ರೆಡಿ ಟು ಕುಕ್‌ ವ್ಯಂಜನಗಳ ಟ್ರೆಂಡ್‌ ಇದೀಗ ದಿನೇ ದಿನೇ ಹೆಚ್ಚುತ್ತಿದೆ. ಬ್ರೇಕ್‌ ಫಾಸ್ಟ್, ಸ್ನಾಕ್ಸ್ ಅಥವಾ ಸಂಜೆಯ ತಿಂಡಿಗೆ ಒದಗುವಂಥ ಇಡ್ಲಿ, ದೋಸೆ, ವಡೆ, ಡೋಕ್ಲಾ, ಉಪ್ಪಿಟ್ಟು, ಪಕೋಡ, ಥೇಪ್ಲಾ, ಪರೋಟ ಇತ್ಯಾದಿಗಳ ಸೀಲ್ಡ್ ಪ್ಯಾಕೆಟ್ಸ್ ರೆಡಿಮೇಡ್ ಲಭ್ಯವಿವೆ. ಪ್ಯಾಕೆಟ್‌ನಲ್ಲಿ ಸೂಚಿಸಿರುವಂತೆ ಇವನ್ನು ಬಿಸಿ ನೀರು ಅಥವಾ ಮೊಸರು ಬೆರೆಸಿ, ತಕ್ಷಣ ಅವಸರಕ್ಕೆ ವ್ಯಂಜನ ತಯಾರಿಸಿಕೊಳ್ಳಬಹುದು.
ಇದೇ ತರಹ ಪಾರಿಜ್‌, ಪುಡಿಂಗ್‌ ತಯಾರಿಸಲು ಓಟ್ಸ್, ಕಾರ್ನ್‌ ಫ್ಲೇಕ್ಸ್, ಮ್ಯೂಸಲಿ ಇತ್ಯಾದಿಗೆ ಬಿಸಿ ಹಾಲು ಬೆರೆಸಿದರೆ ಅವು ತಕ್ಷಣ ರೆಡಿ ಆಗುತ್ತವೆ. ಇದರರ್ಥ ಮಾರುಕಟ್ಟೆಯಲ್ಲಿ ಮುಖ್ಯವಾಗಿ 2 ತರಹದ ವ್ಯಂಜನಗಳ ರೆಡಿ ಪ್ಯಾಕೆಟ್‌ ಲಭ್ಯ. ಒಂದಕ್ಕೆ ಹಾಲು, ಮೊಸರು ಬೆರೆಸಿದ ನಂತರ ಕುಕ್‌ ಮಾಡಿದರೆ ಆಯಿತು ಸವಿಯಲು ಸಿದ್ಧ. ಇನ್ನೊಂದು ಬಗೆ ಎಂದರೆ ಪ್ಯಾಕೆಟ್‌ ಸಮೇತ (ಇಡಿಯಾಗಿ) ನೀರಲ್ಲಿ ಕುದಿಸಿದರೆ, ರೆಡಿ ಟು ಈಟ್‌ ವ್ಯಂಜನ ರೆಡಿ. ಕಾರ್ನ್‌ ಫೆಲ್ವಿಕ್‌ ಇತ್ಯಾದಿಗಳಿಗೆ ಕೇವಲ ಬಿಸಿ ಹಾಲು ಬೆರೆಸಿದರೆ ಸಾಕು. ತಕ್ಷಣ ಮಕ್ಕಳಿಗೆ ಸವಿಯಲು ಕೊಡಬಹುದು. ಬನ್ನಿ, ಇವೆರಡಕ್ಕೂ ಇನ್ನೊಂದಿಷ್ಟು ಸಾಮಗ್ರಿ ಬೆರೆಸಿ ಅವನ್ನು ಹೇಗೆ ಪೌಷ್ಟಿಕಗೊಳಿಸಬಹುದು ಎಂದು ವಿವರವಾಗಿ ನೋಡೋಣ.
ಹೆಸರುಬೇಳೆ ಬಜ್ಜಿ ಮಿಕ್ಸ್, ತಾಲಿಪಿಟ್ಟಿನ ಹಿಟ್ಟು : ಹೆಸರೇ ಸೂಚಿಸುವಂತೆ ಇಂಥ ರೆಡಿ ಬಜ್ಜಿ ಮಿಕ್ಸ್ ಗಳ ಹಿಟ್ಟಿಗೆ ನೀರು ಬೆರೆಸಿ ಮಿಶ್ರಣ ಕಲಸಿ ಈರುಳ್ಳಿ, ಆಲೂ, ಬದನೆ, ಸೀಮೆಬದನೆ ಇತ್ಯಾದಿ ಬಿಲ್ಲೆಗಳಿಂದ ಬಜ್ಜಿ ಸವಿಯಬಹುದು. ಇದಕ್ಕೆ ಅಪರೂಪ ಎನಿಸುವ ಸುವರ್ಣಗೆಡ್ಡೆ, ಹಲಸಿನಕಾಯಿಗಳ ಹೋಳನ್ನು ಲಘು ಬೇಯಿಸಿ ಈ ಮಿಶ್ರಣದಲ್ಲಿ ಅದ್ದಿ ಬೋಂಡ, ಬಜ್ಜಿ ತಯಾರಿಸಬಹುದು. ಈ ಮಿಶ್ರಣಗಳಿಂದ ದಿಢೀರ್‌ ದೋಸೆ ಕೂಡ ತಯಾರಿಸಬಹುದು. ತರಕಾರಿ ಹೆಚ್ಚಿ ಲಘು ಬಾಡಿಸಿ ಇದಕ್ಕೆ ಬೆರೆಸಿಕೊಳ್ಳಿ. ಈ ಬಜ್ಜಿ ಮಿಶ್ರಣಕ್ಕೆ ಮೇಲ್ಭಾಗದಿಂದ ಒಂದಿಷ್ಟು ಕೊ.ಸೊಪ್ಪು, ತುರಿದ ಪನೀರ್‌, ಕ್ಯಾರೆಟ್‌ ಇತ್ಯಾದಿ ಉದುರಿಸಿ ದಿಢೀರ್‌ ದೋಸೆ ತಯಾರಿಸಿ.
ನಿಮಗೆ ಡೀಪ್‌ ಫ್ರೈ ಬೋಂಡ, ಬಜ್ಜಿ ಬೇಡ ಎನಿಸಿದರೆ, ಇದೇ ಮಿಶ್ರಣದಿಂದ ಪಡ್ಡು ಸಹ ತಯಾರಿಸಬಹುದು. ಬಹಳ ಕನಿಷ್ಠ ಎಣ್ಣೆ ಬಳಸಿ ಸ್ವಾದಿಷ್ಟ ಪಡ್ಡು ತಯಾರಿಸಬಹುದು. ಇದೇ ತರಹ ತಾಲಿಪಿಟ್ಟಿನ (ರೊಟ್ಟಿ ತರಹ ತಟ್ಟಲು) ಮಿಶ್ರಣಕ್ಕೆ ತುರಿದ ಸೋರೆ, ಕ್ಯಾಪ್ಸಿಕಂ, ಸೌತೇಕಾಯಿ, ಸೀಮೆಬದನೆ, ಹೆಚ್ಚಿದ ಪಾಲಕ್‌, ಕೊ.ಸೊಪ್ಪು, ಪುದೀನಾ ಉದುರಿಸಿ ರೊಟ್ಟಿ ತರಹ ತಟ್ಟಬಹುದು, ಲಟ್ಟಿಸಿ ಥೇಪ್ಲಾ (ಗುಜರಾತಿ ತೆಳು ಚಪಾತಿ, ಉಪ್ಪು ಖಾರ ಬೆರೆತದ್ದು) ತಯಾರಿಸಬಹುದು.
ಓಟ್ಸ್ : ಇತ್ತೀಚೆಗೆ ಜನ ಬಹಳ ಡಯೆಟ್‌ ಕಾನ್ಶಿಯಸ್‌ ಆಗುತ್ತಿದ್ದಾರೆ. ಹೀಗಾಗಿ ಓಟ್ಸ್ ಬಹಳ ಜನಪ್ರಿಯವಾಗುತ್ತಿದೆ. ಇದನ್ನು ಲಘು ಹುರಿದು, ಹಾಲು ಬೆರೆಸಿ ಸವಿಯಬಹುದು. ದಿಢೀರ್‌ ದೋಸೆ ಮಾಡಲು ಬಜ್ಜಿ ಮಿಶ್ರಣಕ್ಕೆ ಅಥವಾ ರವೆ, ಅಕ್ಕಿಹಿಟ್ಟು, ಕಡಲೆಹಿಟ್ಟು ಇತ್ಯಾದಿಗಳಿಗೆ ಬೆರೆಸಿ ದೋಸೆ ತಯಾರಿಸಬಹುದು.
ಪೌಷ್ಟಿಕತೆ ಹೆಚ್ಚಿಸಲು : ನೇರ ಬಿಸಿ ಹಾಲು ಬೆರೆಸಿ ಸವಿದರೆ ತುಸು ಹಸಕಲು ಎನಿಸಬಹುದು, ಬದಲಿಗೆ ತುಸು ಹುರಿದು, ಸಣ್ಣಗೆ ಹೆಚ್ಚಿದ ಹಣ್ಣುಗಳನ್ನು ಈ ಮಿಶ್ರಣಕ್ಕೆ ಬೆರೆಸಿರಿ. ಇದರ ಮೇಲೆ ಸೀಡ್ಲೆಸ್‌ ದಾಳಿಂಬೆ ಹರಳು ಉದುರಿಸಿ. ಸಕ್ಕರೆ ಬದಲಿಗೆ ಜೇನು ಬಳಸಿರಿ. ಜೇನುಹಣ್ಣುಗಳು ಬೆರೆತ ಈ ಮಿಶ್ರಣ ಕಬ್ಬಿಣಾಂಶದಿಂದ ಸಮೃದ್ಧ ಎನಿಸುತ್ತದೆ.
ಓಟ್ಸಿನಿಂದ ದೋಸೆ, ಪ್ಯಾನ್‌ ಕೇಕ್‌, ಇಢ್ಲಿ : ನಿಮ್ಮ ಬಳಿ ಹಿಂದಿನ ದಿನದ ದೋಸೆ, ಇಡ್ಲಿ ಯಾವುದರ ಮಿಶ್ರಣ ತುಸು ಉಳಿದಿದ್ದರೂ ಅದಕ್ಕೆ ಹುರಿದ ಓಟ್ಸ್ ಬೆರೆಸಿ ಪುನಃ ಪ್ಯಾನ್‌ ಕೇಕ್‌, ಇಡ್ಲಿ, ದೋಸೆ, ಪಡ್ಡು ಇತ್ಯಾದಿ ತಯಾರಿಸಬಹುದು. ಈ ಎಲ್ಲಾ ಮಿಶ್ರಣಗಳಿಗೂ ಹುರಿದು, ಆರಿಸಿ, ತರಿ ಮಾಡಿದ ಓಟ್ಸ್ ಬೆರೆಸಿರಿ. ಬೆಳಗಿನ ತಿಂಡಿಗೆ ಇದು ಬೇಕೆನಿಸಿದರೆ ಹಿಂದಿನ ದಿನದ ಮಿಶ್ರಣಕ್ಕೆ ಓಟ್ಸ್ ಪುಡಿ ಜೊತೆ ಅಕ್ಕಿಹಿಟ್ಟು, ಕಡಲೆಹಿಟ್ಟು, ಹುರಿದ ರವೆ ಇತ್ಯಾದಿ ಸೇರಿಸಿಕೊಂಡರೆ ಧಾರಾಳ ಆಯಿತು. ಇದರಿಂದ ಬೆಳಗಿನ ಸ್ವಾದಿಷ್ಟ, ಪೌಷ್ಟಿಕ ಬ್ರೇಕ್‌ ಫಾಸ್ಟ್, ರೆಡಿ. ರೆಡಿ ಟು ಕುಕ್‌ ಉಪ್ಪಿಟ್ಟಿಗಾಗಿ ಅದಕ್ಕೂ ಸಹ ಓಟ್ಸ್ ಪುಡಿ, ಸಣ್ಣಗೆ ಹೆಚ್ಚಿದ ಕ್ಯಾಪ್ಸಿಕಂ, ಕ್ಯಾರೆಟ್‌, ಈರುಳ್ಳಿ ಇತ್ಯಾದಿ ಸೇರಿಸಿ. ಇದರಿಂದ ಉಪ್ಪಿಟ್ಟು ಸಾಕಷ್ಟು ಪೌಷ್ಟಿಕ ಆಗುತ್ತದೆ. ಇದೇ ತರಹ ಮಸಾಲಾ ಓಟ್ಸ್ ಕೊಂಡಾಗ, ಅದಕ್ಕೆ ತುರಿದ ಪನೀರ್‌ ಸೇರಿಸಿ ಪರೋಟಾದಲ್ಲಿ ಹೂರಣ ತುಂಬಿಸಿ, ರುಚಿಕರ, ಪೌಷ್ಟಿಕ ಪರೋಟ ತಯಾರಿಸಿ. ಮಕ್ಕಳಿಗೆ ತಿಳಿಯದೆಯೇ ಪೌಷ್ಟಿಕ ವ್ಯಂಜನ ಸವಿಯುತ್ತಾರೆ.
ಇತ್ತೀಚೆಗೆ ಓಟ್ಸ್ ಜೊತೆ ಕಾರ್ನ್‌ ಫ್ಲೇಕ್ಸ್, ಡ್ರೈಫ್ರೂಟ್ಸ್, ಚೋಕರ್‌ ಇತ್ಯಾದಿ ಬೆರೆತ ಮ್ಯೂಸಲಿ ಸಹ ಲಭ್ಯ. ಇದಕ್ಕೆ ಸಣ್ಣಗೆ ಹೆಚ್ಚಿದ ಸೇಬು, ದ್ರಾಕ್ಷಿ, ಸಪೋಟ, ಮಾವು ಇತ್ಯಾದಿ ಬೆರೆಸಿ ಮಕ್ಕಳಿಗೆ ಸವಿಯಲು ಕೊಡಿ.
ಕಾರ್ನ್‌ ಫ್ಲೇಕ್ಸ್ : ಇದು ಸಹ ರೆಡಿ ಟು ಈಟ್‌ ವರ್ಗಕ್ಕೆ ಸೇರುತ್ತದೆ. ಇದಕ್ಕೆ ಬಿಸಿ ಹಾಲಿನ ಜೊತೆ ಹೆಚ್ಚಿದ ಹಣ್ಣಿನ ಹೋಳು ಬೆರೆಸಿರಿ. ರುಚಿ, ಪೌಷ್ಟಿಕತೆ ಹೆಚ್ಚುತ್ತದೆ. ಕಿವುಚಿದ ಬಾಳೆಹಣ್ಣು, ಕಿತ್ತಳೆ ಕುಸುಮೆ, ದಾಳಿಂಬೆ, ಇತ್ಯಾದಿ ವೆರೈಟಿ ಮಾಡಿ. ಇದರಲ್ಲಿ ಧಾರಾಳ ಪೊಟ್ಯಾಶಿಯಂ, ಐರನ್‌, ವಿಟಮಿನ್‌ `ಸಿ’ ತುಂಬಿದ್ದು ಮಕ್ಕಳ ಇಮ್ಯೂನಿಟಿ ಹೆಚ್ಚಿಸಲು ಪೂರಕ.
ಕಾರ್ನ್‌ ಫ್ಲೇಕ್ಸ್ ಕೇವಲ ಸಿಹಿಗಾಗಿ ಮಾತ್ರ ಎಂದು ಭಾವಿಸದಿರಿ. ಕಟ್‌ ಲೆಟ್‌ ಸಿದ್ಧಪಡಿಸಿ ಅದರ ಮೇಲೆ ಕೋಟಿಂಗಿಗೆ ಸಹ ಬಳಸಬಹುದು. ಇದರ ಜೊತೆಗೆ ತುಸು ಹೆಚ್ಚಿದ ಈರುಳ್ಳಿ ಟೊಮೇಟೊ, ಕ್ಯಾಪ್ಸಿಕಂ, ಮೊಸರು, ಪುದೀನಾ ಚಟ್ನಿ ಬೆರೆಸಿ ಚಾಟ್ ಮಾಡಿಕೊಡಿ. ಭೇಲ್ ಪುರಿಗೆ ಸಹ ಸೇರಿಸಿ.
ಕ್ರಂಚಿ ಟೆಕ್ಸ್ ಚರ್‌ವುಳ್ಳ ಕಾರ್ನ್‌ ಫ್ಲೇಕ್ಸಿನಲ್ಲಿ ಸಕ್ಕರೆ, ಐರನ್‌, ವಿಟಮಿನ್‌, ಮಿನರಲ್ಸ್ ಅಡಗಿದ್ದು ಬೆಳೆಯುವ ಮಕ್ಕಳಿಗೆ ಹೆಚ್ಚು ಪೂರಕ. ಪೌಷ್ಟಿಕ ತಜ್ಞರು ಇದರಲ್ಲಿ ಧಾರಾಳ ಫೈಬರ್‌ ಅಡಗಿದೆ ಎನ್ನುತ್ತಾರೆ. ದಿನಕ್ಕೆ ಒಂದು ಸಲ ಮಾತ್ರ ಇಂಥದ್ದನ್ನು ಸೇವಿಸಬೇಕು, ಬರೀ ಇದನ್ನೇ ತಿನ್ನುತ್ತಾ ಇರಬಾರದು. ಏಕೆಂದರೆ ಇದರಲ್ಲಿನ ಸಕ್ಕರೆ ಅಂಶ ತೂಕ ಹೆಚ್ಚಿಸಿಬಿಡುತ್ತದೆ.
ಮ್ಯೂಸಲಿ : ಮಾರ್ಕೆಟ್‌ನಲ್ಲಿ ಇದರ ಹಲವು ಬಗೆಯ ಫ್ಲೇವರ್ಸ್‌ ಲಭ್ಯ. ಇದನ್ನು ಹಾಲಿಗೆ ಬೆರೆಸುವುದರ ಜೊತೆ ಎನರ್ಜಿ ಬಾರ್‌(ಚಿಕ್ಕಿ, ಕಡಲೆ ಮಿಠಾಯಿ ಇತ್ಯಾದಿ) ತಯಾರಿಸಲಿಕ್ಕೂ ಬಳಸಬಹುದು. ಯಾವುದೇ ಸಿಹಿ ತಿಂಡಿ ತಯಾರಿಸುವಾಗಲೂ ಮ್ಯೂಸಲಿ ಬೆರೆಸಿಕೊಳ್ಳಿ ರುಚಿ ಹೆಚ್ಚುತ್ತದೆ. ಇಂಥ ಚಿಕ್ಕಿ ತಯಾರಿಸುವಾಗ ಸಕ್ಕರೆ ಬದಲು ಬೆಲ್ಲ, ಜೇನು, ಪಾಮ್ ಶುಗರ್‌ ಬಳಸಿದರೆ ಕಬ್ಬಿಣಾಂಶ ಧಾರಾಳ ಸಿಗುತ್ತದೆ.
ಡೋಕ್ಲಾ ಮಿಕ್ಸ್ : ಈ ರೆಡಿಮೇಡ್ ಪ್ಯಾಕೆಟ್‌ ಮಾರ್ಕೆಟಿನಲ್ಲಿ ಸುಲಭವಾಗಿ ಸಿಗುತ್ತದೆ. ಇದರ ಪೌಷ್ಟಿಕತೆ ಹೆಚ್ಚಿಸಲು ಇದಕ್ಕೆ ಹೆಚ್ಚಿ ಬಾಡಿಸಿಕೊಂಡ ಎಲೆಕೋಸು, ಹೂಕೋಸು, ಕ್ಯಾರೆಟ್‌, ಕ್ಯಾಪ್ಸಿಕಂ ಇತ್ಯಾದಿಗಳನ್ನು ಬೆರೆಸಿ ಹಬೆಯಲ್ಲಿ ಬೇಯಿಸಿ ಇಡ್ಲಿ ತರಹ ಡೋಕ್ಲಾ ತಯಾರಿಸಿ.
ವಡೆ ಮಿಕ್ಸಿನಲ್ಲಿ ಬೇಳೆ ಇರುತ್ತದೆ, ಅದು ಪ್ರೋಟೀನಿನಿಂದ ಸಮೃದ್ಧ. ಬಯಸಿದ ಬೆಂದ ತರಕಾರಿ ಹೋಳಿನೊಂದಿಗೆ ಬೆಂದ ಆಲೂ ಸಹ ಮಸೆದು ಈ ಮಿಶ್ರಣಕ್ಕೆ ಬೆರೆಸಿ, ನುಚ್ಚಿನುಂಡೆ ತರಹ ಸಹ ಮಾಡಬಹುದು. ಸ್ಟೀಂ ಬೇಸ್ಡ್ ಆದರಿಂದ ಆರೋಗ್ಯಕ್ಕೆ ಒಳ್ಳೆಯದು. ಮಸೆದ ಆಲೂ ತರಕಾರಿ ಉಂಡೆ ಕಟ್ಟಿ, ವಡೆ ಮಿಕ್ಸಿನಲ್ಲಿ ಬೋಂಡ ತರಹ ಮಾಡಿ ಅದ್ದಿಕೊಂಡು ಡೀಪ್‌ ಫ್ರೈ ಮಾಡಿಯೂ ಕೊಡಿ.
ಯಾವುದೇ ವ್ಯಂಜನವನ್ನು ಅಧಿಕ ಸ್ವಾದಿಷ್ಟ, ಪೌಷ್ಟಿಕಗೊಳಿಸಲು ಅದಕ್ಕೆ ಬೆಂದ/ಹಸಿ ತರಕಾರಿ ಅಥವಾ ಹಣ್ಣಿನ ಹೋಳು ಬೆರೆಸಿ ಬಳಸಿರಿ, ಖಂಡಿತಾ ಲಾಭವಿದೆ. ಪೌಷ್ಟಿಕ ತಜ್ಞರು ಹೇಳುವಂತೆ, ಈ ರೀತಿ ರೆಡಿಮೇಡ್ ಲಭ್ಯವಿರುವ ಈಸಿ ಟು ಕುಕ್‌ ಮಿಶ್ರಣಗಳು 100% ಪೌಷ್ಟಿಕ ಆಗಿರುವುದಿಲ್ಲ. ಆದ್ದರಿಂದ ಮನೆಯಲ್ಲಿ ಇವಕ್ಕೆ ಸೊಪ್ಪು, ತರಕಾರಿ, ಹಣ್ಣು ಸೇರಿಸಿದಾಗ ಅದರ ಪೌಷ್ಟಿಕತೆ ಕೂಡಿಕೊಳ್ಳುತ್ತದೆ.
ಈ ಪದಾರ್ಥಗಳಲ್ಲಿ ದೀರ್ಘಕಾಲದ ಬಾಳಿಕೆಗಾಗಿ ಅಧಿಕ ಪ್ರಿಸರ್ವೇಟಿವ್ಸ್ ಬಳಸಿರುತ್ತಾರೆ. ಹೀಗಾಗಿ ನೇರ ಅನ್ನುವ ಬಳಸುವ ಬದಲು, ಮೇಲೆ ಹೇಳಿದಂತೆ ಬದಲಾಯಿಸಿ ಬಳಸಿರಿ. ಇಂಥವನ್ನು ವಾರಕ್ಕೆ 2-3 ಸಲ ಮಾತ್ರ ಬಳಸಿರಿ. ಹೇಗೂ ಮನೆಯಲ್ಲಿ ಬಗೆ ಬಗೆಯ ತಿಂಡಿ, ಅಡುಗೆ ರೆಡಿ ಆಗುತ್ತದೆ. ಅದರ ಜೊತೆ ರುಚಿಗಾಗಿ ನಡುನಡುವೆ ಇನ್ನೂ ಟ್ರೈ ಮಾಡಬಹುದು. ಉದಾ : ರವೆಯನ್ನು ಮೊದಲೇ ಹುರಿದು ಅದಕ್ಕೆ ಒಗ್ಗರಣೆ ಹಾಕಿಡಿ. ಹಾಗೇ ಬ್ರೋಕನ್‌ ವೀಟ್‌ ಶ್ಯಾವಿಗೆ ಇತ್ಯಾದಿಗಳ ಜೊತೆ ಇವನ್ನು ಬೆರೆಸಿಕೊಂಡು ಬಳಸುತ್ತಿರಿ.
– ನೀರಜಾ ಕುಮಾರ್‌
