ʼಕೂಲಿʼ ಚಿತ್ರದ ಟ್ರೇಲರ್ ಅನಾವರಣ

– ರಾಘವೇಂದ್ರ ಅಡಿಗ ಎಚ್ಚೆನ್.

ಸೂಪರ್‌ ಸ್ಟಾರ್‌ ರಜನಿಕಾಂತ್‌ (Rajinikanth) ತಮಿಳು ಮಾತ್ರವಲ್ಲ ದೇಶ-ವಿದೇಶದಲ್ಲೂ ಲಕ್ಷಾಂತರ ಅಭಿಮಾನಿಗಳನ್ನು ಹೊಂದಿದ್ದಾರೆ. ಬೆಂಗಳೂರಿನಲ್ಲಿ ಕಂಡಕ್ಟರ್‌ ಆಗಿ ವೃತ್ತಿ ಜೀವನ ಆರಂಭಿಸಿ ಬಳಿಕ ಸ್ಟೈಲಿಶ್‌ ಸ್ಟಾರ್‌ ಆಗಿ ಬೆಳೆದಿರುವ ರೀತಿಯೇ ಅದ್ಭುತ. ಈ ಸಿನಿ ಜರ್ನಿ ಅವರದೇ ಚಿತ್ರಗಳಲ್ಲಿ ಬರುವ ಸನ್ನಿವೇಶದಂತೆ ರೋಚಕವಾದುದು. ಅತೀ ಹೆಚ್ಚು ಸಂಭಾವನೆ ಪಡೆಯುವ ಭಾರತೀಯ ನಟರಲ್ಲಿ ರಜನಿಕಾಂತ್‌ ಹೆಸರು ಮುಂಚೂಣಿಯಲ್ಲಿ ನಿಲ್ಲುತ್ತದೆ. ಈ 74ರ ಇಳಿ ವಯಸ್ಸಿನಲ್ಲಿಯೂ ಅದೇ ಚಾರ್ಮ್‌ ಉಳಿಸಿಕೊಂಡಿರುವ ಅವರು ಬಹು ಬೇಡಿಕೆಯ ನಟರೂ ಹೌದು. ಸಿನಿಮಾಕ್ಕಾಗಿ ಕೋಟಿ ಕೋಟಿ ರೂ. ಸಂಭಾವನೆ ಪಡೆಯುವ ಅವರು ಒಂದು ಕಾಲದಲ್ಲಿ ಕೂಲಿ ಕೆಲಸ ಮಾಡುತ್ತಿದ್ದರು ಎಂದರೆ ನಂಬುತ್ತೀರಾ? ಹೌದು, ಆಗ ಅವರ ಸಂಬಳ 2 ರೂ. ಆಗಿತ್ತಂತೆ. ಈ ವಿಚಾರವನ್ನು ಸ್ವತಃ ಅವರೇ ಹಂಚಿಕೊಂಡಿದ್ದಾರೆ.
ಈ ವರ್ಷದ ಬಹು ನಿರೀಕ್ಷಿತ ಚಿತ್ರ ʼಕೂಲಿʼ (Coolie). ರಜನಿಕಾಂತ್‌ ಮತ್ತು ಕಾಲಿವುಡ್‌ನಲ್ಲಿ ಸಂಚಲನ ಸೃಷ್ಟಿಸಿರುವ ನಿರ್ದೇಶಕ ಲೋಕೇಶ್‌ ಕನಗರಾಜ್‌ ಮೊದಲ ಬಾರಿಗೆ ಒಂದಾಗುತ್ತಿರುವ ಈ ಸಿನಿಮಾ ರಿಲೀಸ್‌ಗೆ ರೆಡಿಯಾಗಿದೆ. ಆಗಸ್ಟ್‌ 14ರಂದು ಬಿಡುಗಡೆಯಾಗಲಿರುವ ಈ ಚಿತ್ರ ಈಗಾಗಲೇ ಕುತೂಹಲ ಕೆರಳಿಸಿದೆ. ಪ್ರಚಾರಕ್ಕೆ ಇಳಿದಿರುವ ಚಿತ್ರತಂಡ ಆಗಸ್ಟ್‌ 2ರಂದು ಚೆನ್ನೈಯಲ್ಲಿ ಟ್ರೈಲರ್‌ ರಿಲೀಸ್‌ ಮಾಡಿದೆ. ಈ ಕಾರ್ಯಕ್ರಮದಲ್ಲಿ ಹಾಜರಿದ್ದ ರಜನಿಕಾಂತ್‌ ಸಿನಿಮಾ ಕ್ಷೇತ್ರಕ್ಕೆ ಬರುವ ಮುನ್ನ ತಾವು ಎದುರಿಸಿದ ಸಾವಾಲಿನ ದಿನಗಳನ್ನು ವಿವರಿಸಿದ್ದಾರೆ.
ತಾವು ಚಿತ್ರರಂಗದಲ್ಲಿ ಮಿಂಚುವ ಮೊದಲು ಕೂಲಿಯಾಗಿ ಕೆಲಸ ಮಾಡಿದ ದಿನಗಳನ್ನು ಅವರು ಮೆಲುಕು ಹಾಕಿಕೊಂಡಿದ್ದಾರೆ. ಅದರಲ್ಲೂ ಮೊದಲ ಬಾರಿ ತಾವು ಕಣ್ಣೀರು ಹಾಕಿದ ಆ ಘಟನೆಯನ್ನು ವಿವರಿಸಿದ್ದಾರೆ.
ʼʼಕಾಲೇಜು ಮುಗಿಸಿ ಕೆಲಸ ಇಲ್ಲದೆ ಓಡಾಡಿಕೊಂಡಿದ್ದ ಸಮಯದಲ್ಲಿ ಕೆಲವರು ಮೂದಲಿಸುತ್ತಿದ್ದರು. ನಾನು ಕೂಲಿಯಾಗಿ ಕೆಲಸ ಮಾಡುತ್ತಿದ್ದಾಗ ಅನೇಕ ಬಾರಿ ನನ್ನನ್ನು ರೇಗಿಸಲಾಗಿತ್ತು. ಒಂದು ದಿನ ಒಬ್ಬ ವ್ಯಕ್ತಿ ತನ್ನ ಲಗೇಜ್‌ ಅನ್ನು ಟೆಂಪೋಗೆ ತುಂಬಲು ಸೂಚಿಸಿದ್ದ. ಇದಕ್ಕಾಗಿ ನನಗೆ 2 ರೂ. ಕೊಟ್ಟ. ಆತನ ಧ್ವನಿ ನನಗೆ ಪರಿಚಿತವೆನಿಸಿತು. ಬಳಿಕ ಆತ ನನ್ನ ಕಾಲೇಜು ಸಹಪಾಠಿ ಎನ್ನುವುದು ಅರಿವಿಗೆ ಬಂತು. ಕೊನೆಯಲ್ಲಿ ಆತ ಅವತ್ತು ನಿನಗಿದ್ದ ಅಹಂಕಾರ ಅಷ್ಟಿಷ್ಟಲ್ಲ. ನಿನಗೆ ಆ ಕಾಲೇಜು ದಿನಗಳು ನೆನಪಿದ್ಯಾ? ಎಂದು ಹೇಳಿ ಅಣಕಿಸಿದ್ದ. ಆ ದಿನ ನಾನು ಮೊದಲ ಬಾರಿಗೆ ಅತ್ತಿದ್ದೆʼʼ ಎಂದು ರಜನಿಕಾಂತ್‌ ಅಂದಿನ ದಿನಗಳನ್ನು ನೆನಪಿಸಿಕೊಂಡು ಭಾವುಕರಾಗಿದ್ದಾರೆ.
ಇದರ ಜತೆಗೆ ರಜನಿಕಾಂತ್‌ ನಿರ್ದೇಶಕ ಲೋಕೇಶ್‌ ಕನಗರಾಜ್‌ ಪ್ರತಿಭೆಗೆ ಮೆಚ್ಚುಗೆ ಸೂಚಿಸಿದ್ದಾರೆ. ʼಕೂಲಿʼ ಚಿತ್ರದ ನಿಜವಾದ ನಾಯಕ ಲೋಕೇಶ್‌ ಎಂದು ಬಣ್ಣಿಸಿದ್ದಾರೆ. ಬಹುತಾರಾಗಣದ ʼಕೂಲಿʼ ಚಿತ್ರದಲ್ಲಿ ನಾಗಾರ್ಜುನ್‌, ರಿಯಲ್‌ ಸ್ಟಾರ್‌ ಉಪೇಂದ್ರ, ರಚಿತಾ ರಾಮ್‌, ಸತ್ಯರಾಜ್‌, ಶ್ರುತಿ ಹಾಸನ್‌, ಸೌಬಿನ್‌ ಶಹಿರ್‌ ಮತ್ತಿತರರು ನಟಿಸಿದ್ದಾರೆ. ಬಾಲಿವುಡ್‌ ಸೂಪರ್‌ ಸ್ಟಾರ್‌ ಆಮೀರ್‌ ಖಾನ್‌ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.