ಸಿಹಿ ಸಿಹಿ ತಿನಿಸುಗಳ ಹ್ಯಾಪಿ ದೀಪಾವಳಿ!

ಖರ್ಜೂರದ ಮೋದಕ

ಸಾಮಗ್ರಿ : 1-1 ಕಪ್‌ ಮೈದಾ ಹಾಲು, ಅರ್ಧರ್ಧ ಕಪ್‌ಸಣ್ಣರವೆ, ತುಪ್ಪ, ಹಾಲಲ್ಲಿ ನೆನೆಸಿ ಪೇಸ್ಟ್ ಮಾಡಿದ ಹಸಿ ಖರ್ಜೂರ, ರುಚಿಗೆ ತಕ್ಕಷ್ಟು ಸಕ್ಕರೆ, ತುಪ್ಪದಲ್ಲಿ ಹುರಿದ ಡ್ರೈಫ್ರೂಟ್ಸ್, ಖೋವಾ, ಏಲಕ್ಕಿ ಪುಡಿ, ಹಾಲಲ್ಲಿ ನೆನೆಸಿದ ಕೇಸರಿ, ಕರಿಯಲು ರೀಫೈಂಡ್‌ ಎಣ್ಣೆ.

ವಿಧಾನ : ಒಂದು ಬೇಸನ್ನಿಗೆ ಮೈದಾ, ಸಕ್ಕರೆ, ತುಸು ತುಸುವೇ ಹಾಲು ಚಿಮುಕಿಸುತ್ತಾ ಮೃದು ಪೂರಿ ಹಿಟ್ಟಿನ ಹದಕ್ಕೆ ಕಲಸಿಡಿ. ಇದಕ್ಕೆ ತುಪ್ಪ ಬೆರೆಸಿ ಹದನಾಗಿ ನಾದಿಕೊಳ್ಳಿ, ನೆನೆಯಲು ಬಿಡಿ. ಒಂದು ಸಣ್ಣ ಬಾಣಲೆಯಲ್ಲಿ ತುಸು ತುಪ್ಪ ಬಿಸಿ ಮಾಡಿ. ಇದಕ್ಕೆ ಮಸೆದ ಖೋವಾ, ಖರ್ಜೂರದ ಪೇಸ್ಟ್, ಸಕ್ಕರೆ ಹಾಕಿ ಮಂದ ಉರಿಯಲ್ಲಿ ಕೆದಕಬೇಕು. ನಂತರ ಇದಕ್ಕೆ ಏಲಕ್ಕಿ, ದ್ರಾಕ್ಷಿ, ಗೋಡಂಬಿ ಚೂರು, ಕೇಸರಿ ಬೆರೆಸಿಕೊಳ್ಳಿ. ಇದನ್ನು 2 ನಿಮಿಷ ಕೆದಕಿ ಕೆಳಗಿಳಿಸಿ ಆರಲು ಬಿಡಿ, ಇದೀಗ ಹೂರಣ ರೆಡಿ! ನೆನೆದ ಹಿಟ್ಟಿನಿಂದ ಸಣ್ಣ ಉಂಡೆಗಳಾಗಿಸಿ, ಪುಟ್ಟ ಪೂರಿ ಲಟ್ಟಿಸಿ. ಇದರ ಮಧ್ಯೆ 1-2 ಚಮಚ ಹೂರಣವಿರಿಸಿ, ಮೋದಕಕ್ಕೆ ಮಾಡುವಂತೆ ಎಲ್ಲಾ ಕಡೆಯಿಂದಲೂ ಕವರ್‌ ಮಾಡಿ, ಚಿತ್ರದಲ್ಲಿರುವಂತೆ ಡಿಸೈನ್‌ ಮಾಡಿ. ಹೀಗೆ ಎಲ್ಲವನ್ನೂ ಸಿದ್ಧಪಡಿಸಿಕೊಂಡು ಕಾದ ಎಣ್ಣೆಯಲ್ಲಿ ಕರಿದು ತೆಗೆಯಿರಿ. ಅರ್ಧ ಕಪ್‌ ನೀರನ್ನು ಬಿಸಿ ಮಾಡಿ, ಅದಕ್ಕೆ ಸಕ್ಕರೆ ಹಾಕಿ ಒಂದೆಳೆ ಗಟ್ಟಿ ಪಾಕ ಸಿದ್ಧಪಡಿಸಿ. ಅದನ್ನು ಇದರ ಮೇಲೆ ಲೈಟಾಗಿ ಸುರಿದು, ಪಾಕ ಮೆತ್ತಿಕೊಳ್ಳುವಂತೆ ಮಾಡಿ. ನಂತರ ಚಿತ್ರದಲ್ಲಿರುವಂತೆ ಬೆಳ್ಳಿ ರೇಕಿನಿಂದ ಅಲಂಕರಿಸಿ, ಗಾಳಿಯಾಡದ ಡಬ್ಬಕ್ಕೆ ತುಂಬಿರಿಸಿ. ಹಬ್ಬಕ್ಕೆ 2 ದಿನ ಇರುವಾಗಲೇ ಇದನ್ನು ಸಿದ್ಧಪಡಿಸಿಕೊಳ್ಳಿ.

ಬಾಳೆಹಣ್ಣಿನ ಸಿಹಿಪಡ್ಡು

ಸಾಮಗ್ರಿ : 50 ಗ್ರಾಂ ಬೀಜ ಬೇರ್ಪಡಿಸಿದ ನೇರಳೆ ಹಣ್ಣಿನ ತಿರುಳು, 2-3 ಮಾಗಿದ ಬಾಳೆಹಣ್ಣು, 100 ಗ್ರಾಂ ಮೈದಾ, ಅಗತ್ಯವಿದ್ದಷ್ಟು ಹಾಲು, ಬೆಣ್ಣೆ, ಸಕ್ಕರೆ, ಬೇಕಿಂಗ್‌ ಪೌಡರ್‌, ಅಲಂಕರಿಸಲು ಒಂದಿಷ್ಟು ಸೀಡ್‌ ಲೆಸ್‌ ದಾಳಿಂಬೆ ಹರಳು.

ವಿಧಾನ : ಒಂದು ಸಣ್ಣ ಬಟ್ಟಲಲ್ಲಿ ಬಾಳೆಹಣ್ಣನ್ನು ಚೆನ್ನಾಗಿ ಕಿವುಚಿಟ್ಟುಕೊಳ್ಳಿ. ಮತ್ತೊಂದು ತುಸು ದೊಡ್ಡ ಬಟ್ಟಲಿಗೆ ಉಳಿದೆಲ್ಲ ಸಾಮಗ್ರಿ ಸೇರಿಸಿ ಇದಕ್ಕೆ ಬಾಳೆಹಣ್ಣು ಹಾಕಿ ಚೆನ್ನಾಗಿ ಗೊಟಾಯಿಸಿ. ಇದನ್ನು 10 ನಿಮಿಷ ನೆನೆಯಲು ಬಿಡಿ. ನಂತರ ಪಡ್ಡು ಬಾಣಲೆ ಒಲೆ ಮೇಲಿರಿಸಿ, ಅದರ ಪ್ರತಿಯೊಂದು ಕುಳಿಗೂ ತುಸು ತುಪ್ಪ ಹಾಕಿ. ಅದರ ಮುಕ್ಕಾಲು ಭಾಗ ತುಂಬುವಷ್ಟು ಬಾಳೆ ಮಿಶ್ರಣ ಹಾಕಿಡಿ. ಇದಕ್ಕೆ ಮುಚ್ಚಳ ಮುಚ್ಚಿರಿಸಿ ಬೇಯಿಸಿ. ನಂತರ ಅದನ್ನು ತಿರುವಿಹಾಕಿ, ತುಸು ತುಪ್ಪ ಬಿಟ್ಟು, ಮತ್ತೊಂದು ಬದಿ ಬೇಯಿಸಿ. ಇವನ್ನು ತಟ್ಟೆಯಲ್ಲಿ ಜೋಡಿಸಿ, ಚಿತ್ರದಲ್ಲಿರುವಂತೆ ದಾಳಿಂಬೆಯಿಂದ ಅಲಂಕರಿಸಿ ಸವಿಯಲು ಕೊಡಿ.

ಜಾಮೂನಿನ ಆನ್‌ ಶಾರ್ಟ್‌ ಕ್ರಸ್ಟ್ ಬೋಟ್‌

ಸಾಮಗ್ರಿ : 100-100 ಗ್ರಾಂ ಬೆಣ್ಣೆ, ಐಸಿಂಗ್‌ ಶುಗರ್‌, ಮೈದಾ, ಫ್ರೆಶ್‌ ರಬಡೀ, 1 ಮೊಟ್ಟೆ, ಮಧ್ಯಮ ಗಾತ್ರದ 7-8 ಗುಲಾಬ್‌ ಜಾಮೂನು ಯಾ ರಸಗುಲ್ಲ, ತುಪ್ಪದಲ್ಲಿ ಹುರಿದ ಒಂದಿಷ್ಟು ಡ್ರೈಫ್ರೂಟ್ಸ್, 1 ಕಪ್‌ ಕೆನೆಭರಿತ ಕಾದಾರಿದ ಗಟ್ಟಿ ಹಾಲು, ಅರ್ಧ ಕಪ್ ಸಕ್ಕರೆ, ತುಸು ಏಲಕ್ಕಿ ಪುಡಿ.

ವಿಧಾನ : ಹಾಲನ್ನು ಮತ್ತೆ ಒಲೆ ಮೇಲಿಟ್ಟು ಮಂದ ಉರಿಯಲ್ಲಿ ಅರ್ಧ ಹಿಂಗುವಂತೆ ಕೈಯಾಡಿಸುತ್ತಾ ಕಾಯಿಸಿ. ನಂತರ ಇದಕ್ಕೆ ಸಕ್ಕರೆ, ಏಲಕ್ಕಿ ಬೆರೆಸಿ ಕದಡಿಕೊಂಡು ಕೆಳಗಿಳಿಸಿ. ದೊಡ್ಡ ಬೇಸನ್ನಿನಲ್ಲಿ ತಣ್ಣೀರು ತುಂಬಿಸಿ, ಅದರಲ್ಲಿ ಈ ಮಿಶ್ರಣವನ್ನು ಇರಿಸಿ, ಚೆನ್ನಾಗಿ ಕೂಲ್ ‌ಮಾಡಿ. ನಂತರ ಇದನ್ನು ಫ್ರಿಜ್‌ ನಲ್ಲಿ 1-2 ಗಂಟೆ ಕಾಲ ಇರಿಸಿ ಸೆಟ್‌ ಆಗಲು ಬಿಡಿ.

ಬೆಣ್ಣೆಗೆ ಐಸಿಂಗ್‌ ಶುಗರ್‌ ಬೆರೆಸಿ ಕದಡಿಕೊಳ್ಳಿ. ಇದಕ್ಕೆ ಮೊಟ್ಟೆ ಒಡೆದು ಹಾಕಿ ಚೆನ್ನಾಗಿ ಗೊಟಾಯಿಸಿ. ನಂತರ ಇದಕ್ಕೆ ನಿಧಾನವಾಗಿ ಮೈದಾ ಸೇರಿಸುತ್ತಾ, ಗಂಟಾಗದಂತೆ ಕದಡುತ್ತಿರಿ. ನಂತರ ಈ ಮಿಶ್ರಣವನ್ನು 1 ಗಂಟೆ ಕಾಲ ಫ್ರಿಜ್‌ ನಲ್ಲಿಟ್ಟು ಸೆಟ್ ಮಾಡಿ. ಇದನ್ನು ಹೊರತೆಗೆದು ಮತ್ತಷ್ಟು ಮೈದಾ ಬೆರೆಸಿ, ಮೃದು ಮಿಶ್ರಣ ಕಲಸಿಡಿ. ಮತ್ತೆ 1 ಗಂಟೆ ಕಾಲ ಫ್ರಿಜ್‌ ನಲ್ಲಿಟ್ಟು ಸೆಟ್ ಮಾಡಿ. ನಂತರ ಇದನ್ನು ಹೊರ ತೆಗೆದು ಬೋಟ್‌ ಆಕಾರದಲ್ಲಿ (ಚಿತ್ರದಲ್ಲಿರುವಂತೆ) ರೆಡಿ ಮಾಡಿ. ಇದನ್ನು ಬಿಸಿ ಮಾಡಿದ ಓವನ್ನಿನಲ್ಲಿರಿಸಿ 160 ಡಿಗ್ರಿ ಶಾಖದಲ್ಲಿ ಹದನಾಗಿ ಬೇಕ್‌ ಮಾಡಿ. ನಂತರ ಹೊರ ತೆಗೆದು ಈ ಬೋಟ್‌ ಗೆ ರಬಡೀ ತುಂಬಿಸಿ. ಇದರ ಮೇಲೆ ರಸಗುಲ್ಲ ಯಾ ಜಾಮೂನು ತುಂಬಿಸಿ, ಸುತ್ತಲೂ ದ್ರಾಕ್ಷಿ, ಗೋಡಂಬಿ ಉದುರಿಸಿ, ಚಿತ್ರದಲ್ಲಿರುವಂತೆ ಬೆಳ್ಳಿ ರೇಕಿನಿಂದ ಅಲಂಕರಿಸಿ, ಸವಿಯಲು ಕೊಡಿ.

ಬೀಟ್‌ ರೂಟ್‌ ಹಲ್ವಾ

ಸಾಮಗ್ರಿ : 1 ಕಿಲೋ ಬೀಟ್‌ ರೂಟ್‌, 3-4 ಕಪ್‌ ಸಕ್ಕರೆ, ಅರ್ಧ ಲೀ. ಕಾದಾರಿದ ಕೆನೆಭರಿತ ಗಟ್ಟಿ ಹಾಲು, ತುಪ್ಪದಲ್ಲಿ ಹುರಿದ ಒಂದಿಷ್ಟು ಗೋಡಂಬಿ, ದ್ರಾಕ್ಷಿ, ಪಿಸ್ತಾ, ಬಾದಾಮಿ ಚೂರು, 1 ಕಪ್‌ ತುಪ್ಪ, ತುಸು ಏಲಕ್ಕಿ ಪುಡಿ, ಮಸೆದ ಖೋವಾ, ಅಲಂಕರಿಸಲು ಸೇಬು, ಕಿವೀ ಫ್ರೂಟ್‌ ಬಿಲ್ಲೆಗಳು.

ವಿಧಾನ : ಬೀಟ್‌ ರೂಟಿನ ಸಿಪ್ಪೆ ಹೆರೆದು ನೀಟಾಗಿ ತುರಿದಿಡಿ. ಒಂದು ಬಾಣಲೆಯಲ್ಲಿ ಅರ್ಧ ಸೌಟು ತುಪ್ಪ ಬಿಸಿ ಮಾಡಿ, ಬೀಟ್ ರೂಟ್‌ ತುರಿ ಹಾಕಿ, ಮಂದ ಉರಿಯಲ್ಲಿ ಹದನಾಗಿ ಬಾಡಿಸಿ. ನಂತರ ಇದಕ್ಕೆ ಅರ್ಧದಷ್ಟು ಹಾಲು, ಸಕ್ಕರೆ, ಏಲಕ್ಕಿ ಹಾಕಿ ಕೆದಕಬೇಕು. ನಂತರ ಉಳಿದ ಹಾಲು, ನಡುನಡುವೆ ಉಳಿದ ತುಪ್ಪ ಬೆರೆಸುತ್ತಾ ನಿಧಾನವಾಗಿ ಕೈಯಾಡಿಸಿ. ನಂತರ ಅದನ್ನು ಕೆಳಗಿಳಿಸಿ ಒಂದು ಬಟ್ಟಲಿಗೆ ಹಾಕಿರಿಸಿ ಚಿತ್ರದಲ್ಲಿರುವಂತೆ ಡ್ರೈಫ್ರೂಟ್ಸ್. ಖೋವಾ, ಹಣ್ಣಿನ ಬಿಲ್ಲೆಗಳಿಂದ ಅಲಂಕರಿಸಿ ಸವಿಯಲು ಕೊಡಿ.

ಝಾಫ್ರಾನಿ ರೋಲ್ ವಿತ್‌ ಡ್ರೈಫ್ರೂಟ್ಸ್

ಸಾಮಗ್ರಿ : 3-4 ಬ್ರೆಡ್‌ ಸ್ಲೈಸ್‌, ಹಾಲಲ್ಲಿ ನೆನೆಸಿದ ತುಸು ಕೇಸರಿ, ಕಾದಾರಿದ ಅರ್ಧ ಕಪ್‌ ಗಟ್ಟಿ ಹಾಲು, 150 ಗ್ರಾಂ ಸಕ್ಕರೆ, ಒಂದಿಷ್ಟು ಮಸೆದ ಖೋವಾ, ತುಪ್ಪದಲ್ಲಿ ಹುರಿದ ಡ್ರೈಫ್ರೂಟ್ಸ್, ಅಗತ್ಯವಿದ್ದಷ್ಟು ಮೆಲ್ಟೆಡ್‌ ಚಾಕಲೇಟ್‌, ಅಲಂಕರಿಸಲು ಬೆಂದ ಶ್ಯಾವಿಗೆ.

ವಿಧಾನ : ಒಂದು ಬಾಣಲೆಯಲ್ಲಿ ತುಸು ತುಪ್ಪ ಬಿಸಿ ಮಾಡಿಕೊಂಡು, ಬ್ರೆಡ್‌ ಸ್ಲೈಸ್‌ ನ್ನು ಕರಿದು ತೆಗೆಯಿರಿ. ಅದೇ ಬಾಣಲೆಯಲ್ಲಿ ಹಾಲು ಕಾಯಿಸಿ. ಇದಕ್ಕೆ ಕೇಸರಿ, ಸಕ್ಕರೆ ಬೆರೆಸಿ ಮಂದ ಉರಿಯಲ್ಲಿ ಸತತ ಕೈಯಾಡಿಸಿ ಹಾಲನ್ನು ಅರ್ಧ ಭಾಗ ಹಿಂಗಿಸಿ. ನಂತರ ಇದನ್ನು ಕೆಳಗಿಳಿಸಿ ಕರಿದ ಬ್ರೆಡ್‌ ನ್ನು ಇದರಲ್ಲಿ ನೆನೆ ಹಾಕಿಡಿ. ಇದರ ಮೇಲೆ ತುರಿದ ಖೋವಾ, ತುಪ್ಪದಲ್ಲಿ ಹುರಿದ ಡ್ರೈಫ್ರೂಟ್ಸ್ ಉದುರಿಸಿ, ನೀಟಾಗಿ ಬ್ರೆಡ್‌ ನ್ನು ಸುರುಳಿ ಸುತ್ತಿಕೊಳ್ಳಿ. ಇವೆರಡರ ಕೊನೆಗಳನ್ನೂ ಮೆಲ್ಟೆಡ್‌ ಚಾಕ್‌ ಲೇಟ್‌ ನಲ್ಲಿ ಅದ್ದಿಕೊಂಡು, ಚಿತ್ರದಲ್ಲಿರುವಂತೆ ಅಲಂಕರಿಸಿ ಸವಿಯಲು ಕೊಡಿ.

ಗುಲ್ಕಂದ್‌ ಪುಡಿಂಗ್‌

ಸಾಮಗ್ರಿ : 50 ಗ್ರಾಂ ಗುಲ್ಕಂದ್‌, ಅಗತ್ಯವಿದ್ದಷ್ಟು ರೋಸ್‌ ಸಿರಪ್‌, ವೆನಿಲಾ ಐಸ್‌ ಕ್ರೀಂ, ತಾಜಾ ಗುಲಾಬಿ ದಳ, ತುಸು ಬಿಸಿ ನೀರು, ಅಗರ್‌/ಜೆಲಾಟಿನ್‌ ಪೌಡರ್‌ (ರೆಡಿಮೇಡ್‌ ಲಭ್ಯ).

ವಿಧಾನ : ಗುಲ್ಕಂದ್‌ ನ್ನು ಟೂಟಿ ಫ್ರೂಟ್‌ ತರಹ ಕತ್ತರಿಸಿ, ವೆನಿಲಾ ಐಸ್‌ ಕ್ರೀಂ ಜೊತೆ ಬೆರೆಸಿಕೊಳ್ಳಿ. ತುಸು ಬಿಸಿ ನೀರಿಗೆ ಅಗರ್ ಪೌಡರ್‌, ರೋಸ್‌ ಸಿರಪ್‌, ಗುಲ್ಕಂದ್‌ ಮಿಶ್ರಣ ಬೆರೆಸಿಕೊಳ್ಳಿ. ಇದನ್ನು ಅಚ್ಚಿಗೆ ತುಂಬಿಸಿ, 1-2 ಗಂಟೆಗಳ ಕಾಲ ಫ್ರಿಜ್‌ ನಲ್ಲಿರಿಸಿ ಸೆಟ್‌ ಮಾಡಿ. ನಂತರ ಇದನ್ನು ಹೊರತೆಗೆದು ಚಿತ್ರದಲ್ಲಿರುವಂತೆ ಅರೇಂಜ್‌ ಮಾಡಿ, ಗುಲಾಬಿ ದಳಗಳಿಂದ ಅಲಂಕರಿಸಿ ಸವಿಯಲು ಕೊಡಿ.

ಕ್ಯಾಪ್ಸಿಕಂ ಹಲ್ವಾ

ಸಾಮಗ್ರಿ : ಸಣ್ಣಗೆ ಹೆಚ್ಚಿಕೊಂಡ 3 ಬಗೆಯ ಕ್ಯಾಪ್ಸಿಕಂ (ಒಟ್ಟಾರೆ 250 ಗ್ರಾಂ) ಅರ್ಧ ಲೀ. ಗಟ್ಟಿ ಹಾಲು, ಚೆನ್ನಾಗಿ ಮಸೆದ 100 ಗ್ರಾಂ ಖೋವಾ, 150 ಗ್ರಾಂ ಸಕ್ಕರೆ, ತುಸು ಗುಲಾಬಿ ಜಲ.

ವಿಧಾನ : ಮೊದಲು ಬಾಣಲೆಯಲ್ಲಿ ತುಸು ತುಪ್ಪ ಬಿಸಿ ಮಾಡಿ, ಇದಕ್ಕೆ ಕ್ಯಾಪ್ಸಿಕಂ ಹಾಕಿ ಹದನಾಗಿ ಬಾಡಿಸಿ. ಇದನ್ನು ಕೆಳಗಿಳಿಸಿ ಒಂದು ಬದಿಗಿಟ್ಟು, ಅದೇ ಬಾಣಲೆಯಲ್ಲಿ ಹಾಲು ಕಾಯಿಸಿ. ಉಕ್ಕಿ ಬಂದಾಗ, ಸಕ್ಕರೆ ಹಾಕಿ ಸತತ ಕೈಯಾಡಿಸಿ. ನಂತರ ಇದಕ್ಕೆ ಮಸೆದ ಖೋವಾ ಬೆರೆಸಿ ಕೆದಕಬೇಕು. ಹಾಲು ಅರ್ಧ ಭಾಗ ಹಿಂಗಿದಾಗ, ಬಾಡಿಸಿದ ಕ್ಯಾಪ್ಸಿಕಂ ಬೆರೆಸಿ, ಹಲ್ವಾ ಹದ ಬರುವಂತೆ ಕೆದಕಿ ಕೆಳಗಿಳಿಸಿ. ಇದರ ಮೇಲೆ ಗುಲಾಬಿ ಜಲ ಸಿಂಪಡಿಸಿ, ಸವಿಯಲು ಕೊಡಿ.