ಇಡೀ ಭೂಲೋಕದ ಸ್ವರ್ಗವೆಂದೇ ಖ್ಯಾತಿವೆತ್ತ ಕಾಶ್ಮೀರ ಅತ್ಯಂತ ರಮಣೀಯ ಕಣಿವೆಗಳು ಸುಂದರ ಉದ್ಯಾನವನಗಳಿಂದ ನಂದನವನದಂತೆ ರಾರಾಜಿಸುತ್ತದೆ. ಇದರ ಸಂಪೂರ್ಣ ಪರಿಚಯ ಪಡೆಯೋಣವೇ....?
ಅಮೆರಿಕಾದಲ್ಲಿರುವ ಚಿಕ್ಕ ಮಗ ವರ್ಷಕ್ಕೊಮ್ಮೆ ಭಾರತಕ್ಕೆ ಬಂದಾಗ ಮನೆ ಮಂದಿಯೆಲ್ಲಾ ಸೇರಿ ಎಲ್ಲಿಗಾದರೂ ಪ್ರವಾಸ ಹೋಗುವ ರೂಢಿ. ಈ ಬಾರಿ ಅವನು ಬಂದಾಗ ಎಲ್ಲಿಗೆ ಹೋಗಬೇಕೆನ್ನುವ ಬಗ್ಗೆ ಬಹಳ ಚರ್ಚೆಯಾಗಿ ಕೊನೆಗೆ ಕಾಶ್ಮೀರಕ್ಕೆ ಹೋಗುವುದೆಂದು ನಿರ್ಧಾರವಾಯಿತು.
ನನಗೆ ಜೀವನದಲ್ಲಿ ಒಮ್ಮೆಯಾದರೂ ಕಾಶ್ಮೀರ ನೋಡಬೇಕಲ್ಲವೇ ಎನ್ನುವ ಮನಸ್ಸಿತ್ತು. ಆದರೂ ನಾವು ಈ ಹಿಂದೆ ಮನಾಲಿ ಮತ್ತು ಸ್ವಿಡ್ಝರ್‌ ಲ್ಯಾಂಡ್‌ ಗೆ ಹೋಗಿದ್ದೆ, ಅಲ್ಲೂ ಹಿಮಾಚ್ಛಾದಿತ ಶಿಖರಗಳೇ ಅಲ್ಲವೇ? ಹೀಗಾಗಿ ಕಾಶ್ಮೀರ ಅಷ್ಟೆ ತಾನೇ ಎನ್ನುವ ಭಾವನೆಯೂ ಇತ್ತು. ಆದರೂ ನಮ್ಮ ದೇಶದ ನಾವು ಕೈಲಾಸವೆಂದು ಭಾವಿಸುವ ಪೂಜ್ಯ ಹಿಮಾಲಯಕ್ಕೆ ಹತ್ತಿರವಿರುವ ಕಾಶ್ಮೀರಕ್ಕೆ ಹೋಗುವುದು ಎಂದಾಗ ಖುಷಿಯೂ ಆಯಿತು.
ಆದರೆ ಅಲ್ಲಿ ಯಾವಾಗ ಏನಾಗುತ್ತದೋ ಎನ್ನುವ ಭಯ! ಯಾವಾಗ ಯಾರು ಗುಂಡಿನ ಮಳೆ ಸುರಿಸುತ್ತಾರೋ ಎನ್ನುವ ಆತಂಕ. ಅದರ ಜೊತೆಗೆ ಅಲ್ಲಿ ತುಂಬಾ ಚಳಿ ಎಂದು ಗೊತ್ತಿತ್ತು. ಹವಾಮಾನದ ಬಗ್ಗೆ ಗೂಗಲ್ ನಲ್ಲಿ ತಡಕಾಡಿದ್ದೇ ತಡಕಾಡಿದ್ದು. ಏನೇ ಆದರೂ ಅಲ್ಲಿ ಚಳಿ ಎನ್ನುವುದು ಗಟ್ಟಿ ಇತ್ತು. ನಾವು ಹೊರಟಿದ್ದು ಬೇಸಿಗೆಯಾದರೂ ಅಲ್ಲಿ ಚಳಿಯೇ! ಜೊತೆಗೆ ನನ್ನ ವಯಸ್ಸು, ಹೀಗಾಗಿ ಹೊರಡುವ ಬಗ್ಗೆ ನನಗೆ ಎರಡು ಮನಸ್ಸಿತ್ತು. ಆದರೆ ಮಕ್ಕಳೆಲ್ಲಾ ಸೇರಿ, ``ಅಮ್ಮಾ.... ಯಾವಾಗಲೂ ಹಾಗೆಯೇ, ಯಾವುದನ್ನು ಒಂದೇ ಸಲಕ್ಕೆ ಒಪ್ಪುವುದಿಲ್ಲ,'' ಎನ್ನುವ ಬಿರುದನ್ನೂ ಕೊಟ್ಟು, ವಿಮಾನದ ಟಿಕೆಟ್‌ ಗಳನ್ನು ಬುಕ್‌ ಮಾಡಿದರು. ಇನ್ನು ಮಾತನಾಡುವ ಹಾಗೆಯೇ ಇರಲಿಲ್ಲ. ಹಾಗಾದರೆ ಚಳಿ ತಡೆಯಲು ಸಿದ್ಧತೆ ಪ್ರಾರಂಭವಾಯಿತು. ನನ್ನ ಸೊಸೆ ನೀವು ಥರ್ಮ್ಸ್ ತೆಗೆದುಕೊಳ್ಳಿ, ನಿಮಗೆ ಚಳಿ ಆಗುವುದಿಲ್ಲ ಎಂದಳು. ಅವಳ ಮಾತನ್ನು ಮೀರಲುಂಟೆ? ಬೆಚ್ಚನೆಯ ಉಡುಪಿನ ಸಿದ್ಧತೆ ಆಯಿತು. ಆಗ ತಾನೇ ಗ್ಯಾಂಗ್‌ ಟಾಕ್‌ ಗೆ ಹೋಗಿ ಬಂದ ತಂಗಿ, ನಮಗೆ ಅಲ್ಲಿಯ ಥಂಡಿಯನ್ನು ತಡೆಯಲು ಕಷ್ಟ ಕಣೆ ಎಂದು ಉಲಿದಳು.
ಒಟ್ಟಾರೆ ಯುದ್ಧಕ್ಕೆ ಹೋಗುವಂತೆ ಸಿದ್ಧತೆ ಆಯಿತು. ವಿಮಾನದ ಟಿಕೆಟ್‌ ಗಳ ಜೊತೆ ಅಲ್ಲಿ ಹೋಗಬೇಕಾದ ಸ್ಥಳಗಳು, ಅದನ್ನು ವೀಕ್ಷಿಸುವ ಐಟಿನರಿ ಸಿದ್ಧವಾಯಿತು. ಒಟ್ಟು ಏಳು ದಿನದ ಪ್ರವಾಸ. ನಾವು ಮೊದಲೇ ನಿರ್ಧಾರ ಮಾಡಿದ್ದರಿಂದ ವಿಮಾನದ ಟಿಕೆಟ್‌ ಗಳು ದುಬಾರಿಯಾಯಿತು. ಆದರೂ ಮಗ ಬಂದಾಗ ತಾನೇ ಪೂರ್ಣ ಪ್ರಮಾಣದ ಕುಟಂಬದ ಪಯಣ..... ಹಾಗಾಗಿ ಏನೂ ಮಾಡುವಂತಿರಲಿಲ್ಲ. ಅಲ್ಲಿಯ ಬಗ್ಗೆ ಅನೇಕ ವಿಷಯಗಳ ಸಂಗ್ರಹಣೆ ಆಯಿತು. ನನ್ನ ಸೊಸೆ ಮೊದಲೇ ತುಂಬಾ ಕ್ಲೀನ್‌. ಸ್ವಲ್ಪ ಅತಿಯೇ ಎನ್ನಬಹುದು. ಈ ರೀತಿ ಅವಳ ಗೆಳತಿಯರಿಂದ ಅನೇಕ ವಿಷಯಗಳು ತಿಳಿಯಿತು. ಇವೆಲ್ಲದರ ಜೊತೆಗೆ ನನ್ನ ಸೊಸೆಗೆ ಅಲ್ಲಿ ಟೆರರಿಸ್ಟ್ ಗಳ ಬಗ್ಗೆ ಭಯ ಮತ್ತು ನೈಸರ್ಗಿಕ ಅಪಘಾತಗಳ ಬಗ್ಗೆಯೂ ಭಯ. ಎಲ್ಲರೂ ಅವಳಿಗೆ ಧೈರ್ಯ ತುಂಬಿ ಹೊರಡಿಸಿದ್ದಾಯಿತು. ಅಂತೂ ಒಂಬತ್ತು ಜನರ ದಂಡು ಹೊರಟಿತು ಕಾಶ್ಮೀರಕ್ಕೆ.
