ನ್ಯೂ ಇಯರ್‌ ಪಾರ್ಟಿಗಾಗಿ ಫ್ರೂಟ್ಸ್ ಕೇಕ್

ಎಗ್ ಲೆಸ್ ಕೇಕ್‌

ಸಾಮಗ್ರಿ : 2 ಕಪ್‌ ಮೈದಾ, ಹಾಲಿನ ಪುಡಿ 1 ಕಪ್‌, ಹಾಲು 1 ಕಪ್‌,  ಬೆಣ್ಣೆ ಅಥವಾ ತುಪ್ಪ ಒಂದೂ ಕಾಲು ಕಪ್‌, ಸಕ್ಕರೆ 1 ಕಪ್‌, ಚಿಟಕಿ ಉಪ್ಪು, ಅರ್ಧ ಚಮಚ ಬೇಕಿಂಗ್‌ ಪೌಡರ್‌, ಅಡುಗೆ ಸೋಡಾ ಕಾಲು ಚಮಚ, ವೆನಿಲ್ ಎಸೆನ್ಸ್ ಅರ್ಧ ಚಮಚ.

ವಿಧಾನ : ಮೈದಾ, ಉಪ್ಪು, ಬೇಕಿಂಗ್‌ ಪೌಡರ್‌, ಅಡುಗೆ ಸೋಡಾ ಎಲ್ಲವನ್ನೂ ಒಟ್ಟಿಗೆ ಜರಡಿಯಾಡಿಕೊಳ್ಳಿ. ಹಾಲನ್ನು ಕುದಿಸಿ ಆರಲು ಬಿಡಿ. ಇದಕ್ಕೆ ಹಾಲಿನ ಪುಡಿ ಹಾಕಿ ಬೆಣ್ಣೆ ಹಾಗೂ ಸಕ್ಕರೆ ಪುಡಿ ಹಾಕಿ ಚೆನ್ನಾಗಿ ಕಲಸಿ. ಈ ಮಿಶ್ರಣವನ್ನು ಮೈದಾ ಮಿಶ್ರಣ ಮತ್ತು ವೆನಿಲಾ ಎಸೆನ್ಸ್ ಹಾಕಿ ಚೆನ್ನಾಗಿ ಗೊಟಾಯಿಸಿ. ಈ ಹಿಟ್ಟನ್ನು ಒಂದು ಅಲ್ಯೂಮಿನಿಯಂ ಪಾತ್ರೆಗೆ ಜಿಡ್ಡು ಸವರಿ ಸ್ವಲ್ಪ ಮೈದಾಹಿಟ್ಟನ್ನು ಉದುರಿಸಿಕೊಂಡು ಅದರ ಮೇಲೆ ಈ ಹಿಟ್ಟನ್ನು ಹಾಕಿ, ಆ ಬಟ್ಟಲನ್ನು ಕುಕ್ಕರಿನಲ್ಲಿ ಇಟ್ಟು ಮುಚ್ಚಳ ಮುಚ್ಚಿ. ವಿಷಲ್ ಹಾಕಬೇಡಿ. ಹಾಗೆ ಹಬೆಯಲ್ಲಿ 20 ನಿಮಿಷ ಮೀಡಿಯಂ ಫ್ಲೇಮ್ ನಲ್ಲಿ ಬೇಯಿಸಿ. ನಂತರ ಇನ್ನೂ 10 ನಿಮಿಷ ಕಡಿಮೆ ಉರಿಯಲ್ಲಿ ಬೇಯಿಸಿ. ಆರಿದ ಮೇಲೆ ಪ್ಲೇಟ್‌ ಗೆ ಹಾಕಿ ಘಮಘಮಿಸುವ ಎಗ್‌ ಲೆಸ್‌ ಕೇಕ್‌ ರೆಡಿ. ಓವನ್‌ ನಲ್ಲಿ ಸಹ ಮಾಡಬಹುದು.

ಪೈನಾಪಲ್ ಕೇಕ್‌

ಸಾಮಗ್ರಿ : 1 ಕಪ್‌ ಮೈದಾ, 2 ಕಪ್‌ ಪೈನಾಪಲ್ ಹೋಳು, 1 ಕಪ್‌ ಹಾಲು, 1 ಕಪ್‌ ಸಕ್ಕರೆ, 1 ಸ್ಪೂನ್‌ ಬೇಕಿಂಗ್‌ಪೌಡರ್‌, 250 ಎಂ.ಎಲ್. ನೀರು, ಚಿಟಕಿ ಅಡುಗೆ ಸೋಡಾ, ಸ್ವಲ್ಪ ಬಾದಾಮಿ ಚೂರು, 1 ಕಪ್‌ ವೆಜಿಟೆಬಲ್‌ ಎಣ್ಣೆ, 2 ಮೊಟ್ಟೆ, ಚಿಟಕಿ ಉಪ್ಪು, 1 ಕಪ್‌ ಹಾಲಿನ ಪುಡಿ.

ವಿಧಾನ : ಮೈದಾ, ಸೋಡಾ, ಬೇಕಿಂಗ್‌ ಪೌಡರ್‌, ಉಪ್ಪು ಸೇರಿಸಿ ಜರಡಿಯಾಡಿಕೊಳ್ಳಿ. ಮೊಟ್ಟೆಯನ್ನು ಚೆನ್ನಾಗಿ  ಬೀಟ್‌ಮಾಡಿಕೊಳ್ಳಿ. ಅದಕ್ಕೆ ಜರಡಿ ಹಿಡಿದ ಮೈದಾ, ಹಾಲಿನ ಪುಡಿ ಹಾಕಿ ಚೆನ್ನಾಗಿ ಎರಡು ನಿಮಿಷ ಕಲಸಿ. ಆನಂತರ ಹಾಲನ್ನು ಕುದಿಸಿ, ಆರಿಸಿ ಅದಕ್ಕೆ ಬೆಣ್ಣೆ, ಸಕ್ಕರೆ ಪುಡಿ ಹಾಕಿ ಚೆನ್ನಾಗಿ ಕಲಸಿ. ಇದಕ್ಕೆ ಮೈದಾ ಮಿಶ್ರಣ ಹಾಕಿ ಚೆನ್ನಾಗಿ ಗೊಟಾಯಿಸಿ. ಇದಕ್ಕೆ ಪೈನಾಪಲ್ ಚೂರುಗಳನ್ನು ಹಾಕಿ ಒಟ್ಟಾಗಿ ಕಲಸಿಕೊಂಡು ಅಲ್ಯೂಮಿನಿಯಂ ಪಾತ್ರೆಗೆ ಜಿಡ್ಡು ಸವರಿ, ಸ್ವಲ್ಪ ಮೈದಾ ಹಿಟ್ಟನ್ನು ಸುತ್ತಲೂ ಉದುರಿಸಿ ಕಲಸಿದ ಮೈದಾ ಹಿಟ್ಟನ್ನು ಹಾಕಿ ಮೇಲೆ ಬಾದಾಮಿ ಚೂರನ್ನು ಲಘುವಾಗಿ ಒತ್ತಿ. ಓವನ್‌ ನಲ್ಲಿ 30 ನಿಮಿಷ ಬೇಕ್‌ ಮಾಡಿ. ಆರಿದ ಮೇಲೆ ಸರ್ವಿಂಗ್‌ ಪ್ಲೇಟ್‌ ನಲ್ಲಿ ಇಡಿ. ರುಚಿಕರವಾದ ಪೈನಾಪಲ್ ಕೇಕ್‌ ರೆಡಿ.

 ಆ್ಯಪಲ್ ಕೇಕ್‌

ಸಾಮಗ್ರಿ : 1 ಕಪ್‌ ಮೈದಾ,  2 ಮೊಟ್ಟೆ, ಅರ್ಧ ಕಪ್‌ ಬೆಣ್ಣೆ, 1 ಚಮಚ ನಿಂಬೆ ಜೂಸ್‌, ಅರ್ಧ ಚಮಚ ಬೇಕಿಂಗ್‌ ಪೌಡರ್‌, 2 ಸೇಬು, 2 ಚಮಚ ವೆನಿಲಾ ಎಸೆನ್ಸ್, ಅರ್ಧ ಕಪ್‌ ಹಾಲು.

ವಿಧಾನ : ಮೈದಾ, ಬೇಕಿಂಗ್‌ ಪೌಡರ್‌ ಜರಡಿಯಾಡಿ. ಮೊಟ್ಟೆ ಬೀಟ್‌ ಮಾಡಿ ಅದಕ್ಕೆ ನಿಂಬೆ ರಸ ಸೇರಿಸಿ ಪಕ್ಕಕ್ಕಿಡಿ. ಬೆಣ್ಣೆ, ಸಕ್ಕರೆ. ವೆನಿಲಾ ಎಸೆನ್ಸ್, ಹಾಲು ಹಾಕಿ ಎರಡು ನಿಮಿಷ ಚೆನ್ನಾಗಿ ಕೈಯಾಡಿಸಿ. ಸೇಬನ್ನು ಕಟ್‌ ಮಾಡಿ ಬೀಜ ತೆಗೆದು ತೆಳುವಾಗಿ ಕತ್ತರಿಸಿ. ಮೈದಾ, ಮೊಟ್ಟೆ, ಬೆಣ್ಣೆ ಮಿಶ್ರಣಗಳೆಲ್ಲವನ್ನೂ ಮಿಕ್ಸ್ ಮಾಡಿ ಜಿಡ್ಡು ಸವರಿದ ಆಲ್ಯುಮಿನಿಯಂ ಪಾತ್ರೆಗೆ ಹಾಕಿ, ಅದರ ಮೇಲೆ ಕತ್ತರಿಸಿದ ಸೇಬಿನ ತೆಳು ಹೋಳುಗಳನ್ನು ಸುತ್ತಲೂ ಆಕರ್ಷಕವಾಗಿ ಅಲಂಕರಿಸಿ. ಅದನ್ನು ಓವನ್‌ ನಲ್ಲಿಟ್ಟು 375 ಡಿಗ್ರಿ ಫ್ಯಾರನ್‌ ಹೀಟ್‌ ನಲ್ಲಿ 40 ನಿಮಿಷ ಬೇಕ್‌ ಮಾಡಿ. ಸ್ವಾದಿಷ್ಟವಾದ ಆ್ಯಪಲ್ ಕೇಕ್ ಸವಿಯಲು ರೆಡಿ.

ಡ್ರೈ ಫ್ರೂಟ್‌ ಕೇಕ್‌

ಸಾಮಗ್ರಿ : 200 ಗ್ರಾಂ ಮೈದಾ, 100 ಗ್ರಾಂ ಬೆಣ್ಣೆ, 1-1 ಚಮಚ ಬೇಕಿಂಗ್‌ ಪೌಡರ್‌, ಅಡುಗೆ ಸೋಡಾ, 100 ಗ್ರಾಂ ಸಕ್ಕರೆ,  2 ಮೊಟ್ಟೆ, 1 ಕಪ್‌ ನಷ್ಟು ಬಾದಾಮಿ, ಗೋಡಂಬಿ, ದ್ರಾಕ್ಷಿ, ಪಿಸ್ತಾ, ಚೆರ್ರಿ ಫ್ರೂಟ್ಸ್ , 1 ಕಪ್‌ ನೀರು.

ವಿಧಾನ : ಒಂದು ಪಾತ್ರೆಗೆ ಸಕ್ಕರೆ ಹಾಕಿ ಸಣ್ಣ ಉರಿಯಲ್ಲಿಟ್ಟು ಕರಗಿಸಿ. ಅದು ಕಂದು ಬಣ್ಣಕ್ಕೆ ಬಂದಾಗ ನೀರು ಹಾಕಿ ಕ್ಯಾರಮಲ್ ಸಿರಪ್‌ ಮಾಡಿ. ಬೆಣ್ಣೆಯನ್ನು ಕರಗಿಸಿ ತಣ್ಣಗೆ ಮಾಡಿ, ಅದಕ್ಕೆ ಬೀಟ್‌ ಮಾಡಿದ ಮೊಟ್ಟೆಯನ್ನು ಹಾಕಿ ಚೆನ್ನಾಗಿ ಗೊಟಾಯಿಸಿ. ಅದಕ್ಕೆ ಮೈದಾ, ಬೇಕಿಂಗ್‌ ಪೌಡರ್‌, ಸೋಡಾ ಸೇರಿಸಿ ಜರಡಿಯಾಡಿ, ಇದಕ್ಕೆ ಕ್ಯಾರಮಲ್ ಶುಗರ್‌, ಬೆಣ್ಣೆ, ಮೊಟ್ಟೆ  ಮಿಶ್ರಣ, ಕತ್ತರಿಸಿದ ಡ್ರೈ ಫ್ರೂಟ್ಸ್ ನ್ನು ಸೇರಿಸಿ ಚೆನ್ನಾಗಿ ಗೊಟಾಯಿಸಿ. ಜಿಡ್ಡು ಸವರಿದ ಪ್ಯಾನಿಗೆ ಹಾಕಿ ಮೇಲೆ ಬಾದಾಮಿ, ಗೋಡಂಬಿ ಚೂರುಗಳನ್ನು ಹಾಕಿ ಒತ್ತಿ. ಓವನ್‌ ನಲ್ಲಿ 45 ನಿಮಿಷ ಬೇಕ್‌ ಮಾಡಿ. ಈ ರುಚಿಕರವಾದ  ಡ್ರೈ ಫ್ರೂಟ್ಸ್ ಕೇಕ್‌ ಮಕ್ಕಳಿಗೆ ಬಲು ಇಷ್ಟ.

ಬನಾನಾ ಚಾಕಲೇಟ್‌ ಕೇಕ್‌

ಸಾಮಗ್ರಿ : 2 ಬಟ್ಟಲು ಮೈದಾ, 1 ಚಮಚ ಬೇಕಿಂಗ್‌ ಪೌಡರ್‌,  ಕಾಲು ಚಮಚ ಅಡುಗೆ ಸೋಡಾ, 1 ಚಮಚ ವೆನಿಲಾ ಎಸೆನ್ಸ್, 1 ಕಪ್‌ ಗುಂಡಾಗಿ ಕತ್ತರಿಸಿದ ಬಾಳೆಹಣ್ಣು, 3 ಕರಗಿಸಿದ ಚಾಕಲೇಟ್‌.

ಕ್ರೀಮ್ ಗೆ ಸಾಮಗ್ರಿ : 250 ಗ್ರಾಂ ಕ್ರೀಮ್, ಅರ್ಧ ಕಪ್‌ ಪುಡಿ ಮಾಡಿದ ಸಕ್ಕರೆ, 1 ಚಮಚ ವೆನಿಲಾ ಎಸೆನ್ಸ.

ವಿಧಾನ : ಮೈದಾ, ಬೇಕಿಂಗ್‌ ಪೌಡರ್‌, ಅಡುಗೆ ಸೋಡಾ ಜರಡಿಯಾಡಿ. ಪುಡಿ ಸಕ್ಕರೆ, ಬೆಣ್ಣೆ, ಬೀಟ್‌ ಮಾಡಿದ ಮೊಟ್ಟೆ ಎಲ್ಲವನ್ನೂ ಸೇರಿಸಿ. ನಂತರ ಮೈದಾ ಮಿಶ್ರಣ, ಹಿಸುಕಿದ ಬಾಳೆಹಣ್ಣು, ವೆನಿಲಾ ಎಸೆನ್ಸ್, ಕರಗಿಸಿದ ಚಾಕಲೇಟ್‌ ಎಲ್ಲವನ್ನೂ ಹಾಕಿ ಚೆನ್ನಾಗಿ ಮೂರು ನಿಮಿಷ ಗೊಟಾಯಿಸಿ.

ಕ್ರೀಮ್, ಸಕ್ಕರೆ ಪುಡಿ, ವೆನಿಲಾ ಎಸೆನ್ಸ್ ಈ ಮೂರನ್ನು ಮಿಕ್ಸಿಯಲ್ಲಿ ಮೀಡಿಯಂ ಸ್ಪೀಡ್‌ ನಲ್ಲಿ ರುಬ್ಬಿಟ್ಟುಕೊಳ್ಳಿ. ಈಗ ಕ್ರೀಮ್ ರೆಡಿ.

ಚಾಕಲೇಟ್‌ ನ್ನು ಮೂರು ಭಾಗ ಮಾಡಿ. ಜಿಡ್ಡು ಸವರಿದ ಬ್ಯಾನ್‌ ಗೆ 1 ಭಾಗ ಹಾಕಿ, ಅದರ ಮೇಲೆ ಕ್ರೀಮ್ ಸರಿ, ಬಾಳೆಹಣ್ಣಿನ ತುಂಡುಗಳನ್ನು ಜೋಡಿಸಿ. ನಂತರ ಅದರ ಮೇಲೆ ಮೈದಾ ಚಾಕಲೇಟ್‌ಇಟ್ಟು ಮೇಲೆ ಕ್ರೀಮ್ ಹಾಕಿ. ಬಾಳೆಹಣ್ಣಿನ ತುಂಡುಗಳನ್ನು ಇಡಿ. ಈ ರೀತಿ ಒಂದರ ಮೇಲೆ ಒಂದರಂತೆ ಮೂರು ಪದರಗಳನ್ನು ಮಾಡಿ. ಮೇಲೆ ಕ್ರೀಮ್ ಸವರಿ ಬಾಳೆಹಣ್ಣಿನ ತುಂಡುಗಳನ್ನು ಅಲಂಕರಿಸಿ. ಓವನ್‌ ನಲ್ಲಿ 30 ನಿಮಿಷ ಬೇಕ್‌ ಮಾಡಿ. ನಂತರ ತಣ್ಣಗಾಗಲು ಬಿಡಿ, ತಟ್ಟೆಗೆ ಹಾಕಿ. ಈಗ ರುಚಿಕರವಾದ ಬಾಳೆಹಣ್ಣಿನ ಚಾಕಲೇಟ್‌ ಕೇಕ್‌ ರೆಡಿ.

– ರಾಜೇಶ್ವರಿ ವಿಶ್ವನಾಥ್‌