ತಮಿಳು ಚಿತ್ರರಂಗದ ಇಬ್ಬರು ದಿಗ್ಗಜರಾದ ಸೂಪರ್ ಸ್ಟಾರ್ ರಜನಿಕಾಂತ್ ಹಾಗೂ ಕಮಲ್ ಹಾಸನ್ ಅವರು ಒಂದಾಗುವ ಐತಿಹಾಸಿಕ ಸುದ್ದಿ ಚಿತ್ರಪ್ರೇಮಿಗಳಿಗೆ ಹರ್ಷ ನೀಡಿದೆ.
ರಜನಿಕಾಂತ್ ಅವರ 173ನೇ ಚಿತ್ರವಾಗಲಿರುವ ‘ತಲೈವಾ-173’ ಚಿತ್ರದ ನಿರ್ಮಾಪಕರಾಗಿ ಕಮಲ್ ಹಾಸನ್ ಕಾರ್ಯನಿರ್ವಹಿಸಲಿದ್ದಾರೆ. ಇದರ ಮೂಲಕ ದಶಕಗಳಿಂದ ಸ್ನೇಹಿತರಾಗಿರುವ ಈ ಇಬ್ಬರು ಮಹಾನ್ ಕಲಾವಿದರು ಮೊದಲ ಬಾರಿಗೆ ನಿರ್ಮಾಪಕ-ನಟರಾಗಿ ಒಂದುಗೂಡುತ್ತಿರುವುದು ವಿಶೇಷ.
ಕಮಲ್ ಹಾಸನ್ ಅವರು ತಮ್ಮ ಸ್ವಂತ ನಿರ್ಮಾಣ ಸಂಸ್ಥೆಯಾದ ರಾಜ್ ಕಮಲ್ ಫಿಲ್ಮ್ಸ್ ಇಂಟರ್ನ್ಯಾಷನಲ್ ಮೂಲಕ ಈ ಮಹತ್ವಾಕಾಂಕ್ಷಿ ಯೋಜನೆಯನ್ನು ಹಮ್ಮಿಕೊಳ್ಳಲಿದ್ದಾರೆ. ಈ ಚಿತ್ರವು ತಮಿಳು ಸಿನಿಮಾ ಇತಿಹಾಸದಲ್ಲಿ ಒಂದು ಮೈಲಿಗಲ್ಲನ್ನು ನಿರ್ಮಿಸಲಿದೆ ಎಂಬುದು ಚಿತ್ರರಸಿಕರ ನಂಬಿಕೆ.
ಈ ಚಿತ್ರದ ನಿರ್ದೇಶನದ ಜವಾಬ್ದಾರಿಯನ್ನು ನಿರ್ದೇಶಕ ಸಿ. ಸುಂದರ್ ಅವರಿಗೆ ದೊರೆತಿದೆ. ಸಿ. ಸುಂದರ್ ಅವರು ರಜನಿಕಾಂತ್ ಅವರಿಗೆ ‘ಅರುಣಾಚಲಂ’ಮತ್ತು ಕಮಲ್ ಹಾಸನ್ ಅವರಿಗೆ ‘ಅನ್ಬೆ ಸಿವಂ’ನಂತಹ ಸೂಪರ್ ಹಿಟ್ ಚಿತ್ರಗಳನ್ನು ನೀಡಿದ ಖ್ಯಾತಿ ಹೊಂದಿದ್ದಾರೆ. ಇಬ್ಬರು ದಿಗ್ಗಜ ನಟರನ್ನು ಒಂದೇ ಚಿತ್ರದಲ್ಲಿ ಸಂಯೋಜಿಸುವ ಸವಾಲು ಈಗ ಅವರ ಮೇಲಿದೆ.
2027ಕ್ಕೆ ಬಿಡುಗಡೆ: ‘ತಲೈವಾ-173’ ಚಿತ್ರವನ್ನು 2027ರ ಪೊಂಗಲ್ ಹಬ್ಬಕ್ಕೆ ಬಿಡುಗಡೆ ಮಾಡಲು ಚಿತ್ರತಂಡ ಪ್ಲಾನ್ ಮಾಡಿಕೊಂಡಿದೆ.
ಈ ಘೋಷಣೆಯು ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ಚರ್ಚೆಗೆ ಕಾರಣವಾಗಿದ್ದು, ರಜನಿಕಾಂತ್ ಮತ್ತು ಕಮಲ್ ಹಾಸನ್ ಅವರ ಅಭಿಮಾನಿಗಳು ಈ ಐತಿಹಾಸಿಕ ಸಹಯೋಗಕ್ಕೆ ಸಂಭ್ರಮಿಸುತ್ತಿದ್ದಾರೆ. ಇಬ್ಬರು ನಟರೂ ತಮ್ಮದೇ ಆದ ಪ್ರತ್ಯೇಕ ಶೈಲಿ ಮತ್ತು ಅಭಿಮಾನಿ ವರ್ಗವನ್ನು ಹೊಂದಿದ್ದರೂ, ಈ ಚಿತ್ರದ ಮೂಲಕ ಅವರು ತಮಿಳು ಸಿನಿಮಾವನ್ನು ಹೊಸ ಮಟ್ಟಕ್ಕೆ ತಲುಪಿಸಬಹುದು ಎಂಬ ನಿರೀಕ್ಷೆ ಅಭಿಮಾನಿಗಳದ್ದು.
