ಬಜಾಜ್ ಪುಣೆ ಗ್ರ್ಯಾಂಡ್ ಟೂರ್‌ಗೆ UCI 2.2ರಿಂದ UCI 2.1ಕ್ಕೆ ಉನ್ನತೀಕರಣ ದೊರೆತಿದೆ. ಇದು ಟೂರ್‌ಗೆ ಮಾತ್ರವಲ್ಲದೆ, ಭಾರತದ ಸೈಕ್ಲಿಂಗ್ ಕ್ಷೇತ್ರಕ್ಕೂ ಮಹತ್ವದ ಬೆಳವಣಿಗೆಯಾಗಿದೆ.
ಇತ್ತೀಚೆಗೆ ಕೆನಡಾದ ಮಾಂಟ್ರಿಯಲ್‌ನಲ್ಲಿ ನಡೆದ UCI ಕಾಂಗ್ರೆಸ್‌ನಲ್ಲಿ ಪುಣೆಯನ್ನು 2032ರ UCI ರೋಡ್ ವರ್ಲ್ಡ್ ಚಾಂಪಿಯನ್‌ಶಿಪ್‌ಗಳ ಆತಿಥೇಯ ನಗರವಾಗಿ ಆಯ್ಕೆ ಮಾಡಲಾಗಿತ್ತು. ಇದರೊಂದಿಗೆ, ಈ ಪ್ರತಿಷ್ಠಿತ ವಿಶ್ವ ಚಾಂಪಿಯನ್‌ಶಿಪ್‌ಗೆ ಆತಿಥ್ಯ ವಹಿಸಲಿರುವ ಭಾರತದ ಮೊದಲ ನಗರ ಎಂಬ ಹೆಗ್ಗಳಿಕೆಗೆ ಪುಣೆ ಪಾತ್ರವಾಗಿದೆ.
ಬಜಾಜ್ ಪುಣೆ ಗ್ರ್ಯಾಂಡ್ ಟೂರ್‌ನ ಎರಡನೇ ಆವೃತ್ತಿಯು 2027ರ ಜನವರಿ 26ರಿಂದ 31ರವರೆಗೆ ನಡೆಯಲಿದೆ. ಪುಣೆ ಹಾಗೂ ಸುತ್ತಮುತ್ತಲಿನ ಜಿಲ್ಲೆಗಳಲ್ಲಿ ಒಟ್ಟು ಆರು ಹಂತಗಳಲ್ಲಿ ಸ್ಪರ್ಧೆಗಳು ನಡೆಯಲಿವೆ. UCI ವರ್ಗೀಕರಣದಲ್ಲಿ ಉನ್ನತ ಸ್ಥಾನ ದೊರೆತಿರುವುದರಿಂದ ಹೆಚ್ಚಿನ ಸಂಖ್ಯೆಯ ಅಂತಾರಾಷ್ಟ್ರೀಯ ಸೈಕ್ಲಿಸ್ಟ್‌ಗಳು ಮತ್ತು ತಂಡಗಳು ಈ ಬಾರಿ ಭಾಗವಹಿಸುವ ನಿರೀಕ್ಷೆಯಿದೆ.
2026ರ ಜನವರಿಯಲ್ಲಿ ನಡೆದ ಬಜಾಜ್ ಪುಣೆ ಗ್ರ್ಯಾಂಡ್ ಟೂರ್‌ನ ಮೊದಲ ಆವೃತ್ತಿ ಯಶಸ್ವಿಯಾಗಿ ನಡೆದಿತ್ತು. ಇದರಲ್ಲಿ 35 ದೇಶಗಳ 29 ತಂಡಗಳು ಮತ್ತು 171 ಸೈಕ್ಲಿಸ್ಟ್‌ಗಳು ಭಾಗವಹಿಸಿದ್ದರು. ರೇಸ್ ಸಾಗಿದ ಮಾರ್ಗಗಳುದ್ದಕ್ಕೂ ಅಂದಾಜು 25 ಲಕ್ಷ ಪ್ರೇಕ್ಷಕರು ಸ್ಪರ್ಧೆಯನ್ನು ವೀಕ್ಷಿಸಿದ್ದರು. ಈ ಯಶಸ್ಸಿನೊಂದಿಗೆ, ಭಾರತದ ಅಂತಾರಾಷ್ಟ್ರೀಯ ಸೈಕ್ಲಿಂಗ್ ಕ್ಯಾಲೆಂಡರ್‌ನಲ್ಲಿ ಈ ರೇಸ್ ಪ್ರಮುಖ ಸ್ಥಾನ ಪಡೆದುಕೊಂಡಿದೆ.
UCI 2.2ರಿಂದ 2.1ಕ್ಕೆ ಉನ್ನತೀಕರಣಗೊಂಡಿರುವುದರಿಂದ, ಅಂತಾರಾಷ್ಟ್ರೀಯ ರೋಡ್ ರೇಸಿಂಗ್ ಕ್ಯಾಲೆಂಡರ್‌ನಲ್ಲಿ ಬಜಾಜ್ ಪುಣೆ ಗ್ರ್ಯಾಂಡ್ ಟೂರ್ ಕ್ಲಾಸ್ 2ರಿಂದ ಕ್ಲಾಸ್ 1ಕ್ಕೆ ಏರಿಕೆಯಾಗಿದೆ. ಇದರಿಂದ ಸೈಕ್ಲಿಸ್ಟ್‌ಗಳು ಮತ್ತು ತಂಡಗಳಿಗೆ ಹೆಚ್ಚಿನ UCI ರ‍್ಯಾಂಕಿಂಗ್ ಅಂಕಗಳನ್ನು ಗಳಿಸುವ ಅವಕಾಶ ದೊರೆಯಲಿದೆ. ಅಲ್ಲದೆ, ಬಲಿಷ್ಠ ಅಂತಾರಾಷ್ಟ್ರೀಯ ತಂಡಗಳು ಸ್ಪರ್ಧೆಯಲ್ಲಿ ಭಾಗವಹಿಸಲು ಇದು ಮತ್ತಷ್ಟು ಉತ್ತೇಜನ ನೀಡಲಿದೆ. ಇದರಿಂದ ಪ್ರೇಕ್ಷಕರಿಗೆ ಹೆಚ್ಚು ಪೈಪೋಟಿಯ ಹಾಗೂ ಉತ್ತಮ ಗುಣಮಟ್ಟದ ರೇಸ್‌ಗಳನ್ನು ವೀಕ್ಷಿಸುವ ಅವಕಾಶ ಸಿಗಲಿದೆ.
2027ರ ಆವೃತ್ತಿಯು ಗಣರಾಜ್ಯೋತ್ಸವದ ದಿನವಾದ ಜನವರಿ 26ರಂದು ಆರಂಭವಾಗಿ, ಜನವರಿ 31ರಂದು ಮುಕ್ತಾಯಗೊಳ್ಳಲಿದೆ. ಆರು ಹಂತಗಳ ರೇಸ್‌ನಲ್ಲಿ ಸೈಕ್ಲಿಸ್ಟ್‌ಗಳು ಪುಣೆ ಹಾಗೂ ಮಹಾರಾಷ್ಟ್ರದ ವೈವಿಧ್ಯಮಯ ಭೂಪ್ರದೇಶಗಳ ಮೂಲಕ ಸಾಗುತ್ತಾ ತಮ್ಮ ಸಾಮರ್ಥ್ಯ ಪ್ರದರ್ಶಿಸಲಿದ್ದಾರೆ. ರೇಸ್‌ನ ಮಾರ್ಗಗಳಲ್ಲಿ ಮುಳ್ಶಿ–ಹಿಂಜೆವಾಡಿ, ಬಾರಾಮತಿ–ಸಾಸವಾಡ್, ಜುನ್ನರ್–ರಾಜ್‌ಗುರುನಗರ, ಆಳಂದಿ–ಲೋಣಾವಳಾ–ಖಂಡಾಲಾ, ಲೋಣಾವಳಾ–ಹಿಂಜೆವಾಡಿ ಹಾಗೂ ಪಿಸಿಎಂಸಿ–ಬಾಲಗಂಧರ್ವ ರಂಗಮಂದಿರ ಸೇರಿವೆ. ನಗರ ರಸ್ತೆಗಳು, ಗ್ರಾಮೀಣ ಪ್ರದೇಶಗಳು, ಐತಿಹಾಸಿಕ ಸ್ಥಳಗಳು ಮತ್ತು ಪಶ್ಚಿಮ ಘಟ್ಟಗಳ ಸವಾಲಿನ ಭೂಪ್ರದೇಶಗಳ ಮೂಲಕ ರೇಸ್ ಸಾಗಲಿದೆ.
ಯೂನಿಯನ್ ಸೈಕ್ಲಿಸ್ಟ್ ಇಂಟರ್‌ನ್ಯಾಷನಲ್ (UCI) ಅಧ್ಯಕ್ಷ ಡೇವಿಡ್ ಲಪ್ಪಾರ್ಟಿಯೆಂಟ್ ಮಾತನಾಡಿ, “ಭಾರತದಲ್ಲಿ ರೋಡ್ ಸೈಕ್ಲಿಂಗ್‌ನ ಬೆಳವಣಿಗೆಗೆ ಬಜಾಜ್ ಪುಣೆ ಗ್ರ್ಯಾಂಡ್ ಟೂರ್ ಪ್ರಮುಖ ವೇದಿಕೆಯಾಗಿದೆ. ರೇಸ್‌ನ ಪ್ರಗತಿಯನ್ನು ಗಮನದಲ್ಲಿಟ್ಟುಕೊಂಡು ಇದನ್ನು UCI 2.1ಕ್ಕೆ ಉನ್ನತೀಕರಿಸಿರುವುದು ಮಹತ್ವದ ಬೆಳವಣಿಗೆಯಾಗಿದೆ,” ಎಂದರು.
ಪುಣೆ ಜಿಲ್ಲಾಧಿಕಾರಿ ಜಿತೇಂದ್ರ ದುಡಿ ಮಾತನಾಡಿ, “ಬಜಾಜ್ ಪುಣೆ ಗ್ರ್ಯಾಂಡ್ ಟೂರ್‌ಗೆ UCI 2.1 ಮಾನ್ಯತೆ ದೊರೆತಿರುವುದು ರೇಸ್‌ಗೂ ಹಾಗೂ ಭಾರತದ ಸೈಕ್ಲಿಂಗ್ ಕ್ಷೇತ್ರಕ್ಕೂ ಮಹತ್ವದ ಮೈಲಿಗಲ್ಲಾಗಿದೆ. ಮೊದಲ ಆವೃತ್ತಿ ಈ ರೇಸ್‌ನ ಸಾಮರ್ಥ್ಯವನ್ನು ತೋರಿಸಿಕೊಟ್ಟಿದ್ದು, ಸೈಕ್ಲಿಸ್ಟ್‌ಗಳು, ತಂಡಗಳು ಮತ್ತು ಪುಣೆಯ ಜನರಿಂದ ಉತ್ತಮ ಪ್ರತಿಕ್ರಿಯೆ ದೊರೆತಿತ್ತು. ಇದೀಗ ಸ್ಪರ್ಧೆಯನ್ನು ಮತ್ತಷ್ಟು ಉನ್ನತಮಟ್ಟಕ್ಕೆ ಕೊಂಡೊಯ್ಯಲು, ಬಲಿಷ್ಠ ಅಂತಾರಾಷ್ಟ್ರೀಯ ತಂಡಗಳನ್ನು ಪುಣೆಗೆ ಕರೆತರಲು ಮತ್ತು ಭಾರತೀಯ ಸೈಕ್ಲಿಸ್ಟ್‌ಗಳಿಗೆ ಅನುಭವಿ ಅಂತಾರಾಷ್ಟ್ರೀಯ ಸೈಕ್ಲಿಸ್ಟ್‌ಗಳೊಂದಿಗೆ ಸ್ಪರ್ಧಿಸುವ ಹೆಚ್ಚಿನ ಅವಕಾಶಗಳನ್ನು ಕಲ್ಪಿಸಲು ಸಾಧ್ಯವಾಗಲಿದೆ,” ಎಂದರು.
