“ಬೇಸಿಗೆಯ ದಿನಗಳ ಮಾತು. ನಮ್ಮ ಮನೆಯ ಬೋರ್‌ ವೆಲ್ ಕೆಟ್ಟುಹೋಗಿತ್ತು. ಅದು ದುರಸ್ತಿಯಾಗಲು ಇನ್ನು 3-4 ದಿನ ಬೇಕಿತ್ತು. ಹೀಗಾಗಿ ನಾವು ನೀರಿನ ಸಮಸ್ಯೆಯಿಂದ ಒದ್ದಾಡುತ್ತಿದ್ದೆವು. ಈ ಮಧ್ಯೆ ಊರಿನಿಂದ ನನ್ನ ಅತ್ತೆ ಮಾವ, ಮೈದುನ, ನಾದಿನಿ ನಮ್ಮ ಮನೆಗೆ ಬಂದರು. ಅವರನ್ನು ನೋಡಿ ನನಗೆ ಖುಷಿಯೇನೋ ಆಯಿತು. ಆದರೆ ನೀರಿನ ಕೊರತೆಯ ಸಂದರ್ಭದಲ್ಲಿ ಅವರ ಸ್ನಾನದ ವ್ಯವಸ್ಥೆ, ಬಟ್ಟೆ ಸ್ವಚ್ಛಗೊಳಿಸುವುದು ಹೇಗೆ ಎಂಬ ಚಿಂತೆ ನನ್ನನ್ನು ಕಾಡತೊಡಗಿತು.
“ಅದೇ ದಿನಗಳಲ್ಲಿ ಪಕ್ಕದ ಮನೆಯಾಕೆಗೂ ನನಗೂ ಯಾವುದೊ ವಿಷಯಕ್ಕೆ ಸಂಬಂಧಪಟ್ಟಂತೆ ವಿರಸ ಉಂಟಾಗಿ ಮಾತನಾಡುವುದನ್ನೇ ನಿಲ್ಲಿಸಿಬಿಟ್ಟಿದ್ದೆ. ಅತಿಥಿಗಳು ಮನೆಗೆ ಬಂದ ದಿನದಂದು ಸಂಜೆ ನಾನು ಗೇಟ್‌ ಹತ್ತಿರ ಅತ್ತಿತ್ತ ಸುತ್ತುತ್ತಲಿದ್ದೆ. ಅಷ್ಟರಲ್ಲಿ ನೆರೆಮನೆಯ ಕುಸುಮಾ ಗೇಟು ತೆಗೆದು ಒಳಗೆ ಬಂದು, “ನಿಮ್ಮ ಮನೆಗೆ ಅತಿಥಿಗಳು ಬಂದಿದ್ದಾರೆಯೇ?” ಎಂದು ಕೇಳಿದಳು.
ನಾನು ಮನಸ್ಸಿಲ್ಲದ ಮನಸ್ಸಿನಿಂದ “ಹೌದು” ಎಂದೆ. ಅವಳು ನನ್ನನ್ನು ತಮಾಷೆ ಮಾಡಲು ಬಂದಿರಬಹುದು ಎಂದು ಯೋಚಿಸಿದೆ. ಆದರೆ ಆಕೆ, “ನಿಮ್ಮ ಮನೆಯ ಬೋರ್‌ ವೆಲ್ ಕೆಟ್ಟಿದೆ, ಹೀಗಾಗಿ ನಿಮಗೆ ನೀರಿನ ಸಮಸ್ಯೆ ಆಗ್ತಿರಬಹುದು. ನೀವು ಒಂದು ಪೈಪ್‌ ತೆಗೆದುಕೊಂಡು ಬನ್ನಿ.
“ಅದರಿಂದ ನಮ್ಮ ಮನೆಯ ನಲ್ಲಿಯಿಂದ ನಿಮ್ಮ ಮನೆಯ ತನಕ ನೀರು ತಲುಪಿಸಲು ಸಾಧ್ಯವಾಗುತ್ತದೆ. ನಿಮ್ಮ ಬೋರ್‌ ವೆಲ್ ದುರಸ್ತಿಯ ಬಳಿಕ ಪೈಪ್‌ ತೆಗೆದುಬಿಡಿ,” ಎಂದು ಹೇಳಿದಾಗ, ನನಗೆ ಮಾತೇ ಹೊರಡಲಿಲ್ಲ,” ಇದು ಬೆಂಗಳೂರಿನ ಚಂದ್ರಿಕಾ ಅವರ ಮನದಾಳದ ಮಾತು.
“ನಾನು ಗಂಡನ ಜೊತೆ ಮೋಟಾರ್‌ ಸೈಕಲ್ ಮೇಲೆ ಹೊರಟಿದ್ದೆ. ಆಕಸ್ಮಿಕವಾಗಿ ಹಿಂದಿನಿಂದ ಬರುತ್ತಿದ್ದ ಬಸ್ಸೊಂದು ನಮ್ಮ ಬೈಕ್‌ ಗೆ ಗುದ್ದಿತು. ಆಗ ನಾವು ರಸ್ತೆಯ ಮೇಲೆ ಉರುಳಿಬಿದ್ದೆವು. ಇಬ್ಬರಿಗೂ ಸಾಕಷ್ಟು ಗಾಯಗಳಾದವು. ಜನರು ನಮ್ಮನ್ನು ತಕ್ಷಣವೇ ಆಸ್ಪತ್ರೆಗೆ ಸೇರಿಸಿ ಚಿಕಿತ್ಸೆ ಕೊಡಿಸಿದರು. ನಂತರ ನನ್ನ ತಮ್ಮ ಬಂದು ನಮ್ಮಿಬ್ಬರನ್ನು ಮನೆಗೆ ಕರೆತಂದುಬಿಟ್ಟ. ಆ ಬಳಿಕ ಗಾಯ ಹಾಗೂ ನೋವಿನಿಂದಾಗಿ ನನಗೆ 10 ದಿನಗಳ ಕಾಲ ಹಾಸಿಗೆಯಿಂದ ಮೇಲೇಳಾಗಲಿಲ್ಲ.
“ಈ ಅವಧಿಯಲ್ಲಿ ನನ್ನ ಪಕ್ಕದ ಫ್ಲ್ಯಾಟಿನ ಸುಮಂಗಲಾ ನಮ್ಮ ಮನೆಯ ಸಂಪೂರ್ಣ ಜವಾಬ್ದಾರಿ ತೆಗೆದುಕೊಂಡರು. ನನಗೆ ಅವರು ಯಾವುದೇ ಕೆಲಸ ಮಾಡಲು ಬಿಡಲಿಲ್ಲ,” ಎಂದು ಹೇಳುವಾಗ ಮೈಸೂರಿನ ಸುಚಿತ್ರಾ ಅವರ ಕಣ್ಣುಗಳು ಒದ್ದೆಯಾಗುತ್ತವೆ.
ನೆರೆಮನೆಯವರೇ ನೆರವಿಗೆ ಬರುತ್ತಾರೆ. ಅದರಲ್ಲೂ ನಮಗೆ ಕಷ್ಟಕಾಲದಲ್ಲಿ ಹೆಚ್ಚು ಸಹಾಯ ಮಾಡುತ್ತಾರೆ. ಮುಂಜಾನೆ 10 ಗಂಟೆಯಿಂದ ಸಂಜೆ 6 ಗಂಟೆಯತನಕ ಮನೆಯಲ್ಲಿ ಮಹಿಳೆಯರಷ್ಟೇ ಇರುತ್ತಾರೆ. ಆ ಸಮಯದಲ್ಲಿ ಏನಾದರೂ ತೊಂದರೆ ಉಂಟಾದರೆ ನೆರೆಮನೆ ಅಥವಾ ಫ್ಲ್ಯಾಟಿನ ಮಹಿಳೆಯರೇ ನಿಮ್ಮ ನೆರವಿಗೆ ಬರುತ್ತಾರೆ.
ನೆರೆಯವರ ಜೊತೆ ಉತ್ತಮ ಸಂಬಂಧ
ವಕೀಸೆ ಶರ್ಮಿಳಾ ಹೀಗೆ ಹೇಳುತ್ತಾರೆ, “ಕಳೆದ ವರ್ಷ ಒಂದು ದಿನ ನಾನು ಮನೆಯಲ್ಲಿ ಅಡುಗೆಯ ಸಿದ್ಧತೆ ಮಾಡಿಕೊಳ್ಳುತ್ತಿದ್ದಾಗ ಮಗನ ಶಾಲೆಯಿಂದ ನನಗೆ ಫೋನ್‌ ಬಂತು. ಮಗನ ಆರೋಗ್ಯ ಒಮ್ಮೆಲೆ ಹದಗೆಟ್ಟಿದೆ ಎಂದು ಅವನನ್ನು ಮನೆಗೆ ಕರೆದುಕೊಂಡು ಹೋಗಬೇಕೆಂದು ಹೇಳಿದರು. ಆಗ ನನಗೆ ಏನು ಮಾಡಬೇಕೆಂದು ತೋಚಲಿಲ್ಲ. ಗಂಡ ಆಫೀಸ್‌ ಕೆಲಸದ ನಿಮಿತ್ತ ಬೇರೆ ನಗರಕ್ಕೆ ಹೋಗಿದ್ದರು.
“ಆಗ ನಾನು ಪಕ್ಕದ ಮನೆಯ ರೋಹಿಣಿಯರಿಗೆ ಹೇಳಿದಾಗ ಅವರು ಹೆಚ್ಚೇನೂ ಮಾತನಾಡದೆ ತಮ್ಮ ಸ್ಕೂಟಿ ತೆಗೆದು ನನ್ನನ್ನು ಕರೆದುಕೊಂಡು ತಕ್ಷಣವೇ ಮಗನ ಸ್ಕೂಲಿಗೆ ಹೋದರು. ಅಲ್ಲಿಂದ ನನ್ನ ಮಗನನ್ನು ಡಾಕ್ಟರ್‌ ಹತ್ತಿರ ಕರೆದುಕೊಂಡು ಹೋಗಿ, ನಂತರ ನಮ್ಮ ಮನೆಯವರೆಗೂ ಕರೆದುಕೊಂಡು ಬಂದರು. ಆ ದಿನದಿಂದಲೇ ನನಗೆ ಪಕ್ಕದ ಮನೆಯವರ ಮಹತ್ವ ಎಷ್ಟೆಂಬುದು ಅರಿವಿಗೆ ಬಂತು,” ಎಂದು ಖುಷಿಯಿಂದ ಹೇಳುತ್ತಾರೆ. ಹೀಗಾಗಿ ಅಕ್ಕಪಕ್ಕದವರೊಂದಿಗೆ ಉತ್ತಮ ಸಂಬಂಧ ಇಟ್ಟುಕೊಳ್ಳಲು ಪ್ರಯತ್ನಿಸಿ. ಇಂದಿನ ಧಾವಂತದ ಜೀವನದಲ್ಲಿ ಹಾಗೂ ತಮ್ಮೊಳಗೆ ತಾವು ಇರುವ ಮಾನಸಿಕತೆಯಿಂದಾಗಿ ಪಕ್ಕದ ಮನೆಯವರೊಂದಿಗೆ ಸಂಬಂಧ ಇಟ್ಟುಕೊಳ್ಳುವುದು ಹಾಗೂ ಅದನ್ನು ಸರಿಯಾಗಿ ನಿಭಾಯಿಸಿಕೊಂಡು ಹೋಗುವ ಪರಿಪಾಠ ಹೆಚ್ಚು ಕಡಿಮೆ ನಿಂತೇ ಹೋಗಿದೆ ಎನ್ನಬಹುದು.
ಪಕ್ಕದ ಫ್ಲ್ಯಾಟಿನಲ್ಲಿ ಯಾರು ಇರುತ್ತಾರೆ ಎನ್ನುವುದು ಗೊತ್ತೇ ಇರುವುದಿಲ್ಲ ಹಾಗೂ ಅದನ್ನು ತಿಳಿದುಕೊಳ್ಳಲು ಪ್ರಯತ್ನ ಕೂಡ ಮಾಡುವುದಿಲ್ಲ. ಈಚೆಗೆ ಪಕ್ಕದ್ಮನೆಯವರನ್ನು ನೋಡಿದರೂ ನೋಡದಂತೆ ಇರುವ ಪ್ರವೃತ್ತಿ ಹೆಚ್ಚಾಗಿದೆ.
ಈ ಕುರಿತಂತೆ ಕೋಲಾರದ ಸೀಮಾ ಹೀಗೆ ಹೇಳುತ್ತಾರೆ, “ಒಂದು ದಿನ ನಾನು ಮನೆಯಲ್ಲಿಯೇ ಇದ್ದೆ. ಮನೆಯ ಎಲ್ಲರೂ ಯಾವುದೊ ಕೆಲಸದ ನಿಮಿತ್ತ ಹೊರಗಡೆ ಹೋಗಿದ್ದರು. ನನಗೆ ಸಾಧಾರಣ ಶೀತ ನೆಗಡಿ ಇತ್ತು. ಮಧ್ಯಾಹ್ನದ ಹೊತ್ತಿಗೆ ನನಗೆ ಚಳಿಯೆನ್ನಿಸತೊಡಗಿತು. ಸ್ವಲ್ಪ ಹೊತ್ತಿಗೆ ಜ್ವರ ಕಾಣಿಸಿಕೊಂಡಿತು. ನಾನು ಹಾಸಿಗೆಯ ಮೇಲೆ ಸುಸ್ತಾಗಿ ಬಿದ್ದುಕೊಂಡು ನರಳತೊಡಗಿದ್ದೆ.
“ಅಷ್ಟರಲ್ಲಿ ಹೊರಗಡೆ ಯಾರೋ ಬಾಗಿಲು ಬಡಿಯುತ್ತಿರುವ ಶಬ್ದ ಕೇಳಿ ಬಂತು. ನಾನು ಹೇಗೊ ಎದ್ದು ಬಾಗಿಲು ತೆರೆದೆ. ಎದುರಿಗೆ ಪಕ್ಕದ ಫ್ಲ್ಯಾಟಿನ ಸರೋಜಾ ನಿಂತಿದ್ದರು. `ಯಾರೋ ನರಳುತ್ತಿರುವ ಶಬ್ದ ಕೇಳಿ ನಾನು ನಿಮ್ಮ ಬಾಗಿಲು ಬಡಿದೆ,’ ಎಂದರು. ಅವರು ನನ್ನನ್ನು ತಕ್ಷಣವೇ ಆಸ್ಪತ್ರೆಗೆ ಕರೆದುಕೊಂಡು ಹೋಗಿ ಚಿಕಿತ್ಸೆ ಕೊಡಿಸಿದರು. ಆಸ್ಪತ್ರೆಯ ಬಿಲ್ ಸಹ ಕೊಟ್ಟರು. ಆಸ್ಪತ್ರೆಯಿಂದ ಮನೆಗೆ ಬಂದ ನಂತರ ತಮ್ಮ ಮನೆಯಿಂದ ಇಡ್ಲಿ ಕೂಡ ತಂದುಕೊಟ್ಟರು. ತಿಂದ ನಂತರ ಮಾತ್ರೆ ಕೊಟ್ಟರು. ರಾತ್ರಿ ಸಾಕಷ್ಟು ಹೊತ್ತಿನ ಬಳಿಕ ನನ್ನ ಜ್ವರ ಇಳಿದು ನಿರಾಳ ಎನಿಸಿತು. ನೆರೆಮನೆಯ ಸರೋಜಾ ಬಗ್ಗೆ ನನಗೆ ಹೆಮ್ಮೆಯೆನಿಸಿತು. ಅವರ ನೆರವಿನ ಗುಣ ನೋಡಿ ನಾನು ಭಾವುಕಳಾಗಿ ಹೋದೆ. ಕೆಲವು ತಿಂಗಳುಗಳ ಹಿಂದೆ ನಾನು ಅವರನ್ನು ನೋಡಿ ನಿರ್ಲಕ್ಷ್ಯ ಮಾಡುತ್ತಿದ್ದೆ. ಅವರಿಗೆ ಏನೇನೂ ಮಹತ್ವ ಕೊಡುತ್ತಿರಲಿಲ್ಲ. ಏಕೆಂದರೆ ಅವರು ಕಡಿಮೆ ಓದಿದವರಾಗಿದ್ದರು ಮತ್ತು ಸಾದಾಸೀದಾ ಜೀವನ ನಡೆಸುತ್ತಿದ್ದರು. ಹೀಗಿದ್ದಾಗ್ಯೂ ಕೂಡ ಅವರು ನನಗೆ ನೆರವು ನೀಡಿದರು. ಇಂತಹ ಜನರು ಸಿಗುವುದು ಬಹಳ ಕಡಿಮೆ.”
ಮನೋವಿಜ್ಞಾನಿ ಹೇಮಂತ್‌ ರಾವ್ ಅವರು ಹೀಗೆ ಹೇಳುತ್ತಾರೆ, “ಅಕ್ಕಪಕ್ಕದವರೊಂದಿಗೆ ಒಳ್ಳೆಯ ಸಂಬಂಧ ಹೊಂದುವುದು ಅತ್ಯವಶ್ಯ. ಯಾರಿಗೆ, ಯಾವಾಗ, ಯಾವ ರೀತಿಯ ನೆರವು ಬೇಕಾಗುತ್ತೊ ಹೇಳಲಿಕ್ಕಾಗದು. ಪರಸ್ಪರ ಒಳ್ಳೆಯ ಸಂಬಂಧವೇ ಕಷ್ಟಕಾಲದಲ್ಲಿ ನೆರವಿಗೆ ಬರುತ್ತದೆ. ಇಂದಿನ ಭೌತಿಕ ಯುಗದಲ್ಲಿ ಸಂಬಂಧಗಳ ಮಹತ್ವ ತೀರಾ ಕಡಿಮೆಯಾಗಿದೆ. ಜನರು ವ್ಯಾವಹಾರಿಕ ಸಂಬಂಧಗಳಿಂದ ದೂರ ಸಾಗಿ, ವೃತ್ತಿಪರ ಸಂಬಂಧಗಳನ್ನು ಮಧುರಗೊಳಿಸಲು ಒತ್ತು ಕೊಡಲಾಗುತ್ತಿದೆ.”
– ಜ್ಯೋತಿ ಪ್ರಕಾಶ್‌
ಈ ಸಂಗತಿಗಳನ್ನೊಮ್ಮೆ ಗಮನಿಸಿ
ಪಕ್ಕದ ಮನೆ ಅಥವಾ ಫ್ಲ್ಯಾಟಿನವರೊಂದಿಗೆ ಸ್ನೇಹ ಸಂಬಂಧ ಇಟ್ಟುಕೊಳ್ಳಿ.
ಪಕ್ಕದ್ಮನೆಯವರ ಲ್ಯಾಂಡ್‌ ಲೈನ್‌ ಅಥವಾ ಮೊಬೈಲ್ ನಂಬರನ್ನು ಅವಶ್ಯವಾಗಿ ಇಟ್ಟುಕೊಳ್ಳಿ.
ಬಿಡುವಿದ್ದಾಗ ನೆರೆಮನೆಯವರನ್ನು ಭೇಟಿಯಾಗಿ ಕೆಲವು ಸಹಜ ಮಾತುಗಳನ್ನು ಆಡಿ.
ಖುಷಿ ಅಥವಾ ದುಃಖದ ಸಂದರ್ಭದಲ್ಲಿ ಪಕ್ಕದಮನೆಗೆ ಹೋಗಲು ಸಮಯ ಹೊಂದಿಸಿಕೊಳ್ಳಿ.
ನೀವು ಹೋಗುವಾಗ, ಬರುವಾಗ ಪಕ್ಕದಮನೆಯವರು ಎದುರಿಗೆ ಕಂಡುಬಂದರೆ ಹಾಯ್‌, ಹಲೋ ಅವಶ್ಯವಾಗಿ ಹೇಳಿ. ಅವರ ಯೋಗಕ್ಷೇಮ ವಿಚಾರಿಸಿ.
ನೆರೆಮನೆಯವರ ಜೀವನಮಟ್ಟ ನೋಡಿ ಸಂಬಂಧ ಬೆಳೆಸಬೇಡಿ.
ನಿಮಗಿಂತ ಕೆಳಗಿನ ಜೀವನಮಟ್ಟ ನಡೆಸುವವರನ್ನು ಹೇಯ ದೃಷ್ಟಿಯಿಂದ ನೋಡಬೇಡಿ ಹಾಗೂ ಅವರನ್ನು ಕಡೆಗಣಿಸಬೇಡಿ.
ಒಂದು ಜೀವಕ್ಕೆ ಅಪಾಯವುಂಟಾಗಬಹುದು ಎಂಬಂತಹ ಸ್ಥಿತಿಯಲ್ಲಿ ಮಾತ್ರ ಬೇರೆಯವರ ಕಾರನ್ನು ಕೇಳಿ. ಮೋಜು ಮಜಕ್ಕಾಗಿ ಕಾರು ಕೇಳುವುದು ತಪ್ಪು.
ಪಕ್ಕದ ಮನೆಯವರಿಂದ ಹಣ ಕೈಗಡ ತೆಗೆದುಕೊಂಡಿದ್ದರೆ, ಅದನ್ನು ಸಕಾಲಕ್ಕೆ ವಾಪಸ್‌ ಮಾಡಿ ಧನ್ಯವಾದ ತಿಳಿಸಿ.
ನೀವು ಎಲ್ಲಿಯಾದರೂ ಪ್ರವಾಸಕ್ಕೆ ಹೊರಟಿದ್ದರೆ ಪಕ್ಕದ ಮನೆಯವರಿಗೆ ಅವಶ್ಯವಾಗಿ ತಿಳಿಸಿ.
