ಫೆಬ್ರವರಿ 14 ಮತ್ತು 15 ರಂದು ನಡೆಯಲಿರುವ ಇಂಡಿಯನ್ ರೇಸಿಂಗ್ ಫೆಸ್ಟಿವಲ್ (IRF) ಗಾಗಿ ಗೋವಾದ ಬೀದಿಗಳು ಹೈ-ಸ್ಪೀಡ್ ರೇಸ್ ಟ್ರ್ಯಾಕ್ ಆಗಿ ಬದಲಾಗಲು ಸಜ್ಜಾಗಿವೆ.
'ಸ್ಪೀಡ್ ಡೆಮನ್ಸ್ ದೆಹಲಿ' ತಂಡದ ಮಾಲೀಕ ಹಾಗೂ ನಟ ಅರ್ಜುನ್ ಕಪೂರ್ ಮಾತನಾಡಿ, "ಸ್ಟ್ರೀಟ್ ರೇಸಿಂಗ್ ಮೋಟಾರ್ಸ್ಪೋರ್ಟ್ನ ಅತ್ಯಂತ ಮಾನವೀಯ ಮುಖವನ್ನು ಹೊರತರುತ್ತದೆ. ಇಲ್ಲಿ ವೇಗ ಎಷ್ಟು ಮುಖ್ಯವೋ, ಅಷ್ಟೇ ಸಹಜ ಪ್ರವೃತ್ತಿ, ಸಂಯಮ ಮತ್ತು ವ್ಯಕ್ತಿತ್ವವೂ ಮಹತ್ವದ ಪಾತ್ರ ವಹಿಸುತ್ತದೆ," ಎಂದಿದ್ದಾರೆ.
ತಂಡದ ಪ್ರಮುಖ ಆಕರ್ಷಣೆಯೆಂದರೆ ದೆಹಲಿ ಮೂಲದ ರೇಸರ್ ಶಹನ್ ಅಲಿ ಮೊಹ್ಸಿನ್. ಯುರೋಪಿನಾದ್ಯಂತ ನಡೆದ ವಿಶ್ವ ಕಾರ್ಟಿಂಗ್ ಚಾಂಪಿಯನ್ಶಿಪ್ಗಳಲ್ಲಿ ಭಾರತವನ್ನು ಪ್ರತಿನಿಧಿಸಿರುವ ಇವರು, ಈಗ ತಮ್ಮ ತವರಿನಲ್ಲಿ ಸ್ಪರ್ಧಿಸಲು ಸಿದ್ಧರಾಗಿದ್ದಾರೆ.
ಶಹನ್ ಬಗ್ಗೆ ಮಾತನಾಡಿದ ಅರ್ಜುನ್ ಕಪೂರ್, "ಶಹನ್ ಅವರ ಪಯಣ ಭಾರತೀಯ ರೇಸಿಂಗ್ ಎಷ್ಟು ದೂರ ಸಾಗಿಬಂದಿದೆ ಎಂಬುದಕ್ಕೆ ಸಾಕ್ಷಿಯಾಗಿದೆ. ದೆಹಲಿಯಲ್ಲಿ ಬೆಳೆದು ಅಂತರಾಷ್ಟ್ರೀಯ ಮಟ್ಟದಲ್ಲಿ ಮಿಂಚಿದ ಅವರು, ಈಗ ಭಾರತದ ಸ್ಟ್ರೀಟ್ ಸರ್ಕ್ಯೂಟ್ನಲ್ಲಿ ದೆಹಲಿಯನ್ನು ಪ್ರತಿನಿಧಿಸಲು ಮರಳಿದ್ದಾರೆ. ನಗರ ಮತ್ತು ತಂಡದೊಂದಿಗಿನ ಈ ನಂಟು ಅವರಿಗೆ ವಿಭಿನ್ನ ರೀತಿಯ ಪ್ರೇರಣೆ ನೀಡುತ್ತದೆ," ಎಂದಿದ್ದಾರೆ.
ತಂಡವು ಭಾರತದ ಭರವಸೆಯ ಯುವ ಡ್ರೈವರ್ಗಳಲ್ಲಿ ಒಬ್ಬರಾದ ಇಶಾನ್ ಮಾದೇಶ್ ಅವರನ್ನೂ ಒಳಗೊಂಡಿದೆ. ಇವರು 2025ರ ಎಫ್4 (F4) ಇಂಡಿಯಾ ಚಾಂಪಿಯನ್ಶಿಪ್ನಲ್ಲಿ ಅತ್ಯುತ್ತಮ ಸ್ಥಾನ ಪಡೆದ ಭಾರತೀಯ ರೇಸರ್ ಆಗಿದ್ದಾರೆ. "ಇಶಾನ್ ಅವರಲ್ಲಿ ಸಾಧಿಸುವ ಛಲವಿದೆ. ಎಫ್4 ಇಂಡಿಯಾದಲ್ಲಿ ಒಟ್ಟಾರೆಯಾಗಿ ಮೂರನೇ ಸ್ಥಾನ ಗಳಿಸುವುದು ಸಾಮಾನ್ಯ ಸಾಧನೆಯಲ್ಲ," ಎಂದು ಕಪೂರ್ ಶ್ಲಾಘಿಸಿದ್ದಾರೆ.
ತಂಡಕ್ಕೆ ಅಂತರಾಷ್ಟ್ರೀಯ ಬಲ ತುಂಬಲು ಮಲೇಷ್ಯಾದ ರೇಸರ್ ಅಲಿಸ್ಟರ್ ಯೂಂಗ್ ಸೇರ್ಪಡೆಯಾಗಿದ್ದಾರೆ. ಮಾಜಿ ಫಾರ್ಮುಲಾ 1 ರೇಸರ್ ಅಲೆಕ್ಸ್ ಯೂಂಗ್ ಅವರ ಪುತ್ರ ಅಲಿಸ್ಟರ್, ತಮ್ಮ ತಂದೆಯಿಂದ ಬಂದ ಮೋಟಾರ್ಸ್ಪೋರ್ಟ್ ಪರಂಪರೆ ಮತ್ತು ಅನುಭವದ ಮೂಲಕ ತಂಡಕ್ಕೆ ಹೊಸ ದೃಷ್ಟಿಕೋನ ನೀಡಲಿದ್ದಾರೆ. "ಅಲಿಸ್ಟರ್ ಅತ್ಯುನ್ನತ ಮಟ್ಟದ ರೇಸಿಂಗ್ ವಾತಾವರಣದಲ್ಲೇ ಬೆಳೆದವರು. ಇಂತಹ ಅನುಭವವು ಒತ್ತಡದ ಸಂದರ್ಭಗಳನ್ನು ಹೇಗೆ ನಿಭಾಯಿಸಬೇಕೆಂದು ಅವರಿಗೆ ಕಲಿಸಿಕೊಟ್ಟಿದೆ," ಎಂದು ಕಪೂರ್ ಹೇಳಿದ್ದಾರೆ.
ತಂಡದ ಪಟ್ಟಿಯನ್ನು ಪೂರ್ಣಗೊಳಿಸುವವರು ಆಸ್ಟ್ರೇಲಿಯಾದ ರೇಸರ್ ಕೈಟ್ಲಿನ್ ವುಡ್. ಇವರು ಮಾಜಿ 'ಡಬ್ಲ್ಯೂ ಸೀರೀಸ್' (W Series) ಸ್ಪರ್ಧಿಯಾಗಿದ್ದು, ನೂರ್ಬರ್ಗ್ರಿಂಗ್ನಲ್ಲಿ ಜಯಗಳಿಸಿದ ಮೊದಲ ಆಸ್ಟ್ರೇಲಿಯನ್ ಮಹಿಳೆ ಎಂಬ ಹೆಗ್ಗಳಿಕೆ ಹೊಂದಿದ್ದಾರೆ. ಕೈಟ್ಲಿನ್ ಅವರ ಉಪಸ್ಥಿತಿಯು ತಂಡದ ವಿಶ್ವಾಸವನ್ನು ಹೆಚ್ಚಿಸಿದೆ ಎಂದಿದ್ದಾರೆ.
ಗೋವಾ ರಾಜ್ಯವು ಈ ಸವಾಲಿನ ರೇಸ್ಗೆ ಆತಿಥ್ಯ ವಹಿಸಲು ಸಜ್ಜಾಗಿದ್ದು, ಈ ವಾರಾಂತ್ಯವು ಕೇವಲ ಸ್ಪರ್ಧೆಯಲ್ಲದೆ ಅದಕ್ಕಿಂತಲೂ ಹೆಚ್ಚಿನ ಪ್ರಾಮುಖ್ಯತೆ ಹೊಂದಿದೆ ಎಂದು ಕಪೂರ್ ಅಭಿಪ್ರಾಯಪಟ್ಟಿದ್ದಾರೆ.
