ಸೀನ : ನನ್ನ ಹೆಂಡತಿಗೆ ಸಂಗೀತದ ಬಗ್ಗೆ ಬಹಳಷ್ಟು ತಿಳಿವಳಿಕೆ ಇದೆ. ಆದರೆ ಹಾಡಲು ಹೋಗುವುದಿಲ್ಲ.
ವೆಂಕ : ಬಹಳ ಪುಣ್ಯ ಮಾಡಿದ್ದೀಯಪ್ಪ ನೀನು. ನನ್ನ ಹೆಂಡತಿಗೆ ಸಂಗೀತದ ಗಂಧಗಾಳಿಯೂ ಗೊತ್ತಿಲ್ಲ. ಆದರೂ ಕರ್ಣಕಠೋರವಾಗಿ ಹಾಡ್ತಾನೇ ಇರ್ತಾಳಪ್ಪ…..!
ಪತಿ ಬಹಳ ಪ್ರೀತಿಯಿಂದ ತನ್ನ ಪತಿಯನ್ನು ರಮಿಸುತ್ತಾ ಹೇಳಿದಳು, “ಡಿಯರ್‌, ನಾವಿಬ್ಬರೂ ಪ್ರತಿ ಜನ್ಮದಲ್ಲೂ ಹೀಗೇ ಪರಸ್ಪರ ಭೇಟಿಯಾಗುತ್ತಾ ಒಂದಾಗಿ, ಹೀಗೆ ಪ್ರೀತಿ ಮಾಡುತ್ತಿರೋಣ…..”
ಪತಿ ದೀರ್ಘ ನಿಟ್ಟುಸಿರು ಬಿಡುತ್ತಾ, “ಅದೆಲ್ಲ ಸರಿ ಬಿಡು. ನೀನು ಈ ಜನ್ಮದಲ್ಲಿ ನೀನು ನನ್ನನ್ನು ಬಿಟ್ಟರೆ ತಾನೇ ನಾವು ಮುಂದಿನ ಜನ್ಮದಲ್ಲಿ ಮತ್ತೆ ಭೇಟಿ ಆಗಲು ಸಾಧ್ಯ…..?”
ಗಂಡನ ಸೂಕ್ಷ್ಮವಾದ ಮಾತುಗಳನ್ನು ಪಳಗಿದ ಹೆಂಡತಿ ಹೇಗೆ ಅರ್ಥ ಮಾಡಿಕೊಳ್ಳುತ್ತಾಳೆ ಎಂಬುದಕ್ಕೆ ಇಲ್ಲಿದೆ ನೋಡಿ ಸ್ಯಾಂಪಲ್ :
ಮಹೇಶ್‌ : ಡಾರ್ಲಿಂಗ್‌…. ಸಂಜೆ ಹೊತ್ತು, ಮಳೆ ಜೋರಾಗಿ ಬರ್ತಿದೆ, ಮತ್ತೆ ವಾತಾವರಣ ಬಹಳ ತಂಪಾಗಿದೆ. ಮತ್ತೆ……
ಸರಳಾ : ಈಗ ಇಲ್ಲದ್ದನ್ನೆಲ್ಲ ಯೋಚಿಸಬೇಡಿ. ಮನೆಯಲ್ಲಿ ಮೊದಲೇ ಕಡಲೆಹಿಟ್ಟಿಲ್ಲ, ಈರುಳ್ಳಿ ಬೆಲೆ ನೋಡಿದ್ರೆ ಗಗನಕ್ಕೇರಿದೆ. ಇವತ್ತು ಕೆಲಸದ ನಿಂಗಿ ಚಕ್ಕರ್‌, ನಾನೇ ರಾಶಿ ಪಾತ್ರೆ ಉಜ್ಬೇಕು!
ಮಹೇಶ : ಸರಿ ಬಿಡು, ಮತ್ತೆ……
ಸರಳಾ : ಗೊತ್ತಾಯ್ತು…. ಗೊತ್ತಾಯ್ತು…. ಮಳೆಯಿಂದ ಚಳಿ ಜಾಸ್ತಿ ಆಗಿದೆ. ಹಾಗೇ ಒಂದು ಗ್ಲಾಸ್‌, ಸ್ವಲ್ಪ ಐಸ್‌ ಹಾಕಿಕೊಂಡು ಅಂತ ತಾನೇ? ಅದೆಲ್ಲ ಕಟ್ಟಿಟ್ಟು ಬಿಡಿ. ಮಕ್ಕಳು ದೊಡ್ಡವರಾದರು, ಈಗ ಟ್ಯೂಷನ್‌ ನಿಂದ ಬರುವ ಹೊತ್ತಾಯ್ತು. ಅವರ ಮುಂದೆ ಈ ಅವತಾರಗಳು ಬೇಡವೇ ಬೇಡ!
ಮಹೇಶ್‌ : ಹೋಗ್ಲಿ ಸ್ವೀಟಿ…. ನೀನೀಗ ಸ್ವಲ್ಪ ಫ್ರೀ ಮಾಡ್ಕೋ….
ಸರಳಾ : ಹೇಳಿದ್ನಲ್ಲ…. ಯಾವುದಕ್ಕೂ ಟೈಂ ಇಲ್ಲ! ನನ್ನ ಕಡೆ ನೋಡ್ಲೇಬೇಡಿ, ಆಗಿನಿಂದ ಒಂದೇ ಸಮ ತಲೆನೋವು, ಬಹಳ ಸುಸ್ತಾಗಿದೆ!
ನೀತಿ : ಪಾಪ, ಶೋಷಿತ ಪತಿ ಬೇರೆಲ್ಲಿಗೆ ಹೋಗಬೇಕು?
ಹೀಗೊಂದು ಬೊಂಬಾಟ್‌ ಗಝಲ್!
ಬಹಳ ದಿನಗಳ ನಂತರ ಗಿರಿಜಾ ತವರುಮನೆಗೆ ಹೋಗಿದ್ದಳು. ಅಡುಗೆ ಬಾರದ ಗಂಡನಿಗೆ ಫೋನಿನಲ್ಲಿ ಹೀಗೆ ಮೆಸೇಜ್‌ಕಳುಹಿಸಿದಳು : `ನನ್ನ ಪ್ರೇಮವನ್ನು ನಿಮ್ಮ ಹೃದಯದಲ್ಲಿ ಹುಡುಕಿಕೊಳ್ಳಿ ಚಪಾತಿಗೆ ಸರಿಯಾಗಿ ಹಿಟ್ಟು ಕಲಸಿಕೊಳ್ಳಿ! ಅಸಲಿ ಪ್ರೇಮ ದೊರೆತಾಗ ಅದನ್ನು ಕಳೆಯಬಾರದು, ಈರುಳ್ಳಿ ಹೆಚ್ಚುವಾಗ ಕಣ್ಣೀರು ಸುರಿಸಬಾರದು!
ಎಂದೋ ಒಮ್ಮೆ ನನ್ನ ಮೇಲೆ ಕೋಪಗೊಂಡ್ರಿ ತಪ್ಪಿಲ್ಲ, ಆಲೂ ಬೇಯದಿದ್ರೆ ಎಂದೂ ಪಲ್ಯ ರುಚಿಸಲ್ಲ!
ಜೊತೆಗೂಡಿ ನಾವು ಸಂತೋಷ ಹಂಚಿಕೊಳ್ಳೋಣ, ಟೊಮೇಟೊ ಮಾತ್ರ ಸಣ್ಣದಾಗಿ ಹೆಚ್ಚಿಕೊಳ್ಳೋಣ!
ಜನ ನಮ್ಮ ಪ್ರೇಮ ಕಂಡು ಅಸೂಯೆ ಪಟ್ಟಾರು, ಅಕ್ಕಿ ಬಹಳ ಬೆಂದು ಮುದ್ದೆ ಆದೀತು, ಹುಷಾರು!
ನನ್ನ ಗಝಲ್ ಹಿಡಿಸಿತೇ…. ನೀವೇ ಹೇಳಿ, ಅಡುಗೇಲಿ ಉಪ್ಪು ಕಡಿಮೆಯಾದ್ರೆ ಅಡ್ಜಸ್ಟ ಮಾಡ್ಕೊಳ್ಳಿ!’
ಗಿರಿಜಾ ಗಂಡ ಉಮಾಪತಿ ಸಾಮಾನ್ಯದವನೇ? ಕಿಲಾಡಿಯಂತೆ ತಾನೂ ಉತ್ತರ ನೀಡಿದ :
`ನಿನ್ನ ಈ ಪ್ರೇಮಾನುರಾಗ ನನ್ನ ಮನ ಮುಟ್ಟಿತು, ಪಕ್ಕದ್ಮನೆ ಪಂಕಜಾ ನೀಡಿದ ಅಡುಗೆ ಕಳೆಗಟ್ಟಿತು!’
ಯೋಗ ದಿನಾಚರಣೆ ಬಂದೇಬಿಟ್ಟಿತು! ಬಾಯ್‌ ಫ್ರೆಂಡ್‌ ಸ್ಟೈಲಾಗಿ ಗರ್ಲ್ ಫ್ರೆಂಡ್‌ ಮುಂದೆ ಬಡಾಯಿ ಕೊಚ್ಚುತ್ತಿದ್ದ, “ನಾನು ನಿನಗಾಗಿ ಏನು ಬೇಕಾದರೂ ಮಾಡಲು ಸಿದ್ಧನಿದ್ದೇನೆ. ನನಗಾಗಿ ನೀನು ನಿನ್ನ ಮನೆ ಬಿಟ್ಟು ಓಡಿ ಬರಬಾರದೇ?” ಎಂದು ವಿನಂತಿಸಿಕೊಂಡ.
ಅದಕ್ಕೆ ಗರ್ಲ್ ಫ್ರೆಂಡ್‌ ವಯ್ಯಾರದಿಂದ ಪಲುಕಿದಳು, “ಹೌದೇ…. ಇವತ್ತಿನ ಯೋಗಾ ಡೇಗಾಗಿ, ಭುಜಂಗಾಸನದಿಂದ ಶೀರ್ಷಾಸನದವರೆಗೂ ಚೂರೂ ತಪ್ಪಿಲ್ಲದೆ ಮಾಡಿ ತೋರಿಸು….” ಎಂದಳು.
ಅದಕ್ಕೆ ಅವನು ಹಠದಿಂದ ಒಂದೊಂದೇ ಮಾಡಿದನಾದರೂ, ಶಾಸನ ತಲುಪಿದನು ಮತ್ತೆ ಮೇಲೇಳಲೇ ಇಲ್ಲವಂತೆ!
ಗಂಡ ಹೆಂಡತಿ ಯಾವುದೋ ವಿಷಯಕ್ಕೆ ಘನಘೋರ ಜಗಳ ಮಾಡಿಕೊಂಡರು. ಒಂದು ವಾರ ಆದರೂ ಇಬ್ಬರೂ ಕಮಕ್‌ ಕಿಮಕ್ ಎಂದು ಮಾತನಾಡಲೇ ಇಲ್ಲ. ಮಾರನೇ ದಿನ ಅವರ ವಿವಾಹ ವಾರ್ಷಿಕೋತ್ಸವ ಇಬ್ಬರಿಗೂ ಕಸಿವಿಸಿ. ಆದರೆ ನಾನೇಕೆ ಮೊದಲು ಮಾತನಾಡಿಸಲಿ ಎಂದು ಸ್ವಾಭಿಮಾನ ಅಡ್ಡಿಪಡಿಸಿತು.
ಅಂತೂ ಆಕೆಯೇ ಮೊದಲು ಮಾತನಾಡಿದಳು, “ನೋಡಿ, ವೆಡ್ಡಿಂಗ್‌ ಆ್ಯನಿವರ್ಸರಿ ದಿನ ಇಬ್ಬರೂ ಹೀಗೆ ಮುಖ ಊದಿಸಿಕೊಂಡಿರುವುದು ಚೆನ್ನಾಗಿರಲ್ಲ. ಒಂದು ಕೆಲಸ ಮಾಡೋಣ…. ನೀವು ಸ್ವಲ್ಪ ಕಾಂಪ್ರಮೈಸ್‌ ಮಾಡಿಕೊಳ್ಳಿ, ಉಳಿದದ್ದು ನಾನೇ ಮಾಡ್ತೀನಿ!”
ಗಂಡ ಅದಕ್ಕೆ, “ಸರಿ, ಈಗ ನಾನೇನು ಮಾಡಬೇಕು?” ಎಂದು ಕೇಳಿದ.
“ನೀವು ನಡೆದ ಎಲ್ಲಾ ರಾದ್ಧಾಂತಕ್ಕೂ ತಪ್ಪು ನಿಮ್ಮದೇ ಅಂತ ಧಾರಾಳ ಮನಸ್ಸಿನಿಂದ ಒಪ್ಪಿಕೊಂಡುಬಿಡಿ. ನಾನೂ ನಿಮ್ಮನ್ನು ಧಾರಾಳವಾಗಿ ಕ್ಷಮಿಸಿಬಿಡ್ತೀನಿ!”
ಮತ್ತೆ ಲಟಾಪಟಿ ಶುರುವಾಯಿತು…..
ಯಾವುದೋ ನೆಂಟರ ಮದುವೆಗೆ ಹೋಗಲು ಪತಿಪತ್ನಿ ಸಿದ್ಧರಾಗುತ್ತಿದ್ದರು. ಪತ್ನಿ ಹೇಗೆ ಸಿದ್ಧಳಾದಳು ಅಂತೀರಾ? ಹೊರಡುವ ಮೊದಲು ಸಾಂಗೋಪಾಂಗವಾಗಿ ಈ ಕೆಳಗಿನಂತೆ ಮೇಕಪ್‌ ಮುಗಿಸಿದಳು :
ಫೇಸ್‌ ವಾಶ್‌, ಫೇಸ್‌ ಸ್ಟಿಕ್‌, ಕನ್ಸೀಲರ್‌, ಐ ಶ್ಯಾಡೋ, ಮಸ್ಕರಾ, ಲಿಪ್‌ ಸ್ಟಿಕ್‌, ಲಿಪ್‌ ಲೈನರ್‌, ಐ ಲೈನರ್‌, ಐ ಮೇಕಪ್‌, ಫೇಸ್‌ ಕ್ರೀಂ, ಫೇಸ್‌ ಪೌಡರ್‌, ಕಾಡಿಗೆ, ಬ್ಲಶ್‌ ಆನ್‌, ನೇಲ್ ಪಾಲಿಶ್‌, ಪರ್ಫ್ಯೂಮ್……ಇದೆಲ್ಲ ಆದಮೇಲೆ ಆಕರ್ಷಕ ಸೀರೆ ಉಟ್ಟು 28 ಕಡೆ ಪಿನ್‌ ಸಿಗಿಸಿ, 2 ವಿಧದ ಹೇರ್‌ ಸ್ಟೈಲ್ ಬದಾಯಿಸಿ, ಹೈ ಹೀಲ್ಸ್ ಧರಿಸಿ, ಕೊನೆಗೆ ಗೆಳತಿಗೆ ಫೋನ್‌ ಮಾಡಿದಳು, “ಏ…. ನನಗೆ ಅವಸರದಲ್ಲಿ ಏನೇನೂ ರೆಡಿ ಮಾಡಿಕೊಳ್ಳಲಿಕ್ಕೇ ಆಗಲಿಲ್ಲ. ಹ್ಞೂಂ, ನಿನಗಿಂತ ಇದೇನೂ ಮುಖ್ಯ ಅಲ್ಲ, ಬೇಗ ಬರ್ತೀನಿ ಬಿಡು…..”
ಅದೇ ಗಂಡನೆಂಬ ಪ್ರಾಣಿ ಈಗಾಗಲೇ ಛತ್ರ ತಲುಪಿದ್ದ ಗೆಳೆಯವಿಗೆ ಫೋನ್‌ ಮಾಡಿ, “ಸ್ನಾನ ಮಾಡಿ ನಂತರ ಹೊರಡು ಅಂತೀಯಾ ಗುರೂ?” ಎಂದು ಕೇಳುತ್ತಿದ್ದ.
“ಯಾವ ಮಹಾ ಲಾರ್ಡ್‌ ಲಬಕ್‌ ದಾಸ್‌ ನ ಮದುವೆ ನಡೀತಿದೆ ಅಂತ…. ನಮ್ಮ ಕೊಟ್ರೇಶಿ ಮದ್ವೆ ತಾನೇ…. ಮುಖ ತೊಳ್ಕೊಂಡು ಬೇಗ ಬಾರಲೋ……!”
