ಸಿಹಿಗುಂಬಳದ ಬರ್ಫಿ
ಸಾಮಗ್ರಿ : 500 ಗ್ರಾಂ ಸಿಹಿಗುಂಬಳ (ಕೇಸರಿ ಬಣ್ಣದ್ದು), ರುಚಿಗೆ ತಕ್ಕಷ್ಟು ಸಕ್ಕರೆ, ಖೋವಾ, ತುಪ್ಪ, ಕೋಕೋ ಪೌಡರ್‌, ಫ್ರೆಶ್‌ ಕ್ರೀಂ, 1-2 ಹನಿ ವೆನಿಲಾ ಎಸೆನ್ಸ್, ಅಲಂಕರಿಸಲು ಬಾದಾಮಿ ಚೂರು.
ವಿಧಾನ : ಕುಂಬಳಕಾಯಿ ಶುಚಿಗೊಳಿಸಿ, ದೊಡ್ಡ ಹೋಳಾಗಿಸಿ ಸಿಪ್ಪೆ ಹೆರೆದಿಡಿ. ನಂತರ ಬಾಣಲೆಯಲ್ಲಿ ತುಸು ತುಪ್ಪ ಬಿಸಿ ಮಾಡಿ, ಇದರ ಸಣ್ಣ ಹೋಳುಗಳನ್ನು ಅದರಲ್ಲಿ ಘಮ್ಮೆನ್ನುವಂತೆ ಬಾಡಿಸಿ. 15 ನಿಮಿಷಗಳ ನಂತರ ಇದಕ್ಕೆ ಸಕ್ಕರೆ ಹಾಕಿ, ಪೂರ್ತಿ ತೇಲಾಂಶ ಹಿಂಗಿಸಿ. ನಂತರ ಇದಕ್ಕೆ ತುರಿದ ಖೋವಾ ಬೆರೆಸಿ ಕೆದಕಬೇಕು. 2 ನಿಮಿಷ ಬಿಟ್ಟು ಕೆಳಗಿಳಿಸಿ. ತುಪ್ಪ ಸವರಿದ ತಟ್ಟೆಗೆ ಇದನ್ನು ಹರಡಿ ಸಮನಾಗಿಸಿ. ಒಂದು ಚಿಕ್ಕ ಬಾಣಲೆಯಲ್ಲಿ ತುಸು ಖೋವಾ ಬಾಡಿಸಿ, ಅದಕ್ಕೆ ತುಸು ಸಕ್ಕರೆ, ಕೋಕೋ ಬೆರೆಸಿ ಕೈಯಾಡಿಸಿ. ಇದಕ್ಕೆ ಕ್ರೀಂ ಬೆರೆಸಿ ಸಕ್ಕರೆ ಕರಗುವಂತೆ ಕೆದಕಿ ಕೆಳಗಿಳಿಸಿ. ಇದನ್ನು ಜಮೆಗೊಂಡ ಬರ್ಫಿ ಮೇಲೆ ಹರಡಿ, ತುಸು ಆರಿದ ನಂತರ ಚಿತ್ರದಲ್ಲಿರುವಂತೆ ಕತ್ತರಿಸಿ, ಬಾದಾಮಿಯಿಂದ ಅಲಂಕರಿಸಿ.
ಮಲಾಯಿ ಲಡ್ಡು
ಸಾಮಗ್ರಿ : ಅರ್ಧ ಲೀ. ಕೆನೆಭರಿತ ಗಟ್ಟಿ ಹಾಲು, 100 ಗ್ರಾಂ ಪನೀರ್‌, ಅರ್ಧರ್ಧ ಕಪ್ ಕ್ರೀಂ-ಸಕ್ಕರೆ, ತುಸು ಏಲಕ್ಕಿ ಪುಡಿ.
ವಿಧಾನ : ಬಾಣಲೆಯಲ್ಲಿ ಹಾಲು ಕಾಯಿಸಿ, ಅರ್ಧ ಹಿಂಗುವವರೆಗೆ ಮಂದ ಉರಿಯಲ್ಲಿ ಕುದಿಸಬೇಕು. ಇದಕ್ಕೆ ಸಕ್ಕರೆ ಬೆರೆಸಿ ಚೆನ್ನಾಗಿ ಕರಗುವಂತೆ ಕದಡಿಕೊಳ್ಳಿ. ನಂತರ ಇದಕ್ಕೆ ತುಪ್ಪದಲ್ಲಿ ಹುರಿದ ಪನೀರ್‌ ಚೂರು, ಫ್ರೆಶ್‌ ಕ್ರೀಂ, ಏಲಕ್ಕಿ ಪುಡಿ ಸೇರಿಸಿ ಮತ್ತಷ್ಟು ಕೆದಕಬೇಕು. ಇದು ಸಾಕಷ್ಟು ಗಟ್ಟಿ ಆಗುವವರೆಗೂ ಮಂದ ಉರಿಯಲ್ಲಿ ಹೀಗೇ ಕೈಯಾಡಿಸುತ್ತಿರಿ. ಕೆಳಗಿಳಿಸಿದ ನಂತರ ಚೆನ್ನಾಗಿ ಆರಿದ ಮೇಲೆ, ಲಡ್ಡು ಉಂಡೆ ಕಟ್ಟಬೇಕು. ಚಿತ್ರದಲ್ಲಿರುವಂತೆ ಅಲಂಕರಿಸಿ, ಅತಿಥಿಗಳು ಬಂದಾಗ ಸವಿಯಲು ಕೊಡಿ.
ಬನಾನಾ ಸ್ಲೈಸ್‌
ಸಾಮಗ್ರಿ : ಚೆನ್ನಾಗಿ ಮಾಗಿದ 2 ಚುಕ್ಕೆ ಬಾಳೆಹಣ್ಣು, 9-10 ಗ್ಲೂಕೋಸ್‌ ಬಿಸ್ಕತ್ತು, 2-2 ಚಮಚ ಫ್ರೆಶ್‌ ಕ್ರೀಂ, ಹಾಲಿನ ಗಟ್ಟಿ ಕೆನೆ, ಕಾಲು ಲೀ. ಗಟ್ಟಿ ಕೆನೆಭರಿತ ಹಾಲು, 1 ಚಮಚ ಕಾರ್ನ್‌ ಪೌಡರ್‌, 4-5 ಚಮಚ ಪುಡಿಸಕ್ಕರೆ, ಕಾಯಿತುರಿ, ತುಸು ಏಲಕ್ಕಿ ಪುಡಿ.
ವಿಧಾನ : ಮೊದಲು ಬಿಸ್ಕತ್ತನ್ನು ಮಿಕ್ಸಿಯಲ್ಲಿ ಪುಡಿ ಮಾಡಿ. ಇದಕ್ಕೆ ಹಾಲಿನ ಕೆನೆ ಬೆರೆಸಿ ಮತ್ತೆ ಚಲಾಯಿಸಿ. ಮೋಲ್ಡ್ ಗೆ ಇದರ ಒಂದು ಪದರ ಬರಲಿ. ಬಾಣಲೆಯಲ್ಲಿ ಮೊದಲು ಹಾಲು ಕಾಯಿಸಿ ಅದು ಕಾದಾಗ, ಮಂದ ಉರಿಯಲ್ಲಿ ಅರ್ಧದಷ್ಟು ಹಿಂಗುವವರೆಗೂ ಕುದಿಸಬೇಕು. ನಂತರ ಇದಕ್ಕೆ ಫ್ರೆಶ್‌ ಕ್ರೀಂ, ಕಾಯಿತುರಿ, ಕಾರ್ನ್‌ ಪೌಡರ್‌ ಹಾಕಿ ಕೆದಕಬೇಕು. ಇದು ಸಾಕಷ್ಟು ಗಟ್ಟಿಯಾದಾಗ ಕೆಳಗೆ ಇಳಿಸಿ. ಒಂದು ತಟ್ಟೆಯಲ್ಲಿ ಬಿಸ್ಕತ್ತಿನ ಪುಡಿ ಹರಡಿ, ಅದರ ಮೇಲೆ ಈ ಮಿಶ್ರಣದ ಪದರ ಬರುವಂತೆ ಮಾಡಿ. ಇದನ್ನು ಫ್ರಿಜ್‌ ನಲ್ಲಿರಿಸಿ ಸೆಟ್‌ ಮಾಡಿ. ಫ್ರಿಜ್‌ ನಿಂದ ಹೊರತೆಗೆದ ನಂತರ, ಚಿತ್ರದಲ್ಲಿರುವೆತೆ ಬಾಳೆ ಬಿಲ್ಲೆಗಳಿಂದ ಅಲಂಕರಿಸಿ, ಏಲಕ್ಕಿ ಉದುರಿಸಿ, ಕೂಲ್ ಮಾಡಿ, ಸವಿಯಲು ಕೊಡಿ.
ಟೊಮೇಟೊ ಬರ್ಫಿ
ಸಾಮಗ್ರಿ : 2-3 ಚಮಚ ತುಪ್ಪ, 3-4 ಮಾಗಿದ ಸಿಹಿ ಟೊಮೇಟೊ, ಅರ್ಧ ಕಪ್ ಸಿಹಿ ಖೋವಾ, ಅರ್ಧ ಕಪ್ ಕೆನೆಭರಿತ ಗಟ್ಟಿ ಹಾಲು, 3 ಸಣ್ಣ ಚಮಚ ಕಾರ್ನ್‌ ಪೌಡರ್‌, ಅರ್ಧ ಕಪ್ ಪುಡಿ ಸಕ್ಕರೆ, ಅಲಂಕರಿಸಲು ಒಂದಿಷ್ಟು ಡ್ರೈ ಫ್ರೂಟ್ಸ್.
ವಿಧಾನ : ಟೊಮೇಟೊ ಶುಚಿಗೊಳಿಸಿ, ಹೆಚ್ಚಿ ಮಿಕ್ಸಿಯಲ್ಲಿ ಪೇಸ್ಟ್ ಮಾಡಿ. ಬಾಣಲೆಯಲ್ಲಿ ತುಪ್ಪ ಬಿಸಿ ಮಾಡಿ, ಅದಕ್ಕೆ ಟೊಮೇಟೊ ಹಾಕಿ ಮಂದ ಉರಿಯಲ್ಲಿ ಕೆದಕಬೇಕು. ಕಾದಾರಿದ ಹಾಲಿಗೆ ಕಾರ್ನ್‌ ಪೌಡರ್‌ ಹಾಕಿ ಕದಡಿ, ಅದನ್ನು ಈ ಮಿಶ್ರಣಕ್ಕೆ ಬೆರೆಸಿ, ಸಕ್ಕರೆ, ಖೋವಾ ಹಾಕಿ ಕೆದಕಬೇಕು. ಕೆಳಗಿಳಿಸಿದ ನಂತರ ಸಿಲಿಕಾನ್‌ ಮೋಲ್ಡ್ ಗಳಲ್ಲಿ ತುಂಬಿಸಿ, ಫ್ರಿಜ್‌ ನಲ್ಲಿಟ್ಟು ಸೆಟ್‌ ಮಾಡಿ. ಚಿತ್ರದಲ್ಲಿರುವಂತೆ ಅಲಂಕರಿಸಿ ಸವಿಯಲು ಕೊಡಿ.
ಕಾಟೇಜ್‌ ಚೀಸ್‌ ಮೂಸ್
ಸಾಮಗ್ರಿ : 100 ಗ್ರಾಂ ತಾಜಾ ಪನೀರ್‌, 3-4 ಚಮಚ ಪುಡಿ ಸಕ್ಕರೆ, ಫ್ರೆಶ್‌ ಕ್ರೀಂ, 2 ಸಣ್ಣ ಚಮಚ ಡ್ರಿಂಕಿಂಗ್‌ ಚಾಕಲೇಟ್, 3-4 ಚಮಚ ಕಂಡೆನ್ಸ್ಡ್ ಮಿಲ್ಕ್.
ವಿಧಾನ : ಒಂದು ಬಟ್ಟಲಿಗೆ ತುರಿದ ಪನೀರ್‌, ಸಕ್ಕರೆ, ಕಂಡೆನ್ಸ್ಡ್ ಮಿಲ್ಕ್, ಕ್ರೀಂ ಬೆರೆಸಿ ಚೆನ್ನಾಗಿ ಗೊಟಾಯಿಸಿ. ಈ ಮಿಶ್ರಣವನ್ನು 2 ಭಾಗ ಮಾಡಿ. ಒಂದು ಭಾಗಕ್ಕೆ ಡ್ರಿಂಕಿಂಗ್‌ ಚಾಕಲೇಟ್ ಬೆರೆಸಿ ಮತ್ತೆ ಗೊಟಾಯಿಸಿ. 1 ದೊಡ್ಡ ಗ್ಲಾಸಿಗೆ ಮೊದಲು ಚಾಕಲೇಟ್ ರಹಿತ ಮಿಶ್ರಣ ಸುರಿಯಿರಿ, ಅದರ ಮೇಲೆ ಚಾಕಲೇಟ್ ಸಹಿತ ಮಿಶ್ರಣ ಬೆರೆಸಿಕೊಳ್ಳಿ. ನಂತರ ನಟ್ಸ್, ಚಾಕಲೇಟ್ ನಿಂದ ಗಾರ್ನಿಶ್‌ ಮಾಡಿ ಸವಿಯಿರಿ.
ಕಡಲೆಪುರಿ ಉಂಡೆ
ಸಾಮಗ್ರಿ : 2 ಕಪ್ ಕಡಲೆಪುರಿ, 4 ಚಮಚ ತುಪ್ಪ, ಒಂದಿಷ್ಟು ದ್ರಾಕ್ಷಿ, ಗೋಡಂಬಿ, ಬಾದಾಮಿ, ಪಿಸ್ತಾ ಚೂರು (ಒಟ್ಟಾಗಿ ಅರ್ಧ ಕಪ್), 1 ಕಪ್ ತುರಿದ ಬೆಲ್ಲ, ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸು, ಜೀರಿಗೆ, ಸೋಂಪು, ಕೊಬ್ಬರಿ ತುರಿ, ಏಲಕ್ಕಿ ಪುಡಿ.
ವಿಧಾನ : ಒಂದು ಬಾಣಲೆಯಲ್ಲಿ ತುಸು ತುಪ್ಪ ಬಿಸಿ ಮಾಡಿ, ಮಂದ ಉರಿಯಲ್ಲಿ ಕಡಲೆಪುರಿ ಹಾಕಿ, ಗರಿ ಗರಿ ಆಗುವಂತೆ ಹುರಿಯಿರಿ. ನಂತರ ಇದನ್ನು ಒಂದು ದೊಡ್ಡ ತಟ್ಟೆಗೆ ಹರಡಿರಿ. ಅದೇ ಬಾಣಲೆಯಲ್ಲಿ ಉಳಿದ ತುಪ್ಪ ಬಿಸಿ ಮಾಡಿ, ಬೆಲ್ಲ ಹಾಕಿ ಮಂದ ಉರಿಯಲ್ಲಿ ಕೆದಕುತ್ತಾ, ಬೆಲ್ಲ ಕರಗುವಂತೆ ಮಾಡಿ. ನಂತರ ಇದಕ್ಕೆ ಉಪ್ಪು, ಮಸಾಲೆ ಸಾಮಗ್ರಿ ಹಾಕಿ ಕೆದಕಬೇಕು. ನಂತರ ಕೊಬ್ಬರಿ, ಡ್ರೈ ಫ್ರೂಟ್ಸ್ ಹಾಕಿ ಕೈಯಾಡಿಸಿ. ಕೊನೆಯಲ್ಲಿ ಕಡಲೆಪುರಿ ಹಾಕಿ ಎಲ್ಲ ಚೆನ್ನಾಗಿ ಬೆರೆತುಕೊಳ್ಳುವಂತೆ ಮಾಡಿ. ನಡುನಡುವೆ ತುಪ್ಪ ಬೆರೆಸುತ್ತಿರಿ. ಕೆಳಗಿಳಿಸಿ ತುಸು ಆರಿದ ನಂತರ, ತುಪ್ಪ ಸವರಿದ ಕೈಗಳಿಂದ ಉಂಡೆ ಕಟ್ಟಿರಿ. ಗಾಳಿಯಾಡದ ಡಬ್ಬಕ್ಕೆ ತುಂಬಿಸಿ ಬೇಕಾದಾಗ ಸವಿಯಿರಿ.
ಗೋಧಿ ಬಿಸ್ಕತ್ತು
ಸಾಮಗ್ರಿ : 1 ಕಪ್ ಗೋಧಿಹಿಟ್ಟು, ಅರ್ಧರ್ಧ ಕಪ್ ಸಣ್ಣ ರವೆ, ತುಪ್ಪ, ಬೂರಾ ಸಕ್ಕರೆ, ಒಂದಿಷ್ಟು ಬಾದಾಮಿ ಚೂರು, ಚಿಟಕಿ ಉಪ್ಪು, ಬೇಕಿಂಗ್‌ ಪೌಡರ್‌.
ವಿಧಾನ : ಒಂದು ಬಟ್ಟಲಿಗೆ ತುಪ್ಪ ಹಾಕಿ ಚಮಚದಿಂದ ಕದಡಿರಿ. ಇದಕ್ಕೆ ಬೂರಾ ಸಕ್ಕರೆ ಬೆರೆಸಿ ಚೆನ್ನಾಗಿ ಬೀಟ್‌ ಮಾಡಿಕೊಳ್ಳಿ. ಫ್ಲಫಿ ಆಗಲಿ. ನಂತರ ಇದಕ್ಕೆ ಗೋಧಿಹಿಟ್ಟು, ರವೆ, ಏಲಕ್ಕಿ, ಬೇಕಿಂಗ್‌ ಪೌಡರ್‌ ಬೆರೆಸಿ ಪೂರಿ ಹಿಟ್ಟಿನಂತೆ ಮೃದುವಾದ ಮಿಶ್ರಣ ಕಲಸಿಡಿ. ತುಪ್ಪ ಹಾಕಿ ಚೆನ್ನಾಗಿ ನಾದಿಕೊಂಡು, ಸಮಾನ ಗಾತ್ರದ ಉಂಡೆಗಳಾಗಿಸಿ. ನಂತರ ಬೇಕಿಂಗ್‌ ಟ್ರೇನಲ್ಲಿ ಬಟರ್‌ ಪೇಪರ್ ಹರಡಿ, ಅದರಲ್ಲಿ ಈ ಸಣ್ಣ ಉಂಡೆಗಳನ್ನಿರಿಸಿ, ಸಪಾಟಾಗುವಂತೆ (ಚಿತ್ರ ನೋಡಿ) ಒತ್ತಿಕೊಳ್ಳಿ. ನಂತರ ಬಾದಾಮಿ ಚೂರು ಇರಿಸಿ ತುಸು ಒಳಕ್ಕೆ ಒತ್ತಿಕೊಳ್ಳಿ. ಮೊದಲೇ ಪ್ರೀಹೀಟ್‌ ಮಾಡಿದ ಓವನ್‌ ನಲ್ಲಿ ಇದನ್ನು 180 ಡಿಗ್ರಿ ಶಾಖದಲ್ಲಿ 15-20 ನಿಮಿಷ ಹದನಾಗಿ ಬೇಕ್‌ ಮಾಡಿ. ಹೊರತೆಗೆದು ಕೂಲ್ ಮಾಡಿ, ಗಾಳಿಯಾಡದ ಡಬ್ಬಕ್ಕೆ ತುಂಬಿಸಿ, ಬೇಕಾದಾಗ ಸವಿಯಿರಿ.
ಅಂಜೂರ ಖರ್ಜೂರದ ಸುರುಳಿ
ಮೂಲ ಸಾಮಗ್ರಿ : 2 ಚಮಚ ತುಪ್ಪ, ಅರ್ಧ ಕಪ್ ಹಸಿ ಖರ್ಜೂರದ ಪೇಸ್ಟ್, 1 ಕಪ್ ಅಂಜೂರದ ಪೇಸ್ಟ್.
ಹೂರಣದ ಸಾಮಗ್ರಿ : ಒಂದಿಷ್ಟು ಅಖರೋಟ್‌, ಬಾದಾಮಿ, ಪಿಸ್ತಾ, ಗೋಡಂಬಿ ಚೂರು (ಒಟ್ಟಾರೆ 1 ಕಪ್), 6-7 ಅಂಜೂರದ ಬಿಲ್ಲೆ, ಹಾಲಲ್ಲಿ ನೆನೆದ 10-12 ಎಸಳು ಕೇಸರಿ, 3-4 ಚಮಚ ಗೋಡಂಬಿ ಪುಡಿ, ತುಸು ಹುರಿದ ಅರ್ಧ ಕಪ್ ಗಸಗಸೆ.
ವಿಧಾನ : ಒಂದು ಬಾಣಲೆಯಲ್ಲಿ ತುಪ್ಪ ಬಿಸಿ ಮಾಡಿ. ಇದಕ್ಕೆ ಖರ್ಜೂರ, ಅಂಜೂರದ ಪೇಸ್ಟ್ ಹಾಕಿ ಮಂದ ಉರಿಯಲ್ಲಿ ಕೆದಕಬೇಕು. ಸಾಕಷ್ಟು ಗಟ್ಟಿಯಾದಾಗ ಕೆಳಗಿಳಿಸಿ ಒಂದು ಬಟ್ಟಲಿಗೆ ಹಾಕಿಡಿ. ಗಾಳಿಗೆ ತಾನಾಗಿ ಆರಲಿ. ನಂತರ ಇದನ್ನು ಒಂದು ಅಗಲ ತಟ್ಟೆಯಲ್ಲಿ ಫ್ಲಾಟ್‌ ಆಗಿ ತಟ್ಟಿರಿ. ಇದಕ್ಕೆ ಹೂರಣದ ಎಲ್ಲಾ ಸಾಮಗ್ರಿ ಮಿಶ್ರ ಮಾಡಿ ಹಾಕಿರಿ. ಇದನ್ನು ಉದ್ದದ ಸುರುಳಿ ಆಗಿ ತಿರುಚಿರಿ. ಇದನ್ನು ಗಸಗಸೆಯಲ್ಲಿ ಚೆನ್ನಾಗಿ ಹೊರಳಿಸಿ, 15 ನಿಮಿಷ ಹಾಗೇ ಬಿಡಿ. ನಂತರ ಚಿತ್ರದಲ್ಲಿರುವಂತೆ ನೀಟಾಗಿ ಕತ್ತರಿಸಿ, ಅಲಂಕರಿಸಿ, ಅತಿಥಿಗಳಿಗೆ ನೀಡಿ.
ಕಲಾಕಂದ್
ಸಾಮಗ್ರಿ : ಅರ್ಧ ಲೀ ಗಟ್ಟಿ ಹಾಲು, 400 ಗ್ರಾಂ ತುರಿದ ಪನೀರ್‌, ಅರ್ಧ ಸೌಟು ತುಪ್ಪ, ಒಂದಿಷ್ಟು ಗೋಡಂಬಿ, ಬಾದಾಮಿ, ಪಿಸ್ತಾ ತುಂಡು, ಅರ್ಧ ಕಪ್ ಕಂಡೆನ್ಸ್ಡ್ ಮಿಲ್ಕ್, ತುಸು ಏಲಕ್ಕಿ ಪುಡಿ, ಹಾಲಲ್ಲಿ ನೆನೆದ ಕೇಸರಿ, ಚಿಟಕಿ ಉಪ್ಪು.
ವಿಧಾನ : ಮೊದಲು ಒಂದು ಬಾಣಲೆಯಲ್ಲಿ ಹಾಲು ಕಾಯಿಸಿ. ಅದು ಅರ್ಧದಷ್ಟು ಹಿಂಗುವಂತೆ ಮಂದ ಉರಿಯಲ್ಲಿ ಕುದಿಸಬೇಕು. ನಂತರ ಪನೀರ್‌ ಹಾಕಿ ಕೆದುಕುತ್ತಾ ಪೂರ್ತಿ ಹಿಂಗುವಂತೆ ಮಾಡಿ. ನಂತರ ಇದಕ್ಕೆ ತುಪ್ಪದಲ್ಲಿ ಹುರಿದ ಡ್ರೈ ಫ್ರೂಟ್ಸ್ ಚೂರು ಹಾಕಿ ಕೆದಕಬೇಕು. ಆಮೇಲೆ ಕಂಡೆನ್ಸ್ಡ್ ಮಿಲ್ಕ್, ಏಲಕ್ಕಿ, ಕೇಸರಿ ಬೆರೆಸಿ ಇಡೀ ಮಿಶ್ರಣ ಗಟ್ಟಿ ಆಗುವವರೆಗೂ ಕೆದಕಬೇಕು. ಕೊನೆಯಲ್ಲಿ ಉಪ್ಪು ಸೇರಿಸಿ ಕೈಯಾಡಿಸಿ ಕೆಳಗಿಳಿಸಿ. ನಂತರ ಒಂದು ಅಗಲದ ಟ್ರೇಗೆ ತುಪ್ಪ ಸವರಿ ಅದರಲ್ಲಿ ಈ ಮಿಶ್ರಣ ಹರಡಿರಿ. ಇದು ಗಾಳಿಯಲ್ಲಿ ತಂತಾನೇ ಆರುತ್ತದೆ. ನಂತರ ಇದನ್ನು 30-40 ನಿಮಿಷ ಫ್ರಿಜ್‌ ನಲ್ಲಿರಿಸಿ ಸೆಟ್‌ ಆಗಲು ಬಿಡಿ. ನಂತರ ಹೊರತೆಗೆದು, ಚೌಕಾಕಾರವಾಗಿ ಕತ್ತರಿಸಿ, ಸಿಲ್ವರ್‌ ಫಾಯಿಲ್ ಅಂಟಿಸಿ ಗುಲಾಬಿ ದಳಗಳಿಂದ ಅಲಂಕರಿಸಿ, ಸವಿಯಲು ಕೊಡಿ.
