ದಿಶಾ….. ಏನಮ್ಮ ಇದೆಲ್ಲ?
ಬಾಲಿವುಡ್‌ನಲ್ಲಿ ಇನ್ನೂ ಗಟ್ಟಿಯಾಗಿ ನೆಲೆಯೂರಲಾಗದ ದಿಶಾ ಪಟಾನಿ ಸದಾ ಒಂದಿಲ್ಲೊಂದು ಸುದ್ದಿಯಲ್ಲಿರುತ್ತಾಳೆ. ಒಮ್ಮೆ ಟೈಗರ್‌ ಶ್ರಾಫ್‌ ಜೊತೆ ರೊಮಾನ್ಸ್ ನಡೆಸುತ್ತಾ, ಮತ್ತೊಮ್ಮೆ ನೀರಲ್ಲಿ ಮಿಂದೆದ್ದಂಥ ತನ್ನ ಹಾಟ್‌ ಫೋಟೋ ಶೂಟ್‌ನಿಂದಾಗಿ! ದಿಶಾ….. ಏನಮ್ಮ ಇದೆಲ್ಲಾ? ನಿನ್ನ ಕೆರಿಯರ್‌ಗೆ ಒಂದು ಸರಿಯಾದ ದಿಕ್ಕುದೆಸೆ ತೋರಿಸಬೇಕೆಂದರೆ, ನಟನೆ ಮುಖ್ಯವೇ ಹೊರತು ಇಂಥ ಅವತಾರಗಳಲ್ಲ!
ದಾರಿ ತಪ್ಪಿದ ಮಗ
ಹಿರಿತೆರೆಯಲ್ಲಿ ಹೇಗಾದರೂ ಕಾಣಿಸಲೇಬೇಕು ಎಂದು ಇನ್ನಿಲ್ಲದ ಕಸರತ್ತು, ಮಸಲತ್ತು ನಡೆಸುತ್ತಿರುವ ಗೋವಿಂದ, ಯಾಕೋ ಬಹಳ ದಾರಿ ತಪ್ಪಿದ್ದಾನೆ ಅನಿಸುತ್ತೆ. ಬಾಲಿವುಡ್‌ನ ಕೆಲವು ಮಂದಿ ತನ್ನ ಚಿತ್ರ ರಿಲೀಸ್‌ ಆಗಬಾರದು ಎಂದು ಹುನ್ನಾರ ನಡೆಸಿದ್ದಾರೆ ಎಂಬುದು ಇವನ ವಾದ. ಯಾರ ಹೆಸರನ್ನೂ ಹೇಳಬಯಸದ ಈತ ಗೊಣಗುವುದಂತೂ ನಿಜ. ಬಹುಶಃ ಈತ ಡೇವಿಡ್‌ ಧವನ್‌ ಅಥವಾ ಸಲ್ಮಾನ್ ಖಾನ್‌ರನ್ನು ಬಯ್ಯುತ್ತಿರಬಹುದೆಂದು ಬಲ್ಲವರು ಹೇಳುತ್ತಾರೆ.
ಶಮಿತಾ ಅಂದ್ರೆ ಗೊತ್ತು ತಾನೇ?
`ಝಲಕ್‌ ದಿಖ್‌ ಲಾಜಾ’ ಚಿತ್ರದ `ಶರಾರಾ ಶರಾರಾ….’ ಹಾಡಿಗೆ ಶಮಿತಾ ಶೆಟ್ಟಿ ಹಾಕಿದ್ದ ಹೆಜ್ಜೆಗಳು ನೆನಪಿವೆ ತಾನೇ? ಇಂಥದೇ ಸ್ಟೆಫ್ಸ್ ಹಾಕಲು ಇತ್ತೀಚೆಗೆ ಒಂದು ಶಾರ್ಟ್‌ ಫಿಲ್ಮಿನಲ್ಲಿ ಶಮಿತಾ ಕಾಣಿಸಲಿದ್ದಾಳೆ. ಶಮಿತಾಳ ಒಂದು ತೊಂದರೆ ಎಂದರೆ, ಲಾಂಗ್‌ ಬ್ರೇಕ್‌ ನಂತರ ಶಾರ್ಟ್‌ ಟೈಮಿಗೆ ಬೆಳ್ಳಿತೆರೆಯಲ್ಲಿ ಕಾಣಿಸುತ್ತಾಳೆ. ಹೀಗಾದಾಗ ಸಹಜವಾಗಿಯೇ ಜನ `ಶಮಿತಾನಾ…. ಯಾರದು?’ ಎಂದರೆ ಆಶ್ಚರ್ಯವಿಲ್ಲ.
ಬಾರ್ಡರ್‌ನಲ್ಲಿ ಸಲ್ಮಾನ್
ದಬಂಗ್‌ ಖಾನ್‌ನ ಚಿತ್ರ ಅಥವಾ ಅದರ ಝಲಕ್‌ ಇರಲಿ, ಅಭಿಮಾನಿಗಳಿಗಂತೂ ಅವನ ಕುರಿತ ಪ್ರತಿಯೊಂದು ವಿಷಯ ಕುತೂಹಲಕರವೇ! ಅದಕ್ಕಾಗಿ ಈತ ತನ್ನ ಮುಂದಿನ `ಭಾರತ್‌’ ಚಿತ್ರದ ಕುರಿತ ಒಂದು ಝಲಕ್‌ ಶೇರ್‌ ಮಾಡಿಕೊಂಡಿದ್ದಾನೆ. ಈ ದೃಶ್ಯದಲ್ಲಿ ಸಲ್ಮಾನ್ ಕತ್ರೀನಾ ವಾಘಾ ಬಾರ್ಡರ್‌ ಬಳಿ ನಿಂತಿದ್ದಾರೆ.
ಶಿವಾನಿ ವಿತ್‌ ಫರ್ಹಾನ್‌
ಸಿನಿಮೀಯ ದೃಶ್ಯಗಳಲ್ಲಿ ಕಂಡಬರುವಂತೆಯೇ ಸಿನಿಮಾ ಮಂದಿಯ ನಿಜ ಜೀವನದಲ್ಲೂ ಜೋಡಿಗಳು ಒಂದಾಗುತ್ತವೆ, ಬಿಟ್ಟುಹೋಗುತ್ತವೆ. ಅಧೂನಾಳಿಂದ ಬೇರೆಯಾದ ನಂತರ ಫರ್ಹಾನ್‌ ಶ್ರದ್ಧಾ ಕಪೂರ್‌ರ ಅಫೇರ್‌ ತಾರಕಕ್ಕೇರಿತ್ತು. ಅದೇನಾಯಿತೋ…..? ಅವಳನ್ನು ಬಿಟ್ಟು ಈತ ಈಗ ಶಿವಾನಿ ದಾಂಡೇಕರ್‌ ಜೊತೆ ಸುತ್ತುತ್ತಿದ್ದಾನೆ. ಈಗ ಈತ ಒಮ್ಮೆ ಶಿವಾನಿ ಜೊತೆ ಸೆಲ್ಛಿ ಕ್ಲಿಕ್ಕಿಸಿಕೊಂಡರೆ, ಮತ್ತೊಮ್ಮೆ ಅವಳ ಕೈ ಕೈ ಹಿಡಿದು ಬೀಚ್‌ನಲ್ಲಿ ಓಡಾಟದ ಫೋಟೋ ವೈರಲ್ ಮಾಡ್ತಾನೆ. ಇದನ್ನೆಲ್ಲಾ ಫೇಸ್‌ಬುಕ್‌ನಲ್ಲಿ ನೋಡಿಕೊಂಡು ಜನ ಆಡಿಕೊಳ್ಳದೆ ಇರುತ್ತಾರೆಯೇ?
ಮಧುರಾಳಿಗೀಗ ನೆಗೆಟಿವ್ ಪಾತ್ರ
`ಕಹಾನಿ ಘರ್‌ ಘರ್‌ ಕೀ’ ಧಾರಾವಾಹಿಯಿಂದ ಕೆರಿಯರ್‌ ಆರಂಭಿಸಿದ್ದ ಮಧುರಾಳನ್ನು ಜನ `ನಾಗಿನ್‌’ ಧಾರಾವಾಹಿಯಲ್ಲಿ ಮೆಚ್ಚಿಕೊಂಡರು. ಇದೀಗ ಈಕೆ ಹೈ ವೋಲ್ಟೇಜ್‌ ಡ್ರಾಮಾ ಸೀರಿಯಲ್`ಕಸೌಟಿ ಝಿಂದಗಿ ಕೀ 2′ ನಲ್ಲಿ ನೆಗೆಟಿವ್ ಪಾತ್ರದಲ್ಲಿ ಮೆರೆಯಲಿದ್ದಾಳೆ. ಕಮೋಲಿಕಾ ಪಾತ್ರಧಾರಿ ಹೀನಾ ಖಾನ್‌ಳನ್ನು ಈಕೆ ಹೇಗೆ ಎದುರಿಸಲಿದ್ದಾಳೆ ಎಂಬುದೇ ಕುತೂಹಲದ ಅಂಶ.
ಅಮಾಯ್ರಾ
ಬಾಲಿವುಡ್‌ ನಟಿಯನ್ನು ಮಡಿವಂತಿಕೆಯ ಮಣ್ಣುಹುಳು ಎಂಬಂತೆ ನೋಡಲಾಗುತ್ತಿದೆ. ಅಷ್ಟರ ಮಟ್ಟಕ್ಕೆ ಎಲ್ಲರೂ `ನಾ ಮುಂದು ತಾ ಮುಂದು’ ಶೋಷಿತರು ಎಂದು ಸಾರಿಕೊಂಡು ಹೊರಟಿದ್ದಾರೆ. ಇದೀಗ ಅಮಾಯ್ರಾ ದಸ್ತೂರ್‌ಳ ಸರದಿ. ಇದೀಗ ಈಕೆ ಒಂದು ಹೊಸ ಟ್ವಿಸ್ಟ್ ನೀಡಿದ್ದಾಳೆ. ಗಂಡಸು ಮಾತ್ರವಲ್ಲದೆ ಒಬ್ಬ ಹೆಂಗಸು ಸಹ ತನ್ನನ್ನು ಲೈಂಗಿಕ ಶೋಷಣೆಗೆ ಗುರಿ ಮಾಡಿದ್ದಳು ಎಂದು ಸಾರಿಕೊಂಡಿದ್ದಾಳೆ. ಆದರೆ ಆಕೆ ಅವರಿಬ್ಬರ ಹೆಸರು ಹೇಳುತ್ತಿಲ್ಲ. ನನ್ನ ಶೋಷಣೆ ಕೇವಲ ಉತ್ತರ ಭಾರತದಲ್ಲಿ ಮಾತ್ರವಲ್ಲ ದಕ್ಷಿಣದಲ್ಲೂ ನಡೆಯಿತು ಎನ್ನುತ್ತಾಳೆ.
ಬಪ್ಪಿಗೆ ಡಿಮ್ಯಾಂಡೋ ಡಿಮ್ಯಾಂಡ್‌
ಬಪ್ಪಿ ದಾದಾ ತಮ್ಮ 45 ವರ್ಷಗಳ ಸುದೀರ್ಘ ಕೆರಿಯರ್‌ನಲ್ಲಿ ಸುಮಾರು 500 ಚಿತ್ರಗಳನ್ನು ಪೂರೈಸಿದ್ದಾರೆ. ಇವರ ಸಂಗೀತ ನಿರ್ದೇಶನವನ್ನು ಕೇವಲ ಹಿಂದಿ ಮಾತ್ರವಲ್ಲದೆ, ಬಂಗಾಳಿ, ದಕ್ಷಿಣದ ಚಿತ್ರಗಳಲ್ಲೂ ಕಾಣಬಹುದು. ಈಗ ಮೊದಲ ಬಾರಿಗೆ ಇವರು ಮರಾಠಿ ಚಿತ್ರಕ್ಕೆ ಕೈ ಹಾಕಿದ್ದಾರೆ. ಇತ್ತೀಚೆಗಷ್ಟೇ ಇವರು ಸಂಜಯ್‌ ಜಾಧವ್ ರ `ಲಕ್ಕಿ’ ಚಿತ್ರಕ್ಕಾಗಿ ರೆಕಾರ್ಡಿಂಗ್‌ ಶುರು ಮಾಡಿದರು.
ಸಯಾಮಿಯ ಮರಾಠಿ ಚಿತ್ರ
ರಾಕೇಶ್‌ ಓಂಪ್ರಕಾಶ್‌ ಮೆಹ್ತಾರ `ಮಿರ್ಜ್‌ ಯಾ’ ಹಿಂದಿ ಚಿತ್ರ ಹೀನಾಯ ಸೋಲು ಕಂಡ ನಂತರ, ಅದರಲ್ಲಿ ಪಾದಾರ್ಪಣೆ ಮಾಡಿದ್ದ ಸಯಾಮಿ ಖೇರ್‌ ಬಿಲ್‌ಕುಲ್ ತೆಪ್ಪಗಾದಳು. ಪಾಪ, ಏನು ಮಾಡಲಾದೀತು? ಸುಮಾರು ದಿನಗಳ ನಂತರ ಇದೀಗ ಆಕೆ ಮರಾಠಿ `ಮೌಳಿ’ ಚಿತ್ರದಿಂದ ಮತ್ತೆ ಕಾಣಿಸಲಿದ್ದಾಳೆ. ಆಲ್ ದಿ ಬೆಸ್ಟ್ ಸಯಾಮಿ!
ನುಸ್ರತ್‌ಳ ಫಿಟ್ನೆಸ್ ಫಂಡಾ
`ಪ್ಯಾರ್‌ ಕಾ ಪಂಚ್‌ ನಾಮಾ’ ಚಿತ್ರದಿಂದ ಹೆಸರು ಗಳಿಸಿದ ನುಸ್ರತ್‌ ಭರೂಚಾಳ ಪ್ರಕಾರ, ಪ್ರತಿ ಹೆಂಗಸೂ ಸೈಜ್‌ ಆಗಿರಲು ಸಾಧ್ಯವಿಲ್ಲವಂತೆ. ಸೈಜ್‌ ಅಂದ್ರೆ ಆ ಹೆಣ್ಣು ಪರ್ಫೆಕ್ಟ್ ಫಿಟ್‌ ಎಂದೇನಲ್ಲ. ನಿಮ್ಮ ಬಾಡೀಗೆ ತಕ್ಕಂತೆ ಅದನ್ನು ಟೋನ್‌ ಮಾಡಿ, ಆರೋಗ್ಯಕರ ಆಹಾರ ಸೇವನೆಯೇ ಫಿಟ್ನೆಸ್ ಎನ್ನುತ್ತಾಳೆ, ಮಾತಂತೂ ನಿಜ. ನೀವೇನಂತೀರಿ?
ಅರ್ಶದ್‌ಗೆ ಸುಪ್ರೀಂ ಕೋರ್ಟ್‌ ಕಟಾಕ್ಷ
ಸುಪ್ರೀಂ ಕೋರ್ಟ್‌ ಯಾವಾಗ ವಿವಾಹೇತರ ಸಂಬಂಧವನ್ನು ಅಪರಾಧವಲ್ಲ ಎಂದು ಸಾರಿತೋ ಅರ್ಶದ್‌ ವಾರ್ಸಿ (ಮುನ್ನಾಭಾಯಿಯ ಸರ್ಕಿಟ್‌)ಯಂಥವರಿಗೆ ನಿರಾಳವಾಗಿ ಉಸಿರಾಡುವಂತಾಗಿದೆ. ಅಸಲಿಗೆ ಅರ್ಶದ್‌ ಈಗ ಪ್ರಕಾಶ್‌ರವರ `ಫ್ರಾಡ್‌ ಸೈಯಾ’ ಚಿತ್ರದಲ್ಲಿ ನಟಿಸುತ್ತಿದ್ದಾನೆ. ಇದರಲ್ಲಿ ಈತ ಬೇರೆ ಬೇರೆ ನಗರಗಳಲ್ಲಿ ವಿಭಿನ್ನ ಹುಡುಗಿಯರನ್ನು ವರಿಸಿರುವ ಪಾತ್ರವಂತೆ. ವಿವಾಹೇತರ ಸಂದರ್ಭಗಳೇ ಪ್ರಧಾನವಾಗಿರುವ ಈ ಚಿತ್ರ ಈ ತಿಂಗಳ ಕೊನೆಯಲ್ಲಿ ತೆರೆಕಾಣಲಿದೆ.
ಇಮ್ರಾನ್‌ನ ಚೀಟ್‌ ಇಂಡಿಯಾ
ಕಿಸ್ಸಿಂಗ್‌ ಬಾಯ್‌ ಇಮ್ರಾನ್‌ ಹಶ್ಮಿ ಬಹಳ ಕಾಲದ ನಂತರ `ಚೀಟ್‌ ಇಂಡಿಯಾ’ ಚಿತ್ರದ ಮೂಲಕ ಕಾಣಿಸಲಿದ್ದಾನೆ. ಇತ್ತೀಚೆಗೆ ಇದರ ಟೀಸರ್‌ ರಿಲೀಸ್‌ ಆಯ್ತು. ಪರೀಕ್ಷೆಯಲ್ಲಿ ಕಾಪಿ ಸಮಸ್ಯೆ ಹಾಗೂ ಅದರ ದಂಧೆ ಸುತ್ತ ಹೆಣೆಯಲಾದ ಈ ಚಿತ್ರ ಈ ತಿಂಗಳೇ ರಿಲೀಸ್‌ ಆಗಲಿದೆ. ನಿರ್ದೇಶಕರು ಈ ಗಂಭೀರ ಸಮಸ್ಯೆಯನ್ನು ಹೇಗೆ ಡೀಲ್‌ ಮಾಡಿದ್ದಾರೋ, ನೋಡಿಯೇ ತಿಳಿಯಬೇಕು.
