ನೀವು ಸಹ ಹೋಂ ಲೋನ್‌ ಪಡೆಯಲು ಪ್ಲಾನ್‌ ಮಾಡುತ್ತಿದ್ದರೆ, ಅದಕ್ಕೆ ಮೊದಲು ಈ ಮಾಹಿತಿಯತ್ತ ಒಮ್ಮೆ ಕಣ್ಣಾಡಿಸಿ....
ನಮ್ಮದೇ ಆದ ಸ್ವಂತ ಮನೆ ಹೊಂದುವ ಕನಸು ಎಂಥ ಬಡವರು, ಮಧ್ಯಮ ವರ್ಗದವರಿಗಾದರೂ ಇದ್ದೇ ಇರುತ್ತದೆ. ಆದರೆ ಇಂದಿನ ಅತಿ ತುಟ್ಟಿಯ ದಿನಗಳಲ್ಲಿ, ಅದರಲ್ಲೂ ಮಹಾನಗರಗಳಲ್ಲಿ ಮನೆ ಕೊಳ್ಳುವುದು ಎಂದರೆ ಕಷ್ಟಸಾಧ್ಯವೇ ಸರಿ. ಇಂಥ ಸಂದರ್ಭದಲ್ಲಿ ಗೃಹ ಸಾಲ ಯಾ ಹೋಂ ಲೋನ್‌ ನಮ್ಮ ಈ ಕನಸನ್ನು ನನಸಾಗಿಸಲು ನೆರವಾಗುತ್ತದೆ. ನೀವು ಸಹ ನಿಮ್ಮದೇ ಮನೆ ಕೊಳ್ಳುವ ಪ್ಲಾನಿಂಗ್‌ ನಲ್ಲಿದ್ದರೆ, ಅದಕ್ಕಾಗಿ ಹೋಂ ಲೋನ್‌ ಗೆ ಮೊರೆಹೋಗುವ ಐಡಿಯಾ ಹೊಂದಿದ್ದರೆ, ನೀವು ಈ ಕೆಳಗಿನ ಸಲಹೆಗಳನ್ನು ಅಗತ್ಯ ಪಾಲಿಸಿ, ಈ ಕುರಿತು ಡಬ್ಬಲ್ ಎಚ್ಚರಿಕೆ ವಹಿಸಿರಿ.
ಇತ್ತೀಚಿನ ದಿನಗಳಲ್ಲಿ ಹೋಂ ಲೋನ್‌ ಪಡೆಯುವುದು ಮಾಮೂಲಿ ವಿಷಯ. ಏಕೆಂದರೆ ಸರ್ಕಾರಿ ಯಾ ಖಾಸಗಿ ಬ್ಯಾಂಕ್‌ ಗಳ ಮೂಲಕ ನಿಮ್ಮ ಬಜೆಟ್‌ ಗೆ ಅನುಸಾರವಾಗಿ ಹೋಂ ಲೋನ್‌ ಪಡೆಯಬಹುದು. ಆದರೆ ಇದನ್ನು ಪಡೆಯುವ ಸಂದರ್ಭದಲ್ಲಿ ಅಗತ್ಯವಾಗಿ ಪರೀಕ್ಷಿಸಬೇಕಾದುದು ಎಂದರೆ, ನಿಮ್ಮ ಬಳಿ ಮನೆ ಕೊಳ್ಳಲು ಡೌನ್‌ ಪೇಮೆಂಟ್‌ ಮಾಡುವಷ್ಟು ಹಣ ಇದೆ ತಾನೇ ಎಂಬುದನ್ನು ಖಾತ್ರಿಪಡಿಸಿಕೊಳ್ಳಿ. ಇಡೀ ಮನೆಯನ್ನು ಹೋಂ ಲೋನ್‌ ನಲ್ಲೇ ಕೊಳ್ಳುತ್ತೇನೆಂದರೆ ಅದು ನಿಮ್ಮನ್ನು ಸಾಲದ ಕೂಪದಲ್ಲಿ ಮುಳುಗಿಸಿ ಬಿಡುತ್ತದೆ. ನೀವು ಡೌನ್‌ ಪೇಮೆಂಟ್‌ ಮೂಲಕ ಎಷ್ಟು ಗರಿಷ್ಠ ಮೊತ್ತ ಕಟ್ಟುತ್ತೀರೋ, ಸಾಲದ ಬಾಧೆಯಿಂದ ಅಷ್ಟೇ ಪಾರಾಗುವಿರಿ, ಹೊರೆ ಎಷ್ಟೋ ತಗ್ಗುತ್ತದೆ.
ಆದಾಯಕ್ಕೆ ತಕ್ಕಂತೆ ಹೋಂ ಲೋನ್‌ ಕೆಲವರು ತಮ್ಮ ಸಂಬಳದ ಗೊಡವೆ ಬಗ್ಗೆ ಲೆಕ್ಕಿಸದೆ ದೊಡ್ಡ ಮನೆಗೆ ಆಸೆ ಪಡುತ್ತಾರೆ. ಇದರಿಂದ ಅವರು ದೊಡ್ಡ ಸಾಲದ ಹೊರೆಗೆ ಸಿಲುಕುತ್ತಾರೆ. ಹೀಗಾಗಿ ನಿಮ್ಮ ಆದಾಯಕ್ಕೆ ತಕ್ಕಂತೆ ಹೋಂ ಲೋನ್‌ ಬಗ್ಗೆ ಆಲೋಚಿಸಿ. ಆಗ ಮಾತ್ರವೇ ನೀವು ಅದರ ಸುಲಭವಾಗಿ ಪಾವತಿಸಲು ಸಾಧ್ಯ. ಜೊತೆಗೆ ಮನೆಯ ಇಂಟೀರಿಯರ್ಸ್‌ ನ್ನು ಸಹ ನಿಮ್ಮ ಬಜೆಟ್‌ ಗೆ ಅನುಸಾರವೇ ಇಟ್ಟುಕೊಳ್ಳಿ.
ಈ ಕುರಿತಾಗಿ ನಗರದ ನುರಿತ ಹಣಕಾಸು ತಜ್ಞರ ಅಭಿಪ್ರಾಯದಲ್ಲಿ, ಹೋಂ ಲೋನ್‌ ಪಡೆಯಲು ವ್ಯಕ್ತಿಯ ಕ್ರೆಡಿಟ್ ಸ್ಕೋರ್ ಉತ್ತಮ ಆಗಿರಬೇಕು. ಯಾವುದೇ ಬ್ಯಾಂಕ್‌ ಅಥವಾ ಫೈನಾನ್ಸ್ ಸಂಸ್ಥೆ ನಿಮಗೆ ಲೋನ್‌ ನೀಡಬೇಕೆಂದರೆ, ನಿಮ್ಮ ಕ್ರೆಡಿಟ್ ಸ್ಕೋರ್ ಉತ್ತಮ ಆಗಿರಲೇಬೇಕು. ಅಕಸ್ಮಾತ್‌ ನಿಮ್ಮ ಕ್ರೆಡಿಟ್ ಸ್ಕೋರ್ ಉತ್ತಮ ಅಲ್ಲದಿದ್ದರೆ, ನಿಮಗೆ ಹೋಂ ಲೋನ್‌ ಸಿಗಲು ಬಹಳ ಕಷ್ಟವಾದೀತು. ಕ್ರೆಡಿಟ್ ಸ್ಕೋರ್ 700ಕ್ಕೂ ಅಧಿಕ ಆಗಿದ್ದರೆ, ಮಾಮೂಲಿ ಬಡ್ಡಿ ದರಕ್ಕಿಂತ ಕಡಿಮೆ ಬಡ್ಡಿ ದರದಲ್ಲಿ ಹೋಂ ಲೋನ್‌ ಸಿಗುತ್ತದೆ.
ಕ್ರೆಡಿಟ್ ಸ್ಕೋರ್ ನ ಮಹತ್ವ
ಕ್ರೆಡಿಟ್ ಸ್ಕೋರ್ ನ್ನು ಸಿವಿಲ್ ಸ್ಕೋರ್ ಎಂದೂ ಹೇಳುತ್ತಾರೆ. ಇದು ಯಾವುದೇ ವ್ಯಕ್ತಿಯ ಹಣಕಾಸಿನ ಕ್ರೆಡಿಟ್ ಕುರಿತು ಹೇಳುತ್ತದೆ. ಅಂದ್ರೆ ಆತ ಲೋನ್‌ ಪಡೆಯಲು ಎಷ್ಟು ಅರ್ಹ ಎಂಬುದು. ಇದರಲ್ಲಿ ಆತ ಏನಾದರೂ ಈ ಮೊದಲೇ ಪರ್ಸನಲ್/ವೆಹಿಕಲ್ ಲೋನ್‌ ಪಡೆದಿದ್ದರೆ, ತಡ ಮಾಡದೆ ಅದನ್ನು ಸಮಯಕ್ಕೆ ಸರಿಯಾಗಿ ತೀರಿಸಿದ್ದರೆ, ಜೊತೆಗೆ ಕ್ರೆಡಿಟ್ ಕಾರ್ಡ್‌ ಸಹ ಇದ್ದರೆ, ಅದರಲ್ಲಿ ಯಾ ಸಾಲದ ಹಣ ಬಾಕಿ ಇರದಿದ್ದರೆ, ಆಗ ಮಾತ್ರ ಆ ವ್ಯಕ್ತಿಯ ಕ್ರೆಡಿಟ್ ಸ್ಕೋರ್ ಉತ್ತಮ ಆಗಲು ಸಾಧ್ಯ. ಇದನ್ನು ಬ್ಯಾಂಕ್‌ ಲೋನ್‌ ನೀಡುವ ಮೊದಲೇ ಲೆಕ್ಕ ಹಾಕುತ್ತದೆ.
