- ರಾಘವೇಂದ್ರ ಅಡಿಗ ಎಚ್ಚೆನ್.
2015ರಲ್ಲಿ ಬಿಡುಗಡೆಯಾಗಿ ಸೂಪರ್ ಹಿಟ್ ಆಗಿದ್ದ ‘ಕೆಂಡ ಸಂಪಿಗೆ’ ಚಿತ್ರದ ಸೀಕ್ವೆಲ್ ‘ಕಾಗೆ ಬಂಗಾರ’ ಕೊನೆಗೂ ಸೆಟ್ಟೇರಿದೆ. ನಿರ್ದೇಶಕ ಸೂರಿ ಸಾರಥ್ಯದಲ್ಲಿ ಮೂಡಿಬರುತ್ತಿರುವ ಈ ಬಹುನಿರೀಕ್ಷಿತ ಸಿನಿಮಾದಲ್ಲಿ ನಟೇಶ್ ಹೆಗಡೆ ಖಳನಟನಾಗಿ ಕಾಣಿಸಿಕೊಳ್ಳಲಿದ್ದಾರೆ. ರೂಬಿ ಎಂಬ ವಿಲನ್ ಪಾತ್ರಕ್ಕೆ ಅವರು ಬಣ್ಣ ಹಚ್ಚುತ್ತಿದ್ದು, ಚಿತ್ರದ ತಾರಾಗಣ ಮತ್ತು ಕಥಾಹಂದರದ ಬಗ್ಗೆ ಸಿನಿಪ್ರಿಯರಲ್ಲಿ ಕುತೂಹಲ ಹೆಚ್ಚಾಗಿದೆ.
‘ಕಾಗೆ ಬಂಗಾರ’ ಸಿನಿಮಾ ಆರಂಭವಾಗಲು ಸಾಕಷ್ಟು ಸಮಯ ತೆಗೆದುಕೊಂಡಿತ್ತು. ಇದೀಗ ಚಿತ್ರೀಕರಣಕ್ಕೆ ಚಾಲನೆ ಸಿಕ್ಕಿರುವುದು ಅಭಿಮಾನಿಗಳಿಗೆ ಸಂತಸ ತಂದಿದೆ. ಚಿತ್ರದಲ್ಲಿ ಪ್ರಖ್ಯಾತ್ ಸೂರ್ಯ ಮತ್ತು ರಿಥನ್ಯಾ ವಿಜಯ್‌ಕುಮಾರ್ ಮುಖ್ಯಭೂಮಿಕೆಯಲ್ಲಿ ನಟಿಸುತ್ತಿದ್ದಾರೆ. ಇವರ ಜೊತೆಗೆ ನಟೇಶ್ ಹೆಗಡೆ, ಪ್ರಶಾಂತ್ ಸಿದ್ಧಿ, ನಂದ ಕಿಶೋರ್ ಸೇರಿದಂತೆ ಹಲವು ಕಲಾವಿದರು ಅಭಿನಯಿಸುತ್ತಿದ್ದಾರೆ.
ನಟೇಶ್ ಹೆಗಡೆ ನಿರ್ದೇಶನ ಮತ್ತು ನಟನೆಯ ಎರಡೂ ಕ್ಷೇತ್ರಗಳಲ್ಲಿ ಗುರುತಿಸಿಕೊಂಡಿದ್ದಾರೆ. ‘ಪೆದ್ರೊ’ ಹಾಗೂ ‘ವಾಘಚಿಪಾಣಿ’ ಸಿನಿಮಾಗಳನ್ನು ನಿರ್ದೇಶಿಸಿ, ನಟಿಸಿರುವ ಅವರು, ‘ಬಂದರ್’ ಮತ್ತು ‘ರೈಫಲ್ ಕ್ಲಬ್’ ಚಿತ್ರಗಳಲ್ಲಿ ಅತಿಥಿ ಪಾತ್ರಗಳಲ್ಲೂ ಕಾಣಿಸಿಕೊಂಡಿದ್ದರು. ಈಗ ಸೂರಿ ನಿರ್ದೇಶನದ ‘ಕಾಗೆ ಬಂಗಾರ’ದಲ್ಲಿ ನೆಗೆಟಿವ್ ಶೇಡ್ ಇರುವ ರೂಬಿ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿರುವುದು ವಿಶೇಷವಾಗಿದೆ.
ನಟೇಶ್ ಹೆಗಡೆ ಅವರು ನಿರ್ದೇಶಕ ಅನುರಾಗ್ ಕಶ್ಯಪ್ ಜೊತೆ ಉತ್ತಮ ಒಡನಾಟ ಹೊಂದಿದ್ದಾರೆ. ಕಚ್ಚಾ ವಾಸ್ತವಿಕತೆಯೊಂದಿಗೆ ಸಿನಿಮಾ ಕಟ್ಟಿಕೊಡುವ ಶೈಲಿಗೆ ಹೆಸರಾಗಿರುವ ಅನುರಾಗ್ ಕಶ್ಯಪ್ ಮತ್ತು ಸೂರಿ ಅವರ ಚಿತ್ರನಿರ್ಮಾಣದ ದೃಷ್ಟಿಕೋನವನ್ನು ಗಮನಿಸಿದರೆ, ‘ಕಾಗೆ ಬಂಗಾರ’ದಲ್ಲಿ ನಟೇಶ್ ಅವರ ಪಾತ್ರ ಹೇಗಿರಲಿದೆ ಎಂಬ ನಿರೀಕ್ಷೆ ಹೆಚ್ಚಾಗಿದೆ.
ಎಚ್‌ಆರ್‌ಜಿ ಪ್ರೊಡಕ್ಷನ್ ಅಡಿಯಲ್ಲಿ ನಿರ್ಮಾಣವಾಗುತ್ತಿರುವ ಈ ಚಿತ್ರಕ್ಕೆ ಚರಣ್ ರಾಜ್ ಸಂಗೀತ ಸಂಯೋಜನೆ ಮಾಡುತ್ತಿದ್ದಾರೆ. ‘ಕೆಂಡ ಸಂಪಿಗೆ’ ಚಿತ್ರದ ಸೀಕ್ವೆಲ್ ಆಗಿರುವುದರಿಂದ ಕಥೆಯ ಮುಂದುವರಿಕೆ ಮತ್ತು ಪಾತ್ರಗಳ ಹೊಸ ಆಯಾಮಗಳ ಬಗ್ಗೆ ಪ್ರೇಕ್ಷಕರು ಕುತೂಹಲದಿಂದ ಕಾಯುತ್ತಿದ್ದಾರೆ.
ಇನ್ನೊಂದೆಡೆ, ನಟೇಶ್ ಹೆಗಡೆ ಅವರು ಗಣೇಶ್ ಹೆಗಡೆ ನಿರ್ದೇಶನದ ‘ಕುರ್ಕ’ ಸಿನಿಮಾದಲ್ಲೂ ಅಭಿನಯಿಸಿದ್ದಾರೆ. ಈ ವರ್ಷವೇ ಚಿತ್ರವನ್ನು ತೆರೆಗೆ ತರುವ ಯೋಜನೆಯನ್ನು ತಂಡ ಹೊಂದಿದ್ದು, ಶೀಘ್ರದಲ್ಲೇ ಟ್ರೇಲರ್ ಬಿಡುಗಡೆ ಮಾಡಲು ಸಿದ್ಧತೆ ನಡೆಸಿದೆ. ಹೀಗೆ ಒಂದೆಡೆ ‘ಕಾಗೆ ಬಂಗಾರ’ದ ಮೂಲಕ ಸೂರಿ ಜಗತ್ತಿಗೆ ಮರಳುತ್ತಿರುವ ನಟೇಶ್, ಮತ್ತೊಂದೆಡೆ ‘ಕುರ್ಕ’ ಚಿತ್ರದ ಮೂಲಕವೂ ಪ್ರೇಕ್ಷಕರ ಮುಂದೆ ಬರಲು ಸಜ್ಜಾಗಿದ್ದಾರೆ.
