ಆ ಕ್ಷಣದಲ್ಲಿ ಮನಸ್ಸಿನ ಅಂತರಾಳದಲ್ಲಿ ಒಂದು ಸೂಕ್ಷ್ಮ ಸಂಶಯದ ಕಿಡಿ ಹೊತ್ತಿಕೊಳ್ಳುತ್ತದೆ. ಇಡೀ ಬ್ರಹ್ಮಾಂಡವನ್ನೇ ಸೃಷ್ಟಿಸಿದ ಜಗದೊಡೆಯನಿಗೆ, ಅಣುರೇಣು ತೃಣಕಾಷ್ಠಗಳಲ್ಲೂ ತುಂಬಿರುವ ಸರ್ವಾಂತರ್ಯಾಮಿಗೆ, ನನ್ನ ರಕ್ತದ ಕಣಕಣವೂ ತಿಳಿದಿರುವ ಸೃಷ್ಟಿಕರ್ತನಿಗೆ ನನ್ನ ಹೆಸರು ಗೊತ್ತಿಲ್ವಾ?
ನನ್ನ ತಲೆಯ ಮೇಲಿನ ನಕ್ಷತ್ರದ ಲೆಕ್ಕ ಆತನಿಗೆ ತಿಳಿದಿಲ್ವಾ?
ನನ್ನ ಮೂಲ ಗೋತ್ರ ಯಾವುದು ಅಂತ ಆ ಪರಮಾತ್ಮನಿಗೆ ನೆನಪಿಸಬೇಕಾ?
ಹಾಗಾದರೆ ಈ ಪುರೋಹಿತರು ಕೇಳುವ ಹೆಸರು, ಗೋತ್ರ, ನಕ್ಷತ್ರಗಳ ಈ ಧಾರ್ಮಿಕ ವಹಿವಾಟು ಕೇವಲ ಒಂದು ಸಂಪ್ರದಾಯದ ನಾಟಕವಾ?
ಅಥವಾ ಇದರ ಹಿಂದೆ ಕಣ್ಣಿಗೆ ಕಾಣದ ಯಾವುದೋ ಅದ್ಭುತ ವಿಜ್ಞಾನ, ಮಹಾನ್ ರಹಸ್ಯ ಅಡಗಿದೆಯಾ?
ಈ ಪ್ರಶ್ನೆ ಕೇವಲ ನಿಮ್ಮದಲ್ಲ. ಇವತ್ತು ದೇವಸ್ಥಾನದ ಮೆಟ್ಟಿಲು ಹತ್ತುವ ಲಕ್ಷಾಂತರ ಜನರನ್ನು ಒಳಗೊಳಗೇ ಕೊರೆಯುತ್ತಿರುವ ಜಿಜ್ಞಾಸೆ ಇದು. ಮೇಲ್ನೋಟಕ್ಕೆ ಈ ಪ್ರಶ್ನೆ ತರ್ಕಬದ್ಧವಾಗಿ ಕಾಣಿಸುತ್ತದೆ. ಆದರೆ ಈ ಪ್ರಶ್ನೆಯ ಒಳಗಿಳಿದು ಧರ್ಮಶಾಸ್ತ್ರ ಮತ್ತು ಬ್ರಹ್ಮಾಂಡದ ಆಳಕ್ಕೆ ಇಳಿದರೆ, ಅಲ್ಲಿ ತೆರೆದುಕೊಳ್ಳುವ ಸತ್ಯಗಳು ಮೈನವಿರೇಳಿಸುತ್ತವೆ.
ಇದನ್ನು ಸರಿಯಾಗಿ ಅರ್ಥಮಾಡಿಕೊಳ್ಳಬೇಕಾದರೆ, ಒಂದು ಕ್ಷಣ ನಿಮ್ಮ ಜೇಬಿನಲ್ಲಿರುವ ಮೊಬೈಲ್ ಫೋನನ್ನು ಗಮನಿಸಿ. ಜಗತ್ತಿನ ಯಾವುದೋ ಮೂಲೆಯಲ್ಲಿ ಕೋಟ್ಯಂತರ ಮೊಬೈಲ್ ಟವರ್‌ಗಳಿವೆ. ಆಕಾಶದಲ್ಲಿ ನೂರಾರು ಉಪಗ್ರಹಗಳು ಸುತ್ತುತ್ತಿವೆ. ಗಾಳಿಯಲ್ಲಿ ಲಕ್ಷಾಂತರ ರೇಡಿಯೋ ತರಂಗಗಳು, ಫ್ರಿಕ್ವೆನ್ಸಿಗಳು ಹರಿದಾಡುತ್ತಿವೆ. ಎಲ್ಲವೂ ಸರಿ. ಆದರೆ ನಿಮ್ಮ ಪಕ್ಕದಲ್ಲೇ ಕುಳಿತಿರುವ ಸ್ನೇಹಿತನ ಮೊಬೈಲ್‌ಗೆ ನೀವು ಕರೆ ಮಾಡಬೇಕಾದರೆ ಏನು ಮಾಡುತ್ತೀರಿ?
ಕೇವಲ ಗಾಳಿಯಲ್ಲಿ ಮಾತನಾಡಿದರೆ ಸಾಕಾ?
ಇಡೀ ನೆಟ್‌ವರ್ಕ್ ವ್ಯವಸ್ಥೆಯ ಸರ್ವರ್‌ಗೆ ನಿಮ್ಮ ಧ್ವನಿ ಕೇಳಿಸುತ್ತದೆ ಎಂದು ಸುಮ್ಮನೆ ಕುಳಿತರೆ ನಿಮ್ಮ ಧ್ವನಿ ಅವನಿಗೆ ತಲುಪುತ್ತಾ?
ಖಂಡಿತ ಇಲ್ಲ. ನೀವು ಆತನ ಹತ್ತಂಕಿಯ ನಿರ್ದಿಷ್ಟ ಮೊಬೈಲ್ ಸಂಖ್ಯೆಯನ್ನು ಒತ್ತಲೇಬೇಕು. ಆ ಹತ್ತು ಅಂಕಿಯ ಸಂಖ್ಯೆ ಸರಿಯಾಗಿದ್ದರೆ ಮಾತ್ರ ನಿಮ್ಮ ಸಂಪರ್ಕ ಕಲ್ಪನೆಯಾಗುವುದು. ಒಂದೇ ಒಂದು ಅಂಕಿ ತಪ್ಪಿದರೂ ಕರೆ ಬೇರೆ ಯಾರಿಗೋ ಹೋಗುತ್ತದೆ ಅಥವಾ ಸಂಪರ್ಕವೇ ಕಡಿತಗೊಳ್ಳುತ್ತದೆ.
ಸರ್ವರ್‌ಗೆ ಎಲ್ಲ ಡೇಟಾ ತಿಳಿದಿದೆ ಎನ್ನುವುದು ಎಷ್ಟು ಸತ್ಯವೋ, ಆ ಡೇಟಾವನ್ನು ಸಂಪರ್ಕಿಸಲು ನಿಮಗೆ ಸ್ಪೆಸಿಫಿಕ್ ಅಡ್ರೆಸ್ ಬೇಕು ಎನ್ನುವುದು ಅಷ್ಟೇ ಸತ್ಯ. ನಮ್ಮ ಸನಾತನ ಋಷಿಗಳು ಸಾವಿರಾರು ವರ್ಷಗಳ ಹಿಂದೆಯೇ ಕಂಡುಕೊಂಡ ಆಧ್ಯಾತ್ಮಿಕ ಸೈನ್ಸ್ ಇದು.
ಈ ಜಗತ್ತಿನಲ್ಲಿ ದೇವರು ಕೇವಲ ಒಬ್ಬ ವ್ಯಕ್ತಿಯಲ್ಲ. ಆತ ಒಂದು ಅನಂತ ಶಕ್ತಿ ಸಾಗರ. ಆ ಅನಂತ ಶಕ್ತಿಯ ಜೊತೆ ಸೀಮಿತವಾಗಿರುವ ಮನುಷ್ಯನ ಪ್ರಾಣಶಕ್ತಿಯನ್ನು ಜೋಡಿಸುವ ಅದ್ಭುತ ವೈರ್‌ಲೆಸ್ ತಂತ್ರಜ್ಞಾನವೇ ಸಂಕಲ್ಪ.
ವೇದಗಳು ದೇವರನ್ನು ಸರ್ವಜ್ಞ ಎಂದೇ ಕರೆಯುತ್ತವೆ.
“ಯಃ ಸರ್ವಜ್ಞಃ ಸರ್ವವಿದ್ಯಸ್ಯ ಜ್ಞಾನಮಯಂ ತಪಃ
ತಸ್ಮಾದೇತದ್ಬ್ರಹ್ಮ ನಾಮ ರೂಪಮನ್ನಂ ಚ ಜಾಯತೇ”
ಮುಂಡಕೋಪನಿಷತ್ತಿನ ಈ ಮಂತ್ರ ಸ್ಪಷ್ಟವಾಗಿ ಹೇಳುತ್ತದೆ, ಪರಮಾತ್ಮ ಸರ್ವಜ್ಞ, ಎಲ್ಲವನ್ನೂ ತಿಳಿದವನು. ಅವನಿಗೆ ನಿಮ್ಮ ಇಡೀ ಜಾತಕ, ಹಿಂದಿನ ಜನ್ಮಗಳ ಕರ್ಮದ ಕತೆಗಳೆಲ್ಲವೂ ಗೊತ್ತು. ಹಾಗಾದರೆ ಪ್ರಶ್ನೆ ಉಳಿಯುವುದು ದೇವರಿಗೆ ಗೊತ್ತಿದೆಯಾ ಅಂತಲ್ಲ. ನಿಮಗೆ ನಿಮ್ಮ ಬಗ್ಗೆ ಎಷ್ಟು ಅರಿವಿದೆ ಎನ್ನುವುದು.
ಪೂಜೆಯ ವೇಳೆ ಅರ್ಚಕರು ನಿಮ್ಮ ಗೋತ್ರ, ನಕ್ಷತ್ರ, ಹೆಸರು ಕೇಳಿದಾಗ ಅಲ್ಲಿ ನಡೆಯುತ್ತಿರುವುದು ದೇವರಿಗೆ ಮಾಹಿತಿ ಕೊಡುವ ಕೆಲಸವಲ್ಲ, ಕಾಲ ಮತ್ತು ದೇಶದ ಅನಂತ ಹರಹಿನಲ್ಲಿ ಕಳೆದುಹೋಗಿರುವ ನಿಮ್ಮ ಅಸ್ತಿತ್ವವನ್ನು ಒಂದೆಡೆ ಕೇಂದ್ರೀಕರಿಸುವ ಪ್ರಕ್ರಿಯೆ.
ನಾವು ಅರ್ಚಕರ ಎದುರು ನಿಂತಾಗ ಅವರು ಮಾಡುವ ಮೊದಲ ಕೆಲಸ ಸಂಕಲ್ಪ. ಆ ಸಂಕಲ್ಪದ ಮಂತ್ರಗಳನ್ನು ಗಮನಿಸಿದ್ದೀರಾ? ಪ್ರತಿಯೊಬ್ಬ ಅರ್ಚಕನೂ ಪೂಜೆ ಆರಂಭಿಸುವ ಮುನ್ನ ಹೀಗೆ ಉಚ್ಚರಿಸುತ್ತಾನೆ.
“ಆದ್ಯ ಬ್ರಹ್ಮಣಃ ದ್ವಿತೀಯ ಪರಾರ್ಧೇ ಶ್ವೇತವರಾಹಕಲ್ಪೇ ವೈವಸ್ವತ ಮನ್ವಂತರೇ ಅಷ್ಟಾವಿಂಶತಿತಮೇ ಕಲಿಯುಗೆ ಪ್ರಥಮಪಾದೇ ಜಂಬೂದ್ವೀಪೇ ಭರತವರ್ಷೇ ಭರತಖಂಡೇ ದಂಡಕಾರಣ್ಯೇ ದೇಶೇ…”
ಇದರ ಅರ್ಥವೇನು ಗೊತ್ತಾ? ಇವತ್ತು ವಿಜ್ಞಾನಿಗಳು ಜಿಪಿಎಸ್ ಮೂಲಕ ಇಡೀ ಭೂಮಿಯ ಮೇಲೆ ನಿಮ್ಮ ರೇಖಾಂಶ, ಅಕ್ಷಾಂಶಗಳನ್ನು ಗುರುತಿಸುತ್ತಾರಲ್ಲ, ಅದಕ್ಕಿಂತ ಲಕ್ಷ ಪಟ್ಟು ನಿಖರವಾದ ಟೈಮ್ ಆಂಡ್ ಸ್ಪೇಸ್ ಮ್ಯಾಪಿಂಗ್ ಇದು. ಬ್ರಹ್ಮನ ಸೃಷ್ಟಿಯ ಎರಡನೇ ಭಾಗದಲ್ಲಿ, ಶ್ವೇತವರಾಹ ಕಲ್ಪದಲ್ಲಿ, ವೈವಸ್ವತ ಮನ್ವಂತರದಲ್ಲಿ, ಇಪ್ಪತ್ತೆಂಟನೆಯ ಮಹಾಯುಗದ ಕಲಿಯುಗದ ಮೊದಲ ಪಾದದಲ್ಲಿ, ಜಂಬೂದ್ವೀಪದ ಭರತವರ್ಷದ ಈ ನಿರ್ದಿಷ್ಟ ಊರಿನಲ್ಲಿ ನಾನು ನಿಂತಿದ್ದೇನೆ ಎಂದು ಕಾಲದ ಮತ್ತು ಭೂಗೋಳದ ಅಕ್ಷಾಂಶವನ್ನು ಮೊದಲು ಲಾಕ್ ಮಾಡಲಾಗುತ್ತದೆ.
ಆನಂತರ ಅರ್ಚಕರು ಕೇಳುವುದು, ನಿಮ್ಮ ಕುಲ ಯಾವುದು, ಗೋತ್ರ ಯಾವುದು, ಪ್ರವರ ಯಾವುದು, ನಕ್ಷತ್ರ ಯಾವುದು ಮತ್ತು ಹೆಸರು ಯಾವುದು?
ಇಲ್ಲಿಂದ ಶುರುವಾಗುತ್ತದೆ ಅಸಲಿ ರಹಸ್ಯ. ಗೋತ್ರ ಎಂದರೇನು? ಹಲವರು ಅಂದುಕೊಳ್ಳುತ್ತಾರೆ ಗೋತ್ರ ಎಂದರೆ ಕೇವಲ ಒಂದು ಜಾತಿಯ ಅಥವಾ ಕುಟುಂಬದ ಲೇಬಲ್ ಎಂದು. ಖಂಡಿತ ಅಲ್ಲ. ಗೋತ್ರ ಎಂದರೆ ನಿಮ್ಮ ರಕ್ತದಲ್ಲಿ, ನಿಮ್ಮ ಡಿಎನ್‌ಎ ಯಲ್ಲಿ ಹರಿಯುತ್ತಿರುವ ಮೂಲ ಋಷಿಯ ಪ್ರಾಣಶಕ್ತಿಯ ತರಂಗ.
ಜೀವಶಾಸ್ತ್ರದ ಪ್ರಕಾರ ನಮ್ಮ ದೇಹದಲ್ಲಿ ವಂಶಪಾರಂಪರ್ಯವಾಗಿ ಹರಿದುಬರುವ ವೈ ಕ್ರೋಮೋಸೋಮ್ ಮತ್ತು ಜೆನೆಟಿಕ್ ಕೋಡ್ ಏನಿದೆ, ಅದನ್ನು ನಮ್ಮ ಋಷಿಗಳು ಸಹಸ್ರಾರು ವರ್ಷಗಳ ಹಿಂದೆಯೇ ಗುರುತಿಸಿದ್ದರು. ನೀವು ಕಶ್ಯಪ ಗೋತ್ರ, ಭಾರದ್ವಾಜ ಗೋತ್ರ, ವಸಿಷ್ಠ ಗೋತ್ರ ಅಥವಾ ವಿಶ್ವಾಮಿತ್ರ ಗೋತ್ರ ಎಂದು ಹೇಳಿದಾಗ, ಆ ಮೂಲ ಮಹರ್ಷಿಯ ತಪಸ್ಸಿನ ತರಂಗದ ಜೊತೆ ನಿಮ್ಮ ಡಿಎನ್‌ಎ ಕನೆಕ್ಟ್ ಆಗುತ್ತದೆ.
ಪ್ರವರ ಎಂದರೆ ಆ ಗೋತ್ರದ ಮೂಲದಲ್ಲಿ ತಪಸ್ಸು ಮಾಡಿ ಸಿದ್ಧಿ ಪಡೆದ ಮಹಾನ್ ಋಷಿ ಪರಂಪರೆ. ನೀವು ಸಂಕಲ್ಪದಲ್ಲಿ ಪ್ರವರವನ್ನು ಉಚ್ಚರಿಸಿದಾಗ ನಿಮ್ಮ ಇಡೀ ವಂಶವಾಹಿಯ ಆವರ್ತನ ಜಾಗೃತವಾಗುತ್ತದೆ.
ಇನ್ನು ನಕ್ಷತ್ರ. ನೀವು ಜನಿಸಿದ ಆ ಕ್ಷಣದಲ್ಲಿ ಬ್ರಹ್ಮಾಂಡದ ಆಕಾಶಕಾಯಗಳು ನಿಮ್ಮ ಮೆದುಳಿನ ಮತ್ತು ಶರೀರದ ನರಮಂಡಲದ ಮೇಲೆ ಒಂದು ನಿರ್ದಿಷ್ಟ ಮುದ್ರೆಯನ್ನು ಒತ್ತಿರುತ್ತವೆ. ಅದೇ ನಿಮ್ಮ ನಕ್ಷತ್ರ ಮತ್ತು ರಾಶಿ. ಅಂದರೆ ನಕ್ಷತ್ರ ಎನ್ನುವುದು ನಿಮ್ಮ ದೇಹದ ಎಲೆಕ್ಟ್ರೋಮ್ಯಾಗ್ನೆಟಿಕ್ ಫ್ರೀಕ್ವೆನ್ಸಿ.
ಕೊನೆಯದಾಗಿ ಶರ್ಮ, ವರ್ಮ, ಗುಪ್ತ ಮುಂತಾದ ಹೆಸರುಗಳು. ಇದು ಈ ಸಮಾಜದಲ್ಲಿ ನಿಮ್ಮ ಮನಸ್ಸು ಗುರುತಿಸಿಕೊಂಡಿರುವ ವೈಯಕ್ತಿಕ ಐಡೆಂಟಿಟಿ.
ಈಗ ಈ ಇಡೀ ಚಿತ್ರಣವನ್ನು ಒಟ್ಟಿಗೆ ನೋಡಿ. ಕಲ್ಪ, ಮನ್ವಂತರ, ಯುಗ, ದೇಶ, ಸ್ಥಳ, ಋಷಿ ಗೋತ್ರ, ನಕ್ಷತ್ರ, ಹೆಸರು. ಅಂದರೆ ಅನಂತವಾದ ಈ ಬ್ರಹ್ಮಾಂಡದ ಅಪಾರ ಶೂನ್ಯದಲ್ಲಿ, ನಿಮ್ಮ ನಿಖರವಾದ ಆಧ್ಯಾತ್ಮಿಕ ಐಪಿ ಅಡ್ರೆಸ್ ಇದು.
ಬ್ಯಾಂಕಿಗೆ ಹೋಗಿ ಲಕ್ಷಾಂತರ ರೂಪಾಯಿ ಹಣ ಡ್ರಾ ಮಾಡಬೇಕಾದರೆ, ಮ್ಯಾನೇಜರ್‌ಗೆ ನಿಮ್ಮ ಮುಖ ಚೆನ್ನಾಗಿ ಪರಿಚಯವಿದ್ದರೂ, ಆತ ನಿಮ್ಮ ಪ್ರಾಣಸ್ನೇಹಿತನೇ ಆಗಿದ್ದರೂ ಚೆಕ್ ಮೇಲೆ ಸಹಿ ಇಲ್ಲದೆ, ಅಕೌಂಟ್ ನಂಬರ್ ಇಲ್ಲದೆ ಹಣ ಕೊಡುತ್ತಾನಾ? ಇಲ್ಲ. ನಿಯಮ ನಿಯಮವೇ. ಪ್ರಕೃತಿಯೂ ಹಾಗೆಯೇ. ಪ್ರಕೃತಿಯ ನಿಯಮಗಳು ಅತ್ಯಂತ ಕಟ್ಟುನಿಟ್ಟು. ದೇವರಿಗೆ ಎಲ್ಲವೂ ತಿಳಿದಿರಬಹುದು, ಆದರೆ ಫಲವನ್ನು ಸ್ವೀಕರಿಸಲು ನಿಂತಿರುವ ಜೀವಿಯು ತಾನು ಯಾರೆಂದು ಸ್ಪಷ್ಟವಾಗಿ ನಿವೇದಿಸಿಕೊಳ್ಳದಿದ್ದರೆ ಆ ಕರ್ಮದ ಶಕ್ತಿ ಯಾರ ಖಾತೆಗೆ ಜಮೆಯಾಗಬೇಕು?
ಇದಕ್ಕಾಗಿಯೇ ನಮ್ಮ ಶಾಸ್ತ್ರಕಾರರು ಸಂಕಲ್ಪದ ಮಹತ್ವವನ್ನು ಕಡ್ಡಾಯಗೊಳಿಸಿದ್ದಾರೆ. ಪದ್ಮಪುರಾಣ ಮತ್ತು ಧರ್ಮಸಿಂಧು ಗ್ರಂಥಗಳಲ್ಲಿ ಸ್ಪಷ್ಟವಾದ ಎಚ್ಚರಿಕೆಯಿದೆ.
“ಸಂಕಲ್ಪೇನ ವಿನಾ ರಾಜನ್ ಯತ್ಕಿಂಚಿತ್ ಕುರುತೇ ನರಃ
ಫಲಂ ನಾಸ್ಯ ಭವೇತ್ ತಸ್ಯ ಯಸ್ಮಾತ್ ಸಂಕಲ್ಪಪೂರ್ವಿಕಾಃ”
ಅರ್ಥಾತ್ ಸಂಕಲ್ಪವಿಲ್ಲದೆ ಮನುಷ್ಯ ಯಾವ ಧಾರ್ಮಿಕ ಕ್ರಿಯೆಯನ್ನು ಮಾಡಿದರೂ, ಎಷ್ಟು ಕೋಟಿ ಖರ್ಚು ಮಾಡಿ ಪೂಜೆ ಹೋಮಗಳನ್ನು ನಡೆಸಿದರೂ ಅದರಿಂದ ಯಾವುದೇ ಫಲ ಸಿಗುವುದಿಲ್ಲ. ಎಲ್ಲವೂ ವ್ಯರ್ಥವಾಗಿ ಶೂನ್ಯದಲ್ಲಿ ಕರಗಿಹೋಗುತ್ತದೆ. ಯಾಕೆಂದರೆ ಪ್ರತಿಯೊಂದು ಸತ್ಕರ್ಮಕ್ಕೂ ಸಂಕಲ್ಪವೇ ಬೀಜ. ಬೀಜವಿಲ್ಲದೆ ಮರ ಹುಟ್ಟಲು ಹೇಗೆ ಸಾಧ್ಯವಿಲ್ಲವೋ, ಹಾಗೆಯೇ ಸಂಕಲ್ಪದ ನಿರ್ದಿಷ್ಟ ಗುರುತಿಸುವಿಕೆಯಿಲ್ಲದೆ ಪೂಜೆಯ ಫಲ ಸಂಭವಿಸುವುದೇ ಇಲ್ಲ.
ಇನ್ನೊಂದು ಆಳವಾದ ಆಯಾಮವನ್ನು ನೋಡಿ. ಮನುಷ್ಯನ ಮನಸ್ಸು ಒಂದು ಸೆಕೆಂಡಿಗೆ ಸಾವಿರ ಕಡೆ ಓಡುತ್ತದೆ. ದೇವಸ್ಥಾನದ ಮುಂದೆ ಕೈಮುಗಿದು ನಿಂತಾಗಲೂ ನಮಗೆ ಮನೆಯ ನೆನಪು, ವ್ಯಾಪಾರದ ಚಿಂತೆ, ವಾಹನದ ಕೀಲಿ ಎಲ್ಲಿಟ್ಟೆ ಎನ್ನುವ ಯೋಚನೆಗಳು ಸುಳಿಯುತ್ತಿರುತ್ತವೆ. ದೇಹ ಮಾತ್ರ ದೇವರ ಮುಂದಿರುತ್ತದೆ, ಮನಸ್ಸು ಎಲ್ಲೋ ತಿಪ್ಪೆಯಲ್ಲಿರುತ್ತದೆ. ಆದರೆ ಯಾವಾಗ ಅರ್ಚಕರು ನಿಮ್ಮ ಕೈಗೆ ಅಕ್ಷತೆ, ನೀರು ಕೊಟ್ಟು, ನಿಮ್ಮ ಗೋತ್ರ ಯಾವುದು, ನಕ್ಷತ್ರ ಯಾವುದು, ಹೆಸರು ಹೇಳಿ ಎಂದು ನಿಮ್ಮನ್ನು ನೇರವಾಗಿ ಪ್ರಶ್ನಿಸುತ್ತಾರೋ, ಆ ಕ್ಷಣದಲ್ಲಿ ನಿಮ್ಮ ಚದುರಿದ ಮನಸ್ಸು ಒಮ್ಮೆಲೆ ಜಗ್ಗಿ ಪ್ರಸ್ತುತ ಕ್ಷಣಕ್ಕೆ ಬರುತ್ತದೆ. ನಿಮ್ಮ ಗಮನ ಪೂರ್ತಿಯಾಗಿ ಆ ಪೂಜೆಯ ಮೇಲೆ ಕೇಂದ್ರೀಕೃತವಾಗುತ್ತದೆ.
ನಾಮರೂಪಗಳ ಮಹತ್ವವನ್ನು ಛಾಂದೋಗ್ಯ ಉಪನಿಷತ್ತು ಅತ್ಯಂತ ಸುಂದರವಾಗಿ ವಿವರಿಸುತ್ತದೆ.
“ಆಕಾಶೋ ವೈ ನಾಮ ನಾಮರೂಪಯೋರ್ನಿರ್ವಹಹಿತಾ ತೇ ಯದಂತರಾ ತದ್ಬ್ರಹ್ಮ ತದಮೃತಂ ಸ ಆತ್ಮಾ”
ನಾಮ ಮತ್ತು ರೂಪಗಳೇ ಈ ಜಗತ್ತನ್ನು ನಿರ್ವಹಣೆ ಮಾಡುತ್ತಿರುವುದು. ಆ ನಾಮರೂಪಗಳ ಆಚೆಗೆ ಇರುವುದು ಪರಬ್ರಹ್ಮ. ಆದರೆ ಆ ಪರಬ್ರಹ್ಮನನ್ನು ಅರಿಯಬೇಕಾದರೆ ಅಥವಾ ಆತನ ಶಕ್ತಿಯನ್ನು ನಮ್ಮ ಭೌತಿಕ ಜೀವನದ ಶಾಂತಿ, ನೆಮ್ಮದಿ, ಆರೋಗ್ಯಕ್ಕಾಗಿ ಆವಾಹನೆ ಮಾಡಿಕೊಳ್ಳಬೇಕಾದರೆ ನಾವು ನಾಮರೂಪಗಳ ನೆಲೆಯಲ್ಲೇ ನಿಲ್ಲಬೇಕು. ನಾವು ಇನ್ನೂ ಮುಕ್ತ ಜೀವಿಗಳಲ್ಲ, ಶರೀರದ ಬಂಧನದಲ್ಲಿರುವ ಸಾಮಾನ್ಯ ಮನುಷ್ಯರು. ಆದ್ದರಿಂದ ನಮ್ಮ ಗುರುತು ನಮಗೆ ಅತ್ಯಗತ್ಯ.
ದೇವಸ್ಥಾನದಲ್ಲಿ ನಡೆಯುವ ಅರ್ಚನೆ ಎನ್ನುವುದು ಕೇವಲ ಅರ್ಚಕರು ತಟ್ಟೆ ತೂಗುವುದಲ್ಲ. ಅದು ಭಗವಂತನ ಶಕ್ತಿ ಮತ್ತು ನಿಮ್ಮ ಜೀವಶಕ್ತಿಯ ನಡುವೆ ನಡೆಯುವ ಒಂದು ಅದ್ಭುತ ಆಧ್ಯಾತ್ಮಿಕ ರಿಸೀವರ್ ಪ್ರಕ್ರಿಯೆ. ದೇವಸ್ಥಾನದ ವಿಗ್ರಹ ಅಥವಾ ಪ್ರಾಣಪ್ರತಿಷ್ಠಾಪನೆಗೊಂಡ ಬಿಂಬವು ಒಂದು ಪವರ್‌ಫುಲ್ ಟ್ರಾನ್ಸ್‌ಮಿಟರ್ ಇದ್ದಂತೆ. ಅಲ್ಲಿಂದ ನಿರಂತರವಾಗಿ ಧನಾತ್ಮಕ ತರಂಗಗಳು ಹೊರಹೊಮ್ಮುತ್ತಿರುತ್ತವೆ. ಆ ಟ್ರಾನ್ಸ್‌ಮಿಟರ್‌ನಿಂದ ಬರುವ ದೈವಿಕ ಅನುಗ್ರಹದ ಶಕ್ತಿಯನ್ನು ನೀವು ನಿಮ್ಮ ಬದುಕಿಗೆ ಸೆಳೆದುಕೊಳ್ಳಬೇಕಾದರೆ, ನಿಮ್ಮ ರಿಸೀವರ್ ಟ್ಯೂನ್ ಆಗಿರಬೇಕು. ಆ ಟ್ಯೂನಿಂಗ್ ಪ್ರಕ್ರಿಯೆಯೇ ಗೋತ್ರ ಮತ್ತು ನಕ್ಷತ್ರದ ಉಚ್ಚಾರಣೆ.
ನೀವು ಅರ್ಚಕರಿಗೆ ನಿಮ್ಮ ಗೋತ್ರ, ಪ್ರವರ, ನಕ್ಷತ್ರ ಮತ್ತು ಹೆಸರನ್ನು ಹೇಳಿದಾಗ, ಅರ್ಚಕರು ಆ ವಿವರಗಳನ್ನು ಸಂಕಲ್ಪ ಮಂತ್ರದಲ್ಲಿ ಸೇರಿಸಿ ಗರ್ಭಗುಡಿಯ ದೇವರ ಪಾದಕ್ಕೆ ಸಮರ್ಪಿಸುತ್ತಾರೆ. ಅದು ದೇವರಿಗೆ ನಿಮ್ಮ ಪರಿಚಯ ಮಾಡಿಕೊಡುವುದಲ್ಲ. ಅದು, ಬ್ರಹ್ಮಾಂಡದ ಆ ಅಗಾಧ ಶಕ್ತಿಯಿಂದ ಹೊರಹೊಮ್ಮುತ್ತಿರುವ ಕೃಪಾಶೀರ್ವಾದವನ್ನು ನಿಮ್ಮ ಈ ನಿರ್ದಿಷ್ಟ ಶರೀರ ಮತ್ತು ಆತ್ಮಕ್ಕೆ ಮಾತ್ರ ದಕ್ಕುವಂತೆ ಮಾಡುವ ಡಿಜಿಟಲ್ ಸಿಗ್ನೇಚರ್.
ಇನ್ನೊಂದು ರಹಸ್ಯವಿದೆ. ಗರ್ಭಗುಡಿಯಲ್ಲಿ ನಿಂತ ಅರ್ಚಕ ಕೇವಲ ಒಬ್ಬ ಮಧ್ಯವರ್ತಿಯಲ್ಲ. ಆತ ಆ ಕ್ಷಣದಲ್ಲಿ ಒಂದು ಋತ್ವಿಕ್ ಮಾಧ್ಯಮ. ಆತ ಮಂತ್ರಗಳ ಕಂಪನದ ಮೂಲಕ ದೇವರಿಗೂ ಭಕ್ತನಿಗೂ ನಡುವೆ ಒಂದು ಸೇತುವೆಯಾಗಿ ನಿಲ್ಲುತ್ತಾನೆ. ಸೇತುವೆ ಗಟ್ಟಿಯಾಗಿರಬೇಕಾದರೆ ಎರಡೂ ಬದಿಯ ಕಂಬಗಳು ನಿಖರವಾಗಿರಬೇಕು. ಒಂದು ಬದಿ ದೇವರ ಮಂತ್ರ, ಇನ್ನೊಂದು ಬದಿ ಭಕ್ತನ ನಾಮಗೋತ್ರ.
“ಯೋ ಯಚ್ಛ್ರದ್ಧಃ ಸ ಏವ ಸಃ” ಎಂದು ಭಗವದ್ಗೀತೆಯಲ್ಲಿ ಶ್ರೀಕೃಷ್ಣ ಪರಮಾತ್ಮ ಹೇಳುತ್ತಾನೆ. ಯಾವ ಮನುಷ್ಯನಿಗೆ ತನ್ನ ಅಸ್ತಿತ್ವದ ಮೇಲೆ, ತನ್ನ ಮೂಲ ಬೇರುಗಳ ಮೇಲೆ ಶ್ರದ್ಧೆ ಇರುತ್ತದೆಯೋ ಆತನೇ ಪರಿಪೂರ್ಣ ಫಲವನ್ನು ಪಡೆಯುತ್ತಾನೆ. ನಿಮ್ಮ ತಂದೆ ತಾಯಿ, ನಿಮ್ಮ ಹಿರಿಯರು, ನಿಮ್ಮ ಋಷಿ ಮುನಿಗಳು ಯಾರೆಂದು ಮರೆತರೆ ನೀವು ನಿಮ್ಮ ಬೇರನ್ನೇ ಕತ್ತರಿಸಿಕೊಂಡಂತೆ. ಗೋತ್ರ ಹೇಳುವುದು ಎಂದರೆ ನನ್ನ ಮೂಲವನ್ನು ನಾನು ಮರೆತಿಲ್ಲ, ನಾನೊಬ್ಬ ಅನಾಥನಲ್ಲ, ನಾನು ಮಹಾನ್ ತಪಸ್ವಿಗಳ ವಂಶವಾಹಿಯಲ್ಲಿ ಬಂದಿರುವ ಜೀವ ಎಂದು ಹೆಮ್ಮೆಯಿಂದ ಜಗತ್ತಿಗೆ ಸಾರುವ ಪವಿತ್ರ ಕರ್ತವ್ಯ.
ಹಾಗಾಗಿ ಇನ್ನುಮುಂದೆ ಎಂದಾದರೂ ದೇವಸ್ಥಾನಕ್ಕೆ ಹೋದಾಗ, ಅರ್ಚಕರು ನಿಮ್ಮ ಹೆಸರು, ನಕ್ಷತ್ರ, ಗೋತ್ರ ಕೇಳಿದರೆ ಅಸಡ್ಡೆಯಿಂದ ನೋಡಬೇಡಿ. ಅಥವಾ ದೇವರಿಗೆ ಗೊತ್ತಿಲ್ವಾ ಎಂದು ಮನಸ್ಸಿನಲ್ಲಿ ಹುಸಿ ತರ್ಕ ಮಾಡಬೇಡಿ.
ನಿಮ್ಮ ಕಣ್ಣುಗಳನ್ನು ಮುಚ್ಚಿ, ಎದೆಯುಬ್ಬಿಸಿ, ನಿಮ್ಮ ಗೋತ್ರವನ್ನು, ನಿಮ್ಮ ನಕ್ಷತ್ರವನ್ನು, ನಿಮ್ಮ ಹೆಸರನ್ನು ಅತ್ಯಂತ ಸ್ಪಷ್ಟವಾಗಿ ಉಚ್ಚರಿಸಿ. ಯಾಕೆಂದರೆ ಆ ಕ್ಷಣದಲ್ಲಿ ನೀವು ಕೇವಲ ಒಂದು ಧ್ವನಿಯನ್ನು ಹೊರಹಾಕುತ್ತಿಲ್ಲ. ಅನಂತ ಕಾಲದ ಗರ್ಭದಿಂದ ಇವತ್ತಿನ ಈ ಕ್ಷಣದವರೆಗೂ ನಿಮ್ಮ ರಕ್ತದಲ್ಲಿ ಹರಿದುಬಂದಿರುವ ನಿಮ್ಮ ಸಮಸ್ತ ಪೂರ್ವಜರ ಶಕ್ತಿಯನ್ನು, ನಿಮ್ಮ ಅಸ್ತಿತ್ವದ ಸಂಪೂರ್ಣ ಕಂಪನವನ್ನು ಜಾಗೃತಗೊಳಿಸಿ, ಆ ಬ್ರಹ್ಮಾಂಡ ನಾಯಕನ ಕೃಪೆಯ ವಲಯದೊಳಗೆ ನಿಮ್ಮನ್ನು ನೀವು ಅರ್ಪಿಸಿಕೊಳ್ಳುತ್ತಿದ್ದೀರಿ.
ಇಲ್ಲಿ ಹಲವರ ಮನಸ್ಸಿನಲ್ಲಿ ಮೂಡುವ ಮತ್ತೊಂದು ತೀಕ್ಷ್ಣವಾದ ಪ್ರಶ್ನೆಯಿದೆ. ಕೆಲವರಿಗೆ ತಮ್ಮ ಮೂಲ ಋಷಿ ಗೋತ್ರದ ಸ್ಪಷ್ಟ ಅರಿವಿರುವುದಿಲ್ಲ, ಅಂತಹ ಸಂದರ್ಭದಲ್ಲಿ ಅರ್ಚಕರು ವಿಷ್ಣು ಗೋತ್ರ ಅಥವಾ ಕಶ್ಯಪ ಗೋತ್ರ ಎಂದು ಹೇಳಿ ಸಂಕಲ್ಪ ಮಾಡಿಸುತ್ತಾರಲ್ಲ, ಹಾಗೆ ಹೇಳಿದರೆ ಅದು ನಿಜಕ್ಕೂ ದೇವರಿಗೆ ತಲುಪುತ್ತಾ ಎನ್ನುವ ಸಂಶಯ ಕಾಡುವುದು ಸಹಜ.
ಇದಕ್ಕೆ ಧರ್ಮಶಾಸ್ತ್ರವು ಅತ್ಯಂತ ವಿಸ್ಮಯಕಾರಿಯಾದ ಮತ್ತು ಹೃದಯಸ್ಪರ್ಶಿಯಾದ ಉತ್ತರವನ್ನೇ ನೀಡಿದೆ. ಯಸ್ಯ ನಾಸ್ತಿ ಕುಲಂ ಗೋತ್ರಂ ತಸ್ಯ ವಿಷ್ಣುಃ ಪ್ರಕೀರ್ತಿತಃ ಎನ್ನುತ್ತದೆ ಶಾಸ್ತ್ರವಚನ. ಅಂದರೆ ಯಾರಿಗೆ ತಮ್ಮ ಗೋತ್ರದ ಅರಿವಿಲ್ಲವೋ, ಯಾರು ತಮ್ಮ ಮೂಲ ಬೇರನ್ನು ಗುರುತಿಸಲಾರರೋ, ಅಂತಹ ಎಲ್ಲ ಜೀವಿಗಳಿಗೂ ಸಾಕ್ಷಾತ್ ಜಗದೊಡೆಯನಾದ ಶ್ರೀಮನ್ನಾರಾಯಣನೇ ಮೂಲ ಪಿತಾಮಹ. ಸೃಷ್ಟಿಯ ಸಮಸ್ತ ಜೀವರಾಶಿಗಳು ಕೊನೆಗೆ ಬಂದು ನಿಲ್ಲುವುದು ಆ ಪರಬ್ರಹ್ಮನಲ್ಲಿಯೇ. ಯಾರಿಗೆ ಲೌಕಿಕವಾಗಿ ಗೋತ್ರ ನೆನಪಿಲ್ಲವೋ, ಅವರು ಇಡೀ ಬ್ರಹ್ಮಾಂಡದ ಸೃಷ್ಟಿಕರ್ತನಾದ ವಿಷ್ಣುವಿನ ಹೆಸರನ್ನು ತಮ್ಮ ಮೂಲವೆಂದು ಸ್ವೀಕರಿಸಿ ವಿಷ್ಣು ಗೋತ್ರ ಎಂದು ಹೇಳಿದಾಗ, ಆ ಸಂಕಲ್ಪವು ಯಾವ ಅಡೆತಡೆಯೂ ಇಲ್ಲದೆ ನೇರವಾಗಿ ಪರಮಾತ್ಮನ ಪಾದಗಳನ್ನು ತಲುಪುತ್ತದೆ. ಅಲ್ಲಿ ಕೃತಕವಾದ ಮುಚ್ಚುಮರೆಗಳಿಲ್ಲ, ಕೇವಲ ಪರಿಶುದ್ಧವಾದ ಶರಣಾಗತಿಯಿದೆ. ಗೋತ್ರ ತಿಳಿದಿಲ್ಲ ಎಂಬ ಕೊರಗನ್ನು ಆ ಕ್ಷಣದಲ್ಲಿ ಪರಮಾತ್ಮನೇ ತನ್ನ ಹೆಗಲ ಮೇಲೆ ಹೊತ್ತುಕೊಳ್ಳುತ್ತಾನೆ. ಹಾಗಾಗಿ ವಿಷ್ಣು ಗೋತ್ರದಲ್ಲಿ ಮಾಡುವ ಪ್ರತಿಯೊಂದು ಸಂಕಲ್ಪವೂ ನೂರಕ್ಕೆ ನೂರರಷ್ಟು ಪೂರ್ಣ ಫಲವನ್ನು ನೀಡುವ ಪರಮ ಶ್ರೇಷ್ಠ ಆಧ್ಯಾತ್ಮಿಕ ಸಮರ್ಪಣೆಯಾಗಿದೆ.
ಜ್ಞಾನವಿಲ್ಲದ ಆಚರಣೆ ಮೂಢನಂಬಿಕೆಯಾಗಬಹುದು. ಆದರೆ ವಿಜ್ಞಾನವನ್ನೂ ಮೀರಿದ ಜ್ಞಾನದ ಅರಿವಿನೊಂದಿಗೆ ಮಾಡುವ ಪ್ರತಿಯೊಂದು ಆಚರಣೆಯೂ ಪರಮ ಸತ್ಯದ ದರ್ಶನ ಮಾಡಿಸುತ್ತದೆ. ನಮ್ಮ ಋಷಿಗಳು ರೂಪಿಸಿದ ಪ್ರತಿಯೊಂದು ಪದ್ಧತಿಯ ಹಿಂದೆಯೂ ಇಂಥದ್ದೊಂದು ಅಪ್ರತಿಮವಾದ, ಜಗತ್ತನ್ನೇ ಬೆರಗುಗೊಳಿಸುವ ಗೂಢ ಸತ್ಯ ಅಡಗಿದೆ.
ನಿಮ್ಮ ಅನಿಸಿಕೆ ಅಭಿಪ್ರಾಯಗಳನ್ನು ಕಮೆಂಟ್ ಮೂಲಕ ತಿಳಿಸಿ, ಲೇಖನ ಇಷ್ಟವಾದರೆ ಮಾತ್ರ ಲೈಕ್ & As it is ಶೇರ್ ಮಾಡಿ.
ಎಂ. ಕೃಷ್ಣಪ್ರಸಾದ್ ಭಟ್ ಮದ್ದಡ್ಕ
© 2026 M. Krishnaprasad Bhat Maddadka | All Rights Reserved.
@followers
