ಕಿಯಾರಾಳ ಬೋಲ್ಡ್ ಇಮೇಜ್
ಬಾಲಿವುಡ್ನ ಹೊಸ ಹುಡುಗಿ ಕಿಯಾರಾ ಇತ್ತೀಚೆಗೆ ತನ್ನ ಸೆಕ್ಸೀ ಬಾಡಿಯನ್ನು ಫೇಸ್ಬುಕ್ ಇತ್ಯಾದಿಗಳಲ್ಲಿ ಬೇಕೆಂದೇ ಧಾರಾಳ ಪ್ರದರ್ಶಿಸುತ್ತಿದ್ದಾಳೆ. ಒಂದು ಚಿತ್ರದ ನಂತರ ಮತ್ತೊಂದು ಸಿಗಲು ಬಹಳ ತಡವಾದಾಗ, ಕಿಯಾರಾ ಮತ್ತೇನು ಮಾಡಿಯಾಳು? ಜನರ ಮನಸ್ಸಿನಿಂದ ತಾನು ಅಳಿಸಿ ಹೋಗಬಾರದೆಂದು ಈ ರೀತಿ ಏನೇನೋ ಸರ್ಕಸ್ ಮಾಡುತ್ತಿದ್ದಾಳೆ. ಬರಲಿರುವ ದಿನಗಳಲ್ಲಿ ಅವಳು `ಕಬೀರ್ ಸಿಂಗ್, ಕಳಂಕ್, ಗುಡ್ ನ್ಯೂಸ್’ ಮುಂತಾದ ಚಿತ್ರಗಳಲ್ಲಿ ಮೋಸ್ಟ್ ಗ್ಲಾಮರಸ್ ಆಗಿ ಕಾಣಿಸಲಿದ್ದಾಳೆ.
ಹಾಲಿವುಡ್ ರೀಮೇಕ್ ಚಿತ್ರದಲ್ಲಿ ಆಮೀರ್
ಅಮೀರ್ ಖಾನ್ ತನ್ನ ಲುಕ್ಸ್, ಹಾಗೂ ಬಾಡಿ ಬಗ್ಗೆ ಕೆಲಸ ಮಾಡಲು ಶುರು ಮಾಡಿದ ತಕ್ಷಣ, ಮೀಡಿಯಾದಲ್ಲಿ ಟೆನ್ಶನ್ ಉಂಟಾಗುತ್ತದೆ. ಈಗ ಮಿಸ್ಟರ್ ಪರ್ಫೆಕ್ಷನಿಸ್ಟ್ ಯಾವ ಮೋಡಿ ಮಾಡಲಿದ್ದಾನೋ ಎಂದು ಎಲ್ಲರೂ ಕಾಯುತ್ತಾರೆ. ಇದೀಗ ಆಮೀರ್ ಆಸ್ಕರ್ ಅವಾರ್ಡ್ ವಿನ್ನರ್ ಫಿಲ್ಮ್ `ಫಾರೆಸ್ಟ್ ಜಂಪ್’ನ ಬಾಲಿವುಡ್ ರೀಮೇಕ್ `ಲಾಲ್ಸಿಂಗ್ ಚಡ್ಡ’ ಚಿತ್ರದಲ್ಲಿ ಸರ್ದಾರ್ಜಿ ಪಾತ್ರ ವಹಿಸುತ್ತಿದ್ದಾನೆ. ಆದರೆ ಈ ಚಿತ್ರಕ್ಕಾಗಿ ಜನ ಇನ್ನೂ ಕಾಯಬೇಕು.
ಸ್ಪೈ ಚಿತ್ರ ಎಲ್ಲರಿಗೂ ಸೈ!
ಹಾಲಿವುಡ್ ಅಥವಾ ಬಾಲಿವುಡ್ ಇರಲಿ, ಪತ್ತೇದಾರಿ ಸ್ಪೈ ಚಿತ್ರಗಳು ಎಲ್ಲೆಡೆ ಮಾನ್ಯ. ಎಲ್ಲಾ ವರ್ಗದ ವೀಕ್ಷಕರಿಗೂ ಬೇಕೇಬೇಕು. ಹೀಗಿರುವಾಗ ಬಾಲಿವುಡ್ನ ಸ್ಪೈ ಮೂವಿ ಭಾರತ-ಪಾಕ್ಗೆ ಸಂಬಂಧಿಸಿದ್ದರೆ, ಮತ್ತೇನು ಹೇಳುವುದು? ಜಾನ್ ಅಬ್ರಹಾಂನ ಬರಲಿರುವ ಚಿತ್ರ `ರೋಮಿಯೋ ಅಕ್ಬರ್ ವಾಲ್ಟರ್’ ಇಂಥ ಜಾಸೂಸ್ ಕಥೆ ಹೊಂದಿದೆ. ಹೀರೋ ಪಾಕ್ಗೆ ನುಗ್ಗಿ ಅಲ್ಲಿನ ಡಿಫೆನ್ಸ್ ರಹಸ್ಯ ಭೇದಿಸುವುದೇ ಇದರ ಮರ್ಮ. ವೀಕ್ಷಕರಿಗೆ ಇದು ಎಷ್ಟು ರುಚಿಸುತ್ತದೆ ಎಂಬುದನ್ನು ಚಿತ್ರದ ಬಿಡುಗಡೆ ನಂತರವೇ ತಿಳಿಯಬೇಕು.
ಹಾಸ್ಯ ಅಪಹಾಸ್ಯ ಆಗಬಾರದಷ್ಟೆ
ಈ ಮಾತನ್ನು ನಾವು ಹೇಳುತ್ತಿಲ್ಲ, ಬದಲಿಗೆ `ಪ್ಯಾರ್ ಕೇ ಪಾಪಡ್’ ಧಾರಾವಾಹಿಯಲ್ಲಿ ಮಾನವ್ ಪಾತ್ರ ನಿರ್ವಹಿಸುತ್ತಿರುವ ಅಖಿಲೇಂದ್ರ ಮಿಶ್ರಾ ಹೇಳುತ್ತಿದ್ದಾರೆ. ಇತ್ತೀಚಿನ ಕಿರುತೆರೆ ಕಾಮಿಡಿ ಯಾಕೋ ಸರಿ ಇಲ್ಲ ಎಂಬುದು ಅವರ ಅಭಿಮತ. ಈ ಧಾರಾವಾಹಿಯಲ್ಲಿ ಮಾವ ಅಳಿಯನ ಮಧ್ಯೆ ನಡೆಯುವ ಲಟಾಪಟಿಯೇ ಕಥಾವಸ್ತು. ಆದರೆ ಅದು ಅಶ್ಲೀಲತೆಯ ಗಡಿಗೆ ನುಸುಳಬಾರದು ಎನ್ನುತ್ತಾರೆ. ಇದರಲ್ಲಿ ಅಳಿಯನ ಪಾತ್ರ ವಹಿಸಿದವರು ಅಕ್ಷಯ್ ಮಿಶ್ರಾ.
ನಾನೂ ಲೈಂಗಿಕ ಶೋಷಣೆಗೆ ಒಳಗಾದವಳೇ!
ದಬಂಗ್ ಗರ್ಲ್ ಫಾತಿಮಾ ಸನಾ ಶೇಕ್ ಒಮ್ಮೆ ತನ್ನ ಬೋಲ್ಡ್ ಲುಕ್ಸ್, ಮತ್ತೊಮ್ಮೆ ಸಡಿಲ ಮಾತುಗಳಿಂದಾಗಿ ಚರ್ಚೆಯಲ್ಲಿರುತ್ತಾಳೆ. ಇತ್ತೀಚೆಗೆ ಅವಳು ತಿಳಿಯಪಡಿಸಿದ ವಿಷಯವೆಂದರೆ, ತಾನೂ ಲೈಂಗಿಕ ಶೋಷಣೆಗೆ ಒಳಗಾದವಳಂತೆ! ಪತ್ರಕರ್ತರು ಇದು ಯಾವಾಗ ಹೇಗಾಯಿತು ಎಂದು ಕೇಳಿದಾಗ, ಅದೆಲ್ಲ ಹೇಳಲು ಈಗ ಸಮಯ ತಕ್ಕುದಲ್ಲ, ಮುಂದೆ ನೋಡೋಣ ಎನ್ನುತ್ತಾಳೆ. ಇದೊಳ್ಳೆ ಕಥೆ ಕಣ್ರಿ, ಇದನ್ನು ಹೇಳಲಿಕ್ಕೂ ಮುಹೂರ್ತ ಬೇಕೇ?
ಮತ್ತೆ ಬರಲಿದ್ದಾಳೆ ಅಥಿಯಾ
ನಾಯಕಿ ಅಥಿಯಾಳ ಆರಂಭಿಕ ಚಿತ್ರಗಳಾದ `ಹೀರೋ, ಮುಬಾರ್ಕಾ’ ವೀಕ್ಷಕರಿಗೆ ಇಷ್ಟವಾಗದ ಕಾರಣ ಮಖಾಡೆ ಮಲಗಿತು. ಅಷ್ಟು ಮಾತ್ರಕ್ಕೆ ಇವಳು ಸೋಲೊಪ್ಪುವಳೇ? ಈ ತಿಂಗಳಾಂತ್ಯದಲ್ಲಿ ಇವಳ `ಮೋತಿ ಚೂರ್ ಚಕ್ನಾ ಚೂರ್’ ಚಿತ್ರ ಬಿಡುಗಡೆ ಕಾಣಲಿದೆ. ಈ ಚಿತ್ರದಲ್ಲಿ ನಾಯಕ ಎಂದರೆ ನಾಜುದ್ದೀನ್ ಸಿದ್ದಿಕಿ. ನಾಜ್ ಹಿಟ್ ಚಿತ್ರ ನೀಡುತ್ತಿರುವುದರಿಂದ ಆ ನೆಪದಲ್ಲಿ ಅಥಿಯಾಗೆ ಪಾಸ್ ಮಾರ್ಕ್ಸ್ ಸಿಗಬಹುದೇ….? ನೋಡೋಣ.
ಬದುಕಲು ಕಲಿಯಿರಿ ಇಂಥವರಿಂದ
ಭಾರತೀಯ ಸಮಾಜದಲ್ಲಿ ಮದುವೆಯ ಬಂಧನ ಬಿಡಿಸಲಾಗದ್ದು. ಇಷ್ಟವಿಲ್ಲದಿದ್ದರೂ ಎಷ್ಟೋ ದಂಪತಿ ಮಕ್ಕಳ ಸಲುವಾಗಿ ಸಂಸಾರ ಸಾಗಿಸುತ್ತಾರೆ. ಇಂಥವರು ಬಾಲಿವುಡ್ ಕಪಲ್ಸ್ ನ್ನು ಕಂಡು ಪಾಠ ಕಲಿಯಬೇಕು. ಅರ್ಬಾಜ್ ಖಾನ್ನಿಂದ ಡೈವೋರ್ಸ್ ಪಡೆದ ಮಲೈಕಾ ಅರೋರಾ, ಅವಿವಾಹಿತ ಅರ್ಜುನ್ ಕಪೂರ್ ಜೊತೆ ಬೆರೆತು ಖುಷಿಯಾಗಿದ್ದಾಳೆ. ಅದೇ ರೀತಿ ಅರ್ಬಾಜ್ ಕೂಡಾ ಜಾರ್ಜಿಯಾಳನ್ನು ಸಂಗಾತಿಯಾಗಿ ಪಡೆದಿದ್ದಾನೆ. ಉತ್ತಮ ವಿಚಾರವೆಂದರೆ, ಈ ಮಾಜಿಗಳು, ಪರಸ್ಪರರ ಜೀವನದಲ್ಲಿ ಮೂಗು ತೂರಿಸುವುದಿಲ್ಲ. ಬದುಕು ಎದುರಿಸಬೇಕೇ? ಅದನ್ನು ಇಂಥವರಿಂದ ಕಲಿಯಿರಿ.
ಮಿಂಚುತ್ತಿರುವ ಕಾರ್ತಿಕ್
ಚಿತ್ರಗಳಿರಲಿ, ಡೇಟಿಂಗ್ ಇರಲಿ, ನಟ ಕಾರ್ತಿಕ್ ಎರಡೂ ಕಡೆ ಮಿಂಚುತ್ತಿದ್ದಾನೆ! `ಲುಕಾಛಿಪಿ’ ಚಿತ್ರದ ನಂತರ, ಕಾರ್ತಿಕ್ ಸಾರಾ ಆಲಿಖಾನ್ ಜೊತೆ `ಲವ್ ಆಜ್ಕಲ್-2′ ಚಿತ್ರದ ಶೂಟಿಂಗ್ ಆರಂಭಿಸಿದ್ದಾನೆ. ಇಂದಿನ ನಿರ್ಮಾಪಕ ನಿರ್ದೇಶಕರು ಈ ಜೋಡಿಯೇ ನಮ್ಮ ಚಿತ್ರಕ್ಕಿರಲಿ ಎಂದು ಬಯಸುತ್ತಿದ್ದಾರೆ. ಇದೀಗ ಇವನ ಡೇಟಿಂಗ್ ಸುದ್ದಿ ಕೇಳಿ. ಅತ್ತ ಸಾರಾ, ಇತ್ತ ಅನನ್ಯಾ ಪಾಂಡೆ ಎಂಬಂತೆ ಈತ ಎರಡೂ ದೋಣಿಗಳಲ್ಲಿ ಪ್ರೇಮಯಾನ ನಡೆಸುತ್ತಾ ಫಿಲ್ಮಿ ಫೋಟೋಗ್ರಾಫರ್ಸ್ಗೆ ಸಿಕ್ಕಿಬಿದ್ದಿದ್ದಾನೆ. ಏಕಕಾಲಕ್ಕೆ ಎರಡು ದೋಣಿ ಯಾನ…. ಯಾರಿಗುಂಟು ಯಾರಿಗಿಲ್ಲ?
ಟೈಗರ್ ಅಂದ್ರೆ ತಂದೆಗೆ ಖುಷಿಯೋ ಖುಷಿ!
ಬಾಲಿವುಡ್ನ ಸೀನಿಯರ್ ಸ್ಟಾರ್ ಜಾಕಿ ಶ್ರಾಫ್ರನ್ನು ಅವರ ಮಗ ಟೈಗರ್ ಶ್ರಾಫ್ ಮತ್ತು ದಿಶಾ ಪಟಾನಿಯ ಅಫೇರ್ ಕುರಿತು ಪ್ರಶ್ನಿಸಿದಾಗ, ತಮ್ಮ ಚಿರಪರಿಚಿತ ಮುಗುಳ್ನಗು ಬೀರುತ್ತಾ ಜಾಕಿ, `ಅವರ ದೋಸ್ತಿ ನನಗೆ ಖುಷಿ ತಂದಿದೆ. ಅಷ್ಟು ಮಾತ್ರವಲ್ಲ, ಟೈಗರ್ 25ರ ಹರೆಯದ ಹೊತ್ತಿಗೆ ತನ್ನ ಜೀವನದ ಗಟ್ಟಿ ನಿರ್ಧಾರ ತೆಗೆದುಕೊಳ್ಳುವಷ್ಟು ಸಮರ್ಥನಾಗಿದ್ದಾನೆ ಎಂದು ಹೆಮ್ಮೆಯಾಗುತ್ತಿದೆ,’ ಎಂದರು.
ಕೀರ್ತಿ ಹೊರಟಳು ಬಾಲಿವುಡ್ಗೆ
ತಮಿಳು, ತೆಲುಗು, ಮಲೆಯಾಳಂ ಚಿತ್ರಗಳಲ್ಲಿ ಖ್ಯಾತಳಾದ ಕೀರ್ತಿ ಸುರೇಶ್ ಇದೀಗ ಬಾಲಿವುಡ್ಗೆ ಹೊರಟಿದ್ದಾಳೆ. ಅಜಯ್ ದೇವಗನ್ ನಟಿಸುತ್ತಿರುವ ಫುಟ್ಬಾಲ್ ಆಟಗಾರನ ಕುರಿತಾದ ಬಯೋಪಿಕ್ ಚಿತ್ರದಲ್ಲಿ ಕೀರ್ತಿಗೆ ಗ್ರ್ಯಾಂಡ್ ಎಂಟ್ರಿ ದೊರೆಯಲಿದೆ. ಉತ್ತರದಲ್ಲಿ ಕೀರ್ತಿಯ ಕೀರ್ತಿಪತಾಕೆ ಹರಡಲಿದೆಯೇ? ಕಾಲವೇ ತಿಳಿಸಬೇಕು.
ಜ್ಯಾಕಿ ಜೊತೆ ಅಮಾಯ್ರಾ
2 ವರ್ಷಗಳ ಹಿಂದಿನ ಚಿತ್ರವಾದ `ಕುಂಗ್ಫೂ ಯೋಗ’ ನಿಮಗೆ ನೆನಪಿರಬಹುದು. ನೆನಪಾಗುತ್ತಿಲ್ಲವೇ? ಬಿಡಿ, ಏನೂ ಚಿಂತೆ ಇಲ್ಲ. ನೆನಪಿಡಲಿಕ್ಕೆ ಅದರಲ್ಲಿ ಅಂಥಾದ್ದೇನೂ ಇರಲಿಲ್ಲ. ಆದರೆ…. ಈ ಚಿತ್ರದಲ್ಲಿ ಜ್ಯಾಕಿ ಚಾನ್ ಜೊತೆ ಅಮಾಯ್ರಾ ದಸ್ತೂರ್ ನಟಿಸಿದ್ದಳು. ಇತ್ತೀಚೆಗೆ ಜ್ಯಾಕಿ ಅಮಾಯ್ರಾಳಿಗೆ ಒಂದು ಪುಸ್ತಕನ್ನು ಗಿಫ್ಟ್ ಕೊಟ್ಟಾಗ, ಅವಳಿಗಂತೂ ಆಶ್ಚರ್ಯವೋ ಆಶ್ಚರ್ಯ! ಅಂಥ ಸೂಪರ್ ಸ್ಟಾರ್ ತನ್ನಂಥ ಹೊಸ ನಟಿಯನ್ನು ನೆನಪಿಡುವುದೇ? ಲಕ್ಕಿಗರ್ಲ್…. ಅಮಾಯ್ರಾ!
ಭಯವೇಕೆ? ಅಲರ್ಟಾಗಿರಿ!
ಸಾಮಾನ್ಯವಾಗಿ ಟಿ.ವಿ. ಧಾರಾವಾಹಿಗಳು ಅತ್ತೆ-ಸೊಸೆ ಕಥೆ ಹೇಳುವುದೇ ಹೆಚ್ಚು. ಆದರೆ ಸ್ಟಾರ್ ಭಾರತ್ ಚ್ಯಾನೆಲ್ನಲ್ಲಿ ಪ್ರಸಾರವಾಗುತ್ತಿರುವ `ಏಕ್ ಥಿ ರಾಣಿ ಏಕ್ ಥಾ ರಾಜಾ’ ತುಸು ವಿಭಿನ್ನವಾಗಿ ಮೂಡಿಬರುತ್ತಿದೆ. ಮಹಿಳೆಯರ ಸುರಕ್ಷತೆ, ಸಬಲೀಕರಣದ ಕುರಿತಾದ ಈ ಧಾರಾವಾಹಿ, ಹೆಂಗಸರ ಮೇಲಾಗುವ ದೌರ್ಜನ್ಯ, ಈವ್ ಟೀಸಿಂಗ್ ಎಲ್ಲವನ್ನೂ ಚರ್ಚಿಸುತ್ತದೆ.