- ರಾಘವೇಂದ್ರ ಅಡಿಗ ಎಚ್ಚೆನ್.
'ನನ್ನ ಗೆಳತಿ ನನ್ನ ಗೆಳತಿ ನನ್ನ ನೋಡಿ ನೀ ನಗತಿ..'- ಈ ಹಾಡನ್ನು ಕೇಳಿದರೆ, ತಕ್ಷಣ ನೆನಪಾಗುತ್ತಿದ್ದವರು ಗಾಯಕ ಮಂಜುನಾಥ ಸಂಗಳದ. ಹೌದು, ಉತ್ತರ ಕರ್ನಾಟಕ ಜಾನಪದ ಶೈಲಿಯ ಈ ಹಾಡನ್ನು ರಾಜ್ಯಾದ್ಯಂತ ಮೆಚ್ಚದವರಿಲ್ಲ. ಇಂತಹ ಹಾಡನ್ನು ಬರೆದು ಹಾಡಿದ್ದ ಗಾಯಕ ಮಂಜುನಾಥ ಸಂಗಳದ ವಿಧಿವಶರಾಗಿದ್ದಾರೆ.
ಹೌದು, ಕರ್ನಾಟಕದ ಜೊತೆಗೆ ದೇಶದ ವಿವಿಧ ರಾಜ್ಯಗಳಲ್ಲೂ ಸದ್ದು ಮಾಡಿದ್ದ 'ನನ್ನ ಗೆಳತಿ ನನ್ನ ಗೆಳತಿ ನನ್ನ ನೋಡಿ ನೀ ನಗತಿ..' ಹಾಡಿನ ರಚನೆಕಾರ ಮತ್ತು ಹಾಡುಗಾರ ಮಂಜುನಾಥ ಸಂಗಳದ ತಾರಿಹಾಳ ಗ್ರಾಮದಲ್ಲಿ ವಿಧಿವಶರಾಗಿದ್ದಾರೆ. ಪತ್ನಿ, ಇಬ್ಬರು ಮಕ್ಕಳನ್ನು ಅವರು ಅಗಲಿದ್ದಾರೆ. ಉತ್ತರ ಕರ್ನಾಟಕದ ಅತ್ಯುತ್ತಮ ಹಾಡುಗಾರರಾಗಿ ಹೆಸರು ಪಡೆದಿದ್ದ ಮಂಜುನಾಥ, ಕೆಲವು ದಿನಗಳ ಹಿಂದಷ್ಟೇ ಎಪಿಎಂಸಿ ಚುನಾವಣೆಯ ಸಂಬಂಧವಾಗಿ ಒಂದಷ್ಟು ಓಡಾಡಿಕೊಂಡಿದ್ದರು.
ಹುಬ್ಬಳ್ಳಿಯ ತಾರಿಹಾಳ ಗ್ರಾಮದ ಮಂಜುನಾಥ್ ಸಂಗಳದ ಅವರು ಶನಿವಾರ (ಏ.12) ಹೃದಯಾಘಾತದಿಂದ ಸಾವನ್ನಪ್ಪಿದ್ದಾರೆ. ಭಜನೆ ಹಾಡಿನ ಮೂಲಕ ಬೆಳಕಿಗೆ ಬಂದು ತದನಂತರ ಜಾನಪದ ಹಾಡುಗಾರರಾಗಿ ಹೊರಹೊಮ್ಮಿದ್ದರು ಮಂಜುನಾಥ ಸಂಗಳದ. ನೂರಾರು ಜಾನಪದ ಹಾಡುಗಳನ್ನು ಬರೆದು ಹಾಡಿದ್ದರು ಮಂಜುನಾಥ. ಆದರೆ 'ನನ್ನ ಗೆಳತಿ ನನ್ನ ಗೆಳತಿ ನನ್ನ ನೋಡಿ ನೀ ನಗತಿ..' ಹಾಡಿನಿಂದ ಮಂಜುನಾಥ ಸಂಗಳದಗೆ ಅಪಾರ ಜನಮನ್ನಣೆ ನೀಡಿತ್ತು. ಈ ಹಾಡನ್ನು ಯೂಟ್ಯೂಬ್ನಲ್ಲಿ ಈ ಹಾಡು ಮಿಲಿಯನ್ಗಟ್ಟಲೇ ವೀವ್ಸ್ ಪಡೆದುಕೊಂಡಿರುವುದೇ ಇದಕ್ಕೆ ಸಾಕ್ಷಿ ಆಗಿದೆ.
ಅಸಲಿಗೆ, 'ನನ್ನ ಗೆಳತಿ ನನ್ನ ಗೆಳತಿ ನನ್ನ ನೋಡಿ ನೀ ನಗತಿ..' ಹಾಡನ್ನು ಮಂಜುನಾಥ ಸಂಗಳದ ಅವರು ಬರೆಯಲು ಕಾರಣ, ಅವರ ಗೆಳೆಯನ ಲವ್ ಸ್ಟೋರಿ. ಊರಿನ ಜಾತ್ರೆಯಲ್ಲಿ ಸ್ನೇಹಿತ ಪ್ರೀತಿ ಹುಡುಗಿ ತಲೆಮೇಲೆ ಕುಂಭ ಹೊತ್ತುಕೊಂಡು ಬರುವಾಗ ಈ 'ನನ್ನ ಗೆಳತಿ ನನ್ನ ಗೆಳತಿ..' ಹಾಡನ್ನು ಮಂಜುನಾಥ ಬರೆದಿದ್ದರಂತೆ. ಮುಂದೆ ಅದೇ ಹಾಡು ಅವರಿಗೆ ದೊಡ್ಡಮಟ್ಟದ ಜನಪ್ರಿಯತೆನ್ನು ತಂದುಕೊಟ್ಟಿತ್ತು. ಈ ಹಾಡು ಹಿಟ್ ಆದಮೆಲೆ ಅನೇಕರು ಆ ಟ್ಯೂನ್ ಅನ್ನು ಕಾಪಿ ಮಾಡಿ ಬಳಸಿಕೊಂಡಿದ್ದಕ್ಕೆ ಮಂಜುನಾಥಗೆ ಬೇಸರು ಉಂಟಾಗಿತ್ತಂತೆ. ಉತ್ತರ ಕರ್ನಾಟಕದ ಓರ್ವ ಪ್ರತಿಭಾವಂತ ಕಲಾವಿದನ್ನು ಕಳೆದುಕೊಂಡಿರುವುದು ನಿಜಕ್ಕೂ ದುರದೃಷ್ಟಕರ. ಈ ಹಾಡನ್ನು ರಿಮಿಕ್ಸ್ ವರ್ಷನ್ ಕೂಡ ರಿಲೀಸ್ ಆಗಿವೆ.
ಇನ್ನು, ಸರಿಗಮಪ ಶೋನಲ್ಲಿ ಪುಟಾಣಿ ಗಾಯಕ ಅರ್ಜುನ್ ಇಟಗಿ ಇದೇ ಹಾಡನ್ನು ಹಾಡಿ, ಇನ್ನಷ್ಟು ಫೇಮಸ್ ಆಗಿದ್ದ. ಆ ಸಂದರ್ಭದಲ್ಲೇ ಇದರ ಮೂಲ ಗಾಯಕ ಮತ್ತ ರಚನಕಾರರಾದ ಮಂಜುನಾಥ ಸಂಗಳದ ಅವರು ಹೆಚ್ಚು ಬೆಳಕಿಗೆ ಬಂದರು. ಮಂಜುನಾಥ ಸಂಗಳದ ನಿಧನಕ್ಕೆ ಸಂಗೀತ ಪ್ರಿಯರು, ಅಭಿಮಾನಿಗಳು, ಸ್ನೇಹಿತರು ಸಂತಾಪ ಸೂಚಿಸಿದ್ದಾರೆ.