ನಿಕಿಶಾ ಪ್ರೆಗ್ನೆಂಟ್‌.....!
ಇದೇನಪ್ಪ ನಿಕಿಶಾ ಬಗ್ಗೆ ಇಂಥ ಢಮಾರ್‌ ಸುದ್ದಿ ಅಂತ ಅಚ್ಚರಿಪಟ್ಟರೂ ಆಶ್ಚರ್ಯವಿಲ್ಲ. ಸಾಮಾಜಿಕ ತಾಣದಲ್ಲಿ ತಾರೆಯರು ತಮಗೆ ಇಷ್ಟ ಬಂದಂತೆ ಫೋಟೋ ಹಾಕಿಕೊಂಡು ಏನಾದರೂ ಬರೆಯುತ್ತಲೇ ಇರುತ್ತಾರೆ. ತನ್ನ ಅಭಿಮಾನಿಗಳನ್ನು ನೇರವಾಗಿ ಸಂಪರ್ಕಿಸುವ ಇವರುಗಳು ಆಗಾಗ್ಗೆ ಇಂಥ ಸುದ್ದಿ ಕೊಡುತ್ತಿರುತ್ತಾರೆ. ಇತ್ತೀಚೆಗೆ ನಿಕಿಶಾ ಲಂಡನ್‌ನಲ್ಲಿ ತನ್ನ ಕುಟುಂಬದ ಜೊತೆ ಜಾಲಿ ಟ್ರಿಪ್‌ಗೆಂದು ಹೋಗಿದ್ದಾಗ ಅಲ್ಲಿ ಸಮುದ್ರದ ತೀರದಲ್ಲಿ ಮರಳು ಗುಪ್ಪೆಯನ್ನು ಹೊಟ್ಟೆ ಮೇಲೆ ಹಾಕಿಕೊಂಡು ತಮಾಷೆ ಮಾಡುತ್ತಾ ಪ್ರೆಗ್ನೆಂಟ್‌ ಫನ್‌ ಎಂದು ಬರೆದುಕೊಂಡಿದ್ದಾಳೆ. ಮೊದಲಿಗೆ ಅಚ್ಚರಿ ಪಟ್ಟ ಆಕೆಯ ಅಭಿಮಾನಿಗಳು ಫೋಟೋ ನೋಡಿ ಬಿದ್ದು ಬಿದ್ದು ನಕ್ಕಿದ್ದರಂತೆ. ಒಟ್ಟಿನಲ್ಲಿ ನಮ್ಮ ತಾರೆಯರು ಹೇಗೋ ಅಂತೂ ಸುದ್ದಿಯಲ್ಲಿರುವುದಂತೂ ಸತ್ಯ.
ಎವರ್‌ ಗ್ರೀನ್‌ ಸುಧಾರಾಣಿ
`ಆನಂದ್‌' ಚಿತ್ರದಲ್ಲಿ ಸ್ಕೂಲ್ ಹುಡುಗಿಯಂತಿದ್ದ ಸುಧಾರಾಣಿ ತನ್ನ ವಯಸ್ಸಿಗೆ ತಕ್ಕಂತೆ ಪಾತ್ರ ನಿರ್ವಹಿಸಿ ಮಿಂಚಿದಂಥ ಕನ್ನಡದ ಹುಡುಗಿ. `ಮೈಸೂರು ಮಲ್ಲಿಗೆ'ಯಾಗಿ ಅಭಿನಯ ನೀಡಿದಳು. ರಾಜ್ಯ ಪ್ರಶಸ್ತಿ ಪಡೆದಳು. ನಾಯಕಿ ಪ್ರಧಾನ ಚಿತ್ರಗಳಲ್ಲಿ ನಟಿಸಿ ಹೆಸರು ಮಾಡಿದಳು. ಇಂದು ಸುಧಾರಾಣಿ ಒಂದು ಹೆಣ್ಣು ಮಗುವಿನ ತಾಯಿ, ತನ್ನೆತ್ತರಕ್ಕೆ ಮಗಳು ಬೆಳೆಯುತ್ತಿದ್ದರೂ ಸುಧಾರಾಣಿ ಮಾತ್ರ ಎವರ್‌ ಗ್ರೀನ್‌ ಆಗಿಯೇ ಕಂಗೊಳಿಸುತ್ತಾಳೆ. `ವಾಸ್ತು ಪ್ರಕಾರ' ಚಿತ್ರದಲ್ಲಿ ಅನಂತ್‌ ನಾಗ್‌ ಪತ್ನಿಯಾಗಿ ಮಿಂಚಿದ್ದ ಸುಧಾ ತನಗೊಪ್ಪುವಂಥ ಪಾತ್ರ ಸಿಕ್ಕರೆ ಮಾತ್ರ ನಟಿಸುವ ಅಭ್ಯಾಸ ಇಟ್ಟುಕೊಂಡಿದ್ದಾಳೆ. ಆಗಾಗ್ಗೆ ಜಾಹೀರಾತುಗಳಲ್ಲೂ ಕಾಣಿಸಿಕೊಳ್ಳುವ ಸುಧಾ ಶಿವಣ್ಣನ ಜೊತೆಗೆ ಚಿನ್ನದ ಆಭರಣದ ಜಾಹೀರಾತಿನಲ್ಲಿ ನಟಿಸಿ ಎಲ್ಲರ ಗಮನ ಸೆಳೆದಿದ್ದಳು. ಇದೀಗ `ಲವ್ ಯೂ ಆಲಿಯಾ' ಚಿತ್ರದಲ್ಲೂ ಸುಧಾರಾಣಿ ಗಮನಾರ್ಹ ಪಾತ್ರವೊಂದರಲ್ಲಿ ಕಾಣಿಸಿಕೊಳ್ಳಲಿದ್ದಾಳೆ. ಪರಭಾಷೆಯಿಂದ ಜನಪ್ರಿಯ ನಟಿಯರನ್ನು ಕರೆತಂದು ಆ್ಯಕ್ಟ್ ಮಾಡಿಸುವ ಕೆಲವು ನಿರ್ದೇಶಕರು ಅಂಥ ಪಾತ್ರಗಳನ್ನು ಸುಧಾರಾಣಿಗೂ ಕೊಡಲಿ ಎಂದಷ್ಟೇ ಹೇಳಬಹುದು.
ವಂಶೋದ್ಧಾರಕನಾಗಿ ವಿಜಯ ರಾಘವೇಂದ್ರ
ರಥಸಪ್ತಮಿ ಅರವಿಂದ್‌ಎಂದೇ ಖ್ಯಾತರಾಗಿದ್ದ ಅರವಿಂದ್‌ ಚಿತ್ರ ನಿರ್ಮಾಣಕ್ಕಿಳಿದಾಗ ತಮ್ಮ ಮೊದಲ ಚಿತ್ರವನ್ನು ಹಳ್ಳಿ ಸೊಗಡಿನ ಬ್ಯಾಗ್‌ ರೌಂಡ್‌ ಇಟ್ಟುಕೊಂಡು ಸಿನಿಮಾ ಶುರು ಮಾಡಿದರು. `ವಂಶೋದ್ಧಾರಕ' ಚಿತ್ರದಲ್ಲಿ ವಿಜಯ ರಾಘವೇಂದ್ರ ಮತ್ತು ಮೇಘನಾ ರಾಜ್‌ ಜೋಡಿಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಚಿತ್ರದ ಚಿತ್ರೀಕರಣ ಮುಗಿದು, ಮೊದಲ ಪ್ರಿಂಟ್ ಬಂದಾಗ ಅರವಿಂದ್‌ ಅವರು ತಮ್ಮ ಚಿತ್ರ ಜನರಿಗೆ ಖಂಡಿತ ಹಿಡಿಸುತ್ತೆ ಎಂದು ನಂಬಿಕೊಂಡು ಸೆನ್ಸಾರ್‌ ಮುಂದೆ ಹೋದಾಗ ಒಂದೇ ಒಂದು ಕಟ್‌ ಕೊಡುವುದರ ಮೂಲಕ ಚಿತ್ರಕ್ಕೆ ಸರ್ಟಿಫಿಕೇಟ್‌ ಪಡೆದರು. ಬಹಳ ದಿನಗಳ ನಂತರ ತಾರೆ ಲಕ್ಷ್ಮಿ ಗಮನಾರ್ಹ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿರುವುದು ವಿಶೇಷ. ಸದ್ಯದಲ್ಲೇ `ವಂಶೋದ್ಧಾರಕ' ತೆರೆ ಕಾಣಲಿದೆ.
ಸ್ಯಾಂಡಲ್‌ವುಡ್‌ನ ಪಟಾಕಿ....
ಕನ್ನಡ ಸಿನಿಮಾ ರಂಗದಲ್ಲೀಗ ಹೊಸ ಹುಡುಗಿಯರದೇ ದರ್ಬಾರು. ಇತ್ತೀಚೆಗೆ `ವಜ್ರಕಾಯ' ಚಿತ್ರದಲ್ಲಿ ಕಾಣಿಸಿಕೊಂಡ ನಭಾ ನಟೇಶ್‌ ತನ್ನ ಬಿಂದಾಸ್‌ ಲುಕ್ಸ್ ನಿಂದ ಪ್ರೇಕ್ಷಕರನ್ನು ಸೆರೆಹಿಡಿದ್ದಾಳೆ. ಕುದುರೆ ಸವಾರಿ ಮಾಡುತ್ತಾ ಕಣ್ಣಿಗೆ ಕಪ್ಪು ಕನ್ನಡಕ ಧರಿಸಿ ಬಾಯಲ್ಲಿ ಬೀಡಿ ಕಚ್ಚಿಕೊಂಡು ತೆರೆ ಮೇಲೆ ಎಂಟ್ರಿ ಕೊಟ್ಟಾಗಲೇ ನಭಾ ಇಂಡಸ್ಟ್ರಿಯಲ್ಲಿ ಭದ್ರವಾಗಿ ತಳವೂರುತ್ತಾಳೆ ಎಂದು ಎಲ್ಲರಿಗೂ ಮನದಟ್ಟಾಗಿತ್ತು. ನಭಾ ನಟೇಶ್‌ ತನ್ನ ಮೊದಲ ಚಿತ್ರದಲ್ಲಿ ಟಾಮ್ ಬಾಯ್‌ ಲುಕ್ಕಿಂದ ಕ್ಲಿಕ್ ಆದಳು. ಹ್ಯಾಟ್ರಿಕ್‌ ಹೀರೋ ಶಿವಣ್ಣ ಜೊತೆ ನಟಿಸಿ ಅಭಿಮಾನಿಗಳನ್ನು ಗಿಟ್ಟಿಸಿಕೊಂಡಳು. ಹೆಚ್ಚು ಪ್ರಚಾರವಿಲ್ಲದೇ ಬಂದಂಥ ನಭಾ ತನ್ನ ಮೊದಲ ಚಿತ್ರದಲ್ಲೇ ಧೂಳೆಬ್ಬಿಸಿ ಜನಪ್ರಿಯಳಾಗುತ್ತಿದ್ದಾಳೆ. ಟಾಮ್ ಬಾಯ್‌ ತರಹದ ರೋಲ್ ಗಳಿಗೆ ಬ್ರಾಂಡ್‌ ಆದರೂ ಆಶ್ಚರ್ಯವಿಲ್ಲ.
