ಕೆಲ ವರ್ಷಗಳಿಂದ ನಮ್ಮ ರಾಜ್ಯದಲ್ಲಿ ಅತಿಯಾದ ಓಲೈಕೆಯ ರಾಜಕಾರಣ ಆರಂಭವಾಗಿದೆ. ಆರಂಭದಲ್ಲಿ ಸಾಮಾನ್ಯ ಮತದಾರರನ್ನು ಓಲೈಸಿಕೊಳ್ಳುವ ಸಲುವಾಗಿ ವಿವಿಧ ಭಾಗ್ಯಗಳ ಆಮಿಷವನ್ನು ತಂದು ಅಧಿಕಾರಕ್ಕೆ ಬಂದು ಆತ್ತ ಅಭಿವೃದ್ಧಿಯೂ ಇಲ್ಲದೇ ಇತ್ತ ಸರಿಯಾಗಿ ಭಾಗ್ಯಗಳನ್ನೂ ಕೊಡಲಾಗದೇ ಇರುವ ಈ ಸರ್ಕಾರಕ್ಕೆ ಇತ್ತೀಚೆಗೆ ಯಾವುದೇ ನಯಾ ಪೈಸೆಯೂ ಇಲ್ಲದಂತೆ ವಿದ್ಯಾವಂತರನ್ನು ಓಲೈಸಿಕೊಳ್ಳುವ ಸಲುವಾಗಿ Dr. ಇರುವಂತೆ ಸದ್ಯಕ್ಕೆ Tr. ಮತ್ತು Er. ಭಾಗ್ಯಗಳನ್ನು ಕರುಣಿಸುತ್ತಿರುವ ಸಂಧರ್ಭದಲ್ಲಿ ಅಲ್ಪನಿಗೆ ಐಶ್ವರ್ಯ ಬಂದರೆ, ಅರ್ಧರಾತ್ರಿಯಲ್ಲಿ ಕೊಡೆ ಹಿಡಿದನಂತೆ ಎಂಬ ಗಾದೆ ಮಾತು ನೆನಪಾಗಿ ಈ ಕುರಿತಾಗಿ ಸಮಗ್ರವಾಗಿ ಚರ್ಚೆ ಮಾಡಬೇಕಿನಿಸಿದೆ

ಹೌದು. ಇದು ನೋಡಲು ಕೇವಲ ಎರಡು ಅಕ್ಷರಗಳಾದ “Dr.”, “Er.” “Tr.” ವಿಷಯದಂತೆ ಕಂಡರೂ, ಇದರ ಹಿಂದೆ ಶಿಕ್ಷಣ, ವೃತ್ತಿಪರ ಮಾನ್ಯತೆ, ಸಾಮಾಜಿಕ ಗೌರವ ಮತ್ತು ಕಾನೂನು—ಈ ನಾಲ್ಕೂ ಅಂಶಗಳಿವೆ ಎನಿಸುತ್ತದೆಯಾದರೂ, ಕರ್ನಾಟಕ ಸರ್ಕಾರ 2026ರ ಸೆಪ್ಟೆಂಬರ್‌ 5ರ ಶಿಕ್ಷಕರ ದಿನಾಚರಣೆಯಂದು ಶಿಕ್ಷಕರಿಗೆ ತಮ್ಮ ಹೆಸರಿನ ಮುಂದೆ “Tr.” ಮತ್ತು ಸೆಪ್ಟೆಂಬರ್‌ 15ರ ಇಂಜಿನೀಯರ್ಸ್ ದಿವಸದಂದು ಎಂಜಿನಿಯರ್‌ಗಳ ಹೆಸರಿನ ಮುಂದೆ “Er.” ಬಳಸಲು ಅನುಮತಿ ನೀಡಿರುವುದು ನಿಜಕ್ಕೂ ಒಂದು ರೀತಿಯ ಹಾಸ್ಯಾಸ್ಪದ ಎನಿಸುತ್ತಿದ್ದು, ಇಷ್ಟು ವರ್ಷಗಳ ಅದಿಲ್ಲದೆಯೇ ಸಮಾಜದಲ್ಲಿ ಉತ್ತಮ ಮಟ್ಟದಲ್ಲಿ ಜೀವನ ನಡೆಸುತ್ತಿರುವವರಿಗೆ ಈ ಸರ್ಕಾರದ ಪ್ರಚಾರ ಪ್ರಿಯತೆ ಮತ್ತು ಓಲೈಸಿಕೊಳ್ಳುವುದಕ್ಕಾಗಿ ಇಂತಹ ಗಿಮಿಕ್ ಗಳು ಬೇಕೇ ? ಎಂದು ಜನರು ಕೇಳುತ್ತಿರುವುದರಲ್ಲಿ ಸತ್ಯಾಂಶವಿದೆ ಎಂದೆನಿಸುತ್ತಿದೆ.

ಹಾಗಾಗಿಯೇ ಈ “Dr.” ಬಳಕೆಯ ಸಂಪ್ರದಾಯ ಹೇಗೆ ಮತ್ತು ಏತಕ್ಕಾಗಿ ಬಂದಿತು ಅದು ವೃತ್ತಿಪರ ಗೌರವದ ಮಾನ್ಯತೆಯೇ? ಎಂಬೆಲ್ಲದರ ಕುರಿತಾಗಿ ತಿಳಿಸುಕೊಳ್ಳುವುದು ಅತ್ಯಾವಶ್ಯಕವಾಗಿದೆ,

“Dr.” ಎನ್ನುವುದು ಮೊದಲು ವೈದ್ಯರಿಗಾಗಿಯೇ ಹುಟ್ಟಿದ್ದೇ?

ಈ ಮೇಲಿನ ಪ್ರಶ್ನೆಗೆ ಇಲ್ಲ ಎನ್ನುವ ಉತ್ತರ ನಿಜಕ್ಕೂ ಅಚ್ಚರಿ ಎನಿಸಿದರೂ ಅದೇ ಸತ್ಯವಾಗಿದೆ. Doctor ಎಂಬ ಪದ ಲ್ಯಾಟಿನ್‌ನ “docere” — ಕಲಿಸುವುದು/ಬೋಧಿಸುವುದು ಎಂಬ ಕ್ರಿಯಾಪದದಿಂದ ಬಂದಿದೆ. ಅಂದರೆ ಮೂಲ ಅರ್ಥವೇ “ಬೋಧಕ” ಅಥವಾ “ಶಿಕ್ಷಕ”.

ಮಧ್ಯಯುಗದ ಯುರೋಪಿನ ವಿಶ್ವವಿದ್ಯಾಲಯಗಳಲ್ಲಿ Doctor ಎಂಬುದು ಅತ್ಯುನ್ನತ ಶೈಕ್ಷಣಿಕ ಅರ್ಹತೆಯೊಂದಿಗಿನ ಬೋಧನಾ ಅಧಿಕಾರದ ಪದವಿಯಾಗಿತ್ತು. ಆರಂಭದಲ್ಲಿ ಕಾನೂನು, ಧರ್ಮಶಾಸ್ತ್ರ ಮತ್ತು ನಂತರ ವೈದ್ಯಕೀಯ ಸೇರಿದಂತೆ ಹಲವು ಕ್ಷೇತ್ರಗಳಲ್ಲಿ ಈ ಪದ ಬಳಕೆಯಾಯಿತು. 12–13ನೇ ಶತಮಾನಗಳಲ್ಲಿ Bologna ಮತ್ತು Paris ಮುಂತಾದ ವಿಶ್ವವಿದ್ಯಾಲಯಗಳಲ್ಲಿ “Doctor” ಎಂಬ ಶೈಕ್ಷಣಿಕ ಪರಂಪರೆ ಗಟ್ಟಿಯಾಯಿತು.

ಹೀಗಾಗಿ ಮೂಲತಃ: Doctor ಎನ್ನುವುದು ಕೇವಲ ವೈದ್ಯರಿಗೆಂದೇ ಬಳಸುವ ಪದವಾಗಿರದೇ, Doctor ಎನ್ನುವುದು ಉನ್ನತ ಜ್ಞಾನ/ಬೋಧನಾ ಅರ್ಹತೆ ಹೊಂದಿದ ವ್ಯಕ್ತಿ ಎಂಬುದನ್ನು ಪ್ರಾಚೀನ ಕಾಲದಿಂದಲೂ ಬಳಸುತ್ತಾ ಬಂದಿದ್ದಾರೆ.

ಹಾಗಾದರೆ ವೈದ್ಯರಿಗೆ Dr. ಹೇಗೆ ಬಂತು?

ವೈದ್ಯಕೀಯ ಶಿಕ್ಷಣ ವಿಶ್ವವಿದ್ಯಾಲಯಗಳಲ್ಲಿ ಉನ್ನತ ಶೈಕ್ಷಣಿಕ ಕ್ಷೇತ್ರವಾಗಿ ಬೆಳೆಯುತ್ತಿದ್ದಂತೆ, ವೈದ್ಯಕೀಯದಲ್ಲಿ ಉನ್ನತ ಪದವಿ ಪಡೆದವರಿಗೂ “Doctor” ಎಂಬ ಪದ ಬಳಕೆಯಾಗತೊಡಗಿತು. ಕಾಲಕ್ರಮೇಣ ವೈದ್ಯರು ಸಮಾಜದಲ್ಲಿ ರೋಗವನ್ನು ಗುರುತಿಸಿ ಚಿಕಿತ್ಸೆ ನೀಡುವ ಅಧಿಕೃತ ಜ್ಞಾನ ಹೊಂದಿದ ವೃತ್ತಿಪರರು ಎಂಬ ಸ್ಥಾನ ಪಡೆದರು. ಇದರಿಂದ ಸಾಮಾನ್ಯ ಜನರ ಬಳಕೆಯಲ್ಲಿ “Doctor” ಎಂಬ ಪದಕ್ಕೆ ವೈದ್ಯ ಎಂಬ ಅರ್ಥವೇ ಹೆಚ್ಚು ಬಲವಾಯಿತು. 16ನೇ ಶತಮಾನದ ವೇಳೆಗೆ physician ಎಂಬ ಅರ್ಥದಲ್ಲಿ “doctor” ಬಳಕೆ ಬಹಳ ಗಟ್ಟಿಯಾಗಿತ್ತು.

ಅಂದರೆ ಇಂದು ನಾವು “Dr. Ravi” ಎಂದಾಗ ವೈದ್ಯರನ್ನು ನೆನಪಿಸಿಕೊಳ್ಳುವುದು ಸಾವಿರ ವರ್ಷಗಳ ಹಿಂದಿನಿಂದಲೂ ಹಾಗೆಯೇ ಇತ್ತು ಎಂಬುದಲ್ಲ. ಇದು ದೀರ್ಘಕಾಲದ ಶೈಕ್ಷಣಿಕ ಮತ್ತು ವೃತ್ತಿಪರ ಬೆಳವಣಿಗೆಯ ಫಲ.