ನೀಳ್ಗಥೆ - ಚಂದ್ರಿಕಾ ಸುಧೀಂದ್ರ
ತುಂಬು ಶ್ರೀಮಂತರ ಮಗಳಾದ ಲಾವಣ್ಯಾ, ಹಿರಿಯರ ಆಯ್ಕೆಯಂತೆ ಧನುಷ್‌ನನ್ನು ಮದುವೆಯಾಗಿ ಸುಖೀ ಸಂಸಾರದ ಒಡತಿ ಎನಿಸಿದ್ದಳು. ಸ್ಛುರದ್ರೂಪಿ ಹೆಂಡತಿ ಇದ್ದರೂ ಸದಾ ನಿರ್ಲಿಪ್ತನಾಗಿರುತ್ತಿದ್ದ ಗಂಡನಿಗಿಂತ, ಕ್ಲಬ್‌ಗೆ ಬರುತ್ತಿದ್ದ ವೈಭವ್ ಅವಳಿಗೆ ಹೆಚ್ಚು ಆತ್ಮೀಯನೆನಿಸಿದ ?
ಆ ದಿನ ಆಶ್ರಮದಲ್ಲಿ ಸಂಭ್ರಮದ ವಾತಾವರಣ! ಕಾರಣ ಅಲ್ಲಿರುವ ಹೆಣ್ಣುಮಕ್ಕಳೆಲ್ಲರ ಪಾಲಿಗೆ ಅಮ್ಮನಾಗಿರುವ ಇಂದಿರಮ್ಮನ 60ನೇ ಹುಟ್ಟುಹಬ್ಬದ ಆಚರಣೆ. ಅವರಿಗೆ ಹುಟ್ಟುಹಬ್ಬದ ಸಂಭ್ರಮದ ಆಚರಣೆ ಇಷ್ಟವಿಲ್ಲದಿದ್ದರೂ, ಆ ಮಕ್ಕಳ ಅಭಿಮಾನ, ಪ್ರೀತಿ, ವಿಶ್ವಾಸದ ಮಮತೆಗೆ ಮಣಿದು ಅವರೆಲ್ಲರಿಗೂ ಬೇಸರವಾಗಲು ಇಷ್ಟಪಡದ ಇಂದಿರಮ್ಮ ಒಪ್ಪಬೇಕಾಯಿತು. ಸುಮಾರು ವರ್ಷಗಳಿಂದ ಅಲ್ಲಿಯೇ ಬೆಳೆದು, ಆಶ್ರಮದ ಆಗುಹೋಗುಗಳನ್ನೆಲ್ಲ ನೋಡಿಕೊಳ್ಳುತ್ತಿದ್ದ ವಿಜಯಾ, ಪ್ರೀತಿ, ಸುಮತಿ ಮೂವರೂ ಇಂದಿರಮ್ಮನ ಅನುರಾಗಕ್ಕೆ ಪಾತ್ರರಾಗಿದ್ದು ಅವರಿಗೆ ಸಹಾಯಕರಾಗಿದ್ದರೆಂದರೆ ತಪ್ಪಾಗಲಾರದು. ಎಲ್ಲರೂ ಕೂಡಿ ಅಮ್ಮನ ಹುಟ್ಟುಹಬ್ಬನ್ನು ಸಂಭ್ರಮದಿಂದ ಆಚರಿಸಲು ನಿಶ್ಚಯಿಸಿದ್ದರು.
ಪ್ರೀತಿಯ ಬಳಿ ಬಂದ ಸುಮತಿ ಅಮ್ಮ ಮೊಟ್ಟೆ ಹಾಕಿರುವ ಕೇಕ್‌ ತಿನ್ನುವುದಿಲ್ಲವೆಂದು ಅದನ್ನು ಹಾಕದೇ ಮಾಡಬೇಕೆಂದು ಆರ್ಡರ್‌ ಕೊಟ್ಟು ಬಂದಿದ್ದೇನೆ. ಎಲ್ಲರೂ ಸೇರಿ ಈ ದಿನ ಅಮ್ಮನಿಗೆ ಕೇಕ್‌ ತಿನ್ನಿಸೋಣವೆಂದಳು. ಅಷ್ಟರಲ್ಲಿ ಒಳ ಬಂದ ಆಳು ಸಿದ್ದನನ್ನು ನೋಡಿ ವಿಜಯಾ ಮುಂದುಗಡೆ ಮಾವಿನ ತೋರಣ ಸರಿಯಾಗಿ ಕಟ್ಟು, ಬಣ್ಣ ಬಣ್ಣದ ದೀಪಾಲಂಕಾರ ಮಾಡಿ, ಸ್ವಾಗತ ಫಲಕ ಬರುವಂತೆ ಮಾಡು ಎಂದಳು.
ಅಡುಗೆ ರಂಗಮ್ಮನಿಗೆ ಹೇಳಿ ಈ ದಿನ ವಿಶೇಷವಾದ ಅಡುಗೆ, ತಿಂಡಿ ಮಾಡಲು ಹೇಳಿ, ಹಾಗೇ ಇಂದಿರಮ್ಮ ಹೆಚ್ಚು ಇಷ್ಟಪಡುವ ಸಿಹಿ ತಿಂಡಿ ಮಾಡು, ಎಲ್ಲ ಶುಚಿ ಮತ್ತು ರುಚಿಯಾಗಿರಬೇಕೆಂದು ಸಲಹೆ ಕೊಡುತ್ತಿದ್ದಳು. ಹಾಗೇ ಸಮಾರಂಭದಲ್ಲಿ ಗಣ್ಯ ವ್ಯಕ್ತಿಗಳಿಗೆ ಹಾಗೂ ಅಮ್ಮನಿಗೆ ಹಾಕಲು ತಂದಿರುವ ಹಾರಗಳನ್ನೆಲ್ಲ ಮುಂದುಗಡೆಯ ದೊಡ್ಡ ಹಾಲ್‌ನಲ್ಲಿ ಜೋಡಿಸಿರಿ ಎಂದು ಆದೇಶಿಸುತ್ತಿದ್ದಳು.
ನಾವು ಅಮ್ಮನಿಗೆ ಏನೇ ಮಾಡಿದರೂ ಅದು ಕಡಿಮೆಯೇ. ನಾವು ಅನಾಥರಾಗಿದ್ದಾಗ ನಮಗೆಲ್ಲ ಆಸರೆ ನೀಡಿ, ವಿದ್ಯಾಭ್ಯಾಸ ಕೊಡಿಸಿ, ಟೈಲರಿಂಗ್‌, ಕಂಪ್ಯೂಟರ್‌ ತರಬೇತಿ ಕೊಡಿಸಿ ನಾವು ಜೀವನದಲ್ಲಿ ಒಳ್ಳೆಯವರಾಗಿ ಬಾಳಲು ಅಡಿಪಾಯ ಹಾಕಿಕೊಟ್ಟಿದ್ದಾರೆ. ನಾವು ಅವರಿಗೆ ಎಷ್ಟು ಸೇವೆ ಮಾಡಿದರೂ ಯಾವುದಕ್ಕೂ ಸರಿಸಾಟಿಯಾಗುವುದಿಲ್ಲ. ಹಾಗೆಂದು ಅಮ್ಮ ನಮ್ಮಿಂದ ಏನನ್ನೂ ಬಯಸದೇ ನಿಸ್ವಾರ್ಥ ಮನೋಭಾವದಿಂದ ನಮ್ಮನ್ನು ಸಾಕುತ್ತಿದ್ದಾರೆ. ಅವರ ಋಣದ ಭಾರ ನಮ್ಮ ಮೇಲಿದೆ.
ಪ್ರಮುಖ ವ್ಯಕ್ತಿಗಳು ಮಾತ್ರವಲ್ಲ ಕೊಡುಗೈ ದಾನಿಗಳಾದ ಬೃಹತ್‌ ಕಂಪನಿ ಮಾಲೀಕರುಗಳಾದ ಶ್ರೀಧರ್‌ ಮತ್ತು ಸಂಪತ್‌ ಇಂದು ಆಶ್ರಮಕ್ಕೆ ಆಗಮಿಸುತ್ತಿರುವುದೇ ವಿಶೇಷ. ವಿಶಾಲವಾದ ಹಾಲ್‌ನಲ್ಲಿ ಮೇಜಿನ ಮೇಲೆ ಟೇಬಲ್ ಕ್ಲಾತ್‌ ಹಾಕಿ ದೇವರ ಫೋಟೋ ಇರಿಸಿ ಬೆಳ್ಳಿ ಕಂಬಗಳಲ್ಲಿ ಎಣ್ಣೆ ಬತ್ತಿ ಹಾಕಿ ಅಮ್ಮನಿಂದ ಜ್ಯೋತಿ ಬೆಳಗಿಸುವ ಕಾರ್ಯಕ್ರಮ ಇತ್ತು. ಮತ್ತೊಂದು ಮೇಜಿನ ಮೇಲೆ ಇಂದಿರಮ್ಮ ಸಲ್ಲಿಸಿರುವ ಸೇವೆಯ ಸಾಧನೆಗೆ ಬಂದಿರುವ ಬೆಳ್ಳಿ ಪದಕಗಳು, ಪ್ರಶಸ್ತಿ ಪತ್ರಗಳನ್ನೆಲ್ಲಾ ಜೋಡಿಸಿಡಲಾಗಿತ್ತು.
