ಭಾರತ್ ಜೋಡೋ ಯುವ ಸಂಘ: ಯುವಜನರ ಅಭಿವೃದ್ಧಿಯೇ? ಕಾಂಗ್ರೆಸ್ ಸಂಘಟನೆಗೆ ಸರ್ಕಾರಿ ಹಣವೇ?

ಸರ್ಕಾರದ ಪ್ರಕಾರ, ಯುವಕರಲ್ಲಿ ನಾಯಕತ್ವ ಗುಣ ಬೆಳೆಸುವುದು, ಕ್ರೀಡೆ, ಕಲೆ, ಸಂಸ್ಕೃತಿ, ವೈಜ್ಞಾನಿಕ ಮನೋಭಾವ, ಸಾಮಾಜಿಕ ಸಾಮರಸ್ಯ ಹಾಗೂ ಸಮಾಜಸೇವಾ ಚಟುವಟಿಕೆಗಳಿಗೆ ಉತ್ತೇಜನ ನೀಡುವುದು ಈ ಯೋಜನೆಯ ಉದ್ದೇಶ.

ಆದರೆ, ಈ ಯೋಜನೆಯ ಹೆಸರು, ವೆಚ್ಚ ಮತ್ತು ಅದರ ಹಿಂದಿರುವ ರಾಜಕೀಯ ಹಿನ್ನೆಲೆಯನ್ನು ಗಮನಿಸಿದರೆ, ಇದು ನಿಜಕ್ಕೂ ಯುವಜನರ ಅಭಿವೃದ್ಧಿಗಾಗಿಯೇ ರೂಪಿಸಿರುವ ಯೋಜನೆಯೇ? ಅಥವಾ ಕಾಂಗ್ರೆಸ್ ಪಕ್ಷದ ಸಂಘಟನೆಯನ್ನು ಸರ್ಕಾರಿ ಹಣದಿಂದ ಬಲಪಡಿಸುವ ಮತ್ತೊಂದು ಪ್ರಯತ್ನವೇ? ಎಂಬ ಪ್ರಶ್ನೆಗಳು ಸಹಜವಾಗಿಯೇ ಮೂಡುತ್ತಿವೆ.

10 ಸಾವಿರ ಸಂಘಗಳು… ಎಷ್ಟು ಹಣ?

ಸರ್ಕಾರದ ಆದೇಶದ ಪ್ರಕಾರ,

• ಗ್ರಾಮ ಪಂಚಾಯಿತಿ ಮಟ್ಟದಲ್ಲಿ 6,000 ಸಂಘಗಳು
• ನಗರ ವಾರ್ಡ್ ಮಟ್ಟದಲ್ಲಿ 4,000 ಸಂಘಗಳು

ಒಟ್ಟು 10,000 ಭಾರತ್ ಜೋಡೋ ಯುವ ಸಂಘಗಳನ್ನು ಸ್ಥಾಪಿಸಲಾಗುತ್ತದೆ. ಪ್ರತಿ ಸಂಘಕ್ಕೆ ಪ್ರತಿವರ್ಷ ₹10 ಲಕ್ಷ ಅನುದಾನ ನೀಡಲಾಗುತ್ತದೆ. ಅಂದರೆ,

₹10 ಲಕ್ಷ × 10,000 ಸಂಘಗಳು = ₹10,000 ಕೋಟಿ

ಇದಲ್ಲದೆ, ಪ್ರತಿ ಸಂಘಕ್ಕೆ ಒಬ್ಬ ತರಬೇತುದಾರನನ್ನು ನೇಮಿಸಿ, ಅವರಿಗೆ ವಾರ್ಷಿಕ ₹24,000 ಗೌರವಧನ ನೀಡಲಾಗುತ್ತದೆ.

ಅದರಂತೆ, ₹24,000 × 10,000 = ₹24 ಕೋಟಿ

ಹೀಗಾಗಿ, ಸರ್ಕಾರ ಘೋಷಿಸಿರುವ ಈ ಯೋಜನೆಯ ಒಟ್ಟು ವೆಚ್ಚ ಸುಮಾರು ₹10,024 ಕೋಟಿ.

ಆದರೆ, ಈ ಮೊತ್ತವನ್ನು ಯಾವ ಹಂತದಲ್ಲಿ ಬಿಡುಗಡೆ ಮಾಡಲಾಗುತ್ತದೆ? ಬಜೆಟ್‌ನಲ್ಲಿ ಎಷ್ಟು ಮೀಸಲಿಡಲಾಗಿದೆ? ಹಣ ಹಂಚಿಕೆಯ ವಿಧಾನವೇನು? ಎಂಬ ಸ್ಪಷ್ಟ ಮಾರ್ಗಸೂಚಿಗಳನ್ನು ಸರ್ಕಾರ ಇನ್ನೂ ಪ್ರಕಟಿಸಿಲ್ಲ.

ಉಪಮುಖ್ಯಮಂತ್ರಿಗಳ ಸ್ಪಷ್ಟನೆ

ಉಪಮುಖ್ಯಮಂತ್ರಿ ಡಾ. ಜಿ. ಪರಮೇಶ್ವರ ಅವರು ಈ ಕುರಿತು ಸಾಮಾಜಿಕ ಜಾಲತಾಣ ‘ಎಕ್ಸ್’ನಲ್ಲಿ ಮಾಹಿತಿ ಹಂಚಿಕೊಂಡಿದ್ದು,

• ಪ್ರತಿ ಗ್ರಾಮ ಪಂಚಾಯಿತಿಗೆ ಒಂದು ಸಂಘ,
• ಪಟ್ಟಣ ಪಂಚಾಯಿತಿಯಲ್ಲಿ ಸರಾಸರಿ 4 ಸಾವಿರ ಜನಸಂಖ್ಯೆಗೆ ಒಂದು ಸಂಘ,
• ಪುರಸಭೆಯಲ್ಲಿ 6 ಸಾವಿರ ಜನಸಂಖ್ಯೆಗೆ ಒಂದು ಸಂಘ,
• ನಗರಸಭೆಯಲ್ಲಿ 8 ಸಾವಿರ ಜನಸಂಖ್ಯೆಗೆ ಒಂದು ಸಂಘ,
• ಮಹಾನಗರ ಪಾಲಿಕೆ ಹಾಗೂ ಬಿಬಿಎಂಪಿ ವ್ಯಾಪ್ತಿಯಲ್ಲಿ 10 ಸಾವಿರ ಜನಸಂಖ್ಯೆಗೆ ಒಂದು ಸಂಘ ಸ್ಥಾಪಿಸಲಾಗುವುದು ಎಂದು ತಿಳಿಸಿದ್ದಾರೆ.

ಯೋಜನೆಯನ್ನು ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆ ಅನುಷ್ಠಾನಗೊಳಿಸಲಿದ್ದು, ಗ್ರಾಮೀಣಾಭಿವೃದ್ಧಿ, ನಗರಾಭಿವೃದ್ಧಿ, ಕಂದಾಯ ಹಾಗೂ ಶಿಕ್ಷಣ ಇಲಾಖೆಗಳು ಸಹಕಾರ ನೀಡಲಿವೆ ಎಂದು ಹೇಳಿದ್ದಾರೆ.

ಯಾರು ಸದಸ್ಯರಾಗಬಹುದು?

ಸರ್ಕಾರದ ನಿಯಮಗಳ ಪ್ರಕಾರ,

• ವಯಸ್ಸು 16 ರಿಂದ 35 ವರ್ಷ ಇರಬೇಕು.
• ಪ್ರತಿ ಸಂಘದಲ್ಲಿ ಕನಿಷ್ಠ 100 ಯುವ ಸದಸ್ಯರು ಇರಬೇಕು.
• ಸದಸ್ಯರು ಅದೇ ಗ್ರಾಮ ಅಥವಾ ವಾರ್ಡ್‌ನ ನಿವಾಸಿಗಳಾಗಿರಬೇಕು.
• ಒಬ್ಬ ವ್ಯಕ್ತಿ ಕೇವಲ ಒಂದು ಸಂಘದಲ್ಲಿ ಮಾತ್ರ ಸದಸ್ಯನಾಗಬಹುದು.

ಹಾಗಿದ್ದರೆ ಈಗಿರುವ ಸಂಘಟನೆಗಳ ಕಥೆ ಏನು?

ಇಲ್ಲಿ ಉದ್ಭವಿಸುವ ಮೊದಲ ಪ್ರಶ್ನೆ ಇದೇ.

ಕರ್ನಾಟಕದ ಪ್ರತಿಯೊಂದು ಗ್ರಾಮದಲ್ಲೂ ಈಗಾಗಲೇ ಅನೇಕ ಕ್ರೀಡಾ ಸಂಘಗಳು, ಯುವಕ ಸಂಘಗಳು, ಸಾಂಸ್ಕೃತಿಕ ಸಂಘಟನೆಗಳು, ಭಜನಾ ಮಂಡಳಿಗಳು, ಸಮಾಜಸೇವಾ ತಂಡಗಳು ಸಕ್ರಿಯವಾಗಿವೆ.

ಅಷ್ಟೇ ಅಲ್ಲದೆ ಸರ್ಕಾರದ ಅಧೀನದಲ್ಲಿಯೇ

• ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆ,
• ನೆಹರು ಯುವ ಕೇಂದ್ರ,
• ರಾಷ್ಟ್ರೀಯ ಸೇವಾ ಯೋಜನೆ (NSS),
• ಭಾರತ್ ಸ್ಕೌಟ್ಸ್ ಮತ್ತು ಗೈಡ್ಸ್,
• ವಿವಿಧ ಯುವ ಕ್ಲಬ್‌ಗಳು

ಕಾರ್ಯನಿರ್ವಹಿಸುತ್ತಿವೆ. ಇವೆಲ್ಲವನ್ನೂ ಬಲಪಡಿಸುವ ಬದಲು, ಮತ್ತೊಂದು ಹೊಸ ಸಂಘಟನೆಯ ಅಗತ್ಯವೇನು?

ಹೆಸರೇ ವಿವಾದದ ಕೇಂದ್ರಬಿಂದು

ಯೋಜನೆಯ ಉದ್ದೇಶಗಳಿಗಿಂತಲೂ ಹೆಚ್ಚು ಚರ್ಚೆಯಾಗುತ್ತಿರುವುದು ಅದರ ಹೆಸರು.

“ಭಾರತ್ ಜೋಡೋ” ಎಂಬುದು ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ದೇಶದಾದ್ಯಂತ ಎರಡು ಬಾರಿ ನಡೆಸಿದ ರಾಜಕೀಯ ಪಾದಯಾತ್ರೆಯ ಹೆಸರು.

ಅದೇ ಹೆಸರನ್ನು ಸರ್ಕಾರದ ಅಧಿಕೃತ ಯೋಜನೆಗೆ ಬಳಸಿರುವುದು ಆಡಳಿತ ಮತ್ತು ಪಕ್ಷದ ನಡುವಿನ ಗಡಿಯನ್ನು ಅಸ್ಪಷ್ಟಗೊಳಿಸುತ್ತದೆ ಎಂಬ ಆರೋಪ ವಿರೋಧ ಪಕ್ಷಗಳಿಂದ ಕೇಳಿಬರುತ್ತಿದೆ.

ಸರ್ಕಾರದ ಹಣದಲ್ಲಿ ನಡೆಯುವ ಯೋಜನೆಗೆ ಕಾಂಗ್ರೆಸ್ ಪಕ್ಷದ ರಾಜಕೀಯ ಘೋಷಣೆಯ ಹೆಸರನ್ನು ಬಳಸುವುದು ಎಷ್ಟರ ಮಟ್ಟಿಗೆ ಸಮಂಜಸ?

ಈ ಪ್ರಶ್ನೆಗೆ ಸರ್ಕಾರ ಇನ್ನೂ ನೇರ ಉತ್ತರ ನೀಡಿಲ್ಲ.

ಆದ್ಯತೆಗಳು ಬದಲಾಗಿವೆಯೇ?

ಈ ಯೋಜನೆ ಕುರಿತು ಮತ್ತೊಂದು ಪ್ರಮುಖ ಪ್ರಶ್ನೆ ಹಣದ ಬಳಕೆಯ ಕುರಿತು.

ಇಂದಿಗೂ,

• ಸಾವಿರಾರು ಸರ್ಕಾರಿ ಶಾಲೆಗಳು ಮೂಲಭೂತ ಸೌಲಭ್ಯಗಳಿಲ್ಲದೆ ಕಾರ್ಯನಿರ್ವಹಿಸುತ್ತಿವೆ.
• ಸರ್ಕಾರಿ ಆಸ್ಪತ್ರೆಗಳಲ್ಲಿ ವೈದ್ಯರು ಮತ್ತು ಸಿಬ್ಬಂದಿಯ ಕೊರತೆ ಇದೆ.
• ರೈತರು ಸಂಕಷ್ಟದಲ್ಲಿದ್ದಾರೆ.
• ಲಕ್ಷಾಂತರ ವಿದ್ಯಾವಂತ ಯುವಕರು ನಿರುದ್ಯೋಗಿಗಳಾಗಿದ್ದಾರೆ.

ಇಂತಹ ಸಂದರ್ಭದಲ್ಲಿ ಸುಮಾರು ₹10,024 ಕೋಟಿ ವೆಚ್ಚದ ಹೊಸ ಸಂಘಟನೆಗೆ ಆದ್ಯತೆ ನೀಡುವುದು ಎಷ್ಟು ಸಮಂಜಸ? ಎಂಬ ಪ್ರಶ್ನೆ ಸಾರ್ವಜನಿಕ ವಲಯದಲ್ಲಿಯೂ ಕೇಳಿಬರುತ್ತಿದೆ.

ಪಾರದರ್ಶಕತೆ ಎಲ್ಲಿದೆ?

ಯೋಜನೆಯ ಅನುಷ್ಠಾನ ಕುರಿತು ಇನ್ನೂ ಹಲವು ಪ್ರಶ್ನೆಗಳು ಉತ್ತರಿಸದೇ ಉಳಿದಿವೆ.

• ಸಂಘದ ಸದಸ್ಯರನ್ನು ಯಾರು ಆಯ್ಕೆ ಮಾಡುತ್ತಾರೆ?
• ಅಧ್ಯಕ್ಷರನ್ನು ಯಾರು ನೇಮಿಸುತ್ತಾರೆ?
• ಅನುದಾನವನ್ನು ಯಾರು ನಿರ್ವಹಿಸುತ್ತಾರೆ?
• ವಾರ್ಷಿಕ ಲೆಕ್ಕಪತ್ರಗಳನ್ನು ಯಾರು ಪರಿಶೀಲಿಸುತ್ತಾರೆ?
• ಹಣದ ದುರುಪಯೋಗವಾದರೆ ಯಾರು ಹೊಣೆ?

ಈ ಎಲ್ಲ ವಿಷಯಗಳ ಕುರಿತು ಸರ್ಕಾರ ಇನ್ನೂ ವಿವರವಾದ ಮಾರ್ಗಸೂಚಿಗಳನ್ನು ಪ್ರಕಟಿಸಿಲ್ಲ.

ರಾಜಕೀಯ ಘರ್ಷಣೆಗೆ ಹೊಸ ವೇದಿಕೆಯೇ?

ಸರ್ಕಾರಿ ಅನುದಾನ ದೊರೆಯುವ ಸಂಘಟನೆಗಳ ಸದಸ್ಯತ್ವ ಮತ್ತು ನೇತೃತ್ವಕ್ಕಾಗಿ ಸ್ಥಳೀಯ ಮಟ್ಟದಲ್ಲಿ ಕಾಂಗ್ರೆಸ್, ಬಿಜೆಪಿ ಮತ್ತು ಜೆಡಿಎಸ್ ಕಾರ್ಯಕರ್ತರ ನಡುವೆ ಪೈಪೋಟಿ ಹಾಗೂ ಘರ್ಷಣೆ ಉಂಟಾಗುವ ಸಾಧ್ಯತೆಯನ್ನು ಹಲವರು ವ್ಯಕ್ತಪಡಿಸುತ್ತಿದ್ದಾರೆ.

ಸಮಾಜಸೇವೆಗೆ ಯುವಕರನ್ನು ಪ್ರೇರೇಪಿಸುವ ಬದಲು, ರಾಜಕೀಯ ಪ್ರಭಾವ ವಿಸ್ತರಿಸುವ ವೇದಿಕೆಯಾಗುವ ಅಪಾಯವನ್ನು ವಿರೋಧ ಪಕ್ಷಗಳು ಎತ್ತಿ ತೋರಿಸುತ್ತಿವೆ.

ಆರ್‌ಎಸ್‌ಎಸ್ ವಿರುದ್ಧದ ರಾಜಕೀಯದ ಮುಂದುವರಿಕೆಯೇ?

ಕಳೆದ ಕೆಲವು ತಿಂಗಳುಗಳಿಂದ ಕಾಂಗ್ರೆಸ್ ನಾಯಕರು, ವಿಶೇಷವಾಗಿ ಗೃಹ ಸಚಿವ ಪ್ರಿಯಾಂಕ್ ಖರ್ಗೆ ಹಾಗೂ ಕೆಪಿಸಿಸಿ ಅಧ್ಯಕ್ಷ ಬಿ.ಕೆ. ಹರಿಪ್ರಸಾದ್, ರಾಷ್ಟ್ರೀಯ ಸ್ವಯಂಸೇವಕ ಸಂಘ (RSS) ಕುರಿತು ನಿರಂತರವಾಗಿ ಪ್ರಶ್ನೆಗಳನ್ನು ಎತ್ತುತ್ತಿದ್ದಾರೆ.

• ಸಂಘ ನೋಂದಾಯಿಸಿಕೊಳ್ಳಬೇಕು,
• ಗುರುದಕ್ಷಿಣೆಯ ಲೆಕ್ಕ ನೀಡಬೇಕು,
• ಸರ್ಕಾರಿ ಮತ್ತು ಧಾರ್ಮಿಕ ಸ್ಥಳಗಳಲ್ಲಿ ಚಟುವಟಿಕೆಗಳಿಗೆ ನಿರ್ಬಂಧ ಇರಬೇಕು,
• ಪಥಸಂಚಲನಕ್ಕೆ ಪೊಲೀಸ್ ಅನುಮತಿ ಕಡ್ಡಾಯವಾಗಬೇಕು

ಎಂಬ ಬೇಡಿಕೆಗಳನ್ನು ಅವರು ಹಲವು ಬಾರಿ ಮುಂದಿಟ್ಟಿದ್ದಾರೆ.

ಈ ಹಿನ್ನೆಲೆಯಲ್ಲಿ, ಕಾಂಗ್ರೆಸ್ ಸೇವಾದಳದ ಪ್ರಭಾವ ಕುಗ್ಗುತ್ತಿರುವ ಸಂದರ್ಭದಲ್ಲಿ, ಸರ್ಕಾರಿ ಹಣದಲ್ಲಿ “ಭಾರತ್ ಜೋಡೋ ಯುವ ಸಂಘ“ಗಳನ್ನು ನಿರ್ಮಿಸುವುದು ಸಂಘಕ್ಕೆ (RSS) ಪರ್ಯಾಯ ಸಂಘಟನೆಯನ್ನು ಕಟ್ಟುವ ಪ್ರಯತ್ನವೇ?  ಎಂಬ ಅನುಮಾನವನ್ನು ವಿರೋಧ ಪಕ್ಷಗಳು ವ್ಯಕ್ತಪಡಿಸುತ್ತಿವೆ.

ಸ್ವಂತಕ್ಕೆ ಸ್ವಲ್ಪ ಸಮಾಜಕ್ಕೆ ಸರ್ವಸ್ವ ಎನ್ನುವ ಧ್ಯೇಯದಡಿಯಲ್ಲಿ ನಿಸ್ವಾರ್ಥವಾಗಿ ದೇಶವನ್ನು ಅಖಂಡವಾಗಿಸುವ ರಾಷ್ಟ್ರೀಯ ಮನೋಭಾವನೆಯಿಂದ ಸ್ವಂತ ಹಣ ಬಳಸಿ ಕೊಂಡು ನೂರು ವರ್ಷಗಳ ಕಾಲ ನಡೆಸಿಕೊಂಡು ಬಂದಿರುವ ರಾಷ್ಟ್ರೀಯ ಸ್ವಯಂಸೇವಕ ಸಂಘಕ್ಕೆ ಪ್ರತಿಸ್ಪರ್ಧಿಯಾಗಿ ಈ ಭಾರತ್ ಜೋಡೋ ಯುವ ಸಂಘವನ್ನು ಕರ್ನಾಟಕ ಕಾಂಗ್ರೇಸ್ ಕಟ್ಟಲು ಮುಂದಾಗುತ್ತಿದ್ದಾರೆ ಎಂದರೆ, ಮುಂದೆ ಸರ್ಕಾರಿ ಹಣಕ್ಕಾಗಿ ತಮ್ಮ ತಮ್ಮಲೇ ಕಚ್ಚಾಡುತ್ತಾ ಅದು ಭಾರತ್ ತೋಡೋ ಸಂಘ ಆಗುವ ಎಲ್ಲಾ ಸಾಧ್ಯತೆಗಳೇ ಹೆಚ್ಚಾಗಿದೆ. ಭಾರತ್ ಜೋಡೋ ಯುವ ಸಂಘವನ್ನು ರಾಷ್ಟ್ರೀಯ ಸ್ವಯಂಸೇವಕ ಸಂಘದೊಂದಿಗೆ ಹೋಲಿಸಿಕೊಳ್ಳಲು ಮುಂದಾದಲ್ಲಿ ಅದು ನವಿಲು ನೋಡಿ ಕೆಂಭೂತ ಕುಣಿದಂತೆ ಎಂದರೂ ಅತಿಶಯವಾಗದು

ಕೊನೆಯ ಮಾತು…

ಯುವಕರಿಗೆ ನಾಯಕತ್ವ ತರಬೇತಿ ನೀಡುವುದು, ಸಮಾಜಸೇವೆಗೆ ಪ್ರೋತ್ಸಾಹಿಸುವುದು, ಕ್ರೀಡೆ ಮತ್ತು ಸಂಸ್ಕೃತಿಯನ್ನು ಬೆಳೆಸುವುದು—ಇವೆಲ್ಲವೂ ಸ್ವಾಗತಾರ್ಹ ಉದ್ದೇಶಗಳೇ.

ಆದರೆ,

• ಈಗಾಗಲೇ ಅಸ್ತಿತ್ವದಲ್ಲಿರುವ ಸಂಸ್ಥೆಗಳನ್ನು ಬಲಪಡಿಸುವ ಬದಲು ಹೊಸ ಸಂಘಟನೆ ಯಾಕೆ?
• ಸರ್ಕಾರಿ ಯೋಜನೆಗೆ ರಾಜಕೀಯ ಅಭಿಯಾನದ ಹೆಸರೇ ಯಾಕೆ?
• ಸಾವಿರಾರು ಕೋಟಿ ರೂಪಾಯಿ ಸಾರ್ವಜನಿಕ ಹಣದ ಬಳಕೆ ಕುರಿತು ಸ್ಪಷ್ಟತೆ ಯಾಕಿಲ್ಲ?

ಈ ಪ್ರಶ್ನೆಗಳಿಗೆ ಸರ್ಕಾರ ಉತ್ತರ ನೀಡಬೇಕಾಗಿದೆ.

ಯುವಜನರ ಅಭಿವೃದ್ಧಿಗೆ “ಭಾರತ್ ಜೋಡೋ ಯುವ ಸಂಘ”ಗಳೇ ಪರಿಹಾರವೇ? ಅಥವಾ ಈಗಿರುವ ಯುವ ಸಂಘಟನೆಗಳನ್ನು ಬಲಪಡಿಸುವುದೇ ಸೂಕ್ತವೇ? ಸರ್ಕಾರಿ ಯೋಜನೆಗಳಿಗೆ ರಾಜಕೀಯ ಅಭಿಯಾನಗಳ ಹೆಸರನ್ನು ಬಳಸುವುದು ಪ್ರಜಾಪ್ರಭುತ್ವದ ಆತ್ಮಕ್ಕೆ ಹೊಂದಿಕೆಯಾಗುತ್ತದೆಯೇ? ಸರ್ಕಾರದ ಹಣದಲ್ಲಿ ನಡೆಯುವ ಪ್ರತಿಯೊಂದು ಯೋಜನೆಯೂ ರಾಜಕೀಯಕ್ಕಿಂತ ಸಾರ್ವಜನಿಕ ಹಿತಾಸಕ್ತಿಗೆ ಮೊದಲ ಆದ್ಯತೆ ನೀಡಬೇಕು. ಇಲ್ಲವಾದರೆ, ಸಾರ್ವಜನಿಕರ ತೆರಿಗೆ ಹಣದಿಂದ ರಾಜಕೀಯ ಸಂಘಟನೆಗಳನ್ನು ಕಟ್ಟಲಾಗುತ್ತಿದೆ ಎಂಬ ಟೀಕೆಗೆ ಸರ್ಕಾರವೇ ಅವಕಾಶ ಮಾಡಿಕೊಟ್ಟಂತಾಗುತ್ತದೆ ಅಲ್ವೇ?

ಏನಂತೀರೀ?

ನಿಮ್ಮವನೇ,

ಉಮಾಸುತ