ್ಲಿ ಓಡಾಡಿದರೆ ತ್ವಚೆಗೆ ಬಹಳ ಅಪಾಯಕಾರಿ. ಅದರಿಂದ ರಕ್ಷಿಸಿಕೊಳ್ಳಲು ಸನ್ ಸ್ಕ್ರೀನ್ ಹಚ್ಚಿಕೊಳ್ಳಬೇಕು. ಭಾರತದ ಹವಾಮಾನಕ್ಕೆ ಸನ್ ಸ್ಕ್ರೀನ್ ಎಸ್‌ಪಿಎಫ್‌ 30-40 ಯೋಗ್ಯವಾಗಿರುತ್ತದೆ.
ಊಟ ತಿಂಡಿಯ ಬಗ್ಗೆಯೂ ಗಮನಿಸಿ
ಬಿಸಿಲಿನಿಂದ ರಕ್ಷಿಸಿಕೊಳ್ಳುವ ಎಲ್ಲ ಉಪಾಯಗಳಲ್ಲದೆ ಈ ಹವಾಮಾನದಲ್ಲಿ ಊಟ ತಿಂಡಿಯ ಬಗ್ಗೆ ವಿಶೇಷ ಗಮನ ನೀಡಿ. ಹಸಿರು ಸೊಪ್ಪು ಮತ್ತು ಎಲೆಗಳಿರುವ ತರಕಾರಿ ತಿನ್ನಿ. ಹೆಚ್ಚು ನೀರು ಕುಡಿಯಿರಿ. ತಾಜಾ ಹಣ್ಣುಗಳನ್ನು ತಿನ್ನಿ, ಹುರಿದ, ಕರಿದ ತಿಂಡಿಗಳನ್ನು ತಿನ್ನುವ ಬದಲು ಹೆಚ್ಚು ಲಿಕ್ವಿಡ್‌ ತೆಗೆದುಕೊಳ್ಳಿ. ಮೊಸರು, ಲಸ್ಸಿ, ಜೂಸ್‌ ಹೆಚ್ಚಾಗಿ ಸೇವಿಸಿ.
ತ್ವಚೆಯ ಅಗತ್ಯಗಳನ್ನು ತಿಳಿಯಿರಿ
ದಿನದಲ್ಲಿ ಕನಿಷ್ಠ 2 ಬಾರಿ ಸ್ನಾನ ಮಾಡಿ. ಸ್ನಾನ ಮಾಡುವ ನೀರಿನಲ್ಲಿ ನಿಂಬೆರಸ ಹಾಕಿ. ತ್ವಚೆಗೆ ಹಿತವಾದ ಸೋಪು, ಫೇಸ್‌ ವಾಶ್ ಉಪಯೋಗಿಸಿ. ಆ್ಯಂಟಿ ಫಂಗಲ್ ಪೌಡರ್‌ ಉಪಯೋಗಿಸಿ. ಮನೆಯಿಂದ ಹೊರಡುವ ಮೊದಲು ಮುಖವನ್ನು ತಣ್ಣೀರಿನಿಂದ ತೊಳೆಯಿರಿ. ಶರೀರದ ತೆರೆದ ಭಾಗಗಳಿಗೆ ಸನ್ ಸ್ಕ್ರೀನ್ ಹಚ್ಚಿ. ಬಿಸಿಲಿನಿಂದ ಬಂದಾಗ ಮುಖಕ್ಕೆ ಆಲೂಗೆಡ್ಡೆಯ ರಸ ಹಚ್ಚಿ ಅಥವಾ ನೀರಿಗೆ ಸ್ಛಟಿಕ ಬೆರೆಸಿ ಉಜ್ಜಿ. ಅದರಿಂದ ತ್ವಚೆಗೆ ಆರಾಮವಾಗುತ್ತದೆ. ಡಿಯೋಡರೆಂಟ್‌ ಅಥವಾ ಪರ್ಫ್ಯೂಮ್ ನ್ನು ನೇರವಾಗಿ ತ್ವಚೆಗೆ ಹಾಕುವ ಬದಲು ಬಟ್ಟೆಗಳ ಮೇಲೆ ಸಿಂಪಡಿಸಿ.
– ರಮಾಮಣಿ
ಲೇಪನದಿಂದ ಅನುಕೂಲ
4 ಚಮಚ ಮೊಸರಿನಲ್ಲಿ 2 ಚಮಚ ಕಡಲೆಹಿಟ್ಟು ಬೆರೆಸಿ ಬಾಡಿದ ತ್ವಚೆಯ ಮೇಲೆ ಲೇಪಿಸಿ.
ನಿಂಬೆರಸ, ಜೇನುತುಪ್ಪ ಮತ್ತು ಕಿತ್ತಳೆ ರಸ ಬೆರೆಸಿ ತ್ವಚೆಯ ಮೇಲೆ ಹಚ್ಚಿ.
ಹೊರಗಿನಿಂದ ಬಂದು 10 ನಿಮಿಷಗಳ ನಂತರ ಟೊಮೇಟೊ ಅಥವಾ ಸೌತೆಕಾಯಿಯ ಜೂಸ್‌ ಹಚ್ಚಿ ತಣ್ಣೀರಿನಿಂದ ಮುಖ ತೊಳೆಯಿರಿ.
ಗಂಧದಪುಡಿಗೆ ಎಳನೀರು ಮತ್ತು ಬಾದಾಮಿ ಎಣ್ಣೆ ಹಾಕಿ ಪೇಸ್ಟ್ ಮಾಡಿಕೊಳ್ಳಿ. ಆ ಪೇಸ್ಟ್ ನ್ನು ಮುಖಕ್ಕೆ ಹಚ್ಚಿ ಅರ್ಧ ಗಂಟೆ ಬಿಡಿ. ನಂತರ ತಣ್ಣೀರಿನಿಂದ ತೊಳೆಯಿರಿ.
ಅರಿಶಿನದ ಪುಡಿಯನ್ನು ಮೊಸರು ಮತ್ತು ಜೇನುತುಪ್ಪದಲ್ಲಿ ಬೆರೆಸಿ ಗಟ್ಟಿಯಾದ ಪೇಸ್ಟ್ ಮಾಡಿಕೊಳ್ಳಿ. ಈ ಪೇಸ್ಟ್ ನ್ನು ಮುಖಕ್ಕೆ ಹಚ್ಚಿ 15-20 ನಿಮಿಷ ಬಿಡಿ. ನಂತರ ತೊಳೆಯಿರಿ.
ಆ್ಯಲೋವೇರಾ ಜೆಲ್ ಉಪಯೋಗಿಸಿ. ಅದರಿಂದ ತ್ವಚೆಗೆ ಕಾಂತಿ ಬರುತ್ತದೆ. ಆ್ಯಲೋವೇರಾ ಜೆಲ್‌ಗೆ ನಿಂಬೆರಸ ಬೆರೆಸಿ ತ್ವಚೆಗೆ ಹಚ್ಚುವುದರಿಂದ ತ್ವಚೆಗೆ ಆರಾಮವೆನಿಸುತ್ತದೆ.
1 ಚಮಚ ಉದ್ದಿನ ಬೇಳೆಯನ್ನು ಮೊಸರಿನೊಂದಿಗೆ ಚೆನ್ನಾಗಿ ರುಬ್ಬಿಕೊಂಡು ಬಾಡಿದ ತ್ವಚೆಗೆ ಹಚ್ಚಿ. 15 ನಿಮಿಷಗಳ ನಂತರ ತಣ್ಣೀರಿನಿಂದ ತೊಳೆಯಿರಿ.
ಗಂಧದ ಪುಡಿ, ಕಡಲೆಹಿಟ್ಟು, ಗುಲಾಬಿಜಲ ಮತ್ತು ನಿಂಬೆರಸವನ್ನು ಚೆನ್ನಾಗಿ ಬೆರೆಸಿಕೊಂಡು ಸನ್ ಬರ್ನ್ ಆದ ತ್ವಚೆಯ ಮೇಲೆ ಹಚ್ಚಿ 10 ನಿಮಿಷಗಳ ನಂತರ ತಣ್ಣೀರಿನಿಂದ ತೊಳೆಯಿರಿ.
1 ಚಮಚ ಮೊಸರು, 1 ಚಮಚ ಮೂಲಂಗಿ ರಸ ಮತ್ತು 1 ಚಮಚ ನಿಂಬೆರಸ ಬೆರೆಸಿ ಬಾಡಿದ ತ್ವಚೆಗೆ ಹಚ್ಚಿ.
ಮ್ತುಲಾನಿ ಮಿಟ್ಟಿಯನ್ನು ಮಿನರಲ್ ವಾಟರ್‌ ಬೆರೆಸಿ ಪೇಸ್ಟ್ ಮಾಡಿಕೊಳ್ಳಿ. ಅದನ್ನು ಬಾಡಿದ ತ್ವಚೆಯ ಮೇಲೆ ಹಚ್ಚಿ. 10-15 ನಿಮಿಷಗಳ ನಂತರ ತಣ್ಣೀರಿನಿಂದ ತೊಳೆಯಿರಿ.
4 ದೊಡ್ಡ ಚಮಚ ಮೊಸರು, ಹಿಂಡಿದ 1 ಸಣ್ಣ ತುಂಡು ಸೌತೆಕಾಯಿ, ರುಬ್ಬಿದ ಪರಂಗಿ ಹಣ್ಣಿನ ಸಣ್ಣ ತುಂಡು, 1 ದೊಡ್ಡ ಚಮಚ ಓಟ್‌ ಮೀಲ್ ಸೇರಿಸಿ ಸ್ವಲ್ಪ ಹೊತ್ತು ಫ್ರಿಜ್‌ನಲ್ಲಿಡಿ. ನಂತರ ತ್ವಚೆಯ ಮೇಲೆ ಲೇಪಿಸಿ. ಅದು ಒಣಗಿದ ನಂತರ ತಣ್ಣೀರಿನಿಂದ ತೊಳೆಯಿರಿ.
