ನಿಮ್ಮ ಸಂಗಾತಿ ತಮ್ಮ ಲುಕ್ಸ್ ಕುರಿತು ನಿರ್ಲಕ್ಷಿಸುತ್ತಾ ತಮ್ಮ ವಯಸ್ಸಿಗಿಂತ ಹಿರಿಯರಾಗಿ ಕಾಣಿಸುತ್ತಾರಾ? ಈ ಹೊಸ ವರ್ಷದಲ್ಲಿ ಅವರು ಅಪ್‌ ಟು ಡೇಟ್‌ ಆಗುವಂತೆ ಸಂಕಲ್ಪ ತೊಡಿಸಿ, ನ್ಯೂ ಇಯರ್‌ಪಾರ್ಟಿಗೆ ಅವರನ್ನು ನೀವೇ ತುಸು ಶ್ರಮವಹಿಸಿ ಹೀಗೇಕೆ ರೆಡಿ ಮಾಡಬಾರದು......?
``ಮೇಘಾ.... ಈ ಸಲದ ನ್ಯೂ ಇಯರ್‌ ಪಾರ್ಟಿಗೆ ನೀನು ನಿನ್ನ ಪತಿ, ಮಗಳ ಜೊತೆ ನಮ್ಮ ಮನೆಗೆ ಬರಲೇಬೇಕು. ಈ ಸಲ ನಮ್ಮ ಎಲ್ಲಾ ಕ್ಲಾಸ್‌ ಮೇಟ್ಸ್ ನೂ ಇನ್ವೈಟ್‌ ಮಾಡಿದ್ದೀನಿ. ಬಹಳ ದಿನಗಳ ನಂತರ ಕುಟುಂಬ ಸಮೇತ ಎಲ್ಲರೂ ಸೇರಿ ಈ ಪಾರ್ಟಿ ಎಂಜಾಯ್‌ ಮಾಡೋಣ,'' ಸ್ನೇಹಾ ತನ್ನ ಬಾಲ್ಯ ಗೆಳತಿಗೆ ಫೋನ್‌ ಮಾಡಿ ತಿಳಿಸಿದಾಗ, ಮೇಘಾ ಸಂತೋಷವಾಗಿ ಒಪ್ಪಿದಳು.
ಸ್ನೇಹಾ ಕೆಲವೇ ದಿನ ಉಳಿದಿದ್ದ ನ್ಯೂ ಇಯರ್‌ ಪಾರ್ಟಿಗಾಗಿ ಒಂದೊಂದೇ ಕೆಲಸಗಳಲ್ಲಿ ತಲ್ಲೀನಳಾದಳು. ಮೇಘಾ ಸ್ನೇಹಾ ಬಾಲ್ಯದಿಂದಲೂ ಸಹಪಾಠಿಗಳಾಗಿ ಬೆಳೆದು ಒಂದೇ ಕಾಲೇಜಿನಲ್ಲಿ ಕಲಿತವರು. ಇಬ್ಬರೂ ಕಲಿಕೆಯಲ್ಲೂ ಮುಂದು, ಬ್ಯೂಟಿ ಫಿಟ್ನೆಸ್ ಫ್ರೀಕ್‌ ನಲ್ಲೂ ಮುಂದಿದ್ದರು. ಸದಾ ಬ್ಯೂಟಿಫುಲ್ ಸ್ಮಾರ್ಟ್‌ ಆಗಿ ಕಾಲೇಜಿನಲ್ಲಿ ಒಳ್ಳೆ ಹೆಸರು ಗಳಿಸಿದ್ದರು. ಇದಕ್ಕಾಗಿ ಇಬ್ಬರೂ ಒಟ್ಟೊಟ್ಟಿಗೆ ಡ್ರೆಸ್‌ ಖರೀದಿ, ಜಿಮ್ ಗೆ ಹೋಗುವುದು, ಕಾಸ್ಮೆಟಿಕ್ಸ್ ಶಾಪಿಂಗ್‌ ಇತ್ಯಾದಿ ಮಾಡುತ್ತಿದ್ದರು. ಕಲಿತು ಕೆಲಸಕ್ಕೆ ಸೇರಿದ ನಂತರ ಮದುವೆಯಾಗಿ ಸ್ನೇಹಾ ಬೆಂಗಳೂರಿನಲ್ಲಿ ಉಳಿದರೆ, ಮೇಘಾ ಮೈಸೂರಿಗೆ ಹೊರಟಿದ್ದಳು. ಹೀಗಾಗಿ ವರ್ಷದಲ್ಲಿ 1-2 ಸಲ ಭೇಟಿ ಆಗುತ್ತಿದ್ದರು.
ಮೇಘಾಳ ಪತಿಗೆ ವರ್ಗಾವಣೆ ಆದ್ದರಿಂದ, ಅವಳೂ ಬೆಂಗಳೂರಿಗೇ ಬಂದು ನೆಲೆಸುವಂತಾಯಿತು. ಇಷ್ಟು ದಿನ ಗೆಳತಿಯರು ಮಾತ್ರ ಭೇಟಿ ಆಗುತ್ತಿದ್ದರು, ಇದೀಗ ಅವರ ಕುಟುಂಬಗಳು ಭೇಟಿ ಆಗುವಂತಾಯಿತು. ಈ ನ್ಯೂ ಇಯರ್‌ ಪಾರ್ಟಿಗೆ ಸ್ನೇಹಾ ಬೆಂಗಳೂರಿನಲ್ಲೇ ಉಳಿದಿದ್ದ ತನ್ನ ಇತರ ಸಹಪಾಠಿಗಳನ್ನೂ ಕರೆದಿದ್ದಳು.
ಆ ಸಲ ನ್ಯೂ ಇಯರ್‌ ಪಾರ್ಟಿ ಭಾನುವಾರ ಬಂದಿತ್ತು. ಹೀಗಾಗಿ ಉಳಿದ ಕೊನೆ ತಯಾರಿ ಬೇಗ ಮುಗಿಸಬೇಕೆಂದು ಸ್ನೇಹಾ ಲಘುಬಗೆಯಿಂದ ಎದ್ದು, ಕಾಫಿ ರೆಡಿ ಮಾಡಿ, ಉಳಿದ ಸಣ್ಣಪುಟ್ಟ ಕೆಲಸ ಮುಗಿಸಿ 8 ಗಂಟೆ ಆದರೂ ಇನ್ನೂ ಮಲಗಿದ್ದ ಪತಿಯನ್ನು ಎಬ್ಬಿಸಿದಳು. ಮೇಘಾ ಅಂದು ಬೆಳಗ್ಗೆ 10 ಗಂಟೆಗೇ ಬೇಗ ಬರುವುದಾಗಿ ತಿಳಿಸಿದ್ದಳು. ಇಬ್ಬರೂ ಇಡೀ ದಿನ ಒಟ್ಟಿಗಿದ್ದು, ಪಾರ್ಟಿಯ ತಯಾರಿ ನಡೆಸುವುದೆಂದು ನಿರ್ಧರಿಸಿದರು.
``ಬೇಗ ಏಳಿ ಅಮಿತ್‌...... ಇವತ್ತು ತನ್ನ ಫ್ರೆಂಡ್‌ ಮೇಘಾ ಮನೆಯವರ ಜೊತೆ ಬರ್ತಿದ್ದಾಳೆ. ನೀವು ಬೇಗ ರೆಡಿ ಆಗಿ.''
``ಅಯ್ಯೋ ಭಾನುವಾರ.... ಬಿಡುವು ಮಹಾರಾಯ್ತಿ.... ಇನ್ನೂ ಸ್ವಲ್ಪ ಮಲಗಿರ್ತೀನಿ,'' ಎಂದು ಕೊಸರಿದ ಪತಿರಾಯ.
``ರೀ, ಆ ಮೇಘಾ ಮುಂದೆ ಸ್ವಲ್ಪ ನೀಟಾಗಿ, ಡೀಸೆಂಟ್‌ ಆಗಿ ನೀವು ಪ್ರೆಸೆಂಟೆಬಲ್ ಆಗಿರಬೇಕು. ಬೇಗ ಶೇವಿಂಗ್‌, ಸ್ನಾನ ಮುಗಿಸಿ ರೆಡಿ ಆಗಿ. ಅವಳಂತೂ ಈಗಲೂ ಸ್ಮಾರ್ಟ್‌ ಆಗಿ ಎಲ್ಲಾ ಮೆಯಿಂಟೇನ್‌ ಮಾಡ್ತಾಳೆ!''
