ತೆಲುಗು ಹಾಗೂ ಹಿಂದಿ ಚಿತ್ರಗಳಲ್ಲಿ ಏಕಕಾಲಕ್ಕೆ ನಟಿಸುತ್ತಾ, ವೀಕ್ಷಕರ ಅಪಾರ ಮೆಚ್ಚುಗೆ ಗಳಿಸಿರುವ ವೈಷ್ಣವಿ ಇಲ್ಲಿ ತನ್ನ ಕುರಿತು ಹೇಳಿರುವುದೇನು.....?
ವೈಷ್ಣವಿ ಪಟವರ್ಧನ್ 2016ರಲ್ಲಿ ಮಿಸ್ ಇಂಡಿಯಾ ಸೌಂದರ್ಯ ಸ್ಪರ್ಧೆಯಲ್ಲಿ ಫೈನಲ್ಸ್ ತಲುಪಿದ್ದೇ ಅಲ್ಲದೆ, ಕ್ರಮೇಣ ತೆಲುಗು ಚಿತ್ರಗಳಲ್ಲಿ ಉತ್ತಮ ಪಾತ್ರಗಳನ್ನು ಪಡೆದುಕೊಂಡಳು. ಜೊತೆಗೆ ಕನ್ನಡದ `ಶ್ರೀಮಂತ' ಚಿತ್ರದಲ್ಲೂ ಮಿಂಚಿದ್ದಾಳೆ. ಇದೀಗ ಮತ್ತೊಂದು ಹೆಜ್ಜೆ ಮುಂದುವರಿದು `ವಾಟ್ ಎ ಕಿಸ್ಮತ್' ಚಿತ್ರದ ಮೂಲಕ ಬಾಲಿವುಡ್ ನಲ್ಲಿ ಕಾಣಿಸಿಕೊಂಡು ಬಹು ಚರ್ಚೆಯಲ್ಲಿದ್ದಾಳೆ. ಇದೊಂದು ಕಾಮಿಡಿ ಚಿತ್ರವಾಗಿದ್ದು ಪ್ರಸ್ತುತ ಆಧುನಿಕ ಜೀವನಶೈಲಿಯ ಆಗುಹೋಗುಗಳ ಕಥಾಹಂದರ ಹೊಂದಿದೆ. ವೈಷ್ಣವಿ ಈ ಚಿತ್ರದ ನಾಯಕಿಯಾಗಿ ಬಾಲಿವುಡ್ ನಲ್ಲಿ ಉತ್ತಮ ಹೆಸರು ಗಳಿಸಿದ್ದಾಳೆ.
ತೆಲುಗು, ಹಿಂದಿ ಚಿತ್ರಗಳು ಮಾತ್ರವಲ್ಲದೆ ಈಕೆ ತನ್ನದೇ ಆದ ಒಂದು ಯೂಟ್ಯೂಬ್ ಚಾನೆಲ್ ಹೊಂದಿದ್ದಾಳೆ. ಇದರಲ್ಲಿ ಈಕೆ ಫ್ಯಾಷನ್, ಲೈಫ್ ಸ್ಟೈಲ್ ಕುರಿತು ಬ್ಲಾಗ್ ಬರೆಯುತ್ತಿರುತ್ತಾಳೆ.
`ವಾಟ್ ಎ ಕಿಸ್ಮತ್' ಚಿತ್ರದಲ್ಲಿ ಇವಳದು ಎಂಥ ಪಾತ್ರ? ಬಾಲಿವುಡ್ ನಲ್ಲಿ ಕೆಲಸ ಮಾಡಿದ ಅನುಭವ ದಕ್ಷಿಣಕ್ಕಿಂತ ಹೇಗೆ ವಿಭಿನ್ನ.... ಇತ್ಯಾದಿ ಎಲ್ಲಾ ಪ್ರಶ್ನೆಗಳಿಗೂ ವೈಷ್ಣವಿ ಇಲ್ಲಿ ಉತ್ತರಿಸಿದ್ದಾಳೆ :
`ವಾಟ್ ಎ ಕಿಸ್ಮತ್' ಚಿತ್ರದ ಬಗ್ಗೆ ನಿನಗೆ ಹೆಚ್ಚಿನ ಭರವಸೆ ಉಂಟೆ?
ಇದರ ಕುರಿತಾಗಿ ಭರವಸೆಗಳೇನೋ ಬಹಳ ಇವೆ. ಇದೊಂದು ಲೈಟ್ ಹಾರ್ಟೆಡ್ ಕಾಮಿಡಿ ಚಿತ್ರವಾಗಿದ್ದು, ಜೀವನದ ವಾಸ್ತವಿಕತೆಯನ್ನು ಇಲ್ಲಿ ತೋರಿಸಲಾಗಿದೆ. ಅದರಲ್ಲೂ ನಮ್ಮ ಎಂದಿನ ಜೀವನಶೈಲಿ ಬಲು ಅಸ್ತವ್ಯಸ್ತವಾದಾಗ ಏನಾಗುತ್ತದೆ, ಅದರ ಪರಿಣಾಮಗಳು ಏನಾಗುತ್ತವೆ ಎಂದು ವಿವರವಾಗಿ ತೋರಿಸಲಾಗಿದೆ. ಈ ಚಿತ್ರ ನಮ್ಮ ಪ್ರೇಕ್ಷಕರಿಗೆ ಇಷ್ಟವಾಗಬಹುದು, ಬಾಲಿವುಡ್ ನಲ್ಲಿ ನನ್ನ ಜೀವನ ಮೇಲೇರಬಹುದು ಎಂದೇ ಭಾವಿಸುತ್ತೇನೆ.
ಇದೊಂದು ನಾಯಕ ಪ್ರಧಾನ ಚಿತ್ರ. ಹೀಗಿರುವಾಗ ನಿನಗೆ ಇಲ್ಲಿ ಪವರ್ ಫುಲ್ ಪಾತ್ರ ಸಿಕ್ಕಿದೆಯೇ?
ಈ ಚಿತ್ರದಲ್ಲಿ ನನ್ನ ಪಾತ್ರ ಬಲು ಮಹತ್ವಪೂರ್ಣವಾದುದು. ನಾನು ಈ ಚಿತ್ರದ ನಾಯಕ ಚಂದುವಿನ ಪತ್ನಿ ಆರತಿಯ ಪಾತ್ರದಲ್ಲಿದ್ದೇನೆ. ಅವಳಿಗೆ ತನ್ನದೇ ಆದ ಅನೇಕ ಕನಸುಗಳಿವೆ. ಜೀವನದ ಸಂಘರ್ಷ ಎದುರಿಸಲು ಸಿದ್ಧಳಾಗುತ್ತಾಳೆ, ತನ್ನ ಪತಿಯ ಬಗ್ಗೆ ಅನೇಕ ಭರವಸೆ ಹೊಂದಿರುತ್ತಾಳೆ. ಆದರೆ ಅವನು ಅವಳ ನಿರೀಕ್ಷೆಗೆ ತಕ್ಕಂತೆ ಇರುವುದಿಲ್ಲ. ಆಗ ಅವರಿಬ್ಬರ ನಡುವೆ ಕೋಪ, ಜಗಳ ಹೆಚ್ಚುತ್ತದೆ. ಆ ದೃಷ್ಟಿಯಿಂದ, ನಾಯಕಿ ಇಲ್ಲಿ ಅವನೊಂದಿಗೆ ಜಗಳ ಆಡದಿದ್ದರೆ, ಅವನ ಪಾತ್ರಕ್ಕೆ ಹೇಗೆ ಮಹತ್ವ ಬರಲು ಸಾಧ್ಯ? ಯಾವ ರೀತಿ ಸಂಸಾರದಲ್ಲಿ ಪತಿ ಪತ್ನಿ ಇಬ್ಬರಲ್ಲಿ ಒಬ್ಬರು ಇಲ್ಲದಿದ್ದರೆ ಅದು ಅಪೂರ್ಣವೋ, ಹಾಗೆಯೇ ಸಿನಿಮಾದಲ್ಲಿ ನಾಯಕ ನಾಯಕಿಯರಲ್ಲಿ ಒಬ್ಬರು ಮಿಸ್ ಆದರೂ ಅದು ನಿರರ್ಥಕ ಎನಿಸುತ್ತದೆ. ಇಲ್ಲಿ ನಾಯಕನಿಗೆ ಇರುವಷ್ಟೇ ಪ್ರಾಮುಖ್ಯತೆ ನಾಯಕಿಗೂ ಇದೆ!
ಇದು ನಿನ್ನ ಮೊದಲನೇ ಹಿಂದಿ ಚಿತ್ರವೋ ಅಥವಾ ಇದಕ್ಕೆ ಮೊದಲು ಸಣ್ಣಪುಟ್ಟ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದುಂಟೇ?
