ಕಂಗಳ ಕೆಳಗಿನ ಕಪ್ಪು ವೃತ್ತಗಳಿಂದಾಗಿ, ಹೆಣ್ಣಿನ ಸೌಂದರ್ಯಕ್ಕೆ ರಾಹು ಬಡಿದಂತಾಗುತ್ತದೆ. ಯಾವ ವಿಧಾನ ಅನುಸರಿಸಿ ಇದರಿಂದ ಮುಕ್ತಿ ಹೊಂದಬಹುದು….?
ನಿಮ್ಮ ಚೆಲುವು ಕಂಗೊಳಿಸುವುದೇ ನಿಮ್ಮ ಸುಂದರ ವದನಾರವಿಂದದಿಂದ! ಎಲ್ಲಕ್ಕೂ ಮೊದಲು ಜನರ ದೃಷ್ಟಿ ಮುಖದ ಮೇಲೆ ಹೋಗುತ್ತದೆ. ಹಾಗಿರುವಾಗ, ನಿಮ್ಮ ಮೈ ಬಣ್ಣ ನೀವು ಬಯಸಿದಂತೆ ತಿಳಿಯಾಗಿ ಆಕರ್ಷಕ ಎನಿಸದಿದ್ದಾಗ, ಎಷ್ಟೇ ಮೇಕಪ್ ಮಾಡಿಕೊಂಡರೂ ಏನೋ ಡಲ್ ಎನಿಸುತ್ತದೆ. ಆದರೆ ನಿಮ್ಮ ಕಂಗಳ ಕಾಂತಿ ಮುಖದ ಬೇರೆ ಮೈನಸ್ ಪಾಯಿಂಟ್ಸ್ ನ್ನು ಮರೆಮಾಚಬಲ್ಲದು. ಹಾಗಿರುವಾಗ ನಿಮ್ಮ ಮುಖದ ಸೌಂದರ್ಯ ಎದ್ದು ಕಾಣಲು, ನಿಮ್ಮ ಕಂಗಳ ಕೆಳಗೆ ಮೂಡುವ ಕಪ್ಪು ವೃತ್ತ ಅಥವಾ ಉಂಗುರ (ಡಾರ್ಕ್ ಸರ್ಕಲ್ಸ್) ನಿಮ್ಮನ್ನು ಅಂದಗೇಡಿ ಆಗಿಸುತ್ತದೆ. ಮೈಕಾಂತಿ ಚೆನ್ನಾಗಿದ್ದು, ಮೈಕಟ್ಟು ಸದೃಢವಾಗಿದ್ದರೂ ಈ ಡಾರ್ಕ್ ಸರ್ಕಲ್ಸ್, ನಿಮ್ಮ ಸೌಂದರ್ಯಕ್ಕೆ ದೊಡ್ಡ ಕಪ್ಪು ಚುಕ್ಕೆ ಆದೀತು. ಆದ್ದರಿಂದ ಅದನ್ನು ಹೋಗಲಾಡಿಸಿ, ನಿಮ್ಮ ಮುಖದ ಸೌಂದರ್ಯ ದಿವಿನಾಗಿ ಬೆಳಗುವಂತೆ ಮಾಡಿ. ಕಂಗಳ ಕೆಳಗಿನ ಈ ಡಾರ್ಕ್ ಸರ್ಕಲ್ಸ್ ನಿಮ್ಮ ಸುಸ್ತು, ಅಪೂರ್ಣ ನಿದ್ದೆ, ಒತ್ತಡ, ಟೆನ್ಶನ್, ಹೆಚ್ಚುತ್ತಿರುವ ವಯಸ್ಸಿನ ಕಾರಣ ಆಗುತ್ತದೆ.
ಸಾಮಾನ್ಯವಾಗಿ ಹೆಂಗಸರು ಈ ಡಾರ್ಕ್ ಸರ್ಕಲ್ಸ್ ನ್ನು ಅಡಗಿಸಲು ಮೇಕಪ್ ಸಹಾಯ ಪಡೆಯುತ್ತಾರೆ. ಆದರೆ ಮೇಕಪ್ ಬದಲಾಗಿ ನೈಸರ್ಗಿಕ ವಿಧಾನಗಳಿಂದ ಈ ಕಪ್ಪು ವೃತ್ತಗಳನ್ನು ಓಡಿಸಬೇಕು. ಅದಕ್ಕಾಗಿ ಇಲ್ಲಿವೆ ಕೆಲವು ಮನೆ ಮದ್ದು. ನೀವು ಸಹ ಇವನ್ನು ಅನುಸರಿಸಿ, ಡಾರ್ಕ್ ಸರ್ಕಲ್ಸ್ ನಿಂದ ಮುಕ್ತಿ ಪಡೆಯಿರಿ.
ತಂಪು ಹಾಲು
ಕಾದಾರಿದ ಹಾಲನ್ನು ಇಡೀ ರಾತ್ರಿ ಫ್ರಿಜ್ ನಲ್ಲಿರಿಸಿ ಮಾರನೇ ಬೆಳಗ್ಗೆ ಅದನ್ನು ಡಾರ್ಕ್ ಸರ್ಕಲ್ಸ್ ಗೆ ಹಚ್ಚುವುದರಿಂದ ಹೆಚ್ಚಿನ ಲಾಭವಿದೆ. ಒಂದು ಸಣ್ಣ ಬಟ್ಟಲಲ್ಲಿ ಈ ತಂಪು ಹಾಲು ತೆಗೆದುಕೊಂಡು, ಅದರಲ್ಲಿ ಹತ್ತಿ ಉಂಡೆ ನೆನೆಸಿಡಿ. ನಂತರ ಅದನ್ನು ಕಂಗಳ ಕೆಳಗಿನ ಡಾರ್ಕ್ ಸರ್ಕಲ್ಸ್ ಭಾಗದ ಮೇಲೆ ಇರಿಸಿಕೊಂಡು, ಹಾಗೇ ಅರ್ಧ ಗಂಟೆ ಅಲುಗಾಡದೆ ಇರಿ. ನಂತರ ತಣ್ಣೀರಿನಿಂದ ಮುಖ ತೊಳೆಯಿರಿ. ಇದನ್ನು ಬೆಳಗ್ಗೆ ಸಂಜೆ ಎರಡೂ ಹೊತ್ತು 1-2 ವಾರ ಮುಂದುವರಿಸಿದರೆ, ನೀವು ಬಯಸಿದ ಪರಿಣಾಮ ಖಂಡಿತಾ ಸಿಗುತ್ತದೆ, ಡಾರ್ಕ್ ಸರ್ಕಲ್ಸ್ ಕ್ರಮೇಣ ಮಾಯ ಆಗ ತೊಡಗುತ್ತದೆ.
ಗುಲಾಬಿ ಜಲ
ಹಾಲು 5-6 ಚಮಚ ತಂಪು ಹಾಲಿಗೆ ಅಷ್ಟೇ ಪ್ರಮಾಣದ ಗುಲಾಬಿ ಜಲ ಬೆರೆಸಿಕೊಳ್ಳಿ. ಇದಕ್ಕೆ ಹತ್ತಿ ಉಂಡೆ ಹಾಕಿ ನೆನೆಸಿ, ಕಂಗಳು ಹಾಗೂ ಡಾರ್ಕ್ ಸರ್ಕಲ್ಸ್ ಇರುವ ಜಾಗ ಪೂರ್ತಿ ಕವರ್ಮಾಡಿ. ಅರ್ಧ ಗಂಟೆ ಹಾಗೇ ಅಲುಗಾಡದೆ ಇರಿ. ನಂತರ ತಣ್ಣೀರಿನಿಂದ ಮುಖ ತೊಳೆಯಿರಿ. ಕಪ್ಪು ವೃತ್ತ ಓಡಿಸಲು ಈ ಪ್ರಕ್ರಿಯೆಯನ್ನು ವಾರದಲ್ಲಿ 3 ಸಲ ರಿಪೀಟ್ ಮಾಡಿ.
ಬಾದಾಮಿ ಎಣ್ಣೆ – ಹಾಲು
ಅರ್ಧ ಚಿಕ್ಕ ಬಟ್ಟಲು ತಂಪು ಹಾಲಿಗೆ ಅಷ್ಟೇ ಪ್ರಮಾಣದಲ್ಲಿ ಬಾದಾಮಿ ಎಣ್ಣೆ ಬೆರೆಸಿಕೊಂಡು, ಅದರಲ್ಲಿ ಹತ್ತಿ ಉಂಡೆ ನೆನೆಸಿ, ಕಂಗಳು ಕಪ್ಪು ವೃತ್ತಗಳನ್ನು ಕವರ್ ಮಾಡುವಂತೆ, ಅರ್ಧ ಗಂಟೆ ಕಾಲ ಒತ್ತಿ ಇರಿಸಿಕೊಳ್ಳಿ. ಆಮೇಲೆ ತಣ್ಣೀರಿನಿಂದ ಮುಖ ತೊಳೆಯಿರಿ. ಹೀಗೆ ವಾರಕ್ಕೆ 3-4 ಸಲ ಮಾಡಿ, ಉತ್ತಮ ಪರಿಣಾಮ ಕಾಣುವಿರಿ.
ಟೊಮೇಟೊ
ಡಾರ್ಕ್ ಸರ್ಕಲ್ಸ್ ನಿಂದ ಮುಕ್ತಿ ಪಡೆಯಲು ಟೊಮೇಟೊ ಸಹ ಬಹಳ ಸಹಕಾರಿ. ಇದಕ್ಕಾಗಿ ಮಾಗಿದ 2 ಟೊಮೇಟೊ ಹೆಚ್ಚಿ ಮಿಕ್ಸಿಗೆ ಹಾಕಿ. ಅದಕ್ಕೆ ತುಸು ನಿಂಬೆರಸ ಬೆರೆಸಿ ಪೇಸ್ಟ್ ಮಾಡಿ. ಈ ಪೇಸ್ಟ್ ನ್ನು 2-3 ಗಂಟೆ ಕಾಲ ಫ್ರಿಜ್ ನಲ್ಲಿರಿಸಿ. ನಂತರ ಹೊರತೆಗೆದು ನೇರವಾಗಿ ಕಂಗಳು, ಡಾರ್ಕ್ ಸರ್ಕಲ್ಸ್ ನ ಭಾಗಕ್ಕೆ ಹಚ್ಚಿಕೊಂಡು ಅರ್ಧ ಗಂಟೆ ಕಾಲ ಒಣಗಲು ಬಿಡಿ. ನಂತರ ತಣ್ಣೀರಿನಿಂದ ಮುಖ ತೊಳೆಯಿರಿ. ವಾರಕ್ಕೆ 5-6 ಸಲ ತಪ್ಪದೆ ಹೀಗೆ ಮಾಡಿ, ಡಾರ್ಕ್ ಸರ್ಕಲ್ಸ್ ನಿಂದ ಮುಕ್ತಿ ಪಡೆಯಿರಿ.
ಆಲೂ ರಸ
ನೀಟಾಗಿ ಹಸಿ ಆಲೂ ತುರಿದಿಡಿ. ನಂತರ ಇದನ್ನು ಮಿಕ್ಸಿಗೆ ಹಾಕಿ, ತುಸು ತಂಪು ಹಾಲಿನೊಂದಿಗೆ ಪೇಸ್ಟ್ ಮಾಡಿ. ಆಮೇಲೆ ಇದರಲ್ಲಿ ಹತ್ತಿ ಉಂಡೆ ಹಾಕಿ ನೆನೆಸಿ, ಕಂಗಳು, ಡಾರ್ಕ್ ಸರ್ಕಲ್ಸ್ ಭಾಗಕ್ಕೆ ಒತ್ತರಿಸಿಕೊಂಡು ಅರ್ಧ ಗಂಟೆ ಹಾಗೇ ಇರಿ. ಅರ್ಧ ಗಂಟೆ ಬಿಟ್ಟು ತಣ್ಣೀರಿನಿಂದ ತೊಳೆಯಿರಿ.
ಟೀ ಬ್ಯಾಗ್ಸ್
ಟೀ ಬ್ಯಾಗ್ಸ್ ಬಳಸಿ ಚಹಾ ತಯಾರಿಸುವುದು ಮಾತ್ರವಲ್ಲ, ಇದರಿಂದ ಡಾರ್ಕ್ ಸರ್ಕಲ್ಸ್ ನ್ನು ಸಹ ತೊಲಗಿಸಬಹುದು. ಬಳಸಿದ ಟೀ ಬ್ಯಾಗ್ಸ್ ಚೆನ್ನಾಗಿ ಆರಿದ ನಂತರ, 2-3 ಗಂಟೆ ಕಾಲ ಫ್ರಿಜ್ ನಲ್ಲಿರಿಸಿ, ನಂತರ ಕಂಗಳು, ಡಾರ್ಕ್ ಸರ್ಕಲ್ಸ್ ಭಾಗದಲ್ಲಿ ಇರಿಸಿಕೊಳ್ಳಿ. ಅರ್ಧ ಗಂಟೆ ಬಿಟ್ಟು ಮುಖ ತೊಳೆಯಿರಿ. ಹೀಗೆ ದಿನಕ್ಕೆ 2 ಸಲ, 2-3 ವಾರ ಮಾಡಿ.
ಕಿತ್ತಳೆಯ ರಸ
ಮೊದಲು ಕಿತ್ತಳೆ ಹಣ್ಣಿನಿಂದ ಜೂಸ್ ರೆಡಿ ಮಾಡಿಕೊಂಡು, ಅದಕ್ಕೆ ಕೆಲವು ಹನಿ ಗ್ಲಿಸರಿನ್ ಬೆರೆಸಿಕೊಳ್ಳಿ. ಇದನ್ನು ನೇರವಾಗಿ ಕಂಗಳ ಕೆಳಭಾಗಕ್ಕೆ ಕಪ್ಪು ವೃತ್ತ ಇರುವ ಕಡೆ ಹಚ್ಚಿಕೊಂಡು, ಹಾಗೇ ಅರ್ಧ ಗಂಟೆ ಬಿಟ್ಟು ಮುಖ ತೊಳೆಯಿರಿ. ಇದರಿಂದ ಕಂಗಳ ಹೊಳಪು ಸಹ ಹೆಚ್ಚುತ್ತದೆ.
ಸೌತೇಕಾಯಿ
ಇದು ದೇಹಕ್ಕೆ ತಂಪು ನೀಡುವುದಲ್ಲದೆ ಕಂಗಳಿಗೂ ಹೆಚ್ಚಿನ ಆರೋಗ್ಯ ಒದಗಿಸುತ್ತದೆ. ಇದಕ್ಕಾಗಿ ಸೌತೆ ಬಿಲ್ಲೆಗಳನ್ನು ಕತ್ತರಿಸಿ ಅರ್ಧ ಗಂಟೆ ಕಾಲ ಫ್ರಿಜ್ ನಲ್ಲಿರಿಸಿ. ಆಮೇಲೆ ಅದನ್ನು ನೇರವಾಗಿ ಕಂಗಳು, ಕಪ್ಪು ವೃತ್ತಗಳಿರುವ ಕಡೆ ಇರಿಸಿಕೊಂಡು ಅರ್ಧ ಗಂಟೆ ಹಾಗೇ ಇಡಿ. ನಂತರ ಮುಖ ತೊಳೆಯಿರಿ. ಕೆಲವು ದಿನಗಳ ನಂತರ ಉತ್ತಮ ಪರಿಣಾಮ ಕಾಣುತ್ತದೆ.
ಪುದೀನಾ
ಡಾರ್ಕ್ ಸರ್ಕಲ್ಸ್ ತೊಲಗಿಸಲು ತಾಜಾ ಪುದೀನಾ ಎಲೆ ಸಹ ಬಲು ಉಪಕಾರಿ. ಪುದೀನಾಗೆ ಕೆಲವು ಐಸ್ ಕ್ಯೂಬ್ಸ್ ಬೆರೆಸಿ ಪೇಸ್ಟ್ ಮಾಡಿ. ಇದನ್ನು ಅಗತ್ಯವಿದ್ದ ಕಡೆ ಸವರಿ, 15-20 ನಿಮಿಷ ಹಾಗೇ ಬಿಡಿ. ಆಮೇಲೆ ತಣ್ಣೀರಿನಿಂದ ತೊಳೆಯಿರಿ. ಇದನ್ನು ಪ್ರತಿ ರಾತ್ರಿ ಮಲಗುವ ಮುನ್ನ ಮಾಡಿದರೆ, 1-2 ವಾರಗಳಲ್ಲಿ ಬಯಸಿದ ಪರಿಣಾಮ ಸಿಗುತ್ತದೆ.
ಹಸಿ ಅರಿಶಿನದ ಕೊಂಬು
ಅರಿಶಿನ ತನ್ನ ಆ್ಯಂಟಿಬಯಾಟಿಕ್, ಆ್ಯಂಟಿ ಇನ್ ಫ್ಲಮೇಟರಿ, ಆ್ಯಂಟಿಸೆಪ್ಟಿಕ್ ಗುಣಗಳಿಗೆ ಹೆಸರುವಾಸಿ. ತುಸು ಹುಳಿ ಮೊಸರಿಗೆ, ಹಸಿ ಅರಿಶಿನದ ಕೊಂಬನ್ನು ತುರಿದು ಹಾಕಿ ನುಣ್ಣಗೆ ಪೇಸ್ಟ್ ಮಾಡಿ. ನಂತರ ಈ ಪೇಸ್ಟ್ ನ್ನು ಅಗತ್ಯವಿರುವ ಕಡೆ ಮುಖದಲ್ಲಿ ಹಚ್ಚಿಕೊಂಡು ಅರ್ಧ ಗಂಟೆ ಒಣಗಲು ಬಿಡಿ. ನಂತರ ತುಸು ಬಿಸಿ ನೀರಿನಿಂದ ಮುಖ ತೊಳೆಯಿರಿ. ಹೀಗೆ ವಾರಕ್ಕೆ 4 ಸಲ ಮಾಡಿ.
ಜೇನು–ನಿಂಬೆ
1 ದೊಡ್ಡ ಚಮಚ (ಕಾಯಿಸದ) ಹಸಿ ಹಾಲಿಗೆ ಕೆಲವು ಹನಿ ನಿಂಬೆರಸ ಬೆರೆಸಿರಿ. ನಂತರ ಇದಕ್ಕೆ 1 ಚಮಚ ಜೇನುತುಪ್ಪ ಬೆರೆಸಿ ಚೆನ್ನಾಗಿ ಕದಡಿಕೊಂಡು, ಈ ಮಿಶ್ರಣವನ್ನು ಮುಖದಲ್ಲಿ ಬೇಕಾದ ಕಡೆ ಹಚ್ಚಿಕೊಂಡು, ಅರ್ಧ ಗಂಟೆ ಹಾಗೇ ಬಿಡಿ. ನಂತರ ತಣ್ಣೀರಿನಿಂದ ಮುಖ ತೊಳೆಯಿರಿ. ಹೀಗೆ ಮನೆ ಮದ್ದು ಬಳಸಿ, ಬ್ಯೂಟಿ ಪಾರ್ಲರ್ ಹಾಗೂ ಅದರ ಕೆಮಿಕಲ್ಸ್ ದೂರವಿರಿಸಿ, ನಿಮ್ಮ ಮುಖದ ಕಪ್ಪು ವೃತ್ತಗಳಿಂದ ಮುಕ್ತಿ ಪಡೆಯಿರಿ.
– ಮೋನಿಕಾ
